خواتین

 

ڈاکٹرسکندر شیخ مطرب ؔ کی نظم ’’ماں‘‘
امی جان محترمہ راشدہ عفت صاحبہ کو بہت پسند ہے
امی جان کی خواہش ہے کہ نظم ’’ماں‘‘ روحانی ڈائجسٹ کے قارئین تک بھی پہنچائی جائے۔

 

ایثار کا ، وفائوں کا ، عظمت کا ہے نشاں

زندہ ہے جب بھی ماں ، وہ مر جائے جب بھی ماں

ماں ساتھ ہے تو سایۂ قدرت بھی ساتھ ہے

ماں کے بغیر ایسا لگے دن بھی رات ہے

میں دُور جائوں اس کا مرے سر پہ ہاتھ ہے

میرے لیے تو ماں ہی مری کائنات ہے

پھیلا ہُوا ہے سر پہ دعائوں کا سائباں

زندہ ہے جب بھی ماں، وہ مرجائے جب بھی ماں

 

اس پر یہ دل نثار ہے ، جاں بھی نثار ہے

دنیا میں پیار ہے تو فقط ماں کا پیار ہے

اس کی محبتوں کا کہیں کچھ شمار ہے

یہ عین خاص ! رحمتِ پروردگار ہے

نعم البدل زمانے میں اس کا کوئی کہاں؟

زندہ ہے جب بھی ماں وہ مرجائے جب بھی ماں

 

دامن میں ماں کے صرف وفائوں کے پھول ہیں

ہم سارے اپنی مائوں کے پیروں کی دھول ہیں

اولاد کے ستم اسے ہنس کر قبول ہیں

بچوں کو بخش دنیا ہی ماں کے اصول ہیں

اس کی محبتوں کو کروں کس طرح بیاں

زندہ ہے جب بھی ماں ، وہ مرجائے جب بھی ماں

 

 

دن رات پال پوس کے اس نے بڑا کیا

گرنے لگا تو ماں نے مجھے پھر کھڑا کیا

دس لال اس نے پال دیے اُف نہیں کیا

ہم ایک ماں کو پال نہ پائے یہ کیا کیا ؟

قربانیوں کا نام وفائوں کی داستاں!

زندہ ہے جب بھی ماں، وہ مرجائے جب بھی ماں

 

 

ربّ ِ جہاں نے ماں کو یہ عظمت کمال دی

اس کی دُعا پہ آئی مصیبت بھی ٹال دی

قرآں میں ماں کے پیار کی اس نے مثال دی

جنت اٹھا کے مائوں کے قدموں میں ڈال دی

شفقت کا ہے ٹھکانا ! محبت کا آشیاں

زندہ ہے جب بھی ماں ، وہ مرجائے جب بھی ماں

 

بیٹی کو اس نے شرم و حیا کی قبائیں دیں

بیٹوں کو جاں لُٹانے کی اس نے ادائیں دیں

ہر وقت اس نے ہاتھ اٹھا کر دعائیں دیں

ہم بے وفا ہیں ، ماں نے ہمیں بس وفائیں دیں

احسان مند ! اس کا ہمیشہ سے ہے جہاں

زندہ ہے جب بھی ماں ، وہ مرجائے جب بھی ماں

 

قدرت نے ماں کے پیار کو ایسا جُنوں دیا

ہر ماں نے اپنی کوکھ میں بچے کو خوں دیا

جب بے سکوں ہوا کبھی ، ماں سے لپٹ گیا

بس ماں کی گود نے مجھے مطربؔ سکوں دیا

اس کی وجہ سے ربِ جہاں ہم پہ مہرباں

زندہ ہے جب بھی ماں ، وہ مرجائے جب بھی ماں

 

 

