گھر خاندان

‘‘میرے ابو بہت گرم چائے پیتے ہیں،  اتنی گرم کہ کپ میں انڈیلتے ہی غٹاغٹ پی جاتے ہیں۔’’

تین بچے اپنے کلاس روم میں بیٹھے فری پیریڈ کا فائدہ اٹھا کر گپیں ہانک رہے تھے۔ پہلے بچے کا یہ جملہ سن کر دوسرا فوراً بولا ‘‘یہ تو کچھ بھی نہیں میرے ابو تو چائے کپ میں نکالنے کی زحمت بھی نہیں کرتے بلکہ کیتلی سے ہی منہ لگا لیتے ہیں۔’’ اب تیسرے کی باری تھی جو ایک ایسا جواب سوچ رہا تھا کہ جو ان دونوں سے مختلف ہو، پھر اس نے برجستہ  کہا ‘‘ارے بھئی! میرے ابو سے زیادہ گرم چائے  کوئی نہیں پی سکتا’’ ،  ‘‘وہ کیسے….؟’’ دونوں بچوں نے بیک وقت پوچھا ‘‘کیونکہ میرے ابو چینی پتی کھا کر چولہے پر سے گرم پانی اٹھا کر اپنے منہ میں ڈال لیتے  ہیں’’….

یہ تو محض ایک لطیفہ ہے، لیکن اس سے یہ بات واضح ہو رہی ہے کہ بچوں کے مزاج میں کس قدر انفرادیت ہوتی ہے۔ اکثر بچے ایسے چیزیں پسند کرتے ہیں جو دوسروں سے اچھی ہوں۔ مثلاً اگر بچے کے کسی دوست کی برتھ ڈے پارٹی ہو تو وہ چاہتا ہے کہ اس کے لیے بھی اس سے اچھی پارٹی دی جائے…. کسی دوست یا رشتے دار کے کوئی کپڑے یا جوتے پسند آجائیں تو وہ بھی اس سے اچھے کپڑے یا جوتے لینے کی فرمائش کرتا ہے، اسی طرح اگر کسی بات پر بچے کی تعریف ہوتی ہے تو وہ بھی چاہتا ہے کہ لوگ اس کی تعریف کریں۔ مختصر یہ کہ بچہ ایسی خواہشات رکھتا ہے جو کہ منفرد ہوں اور ایسی چیزیں حاصل کرنا چاہتا ہے جس کی سب تعریف کریں۔ ان  کے حصول کے لیے ہر بچہ مختلف اظہار کا استعمال کرتا ہے۔ اظہار کا یہ فرق بچے  کے مزاج کی وجہ سے ہے کیونکہ ہر بچے کا مزاج مختلف ہوتا ہے۔ بچوں کی تربیت کا یہ ایک اہم نکتہ ہے کہ والدین بچے کے مزاج  کو سمجھیں۔

بچے اپنے اپنے مزاج کے لحاظ سے شرارتی، چلبلے، باتونی، ضدی، ہٹ دھرم، معصوم، متجسس، ڈرپوک، تخیل پسند یا کم گو وغیرہ وغیرہ ہوسکتے ہیں۔ یہ بھی درست ہے کہ ہر بچہ ان تمام رویوں کا اظہار مختلف اوقات میں کرتا ہے مثلاً کبھی وہ شرارت کرتا ہے، تو کبھی معصوم بن جاتا ہے، کبھی ضد کرکے اپنی کوئی بات منوا لیتا ہے  تو کبھی نرمی سے بات سمجھ کر مان لیتا ہے۔  اس لحاظ سے کہا جاسکتا ہے کہ بچہ کا مزاج موقع اور ماحول کے لحاظ سے بدلتا رہتا ہے…. البتہ کوئی نہ کوئی مخصوص مزاج بچے کی طبیعت پر  اکثر غالب رہتا ہے۔

بچوں کی تربیت کے حوالے سے ان کے مزاج کو سمجھنے کی  بہت اہمیت ہے۔ بچوں کی تربیت اس طرح ہو کہ  انہیں علمی،  اخلاقی اور شعوری بالیدگی کے لیے  معلومات ان کے مزاج کی مناسبت سے فیڈ Feed کی جاتی رہیں۔ آئیے اب چند مختلف مزاج کے بچوں اور ان کی تربیت کے کچھ اصولوں پر روشنی ڈالتے ہیں۔

سائنس دان کھوجی بچے

ایک بچے نے جیسے ہی جہاز میں لگا ہوا ایک بٹن آن کیا تو اس کے ہاتھ میں ہلکی سی لرزش ہوئی اور جہاز کی آواز سماعت سے ٹکرائی۔ اس نے جہاز زمین پر رکھا اور تالی بجا کر خوشی کا اظہار کیا۔ اب جہاز فرش پر ادھر ادھر اپنے مدھر میوزک کے ساتھ دوڑ  رہا تھا۔ دیوار سے ٹکرا کر خود ہی مڑ جاتا اور پھر اچانک رک کر پنکھے کی طرح گھومنا شروع کردیتا۔ بچہ یہ سب بڑے شوق سے دیکھ رہا تھا۔ اس کے اردگرد بیٹھے سب لوگ کبھی جہاز کو اور کبھی اسے دیکھتے رہے۔ پھر یہ معمول بن گیا کہ جب بھی بچہ روتا تو اس کے آگے یہ کھلونا رکھ دیا جاتا یوں وہ روتے روتے ہنسنا شروع کردیتا۔ ایک دن وہ بچہ اس روٹین سے بور ہوگیا…. 

