ذہن و شعور

[box type=”note” align=”” class=”” width=””]

Gratitude Meditation

مراقبۂ شکر
[/box]

مراقبہ کی اہمیت سے آج کون واقف نہیں، یہ ذہنی و جسمانی مشق کا بہت قدیم طریقہ ہے۔ مراقبہ ذہنی یکسوئی اور سکون حاصل کرنے اور روحانی حواس کو بیدار و متحرک کرنے کا ایک ذریعہ ہے۔ مشرق میں تو مراقبہ اولیاء اللہ اور صوفیاء کرام کا صدیوں پرانا معمول ہے۔ صوفیاء ارتکاز توجہ لاشعوری کیفیات کے ادراک، باطنی یا روحانی صلاحیتوں کی بیداری کے لیے دیگر مجاہدات اور ریاضتوں کے ساتھ ساتھ مراقبہ کا اہتمام بھی کرتے تھے۔
مراقبے کے ذریعے انسانی ذہن کائناتی شعوری کے ساتھ ہم آہنگ Tune ہوسکتا ہے۔ گویا انسانی ذہن ایک وصول کنندہ Receiver ہے۔ کائنات میں مختلف نشریات مسلسل جاری و ساری ہیں۔ انسانی ذہن مراقبہ کے ذریعے ان نشریات کو بہتر طور پر وصول کرنے اور اُنہیں سمجھنے کے قابل ہوسکتا ہے۔
اپنے کثیرالجہتی مفید اثرات کی وجہ سے مراقبہ صدیوں سے مشرق کی کئی تہذیبوں میں معروف اور رائج رہا ہے۔ اب امریکا اور یورپ میں بھی سائنس دان، ماہرینِ نفسیات، نیورولوجسٹ اور دیگر شعبوں کے طبی ماہرین انسانی ذہن اور صحت پر مراقبے کے اثرات پر تحقیقات کررہے ہیں۔

ان تحقیقات سے پتا چلتا ہے کہ مراقبہ سے ذہنی اور جسمانی دونوں طرح کے فوائد حاصل ہوسکتے ہیں۔ مراقبہ کے روحانی فوائد کے علاوہ روزانہ مراقبہ کرنے سے انسان کی ذہنی، جسمانی صحت اور کارکردگی بہتر بنائی جاسکتی ہے۔
مراقبہ کئی نفسیاتی مسائل مثلاً اسٹریس، ٹینشن، ڈپریشن، خوف، احساسِ کمتری، شک اور وسوسوںوغیرہ سے نجات پانے میں بھی مددگار ہے۔ مراقبہ کی وجہ سے جذبات پر کنٹرول ، غصہ، جذباتی ہیجان جیسے منفی جذبات میں کمی آتی ہے، بیماریوں کے خلاف جسم کے مدافعتی نظام کو تقویت ملتی ہے۔ مراقبہ بلڈ پریشر، بےخوابی کے مسائل ، دل کی تقویت، سانس کی بہتری، قلب، نظام ِدوران ِخون اور اینڈوکرائن نظام کے لیے بھی مفید ہے اور اس سے مزاجی کیفیت پر خوش گوار اثر پڑتا ہے۔ مزید یہ کہ میڈیٹیشن یعنی مراقبہ کرنے والوں میں کشش بہت بڑھ جاتی ہے۔
مختلف تعلیمی و تحقیقی اداروں میں ہونے والی ریسرچ سے واضح ہوا ہے کہ مراقبہ کا عمل انسانی دماغ کے کئی حصوں میں مختلف تبدیلیوں کا ذریعہ بنتا ہے۔ مراقبے کی وجہ سے دماغ کے سیکھنے، سمجھنے، ذہانت اور بصیرت جیسے معاملات سے متعلق حصوں کی تحریکات بڑھ جاتی ہیں ۔ روزانہ مراقبہ کرنے سے ارتکاز توجہ کی صلاحیت میں اضافہ ہوتا ہے۔تخلیقی صلاحیت Creativityبھی بیدار ہوتی ہے اس کے علاوہ وجدان Intuitionکی صلاحیتیں پروان چڑھتی ہیں۔ مراقبہ کی وجہ سے آدمی اپنی صلاحیتوں سے زیادہ سے زیادہ کام لینے کے قابل ہوسکتا ہے۔
یونیورسٹی آف کیلی فورنیا ڈیوس کی پروفیسر کتھیرائن میکلین اور ساتھی ایڈوائزر کلیفورڈ سورن کی مشترکہ تحقیق میں مراقبہ کرنے والوں کا تجزیہ کیا گیا۔ مختلف ٹیسٹ کے بعد ماہرین نے دیکھا کہ مراقبہ کرنے والوں نے مراقبہ نہ کرنے والوں کی نسبت عمدہ کارکردگی کا مظاہرہ کیا۔ غرض جسم کے معاملات ہوں یا ذہن کے، مادی فوائد ہوں یا روحانی مراقبہ ہر جگہ کسی نہ کسی طرح مفید ومعاون ہوسکتا ہے۔
اب ہم بات کرتے ہٰیں شُکر گزاری کی ….