تین روز سے ماں کومے کی حالت میں تھی۔ انہیں ہارٹ اٹیک ہوا تھا۔ مجھے جب ماں کی خبر ملی تو میں ماں سے سینکڑوں کلومیٹر دور تھا۔ دس بارہ گھنٹوں کے تھکا دینے والےسفر کے بعد اسپتال پہنچا۔ ماں ICU میں تھی ان سے کسی کو ملنے نہیں دیا جارہا تھا۔ بڑی کوشش کے بعد ڈاکٹروں نے صرف ایک جھلک دیکھنے کے لیے مجھے ICU میں ماں تک رسائی دے دی۔
ماں بیڈ پر بغیر حرکت کے لیٹی ہوئی تھی۔ ایسا محسوس ہو رہا تھا کہ وہ میری راہ دیکھ رہی ہے۔ پورے جسم پر ڈرپ اور مانیٹر کے تار لگے ہوئے تھے۔ میں بیڈ پر ماں کے برابر ان کا ہاتھ تھامے بیٹھ گیا۔ کچھ لمحے ہی گزرے تھے کہ مجھے محسوس ہوا کہ ماں ہوش میں آرہی ہے۔ میری نظر ان کے چہرے پر تھی ان کی آنکھیں ڈبڈبائیں اور چند ثانیے کے بعد آنکھیں کھلنے لگیں۔ جب حواس پوری طرح بحال ہوئے تو ماں کا پہلا جملہ تھا ….
‘‘بیٹا تو اتنی دور سے آیا ہے کیا تو نے کھانا کھا لیا۔’’
ماں اپنا درد بھول کر میری بھوک کی فکر میں تھی۔ میری آنکھوں سے دو آنسو گرنے کو تھے کہ ماں نے انہیں اپنے ہاتھوں میں لے لیا اور مجھے اپنی آغوش میں چھپا لیا….
ماں بظاہر تین حروف پر مشتمل ایک مختصر، مگر انتہائی میٹھا لفظ ہے، لیکن اس مختصر لفظ کی وسعت کی کوئی حد نظر نہیں آتی۔ یہ رشتہ اپنی ذات میں اس قدر وسعت رکھتا ہے کہ اس میں محبت و ایثار، نیکنیتی، خلوص، قربانی کے عظیم جذبات، بچوں کی تکلیف دور کرنے کا شدید احساس اور ان کی اچھی پرورش کی بھاری ذمہ داری، سب ہی کچھ ہے۔
بچوں کی بہترین تعلیم و تربیت کے لیے اپنی جان جوکھوں میں ڈالنا، وہ پڑھ لکھ کر قابل ہوجائیں تو انہیں اعلیٰ و ارفع مقام پر دیکھنے کے لیے رب کے آگے جھولی پھیلا پھیلا کر رات دن دعائیں اور ان کی صحت وتندرستی، درازیٔ عمر کی اللہ تعالیٰ سے رورو کر التجا کرنا ہی اس کے درجے کو انتہائی بلندی عطا کرتا ہے۔
دنیا کی تاریخ میں ماں کو ہر طرح کے عنوان سے نوازا گیا ہے۔ ہر مذہب کے ماننے والوں میں ماں کے رشتہ کو خصوصی اہمیت دی گئی ہے۔
ماں ایک ایسے درخت کی مانند ہے، جس کی گھنی چھاؤں کبھی کم نہیں ہوتی۔ ماں کی دعا اس کے دل کی آواز ہوتی ہے۔ ماں کی نافرمانی کرنے والا کبھی سکھی نہیں رہتا۔ یہ حقیقت اپنی جگہ اٹل ہے کہ اگر کسی کی ماں اس سے ناراض ہے تو وہ یقیناً جنت کی چابی کھو چکا ہے۔
ماں کے قدموں تلے جنت کی بشارت دی گئی ہے۔ ماں شاہ سے فقیر تک سب کے لیے قابل تعظیم ہے۔ ماں ہی تو ہے جو اپنی ذات کو فنا کرکے اپنی گود میں نئی نسل کو پروان چڑھانے اور نئی بستیوں کو تعمیر کرنے کے لیے عظیم قربانی دیتی ہے، محبت کے لازوال چشمے ماں کے دل سے ہی پھوٹتے ہیں اور بچوں کی ذات کو سیراب کرتے رہتے یں۔ غور کیا جائے تو سب سے خوبصورت لفظ ‘‘ماں’’ ہی ہے۔ ماں کا وجود اپنے اندر محبت و امید کا بھرپور احساس لیے ہوئے ہے۔
اس عظیم ہستی کی دل و جان سے قدر کریں۔ اس ہستی کی ناراضگی مول لینے سے گریز کریں۔ماں کی خوشنودی دنیا میں باعث راحت اور آخرت میں باعث نجات ہے۔ کہیں ایسا نہ ہو کہ یہ ہستی آپ سے چھن جائے اور آپ ساری زندگی پچھتاوے کی آگ میں جلتے رہیں۔ اس لیے جب تک وہ حیات ہے، اس کی خدمت کرنے ہی میں اولاد کی فلاح اور بھلائی ہے۔ اگر جوان ہو کر اولاد ماں کا یہ احسان بھول جائے کہ اس کی ماں نے کتنی راتوں کی نیند اور دن کا سکھ چین اولاد پر قربان کردیا، اس کی پرورش کرنے میں کتنی تکالیف اٹھائیں اور زندگی کے کتنے ہی مسائل سے نبردآزما ہو کر اس کی تعلیم و تربیت میں کوئی کسر نہ چھوڑی تو یقیناً یہ بڑی زیادتی اور ناانصافی ہوگی۔ اب اگر ہمیں اور آپ کو دین اور دنیا میں منزل مقصود یعنی جنت کمانی ہے تو ہم سب پر اپنی ماں کے حقوق ادا کرنا فرض ہیں۔ سب سے پہلا حق تو یہی ہے کہ تا زندگی اولاد اپنی ماں کی فرمانبرداری کرے اور اسے اُف تک نہ کہے۔ یاد رکھیے شرک کے بعد سب سے بڑا گناہ والدین کی نافرمانی ہے، اس لیے ہمیشہ ماں کے سامنے مؤدب رہا جائے اور ہر حال میں اس کی تعظیم کی جائے۔ ماں کی وفات کے بعد ان کی مغفرت کے لیے دعا کی جائے۔ ماں کے رشتہ داروں اور قرابت داروں سے بھی حسن اخلاق سے پیش آیا جائے۔ ماں کے ذمہ اگر کسی کا کوئی قرض ہو تو وہ بھی بغیر حیل و حجت ادا کیاجائے۔

