صحت و تندرستی

جسم کو صحت مند رہنے کے لیے مختلف وٹامنز اور معدنیات کی ضرورت ہوتی ہے۔ انہی میں سے ایک وٹامن ڈی بھی ہے جس کے حصول کا سب سے آسان ذریعہ سورج کی روشنی ہے۔
وٹامن ڈی ہڈیوں کی مضبوطی اور اعصاب کی نشونما کے لیے ضروری ہے۔ یہ وٹامن کچھ غذاؤں جیسے مچھلی، اورنج جوس، پنیر اور انڈے کی زردی وغیرہ میں بھی موجود ہوتا ہے لیکن اسے صرف ان غذاؤں کی مدد سے مکمل طور پر حاصل کرنا مشکل ہے۔جسم کو درکار وٹامن ڈی کی ضرورت پوری کرنے کے لیے سپلیمنٹس سے بھی مدد لی جاسکتی ہے۔ وٹامن ڈی کی کمی بہت سے طبی مسائل پیدا کرسکتی ہے جو کہ مندرجہ ذیل ہیں۔
ہڈیوں کی کمزوری
وٹامن ڈی ہڈیوں کی مضبوطی کے لیے ضروری ہے۔ وٹامن ڈی ہڈیوں میں کیلشیئم کو جذب ہونے میں مدد دیتا ہے جس سے ہڈیوں کی نشونما میں اضافہ ہوتا ہے۔ اس وٹامن کی کمی کمر، جوڑوں اور گھٹنوں وغیرہ میں درد کا سبب بن سکتی ہے جو اس قدر شدید ہوسکتا ہے کہ روزمرہ کے کام انجام دینے میں مشکل ہوسکتی ہے۔
ڈپریشن
وٹامن ڈی کی کمی خون کے بہاؤ کی رفتار کو کم کرتی ہے جس سے ایک طرف تو اعصاب اور پٹھوں کے کام کرنے کی صلاحیت متاثر ہوتی ہے، دوسری جانب دماغ کی طرف خون کا کم بہاؤ ڈپریشن، مایوسی اور اداسی کے جذبات پیدا کرنے کا سبب بنتا ہے۔
بہت زیادہ پسینہ آنا
وٹامن ڈی کی کمی جسم میں پسینہ کے غدود کو فعال کرتی ہے جس سے زیادہ پسینہ آتا ہے۔ یہ علامت نومولود بچوں میں بھی پائی جاسکتی ہے۔
اگر کسی شخص یا بچے کو بہت زیادہ پسینہ آرہا ہو تو یہ وٹامن ڈی کی کمی کی علامت ہوسکتی ہے۔
بالوں کا جھڑنا
بالوں کا تیزی سے جھڑنا ذہنی دباؤ کی وجہ سے بھی ہوتا ہے تاہم وٹامن ڈی کی کمی بھی اس کی ایک وجہ ہے۔ خواتین میں خاص طور پر بال جھڑنے کی ایک بڑی وجہ وٹامن ڈی کی کمی ہی ہے۔
پٹھوں میں درد
وٹامن ڈی کی کمی پٹھوں میں درد اور الرجی کا سبب بھی بن سکتی ہے۔ ایسے افراد سپلیمنٹس کے ذریعے وٹامن ڈی کی کثیر مقدار لے کر اس تکلیف سے محفوظ رہسکتےہیں۔
ہڈیوں، دانتوں، مسلز اور دیگر متعدد جسمانی افعال کے لیے وٹامن ڈی ضروری ہے۔
وٹامن ڈی کی کمی سے جسم کے لیے کیلشیم یا فاسفورس کی مقدار کو ریگولیٹ کرنا مشکل ہوجاتاہے۔ یہ وہ وٹامن ہے جو جسم خود بنانے سے قاصر رہتا ہے۔ اس کا حصول سورج کی روشنی سے ممکنہے۔ کچھ غذائیں بھی ایسی ہیں جو وٹامن ڈی کی کمی کو دور کرنے میں مفید ہوسکتی ہیں۔
مچھلی
مچھلی وٹامن ڈی کے حصول کا اچھا ذریعہ ہے اور لگ بھگ ہر طرح کی مچھلی اس حوالے سے مفید ہے تاہم چربی والی مچھلی زیادہ فائدہ مند ہے۔ اس غذا کا ایک فائدہ اور بھی ہے اور وہ ہے دل کی صحت کے لیے فائدہ مند اومیگا تھری فیٹی ایسڈز کاحصول۔
انڈے کی زردی
جو لوگ مچھلی کھانا پسند نہیں کرتے تو انڈے ایسے افراد کے لیے اچھا آپشن ہے۔ انڈے وٹامن ڈی سے بھرپور ہونے کے ساتھ دیگر غذائی اجزا بھی جسم کو فراہم کرتے ہیں۔ انڈے کی سفیدی میں پروٹین کی مقدار زیادہ ہوتی ہے مگر وٹامنز اور منرلز عام طور پر زردی میں ہوتے ہیں۔ ایک انڈے کی زردی سے کچھ مقدار میں وٹامن ڈی جسم کو ملتا ہے خصوصاً دیسی انڈوں میں یہ مقدار فارمی کے مقابلے میں تین سے چار گنا زیادہ ہوتی ہے۔
فورٹیفائیڈ ملک