ا س نے چلتے ہوئے جہاز کو فرش پر زور زور سے مارنا شروع کردیا  یہاں تک کہ وہ جہاز ٹوٹ گیا۔ شاید اس کے تجسس نے اسے یہ سوچنے پر مجبور کردیا تھا کہ یہ کھلونا آخر چلتا کیسے ہے، مڑتا کیوں ہے اور پھر رک کر پنکھے کی مانند کس طرح گھوم جاتا ہے….؟

اکثر بچوں میں ایسی عادات کا مشاہدہ کیا گیا ہے کہ اگر انہیں کھیلنے یا دل بہلانے کے لیے  کوئی کھلونا یا کوئی بھی چیز دی جائے تو کچھ دن تو اس سے کھیلتے ہیں۔ اس کے بعد  توڑ پھوڑ کر اس کا ستیاناس کردیتے ہیں۔ ایسا عموماً وہ بچے کرتے ہیں جن کے مزاج میں غصہ کا عنصر زیادہ ہو یا پھر وہ غور و فکر زیادہ کرتے ہیں۔

کبھی کبھی یہ غور و فکر یا تجسس شدید ہو جاتا ہے۔ ایسے بچوں میں  چیزوں کے اندرونی نظام کو جاننے کی خواہش بڑھ جاتی ہے۔ یہ تجسس بچوں کو  ہر چیز کے پیچھے چھپی ہوئی حقیقت جاننے پر اکساتا رہتا ہے۔

ایسے بچوں کی حوصلہ فزائی بہت ضروری ہے۔  انہیں نت نئی رنگ برنگی چیزیں لاکر دیں۔ دیکھا گیا ہے کہ ایسے بچے عموماً ایسے کارٹونز یا دیگر پروگرامز  پسند کرتے ہیں جن میں تخلیقی پہلو نمایاں ہو۔

انہیں سائنس فکشن فلموں کا بےچینی سے انتظار رہتا ہے۔ اپنی متجسس طبیعت کے باعث ایسے بچے  سوالات بھی بہت کرتے ہیں۔ ان کے سوالات کے جوابات اس طرح دیں کہ  بڑے ہونے پر  یہ ارتکاز توجہ کی عادت  اور متجسس مزاج ان کی صلاحیتوں کو ابھار سکے۔

ضدی بچے

 ایسے بچے چاہتے ہیں کہ کوئی بھی خواہش ان کے منہ سے نکلنے کے بعد فوراً پوری کردی جائے۔ یہ رویہ اکثر والدین کے لیے بعض اوقات زحمت کا باعث بن جاتا ہے۔ والدین بچے کی کچھ  خواہشات کو تو پورا کرتے ہیں اور بعض کسی وجہ سے پوری نہیں کرپاتے۔ ایسے بچوں کی اگر کوئی خواہش پوری نہیں ہوتی تو وہ ضد کرتے ہیں، روتے ہیں، چیختے چلاتے ہیں، چیزیں توڑتے ہیں یا پھر ایک کونے میں بیٹھ کر ‘‘روں…. روں…. ری…. ری’’ کرتے رہتے ہیں۔ یہ پروگرام اس وقت تک جاری رہتا ہے جب تک ان کی خواہش پوری نہ کردی جائے۔ اکثر یہ بھی مشاہدہ میں آیا ہے کہ ایسے بچے جب روتے ہیں تو ان کی آنکھوں  میں آنسو کا ہلکا سا شائبہ تک نہیں ہوتا۔ گویا بعض اوقات رونے کو وہ اپنی خواہش کی تکمیل کے لیے بطور حربہ استعمال کرتے ہیں۔ ایسے بچوں کی یہ بھی خواہش ہوتی ہے کہ ہر ایک انہیں اہمیت دے یعنی جب وہ کہیں کہ ان کے ساتھ کھیلو تو سب ان کے ساتھ کھیلیں، انہیں باہر جانے کی خواہش ہو تو باہر لے کر جائیں۔ اگر یہ سب کچھ نہ ہو تو وہ مصنوعی خفگی کا اظہار کرتے ہیں یا رونا دھونا شروع کردیتے ہیں۔

بچوں میں ضد کو ختم کرنا اس لیے ضروری ہے  تاکہ وہ مستقبل کے چیلنجوں اور تلخ حقائق کا مردانہ وار سامنا کرسکیں۔ ضد کی  عادت پختہ ہوجائے تو شخصیت کے بگاڑ کا باعث بن سکتی ہے۔  دانش مندی کا تقاضہ تو یہی ہے کہ بچہ کی ہر ضد پوری نہ کی جائے، اس کے رونے یا مچلنے کی پرواہ نہ کی جائے، بچے کو جب اس بات کا یقین ہوجاتا ہے کہ رونے سے جو چیز وہ مانگتا ہے اسے نہیں ملے گی تو بالآخر وہ چپ ہوجائے گا۔ بچہ جب چپ ہوجائے تو پھر اس کی خواہش اگر وہ مناسب اور بےضرر ہو تو پوری کردیں۔ بچے کی ایسی معصوم خواہشات کی تکمیل  کرنا جن  سے ان کی شخصیت میں نکھار پیدا ہو ضروری ہے، لیکن اس رویے کی حوصلہ شکنی کرنا بھی ضروری ہے۔  جس سے ان کے ضدی  پن کی تسکین ہوتی ہو۔

فلسفی و محقق بچے

اس قسم کے بچے ہر چیز اور ہر بات میں  سچ یا حقیقت جاننے کی کوشش کرتے ہیں۔ ایسے بچے اکثر خوشگوار حیرت  میں مبتلا کردیتے ہیں۔ ان کے سامنے کوئی بات کی جائے، اس کے بارے میں سوچتے ہیں اور حقائق جاننے کی کوشش کرتے ہیں۔  ایسے بچے سیدھی سادی اور بامقصد گفتگو پسند کرتے ہیں۔  ایسے بچے بڑے  ہو کر اپنی قائدانہ صلاحیتوں سے سب کو متاثر  کرسکتے ہیں۔ والدین، اساتذہ اور دیگر  عزیز و اقارب کے لیے ضروری ہے کہ ان کے اس مزاج کی حوصلہ افزای کرتے ہوئے ان کے لے بھی سائنس دان بچوں جیسا ماحول فراہم کریں تاکہ ان کی غور و فکر اور تحقیق  و جستجو کی صلاحیت کو جلا مل سکے۔

بزدل اور ڈرپوک بچے

دو سال سے پانچ سال تک کی عمر کے بعض بچوں کو خواہ مخواہ کے ڈر لاحق ہوجاتے ہیں۔ اندھیرے کا خوف، خواب میں ڈر جانا، خوفناک فلم دیکھ کر ایک عرصے خوف میں مبتلا رہنا وغیرہ۔  یہ بھی دیکھا گیا ہے کہ اگر کسی چیز سے بچے  کو نقصان پہنچ جائے تو  وہ آئندہ ایک طویل عرصے تک  اس سے ڈرنے لگتا ہے مثلاً چھری، گرم استری، قینچی وغیرہ۔ ایک بچہ تو پیاز کے چھلکوں سے بھی ڈر جاتا تھا۔ یعنی کوئی بھی شئے اگر غیر حقیقی یا غیر فطری طور پر ایسے بچوں کےسامنے آجائے تو وہ اس سے بھی ڈر سکتے ہیں۔  بعض بچوں میں اس طرح کے خوف عمر بڑھنے کے بعد بھی اکثر قائم رہتے ہیں۔