شکر ادا کرنا یا شکر گزاری ایک ایسا عمل ہے جس کا درس ہزاروں سال سے دیا جارہا ہے، شکر کرۂ ارض پر پھیلی ہر ایک تہذیب و ثقافت اور ہر ایک مذہب کی تعلیمات کا حصہ رہا ہے۔
شکرگزاری ، تَشَکُّر ، ممنونیت، احسان مندی، سپاس گزاری جسے انگریزی میں Gratitude کہتے ہیں، بظاہر یہ چھوٹا سا مثبت عمل ہے مگر یہ ناصرف جسمانی اور ذہنی صحت کے لئے کرشماتی ثابت ہوتا ہے بلکہ روز مرہ کے معاملات اور تعلقات پر بھی اپنے اثرات ثبت کرتا ہے۔
شکر گزاری ایک انتہائی طاقت ور مثبت طرز فکر ہے جو ایک مقناطیس کی طرح کام کرتی ہے۔ شکر گزاری کا یہ مقناطیس مثبت چیزوں ، نعمتوں کو اٹریکٹ کرتا ہے، جس سے زندگی میں مثبت تبدیلی آتی ہے۔
ماہرین کی ریسرچ سے یہ پتا چلتا ہے کہ شکر گزار ہونا آپ کی خوشیوں کے احساس کو بڑھاتا ہے۔ شکر بہتر اور پرسکون نیند کی وجہ بنتا ہے۔ جسم کو طاقت اور اعتماد فراہم کرتا ہے۔ اضطراب Anxiety اور اداسی Depression کی علامات کے تدارک میں معاون ہوتا ہے۔ ایک انوکھی بات یہ ہے کہ جسمانی درد میں بھی حیرت انگیز کمی کا باعث بنتا ہے۔
یونیورسٹی آف کیلی فورنیا ڈیوس میں شکرگزاری پر تحقیق کرنے والے ریسرچر رابرٹ ایمونز Robert Emmons نے شکر گزاری کے موضوع پر کئی کتابیں لکھی ہیں ، جن میں شکر گزاری کارآمدہے Gratitude Works، شکر گزاری کے الفاظ Words of Gratitude، شکر گزاری کی نفسیات Psychology of Gratitude، خدا کا شکر Gratitude to God ، شکریہ Thanks اور شکرگزاری کی چھوٹی کتاب The Little Book of Gratitude شامل ہیں ۔ رابرٹ ایمونز نے اپنا ایک ریسرچ پیپر Gratitude as a Psychotherapeutic Intervention.پیش کیا کہ کس طرح شکر گزاری بیماروں کے لئے ایک ہیلنگ پاور کے طور پر بھی حیران کن کام کرتی ہے۔
رابرٹ ایمونز کا کہنا ہے کہ شکرگزار بننا بلڈ پریشر کو کم کر سکتا ہے ، قوت مدافعت کو بہتر بنا سکتا ہے اور زیادہ موثر نیند کی فراہم کرتا ہے۔ شکرگزار ہونا افسردگی ، اضطراب اور دیگر ذہنی بیماریوں کے خطرے کو کم کرتا ہے ، اور خودکشی کی روک تھام میں اہم عنصر ہے۔ ان کی تحقیق کے مطابق شکرگزاری اسٹریس کے ہارمون (کارٹیسول ) کے لیول کو 23 فیصد کم کرتا ہے، شکرگزاری کرنے والے مریضوں میں دل کی سوزش میں 7 فیصد کمی واقع ہوئی۔ شکرگزار سرگرمیوں ( نعمتوں کی گنتی اور شکرگزاری کے خط )سے چھ ماہ کی مدت کے دوران ڈپریش میں مبتلا مریضوں میں خطرے کو 41 فیصد کم کیا۔ شکر گزار مریضوں میں ڈاسٹلک بلڈ پریشر 16 فیصد کم اور کم شکر گزار افراد میں سسٹولک بلڈ پریشر 10 فیصد کم پایا گیا۔ تشکر آمیز خط لکھنے پر ناکام خودکشی کرنے والے 88 فیصد مریضوں میں ناامیدی کے احساسات کم ہوگئے اور ان میں سے 94 فیصد میں امید کی سطح میں اضافہ ہوا۔ شکرگزار ی کرنے والے دائمی درد کے ایسے مریض جو بے خوابی اور ڈپریشن میں مبتلا تھے ان میں نیند کے معیار میں 10 فیصد بہتری پائی گئی ۔
ماہرین نے شکر گزاری کو جسمانی اور نفسیاتی فوائد سمیت خوشی سے بھی کافی حد تک منسلک کیا ہے۔ ایک تحقیق کے مطابق شکر گزار افراد دیگر کی نسبت 25 فیصد زیادہ خوش ہوتے ہیں۔
یونیورسٹی آف کیلی فورنیا ڈیوس کے رابرٹ ایمونز اور میامی یونیورسٹی کے مائیکل میک کولوف نے شکر گزاری پر تحقیق کرنے کے لیے دوگروپ تشکیل دئیے ایک گروپ سے ہفتے کے دوران پیش آنے والی ایسے واقعات کے بارے میں لکھنے کے لیے کہا گیا جن پر وہ شکر گزار ہیں اور دوسرے گروپ کو ایسی چیزوں کے بارے میں لکھوایا گیا جو انہیں ناپسند ہوں۔ 10 ہفتوں کے بعد ، جن لوگوں نے شکریہ کے بارے میں لکھا وہ زیادہ پرامید تھے اور اپنی زندگی کے بارے میں بہتر محسوس کرتے دکھائی دئیے۔
امریکہ کی ییل Yale یونیورسٹی میں نفسیات اور کاگنیٹو Cognitiveسائنس کی پروفیسر لاؤری سینٹوس Laurie R. Santos نے اپنی کلاس ‘‘سائیکالوجی اینڈ دا گُڈ لائیف’’ کے شاگردوں کو ہفتے کے ساتوں روز ہر رات ہر اُس چیز کی فہرست بنانے کو کہا ہے جس کے لیے وہ شکر گزار ہیں۔ یہ شکرگزاری کی فہرست کہلائے گی۔
پروفیسر سینٹوس نے کہا کہ ‘‘یہ سننے میں کافی سادہ لگتا ہے مگر تحقیقی میں ہم نے دیکھا ہے کہ وہ طلبا جو باقاعدگی سے اس مشق کو کرتے ہیں وہ زیادہ خوش رہتے ہیں۔’’
امریکا کی کیلیفورنیا یونیورسٹی کی تحقیق کے مطابق شکر گزاری کا احساس دل کی صحت کو بہتر بنانے کا سب سے آسان نسخہ ہے۔تحقیق میں بتایا گیا ہے کہ دل کے ایسے مریض جو اپنی زندگی کی مثبت چیزوں پر شکر گزاری کا اظہار کرتے ہیں ان کی ذہنی اور جسمانی صحت میں نمایاں بہتری دیکھنے میں آتی ہے۔اس تحقیق کے دوران ایسے مریضوں کا جائزہ لیا گیا جنہیں دل کے دورہ پڑچکا تھا۔محققین کے مطابق مریضوں کے اندر شکر گزاری کی کیفیت ان کے مزاج، نیند کو بہتر بناتی ہے اور وہ تھکاوٹ اور ورم کی کیفیت سے کافی حد تک محفوظ رہتے ہیں۔
محققین کا کہنا ہے کہ شکر گزاری کی کیفیت کو تحریر کرنا دل کی صحر کے لیے مفید ہوتا ہے۔ جس کے نتیجے میں ہارٹ اٹیک کا خطرہ بھی کم ہوجاتا ہے۔ ان کے بقول ایک شکر گزار دل ہی زیادہ صحت مند ہوتا ہے اور اس کے لیے شکر گزاری کے جذبات کو تحریر کرنا ایک موثر اور آسان طریقہ ہے۔
ہارورڈ یونیورسٹی کے جنیفر لرنر، کیلیفورنیا یونیورسٹی کے یے لی، نارتھ ایسٹرن یونیورسٹی کے ڈیوڈ ڈی اسٹینو اور لیاہ ڈکٖنز کی مشترکہ تحقیق سے یہ بات سامنے آئی کی جن لوگوں میں شکرگزاری کی عادت پختہ ہوتی ہے وہ معاشی میدان میں زیادہ صبر وتحمل اور بہتر ول پاور کا استعمال کرتے ہیں۔
امریکا میں کی جانے والی ایک تحقیق کے مطابق لوگوں کا شکریہ ادا کرنا ویسے تو اچھے آداب کی علامت ہے ساتھ ہی آپ کے تعلقات میں گہرائی پیدا کرتا ہے۔ اگر کسی کے کوئی کام کرنے پر آپ اس کے شکر گزار ہوئے تو آپ نے ایک ایسے شخص کو اپنا دوست بنا لیا جو کسی بھی مصیبت میں آپ کے کام آنے سے نہیں کترائے گا۔
شکر گزاری کی عادت جسمانی صحت میں بھی بہتری لاتی ہے۔ یہ ایک طرف تو دماغی طور پر انسان کو پرسکون کرتی ہے دوسری جانب ماہرین کی ایک تحقیق کےمطابق جسمانی صحت پر بھی مثبت اثرات ڈالتی ہے اور انسان کو مختلف اقسام کی تکالیف سے نجات دلاتی ہے۔ شکر گزاری کی عادت دماغ سے منفی جذبات کو کم کرکے اعصاب کو پرسکون کرتی ہے ۔ جب لوگ اپنی زندگی میں موجود چیزوں کے لیے شکر گزار بنتے ہیں تو ان کے اندر سے غصہ اور چڑچڑاہٹ کا خاتمہ ہوتا ہے۔ جب بھی آپ کے اندر منفی جذبات پیدا ہوں اپنے آپ کو دستیاب چیزوں پر نظر ڈالیں اور سوچیں دنیا کے کتنے ہی لوگ ان سے محروم ہیں ان باتوں پرعمل کر کے آپ بہترین زندگی گزار سکتے ہیں۔
شکر مندی کا احساس اصل میں امید کی توانائی ہے ۔جوہمارے اندر نئی قوت اور مشکل حالات میں ممجتمع اور مثبت طرز فکر کا حامل رہنے کی جرات پیدا کرتی ہے ۔
دانا کہتے ہیں کہ احساسِ تشکر سے لبریز دل ہمیشہ خوش اور مطمئن رہتے ہیں ۔ایسے افراد زندگی کے معاملات میں ایک کامیاب اور مثبت شخصیت کے روپ میں سامنے آتے ہیں ۔افسوس کی بات یہ ہے غمِ روز گار نے ذہنوں کو کچھ اس طرح جکڑ لیا ہے کہ شکرانے اور احسان مندی کی تعلیمات ہونے کے باوجود دورِ حاضر کی اکثریت نہ چاہ کر بھی ان سے محروم ہوتی جارہی ہے۔ شاید اسی لئے لوگوں اکثریت اصل خوشی سے کوسوں دور ہے۔ سوال یہ بھی اٹھتا ہے کہ آخریہ شکرمندی کا احساس دل میں زندہ کیسے رکھا جائے۔ اسے اپنی فطرت کا حصہ کیسے بنایاجائے ؟
تو جناب شکرانہ اور احسان مندی درحقیقت ہر انسان کی فطرت کا حصہ ہیں ۔انھیں بس اجاگر کرنے کی ضرورت ہوتی ہے ۔ جب ہم کسی بات یا احساس کو بار بار دہراتے ہیں تو وہ بات ذہن میں بیٹھ جاتی ہے ۔ وہ احساس پھر سے زندہ ہوجاتا ہے۔