گائے کا فورٹیفائیڈ دودھ وٹامن ڈی کے ساتھ ہوتا ہے مگر آئس کریم اور پنیر میں یہ خوبی موجود نہیں ہوتی۔
فورٹیفائیڈ اورنج جوس
اگر دودھ پسند نہیں تو کوئی مسئلہ نہیں، فورٹیفائیڈ اورنج جوس سے بھی اس کا حصول ممکن ہے، تاہم مختلف برانڈز میں اس وٹامن کی مقدار مختلف ہوسکتی ہے، تو لیبل چیک کرنا ضروری ہے۔
سپلیمنٹس
وٹامن ڈی سپلیمنٹس بھی بازار میں عام دستیاب ہیں۔ مگر کسی سپلیمنٹ کا استعمال ڈاکٹر کے مشورے سے ہی کرنا چاہیے۔
گائے کی کلیجی
گائے کی کلیجی میں وٹامن ڈی کی مقدار کافی زیادہ ہوتی ہے۔ اس سے دیگر غذائی اجزا بھی جسم کو ملتے ہیں جیسے وٹامن اے، آئرن اور پروٹین، تاہم اس میں کولیسٹرول کی مقدار کافی زیادہ ہے تو اسے بہت زیادہ کھانے سے گریز کرناچاہیے۔

دنیا بھر میں وبائی شکل اختیار کرنے والا کورونا وائرس کسی کو بھی متاثر کر سکتا ہے لیکن ان لوگوں کو کورونا وائرس سے خطرہ زیادہ ہے جو کہ ضیعف ہیں یا جنھیں پہلے سےصحت کے مسائل ہیں۔
اس وائرس سے ہلاک ہونے والوں میں زیاہ تعداد معمر لوگوں کی ہے جو کے پہلے سے کسی بیماری میںمبتلا تھے۔
کس کو خطرہ ہے؟
جن لوگوں کو پہلے سے صحت کے مسائل کا سامنا ہے تو اس کا مطلب ہرگز یہ نہیں کہ كورونا وائرس انہیں ہر صورت ہوگا، ہاں ایسے لوگوں کو اس سے نسبتاً زیادہ خطرہ ضرور ہے اور اس کے لیے ضروری ہے کہ یہ لوگ احتیاطی تدابیر پر زیادہ شدت سے عمل کریں۔
جن لوگوں کی عمر زیادہ ہوتی ہے ان کی قوت مدافعت کمزور ہوتی ہے اور وہ لوگ جنھیں پہلے سے صحت کے مسائل ہیں جیسا کہ ذیابیطس، دمہ یا دل کی بیماری ہے انھیں کورونا وائرس کے اثرات اور علامات زیادہ محسوس ہوں گی۔
بہت سے لوگ کورونا وائرس لاحق ہونے کے چند دن بعد ٹھیک ہوجائیں گے لیکن بہت سے لوگ ایسے بھی ہیں جو کہ جلدی صحت یاب نہیں ہوتے اور چند لوگوں کی اس سے موت واقع ہوسکتی ہے۔
میں کیسے اس سے بچوں؟
یہ وائرس کھانسی اور چھینکوں سے اور آلودہ جگہوں سے پھیلتا ہے جیسا کہ پبلک ٹرانسپورٹ، دفاتر اور عوامی مقامات میں ہینڈ ریلنگ یا دروازے کے ہینڈل۔
صفائی کا خیال رکھنا، اس وائرس کو مزید پھیلنے سے روک سکتا ہے۔
کھانستے یا چھینکتے وقت ناک اور منہ پر ٹشو یا اپنی آستین رکھنا۔
اپنے ہاتھوں کو باقاعدگی سے صابن سے دھونایا سینیٹائزر کا استعمال کرنا۔
بیمار لوگوں سے فاصلہ رکھنا۔
بغیر دھلے ہاتھوں کو آنکھوں، ناک اور منہ پر لگانے سے اجتناب کرنا۔
اگر میری طبیعت خراب ہونے لگے تو مجھے کیا کرنا چاہیے؟
کورونا وائرس کی علامات ہیں کھانسی، تیز بخار اور سانس لینے میں دشواری۔ لیکن ان علامات کا مطلب یہ نہیں کہ اس فرد کو کورونا وائرس ہی ہے۔
برطانیہ کے رائل کالج آف جی پی سے تعلق رکھنے والے ڈاکٹر جانتھن لیچ کہتے ہیں: ‘‘مریض کے لیے سب سے اہم چیز یہ ہے کہ وہ خوف زدہ نہ ہو۔ ’’
سب سے اہم چیز ہے کہ اس انفیکشن کو ہونے سے روکنے کے لیے اقدامات کیے جائیں۔
کیا میں اپنی دوائیاں لینا بند کردوں؟
جو لوگ کسی مرض میں مبتلا ہیں ان کے لیے ضروری ہے کہ وہ اپنی دوائیں وقت پر لیتے رہیں۔
میں دمے کا مریض ہوں، مجھے کیا کرنا چاہیے؟
دمےکے مرض کے لیے کام کرنے والی برطانوی ادارے ایستما یو کے کا کہنا ہے کہ دمے کے مریض ڈاکٹر کے تجویز کردہ اپنے انہیلر کا استعمال جاری رکھیں۔
