عالمی ادب

Aqwal Iqbal

اقوالِ زریں : علامہ اقبالؒ

⋅

 

 

اقوال کسی بھی مفکر کی تعلیمات کا نچوڑ ہوتے ہیں۔ ذخیرہ اقوال کا مطالعہ کرنے سے ہمارے لیے یہ ممکن ہو جاتا ہے کہ ہم کم سے کم وقت میں زیادہ افکار تک رسائی حاصل کرسکیں۔ ایک صاحبِ دانش کی تعلیمات کو اگر ایک درخت سے تشبیہہ دی جائے تو اقوال اس شجرِ سایہ دار کا پھل ہوتے ہیں۔ یوں ہم کہہ سکتے ہیں کہ اقوال کی صورت میں صدیوں کے تجربات چند لمحوں میں ہمارے حاشیہ ذہن پر پھیل جاتے ہیں۔ تاریخِ اقوام عالم اس بات کی گواہ ہے کہ مشاہیر کے اقوال نے قوموں کی زندگی میں کیا کیا انقلابات پیدا کیے۔

 

حضرت علامہ محمد اقبال سیالکوٹ میں ۱۸۷۷ء میں پیدا ہوئے، ابتدائی تعلیم سیالکوٹ ہی میں حاصل کی اور مزید تعلیم لاہور میں حاصل کرنے کے بعد اعلیٰ تعلیم کی غرض سے برطانیہ چلے گئے۔علامہ اقبال کا مقالہ reconstruction of religious thought in islam میں دورِ جدید میں مسلمانوں کو درپیش کئی مسائل کا ایک جامع اور قابلِ عمل حل پیش کیا گیا ہے۔
ہندوستان کے مسلمانوں کو بیدار کرنے میں علامہ اقبال کا بہت بڑا ہاتھ ہے، آپ کی شاعری نے ہندوستانی مسلمانوں میں ایک نئی روح پھونک دی اور سب سے پہلے دو قومی نظریہ اور مسلمانوں کے لئے ایک علاحدہ ملک کا نظریہ آپ ہی نے پیش کیا۔
علامہ اقبال کی شاعری کا بہت سی زبانوں میں ترجمہ ہوچکا ہے، قوم نے آپ کو حکیم الامت کا خطاب دیا، آپ کی شاعری میں مسلمانوں کی بیداری پیغام ہے، قائد اعظم محمد علی جناح کو مسلمانوں کی قیادت پر آمادہ کرنا علامہ اقبال ہی کا کام تھا۔

علامہ اقبال کے چند سبق آموز اور ناصحانہ اقوال ملاحظہ ہوں:

  • کلام اللہ کی محض تلاوت ہی نہیں بلکہ کلام اللہ کو سمجھنا بھی ضروری ہے۔
  • صرف کلام اللہ ہی مسلمان کے لئے باعثِ نجات ہے۔
  • عشق رسول اللہ صلی اللہ علیہ وسلم کے بغیر نہ دنیا میں کامیابی ہے اور نہ آخرت میں۔
  • مصائب بھی ایک طرح سے عطیۂ خداوندی ہیں، تاکہ انسان اپنی اصلاح کرے۔
  • مادہ اور روح دونوں کے امتزاج کا نام حقیقت ہے
  • کردار اور صحت مند تخیل میر آجائے تو اس گناہ اور دکھ بھری دنیا کی ایسی تعمیر نو ممکن ہے کہ ایک حقیقی جنت بن جائے۔
  • زندگی میں کامیابی کا انحصار عزم پر ہے نا کہ عقل پر….
  • اپنی حدود کو پہچانیے اور اپنی صلاحیتوں کو پرکھیے پھر زندگی میں آپ کی کام یابی یقینی ہے۔
  • قوی انسان ماحول تخلیق کرتا ہے۔ کمزوروں کو ماحول کے مطابق اپنے آپ کو ڈھالنا پڑتا ہے۔
  • یقین ایک عظیم قوت ہے۔
  • سچی سیاسی زندگی کا آغاز، حقوق کے مطالبے سے نہیں بلکہ فرائض کی ادائیگی سے ہوتا ہے۔
  • اگر آپ چاہتے ہیں کہ دنیا کے شور و غوغا میں آپ کی آواز سنی جائے تو آپ کی روح پر محض ایک ہی خیال کا غلبہ ہونا چاہیے۔
  • مقصد واحد کی لگن والا آدمی ہی سیاسی اور معاشرتی انقلابات پیدا کرتا ہے، سلطنتیں قائم کرتا ہے اور دنیا کو آئین عطا کرتا ہے۔
  • میں اپنے شب وروز اور ماہ و سال کی قدر و قیمت ان تجربات کے لحاظ سے جانچتا ہوں جو وہ مجھے بخشتے ہیں اور بعض اوقات میں یہ دیکھ کر حیران رہ جاتا ہوں کہ ایک آن واحد پورے ایک سال سے زیادہ گراں قدر ہے۔
  • تاریخ ایک طرح کا ضعیم گرامو فون ہے، جس میں اقوام عالم کی صدائیں گونجتی ہیں۔
  • سفارش خودداری کی قاتل ہے۔
  • سوچنے والے زندہ انسان کے خیالات میں تبدیلیاں ہوتی ہیں، جبکہ پتھر ساکن رہتا ہے۔
  • ضبط نفس افراد میں ہوتو اس سے خاندانوں کی تعمیر ہوتی ہے اور اگر اقوام میں ہو تو سلطنتیں قائم ہوتی ہیں۔
  • مخالف کو بھی نرم خوئی سے سمجھاؤ، دلوں کی فطرت ہے کہ اسے محبت سے رام کیا جاسکتا ہے۔
  • انصاف ایک بیش بہا خزانہ ہے، لیکن اس کو رحم سے دور ہی رکھنا چاہئے۔
  • یقین محکم ایک لازوال طاقت ہے۔
  • اگر عزت و آبرو کی زندگی چاہتے ہو تو آپس میں اتحاد پیدا کرو۔
  • دین کی راہ میں خرچ کرنے کی نیت سے اگر مال جمع کیا جائے تو جائز ہے ورنہ نہیں۔
  • پہلے وقتوں میں تعلیم کم تھی اور علم زیادہ، آج کل علم کم ہے اور تعلیم زیادہ۔
  • علم کی ابتداء محسوس سے ہوتی ہے۔
  • نورِ ایمان، کسب حلال سے ہی پیدا ہوتا ہے۔
  • فقر کی پہلی منزل کسب حلال ہے۔
  • مہمان نوازی پیغبروں کا خاصہ ہے۔
  • اسلام میں توکل اور تقویٰ معیارِشرافت ہے نہ کہ حسب و نسب۔
  • کام میری نظر میں عبادت ہی کی طرح مقدس ہے۔
  • یہ خیال غلط ہے کہ اچھے کاموں کا اجر آئندہ زندگی میں ملے گا، حالانکہ اچھے عمل کبھی ضائع نہیں ہوتے۔
  • انسانیت کی بقاء کا راز انسانیت کے احترام میں پوشیدہ ہے۔
  • صبر مسلمانوں کے لئے بہت بڑی سعادت ہے۔
  • میں آزاد نظامِ تعلیم کا قائل نہیں، تعلیم بھی قومی ضروریات کی تابع ہے۔
  • باجماعت نماز کا مقصد یہ ہے کہ جماعت میں شامل سبھی لوگ اپنے مراتب اور حسب و نسب سے بالا ہوکر اللہ کے حضور حاضری دیں۔
  • ہر معاملے میں اللہ پر بھروسہ کرنا ہی مسلمانی ہے۔
  • ایک قابل استاد ایک سورج کی حیثیت رکھتا ہے، جو اپنی روشنی و حرارت ہر چیز اور جگہ تک پہنچاتا ہے۔
  • مخالف طاقتوں سے گھبرانا نہیں چاہئے بلکہ جد و جہد میں تیزی پیدا کرنا ضروری ہے کیونکہ یہی زندگی ہے۔
  • علی الصبح جس گھر میں تلاوت کلام پاک کی ہو وہ قابل تحسین ہے۔
  • اے مسلمانو! ذات پات، قومی عصبیت، برادری کے امتیاز اور بندہ و آقا کی تفریق کو رد کردو۔
  • جو شخص اپنی عظمت کے گیت گائے وہ ہرگز عظیم نہیں ہوسکتا۔
  • وہ تمام اشیاء جن کی موجودگی کا احساس ہمیں حواس کے ذریعہ ہو وہ اپنی کیفیات نفس ہیں باہر کی کوئی چیز نہیں۔
  • عقل ایک حد سے بڑھ نہیں سکتی جبکہ عشق کی کوئی حد نہیں۔
  • نقش حیات ہر لحظہ مٹتا ہے اور نئی شان سے ابھرتا ہے، فضاء و بقاء کی اس کثرت میں محض زندگی کی وحدت جلوہ گر ہے۔
  • زمانہ کسی کا انتظار نہیں کرتا، جو لوگ اپنا وقت بے علمی میں کھودیتے ہیں وہ اپنی ذلت و رسوائی کے ساتھ اپنی ہر اچھائی بھی کھودیتے ہیں۔
  • مسلمانوں کا ایک قوم بن کر رہنا ضروری ہے، کیونکہ قوم سے جدائی افراد کی اہمیت ختم کردیتی ہے۔
  • ہر مسلمان کو چاہئے کہ وہ بیکار نہ بیٹھا رہے، بلکہ رزق کی سعی کرے۔
  • ہر انسان ادنیٰ پیمانے پر خود خالق ہے اور ان تخلیقی قوتوں کو ضائع کرنا گناہ ہے۔
  • زندگی اصل میں موت کی ابتداء اور موت زندگی کا آغاز ہے۔
  • مومن کو چاہئے کہ دنیا میں محنت و مشقت میں زندگی گذارے۔
  • کامیابی اور ناکامی پر نظر نہ رکھو بلکہ اپنے مقاصد تخلیق کو جانو اور جد و جہد مسلسل جاری رکھو۔
  • قطرہ دریاء کے باہر ہے، جب قطرہ دریا میں مل جائے تو دریا ہے۔
Liked Liked
No Comments
Sultan Bahu iqbal

, ,

حضرت سلطان باہو اور علامہ اقبال کا شاہین

⋅

حضرت علامہ اقبال ؒ سلسلہ قادریہ سے بیعت تھے۔ان کے والد بھی صوفی بزرگ تھے۔ حضرت علامہ کے کلام میں جا بجا صوفیا ئے کرام سے عقیدت ومحبت کا اظہار ملتا ہے۔ اقبالؒ مولانا روم کے مرید ہندی ہیں تو وہ سنائی ؒ اور فرید الدین عطار ؒ کو بھی اپنا پیشوا مانتے ہیں۔ اقبال کے کلام میں ان صوفیا کی گونج ہر جگہ سنائی دیتی ہے ۔
یہ بات کم لوگ جانتے ہیں کہ علامہ اقبال کی شاعری اور فلاسفی کی عمارت جن بنیادوں پر کھڑی ہے وہ سلطان باہو کی فراہم کردہ ہیں۔ اگرچہ حضرت سلطان باھُو اور علامہ اقبال کے ادوار میں دو صدیوں سے زائد کا فرق ہےلیکن دونوں صوفیاء میں گہری فکری مماثلت نظر آتی ہے۔

 

شاہین اور شہباز :


سلطان العارفین حضرت سلطان باہوؒ اور علامہ اقبال ؒکے درمیان فکری اصطلاحات میں جو مشاہدات کا اشتراک ہے وہ آدمی کو بعض دفعہ حیران کر دیتا ہے مثلاً اقبال کا استعارہ شاہین دراصل سلطان باہو کا شہبازہے۔ سلطان باہو فرماتے ہیں۔ 

میں شہباز کراں پروازاں وچ دریا کرم دے ہُو
زبان تاں میری کن برابر موڑاں کم قلم دے ہُو
افلاطون ارسطو جیہں میرے اگے کس کم دے ہُو
حاتم جیہں لکھ کروڑاں در باہُو دے منگدے ہُو

اِس بیت میں حضرت سُلطان باھُو فرماتے ہیں :
میں شہباز بن کر دریائے لُطف و کرم میں پرواز کناں ہوں، میری زبان میں خالق کی عنایت کردہ ‘‘کُن’’اور قلم موڑنے کی تاثیر ہے۔
دنیا کے بڑے بڑے فلسفی افلاطون اور ارسطُو بھی میرے سامنے ادنیٰ اور کروڑوں حاتِم بھی میرے سامنے مانِند گداگر ہیں۔
اقبال نے اپنی شاعری میں شاہین کو بلند پروازی کی بنا پر ایک خاص علامت کی حیثیت سے پیش کیا ہے۔ اقبال کے نزدیک یہی صفات مردِ مومن کی بھی ہیں :

عقابی روح جب بیدار ہوتی ہے جوانوں میں
نظر آتی ہے ان کو اپنی منزل آسمانوں میں
نہیں ترا نشیمن قصرِ سلطانی کی گنبد پر
تو شاہیں ہے بسیرا کر پہاڑوں کی چٹانوں میں


قناعت نہ کر عالمِ رنگ و بو پر
چمن اور بھی آشیاں اور بھی ہیں
تو شاہیں ہے پرواز ہے کام تیرا
تیرے سامنے آسماں اور بھی ہیں

سلطان باہو فرماتے ہیں۔ 

جائے کہ من رسیدم امکان نہ ہیچ کس را
شہبازِ لامکانم آنجا کجا مگس را

‘‘قرب الٰہی کے جس مرتبے پرمَیں پہنچا ہوں وہاں ہر کسی کے پہنچنے کاامکان نہیں ہوتا۔ میں لامکان کاشہباز ہوں،لامکان میں مکھیوں کی جگہ نہیں ہے-’’
حضرت سلطان باھُو مزید فرماتے ہیں :

ہر منتہٰی آغازِ من
مگسی کجا شہبازِ من
کس نیست محرم رازِ من
در عشق اُو پروانہ ام
از جانِ خود بیگانہ ام‘

‘‘ہر انتہا میری ابتدا ہے- میرے راز کا محرم کوئی نہیں ، کہاںمکھی اور کہاں میرا شہباز؟ مَیں اُس کے عشق کا پروانہ ہوں، اپنی جان سے بیگانہ ہوں’’-

مرشد عنقا بود شہباز پر 
مگس مرشد کی برد کوہ سر بسر

‘‘عنقا صفت مرشد بلند پرواز شہباز ہوتا ہے، لیکن مکھی صفت مرشد کوہِ معرفت کی بلندچوٹیوں تک کہاں پہنچ سکتا ہے-’’
اقبال فرماتے ہیں:

 جھپٹنا ، پلٹنا، پلٹ کر جھپٹنا
لہو گرم رکھنے کا ہے اک بہانہ
یہ پورب ، یہ پچھم ، چکوروں کی دنیا
میرا نےلگوں آسماں بے کرانہ
پرندوں کی دنیا کا درویش ہوں میں
کہ شاہیں بناتا نہیں آشیانہ؟

 

فقرِ اقبال ، فقرِ باہو:

 

 

فقر بھی اقبال کے نزدیک مرد درویش کی بڑی خصوصیت ہے :

 اس فقر سے آدمی میں پیدا
اللہ کی شان ِ بے نیازی
کنجشک و حمام کے لئے موت
ہے اس کا مقام شہبازی


فقر کے ہیں معجزات،تاج وسریر وسپاہ
فقر ہے میروں کا میر،فقر ہے شاہوں کا شاہ
علم کا مقصود ہے پاکی ٔ عقل وخرد
فقر کا مقصود ہے عفتِ قلب ونگاہ

 

اقبال کا فقر، فقرِ سلطانِ باہو ہے، باہوکہتے ہیں:

نیم نظرِ فقیر بہ از کیمیا
زاں نظر واصل شوی عارف خدا

(فقیر کی نیم نگاہ بھی کیمیا سے بہتر ہے کہ اس سے تو اللہ تعالیٰ سے واصل ہو کر عارف باللہ ہو سکتا ہے )

 

نظر فقرش گنج قدمش گنج بر
فقر لایحتاج شد صاحبِ نظر

(فقر کی نظر بھی خزانہ ہوتی ہے اور اس کے قدموں میں بھی خزانہ ہوتا ہے لیکن فقر اس کے باوجود لا یحتاج رہتا ہے۔)
علامہ اقبا ل فرماتے ہیں۔

نگاہ فقر میں شان سکندری کیا ہے
خراج کی جو گدا ہو وہ قیصری کیا ہے

حضرت سلطان باھُو مزید فرماتے ہیں :

 فقر شاہے ہر دوعالم بے نیاز و باخدا
احتیاجش کس نہ باشد مدِّ نظرش مصطفیٰؐ

(فقر بادشاہ ہے جو قرب ِ الٰہی کی بنا پر دونوں جہاں سے بے نیاز ہے اسے کسی کی پرواہ نہیں ۔ وہ ہر وقت حضورِ اکرم ﷺ کی نظر رحمت میں رہتاہے۔)
علامہ اقبال فرماتے ہیں:

  فقر ذوق و شوق و تسلیم و رضااست
ما امینیم ایں متاعِ مصطفیٰؐ است

(فقر ذوق و شوق اور تسلیم و رضا کا نام ہے۔ یہ محمد مصطفی ﷺ کی میراث ہے اور ہم امین ہیں۔)

 

مرد مومن:

حضرت علامہ کے ہاں مرد مومن کا تصوربھی بڑی حد تک سلطان العارفین کے مرد مومن سے ملتا جلتا ہے ۔علامہ کہتے ہیں:۔

غالب وکار آفریں کار کشا کار ساز
خاکی ونوری نہاد،بندۂ مولا صفات
کافر کی یہ پہچان کہ آفاق میں گم ہے
مومن کی یہ پہچان کہ گم اس میں ہے آفاق
ہاتھ ہے اللہ کا بندۂ مومن کا ہاتھ
غالب و کار آفریں کار کشا و کار ساز

حضرت سلطان العارفین کے ہاں مرد مومن ذات حق کی عین ہوتا ہے۔وہ فنائے نفس اور بقائے روح کی حالت میں ہوتاہے۔وہ فقر وشجاعت اور سخاوت و مصلحت سے مزین اور عارف باللہ ہوتا ہے۔ آپ کہتے ہیں:

مردان خدا خدا نہ باشد
لیکن ز خدا جدا نباشد

(مردان خدا خدا تو نہیں ہوتے مگر خدا کے ذکر و خیال سے جدا بھی نہیں ہوتے)

 

تصورِ علم:


حضرت علامہ ؒکے ہاں تصور علم بھی حضرت سلطان العارفین ؒسے ملتا جلتا ہے ۔حضرت علامہ علم کی بے مقصدیت اور ایسی تعلیم کے خلاف ہیں جو بے علمی اور بے یقینی کو جنم دیتی ہے اور جس سے ملت کے نوجوانوں کی صلاحیتیں مفلوج ہو جاتی ہیں:

وہ علم نہیں زہر ہے احرار کے حق میں
جس علم کا حاصل ہے جہاں میں دو کفِ جو
دنیا ہے روایات کے پھندوں میں گرفتار
کیا مدرسہ کیا مدرسہ والوں کی تگ و دو

حضرت سلطان العارفینؒ کے علم کے حوالے سے افکار بھی ایک جامع نظام رکھتے ہیں اور ان کا تصور علم بھی دیگر افکار کی طرح الہامی ہے :

علم با عمل است بشنوای ہوشمند
نیست بر تو کتب خواندن فرض چند
زاں علم عالم شوئی صاحب نظیر
علم یک حرف است بروشن نظیر
نظر ِ مرشد می بر با مصطفی
واقف اسرار گردد از الہ
ختم گردد علم حلم و ہر مقام
ایں چنیں تحصیل عارف شد تمام
رفت عمرش با مطالعہ
معرفت حاصل نشد افسوس غم

(اے عاقل سن علم وہ ہے جس پر عمل کیا جائے۔تو علم کو زیر عمل رکھ ورنہ اتنی زیادہ کتابیں پڑھنا فرض نہیں ہے ۔علم تو ایک حرف ہے جس کو اگر پڑھ لیا تو دل روشن ہو جاتا ہے ،اس علم کو پڑھنے والا صاحب نظر عالم بن جاتا ہے ۔
نگاہِ مرشد بندے کو حضور ﷺ کی مجلس میں پہنچا دیتی ہے ،جہاں اس پر اسرار الہی کھلتے ہیں۔اس مرتبے پر پہنچ کر عارف حق ایسا عالم بن جاتا ہے جس کے سامنے علم وحلم ومراتب کی تمام حدود معدوم ہوجاتی ہیں۔
جو آدمی ساری عمر پڑھائی لکھائی میں مشغول رہا مگر معرفت الہی حاصل نہ کر سکا،تو افسوس وغم کاوبال اس کی اپنی گردن پر رہا’’ ۔

 

عشق:

باہو اور اقبال کے درمیان ایک اہم قدر مشترک عشق ہے ، ان کے ہاں عشق ایک لازوال قوت کے طور پر نظر آتا ہے- حضرت سلطان باھو فرماتے ہیں :

جس منزل نوں عشق پہنچاوے ایمان نوں خبر نہ کوئی ھوُ

مزید فرماتے ہیں :

اک نگاہ جے عاشق ویکھے لکھ ہزاراں تارے ھوُ
لکھ نگاہ جے عالم ویکھے کسے نہ کدھی چاہڑے ھوُ

حضرت سلطان باھُوؒ کے نزدیک مرشد کامل کی ایک نظر عرفانِ ذاتِ تعالیٰ کی منزل تک پہنچاتی ہے-
علامہ اقبال بھی عشق کی اسی رمز کو اس طرح بیان فرماتے ہیں:

علم مقام صفات، عشق تماشائے ذات
عشق سکون و ثبات، عشق حیات و ممات
کوئی اندازہ کر سکتا ہے اس کے زورِ بازو کا
نگاہِ مرد مومن سے بدل جاتی ہیں تقدیریں

 اقبال نے سلطان باہو کی زمینوں میں غزلیں کہی ہیں۔ مثال کے طور پر اقبال کی مشہور نظم :

‘‘خود ی کا سرِ نہاں لا الہ الا اللہ’’

کی نا صرف زمین بلکہ اس غزل کے موضوعات تک سلطان باہو کی فارسی غزل سے لئے گئے ہیں۔ سلطان باہو فرماتے ہیں:

نجاتِ مردمِ جاں لا الہ الا اللہ
کلیدِ قفلِ جناں لا الہ الا اللہ
چہ خوف آتشِ دوزخ چہ باکِ لعین
ورا کہ کردبیاں لاالہ الا اللہ

اس زمین میں علامہ اقبال کہتے ہیں :

خودی کا سرِ نہاں لا الہ الا اللہ
خودی ہے تیغِ فساں لا الہ الا اللہ
یہ دور اپنے ابراہیم کی تلاش میں ہے
صنم کدہ ہے جہاں لا الہ الا اللہ

 

Liked Liked
No Comments
National Languages Pakistan

, , , , , , , , , , , , , , , , , , , , , ,

پاکستان میں قومی زبان کے چند بڑے خدمت گار

⋅


[box type=”info” align=”” class=”” width=””]پاکستان میں اردو کے علاوہ بولی جانے والی چھ بڑی زبانوں (سندھی ، پنجابی ، پشتو ، بلوچی ، سرائیکی ، ہندکو ، ) کو گذشتہ ایک صدی میں ترقی دینے والے چند محترم ہستیوں کی خدمات کا مختصر تذکرہ …. شیخ ایاز ، استاد دامن ، حمزہ بابا ، سید ظہور شاہ ہاشمی ، احمد خان طارق ، شاکر شجاع آبادی ، سائیں علی احمد پشاوری ، رضا ہمدانی[/box]

انسان کی ترقی کی بنیاد ہی زبان ہے کیونکہ زبان کے بغیرعلم کا حصول اور ترسیل ممکن نہیں ۔ زبان کے ذریعے ہی ہم کائنات کے پوشیدہ رازوں سے پردہ اُٹھاسکتے ہیں ۔
کسی قوم کی بقا اور ترقی کے لیے زبان،ثقافت اور قومی تشخص روح رواں کی حیثیت رکھتا ہے۔ کامیاب اور ترقی يافتہ قوموں کی تاریخ اٹھا کر ديکھ ليں ، ان کی ترقی میں ان کی مادری زبانوں کا نمایاں کردار نظر آتا ہے۔ کم و بیش ہر مہذب و ترقی یافتہ قوم نے اپنی مادری زبان کو اپنا کر ترقی کی منازل طے کی ہیں۔ تمام معاشی اور سائنسی ترقی یافتہ ممالک کے ہاں ذریعہ تعلیم وہاں کی قومی اور مادری زبان ہی ہے۔
پاکستان ایک کثیر اللسانی ملک و معاشرہ ہے۔ پاکستان میں 77زبانیں بولی جاتی ہیں جن میں 72 زبانیں مقامی اور قدیم ہیں۔ پاکستان میں نو بڑی زبانیں ہیں ۔ پنجابی، سندھی، سرائیکی، پشتو، اردو، بلوچی، ہندکو، براہوی، شینا تسلیم شدہ زبانیں ہیں ۔
پاکستان میں رائج دوسری زبانوں اور لہجوں میں، فارسی، گجراتی، کشمیری، بروشسکی، انڈس کوہستانی، مارواڑی، میمنی، پوٹھواری، بلتی، گوجری، دری،آیر، بدیشی، باگری، بٹیری، بھایا، براہوی، چلیسو، دامیڑی، دیہواری، دھاتکی، ڈوماکی، گواربتی، گھیرا، گوریا، گوورو، گرگلا، ہزاراگی، جدگلی، جنداوڑا، کبوترا، کچھی، کالامی، کالاشہ، کلکوٹی، کامویری، کاٹی، کھیترانی، کھوار، کولی (لچھی، پرکاری اور دوھیارہ لہجے)، لہندا، لاسی، لوارکی، اوڈ، ارمری، پھالولہ، سانسی، ساوی، توروالی، اوشوجو، واگھری، وخی، وانیسی اور یدغہ شامل ہیں۔
سی آئی اے ورلڈ فیکٹ بک کے مطابق پاکستان میں 48 فیصد لوگ پنجابی، 12 فیصد سندھی، 10 فیصد سرائیکی، 8 فیصد پشتو، 8 فیصد اردو، 3 فیصد بلوچی، 2 فیصد ہندکو، ایک فیصد براہوی اور 8 فیصد لوگ انگریزی و دیگر چھوٹی زبانیں بولتے ہیں۔ پنجابی، سندھی، سرائیکی، پشتو، بلوچی ، ہندکو اور براہوی ہمارے خطے کی قدیم زبانیں ہیں۔
دنیا میں سینکڑوں زبانوں کے معدوم ہونے کا خطرہ ہے اور اٹلس آف ورلڈ لینگویج ان ڈینجر 2009ء کے مطابق پاکستان میں بولی جانی والی 35 فیصد زبانوں کو معدومیت کا خطرہ ہے۔ مادری زبانوں کو درپیش خطرات کے حوالے سے پاکستان دنیا بھر میں 28 ویں نمبر پر ہے۔
مادری زبانوں کو بچانے کےلیے اپنا پنا کردار ادا کرنے کی اشد ضرورت ہے۔ جس کا طریقہ یہ ہے کہ لوگ اپنی مادری زبان بولنے کے ساتھ ساتھ اس زبان کو پڑھیں اور لکھیں۔
پاکستان میں قومی زبانوں کے کئی اساتذہ اکرام، اہلِ علم و دانش ، اہلِ ادب قلم کاروں اور تعلیمی اداروں نے اپنی زبان کی خدمت کا مشن شروع کیا۔
ان میں سے بہت سے لوگوں نے لوک کہانیوں، شاعری و گیت، نظم و نثر، علاقائی ادب ، لغات و قاعدوں اور عالمی زبانوں کے قومی و علاقائی زبانوں میں تراجم کے ذریعے زبان کی خدمت اور استحکام کے لیے کوششیں کیں۔

 

[box type=”success” align=”” class=”” width=””] روحانی ڈائجسٹ کے اکثر قارئین نوع بہ نوع موضوعات سے آگہی اور حصول علم کا شوق رکھتے ہیں۔ اچھا علمی اور اعلیٰ ادبی ذوق رکھنے والے ہمارے کئی قارئین اس خطے کی تاریخ اور مختلف خصوصیات کے بارے میں تحقیق و جستجو کو بھی پسند کرتے ہیں۔ روحانی ڈائجسٹ کے گزشتہ شماروں میں شایع ہونے والی کئی ٹائٹل اسٹوریز پر قارئین کی پسندیدگی ہمارے لیے حوصلہ افزائی کا سبب بنی ہے ۔
روحانی ڈائجسٹ کے ایڈیٹر ڈاکٹر وقار یوسف عظیمی پاکستان میں آباد کئی قومیتوں کی شاندار اور پر کشش ثقافتی خصوصیات ، ان کی زبانوں کے اعلی علمی و ادبی اثاثوں اور ان میں پائے جانے والے دانش وبصیرت کے خزانوں ، معرفت الٰہی، عشق رسول ، انسان دوستی، رواداری محبت ، خودداری ہمت و شجاعت مہر و وفا اور دیگر اعلی اوصاف کے تذکرے روحانی ڈائجسٹ کے قارئین تک پہنچانا چاہتے ہیں۔
ڈاکٹر وقار یوسف عظیمی کہتے ہیں ‘‘ہماری زبانوں اور بولیوں کو کئی اولیاء اور صوفیاء کرام نے اپنی فکر کے تعارف، پیغام کی ترویج اور اپنی تعلیمات کی ترسیل کا ذریعہ بنایا ہے ۔ بعض اولیاء اللہ نے دین اسلام کی تبلیغ ، عوام کی اصلاح اور خدمت خلق کے لئے سعی مسلسل کے ساتھ ساتھ بہت بڑے عالم کی ذمہ داریاں نبھاتے ہوئے زبان کو سنوارنے اور ترقی دینے میں بھی نمایاں کردار ادا کیا ہے ۔ اس کی سب سے بڑی مثال پنجابی زبان کو ترقی دینے میں بابا فریدالدین مسعود گنج شکر ہیں ۔
سندھی اس خطے کی قدیم ترین علمی اور ادبی زبان ہے ۔ سندھی زبان کی تاریخی وقعت اور اہمیت کا اندازہ اس سے کیا جاسکتا ہے کہ برصغیر میں قرآن پاک کا سب سے پہلا ترجمہ آج سے تقریباً گیارہ سو سال پہلے (؍ 883ء)سندھی زبان میں ہی ہوا تھا ۔ سندھی زبان کو مزید ترقی بھی ایک ولی اللہ ، رومی مہران حضرت شاہ عبداللطیف بھٹائی کے ذریعے ملی۔ 800سال پہلے سندھ کے عوام کی معاشی اور سماجی حالت سدھارنے کے لیے اس وقت کی سرکاری زبان فارسی کی عوامی تعلیم کے اہتمام کا سہرا صوفی بزرگ حضرت لعل شہباز قلندر کے سر ہے۔
پاکستان کی قومی زبان اردو اور سرکاری زبان انگلش ہے۔ پاکستان میں بولی جانے والی دیگر زبانوں کو عام طور پر پر علاقائی زبانیں کہا جاتا ہے ۔ ڈاکٹر وقار یوسف عظیمی اپنی تقریروں اور تحریروں میں پاکستان میں بولی جانے والی نو بڑی زبانوں کو علاقائی زبان کے بجائے پاکستان کی قومی زبانیں کہتے اور لکھتے ہیں۔ آپ کہتے ہیں کہ اردو کی طرح دیگر زبانیں بھی ہماری قومی زبانیں ہیں ۔ ان زبانوں کا تحفظ اور ترقی سب پاکستانیوں کا خاص طور پر اس زبان بولنے والوں کا اجتماعی فریضہ ہے۔’’
زیر نظر مضمون میں قارئین روحانی ڈائجسٹ میں پاکستان میں اردو کے علاوہ بولی جانے والی چھ بڑی زبانوں کو گذشتہ ایک صدی میں ترقی دینے والے چند محترم ہستیوں کی خدمات کا مختصر تذکرہ کیا جارہا ہے۔ یہ تذکرہ ان ہستیوں کی خدمات کا اعتراف بھی ہے اور اپنی موجودہ اور نئی نسل سے اس امید کا اظہار بھی ہے کہ ہم سب مل کر اپنے وطن پاکستان کی علمی وثقافتی ترقی میں اپنا اپنا کردار خوش دلی اور تن دہی سے ادا کریں گے۔
[/box]

