کشورِ ظلمات

تاریکی کے دیس میں بسنے والی مخلوق کے اسرار پر مشتمل دلچسپ کہانی….

[box type=”success” align=”” class=”” width=””] ’’اندھیرا بھی روشنی ہے‘‘….
یہ حضرت قلندر بابا اولیاء رحمۃ اللہ علیہ کا فرمان ہے….
جس چیز کو ہم اندھیرا کہتے ہیں اُس میں بھی ایک وسیع دنیا آباد ہے۔ اُس دنیا میں بھی زندگی اپنے تمام رنگوں کے ساتھ حرکت میں ہے…. ہم نے چونکہ اندھیرے کو خوف کی
علامت بنا دیا ہے، اس لئے اندھیرے میں روشن یہ دنیا ہم پر منکشف نہیں ہوتی…. لیکن ایسے واقعات اکثرو بیشتر پیش آتے رہتے ہیں جب کشورِ ظلمات کے مظاہر کے ادراک
کا احساس ہونے لگتا ہے…. سائنسی علوم کے ماہرین بھی اس بات کو تسلیم کرتے ہیں کہ کائنات میں زندگی بیِشمار پیکر میں جلوہ گر ہوسکتی ہے…. سائنسی تحقیق کے مطابق
ایک زندگی وہ ہے جو ’’پروٹین اِن واٹر‘‘ کے فارمولے سے وجود میں آئی ہے۔ ہم انسان جو پروٹین اور پانی سے مرکب ہیں اپنی غذا ہائیڈروجن اور کاربن کے سالمات سے حاصل
کرتے ہیں، لیکن اگر کوئی مخلوق ’’پروٹین اِن ایمونیا‘‘ کے فارمولے پر تخلیق ہوئی ہو تو اُسے ایسی غذا کی ضرورت ہرگز نہ ہوگی جو انسان استعمال کرتے ہیں…. ممکن ہے وہ فضا
سے انرجی جذب کرکے اپنی زندگی برقرار رکھتی ہو!…. ممکن ہے کہ اُن کے جسم میں نظام ہضم کے آلات مثلاً معدہ، جگر، گردے، آنتیں وغیرہ بھی موجود نہ ہوں!…. اُن
کے جسم کی ہیئت ہمارے تصور سے بالکل ماوریٰ ہو!…. ممکن ہے کہ اُن کا جسم وزن سے بالکل آزاد ہو!…. وہ ہوا میں اُڑسکتی ہو!…. اتنی لطیف ہوکہ چشم زدن میں
ہماری نظروں سے غائب ہوجائے!…. وہ مختلف شکلیں اختیار کرسکتی ہو!…. مابعد الحیاتیات کے ماہرین خیال کرتے ہیں کہ کائنات میں ایسی مخلوق کا پایا جانا جانا
بعیدازامکان ہرگز نہیں ہے….
ظلمات کے معنی ہیں….تاریکی…. اور کشور کے معنی دیس یا وطن کے ہیں…. تاریکی کے دیس میں آباد ایک مخلوق سے متعارف کرانے والی یہ کہانی فرضی واقعات پر
مبنی ہے….  کسی قسم کی مماثلت اتفاقیہ ہوگی….[/box]

(سولہویں قسط)

فیض انکل کو کراچی سے لاہور آنے والی صبح کی کسی فلائٹ میں سیٹ نہیں مل سکی…. یہاں سے حرا نے بھی کئی جگہ فون کیے…. ایک ٹریول ایجنٹ کے پاس رات کی آخری فلائٹ میں چانس پر ایک سیٹ تھی…. حرا نے پھر فیض انکل کو فون پر اطلاع دی کہ میں نے رات کی فلائٹ میں آپ کے لئے سیٹ بک کرادی ہے…. یہ سیٹ بھی چانس پر ہے لیکن اُمید ہے کہ مل جائے گی….
پہلے تو اُس نے سوچا کہ تھکن بہت ہوگئی ہے، فیض انکل کو لینے کے لئے ڈرائیور کو بھیج دوں گی…. پھر اُس نے خود بھی جانے کا فیصلہ کرلیا اور جلدی جلدی تیار ہوکر ڈرائیور کے ہمراہ ایئرپورٹ کی جانب روانہ ہوگئی…. ایئرپورٹ پہنچ کر پتہ چلا کہ فلائٹ ایک گھنٹہ لیٹ ہے…. پھر یہ ایک گھنٹہ طویل ہوکر دو اور پھر ڈھائی گھنٹے میں تبدیل ہوگیا…. اور رات گئے کراچی سے آنے والے جہاز نے لینڈنگ کی…. کچھ دیر بعد مسافروں کے ہمراہ فیض انکل ایئرپورٹ سے باہر آئے تو حرا نے دور سے دیکھ کر اشارہ کیا…. حرا نے دیکھا کہ فیض انکل چہرے سے بہت تھکے تھکے لگ رہے ہیں…. کہیں بیمار تو نہیں ہیں اور صرف میری خاطر اُنہوں نے اتنا لمبا سفر اختیار کیا ہے….
اس نے فیض انکل کے قریب آتے ہی جرح شروع کردی…. انکل آپ کس قدر کمزور ہوگئے ہیں…. اپنا خیال رکھنا آپ نے بالکل چھوڑ دیا ہے…. ۔ نامعلوم کچھ کھاتے پیتے بھی ہیں یا وہ بھی یاد نہیں رہتا…. بس کتابیں پڑھ کر ہی پیٹ بھر لیتے ہیں‘‘….
’’ارے بھئی….۔ نہ سلام نہ دعا…. بس دیکھتے ہی بوچھاڑ شروع کردی‘‘…. فیض انکل ہنستے ہوئے بولے۔
ڈرائیور نے فیض انکل سے سوٹ کیس لے کر کار کی ڈگی میں رکھا اور جب دونوں کار کی پچھلی سیٹس پر بیٹھ گئے تو گاڑی اسٹارٹ کرکے کشادہ سڑک پر آگے بڑھا دی…. رات بہت زیادہ ہوجانے کی وجہ سے سڑکیں سنسان ہوچکی تھیں…. اِکا دُکّا گاڑیاں کبھی کبھار آتے جاتے دکھائی دے جاتیں …. پھر دور حدنگاہ تک سنّاٹا ہی سنّاٹا تھا…. کچھ دور جانے کے بعد کار نے جھٹکے لینا شروع کردئیے…. اور رفتار کم ہوتے ہوتے انجن بالکل بند ہوگیا…. ڈرائیور نے کار سائیڈ میں لگائی اور اُترکر چیک کرنے لگا…. یہ انڈسٹریل ایریا کو جانے والا شارٹ کٹ راستہ تھا، سٹرک کے دونوں اطراف کھیت تھے اور آبادی کافی فاصلے پر تھی…. اسٹریٹ لائٹس بھی کام نہیں کر رہی تھیں یعنی چاروں طرف تاریکی کا راج تھا….
ڈرائیور نے ہر چیز چیک کرلی لیکن کسی میں بھی کوئی بڑی خرابی کے آثار نظر نہیں آئے…. پھر کیا وجہ ہوسکتی ہے؟…. اُس کا ذہن بُری طرح اُلجھ کر رہ گیا…. پھر حرا اور فیض انکل بھی گاڑی سے نیچے اُتر آئے ان دونوں نے بھی اچھی طرح معائنہ کیا…. ڈرائیور نے بڑی سی ٹارچ نکال لی تھی….
فیض انکل نے گھڑی پر نگاہ ڈالی تو رات کے تین بج رہے تھے…. تینوں یہی سوچ رہے تھے کہ ایسے میں کیا کیا جائے؟…. ڈرائیور نے کار اسٹارٹ کرنے کی کوشش کی لیکن یہ کوشش کامیاب نہ ہوسکی…. فیض انکل نے حرا سے کہا ’’بھئی تم ایسا کرو کہ ڈرائیونگ سیٹ پر بیٹھو اور ہم دونوں دھکا لگاتے ہیں…. شاید کام بن جائے‘‘….
حرا نے کار کا گیئر نیوٹرل کیا…. فیض انکل اور ڈرائیور نے کار کو دھکا لگایا…. دونوں دھکا دیتے ہوئے کار کو چند گز کے فاصلے پر تولے آئے لیکن کار اسٹارٹ نہ ہوسکی….
’’شاید کار کی الیکٹرک وائرنگ میں کچھ فالٹ ہوگیا ہوگا‘‘…. ڈرائیور نے خیال ظاہر کیا
’’لیکن پھر دھکیلنے سے کیوں اسٹارٹ نہیں ہوئی؟….۔ اچھی خاصی رفتار سے چلتے چلتے اچانک بند کیوں ہوگئی تھی؟‘‘….
’’انکل ایسا کرتے ہیں ہم دونوں کار کے اندر بیٹھ جاتے ہیں اور ڈرائیور کو آبادی میں بھیج کر دیکھتے ہیں شاید کوئی مکینک مل جائے‘‘…. حرا نے کہا۔
’’مگر حرا بیٹا یہ بھی تو سوچو کہ اس وقت رات کا تین بج رہا ہے…. اس وقت کون سی دکان کھلی ہوگی؟‘‘…. فیض انکل نے کہا
’’سر جی! ایک کام ہوسکتا ہے‘‘….
’’ہاں بولو!‘‘….
’’یہاں سے تھوڑا دور ہی ہائی وے ہے…. کوئی پندرہ منٹ تک مجھے پیدل چلنا پڑے گا…. وہاں پہنچ کر مجھے کسی ٹرک سے لفٹ تو مل ہی جائے گی…. قریبی کسی پٹرول پمپ میں مکینک ضرور موجود ہوگا…. آپ لوگ کار کا شیشہ بند کرکے آرام سے بیٹھیں…. بس میں یوں گیا اور یوں آیا‘‘….۔
’’ایسا لگتا ہے کہ آج ہماری صبح انہی کھیتوں کے درمیان ہوگی…. ویسے انکل بہت دلکش منظر ہوتا ہوگا‘‘…. حرا نے اپنے اندر کی گھبراہٹ پر پردہ ڈالتے ہوئے کہا…. نجانے کیوں اُس کا دل بہت تیزی سے دھڑک رہا تھا…. وہ دونوں کار کی ہیڈ لائٹس کی روشنی میں ڈرائیور کو جاتا ہوا دیکھتے رہے…. ڈرائیور خاصی دور جاکر دائیں جانب مُڑگیا…. یہ راستہ ہائی وے کو جاتا تھا۔
فیض انکل کو احساس ہوگیا تھا کہ حرا خوف محسوس کر رہی ہے اس لئے اُنہوں نے اِدھر اُدھر کی باتیں شروع کردیں…. باتوں باتوں میں اُنہیں پتہ ہی نہیں چلا کہ ایک گھنٹہ گزر گیا ہے…. اس دوران اچانک حرا خاموش ہوکر کچھ سننے کی کوشش کرنے لگی…. ’’انکل! آپ سن رہے ہیں؟‘‘….
’’ہوں!‘‘….۔
’’ڈرائیور کیا تانگے پر آرہا ہے؟‘‘….
’’ہوسکتا ہے!‘‘….
’’لیکن سامنے سے تو یہ آواز نہیں آرہی ہے…. دائیں بائیں تو کھیت ہیں…. پیچھے سے؟…. لیکن ڈرائیور تو سامنے کی طرف گیا ہے‘‘….
’’ہاں! وہ تو‘‘….
پھر گھوڑا گاڑی کی کھٹ کھٹ قریب آتی گئی…. ابھی وہ دونوں آواز کی سمت کے حوالے شش و پنج میں ہی تھے کہ یکدم اندھیرا سا چھا گیا…. لیکن اس اندھیرے کی کیفیت بالکل عجیب ہی تھی…. کار کی ہیڈ لائٹس روشن تھیں اور اردگرد ملگجی سی روشنی بھی پھیلی ہوئی تھی…. لیکن ایک اندھیرا سا غالب ہوگیا تھا…. وہ دونوں یہ سوچ رہے تھے کہ نامعلوم یہ ہمارا احساس ہے یا پھر حقیقت میں ایسا ہی ہوا ہے…. اسی کیفیت میں اُنہوں نے دیکھا کہ ایک دیوہیکل گھوڑا گاڑی سامنے کھڑی ہے جس پر پولیس کی یونیفارم کی طرز کا لباس پہنے انتہائی عظیم البحثّہ افراد بیٹھے ہیں گھوڑا گاڑی کی اگلی سیٹ پر بیٹھے ہوئے ایک آدمی نے پیچھے بیٹھے ہوئے آدمی سے کچھ بات چیت کی…. اور پھر وہ اُترکر اُن کے پاس آگیا، اُس کا قد کوئی گیارہ بارہ فٹ کے لگ بھگ ہوگا….
’’تمہارا نام حرا ہے؟‘‘….۔
’’ہاں!…. مگر تم کون ہو؟‘‘…. حرا نے گھگھیاتے ہوئے کہا۔
’’آپ کو ہمارے ساتھ چلنا ہوگا‘‘….۔
’’کیوں؟…. اور تم نے یہ نہیں بتایا کہ تم کون ہو؟‘‘….
’’ابھی ہم تفصیل نہیں بیان کرسکتے…. لیکن ہم آپ کے دشمن نہیں ہیں…. اگر آپ چلنے کے لئے تیار نہیں ہوں گی تو پھر شاید ہمیں زبردستی آپ کو لے جانا پڑے گا‘‘….
’’کیا تمہارا تعلق نوعِ اجنّہ سے تو نہیں ہے؟‘‘…. فیض انکل نے سوال کیا، وہ اب تک ان لوگوں کا جائزہ لے رہے تھے….
’’جی ہاں!‘‘….
’’کیا تم حضرت عمرام سے واقف ہو؟‘‘….۔
’’جی! وہ ہمارے محترم بزرگ ہیں‘‘….۔
’’وہ اللہ والے بزرگ ہیں!…. میری اُن سے ملاقات ہوچکی ہے…. یہ قیامِ پاکستان سے پہلے کی بات ہے…. اُس وقت میں دہلی میں مقیم تھا…. وہ شاہی مسجد کے ایک ستون کے پاس مجھے ملا کرتے تھے…. اُنہوں نے مجھ سے کہا تھا کہ اگر میرے بارے میں تم نے کسی کو بتادیا تو پھر ہماری تمہاری ملاقات نہیں ہوسکے گی…. تین چار برس تک ہر جمعے وہ اسی جگہ نظر آتے تھے….۔ عجیب بات ہے کبھی میں نے اُن سے کوئی فرمائش نہیں کی…. جیسے عام لوگ سوچتے ہیں کہ کوئی جن مل جائے تو خزانہ مانگ لیں گے، یا پھر کچھ اور…. وہ مجھے بتاتے تھے کہ کائنات کس طرح تخلیق ہوئی…. مکلف مخلوقات کو ن کون سی ہیں…. اور نجانے کیا کیا…. کبھی وہ حضور پاکﷺ کی شخصیت کے بارے میں ایسی راز کی باتیں بھی بتایا کرتے جو عام طور پر سیرت کی کتابوں میں درج نہیں ہوتیں اور نہ ہی موعظین کی زبانی سننے کو ملتی ہیں….
’’انکل…. یہ لوگ کہہ رہے ہیں کہ مجھے زبردستی لے جائیں گے…. اور آپ نجان کون سی باتیں لے کر بیٹھ گئے…. کچھ کیجئے…. کچھ سوچئے…. یہ کیا کر رہے ہیں آپ‘‘….۔ حرا نے فیض انکل کو بازوئوں سے جھنجھوڑنے کے بعد سرگرشیوں میں کہا….
’’بات کرنے دو…. ممکن ہے یہ لوگ ہمارے ہمدرد ہوں‘‘…. فیض انکل نے بھی آہستگی سے کہا۔
’’انکل آپ کو ڈر نہیں لگ رہا ہے؟‘‘….۔
’’آدمی کو ڈرنے کے لئے اُس کی اپنی ذات ہی کافی ہے…. کیونکہ یہ اُ س کی حرص ہی تو ہوتی ہے جو اُسے ایسی جگہ لے جاکر ڈبوتی ہے کہ پھر وہ لاکھ ہاتھ پیر مارلے باہر نہیں نکل سکتا‘‘….۔
’’کیا ہوگیا ہے انکل آپ کو‘‘….
’’جلدی کیجئے ہمارے پاس وقت نہیں ہے‘‘….۔ وہ عظیم البحثّہ سپاہی بولا۔
’’بھئی میں تمہیں حضرت عمرام سے اپنے تعلق کے بارے میں بیان کر رہا تھا….۔ یہ میری بے وقوفی تھی کہ میں نے اپنی اماں کو اُن کے بارے میں بتادیا اور پھر وہ مجھے کبھی نہیں ملے…. جب تم اُن کا احترام کرتے ہو تو میں بھی اُن کا ایک عقیدت مند ہوں…. تم اُن کا لحاظ کرکے بھی مجھے اس معاملے کی حقیقت نہیں بتائو گے‘‘….
گھوڑے گاڑی پر بیٹھے ہوئے افراد میں سے ایک نے جو اِن کا افسر معلوم ہوتا تھا…. آواز لگائی…. اُسے شاید بہت جلدی تھی…. چنانچہ اُن کی کار کے سامنے کھڑا سپاہی اپنے افسر کے پاس گیا اور کچھ دیر بات کرتا رہا…. تھوڑی دیر بعد وہ افسر کار کے سامنے آکر رُک گیا….۔ اور بڑے ادب سے سرجھکا کر سلام کیا اور عاجزانہ انداز میں بولا ’’میں معذرت خواہ ہوں…. مجھے معلوم نہیں تھا کہ آپ حضرت عمرام کے عقیدت مند ہیں اور ان سے فیض یافتہ بھی ہیں…. دراصل بات یہ ہے کہ ہماری نوع کا ایک شرپسند گروہ حرا صاحبہ کواغواء کرنا چاہتا ہے‘‘….۔
’’کیوں؟‘‘….۔ حرا تقریباً چیخ پڑی۔
’’اُن کے مقاصد کیا ہیں؟‘‘….۔ فیض انکل نے پوچھا۔
’’محترم! مجھے اب آپ کو پوری تفصیل بتادینی چاہئے…. اصل بات یہ ہے کہ آگیا بتیال کے ایک اہم اور ذمہ دار رکن پر ہماری عدالت میں مقدمہ چل رہا تھا….۔ نوعِ انسانی کا ایک مضبوط گواہ ہماری حکومت نے پیش کردیا تھا اور قریب تھا کہ اُس ملزم سے ہم بہت کچھ اُگلوالیتے اور پھر ناصرف اُسے سزائے موت ہوجاتی بلکہ کچھ ایسے لوگوں کو بھی یہ سزا ملتی جو ہمارے ہاں شرفاء کا لبادہ اوڑھے شرپسند گروپ کو درپردہ سپورٹ کرتے ہیں‘‘….
’’تو اُس گواہ کا مجھ سے کیا تعلق؟‘‘….۔ حرا نے سوال کیا اور پھر کچھ سوچتے ہوئے بولی ’’کہیں وہ….؟‘‘….۔
’’محترمہ میں سب کچھ بتارہا ہوں…. نوعِ انسانی سے تعلق رکھنے والے وہ اس گواہ عمر صاحب ہیں….۔ اور نوعِ اجنّہ کے اس ملزم کا نام عنبر ہے…. عنبر آگیا بتیال کا سرکردہ رکن ہے…. اور اس نے اس گروپ کی بہت سی تخریبی کارروائیوں میں حصّہ لیا ہے‘‘….۔
’’تو عمر زندہ ہے؟…. انکل دیکھا میرا دل کہتا تھا نا کہ عمر زندہ ہے…. عمر زندہ ہے‘‘….۔ اور یہ کہہ کر حرا پھوٹ پھوٹ کر رونے لگی….۔
’’محترمہ…. عمر صاحب ہماری حفاظت میں ہیں…. دراصل عنبر ہماری قید سے فرار ہوگیا ہے…. اُس کے شرپسند ساتھی جیل پر حملہ کرکے اُسے آزاد کراکے لے گئے…. چنانچہ اُس مقدمے کی کارروائی مؤخر کرنی پڑی…. اور عمر صاحب کو عدالت نے اس وقت تک عالمِ جنات میں رُکنے کا حکم دیا ہے جب تک کہ عنبر گرفتار نہیں ہوجاتا…. اس لئے کہ اگر انہیں نوعِ انسانی میں واپس بھیج دیا جاتا تو پھر یہاں اُن کی حفاظت کرنا ہمارے لئے ممکن نہیں تھا…. عمر کی گواہی پر ہی عنبر کو سزا ہوسکتی ہے‘‘….۔
’’لیکن حرا سے عنبر کی تو میرا خیال ہے کوئی دشمنی نہیں ہوسکتی‘‘….۔فیض انکل نے کہا۔
’’محترم! وہ لوگ شر کے نمائندے ہیں…. ایسی ایسی چالیں چلتے ہیں کہ آپ جیسے شریف لوگ سوچ بھی نہیں سکتے…. دراصل ان کا منصوبہ یہ ہے کہ وہ حرا صاحبہ کو اغواء کرکے عمر کو بلیک میل کریں…. ہماری ریاست کے افسران بالا نے حرا صاحبہ کی سیکیورٹی پر کئی جن معمور کر رکھے تھے…. وہ دن رات ان کی حفاظت کر رہے تھے….اس سلسلے میں ان کا تین شرپسند جنات سے مقابلہ بھی ہوا اور اس مقابلے میں وہ مارے گئے‘‘….
’’کیا کتوں کی جلی ہوئی لاشیں!…. کیا وہ شرپسند جنات تھے؟‘‘…. فیض انکل نے پوچھا
’’جی بالکل! آپ نے صحیح پہچانا…. لیکن کل اُنہوں نے ہمارے ایک تجربہ کار سیکیورٹی افسر کو شہید کردیا ہے‘‘….
’’درخت کے جلنے کا واقعہ؟…. کیا؟!؟‘‘….
’’جی آپ بالکل صحیح سمجھے…. ہمارے سینئر افسر اُسی درخت پر مقیم تھے….ا ن شرپسندوں کے پاس تخریب کی کوئی زبردست طاقت یا ہتھیار موجود ہے…. اس لئے حرا صاحبہ کو اُن شرپسندوں کے چنگل سے محفوظ رکھنے کا ہمارے پاس یہی راستہ باقی رہ جاتا ہے کہ ہم انہیں کچھ عرصے کے لئے عالمِ جنات میں منتقل کردیں‘‘….
’’کیا ایسا ممکن ہے کہ آپ مجھے بھی اپنے ہمراہ لے چلیں‘‘…. فیض انکل نے پوچھا۔
’’فیض انکل…. کیا کہہ رہے ہیں…. ان لوگوں کو ٹالنے کی کوشش کریں‘‘….۔
’’نہیں بیٹا…. یہ لوگ ہمارے ہمدرد ہیں…. ہمارے دشمن نہیں ہیں‘‘….۔
’’مگر؟!؟‘‘….
’’دیکھئے محترمہ آپ اگر خوشی خوشی ہمارے ساتھ چلیں گی تو آپ کو کوئی تکلیف نہیں ہوگی ورنہ ہم اپنے افسرانِ بالا کے تابع فرمان ہیں…. حکم عدولی میں کسی قسم کی کوتاہی پر ہمیں سخت ترین سزا بھی مل سکتی ہے‘‘….۔
’’کیا میری عمر کے ساتھ ملاقات ہوسکے گی؟‘‘…. حرا نے پوچھا۔
’’جی ہاں!…. عمر صاحب حضرت عمرام کے گھر مقیم ہیں…. میری معلومات کے مطابق تو حضرت عمرام کی پوتی قسطورہ صاحبہ سے تو شاید آپ مل چکی ہیں‘‘….
’’ہاں!…. قسطورہ!…. مجھے یاد آگئی‘‘….۔
’’یعنی ہم یہاں سے سیدھے حضرت عمرام کی خدمت میں پہنچیں گے؟‘‘…. فیض انکل نے پوچھا۔
’’جی ہاں!‘‘….
’’انکل مجھے بہت ڈر لگ رہا ہے‘‘….۔ حرا نے کہا
’’بیٹا! جیسے جیسے وقت گزرے گا تمہارا ڈر ختم ہوتا جائے گا‘‘…. یہ کہہ کر فیض انکل جنات کے افسر سے مخاطب ہوئے ’’بھئی تم نے یہ نہیں بتایا کہ تم مجھے اپنے ہمراہ لے چلو گے کہ نہیں‘‘….۔
’’دیکھئے میں اس سوال کے جواب میں ہاں یا ناں نہیں کہہ سکتا….۔ اس لئے کہ ہم صرف تابع فرمان لوگ ہیں…. ہمیں حکم ہوا کہ حرا صاحبہ کو لے آئیں…. لیکن چونکہ آپ حضرت عمرام کے عقیدت مند ہیں اور صاحبِ علم معلوم ہوتے ہیں، اس لئے آپ کا احترام کرتے ہوئے اتنا ضرور کریں گے کہ آپ کو اپنے ہمراہ عالمِ جنات میں اپنی ریاست کے داخلی دروازے تک لے چلیں….وہاں پہنچ کر اگر آپ کو داخلے کی اجازت مل گئی تو ٹھیک ہے ورنہ ہم اس قابل نہیں کہ کسی کی سفارش کرسکیں…. پھر ہم آپ کو اسی جگہ واپس چھوڑ جائیں گے‘‘….
’’چلو بھئی قسمت آزمانے میں کیا حرج ہے؟‘‘…. فیض انکل نے خوش دلی سے کہا۔
پھر اس جن افسر نے اپنے سپاہیوں سے اپنی زبان میں کچھ کہا، جسے حرا اور فیض انکل بالکل نہیں سمجھ سکے…. ایک سپاہی نے گاڑی کے کسی لیور کو گھمایا تو ذرا دیر میں چار سیٹوں کی گاڑی میں دو سیٹوں کا اضافہ ہوگیا…. حرا نے ڈرتے ڈرتے گاڑی کے پائیدان پر قدم رکھا اور اوپر چڑھ کر بیٹھ گئی…. اُس کے دل کی دھڑکن بہت تیز ہوگئی تھی…. فیض انکل اُس کے برابر میں بیٹھ گئے…. آگے بیٹھے سپاہی نے گھوڑوں کو اشارہ کیا اور گھوڑوں نے دوڑنا شروع کردیا…. پھر دیکھتے ہی دیکھتے گاڑی اس قدر تیز ہوگئی کہ اردگرد کے مناظر کا کچھ پتہ ہی نہیں چل رہا تھا…. اتنی تیز رفتار کے باوجود اُن کے جسموں پر اس رفتار کا کچھ اثر نہیں ہورہا تھا….