جن لوگوں کی حالت ایستما (دمے) کی وجہ سے زیادہ بگڑ رہی ہو انہیں فوراً ہسپتالجانا چاہیے۔
مجھے ذیابطیس ہے میں کیا کروں؟
جو لوگ ذیابطیس ٹائپ ون یا ٹو کے مریض ہیں انہیں اس بیماری کے اثرات زیادہ محسوس ہوسکتے ہیں۔
ذیابطیس یو کے کے ڈاکٹر ڈین ہاورڈ کا کہنا ہے کہ جن لوگوں کو ذیابطیس ہے انہیں کورونا وائرس سے زیادہ خطرہ لاحق ہے۔
جن لوگوں کو ذیابطیس ہے اور انہیں کھانسی، تیز بخار یا سانس لینے میں دشواری ہورہی ہے تو وہ فوراً ہسپتال جائیں، اور اپنی بلڈ شوگر بھی چیک کرتے رہیں۔
اگر مجھے کوئی اور بیماری ہے تو میں کیا کروں؟
جن لوگوں کو ہائی بلڈ پریشیر، پھیپڑوں کی تکلیف یا جن کی قوتِ مدافعت کمزور ہے انھیں کورونا وائرس سے صحت کے دوسرے مسائل یا بیماری لاحق ہونے کا خطرہ زیادہ ہے۔
بچوں میں سرطان اور لیوکیمیا کی بیماری کے لیے کام کرنے والے برطانوی ادارے چلڈرنز کینسر اینڈ لیوکیمیا گروپ (سی سی ایل جی) نے کینسر کے مرض میں مبتلا بچوں کے والدین سے کہا ہے کہ وہ اپنے اپنے ڈاکٹروں سے رابطہ کریں تاکہ وہ انھیں ان کے بچوں کے لیے احتیاطی تدابیر بتاسکیں۔
میں سگریٹ پیتا ہوں، کیا مجھے خطرہ ہے؟
پبلک ہیلتھ چیریٹی کی سربراہ ڈیبرا آرنٹ کہتی ہیں کہ جو لوگ بہت زیادہ سگریٹ پیتے ہیں انھیں یا تو اسے کم کردینا چاہیے یا پھر چھوڑ دینا چاہیے۔
سگریٹ پینے والے لوگوں کو پھیپڑوں کے انفیکشن اور نمونیا ہونے کا خطرہ عام لوگوں کے مقابلے میں دو گنا زیادہ ہے۔سگریٹ ترک کرنا صحت کے لیے بہت اچھا ہے۔ کورونا وائرس کا خطرہ سگریٹ چھوڑنے میں حوصلہ افزائیکرےگا۔
میں عمر رسیدہ ہوں، کیا مجھے خود کو الگ کر لینا چاہیے؟
برطانوی حکومت کے چیف میڈیکل ایڈوائزر یا مشیر کا عمر رسیدہ افراد کے بارے میں کہنا ہے کہ اگر احتیاطی تدابیر پر ٹھیک طرح عمل ہورہا ہو تو انہیں خود کو دوسروں سے الگ کرنے کی لازمی ضرورت نہیں ہے۔
ضعیف افراد کے لیے کام کرنے والے برطانوی ادارے ایج یو کے کا کہنا ہے کہ عمر رسیدہ افراد کے دوستوں اور رشتہ داروں کو ان کا خیال رکھنا چاہیے اور وقتاً فوقتاً ان سے حال احوال چال پوچھتے رہنا چاہیے۔

ہم میں ہر کوئی کبھی نہ کبھی دانت کی تکالیف سے پریشان نظر آتا ہے۔ عموماً لوگ یہ شکایت کرتے ہیں کہ مہنگے ٹوتھ پیسٹ کے استعمال کے باوجود دانتوں میں سفیدی اور چمک دکھائی نہیں دیتی۔ ایسی صورتحال میں دانتوں کی دیکھ بھال کے آسان گھریلو علاج بہت مفید ہوسکتے ہیں۔ چاہے دانتوں کو صاف کرنا ہو یا دانتوں کی چمک بڑھانا ، دانتوں سے بدبو دور کرنا یا دانتوں کی خرابی کو روکنا ہے۔
دانتوں کے لیے سادہ اور دیسی ٹوٹکے حاضر ہیں جنہیں صدیوں سے کارگر پایا گیا ۔ یہ آسان گھریلو ٹوٹکے دانتوں اور مسوڑھوں کے لیے مفید ہیں ۔
سفید موتیوں جیسے دانتوں کے لیے آدھا چمچ بیکنگ سوڈا ایک چٹکی بھر نمک کے ساتھ ملا کر دانتوں کو برش سے مساج کریں۔ اس کے بعد ٹوتھ پیسٹ سے دانت برش کریں۔
دانت چمک داربنانے کے لیے ایک چائے کا چمچہ کھانے کا سوڈا ، ایک چمچہ پسا ہوا نمک، پسا ہواسہاگہ لے کر شیشی میں رکھ لیں۔ اس سے دانت صاف کریں ۔