سندھی / سنڌي

پاکستان کی زبانوں میں سندھی زبان اس منفرد اعزاز کی حامل ہے کہ برصغیر میں سب سے پہلے قرآن پاک کا ترجمہ سندھی زبان میں ہی کیا گیا ۔ یہ 883ء کے لگ بھگ کا واقعہ ہے۔ دو کروڑ سے زائد پاکستانیوں کی مادری زبان سندھی ہے ، سندھ کے علاوہ بلوچستان میں بھی لوگوں کی ایک بڑی تعداد سندھی بولتی ہے۔
شاہ عبد اللطیف بھٹائی ، لعل شہباز قلندر‏، سچل سرمست، مخدوم آدم نقشبندی، میر محمد معصوم بکھری، قادر بخش بیدل، مرزا قلیچ بیگ، عمر بن محمد داؤد پوتہ، علامہ آئی آئی قاضی، ایلسا قاضی، ژاں فرانسوا جاریج ، این میری شمل، حسام الدین راشدی، شیخ ایاز، نبی بخش خان بلوچ، ڈاکٹر غلام مصطفیٰ خان، جی الانا، محمد ابراہیم جویو، استاد بخاری، علن فقیر اور متعدد صوفیاء، ادبا ، شعرا اور محققین نے اپنے اپنے طرز پر سندھی زبان کی بیش بہا خدمات انجام دی۔ سندھی زبان کے فروغ کے لیے کام کرنے والے اداروں اور تنظیموں میں سندھی ادبی بورڈ، سندھی لینگویج اتھارٹی (سنڌي ٻوليءَ جو با اختيار ادارو)، سندھی ادبی سنگت، سندھی عوامی تحریک نمایاں ہیں۔
قیام پاکستان کے بعد جن اہم شخصیات نے سندھی زبان و ادب پر اپنے اثر و رسوخ چھوڑے ان میں شیخ ایاز کا نام سر فہرست ہے۔

شیخ ایاز
جدید سندھی ادب کے بانی،شیخ ایاز کا اصل نام مبارک علی شیخ تھا۔ وہ 2 مارچ 1923ء کو شکارپور میں پیدا ہوئے ۔ گریجویشن کے بعد وکالت کی ڈگری حاصل کی اور 1976 میں سندھ یونیورسٹی کے وائس چانسلر تعینات ہوئے ۔ سندھی ادب اور شاعری کا ذکر سندھ کے عظیم اور مشہور شاعر شیخ ایاز کے بغیر نامکمل ہے۔ شیخ ایاز کے بنا سندھی شاعری ایسے ہے جیسے میر تقی میر اور غالب کے بنا اردو شاعری….
بھٹائی کی صوفیانہ شاعری کے تسلسل کے ساتھ کئی اعلیٰ جذبات مثلاً انسان دوستی ، وطنیت، پیار، تذکرہ حسن، صوفی ازم، قربانی اور سچ یکجا کرنے سے ایک ہستی وجود میں آتی ہے اسی ہستی کا نام ہے شیخ ایاز۔ شاہ عبداللطیف بھٹائی کے بعد سندھ کا عظیم شاعر شیخ ایاز کو مانا جاتا ہے۔ شیخ ایاز نے اپنے کلام سے سندھی شاعری کو تازگی بخشی ۔ شیخ ایاز سے قبل جو سندھی شاعری تخلیق ہو رہی تھی، وہ فارسی کے زیر اثر تھی، مگر ایاز نے ماضی کی شعری روایات میں تبدیلیاں کرکے سندھی زبان کو ایک جدید روپ دیا۔ شیخ ایاز نے سندھی شاعری اور ادب میں کئی نئے رحجانات متعارف کرائے اور یہ ثابت کر دیا کہ سندھی زبان میں شاعری کسی بھی لحاظ سے عالمی معیار سے کم نہیں ہے۔ شیخ ایاز کی شاعری کو جب موسیقی کا ترنم دے کر، سُروں میں گایا گیا، تو وہ گیت ہر طبقے میں بہت ہی زیادہ مشہور ہوئے۔

روح راضي ڪجي, ياد تازي ڪجــــي
دل ٿي چاهي وري, يـــاد تازي ڪجـي
من هو پرچي پوي, آزي نيازي ڪجي
ڇـــو ڀـــلا پيـــار ۾, جلد بازي ڪجي
نيت سجدا هجن, دل نمازي ڪـجي
شهر مجرم سڄــو اياز, ڪنهن کي قاضي ڪجي
روح کو راضی کریں یاد تازی کریں
دل اگر چاہے تو پھر سے تازی کریں
دل پھسل سکتا ہے خود نیازی کریں
جو اگر پیار میں جلد بازی کریں
نیت سجدہ کرکے دل نمازی کریں
ایاز! شہر ہی مجرم ہوا کس کو قاضی کریں
ميلي ۾ تُون تنها تنها، ڪنهن کي ڳولين ٿو؟
اک ۾ ڳوڙها، هٿ ۾ گجرا، ڪنهن کي ڳولين ٿو؟
ساري جيون مايا سپنو، تنهن ۾ سَوَ سپنا،
او سپنا، سپني جا سپنا! ڪنهن کي ڳولين ٿو؟
پير پَٽيءَ تي ناهي تُنهنجو، ڪهڙو تنهنجو ماڳ؟
رستي مان نڪتا سَوَ رستا، ڪنهن کي ڳولين ٿو؟
میلے میں تو تنہا تنہا، کسے ڈھونڈتا ہےتو؟
آنکھ میں آنسو، ہاتھ میں گجرا، کسے ڈھونڈتا ہےتو؟
زندگی فانی خواب ، اس میں دیکھ اایک خواب
وہ خواب، بھی خواب ہوا، کسے ڈھونڈتا ہےتو؟
پیر نہیں زمین پر تیرے، کہاں ہے تیری منزل؟
سیدھے رستے پر نہیں رستہ ، کسے ڈھونڈتا ہےتو؟

شیخ ایاز نے تقریباۤساٹھ کتابیں لکھیں، 1946ءمیں ان کی مختصر کہانیوں کا پہلا مجموعہ ‘‘سفید وحشی’’ شائع ہوا، بعد میں کئی اور مجموعے شائع ہوئے جن میں پنھل کان پوءِ خصوصاً قابل ذکر ہیں ۔ ان کی شاعری کا پہلا مجموعہ ڀونر ڀري آڪاس 1962ءمیں پاکستان رائٹرز گلڈ کے زیر اہتمام شائع ہوا۔ ان کی شاعری کا دوسرا مجموعہ ڪلهي پاتم ڪينرو1963ءمیں شائع ہوا۔ شیخ ایاز نے سندھی کے ساتھ ساتھ اردو کو بھی اپنا ذریعہ اظہار بنایا اور ان کی اردو شاعری کے مجموعوں میں بوئے گل نالہ دل، کف گلفروش اورنیل کنٹھ اور نیم کے پتے شامل ہٰیں۔ ان کی سندھی شاعری کا ایک اردو ترجمہ بھی ‘‘حلقہ مری زنجیر کا’’کے نام سے شائع ہواتھا۔
شیخ ایاز کی ادبی خدمات کے اعتراف میں انہیں ستارہ امتیاز ، ملک کے سب سے بڑا ادبی ایوارڈ ہلال امتیاز اور فیض احمدفیض ایوارڈ سے بھی نوازا گیا ۔
شیخ ایاز نے اپنی شاعری میں معاشرے کے ہر طبقے کی نمائندگی کی اور تمام مسائل کو اجاگر کیا ۔ انہوں نے بيت، دوہا، وايون، گيت، نظم، آزاد نظم، ہائيکو، آب بیتی، کہانیوں سمیت نثر میں بھی بے مثال نمونے چھوڑے ۔ شیخ ایاز کے دیگر تخلیقی کمالات کا سب سے بڑا نمونہ سندھ کے عظیم صوفی شاعر شاہ عبداللطیف بھٹائی کے کلام کا اُردو میں ترجمہ ہے۔
کسی بھی شاعر کے کلام کو منظوم ترجمہ کرنا انتہائی مشکل کام ہے، یہ شیخ ایاز کی شاعرانہ بصیرت، سندھی اور اردو زبان میں ادبی اور فنی مہارت تھی کہ انہوں نے اس کام کو انتہائی احسن طریقے کے ساتھ انجام دیا۔
شاہ سائیں کے کلام اور شیخ ایاز کے اردو ترجمے سے چند منتخب اشعار ….

اَول الله عَلِيمُ، اعليٰ، عالَمَ جو ڌَڻِي
قادِرُ پنهنجي قُدرت سين، قائم آهِ قديم
والي، واحِدُ، وَحۡدَهٗ، رازق، رَبُّ رَحِيم
سو ساراه سچو ڌڻي، چئِي حَمدُ حَڪِيم
ڪري پاڻ ڪَرِيمُ، جوڙُون جوڙَ جهان جي
اوّل نام اﷲ کا اعلیٰ اور علیم
قادر اپنی فطرت سے قائم اور قدیم
والی واحد وحدهٔ رازق رب رحیم
بڑھ کر ہے ہر حمد سے اس کی حمد حکیم
ہے سارے سنسار کا مالک وہی کریم
پاڻَهِين جَلَّ جَلَالَہٗ، پاڻهِين جانِ جمالُ
پاڻهِين صورت پِرِينءَ جي پاڻهِين حُسن ڪَمالُ
پاڻهِين پِر مُريد ٿئي، پاڻهِين پاڻَ خيالُ
سڀ سڀوئي حالُ، منجھان هي معلوم ٿئي
غیر محدود ہے جلال اس کا
دھر آئینۂ جمال اس کا
آپ رہبر ہے آپ ہی راہی
ختم خود اس پہ ہے کمال اس کا
اس کا احساس ہر جگہ ہر وقت
کہ ہم گیر ہے خیال اس کا
روح انسان میں جلوۂ فرما ہے
پر تو حسن بے مثال اس کا
عاشقَ! معشوقن جو، وٺِي ويھ دُڪاڻ؛
پَـئِجِ پيش پِريُنِ جي، پَٽِيءَ وجِھي پاڻ؛
ته تون تنِين ساڻُ، سدا رهِين سُرخُرو.
منزل عشق ہے در محبوب
سجدہ ریزی کرو عقیدت سے
کیا عجب تم پہ مہربان ہو جائے
اور نوازے تمہیں محبت سے
کاش مل جائے خوب و زشت کا راز
تمہیں اس رہبر حقیقت سے
طَالِبُ ڪَثَرَ، سونهن سَرُ، اِيَ رومِيءَ جِي راءِ؛
ماڙهُو اِتِ ڪِياءِ، مَنڊُ نه پسين مَنڊيو!
موج زن چشمہ حقیقت ہے
قولِ رومی پیامِ راحت ہے
جس نے دیکھی وہ ہستی مطلق
وہ مجسم سکوتِ حیرت ہے

شیخ ایاز کا ارادہ شاہ لطیف کی حیات و افکار پر ناول لکھنے کا بھی تھا، مگر زندگی کی مدت پوری چکی تھی اور یہ کام نہ ہوسکا۔ شیخ ایاز 28 دسمبر 1997ء کو 74 برس کی عمر میں انتقال کر گئے ، انہیں بھٹ شاہ میں شاہ لطیف کے مزار کے احاطے میں سپرد خاک کیا گیا ۔
شاہ عبداللطیف ہونیورسٹی خیرپور میں 1998ء میں شیخ ایاز چئیر قائم کی گئی۔ شیخ ایاز کی شاعری اور دیگر کارناموں کو عوام و خواص میں مزید اُجاگر کرنے میں ابراہیم جویو ، رسول بخش پلیجو ، سندھ ادبی بورڈ اور محکمہ ثقافت و سیاحت سندھ کی کوششیں بہت نمایاں ہیں۔

پنجابی

پنجابی، پاکستان میں سب سے زیادہ بولی جانی والی زبان ہے ۔ اعداد و شمار کے مطابق پاکستان میں پنجابی زبان بولنے والوں کی تعداد کل آبادی کا 41فیصد ہے ، پنجاب میں 75فیصد، سندھ میں 6فیصد، اسلام آباد میں 71فیصد، بلوچستان میں 3فیصد، خیبر پختونخوا اور فاٹا میں 1فیصد شرح ہے۔ پنجابی زبان بولنے اور سمجھنے والے پاکستان کے ہر صوبہ میں موجود ہیں۔
پنجابی زبان کو ترقی دینے میں صوفی بزرگ حضرت بابا فرید گنج شکر کا حصہ بہت زیادہ ہے، ان کےعلاوہ بابا بلھے شاہ، سلطان باہو، شاہ حسین، وارث شاہ، میاں محمد بخش، پیر مہر علی شاہ، استاد دامن، احمد ندیم قاسمی، امجد اسلام امجد، فیض احمد فیض، اشفاق احمد، واصف علی واصف، ضمیر جعفری، عطاء الحق قاسمی، انور مسعود، عین الحق فرید کوٹی، شریف کنجاہی، افتخار نسیم، احمد راہی، پروفیسر غلام رسول، نور محمّد کپورتھلوی، حافظ محمود شیرانی ، بابو رجب علی، قادر یار، منیر نیازی، شہباز ملک اور متعدد صوفیاء، ادبا، شعرا اور محققین نے پنجابی زبان پر اپنے اثر و رسوخ چھوڑے ۔ قیام پاکستان کے بعد جن اہم شخصیات نے پنجابی زبان و ادب میں مقبولیت حاصل کی ان میں استاد دامن کا نام بہت زیادہ نمایاں ہے۔

استاد دامن

استاد دامن کا اصل نام چراغ دین اور دامن تخلص تھا، 4 ستمبر 1911 میں چوک متی لاہور میں پیدا ہوئے۔ بچپن ہی میں گھریلوحالات کے پیش نظر استاد دامن نے حصول تعلیم کے ساتھ والد کے ساتھ درزی کا کام بھی کیا۔ انہیں شاعری کا شوق تو بچپن ہی سے تھا لیکن باقاعدہ طور پر شاعری کا آغاز میٹرک کے بعد کیا۔ مختلف جلسوں اور مشاعروں میں اپنا پنجابی کلام سنانے لگے۔
استاد دامن نے پنجابی شاعری کی فنی خوبیوں پر ملکہ رکھنے کی بدولت اہل علم وفن سے استاد کا خطاب حاصل کیا۔ استاد دامن مزدوروں، کسانوں، غریبوں اور مظلوموں کے شاعر تھے۔ انہوں نے ان طبقوں کی حمایت اور حقوق کے لیے آواز اٹھائی اور استحصالی طبقو ں کی مذمت کی۔استاد دامن نے پنجابی شاعری کے ذریعے پنجاب کی ثقافت کے رنگوں کو اجاگر کیا۔ ان کی لوک شاعری نے لوگوں کو خصوصی طور پر اپنی طرف متوجہ کیا۔ ان کے لہجے میں طنز اور مزاح تھا۔ انہوں نے مزاح کے انداز میں لوگوں کو معاشر تی خرابیوں سے آگاہ کیا۔ استاد دامن کی شاعرانہ عظمت کا اعتراف کرتے ہوئے شاعر فیض احمد فیض کہتے ہیں کہ میں پنجابی میں صرف اس لیے شاعری نہیں کرتا کہ پنجابی میں شاہ حسین ، وارث شاہ اور بلھے شاہ کے بعد استاد دامن جیسے شاعر موجود ہیں۔
استاد دامن کی شاعری میں صوفیاء کا رنگ جھلکتا ہے، بلھے شاہ کے انداز میں وہ کہتے ہیں :

