ہمت کرے انساں تو کیا ہو نہیں سکتا….

خوشی و غم اور کامیابی و ناکامی کی آنکھ مچولی زندگی بھر انسان کے ساتھ چلتی رہتی ہے، اچھے برے دن ہماری زندگی کا لازمہ ہیں، اس حوالے سے انسانی سوچ کا کردار سب سے اہم ہوتا ہے، زندگی میں ہمارے ساتھ کبھی بھی کچھ غلط نہیں ہوتا۔ اگر کچھ غلط ہوسکتا ہے تو ، صرف ہمارے نقطہ نظر۔ ہماری زندگی ایسے ہی بن جاتی ہے جیسے ہم دیکھتے ہیں۔ ناکامی، محرومی، رکاوٹ اور کمزوری جسم میں نہیں بلکہ دماغ میں ہے۔

انسان کی کامیابی یا ناکامی اس کی جسمانی اعضاء کی درستی سے ہرگز مشروط نہیں ہے۔کامیابی کے لیے ذہنی اور فکری صلاحیتوں کے ساتھ ساتھ غیر متزلزل یقین، مصمم ارادہ اور آگے بڑھنے کی صلاحیت و خواہش بہت ضروری ہوتی ہے۔ دنیا میں کم ہی سہی لیکن ایسی مثالیں موجود ہیں جن میں کسی مرد یا عورت نے بیماری یا معذوری کو اپنی راہ کی رکاوٹ نہیں بننے دیا اور بڑی بڑی کامیابیاں حاصل کرتے ہوئے دوسرے انسانوں کو حوصلہ فراہم کیا۔

نابینا خاتون ہیلن کیلرHelen Keller ہوں ، 25 سال کی عمر میں کینسر کا مریض بننے والے سائیکلسٹ لینس آرمسٹرونگ Lance Armstrong ہوں، جسمانی طور پر معذور طبیعات دان اسٹیفن ہاکنگ Stephen Hawking، ان سب ہستیوں نے شدید معذوری کے باوجود اپنی زندگی بہت پروقار طریقے سے گزاری اور انہوں نے دنیا کو بہت کچھ دیا۔

ایسی ہی ہستیوں میں پاکستان کی ایک خاتون منیبہ مزاری Muniba Mazari بھی ہیں۔ ایک روڈ ایکسیڈنٹ میں شدید زخمی ہوکر معذور ہوجانے کے باوجود منیبہ نے ہمت نہیں ہاری اور مشکلات کا مقابلہ کرتے ہوئے، دوسروں کے لیے شان دار قابلِ تقلید مثال بنیں ۔ اپنے عزم و ہمت سے منیبہ اس شعر کی عملی تفسیر بن گئیں

وہ کونسا عقدہ ہے جو وا ہو نہیں سکتا
ہمت کرے انساں تو کیا ہو نہیں سکتا

آئیے درج ذیل ویڈیو میں مبینہ مزاری کے عزم و ہمت کی کہانی ان ہی کی زبانی سنتے ہیں۔