تھوڑا سا بیکنگ سوڈا لے کر اس میں تازہ لیموں کا رس ملا کر پیسٹ بنا لیں اور برش کی مدد سے اسے دانتوں پر اچھی طرح لگائیں۔ اس سے قبل دانتوں کو ٹشو پیپر سے رگڑ کر صاف کر لیں ۔
سرسوں کے تیل میں نمک ملا کر صبح شام دانتوں پر ملنے سے دانتوں سے خون آنا ، مسوڑھوں کی سوزش اور دانتوں کے درد میں آرام پہنچتا ہے ساتھ ہی دانت چمکیلے اور مضبوط بھی بنتے ہیں۔
صبح دانت برش کرنے سے پہلے ایک چمچ ناریل کا تیل منہ میں ڈال کر دانتوں کے اردگرد خوب اچھی طرح گھمائیں اور 15 منٹ تک تیل دانتوں پر لگا رہنے دیں، پھر نیم گرم پانی سے اچھی طرح کلی کر لیں۔یہ عمل ہفتے میں دو سے تین بار کرنے سے دانت صاف اور سفید ہو جائیں گے ۔
اسٹرابیری میں دانتوں کو صحت مند اور سفید کرنے والے قدرتی اجزاء شامل ہیں۔ سٹرابیری کا ٹکڑا چند منٹ دانتوں،مسوڑھوں پر ملنے سے ان پر جما ہوا گاڑھا میل(پلاک) دور ہو جاتا ہے۔
دانتوں کا پیلا پن دور کرنے کے لیے ایک اسٹرابیری کےگودے میں آدھا چائے کا چمچ بیکنگ پاؤڈر مکس کرکے ٹوتھ برش سے پانچ منٹ دانتوں پر لگا رہنے دیں پھر اچھی طرح برش کریں۔
لونگ میں پایا جانے والا جزEugenol جراثیم کش اثرات کا حامل ایک طاقتور اینٹی سیپٹک ہے۔ دانت یا مسوڑے پر لونگ یا لونگ کا تیل لگانا مسوڑھوں کی صحت کے لیے بہترین مانا جاتا ہے۔
تلسی کے چند پتے باقاعدگی سے چبائے جائیں تو یہ دانتوں کے پلاک اور بدبو دار سانسوں کو دور کرنے میں مفید ہیں۔
ملیٹھی کی جڑوں میں Licoricidinاور Licorisoflavin نامی مرکبات پائے جاتے ہیں۔ یہ دانتوں کے خلا میں جراثیم کی پیداوار کو روکتے ہیں اور بدبودار سانسوں کے خلاف نبردآزما رہتے ہیں۔ دانتوں کی بیماریوں سے بچاؤ کے لیےایک چٹکی ملٹھی سفوف لے کر متاثرہ دانت پر رکھیں یا اس سفوف سے دانت برش کریں۔
نیم یا پیلو کے درخت کی نرم چھال دانتوں کے داغ اور پیلاہٹ ختم کرنے میں بہت مفید ہے۔ روزانہ دو سے تین دفعہ اس چھال سے دانت صاٖف کرنے سے دانت موتی کی طرح چمکنے لگتے ہیں۔
پودینہ دانتوں کو چمکانے کے لیے انتہائی فائدہ مند ہے ۔ پودینہ کوٹ کر رکھ لیں اور برش پر لگا کر ٹوتھ پیسٹ کی جگہ یہ استعمال کرنے سے دانت مضبوط اور چمک دار ہوجاتے ہیں ۔
لیموں میں موجود سٹرس ایسڈ دانت سفید کرتے ہیں۔ ایک لیموں کا چھلکا لیں اور اپنے دانتوں پر اچھی طرح رگڑیں ۔
نمکین نیم گرم پانی دانتوں کو قدرتی طور پر صاف رکھتا ہے اورمسوڑھوں کو صحت مند رکھتا ہے۔ ایک چائے کا چمچ نمک نیم گرم پانی میں مکس کر کے ماؤتھ واش کے طور پر استعمال کریں۔
کیلے کے چھلکے میں پوٹاشیم، مینگیز اور میگنیشیم پائے جاتے ہیں جو دانتوں کو صحت مند اور چمک دار بنانے کا بہترین نسخہ ہیں۔ تقریباً ایک منٹ کیلئے چھلکے کو دانتوں پر رگڑیں اور یہ عمل روزانہ دو مرتبہ کریں، مالٹے اور سیب کے چھلکے کے بھی ایسے ہی فوائد دیکھے گئے ہیں۔
بینگن کی راکھ کسی بھی ٹوتھ پیسٹ کے ساتھ ملا کر دانت صاف کیے جائیں تو دانت سفید اور چمک دار ہوجاتے ہیں۔
صبح برش کرنے کے بعد، سیب کے سرکہ میں برابر مقدار میں پانی ڈال کر اس سے کلی کرینے سے دانتوں کی بدبو منٹوں میں ہی ختم ہوجاتی ہے۔ سرکہ ہفتے میں دو بار سے زیادہ استعمال نہ کریں۔
