پرسکون زندگی

جسم کو صحت مند رہنے کے لیے مختلف وٹامنز اور معدنیات کی ضرورت ہوتی ہے۔ انہی میں سے ایک وٹامن ڈی بھی ہے جس کے حصول کا سب سے آسان ذریعہ سورج کی روشنی ہے۔
وٹامن ڈی ہڈیوں کی مضبوطی اور اعصاب کی نشونما کے لیے ضروری ہے۔ یہ وٹامن کچھ غذاؤں جیسے مچھلی، اورنج جوس، پنیر اور انڈے کی زردی وغیرہ میں بھی موجود ہوتا ہے لیکن اسے صرف ان غذاؤں کی مدد سے مکمل طور پر حاصل کرنا مشکل ہے۔جسم کو درکار وٹامن ڈی کی ضرورت پوری کرنے کے لیے سپلیمنٹس سے بھی مدد لی جاسکتی ہے۔ وٹامن ڈی کی کمی بہت سے طبی مسائل پیدا کرسکتی ہے جو کہ مندرجہ ذیل ہیں۔
ہڈیوں کی کمزوری
وٹامن ڈی ہڈیوں کی مضبوطی کے لیے ضروری ہے۔ وٹامن ڈی ہڈیوں میں کیلشیئم کو جذب ہونے میں مدد دیتا ہے جس سے ہڈیوں کی نشونما میں اضافہ ہوتا ہے۔ اس وٹامن کی کمی کمر، جوڑوں اور گھٹنوں وغیرہ میں درد کا سبب بن سکتی ہے جو اس قدر شدید ہوسکتا ہے کہ روزمرہ کے کام انجام دینے میں مشکل ہوسکتی ہے۔
ڈپریشن
وٹامن ڈی کی کمی خون کے بہاؤ کی رفتار کو کم کرتی ہے جس سے ایک طرف تو اعصاب اور پٹھوں کے کام کرنے کی صلاحیت متاثر ہوتی ہے، دوسری جانب دماغ کی طرف خون کا کم بہاؤ ڈپریشن، مایوسی اور اداسی کے جذبات پیدا کرنے کا سبب بنتا ہے۔
بہت زیادہ پسینہ آنا
وٹامن ڈی کی کمی جسم میں پسینہ کے غدود کو فعال کرتی ہے جس سے زیادہ پسینہ آتا ہے۔ یہ علامت نومولود بچوں میں بھی پائی جاسکتی ہے۔
اگر کسی شخص یا بچے کو بہت زیادہ پسینہ آرہا ہو تو یہ وٹامن ڈی کی کمی کی علامت ہوسکتی ہے۔
بالوں کا جھڑنا
بالوں کا تیزی سے جھڑنا ذہنی دباؤ کی وجہ سے بھی ہوتا ہے تاہم وٹامن ڈی کی کمی بھی اس کی ایک وجہ ہے۔ خواتین میں خاص طور پر بال جھڑنے کی ایک بڑی وجہ وٹامن ڈی کی کمی ہی ہے۔
پٹھوں میں درد
وٹامن ڈی کی کمی پٹھوں میں درد اور الرجی کا سبب بھی بن سکتی ہے۔ ایسے افراد سپلیمنٹس کے ذریعے وٹامن ڈی کی کثیر مقدار لے کر اس تکلیف سے محفوظ رہسکتےہیں۔
ہڈیوں، دانتوں، مسلز اور دیگر متعدد جسمانی افعال کے لیے وٹامن ڈی ضروری ہے۔
وٹامن ڈی کی کمی سے جسم کے لیے کیلشیم یا فاسفورس کی مقدار کو ریگولیٹ کرنا مشکل ہوجاتاہے۔ یہ وہ وٹامن ہے جو جسم خود بنانے سے قاصر رہتا ہے۔ اس کا حصول سورج کی روشنی سے ممکنہے۔ کچھ غذائیں بھی ایسی ہیں جو وٹامن ڈی کی کمی کو دور کرنے میں مفید ہوسکتی ہیں۔
مچھلی
مچھلی وٹامن ڈی کے حصول کا اچھا ذریعہ ہے اور لگ بھگ ہر طرح کی مچھلی اس حوالے سے مفید ہے تاہم چربی والی مچھلی زیادہ فائدہ مند ہے۔ اس غذا کا ایک فائدہ اور بھی ہے اور وہ ہے دل کی صحت کے لیے فائدہ مند اومیگا تھری فیٹی ایسڈز کاحصول۔
انڈے کی زردی
جو لوگ مچھلی کھانا پسند نہیں کرتے تو انڈے ایسے افراد کے لیے اچھا آپشن ہے۔ انڈے وٹامن ڈی سے بھرپور ہونے کے ساتھ دیگر غذائی اجزا بھی جسم کو فراہم کرتے ہیں۔ انڈے کی سفیدی میں پروٹین کی مقدار زیادہ ہوتی ہے مگر وٹامنز اور منرلز عام طور پر زردی میں ہوتے ہیں۔ ایک انڈے کی زردی سے کچھ مقدار میں وٹامن ڈی جسم کو ملتا ہے خصوصاً دیسی انڈوں میں یہ مقدار فارمی کے مقابلے میں تین سے چار گنا زیادہ ہوتی ہے۔