ماں محبت کا لازوال سرچشمہ – تحریر اقراء فہیم / روحانی ڈائجسٹ مئی 2016ء سے اقتباس

اسلام دین فطرت اور انسانیت کا مذہب ہے ۔ اس کی تمام تعلیمات انسانی فطرت کے عین مطابق ہیں۔ خدائے رحمن کا مخاطب انسان ہے ، اس نے انسان کو اشر ف المخلوقات کا تاج زریں پہنا کر کائنات کی جملہ مخلوق پر فضیلت بخشی اور عزت و تکریم کی سند عطا کی، عالم انسانیت کے تمام انسان مساوی مرتبے کے حامل ہیں، رنگ و نسل اور قوم و قبیلے کے تمام امتیازات بے معنی ہیں ۔ ارشاد بانی ہے ’’ترجمہ ، لوگوں ! ہم نے تم کو ایک مرد اور ایک عورت سے پیداکیا اور پھر تمہاری قومیں اور برادریاں بنا دیں ، تاکہ تم ایک دوسرے کو پہچانو ( سورۃ الحجرات ، آیت 13) ‘ ‘ قوموں اور برادریوں میں انسان تمدن و معاشرت کی اہم اکائی ’’خاندان‘‘ ہے اور خاندان کی بنیادی اور مرکزی اکائی ’’ماں‘‘ ہے ۔ اسلام نے خاندانی نظام میں سب سے زیادہ عظمت و احترام اور فضیلت و اہمیت ’’ ماں ‘‘ کو عطا کی ہے،قرآن کریم اور محسن انسانیت کے فرامین میں جا بجا اس ابدی اور ناقابل تردید حقیقت کو بیان کیا گیا ہے۔
دین فطرت نے ’’ ماں ‘‘ کا مرتبہ سب سے بلند اور سب سے عظیم مقرر کیا ہے ۔ اس کے قدموں کو سعادت و کامرانی کا گنجینہ او راس کے لبوں سے نکلی ہوئی دعائوں کو فلاح و کامیابی کا خزینہ قرار دیا ہے ۔ پیغمبر رحمت حضرت محمدرسول اللہ ﷺ کا ارشاد ہے کہ ’’ جنت ماں کے قدموں کے نیچے ہے ۔ ‘‘ (مسند احمد ، نسائی )
’’ ماں‘‘ خلوص و ایثار اور بے لوثی و بے غرضی کی علامت ہے ۔ اولاد کے لیے اس کی محبت و شفقت اورتربیت و رحمت، عکس ہے رب العالمین کی اپنی مخلوق سے محبت و رحمت کی ۔ اسلام نے ماں اور باپ دونوں کے ساتھ حسن سلوک کی تاکید کی اور ان کی اطاعت کا حکم دیا ہے۔تاہم قرآن و حدیث میں ماں کے احسانات کو نمایاں کرتے ہوئے اسے عظمت کا مقام عطا کیا گیا ہے۔
رسول اللہ ﷺنے ارشاد فرمایا! ’’میں آدمی کو اس کی ماں کے بارے میں تاکید کرتا ہوں ، میں آدمی کو اس کی ماں کے بارے میںتاکید کرتا ہوں،چوتھی مرتبہ فرمایا، میں آدمی کو اس کے باپ کے بارے میں حسن سلوک کی تاکید کرتا ہوں۔‘‘ (سنن ابن ماجہ )