(جاری ہے)

جولائی 2004ء

تاریکی کے دیس میں بسنے والی مخلوق کے اسرار پر مشتمل دلچسپ کہانی….

[box type=”success” align=”” class=”” width=””] ’’اندھیرا بھی روشنی ہے‘‘….
یہ حضرت قلندر بابا اولیاء رحمۃ اللہ علیہ کا فرمان ہے….
جس چیز کو ہم اندھیرا کہتے ہیں اُس میں بھی ایک وسیع دنیا آباد ہے۔ اُس دنیا میں بھی زندگی اپنے تمام رنگوں کے ساتھ حرکت میں ہے…. ہم نے چونکہ اندھیرے کو خوف کی
علامت بنا دیا ہے، اس لئے اندھیرے میں روشن یہ دنیا ہم پر منکشف نہیں ہوتی…. لیکن ایسے واقعات اکثرو بیشتر پیش آتے رہتے ہیں جب کشورِ ظلمات کے مظاہر کے ادراک
کا احساس ہونے لگتا ہے…. سائنسی علوم کے ماہرین بھی اس بات کو تسلیم کرتے ہیں کہ کائنات میں زندگی بیِشمار پیکر میں جلوہ گر ہوسکتی ہے…. سائنسی تحقیق کے مطابق
ایک زندگی وہ ہے جو ’’پروٹین اِن واٹر‘‘ کے فارمولے سے وجود میں آئی ہے۔ ہم انسان جو پروٹین اور پانی سے مرکب ہیں اپنی غذا ہائیڈروجن اور کاربن کے سالمات سے حاصل
کرتے ہیں، لیکن اگر کوئی مخلوق ’’پروٹین اِن ایمونیا‘‘ کے فارمولے پر تخلیق ہوئی ہو تو اُسے ایسی غذا کی ضرورت ہرگز نہ ہوگی جو انسان استعمال کرتے ہیں…. ممکن ہے وہ فضا
سے انرجی جذب کرکے اپنی زندگی برقرار رکھتی ہو!…. ممکن ہے کہ اُن کے جسم میں نظام ہضم کے آلات مثلاً معدہ، جگر، گردے، آنتیں وغیرہ بھی موجود نہ ہوں!…. اُن
کے جسم کی ہیئت ہمارے تصور سے بالکل ماوریٰ ہو!…. ممکن ہے کہ اُن کا جسم وزن سے بالکل آزاد ہو!…. وہ ہوا میں اُڑسکتی ہو!…. اتنی لطیف ہوکہ چشم زدن میں
ہماری نظروں سے غائب ہوجائے!…. وہ مختلف شکلیں اختیار کرسکتی ہو!…. مابعد الحیاتیات کے ماہرین خیال کرتے ہیں کہ کائنات میں ایسی مخلوق کا پایا جانا جانا
بعیدازامکان ہرگز نہیں ہے….
ظلمات کے معنی ہیں….تاریکی…. اور کشور کے معنی دیس یا وطن کے ہیں…. تاریکی کے دیس میں آباد ایک مخلوق سے متعارف کرانے والی یہ کہانی فرضی واقعات پر
مبنی ہے….  کسی قسم کی مماثلت اتفاقیہ ہوگی….[/box]

(پندرہویں قسط)