فورٹیفائیڈ ملک
گائے کا فورٹیفائیڈ دودھ وٹامن ڈی کے ساتھ ہوتا ہے مگر آئس کریم اور پنیر میں یہ خوبی موجود نہیں ہوتی۔
فورٹیفائیڈ اورنج جوس
اگر دودھ پسند نہیں تو کوئی مسئلہ نہیں، فورٹیفائیڈ اورنج جوس سے بھی اس کا حصول ممکن ہے، تاہم مختلف برانڈز میں اس وٹامن کی مقدار مختلف ہوسکتی ہے، تو لیبل چیک کرنا ضروری ہے۔
سپلیمنٹس
وٹامن ڈی سپلیمنٹس بھی بازار میں عام دستیاب ہیں۔ مگر کسی سپلیمنٹ کا استعمال ڈاکٹر کے مشورے سے ہی کرنا چاہیے۔
گائے کی کلیجی
گائے کی کلیجی میں وٹامن ڈی کی مقدار کافی زیادہ ہوتی ہے۔ اس سے دیگر غذائی اجزا بھی جسم کو ملتے ہیں جیسے وٹامن اے، آئرن اور پروٹین، تاہم اس میں کولیسٹرول کی مقدار کافی زیادہ ہے تو اسے بہت زیادہ کھانے سے گریز کرناچاہیے۔

گھر میں سناٹا تھا دو ننھی منی بچیاں خاموشی سے بیٹھی کسی کا انتظار کر رہی تھیں…. آخر وہ وقت آتا ہے، بیٹیوں کے والد کا گھر میں داخل ہوتے یہ شور شرابے خوشیوں کے قہقہوں سے استقبال ہوتا ہے۔ ایک بیٹی ہاتھ سے بیگ لے کر رکھتی ہے تو دوسری جلدی سے پانی کا گلاس لاکر دیتی۔ گھر میں لائٹ نہ ہونے کی وجہ سے دونوں بیٹیاں بابا کو جلدی جلدی اخبار سے ہوا کرتی ہیں۔ دونوں جلدی جلدی سارے دن کی روداد سنانے کی کوشش میں ایک دوسرے پر سبقت لے جانے کی کوشش کرتی ہیں۔ ان کی والدہ پیار سے انہیں سمجھاتی ہیں۔
دیکھو….! آپ کے بابا کہیں جا تو نہیں رہے انہیں فریش ہونے دو۔ بڑی بیٹی جلدی سے بابا کو چپل لاکر دیتی ہے۔ والد بیٹیوں کی محبت میں سارے دن کی تھکان بھول جاتے ہیں۔
بیٹیوں کا فطری طور پر والد کی طرف زیادہ جھکاؤ ہوتا ہے۔ اگر والد بیٹی کے ساتھ اچھے روابط رکھتے ہوں ، اس کی بات غور سے سنتے ہوں ، اس کے لیے رول ماڈل بن کر دکھاتے ہوں، اپنی بیٹی پر فخر کرتے ہوں اور اس کی زندگی میں اہم ترین حیثیت کے حامل ہوں توپھر جان لیں کہ والد کی محنت کبھی ضائع نہیں جائے گی۔
والد اپنی بیٹی کی صورت میں ایک بہترین، بااعتماد، حوصلہ مند، بلند ہمت اور پُرعزم شخصیت سے معاشرے کو نواز سکتے ہیں۔
باپ اپنی بیٹی سے جس قدر محبت کرتا ہے، بیٹی بھی جواب میں انہیں احساس تفاخر کے مواقع فراہم کرتی ہے۔
بیٹی اپنے والد کو دنیا کی اہم ترین ہستی تصور کرتی ہے، جس کا اندازہ ایک دس سالہ بچی کے ان خیالات سے بخوبی ہوسکتا ہے جو اپنی تحریر کردہ نظم میں کہتی ہے کہ ….میرے والد دنیا کے سب سے عظیم والد ہیں،
وہ جب بھی کسی کھیل میں حصہ لیتے ہیں تو ضرور فتح یاب ہوتے ہیں۔
وہ دنیا کے طاقتور ترین انسان ہیں جو کسی بھی معروف باکسر یا ریسلر کو ایک ہاتھ سے بھی ہراسکتےہیں۔ آپ کسی بھی ڈاکو کا نام لیں وہ اسے آسانی سے مار سکتے ہیں۔
وہ اس قدر ہینڈ سم ہیں کہ انہیں کسی مشہور ہیرو کے مقابلے میں بھی کھڑاکیا جاسکتاہے….