مراقبۂ شکر – Gratitude Meditation

مراقبہ اور شکر گزاری کے جسمانی، روحانی اور ذہنی ثمرات کو دیکھتے ہوئے مغرب میں ماہرین نے مراقبہ کی ایک قسم مراقبہ شکر (Gratitude Meditation) متعارف کرائی ہے۔
ماہرین کا کہنا ہے کہ مراقبہ اور شکر گزاری مل کر انسان کی ظاہری و باطنی زندگی اور خوشیوں کو دوآتشہ کردیں گے۔ اپنی زندگی میں موجود مثبت چیزوں پر شکر گزار ہونا اور منفی چیزوں کے اندر بھی مثبت تلاش کرنا اس مراقبے کی سب سے بڑی کامیابی ہے۔
مراقبہ شکر ، مراقبہ کی ایک ایسی قسم ہے جو زندگی کی اہم چیزوں کے لئے شکرگزاری پر توجہ دیتی ہے۔ مراقبہ شکر کوئی نئی مشق نہیں ہے، پرسنالٹی ڈیولپمنٹ پر لکھی کئی کتابوں کے مصنف وائن ڈائیر Wayne Dyer، جیک کورن فیلڈ Jack Kornfield، رہونڈا بیرن Rhonda Byrn ، ایم جے ریان M. J. Ryan نے شکر اور احسان مندی کے کئی طریقوں پر بات کی ہے۔ رابرٹ ایمونز Robert Emmons، لاؤری سینٹوس Laurie R. Santos ، ڈاکٹر کیتھی کیمپر Dr. Kathi Kemper نے شکرگزاری کےاثرات پر تحقیق کی اور پریما چاڈرن Pema Chodron، جان کباٹ زن Jon Kabat-Zinn، تخ نیات ہانہ Thich Nhat Hanh، ایکھارت ٹولی Eckhart Tolle، کرسٹین نیف Kristin Neff، سارہ آسٹر Sara Auster ، ٹونی روبنز Tony Robbins، دیپک چوپڑا، رچرڈ الپرٹ ، ایلی بوتھروئڈ، جینی لی ٹونر، جیسی روبنسن سمیت مراقبہ اور مائنڈ فلنیس کے کئی ماہرین نے مراقبہ شکر Gratitude Meditation کی کئی مشقیں متعارف کرائی ہیں۔
مراقبۂ شکر اس وقت دنیا کی تیزی سے مقبول ہوتا متبادل طریقہ علاج بن گیا ہے۔
جب بھی کسی لمحہ میں کچھ بھی ناگوار محسوس ہو، کچھ بھی ایسا ہو رہا ہو جس کا سامنا کرنا آسان نہیں تو بس مراقبہ شکر یعنی گریٹی ٹیوٹ میڈیٹیشن کے لیے روزانہ چند منٹ نکالنے ہوں گے۔ یہ مشقیں آپ کو تازہ دم کردیں گی۔
مراقبہ کے لئے پر سکون جگہ کا انتخاب کریں جہاں آپ بغیر کسی مداخلت کے یہ مشق کر سکیں۔شروع میں بہت سی چیزیں آپ کی توجہ ہٹائیں گی جیسے گاڑیوں کا شور،پرندوں کی آوازیا لوگوں کی باتیں۔بہتر یہ ہے کہ آس پاس موجود بجلی کے آلات اور سیل فون بند کردیں اور کمرہ بند کرلیں۔ کانوں میں بھی روئی کا پھایا رکھ لیں۔ جب آپ مراقبے کے عادی ہو جائیں گے توکہیں بھی یہ مشق کر سکتے ہیں۔ مراقبہ کے لیے آلتی پالتی مار کر بیٹھ جائیں اگر آپ اس میں تکلیف محسوس کرتے ہیں توکسی گدی یا کرسی پر بیٹھ سکتے ہیں،یا دیوار سے ٹیک لگا لیں۔
مراقبے کے دوران آپ کو سانس پر کنٹرول کرنا ہے کیونکہ گہرے سانس جسم اور ذہن کو سکون دیتے ہیں۔پرتاثیر مراقبہ وہی ہے جس میں آپ کی پوری توجہ سانس پر ہو۔ ناک کے ذریعے سانس اندرلیں اورباہر نکالیں۔منہ بند رکھیں لیکن پرسکون انداز میں رہیں۔
کسی چیز پر توجہ دینا پُراثر مراقبے کا اہم حصہ ہے۔ مقصد ذہن سے اس سوچ کو دور کرنا ہے جو دباؤ کا باعث ہے۔ سانس کی آمدورفت کو معمول پر رکھتے ہوئے ، اللہ کی دی ہوئی لاتعداد نعمتوں کو یاد کرنے کی کوشش کیجئے اور کچھ نہیں تو بس محسوس کرنا شروع کر دیجئے۔ اپنے لبوں سے شکرانے کے الفاظ ادا کیجئے اور تہہ دل سے اللہ کی ہر نعمت کا شکر ادا کیجئے کہ اس نے آپ کو سننے، دیکھنے، سمجھنے کی صلاحیت سے نوازا ہے ، اسی کیفیت میں اب بالکل آرام اور اعتماد کے ساتھ مسکراتے ہوئیے اپنی آنکھیں کھول لیجیے ۔
شکر گزاری کے یہ الفاظ کامیابی کا پیغام ہیں۔ یہ خوشی کا پیغام ہے جسے ہمارا دماغ ایک مثبت عمل کی حیثیت میں قبول کرتا ہے۔ دل کے لیے یہ الفاظ ہم آہنگی اور طمانیت کا باعث بنتے ہیں۔ جیسے جیسے گریٹی ٹیوٹ میڈٹیشن کی مشق کو دہراتے جاتے ہیں اینڈورفن Endorphin اور سیروٹینین Serotoninکی مقداروں میں توازن بھی آتا جاتا ہے۔ یہ توازن اسٹریس اور ڈپریشن میں کمی اور خود اعتمادی میں اضافے کا سبب بنتا ہے۔