یہ بات بھی مشاہدے میں آتی ہے کہ بچوں کو ڈرپوک اور بزدل بنانے میں اکثر والدین اور بہن بھائیوں کا بھی ہاتھ   ہوتا ہے۔ دیکھا گیا ہے  عموماً خواتین چھپکلی، لال بیگ اور چوہوں وغیرہ سے ڈرتی ہیں۔ یہ ڈر  بعض اوقات اس قدر  شدید ہوتا ہے کہ وہ انہیں دیکھ کر چیخیں مارنا شروع کردیتی ہیں۔ انہیں اس وقت تک سکون نہیں ملتا جب تک گھر کا کوئی فرد چھپکلی یا لال بیگ کو مار نہ دے۔ اگر مارنے کی مہم ناکام ہوجاے اور لال بیگ یا چھپکلی کہیں چھپ کر بیٹھ جائے تو پھر وہ پوری رات خوف میں مبتلا رہتی ہیں اور بےچین ہو کر کروٹیں بدلتی رہتی ہیں۔ بچہ جب یہ محسوس کرتا ہے کہ ان کے بڑے بھی ان سب  چیزوں سے ڈرتے ہیں تو اس کے ذہن میں بھی یہ خوف منتقل ہوجاتا ہے کہ یہ چیزیں خطرناک ہیں…. بڑوں کو چاہیے کہ وہ خود بھی ایسے خوف سے باہر آئیں تاکہ بچوں کے خوف کو دور کرسکیں…. بھئی ذرا پہلے  آپ خود کو دیکھیں اور پھر چھپکلی، لال بیگ اور چوہے وغیرہ کو…. کیا اوسطاً پانچ فٹ کچھ انچ کے انسان کو چند انچ کے ان کیڑے مکوڑوں سے ڈرنا زیب دیتا ہے….

ذہین بچے

 ایسے بچے جو ہر سال امتحان میں نمایاں نمبروں سے پاس ہوتے ہیں، ٹیچرز کی ہر بات بہت جلدی سمجھ لیتے ہیں، جو کچھ پڑھتے ہیں وہ جلد  ذہن نشین بھی کرلیتے ہیں، ہر بات کو بہت  گہرائی میں جاکر سوچتے ہیں، ہر موضوع پر طویل گفتگو  کرسکتے ہیں، ماں باپ، بہن بھائیوں کے علاوہ اپنے ٹیچرز اور دیگر عزیز و اقارب سے اعتماد کے ساتھ گفتگو کرتے ہیں، ایسے بچے  اپنے مزاج کے اعتبار سے ذہین بچوں کی لسٹ میں آتے ہیں۔ بچوں کو ایسی گراں قدر صفات کا حامل بنانے میں والدین اور اساتذہ کی اچھی تربیت کا بھی بہت ہاتھ ہوتا ہے۔  اس طرح کے بچوں کو تعلیمی میدان کے علاوہ پریکٹیکل زندگی کے متعلق بھی رہنمائی فراہم کی جانی ضروری ہے۔

بےوقوف بچے

ایسے بچے عموماً کم گو، گم سم رہنےو الے ، شرمیلے ہوتے ہیں۔  یہ بچے ذہین بچوں سے بالکل مختلف ہوتے ہیں۔ یعنی تعلیمی میدان میں پیچھے رہتے ہیں، کھیلوں سے تو عموماً انہیں دلچسپی ہی نہیں ہوتی، ٹیچرز ان کو سمجھاتے  سمجھاتے تھک جاتے ہیں لیکن بات ان کے ذہن نشین ہی نہیں ہوتی…. ایسے بچوں کو والدین اور اساتذہ کی بھرپور توجہ اور محبت کی ضرورت ہوتی ہے۔ والدین، اساتذہ اور دیگر عزیزوں کو ان کے  قریب آکر بھرپور پیار اور محبت سے ان کی مدد اور حوصلہ افزائی کرنی چاہیے تاکہ ان کا اعتماد بحال ہو۔ دیکھا گیا ہے کہ عدم توجہ یا احساس کمتری کی وجہ سے ایسے بعض بچے بےوقوفی کی حد تک کند ذہن ہوجاتے ہیں۔

آرٹسٹ بچے

چار پانچ بچیوں نے شام کے وقت گھر کے ایک کمرے کو کلاس روم بنا دیا۔ دیوار پر آویزاں تصویری فریم کو الٹا کر کے بلیک بورڈ کا کام لیا جارہا ہے جس کے ساتھ ایک بچی ایک  ہاتھ میں کتاب اور ایک ہاتھ میں اسٹک لیے کھڑی تھی اور باقی بچیاں نیچے بیٹھی ہوئی تھیں۔ ‘‘تو ہم آج کا سبق شروع کرتے ہیں’’…. بلیک بورڈ کے ساتھ کھڑی بچی نے جو اس وقت ٹیچر بنی ہوئی تھی، کلاس شروع کی۔

‘‘لیکن شمائلہ پہلے مس رضیہ کی طرح چشمہ تو لگاؤ….’’ اسٹوڈنٹ بچیوں میں سے کسی ایک نے کہا تو وہ  ‘‘اچھا ہاں!’’ کہتی ہوئی فوراً چشمہ ڈھونڈنے لگی۔ اس طرح ہمیں پتہ چلا کہ یہ کمبائن اسٹڈی نہیں بلکہ اپنی کلاس ٹیچر کی نقل اتاری جارہی ہے۔  اس نے ایک چشمہ پہن کر پھر کچھ کہا تو دوسری بچی نے فوراً مداخلت کی ‘‘یہ چشمہ تمہارے چہرے پر سوٹ نہیں کر رہا، مس رضیہ تو اپنے منہ سے بڑا چشمہ لگاتی ہیں’’…. پھر اس نے اپنے منہ سے بڑا اور اپنی ٹیچر کے حلیے سے ملتا جلتا چشمہ پہن کر بولنا شروع کیا ‘‘ہمیں بچوں سے پیار کرنا چاہیے، ان کا خیال رکھنا چاہیے۔  اللہ میاں بھی ان لوگوں کو پسند کرتے  ہیں جو بچوں سے نرمی اور پیار سےپیش آتے ہیں۔’’ اس دوران بار بار وہ اپنی ناک کو مخصوص انداز میں سیکٹر رہی تھی شاید یہ بھی ان کی مس کا اسٹائل ہو۔ سب بچیاں اس کی اداکاری سے لطف اندوز ہو رہی تھیں اور شمائلہ بولے جارہی تھی….