آخر میں بیٹی کہتی ہے کہ اس بات کا ثبوت چاہیے تو بس مجھے دیکھ لیں!
چند الفاظ پر مشتمل اس نظم میں جس کا ترجمہ یہاں پیش کیا گیا ہے۔
ایک بیٹی کے ان احساسات کی ترجمانی ہے، جو وہ والد کے بارے میں رکھتی ہے۔
اہم ترین شخصیت :
والد اپنی بیٹیوں کے لیے اہم ترین شخصیت ہوتے ہیں۔ بیٹیاں اپنے والد سے بہت محبت کرتی ہیں۔ بیٹیوں کے دل میں والد کی بہت قدر اور تعظیم ہوتی ہے۔ بیٹیاں اپنے والد کی خدمت کرنا چاہتی ہیں، اپنے والد کو خوش دیکھنا چاہتی ہیں۔ والد کی ذرا سی تکلیف پر بیٹیاں بہت بےچین اور پریشان ہوجاتی ہیں۔ ہر والد کو اس حقیقت کا احساس ہوناچاہیے۔
بیٹی یہ بھی جاننا چاہتی ہے کہ اس کے والداس سے کس قدر محبت کرتے ہیں۔ عمر کے ساتھ ساتھ والد کی محبت اور شفقت کا احساس بیٹی کو مزید پُراعتماد اور باہمت بناتا ہے۔
بیٹی کی بات بغور سنیں:
کوئی باپ بیٹی کی توجہ حاصل کرنا اور اس سے روابط کی بہتری چاہتا ہے تو اس کی بات بغور سنے۔
رول ماڈل بنیں:
ایک نو عمر لڑکی کا کہنا تھا کہ ‘‘میرے والد میرے رول ماڈل ہیں، میں دنیا کے تمام افراد کا موازنہ ان سے کرتی ہوں۔ وہ سب سے زیادہ پیار کرنے والے، قابل بھروسہ، سراہنے کے لائق اور متحمل مزاج انسان ہیں۔ وہ میرے لیے ماڈل کی حیثیت رکھتے ہیں۔ بیٹی کا کہنا تھا کہ اپنے والد کے ساتھ اس مستحکم رشتے نے مجھے حوصلہ اور ہمت ہی نہیں دی بلکہ ایک درست سمت بھی عطا کی ہے۔ ’’
زیادہ تر لڑکیاں والد کو ایک ہیرو کے طور پر دیکھتی ہیں۔ والد کا بیٹی کےساتھ رویہ اس بات کا تعین کرتا ہے کہ وہ بیٹی اپنی سوچوں کو کہاں تک وسعت دے سکتی ہے۔
تنقید کرتے رہنے والا سخت گیر باپ بیٹی میں خود اعتمادی پیدا نہیں ہونے دیتا۔
صحت مندانہ روابط کے ساتھ پرورش:
اگر کسی لڑکی نے والد کی طرف سے حوصلہ افزائی کے ساتھ صحت مندانہ روابط رکھتے ہوئے پرورش پائی ہوگی تو وہ دیگر تمام رشتوں سے بھی اسی قسم کی توقعات کرے گی۔ اس طرح وہ دوسروں کے ساتھ بھی اخلاق و مروت سے پیش آئے گی لیکن اگر اسے والد سے محض ڈانٹ ڈپٹ کے ساتھ ہی عدم تحفظ کا احساس ملا ہوگا تو وہ مستقبل میں بھی خوف زدہ رہے گی۔
تعلیم اور کیریئر پر اثر:
لڑکی کی تعلیم اور کیریئر کو کامیابی سے ہمکنار کرانے میں والد کا اثر زیادہ ہوتا ہے۔ یہ بھی دیکھنے میں آیا ہے کہ بیٹی تعلیمی اعتبار سے والد کے نقش قدم پر چلنے کی کوشش کرتی ہے اور اس کی یہ خواہش بھی ہوتی ہے کہ اسی شعبے کو اپنائے جس میں اس کے والد نے کوئی اچھا مقام حاصل کیا ہو۔
ایک سینئر صحافی کا کہنا ہے کہ ‘‘جب میں اپنی بیٹی میں وہ صلاحیتیں ابھرتی ہوئی دیکھتا ہوں جنہوں نے مجھے ایک صحافی کے طور پر ناموری عطا کی تو میرا سر فخر کے احساس سے بلند ہوجاتا ہے۔
زیادہ وقت ساتھ گزاریں:
حال ہی میں ہونے والے ایک سروے میں بیٹیوں کا یہ کہنا ہے کہ وہ اپنےوالد کے ساتھ زیادہ سے زیادہ وقت گزارنے کی خواہش مند ہیں۔