حرا کار کی چابیاں سنبھالتی ہوئی باہر نکلی اور گاڑی اسٹارٹ کرکے، تیزی کے ساتھ ویئر ہائوس کے سامنے جاپہنچی…. ایڈمن آفیسر نجم بھی وہاں موجود تھا…. اس نے حرا کو دیکھا تو پیر پٹخ کر رہ گیا….
فائر بریگیڈ کے عملے نے جان توڑ کوشش کے بعد ویئر ہائوس میں اسٹور کئے ہوئے بنڈلوں کی بڑی تعداد کو نذرِ آتش ہونے سے بچالیا…. ایڈمن آفیسر اس بات پر مصر تھا کہ آگ شارٹ سرکٹ کے باعث لگی ہے…. حرا نے ایڈمن آفیسر کی بات کا کوئی جواب نہیں دیا لیکن اپنے چہرے کے تاثرات سے یہ بھی ظاہر نہیں ہونے دیا کہ وہ اُس کی بات سے متفق نہیں ہے۔
اُس نے پورے ویئرہائوس کا اچھی طرح جائزہ لیا…. فی الوقت تو اُسے کچھ سمجھ میں نہیں آسکا…. چنانچہ اُس نے ہدایت دی کہ کل تک کسی بھی چیز کو اِدھر سے اُدھر نہ کیا جائے…. اگلے روز صبح ہی صبح اُس نے فوٹو گرافر کو بلوالیا…. فوٹوگرافر نے مختلف زاویوں سے تصاویر اُتاریں اور دو ڈھائی گھنٹوں میں پازیٹیو اُس کو پیش کردئیے….۔ انشورنس کمپنی کے نمائندے نے بھی ویئر ہائوس کا جائزہ لیا تھا…. اور اُن کے فوٹوگرافر نے تصاویر بھی اُتاری تھیں…. اُس نے انشورنس کے نمائندے سے درخواست کی تھی کہ آپ کے فوٹو گرافر کی تصاویر بھی مجھے درکار ہیں…. شام تک وہ تصاویر بھی آگئیں….حرا کافی دیر تک تمام تصاویر کا جائزہ لیتی رہی….۔ اُسے سخت تھکن محسوس ہو رہی تھی۔ اُس نے تمام تصاویر اکھٹی کیں اور میز کی دراز میں رکھ کر جب دراز بند کرنے لگی تو اوپر رکھی ہوئی تصویر کو دیکھ کر اُس کے ذہن میں ایک جھماکہ ہوا….۔
اُس نے فوراً اُس تصویر کو نکالا اور بغور دیکھنے لگی…. اب اُسے احساس ہوا کہ وہ اصل معاملے کی تہہ تک پہنچ جائے گی۔
یہ تصویر انشورنس کمپنی کے فوٹو گرافر نے اُتاری تھی…. حرا نے جس فوٹو گرافر سے تصویریں بنوائی تھیں اُس کی رہنمائی یقینا ایڈمن آفیسر نے ہی کی ہوگی….۔ اس لئے کہ جب حرا نے فوٹو گرافر کو ویئر ہائوس بھجوایا تھا فوراً ہی ایڈمن آفیسر نے انٹرکام پر اُس سے رابطہ کرکے اعتراضات کی بھرمار کر دی تھی….
میڈم! یہ انشورنس کمپنی کا کام ہے…. جب انشورنس کمپنی سے ہمارا سارا نقصان پورا ہوجائے گا تو ہم بلاوجہ اُن کے لئے شک کی بنیادیں کیوں استوار کریں!….میڈم!…. ابھی بھی وقت ہے…. اگر کہیں اِس وقت انشورنس کمپنی کا نمائندہ آگیا تو معاملہ گڑ بڑ ہوجائے گا…. میڈم! میں فوٹوگرافر کو منع کردوں…. اُس کے آنے جانے کا کرایہ میں اپنی جیب سے دے دوں گا!….۔
’’نجم صاحب! مجھے دو گھنٹے کے اندر اندر فوٹو گرافس چاہئیں!‘‘…. حرا نے یہ کہہ کر فون بند کردیا…. پھر اُس کے ذہن میں یہ خیال آیا کہ کیوں نہ انشورنس کمپنی والوں سے بات کرکے اُن کی اُتاری ہوئی تصاویر بھی حاصل کی جائیں…. اگر کوئی گڑبڑ ہے تو وہ سامنے آجائے گی…. اور اگر ایسی کوئی بات نہیں ہے تو شک دُور ہوجائے گا….
انشورنس کمپنی کے نمائندے سے اُس نے فون پر بات کی تو معلوم ہوا کہ وہ فیض انکل کے دوست ضمیر صاحب ہیں…. حرا نے تصاویر کے لئے کہا تو وہ بخوشی راضی ہوگئے…. حرا نے کہا کہ یہ تصاویر اُس کو اس طرح بھیجی جائیں کہ آفس میں کسی کو اس کی بھنک بھی نہ لگے، لہٰذا اُنہوں نے کورئیر سروس کے ذریعے تصاویر بھجوائیں جو حرا کو شام تک وصول ہوگئیں۔ حرا نے ضمیر صاحب کو فون ملایا…. ’’ضمیر صاحب! اگر آپ مناسب سمجھیں تو مجھے آپ کی رپورٹ کی بھی ایک کاپی چاہئے…. یہ میں Unofficially درخواست کر رہی ہوں…. آپ یا آپ کی کمپنی جو بھی فیصلہ کرے گی میں اُس پر بالکل اثرانداز نہیں ہوں گی….۔ بلکہ ممکن ہے کہ اس طرح آپ کی کمپنی کا فائدہ بھی ہوجائے‘‘….
’’بھئی تم میری بیٹی کی طرح ہو…. میں تمہیں انکار نہیں کرسکتا…. مجھے ایسا لگتا ہے کہ تم کسی پریشانی میں مبتلا ہو…. اگر مناسب سمجھو تو مجھ سے ڈسکس کرلو ، شاید میں تمہاری کچھ مدد کرسکوں‘‘…. ضمیر صاحب نے کہا
’’ضمیر صاحب مجھے آپ کی ہیلپ کی ضرورت یقینا پڑے گی…. لیکن پہلے میں خود کسی نتیجے پر پہنچ جائوں…. تو آپ کل رپورٹ بھجوا رہے ہیں‘‘….
’’رپورٹ بننے میں تو ابھی ایک ہفتہ لگ جائے گا…. لیکن تمہیں کس قسم کی معلومات درکار ہیں؟…. مجھے بتائو میں کل تمہیں فیکس کردوں گا‘‘….
حرا نے کچھ سوالات ضمیر صاحب کو لکھوادئیے پھر اس نے کراچی میں ڈائریکٹر صاحب کو فون پر اب تک کی تمام تفصیلات بتائیں۔ اُنہوں نے کہا کہ حرا تم فکر نہ کرو ہم تمہارے ساتھ ہیں…. پھر اُس نے فیض انکل سے بات کی…. اپنے خدشات کے حوالے سے اُس نے فیض انکل کی رائے لی تو فیض انکل نے کہا ’’اگر آدمی کو یہ یقین ہو کہ وہ حق پر ہے اور اُس کا دل بھی گواہی دے رہا ہو تو پھر اُسے ڈٹ جانا چاہئے…. نتیجہ تو اللہ کے اختیار میں ہے‘‘….۔
حرا نے فیض انکل کو بتایا ’’انکل اب تک تسلسل سے کئی واقعات سامنے آئے ہیں…. سیکورٹی گارڈ کا بے ہوش ہونا…. پھر اُس کی یادداشت ختم ہوجانا…. یہ بات تو طے ہے کہ ایڈمن آفیسر اور ویئرہائوس انچارج آپس میں ملے ہوئے ہیں…. ممکن ہے مزید افراد بھی ان کے ساتھ شامل ہوں…. کل یا پرسوں تک کوئی واضح صورتحال سامنے آجائے گی…. لیکن ان واقعات میں ایک نہایت واقعہ عجیب اور تسلسل سے بالکل الگ معلوم ہوتا ہے‘‘….
’’ہاں بتائو!‘‘…. فیض انکل نے کہا
’’چند روز پہلے آدھی رات گزرنے کے بعد کتے بہت زیادہ شور کرنے لگے تھے…. وہ عجیب و غریب انداز سے بھونکتے تھے…. جس طرح وہ کسی مشکوک آدمی کو دیکھ کر بھونکتے ہیں…. ایسا انداز نہیں تھا…. بلکہ ایسا لگ رہا تھا کہ جیسے وہ بہت خوفزدہ ہوں…. پھر دو کتوں کی یکے بعد دیگرے جلی ہوئی لاشیں ملی…. اس میں عجیب اور حیرت انگیز بات یہ ہے کہ یہ لاشیں جہاں جلی ہوئی پائی گئیں…. وہاں اردگرد بلکہ دُور دُور تک آگ کیا چنگاری کا نام و نشان تک نہیں تھا…. ایسا لگتا تھا کہ ان جلی ہوئی لاشوں کو کوئی بڑی احتیاط کے ساتھ رکھ گیا ہے۔ سیکیورٹی انچارج شوکت کا خیال تھا کہ شاید شرارتی لڑکوں نے پاگل کتے کو مارنے کے بعد جلادیا ہو لیکن بعد میں اُس نے گرائونڈ میں کھیلنے والے بچوں سے معلومات کرائیں تو اس خیال کی تصدیق نہیں ہوسکی…. پھر اگر کتے کو مار کر جلایا گیا ہوتا تو اردگرد کہیں نہ کہیں تو آگ کا نشان تو ضرور ہوتا…. ایسا کچھ نہ تھا…. چونکہ دوسرا مسئلہ اس قدر شدّت کے ساتھ سامنے آیا کہ میں ان واقعات کو بھول ہی گئی تھی…. آج آپ سے بات ہوئی تو ابھی یہ سب کچھ یاد آیا ہے‘‘….
’’بیٹا ابھی تم ویئر ہائوس کا کیس پوری توجہ کے ساتھ حل کرو…. پھر اگر ایسی کوئی بات ہو تو اُسی روز مجھے بتانا…. اور ہاں اپنا خیال رکھنا!‘‘…. پھر دعائوں کے ساتھ فیض انکل نے فون بند کردیا….
انشورنس کمپنی کے فوٹو گرافر کی اُتاری گئیں کئی تصاویر کو دیکھ کر یہ شک شدّت کے ساتھ اُبھر رہا تھا کہ ایکسپورٹ کئے جانے والے ہزاروں بنڈلوں میں تین چار سو کے قریب بنڈلوں کو الگ کیا گیا اور پھر اُنہیں نیچے رکھ کر آگ لگادی گئی…. جس سے دوسرے بنڈلوں نے بھی آگ پکڑلی…. ساتھ ہی ایک بڑا ستون تھا جس پر الیکٹرک سوئچ بورڈ نصب تھا….۔ وہ سوئچ بورڈ اور جلے ہوئے کچھ تار جلے ہوئے بنڈلوں کی راکھ پر پائے گئے…. اگر شارٹ سرکٹ ہوتا تو بجلی کے تاروں میں آگ لگ جاتی اور تاروں کی آگ سے سب سے پہلے ہزاروں بنڈلوں کی لاٹ میں سے سب سے اوپر رکھے گئے بنڈلوں میں آگ لگتی…. اس لئے کہ چھت پر لگے بجلی کے تاروں کا اُن سے فاصلہ محض تین چار فٹ ہوگا…. لیکن آگ ستون کے قریب رکھے ہوئے بنڈلوں میں لگی تھی…. جنہیں یقینا کسی نے جان بوجھ کر نیچے رکھا تھا….
اگلے روز دس بجے تک ضمیر صاحب کا فیکس بھی آگیا…. اُن کے تجزئیے کے مطابق آگ رات کے بارہ بجے سے ساڑھے بارہ بجے کے درمیان کسی وقت لگی ہے…. آگ نے دائیں سے بائیں کی طرف پھیلنا شروع کیا…. اور آگ کے شعلوں کی بلندی چار فٹ تک تھی…. حرا نے ضمیر صاحب کا فون پر شکریہ ادا کیا…. پھر ایک درخواست کی کہ کیا وہ کسی لیبارٹری سے جلے ہوئے بنڈلوں کی راکھ کا Analysis کرواکر رپورٹ آج ہی دے سکتے ہیں؟….
اُنہوں نے کہا ’’دیکھو بھئی…. ہونے کو تو سب کچھ ہوسکتا ہے…. راکھ کے نمونے میں نے بھی لئے تھے اور اُنہیں لیبارٹری بھجوادیا تھا…. ان کی رپورٹ تو دو تین روز میں ہی مل سکے گی…. لیکن ایک طریقہ یہ ہے کہ اگر تم الگ سے راکھ کا نمونہ بھجوادو تو میں ایک گھنٹے میں ہی تمہارے لئے رپورٹ نکلواسکتا ہوں….۔ بس کچھ رقم زیادہ خرچ ہوجائے گی‘‘….
’’ضمیر صاحب آپ خرچے کی فکر نہ کریں…. بس یہ کام آج ہی فائنل ہوجائے تو آپ کی عنایت ہوگی‘‘….
’’ارے یہ کیسی غیروں کی سی باتیں کر رہی ہو…. بھئی فیض میرا بہت اچھا دوست ہے…. ۔ ابھی کل رات ہی میری اُس سے بات ہوئی ہے…. تم میری بیٹی کی طرح ہو…. بلکہ تم آج رات کو گھر آئو میں تمہیں اپنی فیملی سے ملوائوں گا…. تمہارا دل بھی بہل جائے گا…. میرے دو بیٹے شادی شدہ ہیں اُن کے بچے ہیں…. اور میری ایک بیٹی ندا ابھی کالج میں پڑھ رہی ہے…. بڑا بھرا پُرا گھر ہے…. ماشاء اللہ خوب رونق رہتی ہے…. ندا تو تم سے مل کر بہت خوش ہوگی‘‘….۔ ’’میں ضرور آئوں گی انکل!…. لیکن ابھی یہ کیس حل ہوجائے‘‘….
’’کیس جب تمہارے ہاتھ میں اللہ نے دیا ہے تو یقینا اس کا حل بھی ہوجائے گا‘‘….
حرا نے ضمیر صاحب سے فون پر بات کرنے کے بعد سیکیورٹی انچارج شوکت کو بلوایا اور اُس سے کہا کہ وہ ویئر ہائوس سے تھوڑی سی راکھ پلاسٹک کی تھیلی میں لے کر ضمیر صاحب کے پاس اُن کے آفس پہنچ جائے۔
تھوڑی دیر کے بعد شوکت نے فون پر بتایا کہ ’’ویئر ہائوس کی تو راتوں رات صفائی ہوگئی ہے…. صبح کراچی کے لئیق صاحب کو ایڈمن آفیسر نے چارج بھی دے دیا ہے‘‘….
’’تم یہ معلوم کروائو کہ جلی ہوئی راکھ کہاں پھنکوائی گئی ہے؟‘‘….
’’میڈیم جی! معلوم کیا کروانا ہے…. مجھے معلوم ہے کہ کچرا کہاں ڈالا جاتا ہے…. بس یہ دعا کریں کہ وہاں سے سٹی گورنمنٹ کے ٹرک نے کچرا نہ اُٹھا لیا ہو ورنہ ہمیں کچھ نہیں ملے گا‘‘….۔
’’اللہ مالک ہے…. اب تم ایسا کرنا کہ کئی جگہ سے راکھ لینا…. یعنی کئی تھیلیاں بنالینا…. اس لئے اب تو سب آپس میں مکس ہوگئی ہوگی‘‘….
’’جی ایسا ہی کروں گا‘‘…. پھر وہ اپنے کام میں لگ گئی…. کچھ دیر بعد اُس کی سیکریٹری نے اطلاع دی کہ ایڈمن آفیسر نجم صاحب آپ سے ملنا چاہتے ہیں….
’’لیکن!…. چلو اچھا بھیج دو‘‘…. حرا نے کہا
ایڈمن آفیسر آتے ہی بڑبڑانے لگا ’’میڈم جی! یہ کراچی سے جو لئیق صاحب آئے ہیں یہ ہمارے ہاں نہیں چل سکتے…. کراچی میں اتنا زیادہ کام نہیں ہے…. اور یہ کافی سُست بھی ہیں…. بڑا مشکل ہوجائے گا جی!‘‘….۔
’’ابھی تو انہی سے کام چلائیے نجم صاحب…. ڈائریکٹر صاحب کا حکم ہے…. ہم کچھ بھی نہیںکرسکتے‘‘…. حرا نے مسکراتے ہوئے کہا
’’نہیں جی!…. کیوں نہیں کرسکتے!…. آپ رپورٹ بھیج دیں کہ یہ بندہ ہمارے کام کا نہیں ہے‘‘…. ۔ایڈمن آفیسر نے زور دیتے ہوئے کہا
’’نجم صاحب! آپ تو ماشاء اللہ بہت تجربہ کار آدمی ہیں…. آپ خود جانتے ہیں کہ جس بندے کو چارج سنبھالے چند گھنٹے گزرے ہوں اُس کے بارے میں کوئی اچھی یا بُری رپورٹ تیار نہیں ہوسکتی…. تین مہینے سے پہلے تو ڈائریکٹر صاحب کوئی رپورٹ قبول ہی نہیں کریں گے‘‘….۔
’’آپ اپنی ریپوٹیشن اور کرسی بچانے کے لئے ایسا کہہ رہی ہیں…. کام تو ہمیں لینا ہوتا ہے…. ہمیں دیکھنا ہوتا ہے…. آپ کو ہماری اور ہمارے لوگوں کی پریشانی کا کوئی خیال نہیں ہے‘‘…. وہ ہتھے سے اُکھڑنے لگا
’’آپ غلط بات کر رہے ہیں‘‘ حرا کو بھی غصہ آگیا…. پھر اُس نے اپنے غصّے پر قابو پاتے ہوئے کہا ’’مجھے بالکل آپ ہی لوگوں کے مفاد کا خیال ہے…. لیکن آپ ہی مشورہ دیجئے کہ میں کیا کروں؟…. لئیق صاحب اس گروپ آف کمپنیز سے گزشتہ بیس سالوں سے وابستہ ہیں…. اب میں ایک ہی دن میں اُن کی خراب رپورٹ کیسے دے سکتی ہوں اور کیا میری ایسی کسی رپورٹ کو ہیڈ آفس کوئی اہمیت بھی دے گا؟…. آپ تسلّی رکھیں اگر کوئی خامی یا غلطی نظر آئی تو میں ضرور ڈائریکٹر صاحب کے سامنے پیش کردوں گی‘‘….۔
ایڈمن آفیسر مشکوک نظروں سے حرا کی طرف دیکھتے ہوئے کمرے سے باہر نکل گیا جبکہ حرا بدستور مسکراتی رہی…. اس کے بعد حرا نے ویئر ہائوس کے نئے انچارج لئیق صاحب کو بلوایا….۔ کچھ دیر بعد وہ بہت سی فائلوں کے ہمراہ آن پہنچے….۔
’’کل ڈائریکٹر صاحب نے‘‘…. لئیق صاحب نے تفصیل بیان کرنی چاہی تو حرا نے بات کاٹتے ہوئے کہا ’’مجھے سب معلوم ہے آپ وضاحت نہ کریں…. ہاںبتائیے ڈائریکٹر صاحب کی ہدایت پر آپ نے فائلیں چیک کیں؟‘‘….۔
’’میڈم! وہاں تو سارا نظام ہی تلپٹ ہے…. فائلیں تک تو ترتیب سے رکھی ہوئی نہیں ہیں …. معلوم نہیں کیسے کام ہورہا تھا‘‘….۔
’’آپ کو اسی لئے تو بلوایا گیا ہے‘‘….
ابھی حرا فائلیں ہی چیک کر رہی تھی کہ سیکریٹری نے بتایا کہ ضمیر صاحب تشریف لائے ہیں….
’’لئیق صاحب! آپ یہ فائلیں یہی چھوڑ جائیں…. انشاء اللہ کل آپ سے تفصیلی بات ہوگی‘‘….
لئیق صاحب رُخصت ہوئے تو ضمیر صاحب حرا کے آفس میں داخل ہوگئے…. وہ حرا کو دیکھتے ہی بولے ’’بھئی تمہارا شک درست نکلا‘‘….۔ پھر اُنہوں نے بیٹھ کر تفصیل بتائی، جو کچھ یوں تھی کہ راکھ کے چھ پیکٹ شوکت نے پہنچائے تھے…. اُن میں سے چار پیکٹ کے تجزیہ سے معلوم ہوا کہ یہ کاٹن کی راکھ ہے…. اور باقی دو پیکٹوں کی راکھ سے معلوم ہوا کہ یہ کوئی نشہ آور شئے تھی….
’’یعنی میرا شک درست تھا کہ کمپنی کے مال کے ساتھ کچھ غیر قانونی اشیاء بھی ایکسپورٹ ہو رہی ہیں…. ویئر ہائوس انچارج کی تبدیلی سے یہ بھانڈا پھوٹ سکتا تھا چنانچہ دوسرے روز جانے والے سامان میں نشہ آور اشیاء کے بنڈل جلا دئیے گئے…. ضمیر صاحب آپ نے آگ لگنے کا جو وقت بتایا ہے، میری تفتیس کے مطابق اُس دوران فیکٹری کی بجلی گئی ہوئی تھی…. جب آگ چاروں طرف پھیل گئی تب وہاں بجلی آئی ہے…. اور پھر شارٹ سرکٹ کی بات اس لئے بھی درست تسلیم نہیں کی جاسکتی ہے کہ نیچے رکھے گئے بنڈل جلے ہیں اوپر کے بالکل محفوظ ہیں۔
لیبارٹری کی رپورٹ آنے کے بعد باقی ساری گتھیاں خودبخود سلجھتی چلی گئیں…. ڈائریکٹر صاحب کراچی سے شام تک آگئے تھے…. ایڈمن آفیسر کو شاید بھنک لگ گئی تھی چنانچہ وہ بیرونِ ملک فرار ہونے کی کوشش میں ایئرپورٹ پر پکڑ لیا گیا…. فیصل آباد میں یہاں کے سابقہ ویئر ہائوس انچارج کو بھی گرفتار کرلیا گیا اور پھر کئی مزید گرفتاریاں بھی عمل میں آئیں…. یہ لوگ گزشتہ چار سالوں سے یہ کام کر رہے تھے…. اور کمپنی کے مال میں چھپاکر نشہ آور اشیاء بیرونِ ملک سپلائی کر رہے تھے…. بیرونِ ملک بھی ان کے مضبوط رابطے موجود تھے…. اگر خدانخواستہ یہ مال پکڑا جاتا تو کمپنی کے ساتھ ساتھ ملک کی بھی بدنامی ہوتی…. حکومت تک یہ اطلاع پہنچی تو حکومت نے حرا کو ایوارڈ دینے کا فیصلہ کیا…. حرا بہت مسرور تھی…. رات کافی دیر تک وہ فیض انکل سے فون پر بات کرتی رہی….
اس دوران اچانک بڑی زور کا دھماکہ ہوا…. ایسا جیسے بجلی کڑکتی ہے…. فیض انکل کو ہولڈ کرواکر اُس نے باہر نکل کر دیکھا تو سامنے میدان کے کنارے لگا ہوا درخت کوئلہ ہوچکا تھا…. شاید بجلی گری ہوگی…. اُس نے سوچا…. چوکیدار بھی ساتھ کھڑا تھا، کہنے لگا ’’یہ سب سائنسی ترقی کا عذاب ہے‘‘….۔
’’وہ کیسے؟‘‘…. حرا نے پوچھا
’’دیکھیں تو…. آسمان پر بادل کا ایک ٹکڑا بھی نہیں ہے اور اس پر بجلی گری اور یہ کوئلہ ہوگیا‘‘….۔
’’تو اس میں سائنسی ترقی کہاں سے آگئی؟‘‘….۔
’’تو اور کیا ہے؟‘‘….۔
وہ چوکیدار کو باہر چھوڑ کر واپس اندر آئی اور فیض انکل کو تفصیل بتانے لگی پھر اس نے پوچھا ’’انکل ایسا کیوں کر ہوا؟…. اس کی کیا وجہ ہوسکتی ہے؟‘‘….۔
’’ہوں!…. شاید!…. نہیں!…. بلکہ میں کل صبح کی فلائٹ سے خود لاہور آجاتا ہوں‘‘….