اے گڑیا تمہاری توجہ کہاں ہے، یہ کیا کھسر پھسر لگا رکھی ہے۔  چلو اپنی بینچ پر کھڑی ہوجاؤ’’….

یہ حکم صادر کرتے ہوئے اس نے گڑیا کے ہاتھ پر اسٹک بھی ماری۔ کیا یہ بھی ان کی کلاس  ٹیچر کی شخصیت کا خاصا تھا….؟

بچے ہر رویے کو محسوس کرتے ہیں خواہ وہ مثبت ہوں یا منفی…. اور اس کا اظہار کسی بھی طریقے سے کردیتے ہیں۔

اس واقعے سے ایک بات کی نشاندہی مزید ہوتی ہے کہ بعض بچوں کے اندر کہیں نہ کہیں ایک آرٹسٹ چھپا ہوا ہوتا ہے جو زندگی کے کرداروں اور واقعات پر غور و فکر کرکے کسی نہ کسی کینوس پر پیشکرتا ہے۔

ایسے بچے جمالیاتی ذوق کے مالک ہوتے ہیں۔ اداکاری، شعر و ادب اور آرٹ میں بھرپور دلچسپی لیتے ہیں۔ ان کی اچھی تربیت کے لیے ضروری ہے کہ انہیں پھولوں اور خوبصورت مناظر کی تصاویر لاکر دی جائیں۔  ڈرائنگ اور پینٹنگ کے لیے وسائل فراہم کیے جائیں۔ اسکول کے ڈراموں اور دیگر تقریبات میں حصہ لینے پر حوصلہ افزائی کی جائے۔

معصوم بچے

ایک دن ہمارے خاندان کے بہت سے افراد  ماموں کے گھر بیٹھے ان کی شادی کی البم دیکھ رہے تھے۔ سب لوگ تصویریں دیکھ کر پرانی یادیں تازہ کررہے تھے۔   کچھ یہ کہہ رہے تھے  کہ ہم پہلے کتنے چھوٹے تھے اور اب کتنے بڑے ہوگئے ہیں، اس وقت کے دلچسپ واقعات سنا رہے تھے اور انجوائے کر رہے تھے کہ اچانک ہمارے ماموں کے بیٹے نے جو اس وقت بمشکل چھ سال  کا تھا، اسے اس البم میں اپنی کوئی تصویر نظر نہیں آئی، وہ کہنے لگا میں بھی تو اس وقت بہت چھوٹا ہوں گا….؟’’

 اس کے لہجے میں اس قدر معصومیت تھی کہ سب ہی بےساختہ ہنس پڑے،  خود ممانی جان بھی چہرے پر  ہاتھ رکھ کر ہنس رہی تھیں۔ اس کے سوال کا جواب تو کسی کے پاس نہیں تھا مگر اس کی معصومیت پر قربان جانے کو دل چاہ رہا تھا۔

جو بچے معصوم ہوتے ہیں ان کی شرارتیں بھی بڑی معصوم سی ہوتی ہیں۔

بچوں کی ہر سطح پر تربیت ضروری ہے ان کو مذہبی، علمی، عملی، اخلاقی، سائنسی، معاشرتی، معاشی، ثقافتی اور فنی علوم کے حوالے سے بھرپور تربیت دیں اس تربیت کے دوران  اس بات کا خاص طور پر خیال رکھنا بہت ضروری ہے کہ بچے کی معصومیت ختم نہ ہونے پائے…. دیکھا گیا ہے کہ بعض بچے جو اپنی عمر سے بڑی بڑی باتیں کرتے ہیں، بعض اوقات وہ تشدد پسند یا تکلیف دہ حد تک شرارتی ہوجاتے ہیں یا کسی اور بری عادت میں مبتلا ہوجاتے ہیں۔ اسی طرح بچے کی معصومیت اس کا زیور  ہوتی ہے۔ چہرے کا یہی حسن اور بھولپن اس کو ممتاز اور نمایاں کرتا ہے۔ اس معصومیت کی حفاظت بچے سے جڑے ہر فرد کا اہم نصب ا لعین  ہونا چاہیے۔

بچوں کا مزاج خواہ جیسا بھی ہو، معصومیت ہر بچے میں ہوتی ہے۔ جس طرح ایک اداکار اپنے سین کی ڈیمانڈ کے مطابق اپنے چہرے کے تاثرات  بدلتا ہے بلکہ اسی طرح بچے بھی موقع محل کی مناسبت سے اپنے مزاج میں تبدیلی لاتے ہیں لیکن  ہر بچے کا اپنا ایک مخصوص مزاج ضرور ہوتا ہے۔

بچوں کی اچھی تربیت کے لیے ضروری ہے کہ ان کے مزاج کے اتار چڑھاؤ کو سمجھا جائے اور جس وقت جو مزاج ان پر غالب ہو اسی کو مد نظر رکھ کر تربیت کی جائے۔ اس کے لیے سب سے ضروری چیز یہ ہے کہ آپ اپنے بچوں کو وقت دیں تاکہ وہ آپ کی محبت کو محسوس کرسکیں، آپ کی شخصیت کےمثبت پہلوؤں سے روشناس رہیں اور انہیں اپنے تحفظ کا احساس ہوتا رہے۔

حضرت علی کرم اللہ وجہہ کا فرمان ہے کہ اپنے بچوں کی تربیت اپنے دور کے مطابق نہ کرو بلکہ آنے والے وقت کے لحاظ سے کرو کیونکہ انہیں ایسے زمانے کے لئے پیدا کیا گیا ہے جو تم سے مختلف ہے۔  