مائنڈ فُل نیس – Mindfulness

مراقبہ کے لیے ماحول یا وقت میسر نہ ہوتو آپ مائنڈ فلنیس گریٹی ٹیوٹ کی مشقیں بھی کرسکتے ہیں۔ یوں تو ان مشقوں کو لیٹ کر ،بیٹھ کریا چلتے ہوئے کسی طرح بھی کیا جا سکتا ہے لیکن شرط یہ ہے کہ آپ آرام دہ حالت میں ہوں ۔
آئینے کے سامنے ایک بار روزانہ تو ضرور جاتے ہوں گے۔اس لئے سب سے پہلے ایک چٹ پر شکریہ لکھ کر آئنے پر چسپاں کردیجئے ۔ اب جب آئینے کے سامنے کھڑے ہوکر اپنے سراپے کا جائزہ لیں تو ایک منٹ خود کو دیجئے اور اپنے دل پر ہاتھ رکھیئے اور اپنے لمس کو محسوس کیجئے۔ سوچئے وہ کون سا عضو ہے جو اگر نہ ہوتا تو آپ کو کیا فرق پڑتا۔
سب سے پہلے تو اسی کا شکر ادا کیجئے کہ اللہ تعالی نے آپ کو آنکھوں کی نعمت اور ان آنکھوں میں روشنی کی بیش قیمت دولت سے سرفراز کیا ہے۔ اپنی آنکھوں کو اپنے چہرے کو غور سے دیکھیں پھر آنکھیں بند کریں اور یہ سوچیں کہ آپ دیکھ نہیں سکتے…. خوبصورت دن، تاروں بھرے آسمان، ٹھنڈی ہواوں سے بھری شام ، ڈوبتے سورج اور خوبصورت درختوں کو آپ دیکھ نہیں سکتے ۔
اب آپ آنکھیں کھولیں اپنی آنکھوں کو غور سے آئینے میں دیکھیں ۔ اب دل پر ہاتھ رکھ کر اس بات پر شکر ادا کریں کے آپ دیکھ سکتے ہیں اور اس وقت جو مسرت اور خوشی آپ محسوس کرتے ہیں وہ ہوتی ہے شکرگزاری کی اصل روح!
کیا آپ نے اپنی آتی جاتی سانس کا شکر ادا کیا؟ کیا آپ نے کبھی سورج ہوا پانی خوراک اور اپنی صحت کا شکر ادا کیا؟کیا آپ نے کبھی اپنی آنکھوں کا شکریہ ادا کیا جن کی بدولت آپ کئی نعمتوں کو دیکھتے ہیں؟ کبھی اپنے ذہن ، اور دوسرے حواس کا شکریہ ادا کیا ؟ کیا آپ نے کبھی اس خوبصورت صبح کا خیر مقدم کیا جو ایک تازہ دم زندگی کی نوید لے کر آئی ہے ؟ کیا آپ نے اپنے آفس میں موجود اسسٹنٹ، ریسپشنیسٹ، آفس کولیگز، آفس میں موجود مشینوں اور دیگر سہولیات کا شکرادا کیا ہے کہ یہ آپ کو میسر ہیں ،کیا آپ ان رشتوں کا شکرگزار ہے جنہوں نے آپ کے لیےوقت اور مال کی قربانی دی ؟ کیا آپ ان لوگوں کے شکر گزار رہے ہیں جو آپ کی گلیاں ، گھر، آفیس ، واش رومز وغیرہ روز آپ کے لیے صاف کرتے ہیں؟ ….
شکر ادا کرنے کے لیے ہمیں کوئی وجہ تلاش کرنے کی ضرورت نہیں ہونی چاہیے۔ حالانکہ وجہیں تو بہت سی ہوتیں ہیں۔ زندگی میں ان گنت مہربانیاں اور نعمتیں ہیں جو ہم پر قدرت ہر لمحہ نچھاور کرتی رہتی ہے، حقیقت تو یہ ہے کہ نعمتیں گنتے عمر گزر جائے تو ہم گن بھی نہ پائیں۔ تاہم جب بھی آپ کو مایوسی کا احساس ہو تو اپنے ارگرد نظر دوڑائیں اور ان چیزوں کو دیکھ لیں جو آپ کے کام آتی ہیں، خوشی دیتی ہیں یا جن کے بغیر زندگی کا تصور ادھورا لگتا ہے، تو شکر گزاری خودبخود پیدا ہونے لگتی ہے، خود سوچیں اگر ہاتھ نہ ہوتے تو یا ٹانگوں سے محروم ہوتے تو زندگی کیسی ہوتی؟
جو لوگ شکر گزاری کی عادت اپنا لیتے ہیں، ان کے اندر زندگی کے لیے امید بھی بڑھتی ہے۔ اس کے لیے آپ کوئی بھی طریقہ کار اختیار کرسکتے ہیں یا کم از کم اپنے ذہن کے اندر تو ان چیزوں کے لیے شکر گزار ہوں جو زندگی میں آپ کو ملی ہوئی ہیں۔
یوں تو مائنڈ فلنیس کی مشق کسی بھی وقت کی جاسکتی ہے مگر اسے صبح کے وقت کرنا زیادہ فائدہ مند ہوتا ہے، صبح کے وقت کسی کامیابی کا تصور دماغ پر پورے دن گہرا اور مثبت اثر ڈالتا ہے۔ اس لیے اپنے حالات و واقعات و جذبات کو چھیڑے بغیر صبح اٹھتے ہی اللہ اور اس کی عطاکردہ نعمتوں کا شکر ادا کرنے کی عادت ڈالئے۔ آپ خود محسوس کریں گے کہ شکر ادا کرنے سے دل گھبرانے کی کیفیت کم ہوتی جائے گی۔ دل و دماغ کو سکون ملنے لگے گا۔

شکریہ لکھ کر ادا کیجیے – Gratitude Diary

کبھی تو زندگی میں آپ نے خط لکھا ہو گا۔اگر نہیں تو اسکول میں تو ضرور خط لکھنا سیکھا ہوگا۔ ہمارے کہنے کا مطلب یہ ہے کہ خط لکھیے۔ اس شخصیت کے نام جس نے آپ کو متاثر کیا۔ یہ شخصیت آپ کے والدین ، دادا دادی نانا نانی یا پھر کوئی استاد بھی ہو سکتاہے۔ اس ہستی کے نام ایک ‘‘خطِ شکرانہ’’ تحریر کیجئے۔ان کی خوبیاں، اچھائیاں، ان کی وہ بات وہ عادت جس سے آپ متاثر ہوئے اسے تحریر کیجئے اور اس ہستی کو احساس دلائیے کہ اس کے اس نیک عمل سے آپ کوکیا فائدہ حاصل ہوا۔ اس ہستی کی خوبیوں اور اچھائیوں کو بہت دل سے نکلے لفظوں میں بیان کیجئے اور لفافہ بند کر کے بھیج دیجئے۔
اگر خط لکھنا یا بھیجنا ممکن نہیں تو ڈائری لکھئے۔ روزانہ زندگی کا شکر ادا کرنے کی عادت ڈالئے۔ کچھ ہے یا کچھ نہیں ۔برا ہے یا بھلا ہے ۔شکر ہے کہ اللہ تعالی نے آپ کو زندگی کی نعمت سے نوازا ہے ۔تو بس اسی کا شکر ادا کرنا بھی ایک بہت اچھا عمل ہے ۔
امریکی مصنفہ سارہ بین بریدناکSarah Ban Breathnachاپنی کتاب سمپل ابنڈنس Simple Abundance (یعنی آسان فراوانی‌) میں لکھتی ہیں:
‘‘ہر رات سونے سے پہلے سارادن کی کم سے کم پانچ ایسی چیزیں یا واقعات لکھیے جس کے لئے شکر ادا کرنا چاہیے ۔کوئی دن ایسا ہوگا جب آپ شکرانے کی ایک طویل فہرست لکھنے کے لئے بےتاب ہوں گے اور کوئی دن ایسا بھی ہوگا جب آپ کے پاس چند سادہ سے لفظوں کے سوا شاید کچھ اور نہ ہو۔
مہینے کے اختتام تک جیسے جیسے آپ کی یہ ڈائری بھرتی جائے گی ویسے ویسے آپ اپنے اندر ایک نئی تبدیلی محسوس کریں گے۔ اپنے خیالات اور احساسا ت میں ایک نئی تبدیلی جو کسی بھی حال میں آپ کے اندر شکرانے کی کیفیت پیدا کردے گی۔بس یوں سمجھیے کہ آپ کے باطن میں اندرونی بایولوجیکل کلاک کی طرح ایک خود کار شکرانہ کابٹن بھی فکس ہو جائے گا’’۔
کتاب ‘‘شکریہ’’ Thanksمیں مصنف ڈاکٹر رابرٹ ایمونز اپنی تحقیق کا ذکر کرتے ہیں کہ دو گروہوں پر تجربہ کیا گیا۔ ایک کو اپنی ڈائری میں ہفتہ وار پانچ چیزیں تحریر کرنے کو کہا گیا جس کے لئے وہ شکر گزار ہیں اور دوسرے گروہ کو وہ پانچ چیزیں تحریر کرنے کو کہا گیا جس کے لئے وہ شکوہ کناں ہیں۔
پہلے گروہ کو اپنی خوشی، اطمینان، جسمانی اور ذہنی صحت میں اضافے کا اظہار کرتے پایا گیا جبکہ دوسرے گروہ کا تجربہ اس کے الٹ تھا۔
نعمتوں کو شمار کرنا ان کی اہمیت کو بڑھا دیتا ہے۔ جبکہ شکایات اپنی اہمیت کھونے لگتی ہیں۔