(جاری ہے)

جون 2004ء

تاریکی کے دیس میں بسنے والی مخلوق کے اسرار پر مشتمل دلچسپ کہانی….

[box type=”success” align=”” class=”” width=””] ’’اندھیرا بھی روشنی ہے‘‘….
یہ حضرت قلندر بابا اولیاء رحمۃ اللہ علیہ کا فرمان ہے….
جس چیز کو ہم اندھیرا کہتے ہیں اُس میں بھی ایک وسیع دنیا آباد ہے۔ اُس دنیا میں بھی زندگی اپنے تمام رنگوں کے ساتھ حرکت میں ہے…. ہم نے چونکہ اندھیرے کو خوف کی
علامت بنا دیا ہے، اس لئے اندھیرے میں روشن یہ دنیا ہم پر منکشف نہیں ہوتی…. لیکن ایسے واقعات اکثرو بیشتر پیش آتے رہتے ہیں جب کشورِ ظلمات کے مظاہر کے ادراک
کا احساس ہونے لگتا ہے…. سائنسی علوم کے ماہرین بھی اس بات کو تسلیم کرتے ہیں کہ کائنات میں زندگی بیِشمار پیکر میں جلوہ گر ہوسکتی ہے…. سائنسی تحقیق کے مطابق
ایک زندگی وہ ہے جو ’’پروٹین اِن واٹر‘‘ کے فارمولے سے وجود میں آئی ہے۔ ہم انسان جو پروٹین اور پانی سے مرکب ہیں اپنی غذا ہائیڈروجن اور کاربن کے سالمات سے حاصل
کرتے ہیں، لیکن اگر کوئی مخلوق ’’پروٹین اِن ایمونیا‘‘ کے فارمولے پر تخلیق ہوئی ہو تو اُسے ایسی غذا کی ضرورت ہرگز نہ ہوگی جو انسان استعمال کرتے ہیں…. ممکن ہے وہ فضا
سے انرجی جذب کرکے اپنی زندگی برقرار رکھتی ہو!…. ممکن ہے کہ اُن کے جسم میں نظام ہضم کے آلات مثلاً معدہ، جگر، گردے، آنتیں وغیرہ بھی موجود نہ ہوں!…. اُن
کے جسم کی ہیئت ہمارے تصور سے بالکل ماوریٰ ہو!…. ممکن ہے کہ اُن کا جسم وزن سے بالکل آزاد ہو!…. وہ ہوا میں اُڑسکتی ہو!…. اتنی لطیف ہوکہ چشم زدن میں
ہماری نظروں سے غائب ہوجائے!…. وہ مختلف شکلیں اختیار کرسکتی ہو!…. مابعد الحیاتیات کے ماہرین خیال کرتے ہیں کہ کائنات میں ایسی مخلوق کا پایا جانا جانا
بعیدازامکان ہرگز نہیں ہے….
ظلمات کے معنی ہیں….تاریکی…. اور کشور کے معنی دیس یا وطن کے ہیں…. تاریکی کے دیس میں آباد ایک مخلوق سے متعارف کرانے والی یہ کہانی فرضی واقعات پر
مبنی ہے….  کسی قسم کی مماثلت اتفاقیہ ہوگی….[/box]

(چودہویں قسط)