ماہنامہ روحانی ڈائجسٹ مئی 2021ء اولاد نمبر سے انتخاب

بچوں کی اچھی تربیت و تعلیم کے لیے اولیاء اللہ سے رہنمائی

صوفیا، اولیاء کرام اور بعض دیگر مشاہیر کی زندگیوں پر غور کیا جائے تو ان کی ابتدائی تربیت میں والدین کا کردار نہایت اہم نظر آتا ہے۔ ان کی روحانی طرزفکر بننے میں بھی گھر کے ماحول خصوصاً والدین کا بہت حصہ ہے۔
طرزِفکر کی تشکیل کا عمل پیدائش سے پہلے ہی شروع ہوجاتا تھا۔ پھر والدین بچے کے اخلاقی و روحانی جوہر ابھارنے میں خاص کردار ادا کرتے ہیں ۔ شعور سنبھالنے کے بعد ایسے لوگ جب کسی روحانی اُستاد کی شاگردی اختیار کرتے تو روحانی منازل طے کرنا ان کے لیے زیادہ آسان ہوجاتا۔
ایک صاحب کی شادی ہوئی۔ یہ صاحب نرم مزاج تھے جبکہ بیگم بہت غصے والی۔ ان کے بچوں میں ایک بچہ بالکل والد کی طرح نرم مزاج تھا جبکہ ایک لڑکا اور لڑکی میں ماں کی غصیلی طبیعت منتقل ہوئی۔ والدین کی سوچ اور طرز فکر منتقل ہونے کی بہت سی مثالیں دیکھی جاسکتی ہیں۔
علم نفسیات میں ایک واقعہ بہت مشہور ہے۔ ایک انگریز ماں کے بطن سے ایک ایسا بچہ پیدا ہوا جس کے نقش و نگار اور رنگ حبشی نژاد بچوں کی طرح تھا۔ موٹا ناک نقشہ، گھونگریالے بال، سیاہ رنگ۔ اس بچے کے رنگ و روپ پر ماں باپ دونوں ہی بہت حیران ہوئے۔ انہوں نے اور ان کے خاندان والوں نے سوچا کہ ایسا کیونکر ہوا۔ کئی ٹیسٹ اور دیگر تحقیق کے بعد یہ راز کھلا کہ حمل کے زمانے میں ماں جس کمرے میں رہتی تھی وہاں دیوار پر ایک سیاہ فام حبشی بچے کا فوٹو آویزاں تھا۔
بڑے بڑے نفسیات داں، دانشوروں اور ڈاکٹرز کا بورڈ بیٹھا ۔ ان کے باہمی صلاح مشورے سے یہ بات طے پائی کہ عورت حمل کے زمانے میں بار بار حبشی بچے کی اس تصویر کو دیکھتی رہی تھی، دیکھنے میں اتنی گہرائی پیدا ہوگئی کہ اس کے تصورات پیٹ میں موجود بچے کو منتقل ہوگئے۔
دوسرا تجربہ یہ کیا گیا کہ آئندہ جب وہ امید سے ہوئی تو وہاں ایک بہت خوبصورت بچے کا فوٹو آویزاں کیا گیا اور تجرباتی بنیادوں پر ماں کو ہدایت کی گئی کہ اس فوٹو کو زیادہ سے زیادہ دیکھا جائے۔ اس کا نتیجہ یہ برآمد ہوا کہ پیدا ہونے والے بچے کے نقوش تقریباً وہی تھے جو دیوار پر آویزاں بچے کی تصویر کے تھے۔
اس واقعے سے یہ پتہ چلتا ہے کہ حمل کے دوران ماں کے جذبات و احساسات بچے پر کس طرح اثرانداز ہوتے ہیں۔ ماں کی سوچ یا طرزِ فکر کا اثر بچے پر پڑتا ہے۔ ماں اور باپ کی اکثر عادتیں بچے میں جینیاتی طور پر منتقل ہوجاتی ہیں۔
روحانی سائنس بتاتی ہے کہ ذہن میں دو قسم کے نقوش ہوتے ہیں۔ ایک قسم کے اندر لطیف انوار کا ذخیرہ ہوتا ہے۔ دوسری قسم کے نقوش کثیف جذبات کے ہوتے ہیں۔ کثیف جذبات میں خود غرضی، تنگ نظری، کم ظرفی، احساس کمتری یا احساس برتری جیسے جذبات شامل ہیں۔
انسان کی طرز فکر مثبت ہے تو اس کے جسم میں صحت بخش اور پرسکون لہریں دور کریں گی اور یہی لہریں بچے کی طرزِ فکر کا حصہ بن جائیں گی۔
میڈیکل سائنس بتاتی ہے کہ ذہنی طور منتشر اور پریشان ماؤں کے ہاں ہونے والے بچے خوفزدہ ہوسکتے ہیں۔ اس لیے ماؤں کو ہدایت کی جاتی ہے کہ وہ دورانِ حمل ذہنی طور پر ریلیکس رہیں۔ باپ کا یہ فرض ہے کہ وہ اپنی حاملہ بیوی کو پرسکون ماحول فراہم کرے۔ والدین خصوصاً ماں کی سوچ بچے پر بہت زیادہ اثر انداز ہوتی ہے۔
ماں اور باپ کے خیالات اور طرز فکر بچے کی جین کا حصہ ہوتے ہیں۔ شوہر اور بیوی کے خلیات مل کر جب نئی تخلیق عمل میں آتی ہے تو باپ اور ماں کی طرز فکر کا اثر اس میں پایا جانا لازمی ہے۔ اگر میاں بیوی کی سوچ میں پیغمبرانہ اور روحانی طرزفکر موجود ہے تو تخلیق کی ابتداء میں ہی طرزفکر کا یہ عکس اگلی زندگی میں بھی منتقل ہوسکتا ہے۔ اگر میاں اور بیوی کی طرز فکر میں تخریب ہے تو اس کا اثر بھی نئی نسل کو منتقل ہوسکتا ہے۔
اولاد کی ذہنی و جسمانی تخلیق میں ماں اور باپ دونوں کا حصہ ہوتا ہے لیکن اس میں ماں کا شیئر زیادہ ہوتا ہے۔
بعض علمائے باطن تو یہاں تک فرماتے ہیں کہ اولاد کو نوے فیصد ذہن ماں کا منتقل ہوتا ہے۔ اس لیے بچے کی ذہنی تربیت اور اسے روحانی اقدار سے آشنا کرانے میں ماں کا کردار بھی بہت زیادہ ہوتا ہے۔ یہ ذہن نشین رکھنا ضروری ہے کہ جینیاتی کوڈ میں طرز فکر محفوظ ہوجاتی ہے اور یہ اگلی نسلوں میں منتقل ہوتی رہتی ہے۔