بیٹی کی پرورش کوئی آسان نہیں، بڑا کٹھن کام ہے۔ بیشتر والد سمجھتے ہیں کہ بیٹی کی پرورش کی تمامتر ذمہ داری اس کی ماں پر ہے۔ بیٹی کو والد کی بھی اتنی ہی ضرورت ہے جیسے کہ ماں کی ہوتی ہے۔
مجھے تم پر فخر ہے:
اگر والد اپنی بیٹی سے یہ کہیں کہ ‘‘وہ تمام کامیابیاں جو تم نے حاصل کی ہیں مجھے ان پرفخر ہے’’ تو یہ ایک خصوصی بات ہوگی۔ اس سے جب یہ کہیں گے کہ ‘‘میری نگاہ میں تمہاری اہمیت بہت زیادہ ہے’’ تو اس کا چہرہ خوشی سے دمکنے لگے گا، اس کے چہرے پر ایک احساس تفاخر پیدا ہوگا کہ اس کےوالد، یعنی اپنے ہیرو اور رول ماڈل کے لیے وہ کس قدر اہمیت کی حامل شخصیت ہے۔

دنیا بھر میں وبائی شکل اختیار کرنے والا کورونا وائرس کسی کو بھی متاثر کر سکتا ہے لیکن ان لوگوں کو کورونا وائرس سے خطرہ زیادہ ہے جو کہ ضیعف ہیں یا جنھیں پہلے سےصحت کے مسائل ہیں۔
اس وائرس سے ہلاک ہونے والوں میں زیاہ تعداد معمر لوگوں کی ہے جو کے پہلے سے کسی بیماری میںمبتلا تھے۔
کس کو خطرہ ہے؟
جن لوگوں کو پہلے سے صحت کے مسائل کا سامنا ہے تو اس کا مطلب ہرگز یہ نہیں کہ كورونا وائرس انہیں ہر صورت ہوگا، ہاں ایسے لوگوں کو اس سے نسبتاً زیادہ خطرہ ضرور ہے اور اس کے لیے ضروری ہے کہ یہ لوگ احتیاطی تدابیر پر زیادہ شدت سے عمل کریں۔
جن لوگوں کی عمر زیادہ ہوتی ہے ان کی قوت مدافعت کمزور ہوتی ہے اور وہ لوگ جنھیں پہلے سے صحت کے مسائل ہیں جیسا کہ ذیابیطس، دمہ یا دل کی بیماری ہے انھیں کورونا وائرس کے اثرات اور علامات زیادہ محسوس ہوں گی۔
بہت سے لوگ کورونا وائرس لاحق ہونے کے چند دن بعد ٹھیک ہوجائیں گے لیکن بہت سے لوگ ایسے بھی ہیں جو کہ جلدی صحت یاب نہیں ہوتے اور چند لوگوں کی اس سے موت واقع ہوسکتی ہے۔
میں کیسے اس سے بچوں؟
یہ وائرس کھانسی اور چھینکوں سے اور آلودہ جگہوں سے پھیلتا ہے جیسا کہ پبلک ٹرانسپورٹ، دفاتر اور عوامی مقامات میں ہینڈ ریلنگ یا دروازے کے ہینڈل۔
صفائی کا خیال رکھنا، اس وائرس کو مزید پھیلنے سے روک سکتا ہے۔
کھانستے یا چھینکتے وقت ناک اور منہ پر ٹشو یا اپنی آستین رکھنا۔
اپنے ہاتھوں کو باقاعدگی سے صابن سے دھونایا سینیٹائزر کا استعمال کرنا۔
بیمار لوگوں سے فاصلہ رکھنا۔
بغیر دھلے ہاتھوں کو آنکھوں، ناک اور منہ پر لگانے سے اجتناب کرنا۔
اگر میری طبیعت خراب ہونے لگے تو مجھے کیا کرنا چاہیے؟
کورونا وائرس کی علامات ہیں کھانسی، تیز بخار اور سانس لینے میں دشواری۔ لیکن ان علامات کا مطلب یہ نہیں کہ اس فرد کو کورونا وائرس ہی ہے۔
برطانیہ کے رائل کالج آف جی پی سے تعلق رکھنے والے ڈاکٹر جانتھن لیچ کہتے ہیں: ‘‘مریض کے لیے سب سے اہم چیز یہ ہے کہ وہ خوف زدہ نہ ہو۔ ’’
سب سے اہم چیز ہے کہ اس انفیکشن کو ہونے سے روکنے کے لیے اقدامات کیے جائیں۔
کیا میں اپنی دوائیاں لینا بند کردوں؟
جو لوگ کسی مرض میں مبتلا ہیں ان کے لیے ضروری ہے کہ وہ اپنی دوائیں وقت پر لیتے رہیں۔