کمپنی کی ہائر مینجمنٹ حرا کی قابلیت، صلاحیتوں اور اُس کی لگن سے بے حد متاثر تھی…. چنانچہ اُنہوں نے فیصلہ کیا کہ حرا کو اُس کی محنت کا بہتر صلہ دیا جائے…. بہت غور و خوض کے بعد یہ فیصلہ کیا گیا کہ حرا کو لاہور کی فیکٹری میں جی ایم بناکر بھیجا جائے یوں ہائر مینجمنٹ کو ایک طرح کا اطمینان بھی رہے گا کہ لاہور کی فیکٹری کا کنٹرول ہیڈ آفس کے ایک ذمّہ دار فرد کے پاس ہے۔
جب ماہانہ میٹنگ کے دوران تمام افسران کی موجودگی میں ڈائریکٹر صاحب نے یہ اعلان کیا تو تالیوں کا شور سُن کر حرا کی آنکھیں آنسوئوں سے لبریز ہوگئیں…. وہ سوچ رہی تھی کہ یہ خوشی کے آنسو ہیں یا غم کے…. کیا وہ ہائر مینجمنٹ کی اس آفر کو قبول کرلے؟…. یا کے پھر؟…. وہ عجیب گومکو کی سی کیفیت میںتھی۔
اُس نے شاید خود کو وقت کی لہروں کے سپرد کردیا تھا اور بے حس و حرکت ان لہروں کے دوش پر بہی چلی جارہی تھی…. اس لئے کامیابیوں اور ناکامیوں کا کوئی غم نہ تھا…. بس ایک موہوم سی اُمید کے سہارے جئے جارہی تھی کہ شاید کبھی نہ کبھی عمر سے ملاقات ہوگی اور وہ اپنی زندگی کا بقیہ سفر اُس کی ہمراہی میں طے کرے گی….
لاہور پہنچ کر وہ کام کے بکھیڑوں میں اس قدر اُلجھی کہ اُسے خود کا بھی ہوش نہیں رہا…. لیبر یونین اور ایڈمن کے برسوں سے چلے آرہے جھگڑے کو اُس نے چند دن کی مغز ماری کے بعد نمٹا دیا تو اُس کو کسی حد تک سکون ملا….
فیکٹری کے ساتھ ہی ایک خوبصورت بنگلے میں اُس کی رہائش تھی…. دو خادمائیں اور ایک چوکیدار…. اور اتنے بڑے بنگلے میں وہ تنہا تھی….
دن بھر معمول کے کام پھر مختلف ڈیپارٹمنٹس کی رپورٹس کو چیک کرنے کے بعد اپنے ریمارکس لکھنا اور روزانہ شام کو ڈائریکٹر صاحب سے فون پر کراچی بات کرکے مختلف مسائل پر ڈسکشن کرنا…. یوں اکثر رات کے آٹھ بج جاتے….ایک روز وہ کچھ وقت نکال کر بازار گئی اور اپنے لئے کچھ کپڑے اور دیگر ضرورت کی چیزیں خریدی…. اب جبکہ کافی چیزیں ترتیب میں آتی جارہی تھیں اور اُس کو بہت سارے معاملات کے حوالے سے اچھی رپورٹس مل رہی تھیں تو وہ اکثر لانگ ڈرائیو پر نکل جایا کرتی….
ایک روز وہ نور جہاں کے مزار پر جاپہنچی…. اُسے سخت حیرت ہوئی کہ ہندوستان کی ملکہ جس نے کسی زمانے میں اس قدر وسیع اور عریض سلطنت پر راج کیا…. آج اُس کا مزار ویرانی اور کسمپرسی کا مرقع بنا ہوا تھا…. اُس کی طبیعت کچھ دیر میں ہی اُکتا گئی اور وہ وہاں سے اُٹھ آئی…. اُس نے ڈرائیور سے کہا کہ داتا صاحبؒ کے مزار چلو….
جب وہ مزار پر پہنچی تو رات ہوچکی تھی لیکن وہاں ایسا لگ رہا تھا کہ گویا دن نکلا ہو اہے…. اُس نے فاتحہ پڑھی اور آنکھیں بند کرکے بیٹھ گئی…. اُس کے ذہن پر ایک شفیق اور کرم نواز ہستی کا تصور اُبھرا…. اس کو بہت سکون مل رہا تھا…. وہ خیال سے بے خیال ہوگئی…. اپنا احساس ختم ہوگیا…. جب اُس نے آنکھیں کھولیں تو اُسے احساس ہوا کہ اس طرح بیٹھے ہوئے اُس کو ایک گھنٹے سے زیادہ ہوچکا ہے….۔ وہ مزار سے باہر آئی تو ڈرائیور اُس کا منتظر تھا….
٭٭٭٭
ایک رات گرمی کے باعث اُس کی آنکھ کھل گئی…. لائٹ چلی گئی تھی…. چوکیدار جنریٹر اسٹارٹ کر رہا تھا…. اُس نے نوٹ کیا کہ آج آوارہ کتے غیرمعمولی طور پر بہت شور کر رہے ہیں…. اُس کی خادمہ نصیباں بھی جاگ گئی تھی…. حرا نے پوچھا کہ ’’آج کتے کیوں اس قدر شور کر رہے ہیں؟…. جائو چوکیدار سے معلوم کرو‘‘….
نصیباں نے تھوڑی دیر بعد آکر بتایا کہ چوکیدار کا خیال ہے کہ شاید چوروں کا کوئی گروپ ہے جو کئی روز سے اردگرد کا جائزہ لے رہا ہے…. اور واردات کے لئے موقع کی تلاش میںہے….
اُس کے بنگلے کے سامنے ایک خالی قطعہ تھا جس کے چاروں طرف درخت لگے ہوئے تھے…. اور میدان میں بچے کرکٹ وغیرہ کھیلتے تھے…. فیکٹری میں مرمت کے لئے آنے والا تعمیراتی سامان کا بھی ایک طرف ڈھیر لگا ہو ا تھا…. اس کے آگے فیکٹری کا ویئر ہائوس تھا جہاں فیکٹری میں تیار ہونے والی پروڈکٹ پیکنگ کے بعد جمع کی جاتی تھی…. اور یہاں سے روزانہ بڑے بڑے کنٹینر میں بھر کر شپمنٹ کے لئے روانہ کیا جاتا تھا…. ویئر ہائوس کی سیکورٹی کے لئے مسلّح گارڈ دن رات ڈیوٹی دیتے تھے…. اُس نے فائل سے روسٹر نکال کر دیکھا تو آج رات سیکورٹی انچارج شوکت بھٹی کی ڈیوٹی تھی…. ویئر ہائوس کے وزٹ کے دوران شوکت بھٹی کو اُس نے دیکھا تھا…. پہلی نظر میں اُسے وہ ایک ایماندار اور محنتی شخص محسوس ہوا تھا….
حرا نے ویئر ہائوس کا نمبر ڈائل کرکے شوکت سے پوچھا کہ اُس نے کسی کی نقل و حرکت تو نہیں دیکھی…. شوکت نے بتایا کہ آج ایک ہفتہ بعد وہ نائٹ شفٹ میں آیا ہے لیکن گزشتہ ایک ہفتہ کی رپورٹ میں یہ بات ریکارڈ کی گئی ہے کہ رات کے ایک خاص وقفے میں جب حبس بہت زیادہ بڑھ جاتا ہے اور ہو بالکل بند ہوجاتی ہے تو آوارہ کتے غیرمعمولی طور پر بھونکنا شروع کردیتے ہیں….۔ ایک دن ایک کتے کی جلی ہوئی لاش بھی ملی تھی…. جس کے متعلق یہ خیال تھا کہ شاید شرارتی لڑکوں نے پاگل کتے کو مارنے کے بعد جلادیا ہو…. لیکن ایک عجیب بات یہ تھی کہ کتے کی جلی ہوئی لاش گرائونڈ کے آخری حصے سے ملی تھی جہاں ایک چھوٹا سا نالہ بہتا ہے اور جہاں پر گھاس ایک فٹ سے زیادہ بلند ہوچکی ہے…. حیرت انگیز امر یہ ہے کہ گھاس اور اُس کے اردگرد دور دور تک آگ سے جلنے کی کوئی علامات نہیں پائی گئی…. اور نہ ہی ایسے کوئی آثار نظر آئے کہ کتے کو کہیںاور جلایا گیا اور بعد میں اُسے گھسیٹ کر یہاں ڈال دیا گیا ہو….
حرا نے شوکت سے کہا کہ وہ اسی طرح الرٹ رہیں….اور کوئی بھی غیر معمولی بات نظر آئے تو ایڈمن آفیسر کو رپورٹ کرنے کے ساتھ ساتھ اُسے بھی براہِ راست اطلاع دیں….
٭٭٭٭
ایک ہفتہ خاموشی سے گزر گیا…. اور شوکت کی بتائی ہوئی تفصیلات اُس کے ذہن سے نکل گئیں…. ایک رات تین بجے فون کی بیل سے اُس کی آنکھ کھل گئی….۔ اُس نے ہڑبڑا کر فون اُٹھایا….
’’میڈم معاف کیجئے گا…. آپ کا حکم تھا ورنہ میں اس طرح آپ کو ڈسٹرب کبھی نہ کرتا!‘‘…. دوسری طرف سے سیکیورٹی انچارج شوکت بول رہا تھا….
’’نوپرابلم! ….بولو کیا بات ہے؟‘‘…. حرا نے کہا
’’میڈم بات یہ ہے کہ آج پھر ایک کتے کی جلی ہوئی لاش ملی ہے اور دوسری بات یہ ہوئی کہ آج ایک گارڈ نے ویئر ہائوس کے پچھلے دروازے کی جانب کسی کو جاتے ہوئے دیکھا تو مخصوص انداز سے سیٹی بجاکر اُس نے اپنے ساتھیوں کو اطلاع دی اور اُس جانب بڑھا…. مجھے بھی سیٹی کی آواز سنائی دے گئی تھی چنانچہ میں بھی اُسی طرف فوراً بھاگا تھا…. جب میں وہاں پہنچا تو دیکھا ہمارا ایک سیکیورٹی گارڈ بے ہوش ہے….
میڈم! میں نے اُس کو اچھی طرح چیک کرلیا ہے…. اُس کے جسم پر کہیں بھی زخم کا کوئی نشان نہیں ہے…. اور نہ ہی اُس کے سر پر ضرب لگاکر اُسے بے ہوش کیا گیا ہے…. میں نے فون پر ایڈمن آفیسر نجم صاحب کو مکمل تفصیل بتادی ہے…. اور ایمبولینس بھی منگائی ہے….۔ لیجئے وہ آگئی…. اچھا میں باقی تفصیل میں آپ کو کل بتادوں گا‘‘….
’’دیکھو تم نے ایڈمن آفیسر کو یہ تو نہیں بتایا نا کہ تم مجھے بھی فون کرو گے‘‘….۔
’’نہیں جی! ایسی غلطی میں کیسے کرسکتا ہوں؟‘‘….
’’گڈ!…. کل شام کو میرے آفس میں مجھے رپورٹ دینا‘‘….
فون رکھ کر وہ دیر تک سوچتی رہی…. اُسے ایڈمن آفیسر مشکوک آدمی معلوم ہوتا تھا…. اُس کی جوائننگ سے پہلے ایک کنسائنمنٹ میں کچھ گڑبڑ ہوگئی تھی…. اور ایڈمن آفیسر نے دو افراد کو اس معاملے میں ملوث قرار دے کر انہیں نکال دیا تھا…. حرا نے اُس معاملہ کی پوری رپورٹ پڑھی تھی….۔ اُس وقت وہ یہی سوچتی رہ گئی تھی کہ اگر گھپلا پکڑا نہ جاتا تو اُن دونوں افراد کا اس میں کیا فائدہ ہوتا؟…. کچھ لمبا چکر معلوم ہوتا ہے!…. ایسا لگتا ہے کہ شاید ویئر ہائوس کا انچارج اور ایڈمن آفیسر آپس میں ملے ہوئے ہیں….خیر اصل بات تو اُس وقت پتہ چلے گی جب سیکیورٹی گارڈ ہوش میں آئے گا…. یہ سوچ کر وہ دوبارہ سونے کی کوشش کرنے لگی….
٭٭٭٭
اگلا دن بظاہر معمول کے مطابق ہی گزرا لیکن غیر معمولی بات یہ تھی کہ ایڈمن آفیسر نے رات کے واقع کا کا کوئی تذکرہ نہیں کیا…. شام کو سیکیورٹی انچارج شوکت نے آکر رپورٹ دی کہ سیکیورٹی گارڈ کو زہر آلود سوئی چبھوکر بے ہوش کیا گیا ہے…. زہر بہت خطرناک تھا…. اللہ کے کرم سے اُس کی جان محفوظ رہی…. لیکن اُس کے ذہن پر بہت بُرا اثر پڑا ہے اور وہ اپنی یادداشت کھوچکا ہے…. ڈاکٹروںکا کہنا ہے کہ طویل علاج کے بعد امکان ہے کہ اُس کی یادداشت بحال ہوجائے گی….
حرا سر پکڑ کر بیٹھ گئی…. اُسے ایڈمن آفیسر پر سخت غصّہ آرہا تھا…. اتنا بڑا حادثہ ہوگیا اور اُس نے مجھے کچھ بتانے کی ضرورت بھی محسوس نہیں کی…. حد ہوگئی….
مجھے اُسے بلاکر سرزنش کرنی چاہئے….
نہیں!…. اس طرح وہ ہشیار ہوجائے گا اور شوکت کو بھی پریشان کرے گا…. پھر اُسے نے ریسیور پر کریڈل واپس رکھ دیا….
ہوں!…. کچھ ایسا کرنا چاہئے کہ سانپ بھی مرجائے اور لاٹھی بھی نہ ٹوٹے…. یعنی مجھے سامنے آئے بغیر کارروائی کرنی چاہئے…. ورنہ مجھے بھی ہراساں کیا جاسکتا ہے….
پھر حرا نے کنسائنمنٹ رپورٹ منگوائی اور کافی دیر تک اُس کا مطالعہ کرتی رہی…. لیکن کوئی ایسی بات واضح نہ ہوسکی….
اُس روز اُس نے دوبارہ داتا صاحبؒ کے مزار پر حاضری دی اور داتا صاحبؒ کے وسیلے سے دعا کی کہ اللہ پاک مجھے سرخرو فرمائے….
اگلے روز رات گئے پھر اُس کی آنکھ کھل گئی…. آوارہ کتے بے تحاشہ بھونک رہے تھے….۔ ایسا لگ رہا تھا کہ جیسے کسی چیز سے خوفزدہ ہوں…. آج سیکیورٹی انچارج شوکت کے بجائے ایک دوسرا بندہ ڈیوٹی پر تھا…. اُس نے نمبر ملاکر یہ سوچتے ہوئے فون رکھ دیا کہ ایک سے زیادہ بندوں کو میری تشویش کے بارے میں کچھ پتہ نہیں چلنا چاہئے….
٭٭٭٭
حرا ڈائریکٹر صاحب کو روزانہ فون کرتی تھی اور گزشتہ دنوں کے حالات سے بھی انہیں آگاہ کردیا تھا…. اُنہوں نے کہا کہ ویئر ہائوس انچارج کے تبادلے کے لئے میں فیصل آباد فیکٹری کے جنرل منیجر سے بات کرتا ہوں…. ویئر ہائوس کا انچارج فیصل آباد کا رہنے والا ہے…. اگر اُس کا تبادلہ اُسی کے شہر میں کردیا جائے تو اُسے کوئی اعتراض نہیں ہونا چاہئے….۔
دوسرے روز فیصل آباد کی فیکٹری کے جنرل منیجر کا لیٹر اُس کو بذریعہ فیکس موصول ہوگیا….
پروٹوکول کے مطابق حرا نے ایڈمن آفیسر کو طلب کیا اور فیصل آباد سے موصول ہونے والا فیکس اُس کے سامنے رکھ دیا…. اُس کی توقع کے برخلاف ایڈمن آفیسر کہنے لگا ’’میڈم جی! یہ ممکن نہیں…. یہ فیصل آباد والے ہر دوسرے مہینے ہمارا کوئی نہ کوئی بندہ مانگ لیتے ہیں…. ہمارا یہی کام رہ گیا ہے کہ ہم بندہ تیار کرکے اُنہیں دیتے جائیں…. نہیں جی!…. یہ ممکن نہیں ہے….۔ آپ اُن سے صاف صاف کہہ دیں‘‘….
’’بھی نجم صاحب آپ کیوں پریشان ہو رہے ہیں…. کل کراچی سے لئیق صاحب آرہے ہیں…. کمپنی ڈائریکٹر کے لیٹر کے ساتھ اُن کا یہاں ویئر ہائوس انچارج کی پوسٹ پر تبادلہ ہوگیا…. وہ بٹ صاحب کی جگہ سنبھال لیں گے‘‘….
ایڈمن آفیسر کچھ بولنے کے لئے منہ کھول ہی رہا تھا کہ حرا نے ٹھوس اور حتمی لہجے میں کہا ’’آپ بٹ صاحب کو کہہ دیں کہ کل وہ فیصل آباد میں رپورٹ کریں گے…. جہاز کے ٹکٹ وغیرہ کے لئے اکائونٹس ڈیپارٹمنٹ کو میں نے چٹ بھجوادی ہے‘‘….
ایڈمن آفیسر کی ساری پھوں پھاں نکل گئی تھی…. اُس کا بس نہیں چل رہا تھا کہ وہ حرا کو کچا چبا جائے….
٭٭٭٭
رات کا ایک بجا تھا اور وہ کمپیوٹر پر فیض انکل سے چیٹنگ کر رہی تھی…. اچانک فائر بریگیڈ کے سائرن کے شور سے وہ ہڑبڑا سی گئی….
’’چوکیدار!‘‘…. اُس نے تقریباً چیختے ہوئے چوکیدار کو آواز دی…. چوکیدار دوڑتا ہوا اندر آیا….
’’یہ فائر بریگیڈ کی گاڑیاں کیوں آئی ہیں؟‘‘….
’’بی بی جی!…. سامنے والے گودام میں آگ لگ گئی ہے جی‘‘….
’’آگ!…. ڈرائیور سے بولو گاڑی نکالے‘‘….
(جاری ہے)
’’وہ تو چلا گیا جی!‘‘….۔
’’اچھا چلو میں خو د دیکھتی ہوں‘‘…. یہ کہہ کر حرا کار کی چابیاں سنبھالتی ہوئی باہر نکلی اور گاڑی اسٹارٹ کرکے، تیزی کے ساتھ ویئر ہائوس کے سامنے جاپہنچی…. ایڈمن آفیسر نجم بھی وہاں موجود تھا…. اس نے حرا کو دیکھا تو پیر پٹخ کر رہ گیا….

(جاری ہے)

مئی 2004ء

تاریکی کے دیس میں بسنے والی مخلوق کے اسرار پر مشتمل دلچسپ کہانی….