وید کتاباں پڑھ پڑھ تھکا،کجھ نہ بنیاں کچا پکا
اوڑک رہِ گیا حقہ بکا، مکے گیا تے کجھ نہ مکا
ایویں مکّ مکۓ کاہدے، مکدی گلّ مکا او یار
مسجد مندر تیرے لئی اے،باہر اندر تیرے لئی اے
دلِ قلندر تیرے لئی اے،سکّھ اک اندر تیرے لئی اے
میرے کول تے دل ای دل اے، اوہدے وچ سما او یار
میں نہیں سکھیا علم ریاضی، ناں میں پنڈت ملا قاضی
نہ میں دانی نہ فازی نہ میں جھگڑے کر کر راضی
نہ میں منشی، عالم فاضل، نہ میں رند تے نہ ہشیار
مینوں پاگل پن درکار، مینوں پاگل پن درکار

استاد دامن کی شاعری میں لوک رنگ، تصوف، سیاسی موضوعات، روایتی موضوعات کے علاوہ روز مرہ زندگی کا ہر رنگ ملتا ہے۔ ان کی شاعری حقیقت نگا ری اور فطر ت نگاری کی خوبیوں سے مالامال ہے اور انسانی زندگی کی خوبصوت عکاس ہے۔

ایہہ دنیا مثل سراں دی اے،
ایتھے مسافراں بیٹھ، کھلو جانا
وارو واری اے ساریاں کوچ کرنا،
آئی وار نہ کسے اٹکو جانا

مکان تے ٹیکس دکان تے ٹیکس
ڈیوڑی تے ٹیکس دلان تے ٹیکس
اس واسطے بولدا نئی دامن
متاں لگ جاۓ میری زبان تے ٹیکس

مینوں دسّ اوئے ربا میریا،
میں ڈبدا ڈبدا جاں
میں اوتھے ڈھونڈاں پیار نوں،
جتھے پتراں کھانی ماں

استاد دامن نے ادبی تنظیم پنجابی ادبی سنگت کی بنیاد رکھی اور اس کے سکریٹری ر ہے۔ استاد دامن بلھے شاہ اکیڈمی ، مجلس شاہ حسین کے سرپرست اور ریڈ یو پاکستان شعبہ پنجابی کے مشیر بھی تھے۔ ان مختلف حیثیتوں میں انہوں نے پنجابی زبان و ادب کے فروغ کے لیے گرانقدر خدمات سر انجام دیں ۔ پنجابی زبان کا یہ عوامی شاعر 3 دسمبر 1984 کو اس دار فانی سے کوچ کر گیا ۔ انہیں مادھو لال شاہ حسین کے مزار کے احاطے میں واقع قبرستان میں سپردخاک کیا کیا۔
پاکستان میں پنجابی زبان کے فروغ کے حوالہ سے کام کرنے والے اداروں اور تنظیموں میں پنجابی ادبی بورڈ ، پلاک (پنجابی انسٹیٹیوٹ آف لینگوئچ )، پنجابی ادبی سنگت، پنجابی پرچار تنظیم، سانجھ متر تنظیم، پنجابی کھوج گڑھ، لوکائی، دل دریا پاکستان، پاکستانی سانجھ سنگت، شاہین ادبی سنگت، سنگت بلھے شاہ، ماں بولی کوآرڈینیشن کمیٹی، قْقنس، سنگری، پنجاب لوک لہر اور دیگر شامل ہیں۔

پشتو / پښتو

16فیصد پاکستانیوں کی مادری زبان پشتو ہے۔ صوبہ خیبر پختونخوا میں زیادہ تر پشتو زبان بولی جاتی ہے اگر چہ مختلف علاقوں میں اس کا لہجہ بھی دیگر زبانوں کی طرح مختلف ہے ۔ پشتو کے 17مختلف مشہور لہجے ہیں۔ پشتو صوبہ خیبر پختونخوا کے علاوہ پاکستان کے دیگرصوبوں بلوچستان، پنجاب،بلوچستان، سندھ ، میں بھی بولی جاتی ہے ۔
پشتو زبان کی ادبی ترویج میں حضرت رحمان بابا، مرزاخان انصاری، خوشحال خان خٹک، جمال الدین افغانی، اشرف خان خٹک، عبدالقادر خان خٹک، احمدشاہ ابدالی، نازوتوخی،کاظم خان شیدا ، خواجہ محمد بنگش، حمزہ بابا، خاطر آفریدی، غنی خان، کبیر ستوری، سمندر خان سمندر، پریشان خٹک قابل ذکر ہیں۔

حمزہ بابا

پشتو زبان کے شاعر، ادیب، صوفی، مفکر اور بابائے غزل امیر حمزہ شنواری جو عموماً حمزہ بابا کے نام سے مشہور ہیں، ستمبر 1907ء کو درہ خیبر کے ایک پس ماندہ علاقے لنڈی کوتل میں پیدا ہوئے۔ 1913ء میں گاؤں کے پرائمری سکول میں داخل ہوئے مگر پڑھائی سے جی چراتے اور اکثر اوقات سکول سے غیر حاضر رہتے تھے۔ والدہ کی وفات کے بعد ان کے والد نے انہیں پشاور میں اسلامیہ کالجیٹ سکول داخل کروادیا ۔ علامہ عنایت اللہ خان المشرقی (خاکسار تحریک کے بانی) اس اسکول کے پرنسپل تھے۔
اسکول کی تعلیم کے بعد بعد حمزہ شنواری طورخم میں پاسپورٹ کلرک بھرتی ہوئے، قبائلی پولیٹیکل نظام میں بھی بطور کلرک رہے ، بعد میں ریلوے میں ملازمت بھی اختیار کی، مگر حمزہ شنواری اپنی سیمابی فطرت کی وجہ سے دیر تک ایک جگہ ملازمت نہیں کرسکتے تھے۔
ملازمت کی تلاش میں بمبئی اور دہلی گئے، مگر کہیں کام نہیں ملا۔ واپسی پر اجمیر میں خواجہ معین الدین چشتی کے مزار پر حاضری دی جہاں ان پر ایک عجیب کیفیت طاری ہوگئی۔ یہیں سے ان کے اندر کے صوفی نے انگڑائیاں لیں، واپس گاؤں آئے ۔
یہاں ایک روحانی شخصیت سید عبدالستار شاہ عرف بادشاہ جان کے مرید بن گئے اور اپنے مرشد کی ہدایت پر پشتو زبان پشتو میں لکھنا شروع کردیا۔ 1937ء میں تصوف کے موضوع پر کتاب ‘‘تجلیات محمدیہ’’ لکھی۔اخبار میں افسانے اور مضامین اور پشاور ریڈیو کے لیے سینکڑوں ڈرامے، گیت ، مکالمے ، فیچرز اور تقریریں لکھیں۔
حمزہ بابا ادبی تنظیم بزم ادب پشتو کے نائب صدر ، ادبی تنظیم اولسی ادبی جرگہ کے صدر اورپاکستان رائٹرز گلڈ سابق صوبہ سرحد کے اولین سیکرٹری جنرل بھی رہ چکے تھے، انہیں صدارتی تمغہ برائے حسن کارکردگی سے بھی نوازا گیا۔ انہوں نے رحمان بابا کی غزلوں کا منظوم اردو ترجمہ اور علامہ اقبال کے جاوید نامہ اور ارمغان حجازکا پشتو میں منظوم ترجمہ بھی کیا۔ حمزہ بابا نے تصوف، شاعری، ثقافت اور ادب کے موضوع پر 35 کتابیں لکھیں ۔ ان کے بیشتر اشعار ضرب المثل کی طرح سنائے جاتے ہیں۔
بابائے جدید پشتو غزل امیرحمزہ خان شنواری 18فروری 1994ء کو 87 سال کی عمر میں خالق حقیقی سے جاملے ۔ حمزہ بابا کے کلام سے انتخاب….

ستا پہ اننګو کې د حمزہ د وینو سره دي
تہ شوې د پښتو غزلہ ځوان زہ دې بابا کړم

تیرے رخساروں میں حمزہ کے خون کی سرخی ہے
اے پشتو کی غزل تم جوان تو ہوگئی مگر مجھے بوڑھا کرگئی

انسان یم د فطرت په تقاضو کښي نه راځم
شاهین یم د کارغانو په پنجو کښي نه راځم
یو سیند یم د صهبا د پیرزوني وهم جوش
لیکن زه د کم ظرفو په کاسوکښي نه راځم

میں وہ انسان ، فطرت کے تقاضے جسے نہ روک سکیں
میں وہ شاہین، کوؤں کے پنجے جس تک نہ پہنچ سکیں
میں (علم و عشق کی ) مئے کا جوش مارتا وہ سمندر ہوں،
جس کے قطرے ، کم ظرف پیالوں تک نہ پہنچ سکیں

زود رنجی دَ آئینہ زڑونو صفت وی
صافی ڈیرہ قبلوؤنہ د غبار کا

زود رنجی آئینہ دلوں کی صفت ہے
صافی نے کتنا غبار جذب کیا ہے

ته یو ښه پښتون شه نو انسان به شے
بیا چه ښه انسان شے مسلمان به شے

پہلے اچھے پشتون بنو، تبھی بنو گے اچھے انسان
جب اچھے انسان بنو گے، تبھی بنو گے اچھے مسلمان

حمزہ بابا کی شاعری کے چند تراجم پیش خدمت ہیں:

اگرچہ تیرا خیال میرے دل کی گرہ نہیں کھولتا
مگر تیرے تصور نے میری بصارت کا دروازہ کھول دیا

دل کی کائنات یہ ایک آہ ہے
کیا رہ جائے گا اگر یہ بھی نکل گئی

کچھ لمحے پہلے میں تیری آنکھوں میں تھا
اب میں نظر نہیں آ رہا، تو نے مجھے کہاں کھو دیا

میرے خیال کی اڑان کائنات سے ماورا ہے
روشنی کی رفتار محسوسات سے باہر نہیں نکل سکتی

ان میں الفاظ نہیں صرف مفہوم ہے
آہوں کی طرح باتیں کرتا ہوں

تیری دید کے لیے میں فنا ہو چکا ہوں
میرے بدن میں صرف آنکھیں رہ گئی ہیں

جس کے اظہار کے لیے لفظ نہیں ملتے
خیال میں وہ مضمون آیا ہے

جب ہر شے سے آگاہ ہو جاتا ہے تو اس میں کچھ نہیں بچتا
تخیل کا عدم آئینے کا وجود رکھتا ہے


پاکستان میں پشتو زبان کے فروغ کی علمبردار ، ادبی اور ثقافتی تنظیموں اور اداروں میں پشتو اکیڈمی، پشتو ادبی تحریک، اولسی ادبی جرگہ، پشتو ادبی سوسائٹی، پشتو ادبی خدمتگار، تنقیدی ادبی ٹولنہ، رحمان بابا ادبی جرگہ اور دیگر شامل ہیں۔

بلوچی / بلۉچي

پاکستان کے صوبہ بلوچستان کے علاوہ بلوچی بولنے والے سندھ ، پختونخوا میں آبادہیں۔ پڑوسی ملک ایران میں بھی بلوچی بولی جاتی ہے، تاہم ان کے لہجے اور بلوچستان کے لہجے میں بہت فرق ہے۔
بلوچی زبان کی ترویج میں صوفی بزرگ حضرت میاں عبدالحکیم نانا صاحب، جام درک، مُلاّ فاضل، مست تولی، ملا مزار بنگلزئی ، ملنگ بابا، نورمحمد بمپشتی، مولانا خیر محمد ندوی ؒ ، سید ظہور شاہ ہاشمی ، محمد حسین عنقاؔ ، جی آر مُلاّ، میر گل خان نصیر، آزاد جمالدینی، عطاشاد، فیض بخشاپوری ، صبا دشتیاری کے نام قابل ذکر ہیں۔
بلوچی زبان کے حروف میں ث، ح، خ، ذ، ص، ض، ط، ظ، ع، غ، ف، ق، کےحرف استعمال نہیں ہوتے۔ دلچسپ امر یہ ہے کہ 19صدی سے قبل بلوچی غیر تحریر شدہ زبان تھی۔ قیام پاکستان سے قبل سے کراچی کے صوفی بزرگ ملنگ بابا نے بلوچی زبان میں اولین غزلیں کہیں، لیکن اس وقت بلوچی زبان باقائدہ تحریری شکل میں نہ تھی، اس لیے ان کا کلام سینہ بہ سینہ ہی آگے بڑھا۔ ملنگ بابا فرماتے ہیں :

تک دو روچی ھست اے دنیا اعتبارے ۽ ھچ نیست
آ کج اِنت سُلطان سکندر یادگارے ۽ ھچ نیست

اس ایک دو دن کی دنیا پر کوئی اعتبار نہیں کیا جاسکتا
کہاں ہے سلطان سکندر جس کی یادگار تک باقی نہیں

اپسوز ھزار ارماں گنِداں نہ گنداں دوست ءَ َ
نیست اِشک ءِ درد ءَ درمان گنِداں نہ گنداں دوست ءَ َ

(صدر ہزار افسوس وارمان کی بات ہے کہ دوست کو دیکھتے ہوئے بھی دیکھ نہیں سکتے،
عشق کے درد کا واقعاً کوئی علاج نہیں کہ دوست کودیکھتے ہوئے بھی دیکھ نہیں سکتے ….)