میں دمے کا مریض ہوں، مجھے کیا کرنا چاہیے؟
دمےکے مرض کے لیے کام کرنے والی برطانوی ادارے ایستما یو کے کا کہنا ہے کہ دمے کے مریض ڈاکٹر کے تجویز کردہ اپنے انہیلر کا استعمال جاری رکھیں۔
جن لوگوں کی حالت ایستما (دمے) کی وجہ سے زیادہ بگڑ رہی ہو انہیں فوراً ہسپتالجانا چاہیے۔
مجھے ذیابطیس ہے میں کیا کروں؟
جو لوگ ذیابطیس ٹائپ ون یا ٹو کے مریض ہیں انہیں اس بیماری کے اثرات زیادہ محسوس ہوسکتے ہیں۔
ذیابطیس یو کے کے ڈاکٹر ڈین ہاورڈ کا کہنا ہے کہ جن لوگوں کو ذیابطیس ہے انہیں کورونا وائرس سے زیادہ خطرہ لاحق ہے۔
جن لوگوں کو ذیابطیس ہے اور انہیں کھانسی، تیز بخار یا سانس لینے میں دشواری ہورہی ہے تو وہ فوراً ہسپتال جائیں، اور اپنی بلڈ شوگر بھی چیک کرتے رہیں۔
اگر مجھے کوئی اور بیماری ہے تو میں کیا کروں؟
جن لوگوں کو ہائی بلڈ پریشیر، پھیپڑوں کی تکلیف یا جن کی قوتِ مدافعت کمزور ہے انھیں کورونا وائرس سے صحت کے دوسرے مسائل یا بیماری لاحق ہونے کا خطرہ زیادہ ہے۔
بچوں میں سرطان اور لیوکیمیا کی بیماری کے لیے کام کرنے والے برطانوی ادارے چلڈرنز کینسر اینڈ لیوکیمیا گروپ (سی سی ایل جی) نے کینسر کے مرض میں مبتلا بچوں کے والدین سے کہا ہے کہ وہ اپنے اپنے ڈاکٹروں سے رابطہ کریں تاکہ وہ انھیں ان کے بچوں کے لیے احتیاطی تدابیر بتاسکیں۔
میں سگریٹ پیتا ہوں، کیا مجھے خطرہ ہے؟
پبلک ہیلتھ چیریٹی کی سربراہ ڈیبرا آرنٹ کہتی ہیں کہ جو لوگ بہت زیادہ سگریٹ پیتے ہیں انھیں یا تو اسے کم کردینا چاہیے یا پھر چھوڑ دینا چاہیے۔
سگریٹ پینے والے لوگوں کو پھیپڑوں کے انفیکشن اور نمونیا ہونے کا خطرہ عام لوگوں کے مقابلے میں دو گنا زیادہ ہے۔سگریٹ ترک کرنا صحت کے لیے بہت اچھا ہے۔ کورونا وائرس کا خطرہ سگریٹ چھوڑنے میں حوصلہ افزائیکرےگا۔
میں عمر رسیدہ ہوں، کیا مجھے خود کو الگ کر لینا چاہیے؟
برطانوی حکومت کے چیف میڈیکل ایڈوائزر یا مشیر کا عمر رسیدہ افراد کے بارے میں کہنا ہے کہ اگر احتیاطی تدابیر پر ٹھیک طرح عمل ہورہا ہو تو انہیں خود کو دوسروں سے الگ کرنے کی لازمی ضرورت نہیں ہے۔
ضعیف افراد کے لیے کام کرنے والے برطانوی ادارے ایج یو کے کا کہنا ہے کہ عمر رسیدہ افراد کے دوستوں اور رشتہ داروں کو ان کا خیال رکھنا چاہیے اور وقتاً فوقتاً ان سے حال احوال چال پوچھتے رہنا چاہیے۔

ہم میں ہر کوئی کبھی نہ کبھی دانت کی تکالیف سے پریشان نظر آتا ہے۔ عموماً لوگ یہ شکایت کرتے ہیں کہ مہنگے ٹوتھ پیسٹ کے استعمال کے باوجود دانتوں میں سفیدی اور چمک دکھائی نہیں دیتی۔ ایسی صورتحال میں دانتوں کی دیکھ بھال کے آسان گھریلو علاج بہت مفید ہوسکتے ہیں۔ چاہے دانتوں کو صاف کرنا ہو یا دانتوں کی چمک بڑھانا ، دانتوں سے بدبو دور کرنا یا دانتوں کی خرابی کو روکنا ہے۔
دانتوں کے لیے سادہ اور دیسی ٹوٹکے حاضر ہیں جنہیں صدیوں سے کارگر پایا گیا ۔ یہ آسان گھریلو ٹوٹکے دانتوں اور مسوڑھوں کے لیے مفید ہیں ۔