دعا ، ذکر اور سجدہ شکر- Chant and Prayer

اللہ نے بہت زیادہ نعمتیں دی ہیں جن کا شکریہ ادا کرنا تو ہم سب پر فرض ہے لیکن اکثر لوگ اس بارے میں سوچتے بھی نہیں، ہم ہیں کہ بس شکایات لیے خفا خفا سے بیٹھے رہتے ہیں۔
یاد رکھیئے ….!اللہ کا شکر وہ نعمت بھی عطا کرتاہے جو کبھی مانگنے سے نہیں ملی ہوتی۔ ناشکری ایک ناپسندیدہ عمل اور منفی سوچ ہے۔ناشکری کے الفاظ بےچینی اور اضطراب کو بڑھا دیتے ہیں۔ اس لیے کوئی بھی کیفیت ہوکتنے ہی پریشان یا ٹوٹے ہوئے ہوں۔ بس اپنے لبوں کو حرکت دیجئے اور ایک منٹ تک شکر گزاری کے الفاظ دہرانے کی عادت ڈالئے ۔
دو ستو…. ! یہاں یہ مت سوچئے گا کہ ابھی تو سخت الجھن میں ہوں آخر کس بات کا شکر کروں؟ یہ الفاظ آپ کے اندر بے چینی اور اضطراب کو بڑھا دیں گے۔ ناشکری ویسے بھی ایک نا پسندیدہ عمل اور منفی سوچ ہے۔ اس سے بچنے کے لیے بس زیرِ لب دہرائیے یا دھیمی آواز سے یہ کہتے ہوئے ہونٹوں کو حرکت دیجئےکہ
‘‘الحمدللہ، یااللہ تیرا شکر ہے’’۔
آخر میں سب سے اہم بات اور سب سے اہم عمل، نماز اللہ تعالی کا شکرانہ بھی ہے۔ سب مسلمان جانتے ہیں کہ نماز دین کا ستون ہے۔ مومن کی معراج ہے ۔ نماز باری تعالی کے بیش بہا انعامات کا شکرانہ بھی ہے ۔اس میں کوئی شک نہیں کہ وہ لوگ جو نعمتوں کا شکر ادا کرتے ہیں باری تعا لی کو بہت پسند ہیں ۔

ستمبر 2020ء

ذہنی استعداد اور یادداشتـ میں اضافہ کیجیے…..! 

Increase Your Memory & Mind Capacity

[box type=”note” align=”” class=”” width=””]
قسط 1
[/box]

انسانی دماغ قدرت کا ایک حیرت ناک عجو بہ اور دنیا کی پیچیدہ ترین چیز ہے۔ کتاب ذہن کے راز Mysteries of the Mind کے مصنف لکھتے ہیں کہ ایک انسانی دماغ کا وزن عام طور پر تین پونڈ (1.4 کلوگرام)‏ ہوتا ہے جو گریپ‌ فروٹ جتنا بڑا ہوتا ہے۔‏ دماغ میں دس کھرب خلیے اور ایک کھرب کے لگ‌بھگ نیورونز پائے جاتے ہیں جو ایک دوسرے سے جڑے ہوتے ہیں۔‏ اکثر ایک نیورون ایک لاکھ نیورونز سے جڑا ہوتا ہے۔‏ اعصابی نظام کی اکائی نیورون کی ایک خاص قسم حافظے اور یاداشت کی ذمہ دار ہے۔ ہر نیورون ایک سپر کمپیوٹر کی طرح کام کرتا ہے اور دوسرے نیورونز کو ایک سیکنڈ میں ایک ہزار بائٹ کی انفارمیشن پہنچاتے ہیں۔ یہ انفارمیشن جنیاتی کوڈذ کی طرح بلحاظ نوعیت حادثہ و واقعہ ترتیب وار دماغ کے حصے ہیپوکیمپس Hippocampus میں یادداشت بن کر محفوظ رہتی ہیں۔ اِس وجہ سے دماغ بہت سی معلومات کو ذخیرہ کرنے کے قابل ہوتا ہے۔ البتہ اِس معلومات کا اس وقت کوئی فائدہ نہیں ہوتا جب ضرورت پڑنے پر یاد ہی نہ آئے۔‏