[box type=”success” align=”” class=”” width=””] ’’اندھیرا بھی روشنی ہے‘‘….
یہ حضرت قلندر بابا اولیاء رحمۃ اللہ علیہ کا فرمان ہے….
جس چیز کو ہم اندھیرا کہتے ہیں اُس میں بھی ایک وسیع دنیا آباد ہے۔ اُس دنیا میں بھی زندگی اپنے تمام رنگوں کے ساتھ حرکت میں ہے…. ہم نے چونکہ اندھیرے کو خوف کی
علامت بنا دیا ہے، اس لئے اندھیرے میں روشن یہ دنیا ہم پر منکشف نہیں ہوتی…. لیکن ایسے واقعات اکثرو بیشتر پیش آتے رہتے ہیں جب کشورِ ظلمات کے مظاہر کے ادراک
کا احساس ہونے لگتا ہے…. سائنسی علوم کے ماہرین بھی اس بات کو تسلیم کرتے ہیں کہ کائنات میں زندگی بیِشمار پیکر میں جلوہ گر ہوسکتی ہے…. سائنسی تحقیق کے مطابق
ایک زندگی وہ ہے جو ’’پروٹین اِن واٹر‘‘ کے فارمولے سے وجود میں آئی ہے۔ ہم انسان جو پروٹین اور پانی سے مرکب ہیں اپنی غذا ہائیڈروجن اور کاربن کے سالمات سے حاصل
کرتے ہیں، لیکن اگر کوئی مخلوق ’’پروٹین اِن ایمونیا‘‘ کے فارمولے پر تخلیق ہوئی ہو تو اُسے ایسی غذا کی ضرورت ہرگز نہ ہوگی جو انسان استعمال کرتے ہیں…. ممکن ہے وہ فضا
سے انرجی جذب کرکے اپنی زندگی برقرار رکھتی ہو!…. ممکن ہے کہ اُن کے جسم میں نظام ہضم کے آلات مثلاً معدہ، جگر، گردے، آنتیں وغیرہ بھی موجود نہ ہوں!…. اُن
کے جسم کی ہیئت ہمارے تصور سے بالکل ماوریٰ ہو!…. ممکن ہے کہ اُن کا جسم وزن سے بالکل آزاد ہو!…. وہ ہوا میں اُڑسکتی ہو!…. اتنی لطیف ہوکہ چشم زدن میں
ہماری نظروں سے غائب ہوجائے!…. وہ مختلف شکلیں اختیار کرسکتی ہو!…. مابعد الحیاتیات کے ماہرین خیال کرتے ہیں کہ کائنات میں ایسی مخلوق کا پایا جانا جانا
بعیدازامکان ہرگز نہیں ہے….
ظلمات کے معنی ہیں….تاریکی…. اور کشور کے معنی دیس یا وطن کے ہیں…. تاریکی کے دیس میں آباد ایک مخلوق سے متعارف کرانے والی یہ کہانی فرضی واقعات پر
مبنی ہے….  کسی قسم کی مماثلت اتفاقیہ ہوگی….[/box]

(تیرہویں قسط)

دن مہینے اور مہینے سال میں بدل گئے۔ وقت کا کیا ہے وہ تو پر لگا کر اُڑتا چلا جاتا ہے…. اُسے اِس سے کیا غرض کہ کسی کی آنکھوں میں انتظار منجمد ہوکر رہ گیا ہے…. وقت تو منجمد نہیں ہوسکتا…. کہ وہ تو حرکت کا دوسرا نام ہے…. اور کائنات کا سسٹم حرکت پر ہی قائم ہے…. کائنات کے کسی ایک گوشے میں بھی حرکت کا عمل ختم ہوجائے یا معطل ہوجائے تو کائنات کے سسٹم میں یہ عمل زبردست مزاحمت پیدا کردے گا اور یہ مزاحمت اس سسٹم کو درہم برہم کرکے رکھ دے گی…. ہم کسی معاملے میں ، کسی موقع پر یا کسی جگہ پر یہ کہتے ہیں کہ یہاں وقت ٹھہر گیا ہے…. تو یہ محض ہماری اندورنی کیفیت ہوتی ہے۔
حرا آج بھی عمر کی منتظر تھی…. اس دوران کئی سال گزر گئے…. ان سالوں میں حالات کہیں سے کہیں جا پہنچے…. ماں جی! عمر کی زندگی کی دعائیں مانگتے مانگتے خود زندگی کی بازی ہار گئیں…. حرا کے والد بھی اُسے داغِ مفارقت دے گئے…. ایک فیض انکل ہی اُس کا سہارا تھے…. اُسے تسلّی دیتے رہتے…. اُسے سمجھاتے کہ وہ عمر کو بھولا ہوا خواب سمجھے اور اپنی جمودزدہ زندگی کو دوبارہ متحرک کرکے آگے بڑھائے…. اُن کی باتیں سن کر اُس کی خاموش نگاہیں خلا میں نجانے کس چیز پر مرکوز ہوجاتیں اور شاید فیض انکل کی کوئی بات اُس کے کانوں کے راستے سے اُس کے ذہن کے کسی گوشے تک بھی نہ پہنچتی…. اور جب فیض انکل اُسے جھنجھوڑتے تو وہ جیسے گہری نیند سے اچانک بیدار ہوجاتی….
یہ کیفیت ابتدائی چند ماہ تک مستقل قائم رہی…. پھر فیض انکل کی کوششوں سے اُس کے ذہن کا جمود ٹوٹنا شروع ہوا…. آہستہ آہستہ تبدیلی آتی گئی…. اس دوران وہ مسلسل 6 ماہ تک گھر پر تھی…. پے درپے صدمات نے اُس کے ذہن کو مائوف کردیا تھا….۔چھ ماہ بعد وہ اپنے آفس پہنچی یہاں بھی بہت زیادہ تبدیلیاں آچکی تھیں…. ڈائریکٹر اور منیجرز تبدیل ہوچکے تھے…. اسٹاف میں بھی کچھ لوگ نئے آگئے تھے…. چونکہ اُس نے اِس ادارے میں بہت عرصہ گزارا تھا اور یہاں کے کام پر اُسے مکمل دسترس حاصل تھی، اس لئے اُسے دوبارہ اپائنٹ کرلیا گیا…. اگلے ہی روز اُس نے آفس بھی جوائن کرلیا…. ذہنی مصروفیت بڑھی تو یادوں کے زخم بھی بھرتے گئے….۔
اُس کے ادارے نے ایک نئے پروجیکٹ پر کام شروع کیا اور اس پروجیکٹ کے سلسلے میں کچھ نئے افراد عارضی طور پر بھرتی کئے گئے…. سینئر اسٹاف کو نئے لوگوں کی تربیت اور نگرانی کی ذمہ داری سونپی گئی…. حرا کو بھی پانچ افراد پر مشتمل ایک گروپ پر نگران مقرر کیا گیا…. تین مہینے کے تربیتی مراحل سے گزرنے کے بعد کام شروع ہوگیا…. اس دوران وہ اپنے گروپ کے پانچوں افراد سے خوب گُھل مل گئی تھی…. ان میں تین لڑکیاںتھیں اور دو لڑکے…. یہ سب فریش سائنس گریجویٹ تھے…. اس لئے کام میں خوب دلچسپی لے رہے تھے…. اُسے اِن لوگوں کو ٹریننگ دینے میں کوئی دشواری پیش نہیں آئی….نمرہ اُس کے گھر سے کچھ فاصلے پر ہی رہتی تھی اس لئے حرا نے اُسے آفر کی کہ وہ اُس کے ساتھ کار میں آفس آیا جایا کرے…. نمرہ نے تھوڑی بہت جھجک کے بعد اُس کی یہ پیشکش قبول کرلی…. ایک روز شہر میں اسٹرائیک تھی…. ٹرانسپورٹ جزوی طور پر بند تھی…. اِکا دُکا بسیں چل رہی تھیں تو اُن پر لوگ مکھیوں کی مانند چپکے ہوئے تھے…. حرا نمرہ کو ایک ایسے اسٹاپ پر اُتار دیتی تھی جہاں سے اُس کا گھر اگلے اسٹاپ پر تھا چنانچہ وہ بس میں بیٹھ کر چلی جاتی…. حرا نے کئی مرتبہ کہا بھی کہ میں تمہیں آگے تک چھوڑ دیتی ہوں…. ایک دو منٹ ہی خرچ ہونگے لیکن نمرہ نے اصرار کیا تو وہ اُسے اُسی اسٹاپ پر اُتارکر اپنے گھر کی طرف گاڑی موڑ لیتی…. اُس روز صورتحال کچھ ایسی تھی کہ نمرہ بھی منع نہ کرسکی…. نمرہ کا گھر مین روڈ سے قریب ہی تھا…. یہ لوئر مڈل کلاس لوگوں کی بستی تھی…. حرا نے نمرہ کے گھر کے سامنے گاڑی روکی…. تو نمرہ نے اُسے اندر آنے کے لئے کہا…. اور اس قدر اصرار کیا کہ اُسے گاڑی لاک کرکے اُترنا ہی پڑا…. گلی میں شور مچاتے بچوں کا ہجوم اب اُس کی گاڑی کے اردگرد جمع ہوچکا تھا…. جو کبھی اُسے اور کبھی اُس کی گاڑی کو دیکھ رہے تھے…. گلی میں سیوریج کا گندہ پانی پھیلا ہوا تھا….۔ خجل ہوتی نمرہ اُسے بازوئوں سے پکڑ کر اپنے گھر کے اندر لے آئی…. ۔ ’’آئیے میڈم!…. ہمارا گھر آپ کے لائق تو نہیں لیکن مجھے اس وقت جس قدر خوشی ہورہی ہے…. وہ میں الفاظ میں بیان نہیں کرسکتی‘‘….
پھر نمرہ نے حرا کو چائے پلاکر ہی رُخصت کیا…. حرا سوچ رہی تھی کہ قدرت بھی کیسے کیسے لعل و گہر کہاں کہاں پر رکھ چھوڑتی ہے…. کہاں نمرہ کا ذہن؟…. کہاں اُس کے اردگرد کا ماحول؟…. مجھ سے جس قدر بھی ہوسکا نمرہ کو آگے بڑھانے اور اُس کے ماحول کو بدلنے کے لئے ہر ممکن کوشش کروں گی…. حرا نے دل ہی دل میں یہ عزم کرلیا….
پھر وہ نئے پراجیکٹ میں ایسی جتی کہ اُسے دن رات کا بھی ہوش نہ رہا…. اس سلسلے میں اُسے ریفریشر کورس کے لئے بیرونِ ملک بھی جانا پڑا…. تین ماہ فرانس میں گزارنے کے بعد وہ وطن واپس آئی اور اپنے کام میں دوبارہ مگن ہوگئی…. فیض انکل دل ہی دل میں خدا کا لاکھ لاکھ شکر ادا کرتے تھے کہ حرا دوبارہ زندگی کی حرکت کے ساتھ متحرک ہوگئی ہے۔ کبھی کبھی وہ فارغ ہوتی اور فیض انکل کے ساتھ بیٹھتی تو عمر کا تذکرہ ضرور کرتی….
فیض انکل نے عمر کے والے سے استخارہ کیا تھا، جس میں پتہ چلا تھا کہ عمر زندہ ہے اور کچھ عرصے بعد حرا کی اُس سے ملاقات ضرور ہوگی…. لیکن اُنہوں نے حرا کو اس حوالے سے کچھ نہیں بتایا تھا…. وہ ڈرتے تھے کہ کہیں حرا کا ذہن دوبارہ متاثر نہ ہوجائے…. چنانچہ جب حرا عمر کا ذکر کرتی وہ بات گھماکر کسی اور طرف لے جاتے….
ایک روز نمرہ آفس نہیں آئی…. حرا کام کے حوالے سے نمرہ پر بہت زیادہ انحصار کرنے لگی تھی…. اس لئے اُس کا یہ چھٹی کرنا حرا کو بہت زیادہ کھل گیا…. نمرہ نے اب تک کوئی چھٹی بھی نہیں کی تھی جبکہ دوسرے لوگ اپنی چھٹّیاں استعمال کرتے رہتے تھے اس لئے اُسے بہت عجیب سا لگ رہا تھا…. چنانچہ اُس نے کام ختم کرتے ہی نمرہ کے گھر کا رُخ کیا….۔
نمرہ اور اُس کے گھر والوں کے لئے حرا کی آمد انتہائی غیرمتوقع تھی…. وہ سب اُسے دیکھ کر ہڑبونگ کا شکار ہوگئے…. نمرہ نے اُسے علیحدہ کمرے میں لے جاکر بٹھایا ’’میڈم! آپ کو ناحق زحمت ہوئی…. میں اپنی پریشانی میں آپ کو فون کرنا ہی بھول گئی تھی‘‘….۔
’’ میں تمہارے کوئی کام آسکتی ہوں؟…. تم مجھے بتائو تمہیں کیا پریشانی ہے؟‘‘…. حرا نے نمرہ کی پُشت پر ہاتھ رکھ کر تسلّی دیتے ہوئے کہا….
’’ہم غریبوں کی کوئی ایک پریشانی تو ہے نہیں…. آپ کون کون سی پریشانی حل کریں گی…. میرے والد نشہ کرتے ہیں…. باپ کی وجہ سے دونوں بھائی بھی آوارہ ہوگئے ہیں…. والدہ سلائی کرکے گھر کا خرچہ چلاتی ہیں…. میں نے ٹیوشن پڑھا پڑھا کر اپنی تعلیم مکمل کی اور اب سوچا تھا کہ گھر کے حالات تبدیل ہوں گے…. تو ایک نئی مصیبت کھڑی ہوگئی‘‘….
’’کیا ہوا؟‘‘….
’’میری چھوٹی بہن ثمرہ کو دورہ پڑا ہے…. محلّے کے لوگ کہہ رہے ہیں کہ اس پر جن آگیا ہے‘‘….
’’جن؟…. انہیں کس طرح یقین ہے؟‘‘….
’’مجھے نہیں معلوم…. لیکن یہاں پر ہر مسئلہ کو اس طرح توہمات کی نظر سے ہی دیکھا جاتا ہے…. میں ڈاکٹر کو بلا لائی تو پڑوسنیں اُلٹی سیدھی باتیں بنانے لگیں…. کہ یہ تو پیروں اور عاملوں کے بس کی چیز ہے…. ڈاکٹر اس کا کیا توڑ کریں گے‘‘….۔
’’ابھی اُس کی کیسی طبیعت ہے؟‘‘….۔
’’ڈاکٹر نے بڑی مشکل سے نیند کا انجکشن لگایا تھا…. ابھی تو بے خبر سو رہی ہے‘‘….
’’تم گھبرائو نہیں…. میرے انکل نفسیات دان ہیں اس قسم کے معاملات میں ان کے تجربات بھی بہت ہیں، میں اُن سے مشورہ کروں گی…. اگر تم مناسب سمجھو تو‘‘….
’’میڈم! مجھے کیا اعتراض ہوگا…. میری بہن ٹھیک ہوجائے میری تو یہی خواہش ہوگی…. لیکن میڈم آپ ہمارے مسئلے میں پڑ کر خواہ مخواہ پریشان کیوں ہوتی ہیں‘‘…. نمرہ نے کہا
’’ارے اس میں پریشانی کیسی؟…. میں تمہارے کسی کام آجائوں میرے لئے تو یہ خوشی کی بات ہے‘‘….
پھر حرا اُسے تسلی دے کر رُخصت ہوگئی…. گھر پہنچ کر اُس نے فیض انکل سے بات کی…. اُنہوں نے کہا کہ دیکھے بغیر وہ کوئی حتمی رائے دینے سے قاصر ہیں…. چنانچہ اگلے روز وہ دونوں شام کو نمرہ کے گھر جاپہنچے…. اُس وقت نمرہ کی بہن ثمرہ پر دورے کی حالت طاری تھی…. اور وہ واہی تباہی بک رہی تھی….
فیض انکل نے وہاں بیٹھ کر کچھ دیر تک ورد کیا اور چاروں طرف پھونک مارکر آنکھیں بند کرلیں…. شاید وہ اپنے ذہن کی لہروں سے نمرہ کی بہن ثمرہ کو ہپناٹائز کرنے کی کوشش کر رہے تھے…. نمرہ کی بہن کو چار پانچ افراد نے مضبوطی سے پکڑا ہوا تھا…. تھوڑی دیر بعد فیض انکل نے آنکھیں کھول دیں اور نمرہ کی بہن کی آنکھوں میں آنکھیں ڈال کر پلک جھپکائے بغیر کافی دیر تک دیکھتے رہے….
پھر کچھ دیر بعد اُنہوں نے ثمرہ سے پوچھا ’’تم کون ہو؟‘‘….۔
جواب میں اُس نے کہا ’’میں ثمرہ کا ہمزاد ہوں‘‘….۔
’’تم کیا چاہتے ہو؟‘‘….۔
’’میں نے کیا چاہنا ہے!….۔ میں تو کٹھ پتلی ہوں!‘‘….۔
’’تمہاری ڈوریں کس کے ہاتھ میں ہیں؟‘‘….۔
’’یہ میں تمہیں نہیں بتاسکتا!‘‘….۔
پھر فیض انکل نے کچھ پڑھ کر ثمرہ کے چہرے پر دم کیا تو اُس نے ایک زبردست چیخ ماری اور کچھ دیر تک مچلتی رہی….
’’بتا تجھے کس نے گمراہ کیا ہے؟‘‘….
’’میں نہیں بتائوں گا…. وہ لوگ بہت طاقتور ہیں…. تجھے بھسم کردیں گے…. میرا پیچھا چھوڑدے‘‘….
فیض انکل نے دوبارہ کچھ پڑھ کر ثمرہ کے چہرے پر پھونک ماری اب کی مرتبہ اُس کے حلق سے کچھ ایسی آوازیں نکلیں جیسے کسی گائے یا بیل کو جب ذبح کیا جاتا ہے تو اُس کے حلق سے نکلتی ہیں….
’’میر اپیچھا چھوڑ دے!‘‘….۔
’’تجھے بتانا ہوگا؟‘‘….
فیض انکل اس مرتبہ کافی دیر تک پڑھتے رہے…. پھر اُنہوں نے اپنا ہاتھ فضا میں بلند کیا….
’’ٹھہرو!…. بتاتا ہوں…. بتاتا ہوں…. لیکن ایک شرط پر تم میرا پیچھا چھوڑ دو گے‘‘….۔
’’نہیں! بلکہ تم اپنی اوقات میں رہو گے اور اس لڑکی کو دوبارہ تنگ نہیں کروگے‘‘….
’’اچھا اچھا…. بس کرو!‘‘….
’’بتائو تمہیں کون استعمال کر رہا ہے‘‘….۔
’’آگیا بتیال!‘‘…. یہ کہہ کر نمرہ کی بہن بے ہوش ہوگئی…. حرا نے نمرہ کی بہن سے یہ لفظ سنا تو وہ بے اختیار چونکتے ہوئے کرسی سے کھڑی ہوگئی اور جب اُس نے دیکھا کہ سب اُسے حیرت سے دیکھ رہے ہیں تو وہ خاموشی سے بیٹھ گئی…. فیض انکل کچھ دیر سرجھکائے خاموش بیٹھے رہے…. پھر اُنہوں نے نمرہ کی طرف دیکھتے ہوئے کہا ’’بیٹی! تم اپنی بہن کو دن میں تین مرتبہ شہد کھلائو…. نمکین اشیاء کا استعمال بالکل بند کردو…. اور صبح و شام اس کے سرہانے بیٹھ کر سورئہ اعراف کی تلاوت کرو…. اللہ نے چاہا تو یہ بالکل ٹھیک ہوجائے گی…. اور ہاں گھر کے تمام افراد نمکین چیزوں کے بجائے میٹھی اشیاء زیادہ استعمال کریں…. اور بازار کے پسے ہوئے سستے نمک کا استعمال بالکل ترک کردیں اس لئے کہ بعض عاقبت نااندیش اس میں جپسم کی ملاوٹ کردیتے ہیں….۔ جس کی وجہ سے کسی فرد میں ایسی کیفیت پیدا ہوسکتی ہے‘‘….
اس کے بعد وہ لوگ وہاں سے رُخصت ہوگئے…. راستے میں حرا نے پوچھا ’’انکل ہم اس کے ذریعے آگیابتیال تک نہیں پہنچ سکتے‘‘….
’’نہیں!‘‘….
’’کیوں؟…. اگر ہم ثمرہ کے ذریعے آگیا بتیال تک پہنچ جائیں تو ہمیں عمر کا کچھ اتہ پتہ مل سکتا ہے‘‘….
’’نہیں بیٹا! اس لڑکی پر کوئی جن ون تھوڑی سوار ہے‘‘….
’’پھر یہ کیا ہے؟‘‘….
’’دیکھو! اس بات کو تم یوں سمجھو…. ہم لوگ اپنے آپ کو گوشت پوست کا وجود سمجھتے ہیں…. یہ ہمارا وجود نہیں ہے…. ہمارا وجود نورانی لہروں سے مرکب ہے…. روشنیوں سے بنے ہوئے ہمارے اس جسم کو سائنس نے Aura کا نام دیا ہے…. آدمی جب مرجاتا ہے تو اس کا گوشت پوست کا جسم مٹی میں دفن کردیا جاتا ہے…. لیکن روشنیوں کا جسم روشنیوں کے عالم میں منتقل ہوجاتا ہے…. اس عالم کو اعراف یا Astral World کہتے ہیں۔ کبھی کبھی روشنیوں کا یہ جسم کسی وجہ سے متحرک ہوجاتا ہے اور بعض اوقات اسفل السافلین کے کثیف ’’اورا‘‘ یا شرپسند جنات اسے تخریبی مقاصد کے لئے استعمال کرتے ہیں‘‘….
’’تو ہمیں کچھ نہیں پتہ چلے گا‘‘….۔
’’حرا بیٹی تم صبر کرو…. اللہ بڑا کارساز ہے…. وہ ضرور تمہارے صبر کا پھل دے گا‘‘….
حرا کی آنکھیں مسلسل بہتی رہیں….
٭٭٭٭
اُدھر جس مقدمے میں عمر کو گواہی کے لئے عالمِ جنات میں طلب کیا گیا تھا وہ تعطّل کا شکار ہوگیا …. ہوا یہ کہ عالمِ جنات کے ایک قبیلے شرداد کی افواج نے ملک حزقیل پر حملہ کردیا، یہیں عمر بھی مقیم تھا…. قبیلہ شرداد دراصل آگیا بتیال کا حمایتی تھا اور اس حملے کا مقصد صرف اور صرف یہ تھا کہ عنبر کو آزاد کرایا جاسکے…. حملہ اس قدر اچانک تھا کہ حزقیل کے فوجی کچھ دیر تک تو سمجھ ہی نہ پائے کہ ہوا کیا ہے اور شرداد قبیلے کے کمانڈوز آناً فاناً عنبر کو آزاد کراکے اپنے ہمراہ لے گئے…. چنانچہ اِس مقدمے کی کارروائی کو اُس وقت تک کے لئے معطل کرنا پڑا…. جب تک کہ عنبر دوبارہ گرفتار ہوکر عدالت میں پیش نہ ہوجائے…. عمر کے لئے اب عالمِ جنات میں دن کاٹنا مشکل ہوگیا تھا…. وہ سخت حفاظتی محاصرے میں تھا…. کیونکہ اُس کی جان کو ہر پل خطرہ لاحق تھا…. پھر کافی سوچ بچار کے بعد اُس نے قسطورہ کے ذریعے یہ درخواست ملک حزقیل کے اعلیٰ حکام کے پاس بھیجی کہ اُسے انسانوں کی دنیا میں واپس بھیج دیا جائے…. لیکن اُس کی درخواست اس بنیاد پر نامنظور ہوگئی کہ انسانوں کی دنیا میں آگیا بتیال زیادہ آسانی سے عمر کی زندگی ختم کرسکتے ہیں…. یوں آگیا بتیال کے خلاف ایک اہم گواہ کا خاتمہ آگیا بتیال کو اپنی تخریبی کاروائیوں پر زیادہ دلیر بنادے گا….