سفید موتیوں جیسے دانتوں کے لیے آدھا چمچ بیکنگ سوڈا ایک چٹکی بھر نمک کے ساتھ ملا کر دانتوں کو برش سے مساج کریں۔ اس کے بعد ٹوتھ پیسٹ سے دانت برش کریں۔
دانت چمک داربنانے کے لیے ایک چائے کا چمچہ کھانے کا سوڈا ، ایک چمچہ پسا ہوا نمک، پسا ہواسہاگہ لے کر شیشی میں رکھ لیں۔ اس سے دانت صاف کریں ۔
تھوڑا سا بیکنگ سوڈا لے کر اس میں تازہ لیموں کا رس ملا کر پیسٹ بنا لیں اور برش کی مدد سے اسے دانتوں پر اچھی طرح لگائیں۔ اس سے قبل دانتوں کو ٹشو پیپر سے رگڑ کر صاف کر لیں ۔
سرسوں کے تیل میں نمک ملا کر صبح شام دانتوں پر ملنے سے دانتوں سے خون آنا ، مسوڑھوں کی سوزش اور دانتوں کے درد میں آرام پہنچتا ہے ساتھ ہی دانت چمکیلے اور مضبوط بھی بنتے ہیں۔
صبح دانت برش کرنے سے پہلے ایک چمچ ناریل کا تیل منہ میں ڈال کر دانتوں کے اردگرد خوب اچھی طرح گھمائیں اور 15 منٹ تک تیل دانتوں پر لگا رہنے دیں، پھر نیم گرم پانی سے اچھی طرح کلی کر لیں۔یہ عمل ہفتے میں دو سے تین بار کرنے سے دانت صاف اور سفید ہو جائیں گے ۔
اسٹرابیری میں دانتوں کو صحت مند اور سفید کرنے والے قدرتی اجزاء شامل ہیں۔ سٹرابیری کا ٹکڑا چند منٹ دانتوں،مسوڑھوں پر ملنے سے ان پر جما ہوا گاڑھا میل(پلاک) دور ہو جاتا ہے۔
دانتوں کا پیلا پن دور کرنے کے لیے ایک اسٹرابیری کےگودے میں آدھا چائے کا چمچ بیکنگ پاؤڈر مکس کرکے ٹوتھ برش سے پانچ منٹ دانتوں پر لگا رہنے دیں پھر اچھی طرح برش کریں۔
لونگ میں پایا جانے والا جزEugenol جراثیم کش اثرات کا حامل ایک طاقتور اینٹی سیپٹک ہے۔ دانت یا مسوڑے پر لونگ یا لونگ کا تیل لگانا مسوڑھوں کی صحت کے لیے بہترین مانا جاتا ہے۔
تلسی کے چند پتے باقاعدگی سے چبائے جائیں تو یہ دانتوں کے پلاک اور بدبو دار سانسوں کو دور کرنے میں مفید ہیں۔
ملیٹھی کی جڑوں میں Licoricidinاور Licorisoflavin نامی مرکبات پائے جاتے ہیں۔ یہ دانتوں کے خلا میں جراثیم کی پیداوار کو روکتے ہیں اور بدبودار سانسوں کے خلاف نبردآزما رہتے ہیں۔ دانتوں کی بیماریوں سے بچاؤ کے لیےایک چٹکی ملٹھی سفوف لے کر متاثرہ دانت پر رکھیں یا اس سفوف سے دانت برش کریں۔
نیم یا پیلو کے درخت کی نرم چھال دانتوں کے داغ اور پیلاہٹ ختم کرنے میں بہت مفید ہے۔ روزانہ دو سے تین دفعہ اس چھال سے دانت صاٖف کرنے سے دانت موتی کی طرح چمکنے لگتے ہیں۔
پودینہ دانتوں کو چمکانے کے لیے انتہائی فائدہ مند ہے ۔ پودینہ کوٹ کر رکھ لیں اور برش پر لگا کر ٹوتھ پیسٹ کی جگہ یہ استعمال کرنے سے دانت مضبوط اور چمک دار ہوجاتے ہیں ۔
لیموں میں موجود سٹرس ایسڈ دانت سفید کرتے ہیں۔ ایک لیموں کا چھلکا لیں اور اپنے دانتوں پر اچھی طرح رگڑیں ۔
نمکین نیم گرم پانی دانتوں کو قدرتی طور پر صاف رکھتا ہے اورمسوڑھوں کو صحت مند رکھتا ہے۔ ایک چائے کا چمچ نمک نیم گرم پانی میں مکس کر کے ماؤتھ واش کے طور پر استعمال کریں۔