سائنس دان یہ بات جان چکے ہیں کہ پیدائش سے بہت پہلے ہی بچہ کے دماغ میں خلیوں کی چارجنگ شروع ہوجاتی ہے۔1997ء کے اوائل میں ایک سائنسی پیش رفت کا چرچا رہا جس سے معلوم ہوا کہ نوزائیدہ بچہ کا دماغ کورا کاغذ یا صاف سلیٹ کی مانند نہیں ہوتا بلکہ اس کے دماغی خلیات جن کا براہِ راست تعلق کارکردگی سے ہے، پیدائش سے پہلے ہی اپنا کام شروع کردیتے ہیں۔
بچے کے سیکھنے اور یادداشت کا نظام رحمِ مادر میں ہی فعال ہوجاتا ہے۔ دماغ پیدائش سے قبل انسانی ضروریات سے متعلق سرکٹ کی تکمیل میں لگا ہوتا ہے۔ یوں سماعت، بصارت، گویائی وغیرہ کے لئے وہ پہلے ہی پروگرامنگ شروع کردیتا ہے۔
اب یہ والدین، رشتہ داروں اور معاشرہ پر منحصر ہے کہ وہ بچے کے دماغ میں موجود مختلف پروگراموں میں سے کتنے پروگرامز آن کرتے ہیں۔ مثال کے طور پر اگر کسی بچے کی پیدائش کے بعد تین سال تک اس کے ہاتھ کو اس طرح باندھ کر چھوڑدیا جائے کہ وہ حرکت ہی نہ کرسکے تو بعد میں ہاتھ کھولنے کے بعد بھی بچے کا ہاتھ ساری زندگی مفلوج رہے گا ، اس کی وجہ یہ ہے کہ دماغ نے اس ہاتھ سے متعلق جو پروگرامنگ کی تھی اسے آن نہیں کیا گیا۔ اس سلسلے میں سائنس دان مختلف تجربات میں مصروف ہیں۔
اٹلی کے ایک شہر میں ایک خاتون نے اپنی ایک منت پوری کرنے کے لئے اپنے بچے کی ایک آنکھ پر چند ماہ کے لیے پٹی باندھ دی۔
بچہ کچھ بڑا ہوا تو خاتون کو احساس ہوا کہ اس بچے کی وہ آنکھ ٹھیک کام نہیں کررہی جس پرپٹی باندھی گئی تھی۔ پریشان ماں نے اسے کئی ڈاکٹروں کو دکھایا۔ ڈاکٹرز کسی تسلی بخش نتیجے پر نہ پہنچ سکے۔ پھر دنیا کے کئی ماہر ڈاکٹروں کے سامنے یہ کیس آیا۔ اس بچے کی آنکھ کا کئی طرح معائنہ کیا گیا ۔ بظاہر اس کی آنکھ میں کوئی خرابی نہ تھی۔ اس بچے کی ایک آنکھ کا نابینا پن ڈاکٹروں کے لئے معمہ بن گیا تھا۔ آخرکار ایک ماہر نیورولوجسٹ طویل تحقیق کے بعد معاملہ کی تہہ تک پہنچ گیا۔
جدید آلات کے ذریعے پتہ چلا کہ آنکھ کے اعضاء اور اعصاب تو نارمل ہیں لیکن دماغ میں وہ خلیات مردہ ہوچکے ہیں جو بینائی کی اطلاع وصول کرتے ہیں۔ پیدائش کے بعد ان خلیات کو کام کرنے کا موقع نہ مل سکا لہٰذا کچھ ہی عرصہ میں ان خلیات نے اپنا کام کرنا چھوڑ دیا۔ مزید چند ماہ میں یہ خلیات مردہ ہوگئے اور اس طرح بچہ آنکھ کے اعضاء و اعصاب صحیح ہونے کے باوجود ایک آنکھ کی بینائی سے محروم ہوگیا۔
بچے کو روحانی طرزِ فکر پر گامزن کرنے کی ابتداء بھی اس کی پیدائش سے پہلے ہی شروع ہوجاتی ہے۔ ایک روحانی انسان بننے میں بچے کی ماں کا کردار بہت اہم ہے۔ کتنے ہی اولیائے کرام کے ایسے واقعات موجود ہیں کہ جن میں ماں کی طرزِ فکر اور تربیت کا حصہ نمایاں ہے۔ماں کے ساتھ ساتھ بچے میں باپ کی طرزِ فکر کا بھی حصہ ہے۔ کئی بڑے اولیاء کرام کے حوالے سے شواہد ملتے ہیں کہ ان کے والدین، دادا دادی یا نانا نانی میں سے اکثر پیغمبرانہ طرز فکر پر گامزن تھے یا خود اﷲ کے دوستوں میں ان کا شمار ہوتا تھا۔
اس عالمِ رنگ و بو میں آنے کے بعد بچہ کی تربیت یا سیکھنے Learningکا نیا دور شرو ع ہوتا ہے۔ اس ابتدائی دور میں بھی ماں کا کردار اہم ہے۔
حضرت با با فرید گنج شکرؒ کے والد کا انتقال آپؒ کے بچپن میں ہی ہوگیا تھا۔ آپ کی ابتدائی تربیت آپ کی والدہ نے کی۔ والدہ نے چاہا کہ بچہ کا نماز میں اﷲ تعالیٰ سے تعلق قائم ہوجائے۔ بچہ میں نماز کا شوق بڑھانے کے لیے وہ محترم خاتون یہ کرتیں کہ جائے نماز کے نیچے ایک پڑیا میں شکر رکھ دیتیں اور فرمایا کرتیں کہ جو بچے نماز قائم کرتے ہیں انہیں روزانہ شکر مل جاتی ہے۔
فرید الدین مسعود نماز ادا کر کے جائے نماز کا کونا الٹتے تو وہاں شکر موجود ہوتی۔ فرید الدین وہ شکر پا کر بہت خوش ہوتے۔
ایک روز فرید الدین کی والدہ جائے نماز کے نیچے شکر رکھنا بھول گئیں۔ اس روز نماز کے بعد جب فرید الدین مسعود نے جائے نماز اٹائی تو وہاں شکر کی پڑیا موجود تھی۔
فرید الدین کی والدہ محترمہ نے اس روز بعد میں بیٹے سے پوچھا بیٹا تم نے نماز پڑھ لی۔
فرید الدین نے جواب دیا ، جی اماں میں نے نماز پڑھ لی اور نماز کے بعد جائے نماز کے نیچے موجود شکر بھی کھائی۔