سید ظہور شاہ ہاشمی

ایک نوجوان بلوچ پہلے اپنے لیے علم و ادب کی مشکل راہوں کا انتخاب کرتا ہے، ان وادیوں میں قدم رکھنے کے بعد صرف شاعری اور نثری ادب تک خود کو محدود نہیں رکھتا بلکہ بلوچی کو عالمی معیار کے مطابق زبان کا درجہ دینے کا بیڑا اٹھا لیتا ہے۔ کم عمری میں ہی یہ منفرد کارنامہ انجام دے دینے والے فرد کا نام ہے سید ظہور شاہ ہاشمی ۔
بلوچی کو باقاعدہ زبان کی حیثیت دینے میں سب سے بڑا کردار ایک بلوچ جوان سید ظہور شاہ ہاشمی کا ہے۔ سید ظہور شاہ ہاشمی کو جدید بلوچی ادب کا بانی شمارکیا جاتا ہے۔ گوادر کے پہلے بلوچی افسانے سے لے کر، اولین بلوچی ناول انہی کے زورِ قلم کا نتیجہ ہے۔ اسی مردِ علم و ادب نے بلوچی ادب میں تحقیق و تنقید کی روایت ڈالی۔ ان کا سب سے بڑا کارنامہ بلوچی زبان کی لغت مرتب کرنا ہے۔
سید ظہور شاہ ہاشمی 21 اپریل 1926ء کو بلوچستان کے تاریخی ساحلی بندرگاہ گوادر میں پیدا ہوئے، سعدیہ اسکول گوادرمیں تعلیم حاصل کی۔ گوادر اس وقت سلطنت آف عمان کی عمل داری میں تھا۔ ان دنوں اسکولوں میں عربی لازمی پڑھائی جاتی تھی، یوں انہیں فارسی کے ساتھ عربی زبان پر بھی عبور حاصل ہوا۔مزید تعلیم کے لیے کراچی آئے اور ریڈیو پاکستان سے منسلک ہوئے اور وہاں کئی بلوچی پروگرام تخلیق کیے۔
بلوچوں کے سیاسی اور سماجی مسائل کو اجاگرکرنے کے لیے گوادر میں انجمن اصلاح بلوچاں نامی تنظیم اور کراچی میں بلوچی ء زبان ء سرچمگ نامی ادبی تنظیم قائم کی ۔
سید ہاشمی بلوچی زبان، ادب کیلئے دن رات کوشاں رہے۔ انہوں نے عمر کا اچھا خاصا حصہ خلیج کے ممالک میں بھی گزارا، ظہور ہاشمی نے بلوچی کا پہلا ناولٹ ‘‘نازک’’ سمیت لگ بھگ 30 سے زائد کتابیں لکھیں، جن میں زیادہ تر شاعری‘ ناول‘ افسانہ اور زبان و لسانیات پرمبنی تھیں ۔
بلوچی زبان کا یہ درخشاں ستارہ 3 مارچ 1978ء کو ٹی بی کے مہلک مرض میں 52 سال کی عمر میں اس دارفانی سے غروب ہوا۔
سید ظہور شاہ ہاشمی نے بلوچی ادب کو نئی جہت بخشی۔ سید ہاشمی کا شمار بلوچی زبان کے صف اول کے شعراء و ادیبوں میں ہوتا ہے۔ انہوں نے اپنی زندگی بلوچی زبان، ادب ، ثقافت اوربلوچ قوم کی تاریخ کے فروغ کے لیے وقف کردی تھی۔بلوچی زبان کے لیے بے لوث خدمات کرنے پر انہیں تمغۂ حسن کارکردگی سے بھی نوازا گیا۔ ان کا ایک بلوچی شعر ہے،

بیا پدا شتکیں تلارانی دلاں دراں کنیں
گران بہائیں مہر و دوستی ءَ ارزان کنیں

(آؤ مل کر ان بڑے بڑے مضبوط پہاڑوں کا سینہ چیر لیں،
کہ شائد اس طرح پیار و محبت ہر ایک کے سینے میں آسانی کے ساتھ جگہ بنا لے۔)

نی سید بس کن کینگ ءُ کست ءِ
وشنیتکانی لہڑ جنت منجل

(سید ہاشمی خود سے مخاطب ہوکر کہتے ہیں بس اب کینہ و حسد چھوڑ دے ،
کہیں ایسا نہ ہو کہ ان کی آگ کا جوش تمہاری جنت کو پگھلا دے۔ )

ایک اور شعر کا ترجمہ اس طرح ہے،

“دشمن میرے ہر کام میں نقص نکالتے ہیں، وہ کبھی خوش نہیں ہیں، میری یہ جان، میرا یہ نازک اور کمزور جسم قوم کی امانت ہے، جب تک میں اپنی منزل تک نہ پہنچوں تو مجھے قرار کیسے آئے گا”

ایک اور جگہ کہتے ہیں،

“میں نے کب اس دنیا میں سرداری معتبری مانگی تھی۔ میں نے کب اس دنیا میں سونا چاندی لعل و جوہر مانگے تھے۔ جو آئے تھے میں نے انہیں کب بلایا تھا، وہ بزور قوت آئے تھے۔ میں نے تو فقط ان ظالموں سے قوم کی تاریخ مانگی تھی،اس کے بدلے میں انہوں نے ہمیں افلاس و غربت سے ہمکنار کر دیا۔”

سرائیکی

سرائیکی، پاکستان کی اہم ترین علاقائی زبانوں میں سے ایک ہے، پاکستان میں 60 ملین (6 کروڑ ) لوگ سرائیکی وسیب، جنوبی خیبر پختونخواہ، شمالی سندھ اور مشرقی بلوچستان میں سرائیکی بولتے ہیں ، بھارت اور افغانستان میں بھی سرائیکی بولنے والوں موجود ہیں 2017ء کی مردم شماری کے مطابق سرائیکی پاکستان کی تیسری بڑی زبان اور سب سے زیادہ حروف تہجی رکھنے والی زبان ہے۔
معروف صوفی شعراء حضرت بابا فرید گنج شکر ؒ، شاہ حسینؒ، شاہ شمس سبزواری،سچل سرمستؒ ؒ، سلطان باہوؒ، بابا بلھے شاہؒ ؒ اورخواجہ غلام فریدؒ، بہاءُالدین زکریا ملتانیؒ،حافظ جمال اللہ چشتیؒ، منشی غلام حسن شہیدؒ، پیر علی مردان اویسیؒ، حافظ مدد علی، خواجہ مراد، عبدالرب علی افغانی شہید المعروف بابا غریب شاہؒ، قاضی احمد دین، مولانا قائم الدین خان لنگاہؒ، مولانا نظام بخش قریشیؒ، خواجہ عبید اللہ ملتانیؒ، خواجہ محمد حسین بخش ملتانیؒ اور دیگر بے شمار علماء اور شعراء نے سرائیکی زبان و ادب کی مختلف حوالوں سے بھرپور خدمت کی اور سرائیکی کو بامِ کمال تک پہنچایا۔
موجودہ دور میں سرائیکی زبان کی خدمت کرنے والوں کی بات کریں تو قیام پاکستان کے بعد خرم بہاولپوری، مہر عبد الحق سومرہ، شوکت مغل، ممتاز حیدر ڈاہر ،ارشد ملتانی، دلشاد کلانچوی، ڈاکٹر طاہر تونسوی، احمد خان طارق اور عوامی شاعر شاکر شجاع آبادی کے اسماء نمایاں ہیں۔
سرائیکی زبان کے فروغ کے لیے سرگرم اداروں اور تنظیموں میں سرائیکی لوک سانجھ، سویل Swail، سویل سرائیکی سنگت، سرائیکی ادبی گوجھی، سرائیکی مجلس ، سرائیکی فاؤنڈیشن نمایاں ہیں۔

احمد خان طارق

احمد خان طارق سرائیکی دوہڑے کے مقبول ترین شاعر جنہیں سرائیکی وسیب میں ‘‘دوہڑے کا بادشاہ’’ کہا جاتا ہے۔
احمد خان طارق 1924ء میں ڈیرہ غاذی خان کے گاؤں شاہ صدر دین میں پیدا ہوئے۔ احمد خان طارق نے سرائیکی شاعری کی کئی اصناف میں نہ صرف کام کیا بلکہ اپنی انفرادیت کے رنگ بھی نمایاں کئے۔ یہ الگ بات کہ ادبی دنیا میں ان کی زیادہ شہرت اور انفرادیت ان کی ڈوہڑا گوئی کے حوالے سے تھی۔ احمد خان طارق کا دوہڑہ علاقائی روایت و ثقافت،غربت و افلاس،عشق و محبت اور علاقائی محرومیوں کی بھرپورعکاسی کرتاہے۔
احمد خان طارق کی تصانیف میں گھروں در تانی،طارق دے دوہڑے،متاں مال ولے،میکوں سی لگدے،ہتھ جوڑی جُل،بیٹ دی خوشبو شامل ہیں۔
احمد خان طارق کا 10 فروری 2017 کو 93 سال کی عمر میں انتقال ہوا۔
ذیل میں ان کے چند مشہوردوہڑے پیش ہیں:

اے پاگل دل! بے ہوش نہ تھی،
ذرا آپ کوں جھل ، کل آ ویسی
کل سجھ دا وعدہ کر گئے چن،
من کہیں دی گل ، کل آ ویسی
شالا خیر ہووِس ، تھیسی خیر دا ڈینہہ ،
بہسوں رست مل ، کل آ ویسی
اجاں اج تاں طارق ویندا پئے
کل لہسی کل ، کل آ ویسی

تیڈی چھاں تے پلدے پئے ہاسے
کر پاسہ گئیں چن دُھپ کیتی
بس لکدا چھپدا دیکھ تیکوں میڈا
سیت وہ گئے لک چھپ کیتی
چن چاندڑیاں چٹیاں ڈد ھ راتیں
گئیں قہر دیاں کالیاں گھپ کیتی
ادھ بزم دے طارق بہن والے
اج بیٹھوں چنڈ ءِ چ چپ کیتی

چڑیاں اُٹھو ، کئی دھاں کرو، چُپ نہ کرو ، چُپ نہ کرو
خالق جہاں دی خیر کر، ہتھ جوڑ کے چلکیاں کرو
تن بے کفن ڈٖیکھو کتھائیں، ونجٖ کے پراں دی چھاں کرو
رُٹھڑے مناونْ دا دَوا، ساونْ دے سنگ سنگتاں کرو
ہتھ وچ جے کُئی ہتھیار نئیں، چیں چیں کرو چاں چاں کرو
جیکر خُشیاں محبوب ہِن، مونجھیں دیاں وی قدراں کرو
طارقؔ سویرے شام آ ، ویڑھے میڈٖے چُگٖیاں کرو

نہ ساہ مکدے نہ سِک مکدی پئے موتی رُلدن خاک اُتے
میکوں اپنے حال ملال نہیں جگ کھلدے حال ہلاک اُتے
کیں حال دعادے ہتھ چاواں کیویں مرہم لاواں چاک اتے
ہتھ دوہیں طارق رُجھ گئے ہن،ہک طاق اتے بیا ڈھاک اتے

 

شاکر شجاع آبادی

شاکر شجاع آبادی پاکستان سے تعلق رکھنے والے سرائیکی زبان کے مشہور اور ہر دل عزیز شاعر ہیں۔ جسے سرائیکی زبان کا شیکسپیئر اور انقلابی شاعر کہا جاتا ہے۔
شاکر شجاع آبادی کہتے ہیں:

سانوں خوف نئیں دشمن دا
سانوں یار دی یاری کھاگئی ۽
بس شاکر فرق معیاد دا ۽
میں آج رونداں توں کل روسیں
کیہندے کتّے کھیر پیون کیہندے بچّے بھکھ مرن
رزق دی تقسیم تے ہک وار ول کجھ غور کر
نجومی نہ ڈراوے دے اساکوں بدنصیبی دے
جڈاں ہتہاں تے چھالے تھئے لکیراں خود بدل ویسن
تو محنت کر محنت دا صلہ جانڑے خدا جانڑے
تو بیوا بال کے رکھ چھوڑ ہوا جانڑے خدا جانڑے
توں وی راضی میں وی اپنڑا ہاں ٹھریندا رہ ونجاں
لوک پڑھدن حج نمازاں میڈے ذمے لا ایہو
میں تیڈے محبوبؐ دے سہرے لکھیندا رہ ونجاں
بے دید سڄݨ دی یاری کنوں ایویں سُنج ہووے تاں ٹھیک ءِ
بے دید کڈاہیں ڈکھ سُکھ وِچ نہ تھیسی مُول شریک ءِ
منگو وعدہ مِلنڑ دا بُھل چک کے نت ڈیسی غلط تاریک ءِ
کُتا پال کے شاکر کِھیر پِلا بے دید کنوں تاں ٹھیک ءِ

ہندکو

ہندکو پاکستان کی قدیم ترین زبان ہے جو خیبر پختونخوا کے علاوہ صوبہ پنجاب میں اٹک و پوٹھوار اور آزاد کشمیر کے بیشتر علاقوں میں بولی جاتی ہے۔ ہندکو بولنے والوں کی ایک بڑی تعداد سندھ کے شہر کراچی میں بھی مقیم ہے۔
ہند کو کے قدیم شعراء میں رحمت خان رحمت ، محمد دین مائیو، شادا، بابا وجیدا، فر دوس ، کنہیا سنگھ ، نا مور، حاجی گل، امام دین ہزاروی، سخی نماڑا ، استاد مہیّن، بر دا، گاموں ، رمضو اور سائیں احمد علی سائیں پشاوری نمایاں ہیں۔ قیام پاکستان کے بعد ہندکو زبان کی خدمت کرنے والوں میں رضا ہمدانی، فارغ بخاری، آخونزادہ مختار علی نیئر ، خاطر غزنوی ، جلیل حشمی، سلطان سکون، آصف ثاقب ، غلام محمد قاصر ، عبدا للہ یزدانی اور الطاف صفدر کا نام قابل ذکر ہے۔
پاکستان میں ہندکو زبان و ادب کے گہواروں میں گندھارا ہندکو بورڈ، گندھارا ہندکو اکیڈمی، اباسین آرٹس کونسل، بزم شعور ہندکو، ہندکو رائٹرز سوسائٹی کا نام نمایاں ہے۔

سائیں علی احمد پشاوری

صوفی شاعر احمد علی سائیں کا تعلق پشاور سے ہے ، آپ کا شمار انیسویں اور بیسویں صدی کے معروف شعراء میں ہوتا ہے۔ اُن کی شاعری معروف صنف سی حرفی پر مشتمل ہے۔ آپ کے کلام میں فکر و فن کی پختگی کے ساتھ ساتھ اپنی مٹی، اپنی دھرتی اور اپنے وسیب سے محبت کا اظہار بھی موجود ہے ۔
سائیں احمد کی شاعری کے موضوعات میں حمد، نعت، قصیدہ، حسن و عشق، فطرت، تصوف، عرفان زار، عاجزی، انکساری، سچائی، سخاوت، دنیا اور دنیا کی بے سباتی سب شامل ہیں۔
پاکستان کے صوفی شعراء میں حضرت احمد علی سائیں منفرد مقام کے حامل ہیں۔ احمد علی سئیں نے بھی بابا بلھے شاہ، بابا فرید، رحمان بابا، مست توکلی، شاہ عبداللطیف ڈھٹائی، سئیں فقیر، سئیں غلام دین ہزاروی اور شاہ حسین کی طرح آفاقی پیغام کو شاعری میں ڈھال کر لوگوں تک پہنچایا۔ سائیں احمد کی سہ حر فیوں کو سن کر علامہ اقبال نے انہیں ہند کو کا غاؔلب قرار دیا۔ سائیں کی شاعری میں ہند کو محاوروں کا استعمال ان کے کلام کو مزید دل پزیر اور خوش کن بنا تاہے۔

اتھے مار دے ٹکراں خیال سائیاں
جھتے پونچ نہ بادِ صبادی اے
میں تاکھو جیاں دابی استاد ہیواں
تو اے سمجھے، سمجھدار ٹور نیئں میں
سائیں زندہ دل زنگی رکھنا واں،
دنیاجان دی اے زندہ در گور نیئں میں۔

احمد علی سئیں کے چند شعر

رنگ چاہڑے جس نے پربتاں نوں طلب ازل سیں اُسے مشتاق دی اے
ہمسری کرنے اُسدی آئے لکھاں وار سہہ نہ پائے آفاق دی اے
جس قدم ٹھہریا عرش فرش ٹھہرے خوبی خوبیوں میں یہ میثاق دی اے
خود پرست ہن پرکھدے کہہ سائیاں جبکہ خاتم یہ مہر فراق دی اے

رضا ہمدانی

شاعر اور ادیب مرزا رضا حسین ہمدانی 1910ء میں پشاور میں پیدا ہوئے ، اعلیٰ تعلیم کے بعد پشتو فاضل کے امتحانات پاس کیے۔ اردو، فارسی اور پشتو کے ساتھ ساتھ ہندکو میں بھی شعر کہے۔ انہوں نے ہند کو فلموں کے لیے گیت بھی لکھے۔ افسانے، ڈرامے اور تنقیدی مضامین بھی لکھے ۔ اصنافِ سخن میں غزل، نظم، رباعی، قطعہ سب ہی میں طبع آزمائی کی۔
رضا ہمدانی کی تصانیف ایک درجن کے قریب ہیں جو ادبی ،ثقافتی اور تاریخی وسوانحی، دینی ومذہبی موضوعات سے متعلق ہیں۔ ان تصانیف میں اردو شعری مجموعے، صلیب فکر، رگ مینا اور سدرۃ المنتہیٰ کے علاوہ ہندکو شعری مجموعہ ترمے ترمے اور نثری کتب میں ادبیات سرحد، جمال الدین افغانی، خوشحال خان کے افکار، رحمان بابا کے افکار، چار بیتہ، مراۃ الاسلام، سائیں احمد علی پشاوری اور پشتو ادب اور تراجم میں پشتو افسانے، باز نامہ اور پشتو کی رزمیہ داستانیں شامل ہیں۔
﷽ رضا ہمدانی کے علمی و ادبی کارناموں کے اعتراف میں رائٹرزگلڈ،اباسین آرٹ کونسل اور یونیسکو کی جانب سے انعامات سے نوازا گیا۔
رضا ہمدانی کا ہندکو شعر ملاحظہ کیجیے :

چھپن چھوپ دا بہانہ کر کے
نیناں دے وچ لگ گیا واں.