کیلے کے چھلکے میں پوٹاشیم، مینگیز اور میگنیشیم پائے جاتے ہیں جو دانتوں کو صحت مند اور چمک دار بنانے کا بہترین نسخہ ہیں۔ تقریباً ایک منٹ کیلئے چھلکے کو دانتوں پر رگڑیں اور یہ عمل روزانہ دو مرتبہ کریں، مالٹے اور سیب کے چھلکے کے بھی ایسے ہی فوائد دیکھے گئے ہیں۔
بینگن کی راکھ کسی بھی ٹوتھ پیسٹ کے ساتھ ملا کر دانت صاف کیے جائیں تو دانت سفید اور چمک دار ہوجاتے ہیں۔
صبح برش کرنے کے بعد، سیب کے سرکہ میں برابر مقدار میں پانی ڈال کر اس سے کلی کرینے سے دانتوں کی بدبو منٹوں میں ہی ختم ہوجاتی ہے۔ سرکہ ہفتے میں دو بار سے زیادہ استعمال نہ کریں۔
خشک سنترے کے چھلکوں کے ساتھ تیز پات باریک پیس کر رکھ لیں۔ اس سفوف کو انگلی کی مدد سے دانت صاف کریں۔ یہ گھریلو ٹوتھ پاؤڈر دانتوں کے لئے بہت فائدہ مند ہے۔
ایک ایک چائے کے چمچ ہلدی اور ناریل کے تیل میں 2 سے 3 قطرے پودینے کے تیل کے مکس کریں، اس مکسچر کو معمول کے ٹوتھ پیسٹ کی طرح استعمال کریں۔ یہ گھریلو ساختہ ٹوتھ پیسٹ دانتوں کی سطح کی نگہداشت کے ساتھ ساتھ سفیدی بھی لوٹاتا ہے اور سانسوں کو بھی مہکاتا ہے۔
تازہ ایلو ویرا جوس یا اس سے تیار کردہ جیل دانتوں پر رگڑیں ، برش سے مساج کریں اور کلیاں کرلیں۔ یہ عمل آپ برش کرنے کے بعد بھی دہرا سکتے ہیں، چند ہفتوں میں مسکراہٹ سفید جگمگاتے دانتوں سے سج جائے گی۔

ابٹن کا شمار چہرے پر دلکشی لانے والی اشیاء میں کیا جاتا ہے۔ اس کا استعمال صدیوں سے چلا آرہا ہے۔
شادی بیاہ کے موقع پر باقاعدہ ابٹن کی رسوم ہوتی ہیں جس میں دلہن کو ابٹن لگایا جاتا ہے۔ کچھ عرصہ پہلے تک صرف دلہنیں ہی شادی سے مہینہ بھر پہلے خوب صورتی کو بڑھانے کے لیے ابٹن کا مساج کیا کرتی تھیں لیکن اب روزمرہ زندگی میں حسن کی حفاظت کے لیے اس کے استعمال کا مشورہ دیا جاتا ہے۔
ابٹن کے فوائد
ابٹن جلد سے مردہ خلیات کو ختم کرنے میں مفید ہے۔ خون کی گردش کو بڑھاتا ہے جس سے نئے خلیات بن کر جلد کو تروتازہ کرتے ہیں۔ جلد میں کھنچاؤ پیدا کرتا ہے جس سے جلد ڈھلکتی نہیں۔ جلد کے ساتھ جمی گرد کو صاف کرتا ہے۔ خاص طور پر بازو اور ٹانگوں کے جوڑوں سے سیاہی کی تہہ ہٹاتا ہے۔ اس کے مسلسل استعمال سے جلد کے روئیں کمزور ہوکر آہستہ آہستہ جھڑنے لگتے ہیں۔
اُبٹن لگانے کا طریقہ
خشک جلد پر ابٹن لگانے سے پہلے کسی تیل سے مساج کرلیں اور پھر ابٹن لگائیں۔ یاد رہے کہ موسم سرما میں ابٹن میں تیل یا چکنے اجزاء کی آمیزش زیادہ کرنی چاہیے اور موسم گرما میں کم۔ ابٹن کا آمیزہ نہ زیادہ سخت اور نہ پتلا بلکہ ہموار پیسٹ ہو جو آسانی سے لگ جائے اور اتر جائے۔ ابٹن نہانے سے پہلے استعمال کرنا مفید بتایا جاتا ہے۔
ابٹن کی تیاری
اس کی کئی اقسام ہیں جن کو ضرورت کے مطابق استعمال کیا جاسکتا ہے۔
فیشل ابٹن فارمولا