اس پر فرید الدین کی والدہ ماجدہ نے اللہ کا بہت شکر ادا کیا۔
بڑے پیر صاحب حضرت شیخ عبدالقادر جیلانی ؒ کا ایک واقعہ بھی بہت مشہور ہے۔ جب تعلیم حاصل کرنے بغداد روانہ ہوئے تو ان کی والدہ نے چند اشرفیاں ان کے لباس میں سی کر انہیں بتادیا کہ کپڑوں میں اشرفیاں موجود ہیں۔ گھر سے روانہ ہوتے وقت شیخ عبدالقادر جیلانی کی والدہ نے انہیں نصیحت کی کہ بیٹا حالات کچھ بھی ہوں جھوٹ کبھی مت بولنا۔
سفر کے دوران ڈاکوؤں نے قافلے پر حملہ کردیا۔ ایک ڈاکو شیخ عبد القادر کے پاس آیا اور پوچھا ‘‘لڑکے تیرے پاس بھی کچھ ہے’’۔شیخ عبدالقادر نے جواب دیا‘‘ہاں میرے پاس اشرفیاں ہیں۔’’ رہزنوں نے تلاشی لی مگر انہیں اشرفیاں نہ ملیں۔ رہزنوں نے جھنجلا کر کہا جھوٹ بولتا ہے۔ آپؒ نے فرمایا ‘‘نہیں۔ میرے پاس اشرفیاں موجود ہیں’’۔ دوبارہ تلاشی لی مگر رہزنوں کو دوبارہ ناکامی کا منہ دیکھنا پڑا۔ جھنجلاہٹ میں وہ شیخ کو اپنے سردار کے پاس لے گئے اور بتایا کہ یہ لڑکا ایسا ایسا کہتا ہے۔ سردار کو بھی شیخ عبدالقادر نے یہی بتایا کہ میرے پاس اشرفیاں ہیں۔ اس موقع پر سردار نے ان سے کہا ‘‘اے نوجوان تو جھوٹ بول کر اپنی ان اشرفیوں کو ہم سے چھپا سکتا تھا پھر تو نے ایسا کیوں نہ کیا؟’’
شیخ عبدالقادرنے کہا ‘‘میری والدہ کی نصیحت ہے کہ حالات کچھ بھی ہوں کبھی جھوٹ نہ بولنا’’۔ شیخ عبدالقادر کی اس بات سے ڈاکو اتنے متاثر ہوئے کہ انہوں نے قافلے والوں کا لوٹا ہوا سامان واپس کردیا اور رہزنی سے توبہ بھی کرلی۔
یہ واقعہ ہم عام طور پر سن اور پڑھ تو لیتے ہیں لیکن شاید اس کی گہرائی پر کم ہی غور کیا جاتا ہے۔ ہم جانتے ہیں کہ بچے صرف وہی باتیں قبول کرتے ہیں جو والدین کو کرتے دیکھتے ہیں۔ بڑے پیر صاحبؒ کے یقین کی سب سے بڑی وجہ یہ تھی کہ آپؒ کی والدہ نے کبھی جھوٹ نہ بولا تھا۔
یہ ہمارا عام مشاہدہ ہے کہ ہم ایک کام خود کرتے ہوں اور بچے کو وہ کرنے سے منع کریں تو نصیحت اس پر اثر نہیں کرتی۔ ایک صاحب خود سگریٹ نوشی کرتے ہوں ان کے ہاتھ میں سگریٹ ہو اور وہ اولاد کو منع کریں کہ سگریٹ مت پیئو تو بتائیے کیا ان کی نصیحت میں کوئی اثر باقی رہ جائے گا۔
اپنے بچوں کو کسی برے کام سے روکنے کا مؤثر طریقہ یہ ہے کہ بڑے خود وہ کام نہ کریں۔ والدین کی بعض عادتیں بچے غیر محسوس طریقے سے قبول کرلیتے ہیں۔ والدین جھوٹ بولتے ہوں ، غیبت و چغلی کرتے ہوں تو اولاد بھی یہی رویہ اختیار کرلیتی ہے۔ حالانکہ والدین کبھی یہ نہیں چاہتے کہ برائیاں بچوں میں منتقل ہوں نہ ہی وہ اپنے بچوں کو برائیوں کی تعلیم دیتے ہیں مگر ان کا کردار بچوں میں غیر محسوس انداز میں منتقل ہوجاتا ہے۔
اہلِ روحانیت کی تعلیمات سے یہ روشنی ملتی ہے کہ ماں باپ کی سوچ بچے کو منتقل ہوتی ہے۔ پیدائش کے بعد بھی ماں بچے کے لئے مرکزی حیثیت رکھتی ہے ۔ بچہ ہر مشکل ہر تکلیف میں ماں کی طرف ہی لپکتا ہے۔ باپ تو دن بھر ذریعہ معاش میں مصروف رہتا ہے اور بچہ کو چوبیس گھنٹے میں محض چند گھنٹے ہی دے پاتا ہے۔
بچے کی توقعات اور تصورات کا محور زیادہ تر ماں ہوتی ہے۔
اس مضمون کا بنیادی مقصد بھی ماؤں کو اس بات کی اہمیت بتانا ہے کہ بچے کو زیادہ تر ماں کا ذہن منتقل ہوتا ہے۔ باپ یعنی شوہر کو گھر میں ایسا ماحول فراہم کرنے کی ضرورت ہے جس میں بیوی یعنی ماں پرسکون اور آسودہ حالت میں بچے کی اچھی تربیت کرسکے۔ شوہر او ربیوی یعنی ماں باپ کے باہمی تعاون اور دونوں کی جانب سے ملنے والی اچھی تربیت بچہ کے مثبت کردار کی تشکیل ہوتی ہے۔
تربیت کے لحاظ سے لڑکپن کا دور بہت اہم ہے۔ اس دور میں بچپن کی تربیت بہت کام آتی ہے۔ یہ سمجھیں کہ جس طرح مضبوط بنیاد پر بڑی سے بڑی عمارت کھڑی کی جاسکتی ہے بالکل اسی طرح اگر بچپن کے حساس دور میں بچے کی تربیت اچھی طرح کی گئی تو لڑکپن میں قدرے آسانی ہوجاتی ہے۔
لڑکپن کا دور سات آٹھ سال سے بلوغت تک ہوتا ہے۔ لڑکپن کی ابتداء اس وقت سے شروع ہوجاتی ہے جب بچہ تخیلاتی تصویر کشی کے علاوہ چیزوں کو حقیقی معنوں میں دیکھنے لگتا ہے۔ اس عمر میں بچہ کی ضد کم ہونے لگتی ہے اور بات کی تہہ تک پہنچنے کی کوشش کرنے لگتا ہے۔ لڑکپن کی عمر اخلاقی اور روحانی تربیت کی عمر ہے۔ اس عمر میں بچہ ذہنی طور پر خود بھی اور والدین و اساتذہ کی باتوں سے اچھے بُرے کی تمیز کرسکتا ہے۔