رضا ہمدانی کے چند اردو اشعار:

ہر عکس خود ایک آئنہ ہے
ہر سایہ زباں سے بولتا ہے
بھنور سے لڑو تند لہروں سے الجھو
کہاں تک چلو گے کنارے کنارے
طعنہ دیتے ہو مجھے جینے کا
زندگی میری خطا ہو جیسے
عجب چیز ہے یہ محبت کی بازی
جو ہارے وہ جیتے جو جیتے وہ ہارے
جنوں کا راز محبت کا بھید پا نہ سکی
ہمارا ساتھ یہ دنیا مگر نبھا نہ سکی
معمورۂ افکار میں اک حشر بپا ہے
ادراک بھی انساں کے لیے طرفہ بلا ہے
بکھر گیا ہوں فضاؤں میں بوئے گل کی طرح
مرے وجود میں وسعت مری سما نہ سکی
خراب عشق سہی عالم شہود میں ہوں
ہوں اشک اشک مگر اپنے ہی وجود میں ہوں

رضا ہمدانی بزم سخن پشاور، ادبستان پشاور کے ناظم اور انجمن ترقی اردوسرحد کے سیکرٹری بھی رہے۔ ماہنامہ ند ، ہفتہ وار شباب پشاور اور ہفتہ وار اخبار شباب لاہور سمیت کئی رسائل کے مدیر رہے۔
پشتو اور ہندکو ادب کو اردو دان طبقے سے متعارف کرانے میں بھی انہیں اولیت حاصل رہی۔ رضا ہمدانی 9جولائی 1994ء کوپشاور میں وفات پاگئے۔

[box type=”shadow” align=”” class=”” width=””] اس مضمون کی تیاری میں رہنمائی اور علمی مشاورت پر ہم سینئر بلوچ صحافی، ادیب، شاعر اور پہلے بلوچی ٹیلیویژن وش کے بانی جناب احمداقبال بلوچ ۔
پاکستان کے سینئر صحافی، کالم نگار، تجزیہ نگار، براڈ کاسٹر جناب نذیر لغاری اور
استاد، شاعر ، کتاب ‘‘پاکستان کے صوفی شعرا ’’کے مرتب اور دیگر کئی کتابوں کے مصنف ڈاکٹر راشد متین کے شکر گزار ہیں۔

[/box]
Liked Liked
2 Comments

  1. Dr akram khawer: i am adding this in …

    • روحانی ڈائجسٹ: مضمون کا کوئی حصہ کس…

Yunus Emre

, , , , , , , , , , , , ,

یونس ایمرے

⋅


[box type=”shadow” align=”” class=”” width=””]

ترکوں کے محبوب اور مقبول ترین صوفی شاعر ہیں ، جنہیں ترکی اور وسط ایشیائی ممالک آذربائجان، بلقان اور البانیہ وغیرہ میں رومی سے بھی بڑا عوامی شاعر مانا جاتا ہے ….
ترکی کے صدر طیب اردون کہتے ہیں :
’’یونس ایمرے کے نقش قدم پر چل کر ہم دلوں کو جوڑ سکتے ہیں، یونس نے ہمیں کبھی تنہا نہیں چھوڑا۔‘‘
’’یونس ایمرے جیسی آتش ، رومی جیسی فکر اور حاجی بکطاش جیسے تحمل اور وقار کے بغیر قوم کی خدمت نہیں کی جاسکتی ۔‘‘
صدر طیب اردوان مزید کہتے ہیں ’’مجھے یقین ہے کہ ہمارے تمام شہری اپنی زبان کے تحفظ اور تقویت کا اہتمام کرتے ہوئے یونس ایمرے ، مولانا رومی، حاجی بکطاش ولی اور دیگر کئی اکابرین کے آفاقی پیغامات کو آئندہ نسلوں تک پہنچائیں گے۔‘‘
[/box]

اگر برصغیر پاک و ہند میں کسی سے پوچھا جائے کہ ترکی کے سب سے مقبول اور سب سے بڑے صوفی شاعر کون ہیں تو فوراً ہی اس کی زبان پر حضرت جلال الدین رومی ؒ کا نام آئے گا۔ آپ کو یہ سن کر حیرت ہوگی کہ اگر یہی سوال کسی ترکی باشندے سے پوچھا جائے تو اُس کا جواب کچھ اور ہوگا….!!
عالمی سطح پر تو تیرہویں صدی عیسوی کےمشہور صوفی شاعر اور مفکر جلال الدین رومی ؒ کو ایک منفرد مقام حاصل ہے۔ ترکی، ایران اور برصغیر پاک و ہند میں رومی کی شہرۂ آفاق تصنیف مثنوی ایک نہایت محترم کتاب کا درجہ رکھتی ہے، رومی کی شاعری دنیا کی بیشتر زبانوں میں ترجمہ ہوچکی ہے۔ کلام رومی امریکہ میں بیسٹ سیلرز یعنی سب سے زیادہ فروخت ہونے والے کلام میں شامل ہے۔
آپ کو یہ جان کر شاید حیرت ہو کہ ترکی میں ایک صوفی شاعر ایسے ہیں جنہیں رومی سے بھی بڑا عوامی شاعر مانا جاتا ہے، جو گذشتہ سات سو سال سے ترک باشندوں کے محبوب اور مقبول ترین شاعر ہیں ۔
ہم بات کررہے ہیں تیرہویں صدی عیسوی کے معروف ترک صوفی شاعر یونس ایمرے Yunus Emre (پیدائش 1238ء تا وفات 1320ء)کی، جنہیں عربی زبان و لہجے میں يونس امره بھی لکھا اور کہا جاتا ہے۔
تصوف اور روحانیت کے حوالے سے یونس ایمرے کا کلام، رباعی، گیت، نظمیں، غزلیں نہ صرف ترکی بلکہ وسط ایشیائی ممالک بلقان، آذربائجان اور البانیہ میں بھی زبان زد عام ہیں۔
یونس ایمرے 1238ء میں ترکی کے ایسکی شہر کے صارے قوئے Sarıköyنامی علاقے میں پیدا ہوئے، ایمرے کے معانی دوست، محبوب اور عاشق کے ہیں۔ آپؒ کا گھرانہ گاؤں میں ایک غریب کسان کی حیثیت سے ہل چلاکر گزراوقات کیا کرتا تھا۔
کہا جاتا ہے کہ ابھی یونس نو عمر ہی تھے کہ اناطولیہ میں سخت قحط پڑا ، ان کا گاؤں بھی قحط سے بری طرح متاثر ہوا۔ یونس کو اپنے سے زیادہ دوسروں کی فکر تھی۔ یونس ترکی کے معروف صوفی بزرگ حاجی بکطاش ولی کی درگاہ کے لیے روانہ ہوئے۔ رقم پاس نہیں تھی اور درویش کے پاس خالی ہاتھ بھی نہیں جانا چاہتے تھے اس لئے جنگل سے کچھ پھل توڑ لئے۔
حاجی بکطاشؒ بہت پہنچے ہوئے بزرگ تھے، انہوں نے اپنے ایک مرید خاص کو کہا کہ آج ایک لڑکا یونس آنے والا ہے ۔تم اس سے پوچھنا کہ اس کو اناج چاہیے یا ‘‘برکت’’….
جب یونس درویش حاجی بکطاشؒ کی درگاہ پہنچے تو حاجی بکطاشؒ نے خود ان سے پوچھا کہ بیٹا…!تم گندم لینا چاہتے ہو یا برکت۔
یہ سوال انہوں نے تین مرتبہ پوچھا۔ یونس نوعمر تھے، اس لفظ سے ناآشنا تھے انہوں نے پوچھا
‘‘کیا برکت اتنی ہی جگہ لے گی جتنا کہ اناج’’….
جواب ملا ‘‘نہیں ….برکت تو چھوٹی سی جگہ میں سما سکتی ہے۔ ’’
یونس کو خیال آیا کہ ان کے یہاں لوگ فاقوں سے مر رہے ہیں ، ایسے میں میں اتنی چھوٹی سی چیز لے کر کیا کروں گا ۔ یونس نے درگاہ سے گندم اور اناج کی بوریاں اٹھائیں اور خوشی خوشی گاؤں کی طرف روانہ ہوئے۔ ابھی تھوڑی ہی دور گئے تھے کہ ان کے ذہن میں یہ خیال آیا ہوسکتا ہے کہ برکت کوئی ہیرا یا سونا ہو جس کو بیچ کر بہت سا اناج آجائے۔
یہ سوچ کر یونس درگاہ کی طرف واپس پلٹے۔ دوبارہ حاضر ہوکر برکت طلب کی۔
یونس کو جواب ملا کہ ان کے حصے کی برکت تو بکطاش سلسلہ صوفیا کے دوسرے شیخ حضرت طابطوق ایمرےؒ Tapduk Emreکو بھیجی جاچکی ہے، الغرض قصہ مختصر حالات نے کچھ ایسا رخ اختیار کیا کہ چند سال بعد جب یونس ایمرے اناطولیہ کے ایک شہر نالیحان میں قاضی کے عہدے پر فائز تھے، وہاں آپ کی ملاقات صوفی بزرگ طابطوق سے ہوئی۔
یونس ایمرے نالیجان شہر کے قاضی تھے، عدل قائم کرنا ان کی ذمہ داری تھی۔ یونس ایمرے عدل کی فراہمی میں کسی رعایت کے قائل نہ تھے۔ قاضی یونس ایمرے کے فیصلوں اور کئی اقدامات نے جلد ہی نالیحان شہر کے عوام میں ان کی دھاک بٹھادی۔ نالیحان شہر میں صوفی بزرگ طابطوق ایمرے کی درگاہ بھی تھی۔ یونس ایمرے کی طابطوق ایمرے سے بطور قاضی کئی ملاقاتیں ہوئیں۔
یونس پر صوفی طابطوقؒ ایمرے کی صحبتوں کا کچھ ایسا رنگ جما کہ انہوں نے طابطوق ایمرے کی شاگردی اختیار کرنے اور ان سے حصول علم کے لیے قاضی کے منصب سے استعفیٰ دے دیا۔
طابطوق ایمرےؒ سے ا ٓپ نے قرآن و حدیث کے علوم اور روحانیت کے اسرار و رموز سیکھنے کے لیے چالیس سال ان کی خدمت میں گزارے۔ طابطوق ایمرے نے یونس کو بہت سخت مجاہدوں سے گزارا۔ یونس نے کئی سال تک درگاہ کے لیے لکڑہارے کے فرائض بھی سرانجام دیے۔ اسی دوران یونس کی شادی بھی طابطوق ایمرےؒ کی بیٹی سے ہوگئی۔
مولانا رومؒ سے جو تعلق حضرت شمس تبریز کا تھا وہی طابطوق کا یونس ایمرے سے ہے، طابطوق کی تربیت میں یونس نے راہ سلوک کی کٹھن منازل طے کیں اور پھر گاؤں گاؤں، قریہ قریہ، فقیرانہ صدا لگاتے محو سفر رہے۔
یونس ایمرے کا زمانہ بڑا ابتلاء اور آزمائشوں کا زمانہ تھا اس زمانے میں سقوط بغداد کے بعد قونیہ پر سلجوق ترک حکمران تھے، اس وقت قونیہ اور اناطولیہ کا نواحی علاقہ ان وسط ایشیا کے مہاجرین کے لیے واحد پناہ گاہ تھا جن کے آبائی وطن کو منگول حملہ آوروں کی یورش اور قتل و غارت گری نے تباہ و برباد کر رکھا تھا۔
سلجوقی، منگول اور مختلف قبائل لڑائیوں میں مصروف تھے اس دور میں یونس ایمرے نے انسان دوستی اور بھائی چارے کا پیغام پھیلایا اور سب کو اتحاد، اتفاق اور آپس میں مل جل کر رہنے کی تلقین کی۔
یونس ایمرے کے بارے میں کہا جاتا ہے کہ وہ بہت شیریں گفتار اور لحن داؤدی کا سا کمال رکھتے تھے۔ اُس وقت مولانا رومی کا کلام ترکی کی شہری اشرافیہ کی مروجہ ادبی زبان فارسی میں ہونے کی و جہ سے خاص الخاص تھا۔ یونس ایمرے کے ہاں ذریعہ اظہار عام لوگوں کی یعنی دیہی علاقوں میں بولی جانے والی ترکی زبان میں ہی تھا۔ زبان سادہ، مفہوم واضح، تشبیہات، استعارے عام فہم اور زبان زد عام ہونے والے یونس کے کلام میں غنائیت اور نغمگی کا بہاؤ اِس درجہ تھا کہ صوفیاء کی محفلوں میں جب گایا جاتا تھا تو لوگ و جد میں آ جاتے تھے۔ یونس ایمرے کو انا طولیہ کے صوفی درویش بھی کہا جاتاہے۔ معروف ترک بزرگ صوفی شاعر احمدولد اور احمد یسوی کے بعد یونس نے فارسی اور عربی کی بجائے ترک زبان میں شاعری کی۔
یونس ایمرے نے 1320ء میں وفات پائی۔ حضرت یونس ایمرےؒ کے مدفن کا یقینی علم نہیں ہے۔ غالب امکان یہی ہے کہ آپ صارے قوئے میں دفن ہیں۔آپ نے وسطی ایشیاء سمیت شام اور دنیا کے بہت سے ممالک کے سفر کئے اور آپ کے عقیدت مند دنیا کے مختلف خطوں میں پائے جاتے ہیں۔
یونس ایمرے، جلال الدین رومی (1207ء تا 1273ء)کے ہم عصرتھے۔ یونس ایمرے، رومیؒ سے اکتیس سال چھوٹے تھے۔ یونس ایمرے بھی رومی کی طرح عالمی سوچ رکھنے والے عظیم شاعر ہیں۔ ان کو رومی سے جو چیز الگ کرتی ہے وہ ان کی جانب سے استعمال کی جانے والی زبان ہے۔ مولانا نے اپنے شاہکاروں میں ترکی زبان کی اصطلاحات ، محاورے اور فلسفے کو فارسی زبان میں پیش کیا ہے تو یونس ایمرے نے اپنی مادری زبان ترکی کو اپنے اشعار میں تحریر کرنے کو اولیت دی ہے۔ رومی اپنی کہانیوں میں حکایتوں اورمثنویوں کا مجوعہ تصنیف کرتے تھے۔ان کا حلقۂ اثر شہر کے عالم فاضل صوفیوں پرزیادہ مشتمل تھا۔ بنیادی طورپران کی تحریریں ادبی زبان یعنی فارسی میں تھیں۔ دوسری طرف یونس ایمرے بستی بستی گھوم کرغریبوں کے لیے نظمیں کہتے تھے۔ ان کے گیت عام فہم ترک زبان میں ہوتے اسی لیے عوام میں بڑی تیزی سے مقبول ہوتے گئے۔ ترکی میں آپ کو نہایت عزت و احترام حاصل ہوا۔ یہاں تک کہ آپ کو رومی سے بھی بڑا عوامی شاعر مانا جانے لگا ۔
یونس ایمرے نے تحریری طور پر کوئی اثاثہ نہیں چھوڑا ، ان کا کلام، نظمیں اور رباعیات سب سینہ بہ سینہ چلی آرہی تھیں۔ موجودہ صدی میں عبدالباقی گل پنیارلی نامی ایک عالم نے نہایت عرق ریزی سے یونس ایمرے کا کلام مرتب کیا ۔ اس میں 1308 میں لکھی گئی 1575 اشعار پر مبنی ایک مثنوی ‘‘رسالہ النصیحہ’’ ہے جو فارسی بحر و اوزان پر ہے، 350 نظموں پر مشتمل دیوان شامل ہے۔ لیکن یونس ایمرے کا بیشتر کلام امتداد زمانہ کی نظر ہوچکا ہے۔
اس حوالے سے ایک واقعہ مشہور ہے کہ صوفی بزرگ طابطوق ایمرے کا ملا قاسم نامی ایک مرید تنگ نظر، دقیانوسی اور انتہا پسند سوچ کا مالک شخص تھا، ایک روز اس نے اپنے پیر بھائی یونس ایمرے کے تحریری کلام کو دریا برد کرنے کا ارادہ کیا، کہتے ہیں کہ ملا قاسم دریا کے کنارے بیٹھا یونس ایمرے کی شاعری کا مطالعہ کر رہا تھا۔ وہ ایک کے بعد ایک صفحہ پلٹتا اور بڑبڑاتا کہ یہ تو خرافات ہے اور اس صفحے کو توڑمروڑ کر پانی میں ڈال دیتا تاوقتیکہ وہ اس صفحے تک پہنچا جس پر یونس ایمرے نے اپنی ذات کو مخاطب کرتے ہوئے لکھا تھا کہ
‘‘یونس تم حق بات کہو اس لیے کہ ایک دن ایسا آئے گا جب ملا قاسم تمہارا محاسبہ کرے گا’’….
اس مقام پر ملا قاسم کو ہوش آیا اور وہ صفحات کو تلف کرنے کے بعد بہت پچھتایا اور بے اختیار رو دیا۔ آج کہا جاتا ہے کہ یونس امرے کے کلام کا ایک تہائی اثاثہ جو اگلی نسلوں تک پہنچا ہے وہ یونس کے کلیات کا وہی حصہ ہے جو ملا قاسم کی دست برد سے بچ پایا تھا ۔