یادداشت اور انسانی دماٖغ

یادداشت انسانی شخصیت کی بنیاد ہے تاہم کبھی کبھار یہ دھوکا دے جاتی ہے۔ پہلے زمانے میں یہ کہا جاتا تھا کہ بڑھتی عمر کے ساتھ ساتھ بال، کمر اور یادداشت کمزور ہونے لگتے ہیں یعنی عمر جتنی زیادہ ہوتی ہے یادداشت اتنی ہی کم ہوتی جاتی ہے۔ اگر کوئی کم عمر کچھ بھول جاتا ہے مثلاً کوئی نوجوان یہ کہے کہ کار کی چابیاں آخر میں نے کہاں رکھ دی ہیں؟ تو ممکن ہے کہ اُسے یہ جواب ملے کہ کیا واقعی بھول گئے ہو، یا پھر چابیاں رکھتے وقت تمہارا دھیان کدھر تھا؟۔ لیکن اگر کوئی عمر رسیدہ بھول جائے تو ممکن ہے اُن کی ناراض اہلیہ یہ جملہ کہیں کہ ارے 60سال کی عمر ہوگئی ہے اب سٹھیا گئے ہو، کہاں سے یاد آئے گی؟ حالانکہ اُن کے ساتھ بھی بالکل اسی طرح کا معاملہ ہوتا ہے جیسا کہ نوجوانوں سے ہوجاتا ہے، وہ بھی کہیں غلط جگہ رکھ کر بھول گئے ہوتے ہیں۔ یہ عام سی بات ہے اور ہر کسی کے ساتھ ایسا ہوسکتا ہے۔ بھولنے کے متعلق جب بھی کوئی قصہ یا لطیفہ سنایا جاتا ہے تو غائب دماغ پروفیسر کا نام لیا جاتا تھا۔ لیکن معاملہ یہ ہے کہ یادداشت کی کمزوری یا بھول جانے کی عادت اب کسی خاص شعبہ سے وابستہ افراد یا محض بوڑھے لوگوں سے منسوب نہیں رہی۔ یہ ایک ایسا مسئلہ ہے جس سے ہر عمر کے لاتعداد لوگ دوچار ہیں۔ نوجوان، بوڑھے، بچے، مرد وخواتین اکثر یادداشت کی کمزوری یا بھول جانے کی شکایت کرتے ہوئے پائے گئے ہیں کہ وہ اکثر اہم کام یا اپنی رکھی ہوئی چیزیں بھول جاتے ہیں۔ چیزیں خریدنے بازار جاتے ہیں تو یہی بھول جاتے ہیں کہ خریدنا کیا تھا، پڑھا ہوا سبق انہیں یاد نہیں رہتا، امتحان کے لیے اچھی طرح تیاری کرنے کے باوجود جب جواب لکھنے بیٹھے تو آدھا بھول گئے، ایک کمرے سے اٹھ کر دوسرے کمرے میں گئے لیکن وہاں پہنچنے کر یاد ہی نہیں رہا کہ کس کام کے لیے آئے تھے، بعض اوقات ہم کسی سے گفتگو کررہے ہوتے ہیں کہ یکایک گفتگو کا تسلسل ٹوٹ جاتا ہے اور ہم بھول جاتے ہیں کہ ہم کیا کہہ رہے تھے؟ پھر ہم مخاطب سے کہتے ہیں کہ ابھی ہم کیا بات کر رہے تھے؟ پھر جب وہ ہمیں بتاتا ہے تو ہمیں یاد آتا ہے کہ ہم کس موضوع پر بات کررہے تھے ، کچھ لوگ اس بات پر شاکی نظر آتے ہیں کہ کبھی کسی سے کافی عرصے بعد ملاقات ہوتی ہے تو لوگ انہیں پہچان ہی نہیں پاتے یا پھر تقریب میں ملنے والے عزیزوں کے نام بھول جانے کی عادت بعض اوقات شرمندگی کا باعث بن جاتی ہے۔
اس کائنات میں ہر ذی روح حافظہ کی قوت رکھتی ہے، ماہرین بتاتے ہیں کہ چند گرام کا دماغ رکھنے والی گلہریاں اور بعض پرندے مہینوں بعد یاد کر سکتے ہیں کہ اُنہوں نے اپنی خوراک کس جگہ چھپائی ہے۔‏ لیکن سوا کلو کا سپر کمپوٹر جیسا دماغ رکھنے والا انسان ایک گھنٹے میں بھول جاتا ہے کہ اس نے کون سی چیز کہاں رکھی ہے۔‏
عمومی مشاہدہ ہے کہ ہمارے اردگرد موجود لوگوں میں سے کچھ کا حافظہ بہت تیز ہوتا ہے لیکن کچھ ایسے بھی لوگ ہیں جنہیں چیزیں یاد کرنے میں اور ماضی کھنگالنے میں دقت محسوس ہوتی ہے۔
آخر ایسا کیوں ہوتا ہے کہ انسانوں میں سے کچھ کا حافظہ تیز اور کچھ کی یادداشت کمزور کیوں ہوتی ہے۔ بقول حسرتؔ موہانی
نہیں آتی تو یاد ان کی مہینوں تک نہیں آتی
مگر جب یاد آتے ہیں تو اکثر یاد آتے ہیں

ذہنی صلاحیتیں اور سائنس

انسانی دماغ، اعصابی نظام اور ذہنی صلاحیتوں کے بارے میں جاننے کے لیے سائنس دان صدیوں سے ریسرچ کررہے ہیں ۔ انیسویں صدی کے وسط میں دماغ کے خلیوں کا ادراک حاصل ہوسکا اور جدید ٹیکنالوجی نے سائنس دانوں کو اس قابل بنایا کہ وہ دماغ کے اندر تک رسائی حاصل کرکے اس کے ارتعاشات اور حرکات کا صحیح معائنہ کرسکیں، لیکن اب بھی انسانی ذہن کی صلاحیتوں کے متعلق کے کچھ ایسے پیچیدہ پہلو ہیں جو یہ ظاہر کرتے ہیں کہ دماغ قدرت کا ایک حیرت ناک عجو بہ ہے اور اسے سمجھنے میں سائنس ابھی بھی طفل مکتب ہی نظر آئی ہے۔
مغربی سائنس دان یہ سمجھتے آئے تھے کہ انسان اپنے دماغ کا صرف 5 سے 7 فیصد حصہ استعمال کررہا ہے اور دنیا کے ذہین ترین جنیئس افراد بھی اپنے دماغ کو مکمل طور پر نہیں بلکہ اس کی صلاحیت کا صرف 10 فیصد حصہ استعمال کرپاتے ہیں اور اگر وہ دماغ کے غیر استعمال شدہ حصوں کو بھی کام میں لے آئیں تو غیر معمولی کارنامے سرانجام دے سکتے ہیں۔ موجودہ نیورو سائنس اس نظریے کے تردید کرتی ہے۔ کیمبرج یونیورسٹی میں کلینیکل نیورو سائیکالوجی کے سائنسدانو ں کے مطابق یہ تصور قطعا بےبنیاد ہے۔ تحقیق و تجربے سے یہ بات بھی درست ثابت نہیں ہوتی۔دراصل ہمارے دماغ میں 10فیصد نیوورونز اور 90 فیصد امدادی خلیے گلیل Glaialپائے جاتے ہیں انھیں سفید مادہ White matter بھی کہا جاتا ہے۔ یہ امدادی خلیے ہیں، جو نیورون کو غذائیت و عملی مدد فراہم کرتے ہیں۔یہ ممکن ہے کہ ماہرین نے یہ گمان کیا ہو کہ سارا کام تو 10 فیصد خلیے کرتے ہیں ، بقیہ 90 فیصد خلیوں کو بھی ان جیسا بنانا ممکن ہے۔ حالانکہ گلیل بالکل مختلف قسم کے خلیے ہیں اور ایسا کوئی طریق کار نہیں جو انہیں نیورون بنا ڈالے۔
ماہرین نے دماغ کے حصوں کا پتہ چلانے کی خاطر فنکشنل میگنیٹک ریزونینس امیجنگ fMRIتکنیک استعمال کی جو مطلع کرتی ہے کہ انسان چاہے کیسی بھی ہلکی یا سخت حرکت کرے یا مسلسل سوچتا رہے، انسان دماغ کا ہر حصہ ہی متحرک ہوتا ہے۔ دوران نیند بھی ہمارا دماغ، اس کے سارے عصبی خلیے (Nerve) اور عضلات ہمہ وقت مصروف عمل رہتے ہیں۔ دماغ ایک بھی عصبی خلیہ کو فارغ نہیں بیٹھنے دیتا۔ اگر عصبی خلیے فالتو ہو جائیں تو وہ مر جاتے ہیں۔
﷽ دوسرا مفروضہ جو سائنسدانوں میں پایا جاتا تھا وہ یہ تھا کہ عام انسان اور ذہین انسان کے دماغ میں فرق ہوتا ہے…. لیکن آج سائنس جانتی ہے کہ سائنسدان ہوں، اہل علم ہوں یا عام انسان سب کے پاس ایک ہی طرح کا دماغ ہے۔ آئن اسٹائن کے دماغ پر تو برسوں تک لیبارٹریز میں تحقیق کی جاری رہی کہ اس میں ایسی کیا خاص بات تھی، جو دوسرے دماغوں میں نہیں تھی مگر انہیں ایسا کوئی فرق نہیں مل سکا جس کی بدولت وہ آئن اسٹائن کی دماغی ساخت کو ممتاز قرار دے سکیں۔
بیشتر ماہرین بشریات اور ماہرین حیاتیات کا خیال تھا کہ بعض نسلوں کے دماغ کے حجم کی بنا پر دوسروں سے ذہین ہوتے ہیں۔
معروف برطانوی نیورولوجسٹ ووجٹک راکووکزWojtek Rakowicz کا کہنا ہے کہ دماغ کے سائز سے کسی کے قابل یا ناقابل ہونے کی تصدیق نہیں کی جاسکتی۔ دماغ بڑا ہونے کا ذہانت سے کوئی تعلق نہیں۔