(جاری ہے)

اپریل 2004ء

تاریکی کے دیس میں بسنے والی مخلوق کے اسرار پر مشتمل دلچسپ کہانی….

[box type=”success” align=”” class=”” width=””] ’’اندھیرا بھی روشنی ہے‘‘….
یہ حضرت قلندر بابا اولیاء رحمۃ اللہ علیہ کا فرمان ہے….
جس چیز کو ہم اندھیرا کہتے ہیں اُس میں بھی ایک وسیع دنیا آباد ہے۔ اُس دنیا میں بھی زندگی اپنے تمام رنگوں کے ساتھ حرکت میں ہے…. ہم نے چونکہ اندھیرے کو خوف کی
علامت بنا دیا ہے، اس لئے اندھیرے میں روشن یہ دنیا ہم پر منکشف نہیں ہوتی…. لیکن ایسے واقعات اکثرو بیشتر پیش آتے رہتے ہیں جب کشورِ ظلمات کے مظاہر کے ادراک
کا احساس ہونے لگتا ہے…. سائنسی علوم کے ماہرین بھی اس بات کو تسلیم کرتے ہیں کہ کائنات میں زندگی بیِشمار پیکر میں جلوہ گر ہوسکتی ہے…. سائنسی تحقیق کے مطابق
ایک زندگی وہ ہے جو ’’پروٹین اِن واٹر‘‘ کے فارمولے سے وجود میں آئی ہے۔ ہم انسان جو پروٹین اور پانی سے مرکب ہیں اپنی غذا ہائیڈروجن اور کاربن کے سالمات سے حاصل
کرتے ہیں، لیکن اگر کوئی مخلوق ’’پروٹین اِن ایمونیا‘‘ کے فارمولے پر تخلیق ہوئی ہو تو اُسے ایسی غذا کی ضرورت ہرگز نہ ہوگی جو انسان استعمال کرتے ہیں…. ممکن ہے وہ فضا
سے انرجی جذب کرکے اپنی زندگی برقرار رکھتی ہو!…. ممکن ہے کہ اُن کے جسم میں نظام ہضم کے آلات مثلاً معدہ، جگر، گردے، آنتیں وغیرہ بھی موجود نہ ہوں!…. اُن
کے جسم کی ہیئت ہمارے تصور سے بالکل ماوریٰ ہو!…. ممکن ہے کہ اُن کا جسم وزن سے بالکل آزاد ہو!…. وہ ہوا میں اُڑسکتی ہو!…. اتنی لطیف ہوکہ چشم زدن میں
ہماری نظروں سے غائب ہوجائے!…. وہ مختلف شکلیں اختیار کرسکتی ہو!…. مابعد الحیاتیات کے ماہرین خیال کرتے ہیں کہ کائنات میں ایسی مخلوق کا پایا جانا جانا
بعیدازامکان ہرگز نہیں ہے….
ظلمات کے معنی ہیں….تاریکی…. اور کشور کے معنی دیس یا وطن کے ہیں…. تاریکی کے دیس میں آباد ایک مخلوق سے متعارف کرانے والی یہ کہانی فرضی واقعات پر
مبنی ہے….  کسی قسم کی مماثلت اتفاقیہ ہوگی….[/box]

(بارہویں قسط)