خشک سنترے کے چھلکوں کے ساتھ تیز پات باریک پیس کر رکھ لیں۔ اس سفوف کو انگلی کی مدد سے دانت صاف کریں۔ یہ گھریلو ٹوتھ پاؤڈر دانتوں کے لئے بہت فائدہ مند ہے۔
ایک ایک چائے کے چمچ ہلدی اور ناریل کے تیل میں 2 سے 3 قطرے پودینے کے تیل کے مکس کریں، اس مکسچر کو معمول کے ٹوتھ پیسٹ کی طرح استعمال کریں۔ یہ گھریلو ساختہ ٹوتھ پیسٹ دانتوں کی سطح کی نگہداشت کے ساتھ ساتھ سفیدی بھی لوٹاتا ہے اور سانسوں کو بھی مہکاتا ہے۔
تازہ ایلو ویرا جوس یا اس سے تیار کردہ جیل دانتوں پر رگڑیں ، برش سے مساج کریں اور کلیاں کرلیں۔ یہ عمل آپ برش کرنے کے بعد بھی دہرا سکتے ہیں، چند ہفتوں میں مسکراہٹ سفید جگمگاتے دانتوں سے سج جائے گی۔

ابٹن کا شمار چہرے پر دلکشی لانے والی اشیاء میں کیا جاتا ہے۔ اس کا استعمال صدیوں سے چلا آرہا ہے۔
شادی بیاہ کے موقع پر باقاعدہ ابٹن کی رسوم ہوتی ہیں جس میں دلہن کو ابٹن لگایا جاتا ہے۔ کچھ عرصہ پہلے تک صرف دلہنیں ہی شادی سے مہینہ بھر پہلے خوب صورتی کو بڑھانے کے لیے ابٹن کا مساج کیا کرتی تھیں لیکن اب روزمرہ زندگی میں حسن کی حفاظت کے لیے اس کے استعمال کا مشورہ دیا جاتا ہے۔
ابٹن کے فوائد
ابٹن جلد سے مردہ خلیات کو ختم کرنے میں مفید ہے۔ خون کی گردش کو بڑھاتا ہے جس سے نئے خلیات بن کر جلد کو تروتازہ کرتے ہیں۔ جلد میں کھنچاؤ پیدا کرتا ہے جس سے جلد ڈھلکتی نہیں۔ جلد کے ساتھ جمی گرد کو صاف کرتا ہے۔ خاص طور پر بازو اور ٹانگوں کے جوڑوں سے سیاہی کی تہہ ہٹاتا ہے۔ اس کے مسلسل استعمال سے جلد کے روئیں کمزور ہوکر آہستہ آہستہ جھڑنے لگتے ہیں۔
اُبٹن لگانے کا طریقہ
خشک جلد پر ابٹن لگانے سے پہلے کسی تیل سے مساج کرلیں اور پھر ابٹن لگائیں۔ یاد رہے کہ موسم سرما میں ابٹن میں تیل یا چکنے اجزاء کی آمیزش زیادہ کرنی چاہیے اور موسم گرما میں کم۔ ابٹن کا آمیزہ نہ زیادہ سخت اور نہ پتلا بلکہ ہموار پیسٹ ہو جو آسانی سے لگ جائے اور اتر جائے۔ ابٹن نہانے سے پہلے استعمال کرنا مفید بتایا جاتا ہے۔
ابٹن کی تیاری
اس کی کئی اقسام ہیں جن کو ضرورت کے مطابق استعمال کیا جاسکتا ہے۔
فیشل ابٹن فارمولا
ایک کھانے کا چمچ بادام کا پیسٹ، ایک کھانے کا چمچ کاجو کا پیسٹ، ڈیڑھ چائے کا چمچ پستہ پیسٹ، ایک کھانے کا چمچ بالائی، ایک کھانے کا چمچ سرسوں یا بادام کا تیل، ایک کھانے کا چمچ عرق گلاب، ایک چوتھائی کپ سرخ مسور کی دال کا پیسٹ، ان سب کو مکس کرکے چہرے اور گردن پر لگائیں جب تھوڑا سا گیلا ہو تو رگڑ کر اتار دیں۔ (بادام، کاجو، پستہ اور دال مسور کا پیسٹ بنانے کے لیے ان کو پیس کر پانی کے ساتھ مکس کریں)۔
بادام کا ابٹن
بادام ہر قسم کی جلد کے لیے فائدہ مند ہے۔ اس سے جلد نکھر جاتی ہے۔
بادام کو لیموں کے رس میں باریک پیس لیں پھر اس میں انڈے کی سفیدی پھینٹ کر ملالیں اور اتنا بیسن شامل کریں کہ ہموار پیسٹ بن جائے۔
اس پیسٹ کو چہرے، بازو اور گرن پر ملیں، پندرہ منٹ بعد نیم گرم پانی سے دھولیں۔
اس ابٹن کو ہفتہ میں دو دن استعمال کریں اور ہر بار تازہ بنائیں۔
جلد کی صفائی اور چہرے کے بال کم کرنے کےلیے
ایک کپ چنبیلی کی کلی میں ایک کپ بیسن، دو کھانے کے چمچ ہلدی، ان اشیاء کو اچھی طرح مکس کرلیں۔ اس پاؤڈر کا ایک بڑا چمچ لیں اور اس میں چند قطرے لیموں کا رس اور پانی ملا کر استعمال کریں، چند دن استعمال سے چہرے کی رنگت صاف ہوجاتی ہے اور چہرے کے روئیں بھی کم ہوجاتےہیں۔