انسانی یادداشت کی حد

کہتے ہیں کہ انسان ماں کی گود سے قبر تک سیکھتا ہی رہتا ہے اور دماغ ان تمام باتوں کو یاد بھی رکھتا ہے۔ قدرت کی جانب سے عطیہ کردہ ہمارے اس میموری کارڈ کی گنجائش کتنی ہے….؟
اس بارے میں بھی سائنسدان ہمیشہ قیاس آرائیاں ہی کرتے رہتے ہیں۔ اب تک کے اندازوں کے مطابق دماغ ایک ہزار کھرب (ایک کے بعد پندرہ صفر) بائٹس معلومات ذخیرہ کر سکتا ہے جس کے سامنے کمپیوٹر کی میموری کوئی حیثیت نہیں رکھتی۔ ذہن کے سیکھنے کی گنجائش اس سے کہیں زیادہ ہے ….؟‏
سائنسدان اس سوال کے جواب کو جتنا دریافت کرتے ہیں اتنا ہی دنگ رہ جاتے ہیں۔‏ مصنف پیٹر رسل Peter Russell اپنی کتاب ‏دی برین بُکThe Brain Book ‏ میں لکھتے ہیں:‏ ‘‘‏ہم سوچا کرتے تھے کہ انسان کا ذہن صرف ایک حد تک معلومات جذب کر سکتا ہے لیکن تحقیق نے ظاہر کِیا ہے کہ یہ بالکل سچ نہیں۔ مثال کے طور پر یادداشت ہی کو لیجئے۔‏ ’’
مصنف رسل انسانی یادداشت کے بارے میں یوں کہتے ہیں: ‏‘‘‏یہ ایک برتن کی طرح نہیں ہے جسے آپ صرف ایک حد تک بھر سکتے ہیں بلکہ ایک درخت کی مانند ہے جو بڑھتا رہتا ہے۔‏ جو کچھ بھی آپ یاد کر لیتے ہیں وہ اس درخت کی ایک شاخ کی طرح ہے جس سے مزید ٹہنیاں اُگ سکتی ہیں۔‏ انسان کی یادداشت کی کوئی حد نہیں ہوتی۔‏ آپ جتنی باتیں سیکھیں گے اتنا ہی آپ اپنی یادداشت کی گنجائش کو بڑھاتے رہیں گے۔’’
انسانی حافظے کی صلاحیتوں کے مظاہرے کے چند واقعات یہاں پیش کیے جارہے ہیں۔

کئی لوگوں کا حافظہ بہت تیز ہوتا ہے اُن میں بہت سے ایسے لوگ بھی شامل ہیں جو زیادہ پڑھےلکھے نہیں ہیں۔‏ اِس سلسلے میں مغربی افریقہ کے قبیلوں کے اَن‌پڑھ تاریخ‌دانوں پر غور کریں۔‏ ان کو گریو griots کہا جاتا ہے۔‏ اُنہیں اُن تمام لوگوں کے نام معلوم ہیں جو پچھلی کئی پُشتوں میں اُن کے گاؤں میں رہتے تھے۔‏ یہ بات مصنف ایلکس ہیلی Alex Haley کے بڑے کام آئی، جنہوں نے اپنے خاندان کی تاریخ کے بارے میں ایک ناول Roots لکھی کہ کس طرح ان کے پردادا افریقی غلام کے طور پر مُلک گیمبیا سے امریکہ لائے گئے اور سات نسلوں بعد اس خاندان کو شہری حقوق حاصل ہوئے ۔ یہ کہانی لکھنے کے لیے وہ افریقہ کے گریو تاریخ‌دانوں ملے جنہیں ایلکس کے پورے گاؤں اور خاندان کی پچھلی چھ پُشتوں کے نسب نامے زبانی یاد تھے۔ ‏اس ناول پر ایلکس کو پولیوزر پرائز Pulitzer prize ملا۔‏
میتھورین ویز یئر قدیم ایران کے بادشاہ کا لائبریرین تھا۔ وہ اس قدرقوی حافظے کا مالک تھا کہ اگر کسی بھی شخص سے کسی بھی زبان میں کوئی بات سنتاتھا تو بعد میں اس بات کو من وعن بیان کرسکتا تھا۔ ایک بار اس کی اس صلاحیت کی آزمائش بھی کی گئی۔ 12افراد کے سامنے اسے پیش کیا گیا اور ہر ایک نے بالکل مختلف زبان میں چند جملے ادا کیے اور بعد میں ویزئیر نے ہر ایک کا جملہ اسی زبان میں پوری صحت اور درست لہجے کے ساتھ ادا کیا۔
کہتے ہیں کہ مشہور رومی حکمران جولیس سیزر (Julius Caesar)کا حافظہ بہت تیز تھا۔ اسے اپنے ہزار ہا سپاہیوں کے نام زبانی یاد تھے۔ کسی بھی جنگ یا مہم کے دوران وہ ہر سپاہی کو اس کے نام سے پکارتا تھا۔
لتھوانیا کا ایک عالم ایلیا بن سلیمان Elijah Ben Solomon انتہائی غیر معمولی حافظہ رکھتا تھا۔ وہ جس کتاب کو ایک بار پڑھ لیتا تھا وہ پھر اس کے ذہن سے محو نہیں ہوتی تھی۔ ایلیا کے ذہن میں ایک دو نہیں، پوری دو ہزار کتابیں محفوظ تھیں!….ان کتابوں کا ایک ایک لفظ اسے ازبر تھا۔ جہاں سے بھی چاہتے ، لوگ اس سے کوئی بھی پیراگراف سن سکتے تھے۔
امریکی صدر تھیوڈور روزویلٹ (Theodore Roosevelt ) کا حافظہ بھی اتنا تیز تھا کہ اسے عام ملنے والے لوگوں کے چہروں اور نام برسوں یاد رہتے تھے۔
فرانس کا سیاستدان لیون گیمبیٹاLeon Gambetta بھی معلومات کو یاد رکھنے کی غیر معمولی صلاحیت رکھتا تھا، وکٹر ہیوگو کی تحریروں پر مبنی ہزاروں صفحات اسے مکمل طور پر ازبر تھے۔ وہ ایک ایک لفظ کو پوری صحت کے ساتھ بیان کرسکتا تھا….
امریکہ کے مشہور ماہر نباتات اساگرے Asa Gray کا حافظہ اتنا اچھا تھا کہ اسے پچیس ہزر سے زاید پودوں، جڑی بوٹیوں کا نام اور خواص زبانی یاد تھے ۔ امریکی محقق چارلیس ڈارون (Charles Darwin)جب ارتقا پر اپنی کتاب لکھ رہا تھا تو اس نے مختلف قسم کے پودوں کی معلومات کے لیے اساگرے سے ہی مدد لی ۔
یونان کا رچرڈ پورسن Richard Porson انفارمیشن کو پوری صحت کے ساتھ یاد رکھنے کی غیر معمولی صلاحیت رکھتاتھا۔ اسے بھی درجنوں کتابیں یاد تھیں۔
امریکہ کے ہیری نیلسن پلز بری Harry Nelson Pillsbury کی ذہنی قوت اس قدر تھی کہ وہ بیک وقت شطرنج کی 22بازیاں یاد رکھ سکتاتھا اور اتنے ہی افراد سے بیک وقت مقابلہ کرتاتھا۔ ایک نظر ڈال کر وہ پوری بازی کو تمام چالوں کے ساتھ اپنے ذہن میں محفوظ کرلیتاتھا۔
امریکہ کا زیرا کولبرنZerah Colburn ریاضی کے حوالے سے حیرت انگیز ذہانت کا حامل تھا۔ وہ آٹھ سال کی عمر سے ہی حساب کا کوئی بھی سوال بڑی آسانی سے حل کرلیتاتھا۔ اس کی اس صلاحیت نے سب کو ورطۂ حیرت میں ڈال دیا۔ ایک بار اس نے لندن میں ماہرین کے سامنے 21,735 کو 543 سے ضرب دیا اور محض چار سیکنڈز میں جواب بتادیا۔
لیونارڈوڈاونچی (Leonardo Da Vinci)اطالوی نابغہ جسے ہم شہرہ ٴ آفاق تخلیق مونالیزا کے حوالے سے جانتے ہیں، تاریخ انسانی کا ایک ناقابل فراموش کردار ہے۔ وہ محض ایک بڑا مصور ہی نہیں سائنس دان بھی تھا۔ کم از کم ڈیڑھ سو ایجادات لیونارڈو ڈاونچی سے منسوب ہیں، نباتات، علم الابدان، فن تعمیر، انجنیئرنگ، نقشہ گری، ارضیات، فلکیات، موسیقی، فلسفہ، ریاضی، اسلحہ سازی، ہوابازی ، لکھاری، موسیقی اور دیگر شعبوں میں اس کا کام یادگار ہے۔ قدرت نے اسے یہ ملکہ عطا کیا تھا کہ وہ بیک وقت ایک ہاتھ سے پینٹنگ اور دوسرے ہاتھ سے گاڑی کے پرزوں کی مرمت کر سکتا تھا۔
صرف مغرب میں ہی نہیں بلکہ مسلم معاشرے میں ایسی کئی مثالیں موجود ہیں۔
حضرت اما م جعفرصادق ان نادرِ روزگار افراد میں شمار کیے جاتے ہیں جنہوں نے اپنی صلاحیتوں کو علم پھیلانے میں صرف کیا۔ انہوں نے پینسٹھ برس کی عمر پائی اس دوران انہوں نے علم الحدیث، علم الکلام، فلسفہ کیمیا، فلسفہ، طبیعیات، ہئیت، منطق، طب، فلکیات، ما بعد الطبیعیات ، تشریح الاجسام (بائیولوجی) اوردیگر علوم پر کئی کتابیں تحریرکیں ۔
امام بخاری نے 62برس عمر پائی۔ دورطالب عمری میں ہی انہوں نے مشہور عالموں کی کتابیں اور 15ہزار سے زائد احادیث حفظ کرلیں تھیں۔علم حدیث کے شوق میں انہوں نے اس دورمیں شام، مصر اور جزیرہ کا دومرتبہ اور بصرے کا چارمرتبہ سفر کیا۔ چھ سال مکہ میں گذارے۔ احادیث کے علاوہ انہوں نے تاریخ ، تفسیر اورفقہ پر بھی کئی کئی جلدوں میں کتابیں تصنیف کیں۔
بوعلی سینا کا شمار عظیم سائنس دانوں میں ہوتاہے۔ انہوں نے 47برس عمر پائی۔سترہ برس کی عمر تک حصول تعلیم میں مصروف رہے تھے۔ انہوں نے فلسفہ ، منطق ،ریاضی ،فزکس، کیمیا، ارضیات اور طب کے موضاعات پر کئی ضمیم کتب لکھیں جو آج بھی انسائیکلوپیڈیا کی حیثیت رکھتیہیں۔
امام غزالی ؒ نے 53برس عمرپائی اور تصانیف کا سلسلہ بیس برس کی عمر میں شروع کیا۔ انہوں نے 25سال کی مدت میں 69کتابیں لکھیں۔ جن میں سے اکثر کئی کئی جلدوں پر مشتمل ہیں۔
ڈاکٹر رضی الدین صدیقی(جنوری 1908۔ جنوری 1998) کی زندگی پر ایک نگاہ دوڑائی جائے تو ان پر جینئیس کا گمان ہوتا ہے وہ ایک ہی وقت میں کئی علوم کے درجہ کمال پر فائز تھے۔ ڈاکٹر صدیقی ممتاز ریاضی دان، فلسفی، ادبی شخصیت، ماہرِ تعلیم، اسلامی تمدن کے اسکالر اور کئی زبانوں کے ماہر تھے ، انہوں نے فزکس اور کوانٹم مکینکس پر بھی مقالے تحریرکیے۔
قوتِ‌یادداشت کی ایسی مثالیں ہمیں واقعی حیران کر دیتی ہیں۔‏ ان تمام واقعات کو پڑھ کر یہ سوال پیدا ہوتاہے کہ آخر کچھ لوگوں میں ذہنی استعداد اتنی زیادہ اور کچھ لوگوں میں کم کیوں ہوتی ہے …. اس کیوں کا سادہ سا جواب ماہرین یہ دیتے ہیں کہ ایسا اس لیے ہوتا ہے کہ ہم اسے ‘‘ناممکن’’ سمجھتے ہیں جبکہ یہ ہر انسان کے لیے ممکن ہے۔