ایک کھانے کا چمچ بادام کا پیسٹ، ایک کھانے کا چمچ کاجو کا پیسٹ، ڈیڑھ چائے کا چمچ پستہ پیسٹ، ایک کھانے کا چمچ بالائی، ایک کھانے کا چمچ سرسوں یا بادام کا تیل، ایک کھانے کا چمچ عرق گلاب، ایک چوتھائی کپ سرخ مسور کی دال کا پیسٹ، ان سب کو مکس کرکے چہرے اور گردن پر لگائیں جب تھوڑا سا گیلا ہو تو رگڑ کر اتار دیں۔ (بادام، کاجو، پستہ اور دال مسور کا پیسٹ بنانے کے لیے ان کو پیس کر پانی کے ساتھ مکس کریں)۔
بادام کا ابٹن
بادام ہر قسم کی جلد کے لیے فائدہ مند ہے۔ اس سے جلد نکھر جاتی ہے۔
بادام کو لیموں کے رس میں باریک پیس لیں پھر اس میں انڈے کی سفیدی پھینٹ کر ملالیں اور اتنا بیسن شامل کریں کہ ہموار پیسٹ بن جائے۔
اس پیسٹ کو چہرے، بازو اور گرن پر ملیں، پندرہ منٹ بعد نیم گرم پانی سے دھولیں۔
اس ابٹن کو ہفتہ میں دو دن استعمال کریں اور ہر بار تازہ بنائیں۔
جلد کی صفائی اور چہرے کے بال کم کرنے کےلیے
ایک کپ چنبیلی کی کلی میں ایک کپ بیسن، دو کھانے کے چمچ ہلدی، ان اشیاء کو اچھی طرح مکس کرلیں۔ اس پاؤڈر کا ایک بڑا چمچ لیں اور اس میں چند قطرے لیموں کا رس اور پانی ملا کر استعمال کریں، چند دن استعمال سے چہرے کی رنگت صاف ہوجاتی ہے اور چہرے کے روئیں بھی کم ہوجاتےہیں۔
کیل مہاسوں سے نجات
چہرے کے کیل مہاسے اور دانوں کے لیے ابٹن مفید ہے۔ تین چائے کے چمچ بیسن، ایک چوتھائی چائے کا چمچ ہلدی، دو چائے کے چمچ صندل پاؤڈر، ایک چائے کا چمچ نیم پاؤڈر، دو چائے کے چمچ پسا ہوا کھیرا۔ ان سب اجزاء کو مکس کرکے چہرے پر دس سے پندرہ منٹ لگائیں اور کچھ دیر گولائی میں مساج کریں۔
اس سے جلد کو سکون ملتا ہے اور آہستہ آہستہ چہرے سے کیل، مہاسے اور دانے ختم ہوجاتے ہیں۔ اسے ہفتہ میں دو بار لگائیں۔
اسکن نرم و ملائم کرنے اور مردہ خلیات ختم کرنے کے لیے
تین چائے کے چمچ دال مونگ، ایک چائے کا چمچ سوکھی میتھی، ایک چائے کا چمچ مالٹے کی خشک چھال، ایک چائے کا چمچ نیم پاؤڈر، ان سب کو پیس کر روغن زیتون، روغن بادام یا عرق گلاب کے ساتھ ملا کر پیسٹ بنالیں اور اس ابٹن کو چہرے، بازو اور گردن پر دس منٹ لگا رہنے دیں۔ یہ ابٹن جلد سے مردہ خلیات ختم کرکے نرم و ملائم بنانے میں مدد کرتا ہے۔
موئسچرائزنگ ابٹن
خشک جلد کو موئسچرائز کرنے کے لیے یہ ابٹن مفید ہے۔
چھ عدد بادام کی گریاں رات بھر آدھا کپ کریم میں بھگو کر رکھ دیں اور صبح چوپر مشین میں پیس لیں، اس پیسٹ میں دو چائے کے چمچ تل کا تیل اور ایک چائے کا چمچ تلسی پاؤڈر مکس کرکے چہرے پر دس منٹ لگا کر گولائی میں مساج کریں۔ تھوڑی دیر بعد ٹھنڈے پانی سے دھولیں۔
میڈیکیٹڈ ابٹن
آدھا کپ بیسن، ایک چائے کا چمچ ہلدی، ایک چائے کا چمچ لیموں کا رس، ایک چائےے کا چمچ دودھ ایک چائے کا چمچ ناریل یا بادام کا تیل، ان اجزاء کو پانی یا دودھ کے ساتھ مکس کرکے سارے جسم پرلگائیں۔ پانچ منٹ بعد رگڑتے ہوئے اتار دیں اور غسل کرلیں۔