 

 

[box type=”shadow” align=”” class=”” width=””]

ترک صوفی شاعر یونس ایمرے (1238ء – 1320ء) نے اناطولیہ کے ادب و ثقافت پر گہرے اثرات مرتب کیے۔ انھوں نے قدیم اناطولوی ترکی زبان میں تحاریر لکھیں جو جدید ترکی زبان کی ابتدائی شکل تھی۔ یونس ایمرے ترکوں میں بہت ہر دل عزیز ہیں، یونس ایمرے کو سات سو اسی سال گزرنے کے باوجود آج بھی لوگوں کے دلوں پر راج کرتے ہوئے دیکھا جاسکتا ہے، یونس کی مقبولیت کا اندازہ اس بات سے لگایا جاسکتا ہے کہ ناصرف ڈاک ٹکٹ، بلکہ ترکی کرنسی اور سکوں پر ان کی تصاویر نقش ملتی ہیں۔


یونس ایمرے کے مجسمے اور یادگاریں ان کے آبائی شہر ایسکی شہر کی آنادولدو یونیورسٹی ، کارامان، بویوک چکمہجے ، حابی بکطاش نوشہر، اونیے اردو، زیتین بورنو سمیت دیگر کئی شہروں میں ملتے ہیں۔ یونس ایمرے کے نام پر کئی انسٹی ٹیوٹ، فاؤنڈیشن، یونیورسٹی، اوپیرا، کلچرل سینٹر، وقف YEE قائم ہیں۔
جمہوریہ ترکی کے صدر رجب طیب ایردوان کے نام سے منسوب ویب سائٹ آر ٹی ای RTEاردو زبان سمجھنے والوں تک ترک اقوام کی خبروں اور ثقافت کے ساتھ ساتھ رومی اور یونس ایمرے کے صوفیانہ پیغامات کو پہنچانے میں پیش پیش ہے۔ ترکی کے صدر طیب اردون نے کئی بار اپنی تقریروں اور ٹوئیٹر پوسٹ میں یونس ایمرے کا ذکر کیا ہے۔ یونس ایمرے کلچرل سینٹر میں ایک تقریر کے دوران اردون نے یونس ایمرے کی ایک نظم پڑھی

Gelin tanış olalım İşi kolay kılalım
Sevelim sevilelim Dünya kimseye kalmaz
آومل ہر باہم کریں دائمی دوستی ، تاکہ آسان ہوجائے یہ زندگی
آؤ عاشق بنیں اور معشوق بھی، کیسی رنجشیں ، کسی کی نہیں یہ زمیں

یونس ایمرے کی حیات و تعلیمات پر ترکی میں کئی کتب شایع ہوچکی ہیں ، 1974ء میں ان پر ایک فلم بھی بنائی جاچکی ہے۔ حال ہی میں ترکی کے پہلے قومی ٹیلی ویژن اسٹیشن، ٹی آر ٹی 1 کی جانب سے یونس ایمرے کے حالاتِ زندگی پر انہی کے نام سے ایک ٹی وی سیریز ‘‘Yunus Emre: The journey of love’’ (یونس ایمرے: محبت کا سفر) تیار کی ، جو دو سیزن اور تقریباۤ 45 اقساط پر محیط تھی۔اسے 2015ء اور 2016ء میں نشر کیا گیا۔ یہ ڈرامہ سیریز نیٹ فلیکس پر بھی دستیاب ہے اور یوٹیوب چینل، ٹیلیوستان Televistanاور فیس بُک پر اس ترکی ٹیوی سیریز کو انگریزی اور اردو متن (سب ٹائٹلز) کے ساتھ دیکھا جاسکتا ہے۔

https://www.trt1.com.tr/arsiv/yunus-emre
https://www.netflix.com/pk/title/80126991
https://televistan.com/category/tv-series/yunus-emre/
https://youtube.com/channel/UCKAU0EAkmCD22ix9whsqDXQ/
https://www.rteurdu.com/yunus-emre-urdu-subtitle-ep1/
https://www.imdb.com/title/tt0281392/

[/box]

 

یونس ایمرے ترک تصوف کے بڑے اساتذہ میں شمار ہوتے ہیں۔ آپؒ کے اشعار میں عربی اور فارسی ترکیبیں اور قرآن کریم کی آیات کے حوالے بکثرت موجود ہیں۔ یونس ایمرے بہت بڑے عالم بھی تھے ۔ آپؒ ترکی میں ماڈرن لٹریچر کے بانیوں میں شمار ہوتے ہیں۔
ترک زبان و ادب پر یونس ایمرے کے اثرات بہت گہرے ہیں۔ آپ نے جو زبان لکھی اور اپنے شعروں اور تحریروں میں استعمال کی وہ آج کی ترک زبان کی ابتدائی شکل تھی یعنی آپ ترک زبان و ادب کے بانیوں میں سے ہیں۔ آپ ہی وہ شخصیت ہیں جن کی تحریر اور کلام سب سے پہلے تحریری شکل میں ترک زبان میں جمع کیا گیا اور شائع کیا گیا۔
یونس ایمرے ؒ کا کلام دو کتابوں پر مشتمل ہے۔ ایک کتاب نصائح پر مشتمل ‘‘رسالتہ النصیحہ’’ ہے جس میں قریباً ساٹھ نظمیں ہیں۔ دوسری کتاب آپ کا مجموعہ کلام ‘‘دیوان یونس ایمرے’’ ہے ، محققین نے آپؒ کی نظموں کی تعداد 350 بتائی ہے۔
یونس ایمرے کا کلام اردو زبان میں بھی ترجمہ ہوا ۔ اس کا سہرا ڈاکٹر نثار احمد اسرار (1942ء۔ 2004ء) کو جاتا ہے، جو انقرہ میں پاکستانی سفارت خانے میں 26 برس افسرِ اطلاعات رہے۔ ڈاکٹر نثار احمد اسرار نے ترکی، اردو، انگریزی میں علمی ادبی کام بھی کیا اور مشہور ترک شاعر یونس ایمرے اور عاکف ایرصوئے کے کلام کا ترجمہ کرکے اسے اردو داں طبقے میں متعارف کرایا۔ ترکی کے عظیم عوامی شاعر یونس ایمرے کے سوانح حیات ، فکر و فن اور منتخب کلام پر ڈاکٹر نثار احمد اسرار کی کتاب1991ء میں اکادمی ادبیات پاکستان، اسلام آباد سے شایع ہوئی۔
1991ء میں یونس ایمرے کی 750ویں سالگرہ کے موقع پر اقوام متحدہ کی جانب سے متفقہ طور پر اس سال کو عالمی سطح پر ‘‘یونس ایمرے عشق کا سال’’ کے طور پر بھی منایا گیا۔

[box type=”success” align=”” class=”” width=””] اقوام متحدہ کی تعلیمی، علمی و ثقافتی تنظیم (یونیسکو UNESCO) نے یونس ایمرے کی 750ویں سالگرہ کے موقع پر یونس ایمرے کی ادبی خدمات کے اعتراف میں 1991ء کو متفقہ طور پر ‘‘یونس ایمرے عشق کا سال Yunus Emre Love Year ’’کے طور پر منایا ۔ اس پروگرام میں ایک درجن سے زائد زبانوں میں سرگرمیوں ، بزم نشاط ، لیکچر سیریز ، اور اشاعتوں کا آغاز کیا گیا۔ ترکی میں یونس ایمرے کے اعزاز میں تقریبات، مجالس اور علمی مذاکرے ہوئے ، وزارت ثقافت انقرہ کے زیر اہتمام ترکی کے معرف شاعر طلعت سعید حلمان Talât Sait Halman نے یونس ایمرے کی شاعری، نظمیں ، تدوین اور ترجمہ کیے، جو انڈیانا یونیورسٹی (امریکہ )کے زیر اہتمام Yunus Emre and His Mystical Poetry کے نام سے شایع ہوئی۔ یونس ایمرے کی حیات و تعلیمات پر کتب اور اخبار و جرائد کے خصوصی شمارے شایع کیے گئے، اس موقع پر انقرہ میں پاکستانی سفارت خانے کے افسرِاطلاعات ڈاکٹر نثار احمد اسرار نے یونس ایمرے کے کلام کو اردو زبان میں ترجمہ کیا۔
[/box]

یونس ایمرے کی شاعری ناصرف اپنے دور کی تاریخ، تہذیب، زبان، کلچر اور ثقافت کی عکاسی ہے بلکہ اس میں خالق کائنات سے لو لگانا، وحدانیت ، عشق حقیقی ، دنیا کی بے ثباتی، تصوف کے گہرے نقوش ، انسان دوستی، ایک دوسرے کالحاظ، برداشت، تحمل ، محبت و پیار، امن اور بھائی چارے کا درس ملتا ہے۔ آپؒ کے کلام میں زندگی، موت، فقیری، غنا، فنا، کائنات، توحید، اخلاص، عبادت، رضائے الٰہی، جنت اور جہنم کی صوفیانہ تشریح ہے۔
یونس ایمرے کو تصوف سے تعلق رکھنے والے دیگر شاعروں سے جو چیز الگ کرتی ہے وہ ان کا عوامی شاعر ہونا بھی ہے۔ یونس ایمرے کی شاعری بالکل سادہ، باتصور اور مقصد تک براہ راست رسائی رکھتی ہے۔ان کی یہی خوبی عام لوگوں میں مقبولیت کا باعث بنی۔ آپ کی شخصیت، تعلیمات اور کارناموں پر کئی کتب دنیا کی مختلف زبانوں میں شایع ہو چکی ہیں اور مزید ہو رہی ہیں۔ یونس ایمرے کی شاعری ترکوں کے قومی مزاج کی حسین عکاس ہے۔ بیرونی دنیا میں بھی اب ان پہچان ہو رہی ہے۔ ان کے ہم عصر مولانا رومی کا کلام فارسی میں ہونے کی و جہ سے برصغیر اور وسط ایشیا کی ریاستوں میں بہت زیادہ مقبول ہوا۔ تاہم اب انگریزی ترجمے کی وجہ سے لوگ بڑی تعداد میں ان کی یونس ایمرے کے فن اور کلام کی سادگی، برجستگی اور فلسفے سے واقف ہو رہے ہیں۔

[box type=”success” align=”” class=”” width=””]

یونس ایمرے کے حیات و تعلیمات سے دنیا پوری طرح واقف نہیں، ہمیں یونس ایمرے کے وہی حالات ملتے ہیں جو انہوں نے اناطولیہ ترکی میں گذارے ۔ ترکی کے دوسرے علاقوں اور وسط ایشیائی ممالک میں ان کے سفر کے متعلق مستند معلومات دستیاب نہیں۔
یونس ایمرے نے کوئی تحریری اثاثہ نہیں چھوڑا ، ان کی نظمیں اور رباعیات سب سینہ بہ سینہ چلی آرہی تھیں۔ گذشتہ صدی میں عبدالباقی گل پنیارلی Ab- dulbaki Golpinarli نے نہایت عرق ریزی سے یونس ایمرے کا کلام مرتب کیا ۔ یونس ایمرے پر تحقیق کرنے والوں میں پروفیسر فواد کوپریلی Prof.Fuat Köprülü برہان ٹوپرکBurhan Toprak, ، جہت ازتیلی Cahit Öztelli اور صباحتن ایوبی کلے Sebahattin Eyüboğlu.قابل ذکر ہیں۔  

[/box]

صوفی شاعر یونس ایمرے کا کچھ کلام پیش خدمت ہے:

خالق کائنات کی تلاش:
یونس ایمرے عشق حقیقی کے پرستار اور اسیر تھے، آپ کے کلام میں جا بجا عشق حقیقی، وحدانیت اور خالق کائنات سے لو لگانے کا اظہار ملتا ہے۔یونس ایمرے فرماتے ہیں:

Aşkın aldı benden beni,
Bana seni gerek seni.
Ben yanarım dünü günü,
Bana seni gerek seni.
عشقک الدی بندن بینی بکا سِنی کرک سینی
بن ینارم دونی کونی بکا سِنی کرک سینی
ترے عشق میں خود سے بیگانہ ہوں میں
مجھے بس تیری جستجو ، تیری آرزو ہے
شب و روز جلتا ہوں پروانہ ہوں میں
مجھے بس تیری جستجو ، تیری آرزو ہے

Hak cihâna doludur
Kimseler Hakk’ı bilmez
O’nu sen senden iste
O senden ayrı olmaz
حق جہانہ طولودُر کیمسہ لر حقی بیلمز
اونو سن سندن استہ اول سندن ایرو اولماز
حق تعالیٰ سارے جہاں پر محیط ہے
پھر بھی اس کی حقیقت سے کوئی واقف نہیں
بہتر ہوگا کہ اپنے آپ میں اسے تلاش کرو
کیونکہ وہ تم سے دور نہیں ہے

Gönlüm, canım, usum,
bilim senin ile karar eder,
Can kanadı sevi gerek
uçuban dosta gitmeye.
کوکلم جانم عقلم بعلم سنک ایلہ قرار ایدر
جان قنا دین سوِ کرک آچوبن دوستہ کتمیا
میرا دل میری روح میری عقل میرا علم
سب کو تیرے کرم سے قرار ہے
اپنی روح کے پر پھیلانا لازمی ہے
اگر خواہش ہے دوست (خدا) سے ملنے کی