کیل مہاسوں سے نجات
چہرے کے کیل مہاسے اور دانوں کے لیے ابٹن مفید ہے۔ تین چائے کے چمچ بیسن، ایک چوتھائی چائے کا چمچ ہلدی، دو چائے کے چمچ صندل پاؤڈر، ایک چائے کا چمچ نیم پاؤڈر، دو چائے کے چمچ پسا ہوا کھیرا۔ ان سب اجزاء کو مکس کرکے چہرے پر دس سے پندرہ منٹ لگائیں اور کچھ دیر گولائی میں مساج کریں۔
اس سے جلد کو سکون ملتا ہے اور آہستہ آہستہ چہرے سے کیل، مہاسے اور دانے ختم ہوجاتے ہیں۔ اسے ہفتہ میں دو بار لگائیں۔
اسکن نرم و ملائم کرنے اور مردہ خلیات ختم کرنے کے لیے
تین چائے کے چمچ دال مونگ، ایک چائے کا چمچ سوکھی میتھی، ایک چائے کا چمچ مالٹے کی خشک چھال، ایک چائے کا چمچ نیم پاؤڈر، ان سب کو پیس کر روغن زیتون، روغن بادام یا عرق گلاب کے ساتھ ملا کر پیسٹ بنالیں اور اس ابٹن کو چہرے، بازو اور گردن پر دس منٹ لگا رہنے دیں۔ یہ ابٹن جلد سے مردہ خلیات ختم کرکے نرم و ملائم بنانے میں مدد کرتا ہے۔
موئسچرائزنگ ابٹن
خشک جلد کو موئسچرائز کرنے کے لیے یہ ابٹن مفید ہے۔
چھ عدد بادام کی گریاں رات بھر آدھا کپ کریم میں بھگو کر رکھ دیں اور صبح چوپر مشین میں پیس لیں، اس پیسٹ میں دو چائے کے چمچ تل کا تیل اور ایک چائے کا چمچ تلسی پاؤڈر مکس کرکے چہرے پر دس منٹ لگا کر گولائی میں مساج کریں۔ تھوڑی دیر بعد ٹھنڈے پانی سے دھولیں۔
میڈیکیٹڈ ابٹن
آدھا کپ بیسن، ایک چائے کا چمچ ہلدی، ایک چائے کا چمچ لیموں کا رس، ایک چائےے کا چمچ دودھ ایک چائے کا چمچ ناریل یا بادام کا تیل، ان اجزاء کو پانی یا دودھ کے ساتھ مکس کرکے سارے جسم پرلگائیں۔ پانچ منٹ بعد رگڑتے ہوئے اتار دیں اور غسل کرلیں۔

ماہرین نفسیات کا کہنا ہے کہ تقریباً 75 فیصد امراض کا تعلق ٹینشن سے ہوتا ہے۔ موجود ہ دور میں ذہنی دباؤ اور ٹینشن میں بہت تیزی سے اضافہ ہو رہا ہے۔ عالمی ادارہ صحت کے ایک حالیہ سروے کے مطابق ‘‘دنیا کی آبادی کا تقریباً بیس فیصد حصہ اس مرض میں مبتلا ہے۔’’
ہمارے ملک میں چونکہ معاشی دباؤ زیادہ ہے اس لیے اندازہ ہے کہ یہاں یہ تناسب زیادہ ہوگا۔
ٹینشن کیا ہے….؟
ٹینشن سے مراد وہ حالت ہے جب کسی کو کسی مسئلے کا حل نہ مل رہا ہو۔ جس کے باعث اس کے اندر مایوسی اور ناامیدی کے جذبات پروان چڑھنے لگیں اور نتیجتاً وہ چیخنے چلانے لگے یا پھر چپ سادھ کر اپنے بے گانوں سے بےنیاز ہوجائے۔
یہ ایک ایسی نفسیاتی بیماری ہے جس کا ادراک بہت کم لوگوں کو ہوتا ہے۔ اسی لیے وہ اس کے مناسب علاج کی طرف توجہ نہیں دے پاتے۔
ٹینشن کے اسباب و علامات
اس مرض کا آغاز جذباتی، سماجی یا معاشی حادثے سے پیدا ہونے والے ذہنی دباؤ سے ہوتا ہے ابتداء میں مریض پر افسردگی طاری رہتی ہے۔ حال سے عدم اطمینان اور مستقبل سے ناامیدی پیدا ہوجا تی ہے۔ بعض اوقات ذہنی دباؤ اتنی شدت اختیار کرلیتا ہے کہ مریض خودکشی کی کوشش بھی کرنے لگتا ہے۔ ایسے لوگوں میں احساس تحفظ کی کمی اور توجہ کیطلب ہوتی ہے۔