دس سال سے سولہ سال تک کا بچہ زیادہ گہرائی سے اخلاقی باتیں سن اور سمجھ سکتا ہے۔ یہ دور اس لحاظ سے نازک ہے کہ بچہ سختی کرنے سے متنفر ہوسکتا ہے کیو نکہ وہ خود سوچنا اور سمجھنا چاہتا ہے۔ بڑوں کو اسے سمجھانا ضرور چاہئے مگر اپنی مرضی زبردستی مسلط کرنا فاصلے پیدا کرسکتا ہے۔
اولیاء اﷲ میں لڑکپن کا ایک واقعہ حضرت شیخ سعدی ؒ کی سوانح سے ملتا ہے۔ ایک مرتبہ حضرت شیخ سعدی ؒ اپنے والد کے ساتھ سفر میں تھے۔ اسی دوران ان کا قیام ایک مسجد میں ہوا۔ رات کے وقت والد صاحب وضو کر کے نوافل اور ذکر و فکر میں مصروف ہوگئے۔ حضرت شیخ سعدی ؒ بھی اٹھے اور وضو کیا ۔ اس دوران چند آدمی آئے اور مسجد میں آکر سوگئے۔ حضرت شیخ سعدی ؒ نے وضو کیا اور والد کے ساتھ ساری رات ذکر و فکر میں گزار دی۔ صبح اپنے والد سے کہا’’ابا جان یہ لوگ مسجد میں آکر سوتے نہیں بلکہ عبادت کرلیتے تو کتنا اچھا ہوتا۔ انہوں نے پوری رات ضائع کردی‘‘۔ والد صاحب نے فرمایا ‘‘دوسروں پر نظر رکھنے کے بجائے تمہارا بھی سوجانا بہتر ہوتا’’۔
حضرت خواجہ شمس الدین عظیمی صاحب نے اپنی دادی اماں کے حوالے سے چند واقعات کا تذکرہ کیا ہے جو بچوں پر بزرگوں کی تربیت کے اثرات کا ایک خاکہ پیش کرتے ہیں ۔ حضرت عظیمی صاحب کتاب ‘‘آوازِ دوست’’ میں تحریر فرماتے ہیں
‘‘میں نے شعور کے زینے پر پہلا قدم رکھا تو یہ دیکھا کہ دادی امّاں کی گود میں ہوں اور دادی امّاں اﷲ کے کلام کے ورد میں مگن ہیں۔ یہ بھی دیکھا کہ رات کو سونے سے پہلے کلمۂ شہادت پڑھوایا جارہا ہے اور پھر صبح بیدار ہونے کے وقت لازم تھا کہ آنکھ کھلتے ہی کلمۂ طیبہ پڑھا جائے۔ دادی اماں کہانیاں بھی سناتی تھیں۔
ہر کہانی کا ایک مفہوم ہوتا تھا کہ ہمارا تمہارا خدا بادشاہ، خدا کا بنایا رسول بادشاہ۔ اﷲ نے اپنے رسول کے پاس فرشتہ بھیجا۔
ایک نجی محفل میں سلسلہ عظیمیہ کی ایک بہن کو نصیحت کرتے ہوئے حضرت عظیمی صاحب بچے کی تربیت میں والدین اور بزرگوں کی اہمیت پر روشنی ڈال رہے تھے۔ اس موقع پر آپ نے فرمایا
’’میری دادی کی بتائی ہوئی یہ بات کہ ہمارا تمہارا خدا بادشاہ ، خدا کا بنایا رسول ﷺ بادشاہ۔ یہ بات میرے ذہن میں اس طرح نقش ہوگئی کہ اﷲ اور رسولاﷲ ﷺ کے علاوہ کسی کی بڑائی یا بادشاہت اہمیت نہیں رہی۔
یہاں ہم حضرت عظیمی صاحب کی فرمائی ہوئی ایک اور بات کا ذکر کرتے ہیں۔ آپ فرماتے ہیں
دانش ور اس بات پر متفق ہیں کہ بچے کی تربیت کا پہلا گہوارہ اس کا گھر ہوتا ہے۔ بچہ جو سنتا ہے وہی بولتا ہے اور جو دیکھتا ہے وہی اس کا علم بن جاتا ہے۔ آج کے دور میں ہم نہیں دیکھتے کہ دادی اماں نے یہ کہا ہو کہ ہمارا تمہارا خدا بادشاہ، خدا کا بنایا رسولﷺ بادشاہ۔
دن رات گانوں کی آوازیں ہمارے اعصاب پر محیط رہتی ہیں۔ رات کو سونے سے پہلے کتنی مائیں اپنے بچوں کو یہ تلقین کرتی ہیں کہ کلمہ شہادت پڑھ کر سونا چاہیے، کتنے والد اپنی اولاد کو بیدار ہونے کے بعد کلمہ طیبہ پڑھنے کے لئے کہتے ہیں۔
ایک مرتبہ خواجہ شمس الدین عظیمی کے پاس چند افراد موجود تھے۔ ان میں سے ایک صاحب نے عظیمی صاحب سے پوچھا ‘‘ہمیں بتائیے کہ اولاد کی تربیت ہم کس طرح کریں….؟’’
عظیمی صاحب نے مختصر جواب دیا
‘‘اپنی تربیت کرلیجیے…. اولاد کی تربیت خود بخود ہوجائے گی….’’
ایسے لڑکے یا لڑکیاں جنہیں آئندہ باپ یا ماں بننا ہے ان سب پر لازم ہے کہ پہلے اپنی تربیت کریں۔ اپنے اخلاق و کردار کو سنواریں اور اپنی طرز فکر درست کرلیں۔
آج ہم یہ دیکھتے یں بہت سے لڑکے اور لڑکیوں کی شادی ہوجاتی ہے لیکن ان کی ذہنی تربیت نہیں ہوئی ہوتی۔ شوہر بیوی کو دباؤ میں رکھنے کے لیے تمام ہتھکنڈے استعمال کرنا ضروری خیال کرتا ہے اور بیوی شوہر پر تسلط جمانے کی کوششوں میں مصروف نظر آتی ہے۔ ساس بہو، نند بھاوج کی لڑائیاں بھی اکثر تخریبی ذہنوں کی پیداوار ہوتی ہیں۔ لڑائی، جھگڑے، سرد جنگیں اور چپقلش…. اس ماحول میں بچے کی کیا تربیت ہوسکے گی، سب سمجھ سکتے ہیں….
اس لیے بچے کی تربیت سے پہلے ضروری ہے کہ والدین اپنی تربیت کی کوشش کریں۔