Henüz iki cihan benim,
Zindanda görür bu gözüm.
Senin aşkınla bilişem,
Gerek hâsül hastan ola.
ہنوزاكي جہان بینم زنداندا کرور بو کوزم
سنن عشقنلا بلسم،گرك خاص الخاصان اولا
 ترے بغیر دونوں جہاں مجھے زندان نظر آتے ہیں
ترے عشق سے واقف ہو جو وہ خاص الخاص ہے

Dervişlik dedikleri bir acâyip duraktır,
Derviş olan kişiye evvel dirlik gerektir.
Çün erde dirlik ola, Hak ile birlik ola,
Varlığı elden koyup, ere kulluk gerektir.
درویشلک دید کلری بر عجایب طوراقدر
درویش اولان کشیء اول دیرلک کرکدر
چُون ارادہ دیرلک اولا حقلہ برلک اولا
وارلغی الدن قیوب حقہ قوللق کرکدر
درویشی جسے کہتے ہیں وہ اک عجب شے ہے
درویش کے لیے اول خود آگہی ضروری ہے
گر عزم ہے آدمی میں ، تو وصل حق آسان ہے
بس خدمت اولیاء اور خودفراموشی ضروری ہے

باطن کا علم :
حدیث نبوی‘‘من عرف نفسہ فقد عرف ربہ’’ سے روشنی پاتے ہوئے ایمرے کہتے ہیں کہ خود شناسی خدا شناسی ہے، باطن کی تلاش خدا تک رسائی کا سبب بنتی ہے۔

Nite kim ben beni buldum,
bu oldu kim Hakk’ı buldum,
Korkum onu buluncadı,
korkudan kurtuldum ahî.
کِتی كم بن بيني بلدم،بو ولدو كم حقی بُلدم
کُوركم اونو بلنجادی، کُوركدن كورتولدوم اہی
جب کہ میں نے اپنے آپ کو پالیا
یوں سمجھ لو کہ حق تعالیٰ کو پالیا
اسے پانے سے قبل تک مجھ میں ڈر تھا
اب میں ہر ڈر سے آزاد ہوگیا ہوں

یونس ایمرے کہتے ہیں کہ خدا کا جمال ہر جگہ ہے۔ انفس و آفاق میں اسی کا پرتو دکھائی دیتا ہے۔ اسی خیال کے تحت یونس ایمرے انسان کو باطن میں غور کرنے پر زور دیتے ہیں:

İlim ilim bilmektir
İlim kendin bilmektir
Sen kendini bilmezsin
Ya nice okumaktır
عِلم عِلم بيلمَكدِر عِلم كَندين بيلمكدِر
سَن كندوُنىی بيلَمز سِن يا نيجہ اوقُومقدِر
علم کا مطلب علم کا صحیح ادراک ہے
علم اپنے آپ کو جاننے کا نام ہے!
گر تو خود کو نہیں جانتا ہے تو
تو پھر اس حصول ِ علم کا کیا کام ہے!

Gökten inen dört kitabı
günde bin kez okur isen,
Erenlere münkir isen,
didar ırak senden bana.
کوقتن اکن دورت کتابی کند بن کز اکر یسن
ارينليري مُنكيريسن، ديدار عرق سندن بکا
آسمان سے اتری کتابیں چاہے تو ہزار بار پڑھ لے
گر اہل دل سے بغض ہے تو دیدار الٰہی محال ہے

 

عشق ہی مقصد تخلیق:
یونس ایمرے کے نزدیک اللہ نے انسان کو محبت کے ساتھ تخلیق کیا ہے اور باہمی پیار ومحبت، عشق ہی زندگی کا عین مقصد ہے۔ ان کے اشعار میں عشق کی اہمیت جابجا ملتی ہے۔

Aşka gelen gönülde nişan ola
Aşk ile asliyyeti âyan ola
Kimse begenmeye aşık işini
Gören cümle delidür diyen ola
عشق کلن کوکلدانشان اولا
عشق ایلہ اصلیتی عیان اولا
کیمسہ بکنمیہ عشق یشنی
کوردن جملہ دلوز دین اولا
عشق مقام عالی ہے، عشق قدیم و ازلی ہے
جو کرے ذکر ِعشق، وہ زبان ترجمانِ الٰہی ہے

İlâhi, bir aşk ver bana,
Neredeyim bilmeyeyim
Yavı kılayım ben beni,
İsteyiben bulmayayım.
الٰہی بر عشق ویر بکا قندہ لکم بیلمیہ یم
یاوی قیلایم بن بنی استیوبن بولمیہ یم
الٰہی ایسا عشق دے مجھ کو
کہ میں نہ جانوں کہ میں کہاں ہو ں
میں اپنے آپ کو ایسا بھولوں
کہ ڈھونڈنے پر بھی خود کو نہ پاؤں

 

یونس ایمرے کہتے ہیں عشق میں نہ تو خواہش ہوتی ہے نہ ہی حرص و لالچ اور عاشقوں کو محبوب کی چاہ کے علاوہ اپنے لیے کسی چیز کی طلب اور چاہ نہیں ہوتی نہ مہر کی اور نہ ہی وفا ، پابندی و بندش یا کسی صلہ اور بدلے کی محتاج ہوتی ہے۔

Aşk davası kılan kişi hiç
anmaya hırs-u heva,
Aşk evine girenlere ayruk
ne meyl-ü ne vefa.
عشق دعویس قیلن کشی ہیچ اکمیہ حرص و ہوا
عشق اودینہ کرنلر ابرق نہ میل و نہ وفا
دعویٰٔ عشق کرنے والے کیا جانیں حرص و ہوا
خانہ عشق کے مکین کو چاہیے نہ رغبت نہ وفا

 

تفکر و غور وفکر:
علامہ اقبال انسان کو تفکر کی دعوت دیتے ہیں

کھول آنکھ، زمیں دیکھ، فلک دیکھ، فضا دیکھ
مشرق سے اُبھرتے ہوئے سُورج کو ذرا دیکھ
اُس جلوہ بے پردہ کو پردوں میں چھپا دیکھ


یونس ایمرے بیان کرتے ہیں

Ey aşk eri aç gözünü,
Yer yüzüne eyle nazar.
Gör bu latif çiçekleri,
Bezenerek geldi geçer.
Her bir çiçek bin naz ile,
Öğer Hakk’ı nazar ile.
Bu kuşlar hoş avaz ile,
O Padişahı zikr eder.
ای عاشق اری اچ کوزینی یر یوزینہ قیل بر نظر
کور بو لطیف چیچکلریٰ بزنوب اوش کلدی کچر
ہر بر چیچک بک ناز ایلہ اوُکر حقی نیاز ایلہ
بو کوشلر خوش آواز ایلہ اول پادشاہی ذکر ایدر
اے مرد عشق کھول آنکھ ذرا، روئے زمین کو دیکھ ذرا
سجے ہیں جو تیرے لیے ان لطیف پھولوں کو دیکھ ذرا
ہزار گُل اپنی خوشبو سے حق کی مدح بکھیرتے ہیں
ہر خوش آواز پرندے اسی بادشاہ کا ذکر چھیڑتے ہیں

Dün gider gündüz gelir,
gör nicesi uz gelir,
Padişah hükmü ile
âlemde düpdüz gelir.
دون کيدر کوندüز کلور کو نیجہ سی اوز کلور
پادشاہ حکومو ایلہ عالم دا دوبدوز کلور
رات جاتی ہے، دن آتا ہے دیکھو ان کا کیسا نظام ہے
بادشاہ ازل کے حکم سے اس عالم میں تناسب قائم ہے

 

مذہبی رواداری اور انسان دوستی :
یونس ایمرے کے نزدیک انسان دوستی ہی سب کچھ ہے ، سب انسان برابر ہیں۔

میں نہیں آیا فرش زمین پر
تفریق و تخلیف کی خاطر
آپس میں ہو پیار اور محبت
یونس یہ ہے میری ذات کا مقصد

یونس ایمرے محکوم و مظلوم و مجبور کے حقوق کے علم بردار اور زمین داروں اور جاگیرداروں کی اصلاح کے آرزو مند تھے۔ ان کی نظر میں حاکم اگر راہ راست پر ہو تو محکوم بھی نیک اور صالح ہوں گے۔

حاکم جب تو سیدھی راہ چلے گا
لوگ بھی صالح ہو جائیں گے
تو شاطر، مکار ہو گر خود
کیسے پھر وہ نیکو کار بنیں گے؟

یونس ایمرے نے لسانی جھگڑوں کو فساد کی جڑ کہا اور ایک نظم لکھی :

میں اور تم ہم دونوں اگر ایک لفظ کو
مختلف گردانتے ہیں تو کیا
لفظ وہی رہتا ہے ہم بدل جاتے ہیں

[box type=”note” align=”” class=”” width=””]

Keleci bilen kişinin, Yüzünü ağ ede bir söz.
Sözü pişirip diyenin, İşini sağ ede bir söz.
Söz ola kese savaşı, Söz ola kestire başı.
Söz ola ağulu aşı, Bal ile yağ ede bir söz.
کلیجی بیلن كشينک، یوüزینی آق ايدہ بر سوز
سوزے پشوروب دیہ نک ایشنی صاغ ایدہ برسوز
سوز öاولہ کسہ صواشے، سوز اولا کسدیر باشے
سوز ایلہ اغکو اشی، بال ایلہ یاغ ایدہ برسوز
A single word can brighten the face
of one who knows the value of words.
Ripened in silence, a single word
acquires a great energy for work.
War is cut short by a word,
and a word heals the wounds,
and there’s a word that changes
poison into butter and honey.
ایک لفظ کسی شخص کو کامیاب اور روشن کردیتا ہے
جو اس ایک لفظ کی اہمیت اور قدر کو جانتا ہے
لفظ کو تول مول کر بولنے کے لیے لی گئی خاموشی
اس لفظ اور کام کو ایک عظیم تونائی بخشتی ہے
ایک لفظ سے جنگوں میں سر کٹ جاتے ہیں
ایک لفظ ہی سے بھرے زخموں مندمل ہوجاتے ہیں
اور یہ ایک لفظ ہی ہے جس کی وجہ سے زہر بھی
شہد اور مکھن کی طرح میٹھے اور لذیز ہوجاتے ہیں

[/box]

 

 

یونس ایمرے کے چند اقوال درج ذیل ہیں:
-* علم کا مطلب اپنے آپ پر، اپنے دل اور روح پر گرفت حاصل کرنا ہے اگر آپ اسے سمجھنے میں ناکام رہے تو آپ کا سب مطالعہ بیکار ہے۔
-* میری زندگی کا مشن محبت ہے۔
-* دنیا کے تمام باشندے آپس میں بھائی بھائی ہیں۔
-* میری دشمنی صرف نفرت سے ہے۔
-* ہمارا اولین فرض اچھا کردار اور اچھے اعمال ہیں۔
-* تمام الہامی کتب کا مقصد ذات الٰہی کی پہچان ہے۔
-* محبت کا جذبہ سورج کی مانندہے جو سب کو روشنی بخشتا ہے۔ جس دل میں پیار نہ ہو وہ پتھر سے بدتر ہے اور پتھر دلوں پر کچھ نہیں اگتا اور نہ اثر ہوتا ہے۔

 

[box type=”note” align=”” class=”” width=””]

Aşkın aldı benden beni,
Bana seni gerek seni.
Ben yanarım dünü günü,
Bana seni gerek seni.
ترے عشق میں خود سے بیگانہ ہوں میں
مجھے بس تیری جستجو ، تیری آرزو ہے
شب و روز جلتا ہوں پروانہ ہوں میں
مجھے بس تیری جستجو ، تیری آرزو ہے
Ne varlığa sevinirim,
Ne yokluğa yerinirim,
Aşkın ile avunurum,
Bana seni gerek seni
مسرت سے خالی ہے اب میرا جینا
اگر موت آئے تو کچھ غم نہ ہوگا
ترا عشق ہی ایک سہارا ہے میرا
مجھے بس تیری جستجو ، تیری آرزو ہے
Sufilere sohbet gerek,
Ahilere ahret gerek,
Mecnunlara Leyla gerek,
Bana seni gerek seni.
صوفی فقیروں کو مجلس و تسبیح کی فکر
زاہد فقیہوں کو ہے آخرت کی فکر
مجنوں کو تو ہے فقط لیلیٰ کی فکر
مجھے بس تیری جستجو ، تیری آرزو ہے
Yunus çağırırlar adım,
Gün geçtikce artar od’um,
İki cihanda maksudum,
Bana seni gerek seni.
میرا نام ہے یونس، صوفی عاشق
روز بروز آتش شوق بڑھتی رہے گی
دونوں جہانوں میں یہی میرا مقصد
مجھے بس تیری جستجو ، تیری آرزو ہے

[/box]

یہ مضمون ماہنامہ روحانی ڈائجسٹ دسمبر 2019ء کے شمارے میں شایع ہوا۔
تحریر: ابن وصی

Liked Liked
8 Comments

  1. syednajibuddinahmed: بہت خوب جناب بہت ہی …

  2. syednajibuddinahmed: اسلام علیکم!برائے کر…

    • روحانی ڈائجسٹ: السلام علیکم ! مضمون…

  3. syednajibuddinahmed: اسلام علیکم و رحمت ا…

  4. syednajibuddinahmed: اسلام علیکم !ابن عرب…

    • روحانی ڈائجسٹ: فتوحات مکیہ از ابن ع…

  5. syednajibuddinahmed: اسلام علیکم و رحمت ا…

More comments

Bulleh Shah Poetry Article

, , , ,

بابا بلھے شاہ کی شاعری کے روحانی پہلو

⋅

برصغیر پاک و ہند میں اسلام کی اشاعت کا تذکرہ آتے ہی ذہن ان لا تعداد اولیائے کرام اور علمائے عظام کی طرف از خود منتقل ہو جاتا ہے جنہوں نے شب و روز جدوجہد کر کے اس وسیع و عریض سرزمین میں وحدانیت کی روشنی پھیلائی ۔ ان ہستیوں میں صوفی بزرگ حضرت بابابلھے…

This content is for One Year Subscription and Free Subscription members only.
Log In Register

یہ مضمون صرف One Year Subscription and Free Subscription ممبروں کے لیے ہے۔

اپنے پسندیدہ رسالے ماہنامہ روحانی ڈائجسٹ کے مضامین آن لائن پڑھنے کے لیے بذریعہ ای میل یا بذریعہ فیس بُک سبسکرائب کیجیے

 

ہر ماہ روحانی ڈائجسٹ کے نئے مضامین اپنے موبائل فون یا کمپیوٹر پر پڑھیے….

روحانی ڈائجسٹ آن لائن کی سالانہ سبسکرپشن صرف 1000 روپے میں حاصل کیجیے۔

یہ رقم ایزی پیسہ ، جیز کیش، منی آرڈر یا ڈائریکٹ بنک ٹرانسفر کے ذریعے بھجوائی جاسکتی ہے ۔

  • بذریعہ JazzCash رقم مندرجہ ذیل اکاؤنٹ میں جمع کی جاسکتی ہیں۔
    JazzCash : Roohani Digest : 03032546050
  • بذریعہ Easypay رقم مندرجہ ذیل اکاؤنٹ میں جمع کی جاسکتی ہیں۔
    Easypaisa : Roohani Digest : 03418746050
  • یا پھر اپنی ادائیگی براہ راست ہمارے بینک اکاؤنٹ میں جمع کروائیں.
    Roohani Digest : IBAN PK19 HABB0015000002382903

رقم ارسال کرکے اس ای میل یا فون نمبر پر میسج کردیں

manageroohanidigest@gmail.com

03032546050

آپ کا گراں قدر تعاون ادارہ روحانی ڈائجسٹ کی طرف سے قارئین کی بہتر خدمت کے لیے معاون ہوگا۔

مزید رابطے کے لیے
سرکیولیشن مینیجر
02136606329

ڈیجیٹل سبسکرپشن

Liked Liked

Load More