ناممکن سے ممکن تک

مثل مشہور ہے کہ ناممکن کالفظ صرف احمقوں کی ڈکشنری میں پایا جاتا ہے کوئی ایسا کام نہیں جو ممکن نہ ہوسکے۔ ہم خود اپنے ذہنی فیصلے کے مطابق کسی ممکن کو ناممکن سمجھ بیٹھتے ہیں اور پھر ٹس سے مس نہیں ہوتے اور اسے آخری فیصلہ سمجھ کر صبرو شکر کرلیتے ہیں ۔ کسی چیز کو بھول جانا اور چیز ہے اور ذہین ہونا دوسری چیز ہے۔ بھول جانے کی عادت پر قابو پانا ممکن ہے صرف اس ضمن میں کوشش کی ضرورت ہوتی ہے۔
جس طرح معدہ کو ہاضمے یا پھیپھڑوں کو سانس لینے کے لئے بنایا گیاہے ، اسی طرح قدرت نے ہمارے دماغ کو اطلاعات اور معلومات وصول کرنے، ذخیرہ کرنے اور انہیں مناسب موقع و محل پر استعمال کرنے کی صلاحیت کے ساتھ ہی تخلیق کیا ہے ۔ہر انسان کا دماغ بہت کچھ سیکھنے اور یاد رکھنے کی صلاحیت رکھتا ہے۔ اس صلاحیت کا بھرپور استعمال کرنا ہر فرد کے لیے ممکن ہے۔‏ نفسیات کے ماہرین کا کہنا ہے کہ ہر انسان کی ذہنی استعداد میں اضافہ ہوسکتا ہے بشرطیکہ وہ کوشش کرے۔ جو لوگ ہمت ہار دیں گے اور ممکن کو ناممکن سمجھ بیٹھیں گے تو لازماً وہ دوسروں سے پیچھے رہ جائیں گے۔ لہٰذا اپنے دماغ پر بھروسہ کیجیے اور اُسے وہی کچھ کرنے دیں جس کے لیے اُسے بنایا گیا ہے۔ ہم سب اپنی یادداشت کو بہتر بنانے کے قابل ہیں۔‏
ہمارے دماغ میں ایک دن کے اندر مجموعی طور پر ساٹھ ہزار خیالات آتے ہیں۔ اس ہجوم میں ایک آدھ بات کو بھول جانا معمول کی بات ہے۔ سائنس دانوں کا کہنا ہے کہ انسانی ذہن کی استعداد میں خود بخود اضافہ بھی ہوتا رہتا ہے اور اس کے اندر تبدیلیاں بھی واقع ہوتی رہتی ہیں۔ اس کی استعداد پر منحصر ہے کہ آپ اسے استعمال کس طور پر کرتے ہیں۔
کچھ آسان، قابل عمل فطری طریقے ایسے ہیں جن کے ذریعے دماغی یا ذہنی صلاحیتوں میں اضافہ ہوسکتا ہے۔ آپ کی یادداشت تیز اور سوچ وبچار کی صلاحیت بڑھ سکتی ہے۔

(جاری ہے)