عمر کو عالمِ جنات میں آج دوسرا دن ہو چلا تھا…. وہ قسطورہ کے دادا کے گھر مقیم تھا…. گوکہ وہ عالمِ جنات کی انتظامیہ کا مہمان تھا اور انتظامیہ نے اُس کی رہائش کا بندوبست کررکھا تھا لیکن قسطورہ کے دادا نے عالمِ جنات کی پولیس کے ایک اعلیٰ عہدیدار سے کہا کہ وہ عمر کو اپنے ساتھ رکھنا چاہتے ہیں…. عمر نے دیکھا کہ اُس افسر نے بلا حیل و حجت قسطورہ کے دادا کی بات مان لی…. بعد میں قسطورہ نے اُسے بتایا کہ اس کے دادا نے بڑے بڑے جلیل القدر اولیاء اللہ سے فیض پایا ہے۔ یہی وجہ ہے کہ یہاں پر اُن کی بڑی قدرو منزلت کی جاتی ہے…. اُنہوں نے اپنی روحانی طاقت سے یہاں بہت سے مسائل کا خاتمہ کیا ہے اس لئے حکومتی سطح تک بھی ان کی رسائی ہے اور بعض معاملات میں تو مشورہ کرنے کے لئے اعلیٰ عہدیدار ان کی خدمت میں حاضر ہوتے ہیں۔
قسطورہ کے بات سُن کر عمر حیرت میں پڑگیا….۔ وہ یہ سوچنے لگا کہ اتنے بڑا فرد اُس کا استقبال کرنے کے لئے آیا تھا…. آخر اس کی کیا وجہ ہے؟….۔
صبح ہوتے ہی عدالت کے ہرکارے عمر کو لینے کے لئے آگئے…. قسطورہ بھی عمر کے ساتھ عدالت پہنچی…. اس عدالت کا طریقہ کار بالکل انسانوں کی دنیا کے طریقہ کار کی مانند تھا…. عمر سے آگیا بتیال کے بارے میں چند سوالات پوچھے گئے…. عمر نے ان سوالوں کے جواب میں اپنے اوپر گزری ہوئی مکمل روداد سُنا ڈالی….
قسطورہ کا کزن عنبر کٹہرے میں کھڑا اپنے اوپر عائد کئے گئے الزامات کا جواب دے رہا تھا…. عمر کی گواہی کے بعد اُس کے خلاف کیس خاصا مضبوط ہوگیا تھا…. عنبر کے والد کی حکمرانوں تک رسائی تھی اس لئے اُنہوں نے عنبر کو بچانے کے لئے ایڑی چوٹی کا زور لگادیا تھا…. عنبر کا وکیل پینترے بدل بدل کر عمر پر دلیلوں اور سوالوں کی بوچھاڑ کرنے لگا…. ایک لمحے کے لئے تو عمر گڑبڑا سا گیا…. اُس کو کچھ سمجھ میں ہی نہیں آیا کہ وہ کیا جواب دے رہا ہے…. اس موقع پر وکیل استغاثہ نے اُٹھ کر عدالت کو بتایا کہ گواہ چونکہ اس دنیا کا باشندہ نہیں ہے اور یہاں کے ماحول سے کچھ خوفزدہ بھی ہے ، چنانچہ وکیل صفائی کو چاہئے لپ ایک ساتھ کئی سوالات کرنے کے بجائے کچھ سوالات کو اگلی سماعت کے لئے رکھ چھوڑیں…. وکیلِ صفائی جواب میں تقریباً شور مچانے لگا، لیکن عدالت نے وکیل استغاثہ کے مؤقف کو تسلیم کرلیا…. اصل مسئلہ آگیا بتیال کے ساتھ عنبر کے تعلق کو ثابت کرنا تھا…. آگیا بتیال شیطنت کے فروغ کے لئے کام کرنے والا ایک وسیع گروہ تھا…. یہ گروہ عالمِ جنات اور عالمِ انسان دونوں میں پھیلا ہوا ہے…. اگر یہ ثابت ہوجاتا کہ عنبر کا تعلق آگیا بتیال سے کس حد تک ہے تو پھر پولیس کو یہ اختیار حاصل ہوجاتا کہ وہ عنبر سے آگیا بتیال کے متعلق مزید تفصیلات اُگلواسکے، لیکن یہ بہت نازک مرحلہ تھا….۔ عنبر کو اسی کیس میں موت کی سزا ہوسکتی تھی…. چنانچہ جہاں آگیا بتیال کا نیٹ ورک بھی اُسے بچانے کے لئے خفیہ طور پر متحرک تھا…. وہیں اُس کی شاطر ماں اور باپ بھی سیاسی جوڑ توڑ میں مصروف تھے…. عنبر اور عمر کے لئے سیکورٹی بہت سخت تھی…. جہاں ظاہری طور پر بہت زبردست انتظامات کئے گئے تھے وہیں قسطورہ کے دادا عمرام صاحب سے بھی حکومت نے درخواست کی تھی کہ وہ روحانی طور پر اس معاملے کی نگرانی کریں تاکہ آگیا بتیال کی استدراجی قوتوں سے محفوظ رہا جاسکے…. یہی وجہ ہے کہ عمرام نے جب عمر کو اپنے گھر ٹھہرانے کے لئے کہا تو پولیس افسر نے بلا پس و پیش مان لیا….۔
عدالت میں ابھی وکیلِ صفائی کے دلائل جاری تھے کہ عدالت کا وقت ختم ہوگیا….
عمر سپاہیوں کی سخت حفاظت میں واپس قسطورہ کے دادا کے گھر پہنچا…. یہ گھر کیا تھا ایک بڑی سی حویلی تھی…. حویلی میں اُس کا کمرہ دوسری منزل پر تھا لیکن قسطورہ اُسے لے کر ایک ہال نما بڑے سے کمرے میں پہنچی…. یہاں بہت سے جنات جمع تھے اور قسطورہ کے دادا عمرام کی گفتگو بہت غور سے سن رہے تھے…. عمر اور قسطورہ کو ہال میں داخل ہوئے تو عمرام خاموش ہوکر ان دونوں کو دیکھنے لگے…. چند افراد نے بھی اُن کی نظروں کا تعاقب کرتے ہوئے پیچھے مڑ کر دیکھا، قسطورہ کے ہمراہ ایک انسان کو دیکھ کر اُن کی آنکھیں پھٹی کی پھٹی رہ گئیں…. پھر وہ آپس میں چہ میگوئیاں کرنے لگے…. یوں باقی جنات کو اِس محفل میں ایک انسان کی موجودگی کا علم ہوگیا….۔
قسطورہ عمر کو اپنے دادا کے پاس لے گئی…. عمرام نے عمر کو بیٹھنے کا اشارہ کیا…. عمر نے پوچھا ’’آپ کوئی درس دے رہے تھے؟‘‘….۔
اُنہوں نے کہا ’’بھائی ہم کیا کسی کو درس دیں گے…. یہ لوگ ہر ہفتے کی شام کو یہاں اکھٹے ہوجاتے ہیں…. کچھ اپنی کہتے ہیں اور کچھ ہماری سنتے ہیں…. ہمیں اللہ نے اپنے دوستوں کی محبت میں کچھ وقت گزارنے کا شرف عطا کیا…. ہم نے بزرگوں سے جو کچھ بھی سنا اُس میں سے کچھ ہم ان لوگوں کے بھی گوش گزار کردیتے ہیں‘‘….۔ یہ کہنے کے بعد اُنہوں نے حاضرین سے مخاطب ہوکر اپنی گفتگو کا دوبارہ آغاز کیا:
’’جنات کے علاوہ انسان بھی مکلف مخلوق ہے…. انسان کو اللہتعالیٰ نے یہ شرف بخشا ہے کہ اگر وہ کوشش کرے تو وہ اللہتعالیٰ کی نیابت کے مرتبے پر فائز ہوسکتا ہے‘‘….۔
’’معاف کیجئے گا…. میں قطع کلامی کر رہا ہوں…. آپ نے ابھی فرمایا کہ انسان اگر چاہے تو وہ اللہ کی نیابت کے مرتبہ پر فائز ہوسکتا ہے…. جبکہ میںنے تو یہ سنا ہے بلکہ پڑھا بھی ہے کہ ’’انسان کو اللہ نے اپنا نائب بنایا ہے‘‘…. عمر نے کہا
عمرام نے مسکراتے ہوئے عمر کو دیکھا اور بولے ’’قرآن پاک کا مطالعہ کیا جائے تو یہ حقیقت سامنے آتی ہے کہ آدم اسمائے الہٰیہ کے علوم اور اسرار سے واقف ہے اور ان علوم سے فرشتے واقف نہیں…. اب اگر آدم کی اولاد میں سے کوئی فرد اسمائے الہٰیہ کے علوم سے ناواقف ہے تو وہ ہرگز اشرف المخلوقات کہلائے جانے کا حق دار نہیں‘‘….
عمر گوکہ عالمِ جنات میں بالکل بے دست و پا تھا لیکن اُسے انسانوں کے حوالے سے یہ تبصرے بہت گرااں گزرے…. اُسے تو بچپن سے اسی فخر میں مبتلا کردیا گیا تھا کہ وہ اشرف المخلوقات ہے…. گوکہ اِسی موضوع پر اُس کی قسطورہ کے ساتھ بھی کافی بحث ہوچکی تھی لیکن بچپن میں جو بیج بودیا گیا تھا وہ اب تناور درخت بن چکا تھا…. اُسے اتنی آسانی سے تو نہیں گرایا جاسکتا تھا…. چنانچہ اُس نے پھر ایک سوال داغا ’’جناب قرآن تو ہم انسانوں کے لئے نازل ہوا ہے‘‘….
’’نہیں! تمہارا علم محدود ہے…. قرآن اللہتعالیٰ نے جن و انس کی ہدایت کے لئے اپنے محبوب حضرت محمد رسول اللہﷺ پر نازل فرمایا….۔ اسی قرآن میں ہی اللہتعالیٰ کا ارشاد ہے….
’’ہم نے اپنی امانت سماوات پر، زمین پر اور پہاڑوں پر پیش کی، سب نے کہا ہم اس کو اُٹھانے کے متحمل نہیں ہوسکتے اس لئے کہ ہم یہ جانتے ہیں کہ اگر ہم نے یہ امانت اپنے ناتواں کندھوں پر اُٹھائی تو ہم ریزہ ریزہ ہوجائیں گے اور ہمارا وجود نیست و نابود ہوجائے گا‘‘….
مذکورہ ارشادِ باری تعالیٰ پر غوروفکر کریں تو یہ حقیقت واضح ہوکر سامنے آجاتی ہے کہ آسمان بھی شعور رکھتے ہیں، زمین بھی شعور رکھتی ہے، پہاڑ بھی شعور رکھتے ہیں…. بھئی کسی بات کا اقرار کرنا یا انکار کرنا اس بات کی نشاندہی نہیں کہ اُس میں عقل و شعور موجود ہے؟…. اللہ کے دوستوں کی تعلیمات کے مطابق جس طرح مکلف مخلوق انسان اور جنات سماعت، بصارت اور گویائی رکھتے ہیں، اسی طرح پتھر میں بھی یہ ساری صلاحیتیں موجود ہیں…. اور جس طرح مکلف مخلوق میں سوچنے اور غور کرنے کی صلاحیت ہے اسی طرح پتھر بھی غوروفکر کرسکتا ہے…. یہی وجہ ہے کہ پہاڑوں نے اپنے متعلق غوروفکر کیا اور اس نتیجے پر پہنچے کہ اگر ہم اللہتعالیٰ کی امانت کے بوجھ کو اُٹھالیا تو ہم نیست و نابود ہوجائیں گے اور اُنہوں نے اللہتعالیٰ سے معذرت کرلی…. لیکن قرآن پاک کے مطابق انسان نے اس امانت کو قبول کرلیا، بے شک انسان ظالم اور جاہل ہے…. اس کا مطلب یہ ہو اکہ آسمان، زمین اور پہاڑ ظالم اور جاہل نہیں ہیں…. انسان صرف اُس وقت اشرف المخلوقات ہے جب کہ وہ امانتِ الہٰیہ سے واقف ہے…. امانتِ الہٰیہ کیا ہے؟…. یہ کائنات کے تخلیقی فارمولے ہیں…. اسماء سے مراد اللہ کی وہ صفات ہیں جو تخلیق کرنے کی صلاحیت رکھتی ہیں‘‘….
عمرام نے اپنی گفتگو مکمل کی تو عمر کی زبان پر ایک اور سوال مچل رہا تھا ’’میں نے سنا ہے کہ جنات شرپسند مخلوق ہے؟‘‘…. عمر نے سوا ل تو کردیا لیکن سوچنے لگا کہیں یہ لوگ میرے سوال سے ناراض نہ ہوجائیں…. عمرام نے عمر کی جانب مسکراتے ہوئے یوں دیکھا جیسے کسی نادان بچے کو کوئی بزرگ دیکھا کرتا ہے…. اور بولے ’’بیٹا! ایسی بات نہیں ہے!‘‘….۔
’’دراصل میں یہ بات اس بنیاد پر کر رہا ہوں کہ میں نے کہیں پڑھا ہے کہ شیطان نوعِ جنات کا ایک فرد تھا‘‘….۔ عمر نے دوبارہ سوال کیا
’’شیطان کا اصل نام عزازیل تھا…. وہ نوعِ اجنّہ میں سے ہی تھا…. اللہ پاک نے اُسے نظامِ تکوین میں کچھ اختیارات عطا کئے تھے…. قرآن پاک کے مطابق جب اللہتعالیٰ نے انسان کو اشرف المخلوقات بنانے کا ارادہ کیا تو فرشتوں نے عرض کی یہ جو مخلوق آپ پیدا کرنے جارہے ہیں اس کے متعلق ہمارے کچھ تحفظات ہیں…. ہمیں خدشہ ہے کہ یہ زمین پر شر اور فساد کا سبب بنے گی…. اللہتعالیٰ نے ملائکہ کے خدشے کو رَد نہیں کیا لیکن ساتھ ہی یہ بھی فرمایا کہ جو ہم جانتے ہیں وہ تم نہیںجانتے…. چنانچہ نوعِ انسان کی ابتداء حضرت آدم علیہ السلام سے ہوئی…. حضرت آدم کو علم الاسماء منتقل ہوئے اور جب ان علوم کا مظاہرہ آدم کے ذریعے سے ہوا تو تما م مخلوقات نے آدم کی حاکمیت کو تسلیم کرلیا…. قرآن پاک میں سجدہ کرنے کا تذکرہ ہے…. یہ دراصل اطاعت اور فرمانبرداری کا استعارہ ہے…. جنات میں بلند مرتبہ عزازیل نے اِس موقع پر ہٹ دھرمی کا مظاہرہ کیا اور آدم کی اشرفیت کو ماننے سے انکار کردیا…. لہٰذا راندئہ درگاہ ہوگیا…. اس نے اللہتعالیٰ سے اس بات کی اجازت طلب کی کہ اُسے آدم کی نسل کو گمراہ کرنے کے اختیارات دئیے جائیں…. عزازیل کو یہ اجازت مل گئی…. عزازیل نے اپنا ایک گروہ تیار کیا…. اس گروہ میں جنات کے علاوہ انسان بھی شامل ہوتے گئے…. آج تو انسانوں کی ایک بڑی تعداد شیطانی طرزِفکر پر چل رہی ہے….۔ لیکن یہ شیطانی گروہ اللہتعالیٰ کے ایسے بندوں کو گمراہ کرنے سے قاصر رہتا ہے جنہیں اللہتعالیٰ کا قرب حاصل ہو اور جنہیں اللہتعالیٰ کی امانت کا علم حاصل ہو….۔
آگیا بتیال بھی شرپسند جنات اور انسانوں پر مشتمل ایک گروہ کا نام ہے، جس کا کام انسانوں اور جنات کو گمراہ کرنا ہے…. تاکہ وہ دوسروں کے لئے فساد کا سبب بن سکیں…. عالمِ جنات کی حکومتوں نے کئی جگہ سے گروہِ شیطنت کا کافی حد تک قلع قمع کردیا ہے…. یہاں پر اس قسم کے گروہ سے وابستگی ثابت ہوجائے تو سزائے موت سنادی جاتی ہے….۔
یہاں تم نے دیکھا ہوگا کہ اہلِ سیاست، اہلِ روحانیت کے مشاورت سے نظامِ مملکت چلاتے ہیں…. آج کل عالمِ جنات میں تحقیق و ایجادات کا دور دورہ ہے….۔ یہ سب شر ہے یا خیر…. درحقیقت انسانوں نے ہم جنات کو خوامخواہ میں اپنا دشمن سمجھ رکھا ہے…. اگر یہ طرزِفکر ختم ہوجائے تو دونوں مخلوقات مل کر خیر کی طرزِفکر کے لئے زیادہ کام کرسکیں گی…. اور یہ کوئی انوکھی یا ناممکن بات بھی نہیں…. حضرت سلیمان علیہ السلام کے دور میں انسان اور جنات ایک ساتھ پیغمبرانہ مشن کی ترویج کے لئے کام کرتے تھے…. آج بھی اللہ کے دوستوںکی محفل میں سینکڑوں ہزاروں جنات شریک ہوتے ہیں اور فیض پاتے ہیں‘‘…. عمرام نے اپنی گفتگو ختم کی اور محفل میں موجود جنات وہاں سے رُخصت ہوگئے….۔
عمر قسطورہ کے دادا کی باتیں حیرت کے ساتھ سُن رہا تھا…. اُس نے آخر میں پوچھا ’’حضرت! مجھے اپنی ماں جی بہت یاد آرہی ہیں…. یہاں سے مجھے کب رُخصت ملے گی؟‘‘….۔
’’زیادہ نہیں بس ایک ماہ لگ جائے گا‘‘….۔
’’لیکن ایک ماہ تو بہت زیادہ عرصہ ہے‘‘….
’’دادا! ایک ماہ کا مطلب!…. یہ تو بہت زیادہ نہیں ہوجائے گا‘‘….۔ قسطورہ نے کہا
’’ہاں! یہ تو ہے‘‘…. عمرام نے کچھ سوچتے ہوئے کہا…. کچھ دیر خاموش رہے اور پھر قسطورہ کی طرف دیکھتے ہوئے بولے ’’میرا خیال ہے ہمیں عمر کو اعتماد میں لے لینا چاہئے‘‘….
’’ہاں! عمر بات یہ ہے کہ عالمِ جنات اور تمہاری دنیا کے درمیان وقت کا بہت فرق ہے…. جب تم ایک ماہ یہاں گزار کر وہاں پہنچو گے تو وہاں ایک سال کا عرصہ گزر چکا ہوگا‘‘….۔قسطورہ بولی
ایک سال!…. حضرت مجھ پر رحم فرمائیے…. میری ماں جی بہت بوڑھی ہیں، بیمار بھی رہتی ہیں…. کہیں ایسا نہ ہو کہ وہ میر اروگ لگاکہ دنیا ہی سے رُخصت نہ ہوجائیں…. اور حرا کیا وہ میرا ایک سال تک انتظار کرلے گی‘‘…. عمر کے آنسو نکل آئے….

(جاری ہے)