ماہرین کا خیال ہے کہ احساس کمتری اور طبیعت کی حساسیت اس مرض کا سبب بنتے ہیں۔ مذہبی جذبات کو ٹھیس پہنچنے یا عزت نفس مجروح ہونے سے بھی ٹینشن پیدا ہوتی ہے۔ معاشرے میں غربت اور بےروزگاری اس کے اہم ترین اسباب ہیں، ایک سروے کے مطابق ‘‘مرد پانچ فیصد اس مرض میں مبتلا ہیں، جبکہ خواتین نو فیصد اس مرض میں مبتلا ہیں۔’’
ٹینشن کی دیگر وجوہات میں خود رحمی، تاسف اور اپنے آپ کو الزام دینا بھی شامل ہیں۔ بعض اوقات انسان کسی بھی حادثے یا واقعہ کا ذمہ دار اپنے آپ کو ٹھہرانے لگتا ہے جس کی بناء پر وہ ذہنی دباؤ میں مبتلا ہوجاتا ہے۔
انسانی صحت پر اثرات
ذہنی دباؤ اور تناؤ کی وجہ سے انسان مختلف چھوٹی بڑی بیماریوں میں مبتلا ہوجاتا ہے اور ان میں سے بعض بیماریاں خطرناک اور پیچیدہ شکل اختیارکرلیتی.ہیں۔
ماہرین اعصاب نے تحقیق کے بعد پتہ چلایا ہے کہ دباؤ اور امراض میں گہرا تعلق ہے۔ فکر و پریشانی اور تناؤ کے حالات طویل عرصے تک برقرار رہنے سے جسم کا نظامِ مدافعت کمزور اور ناقص ہوجاتا ہے۔ اس کے نتیجے میں جسم میں کئی کیمیائی تبدیلیاں رونما ہونے لگتی ہیں۔ ان سے ہارمونز متاثر ہوتے ہیں اور جسم میں مضر کیمیائی ردعمل ہوتے ہیں جن سے توانائی میں کمی آتی ہے۔ ٹینشن کئی امراض کا سبب بنتی ہے جن میں سے اہم درج ذیل ہیں۔
آنتوں کا دمہ ۔
امراض قلب۔
ہارمونز کی بے قاعدگی ۔
تھکان۔
آنتوں کا دمہ
ذہنی دباؤ، جذباتی ہیجانات، ٹینشن اور پریشانی جیسے عوامل آنتوں کی زود حسی کی کیفیت میں شدت پیدا کردیتے ہیں۔ بدہضمی، دست یا پیچش، قبض، متلی، پیٹ میں اینٹھن، ذہنی تناؤ اور دیگر کئی پریشان کن امراض کا سبب آنتوں کی زود حسی بھی ہوسکتی ہے۔ اسے طبی ماہرین ‘‘آنتوں کا دمہ’’ کہتے ہیں یہ خطرناک عارضہ بغیر کسی انفیکشن کے محض ذہنی پریشانیوں سے بھی لاحق ہوسکتا ہے۔
مریض کے پیٹ کے امراض کا اصل سبب معدے یا آنتوں میں کسی قسم کا انفیکشن نہیں ہوتا بلکہ کوئی چیز آہستہ آہستہ نظام انہضام پر اثر انداز ہو رہی ہوتی ہے اور وہ پراسرار چیز ‘‘اعصابی تناؤ’’ یا ‘‘ٹینشن’’ ہوتی ہے۔
امراض قلب
ذہنی اور نفسیاتی دباؤ خون کی گردش اور بہاؤ میں رکاوٹ کا باعث بنتا ہے۔ غصے کی وجہ سے خون کا جمنا آزادانہ اور بلا روک ٹوک جاری رہتا ہے۔ تیز رفتار خون جمے ہوئے خون کے ان لوتھڑوں کو اپنی مقررہ جگہ سے ہٹا کر دوران خون میں آزاد چھوڑ دیتا ہے جو بعد میں خون کی پتلی نالیوں میں پھنس کر وہاں خون کی روانی کو روک دیتے ہیں اور یوں غشی یا ہارٹ اٹیک ہوسکتا ہے۔ ایک تحقیق کے مطابق غصے کے دوران یا بعد میں ہارٹ اٹیک کا خطرہ دوگنا ہوجاتا ہے۔
ہارمونز پر ٹینشن کے اثرات
جسم کے اندر بہت سی غدودی رطوبتیں پیدا ہو کر خون میں شامل ہوتی ہیں اور جسم کی نشو و نما کا پیچیدہ عمل بڑی باقاعدگی کے ساتھ جاری رکھتی ہیں۔ غالباً جسم کا ہر خلیہ کوئی نہ کوئی رقیق مادہ بناتا ہے۔ یہ مادے ‘‘ہارمونز’’ اور ‘‘کولیونز’’ کہلاتےہیں۔ صحت کی حالت میں ان کے درمیان عمدہ توازن رہتا ہے لیکن تشویش و اضطراب اسے درہم برہم کردیتا ہے۔ لبلبے پر اثر انداز ہو کر ذیابیطس کا مرض پیدا کرتا ہے۔ گلھڑ کا مرض تھائی رائیڈ غدودوں کے زیادہ متحرک ہونے سے پیدا ہوتا ہے اور اس کی بڑی وجہ حد سے زیادہ پریشانی اور تشویش ہے۔
ٹینشن کی وجہ سے گردوں کے اوپر واقع غدود ایڈرینالین زیادہ مقدار میں پیدا کرتے ہیں جو بلڈپریشر کی بیماری کا باعث بنتا ہے۔ دل تیزی سے دھڑکتا ہے خون کی نالیاں سکڑتی ہیں اور تمام اعضاء کی کارکردگی متاثر ہوتی ہے۔
تھکان
ہر وقت پریشان رہنے سے انسان زیادہ تھکتا ہے کام کرنے سے نہیں۔
ہر وقت پریشان رہنے سے انسانی جسم پر برا اثر پڑتا ہے۔ اعصاب کمزور ہوجاتے ہیں اور جسمانی قوت کے ذخائر ختم ہوجاتے ہیں جس کی وجہ سے انسان تھکن، افسردگی اور مایوسی میں مبتلا ہوجاتا ہے۔ وزن کم ہوجاتا ہے۔ نیند بخوبی نہیں آتی۔ سانس کی رفتار کم ہوجاتی ہے اور مزاج میں چڑچڑا پن پیدا ہوتا ہے۔ الغرض ٹینشن انسانی جسم اور صحت کا دشمن ہے اس لیے اس کو معمولی سمجھ کر نظر انداز نہ کریں اور نہ ہی اسے اپنے اوپر طاری ہونے دیں۔ بلکہ اس کے سدباب کے لیے کوششیں کرنی چاہئیں۔
ٹینشن کا علاج اور احتیاطی تدابیر
ٹینشن کسی جنون یا پاگل پن کا نام نہیں ہے بلکہ کوئی بھی شخص ٹینشن میں مبتلا ہوسکتا ہے۔ اس ضمن میں گھر والوں اور متعلقہ افراد کو چاہیے کہ مریض کے ساتھ محبت اور اپنائیت سے پیش آئیں۔
اس مرض کے ایک ماہر کا کہنا ہے کہ ٹینشن کا ابتدائی اور موثر ترین علاج گفتگو ہے۔ وہ کہتے ہیں کہ ان کے پاس جو افراد علاج کے لیے آتے ہیں وہ ان سے کہتے ہیں کہ بولیں، باتیں کریں، احساسات اور جذبات کو لفظوں میں ڈھالیں، خاموش رہنے یا اندر ہی اندر کڑھنے کے بجائے اسے باہر نکالنا ہی اس کا آسان اور بہتر حل ہے۔
ٹینشن کا تعلق حالات سے ہے۔ جب حالات قابو سے باہر ہوجائیں تو انسان کسی بھی وقت ذہنی دباؤ میں مبتلا ہوسکتا ہے لیکن اس میں مبتلا ہوجانے کے بعد اگر فرد کردار، سوچ اور رویے کو حقیقی مثبت اور صحت.مندانہ خطوط پر استوار کرے اور اپنی صحت کا خیال رکھے تو اس کے برے اثرات سے محفوظ رہا جاسکتا.ہے۔
صحت مند ذہن کے لیے صحت مندانہ روایات کو فروغ دینا چاہیے۔ بڑھتی ہوئی عمر کے بچوں کی غذا اور مناسب ورزشوں کا خاص خیال رکھیں۔
خوراک اور صحت کی دیکھ بھال ہر عورت کے لیے ضروری ہے کیونکہ گھر عورت سے ہی چلتا ہے۔ ایک صحت مند اور پُر جوش عورت ہی بہتر طریقے سے گھر چلا سکتی ہے۔ ہلکی پھلکی ورزش کی عادت تناؤ اور تفکرات سے نجات دلا سکتی ہے۔
پیدل چلنا اور یوگا بہترین ورزش ہے۔ پابندی سے نماز پڑھنے (خصوصاً تہجد کی عادت اپنانے) تلاوت کرنے، دوسروں کے دکھ درد میں شریک ہونے سے بھی روحانی و ذہنی سکون ملتا ہے۔ مثبت سوچ اور صحت مندانہ رویے کی حامل اور عبادت.گزارخواتین کو ٹینشن سے خوف زدہ ہونے کی قطعی ضرورت نہیں ہے، اگر خدانخواستہ یہ حملہ آور بھی ہو تو ان خواتین کو اس سے نمٹنا بخوبی آتا ہے۔
جب بھی محسوس کریں کہ شدید قسم کے دباؤ میں مبتلا ہیں یا تھکن ناقابل برداشت محسوس ہو تو تھوڑی سی دیر کے لیے مصروفیات روک دیں اور اس بات کی زیادہ فکر نہ کریں کہ یہ کام ارجنٹ یا فوری نوعیت کا ہے۔ تھوڑی دیر کے لیے پرسکون ہونے کی کوشش کریں۔ اپنے معمولات میں تبدیلی لائیں تو اور بہتر ہے۔ کسی تفریحی مقام پر کچھ وقت گزاریں۔ کوئی ایسا کام کریں (مثلاً مطالعہ، باغبانی وغیرہ) جس میں فرحت محسوس کریں۔ کوئی دلچسپ مشغلہ اختیار کیجیے۔ کسی پرانے دوست سے گپ.شپ کا اہتمام کیجیے۔ وقت کو خود پر طاری مت کیجیے۔ اطمینان سے اپنی مصروفیات جاری رکھیں۔