خود پیکر خلق عظیم حضرت محمد رسول اللہ ﷺ کا معمول تھا کہ آپ ؐ اپنی رضاعی والدہ حضرت حلیمہ سعدیہ کی تشریف آوری کے موقع پر ان کے احترام میں کھڑے ہوجاتے اور ان کے لیے اپنی چادر بچھا دیتے۔ آیات مبارکہ اور احادث نبویؐ میں بوڑھے والدین سے حسن سلوک کی تاکید کی گئی ہے، یہ ہی اسلامی تہذیب و ثقافت اور مسلم خاندان کے نظام کی اساس ہے۔ اسلام میں چودہ سو سال قبل بھی والدین کو عظمت و عزت اور احترام کا درجہ دیا گیا تھا۔ آج بھی والدین کو جو عظمت و اہمیت اور عزت و احترام حاصل ہے ،د نیا کے مختلف معاشروں ، تہذیبوں اور مذاہت میں اس کی مثال نہیں ملتی ۔
مغرب کا خاندانی نظام او ر گھریلو زندگی بدترین انتشار کا شکار ہے ۔ وہاں بوڑھے والدین کی عظمت کا تصور مفقود ہو چکا ہے ۔ گھریلو زندگی کی تباہی اور خاندانی نظام کے انتشار کی بناء پر اگر چہ عورتیں اور بچے شدید متاثر ہوئے، تاہم بوڑھے بالخصوص بوڑھی خواتین کی حالت نا گفتہ بہ ہے ، بڑھاپے میں کوئی ان کا پرسان حال نہیں۔ وہ ، اولڈ ایج ہومز میں انتہائی کسمپری کی زندگی گزارنے پر مجبور ہیں ۔ کبھی کبھار یا سال میں کرسمس کے تہوار کے موقع پر ہی اکثر کو اپنے کسی بیٹے یا بیٹی کی شکل دیکھتے کا موقع ملتا ہے۔ ’’ اولڈ ہومز ‘‘ یا بوڑھوں کی آرام گاہیں، دراصل اذیتّ کدے ہیں جہاں یہ شدید کرب اور ذہنی صدموں کی حالت میں موت کا انتظار کرتے رہتے ہیں۔
اکثر اولاد تو بوڑھے والدین کو اولڈ ہائوسز میں پہنچا کر اپنے فرض سے سبکدوش ہوجاتی ہے اور اگر وہ کسی مرض میں مبتلا نہ ہوں تو بھی تنہائی انہیں ضرور ذہنی مریض بنا دیتی ہے ۔ ماں باپ اپنی اولاد سے ملنے کو ترستے رہتے ہیں، لیکن اولاد کے پاس ماں باپ کے لیے کوئی وقت نہیں ہوتا یہی وجہ ہے کہ یورپ میں ’’ فادر ڈے ‘‘ اور ’’ مدر ز ڈے ‘‘ کی روایات نے جنم لیا۔ وہ اپنے ماں باپ اور اسی طرح دیگر رشتوں کے لیے ایک دن مخصوص کر دیتے ہیں تاکہ ان کو خراج تحسین پیش کیا جاسکے۔
کہا جاتا ہے کہ خاندانی نظام کی تباہی ، گھریلو زندگی کی بربادی اور اولڈ ہومز کی آباد کاری کے بعد مغربی معاشرے میں ’’ ماں ‘‘ کی عظمت کا تصور اُجاگر ہوالیکن اس کی تکمیل کے لیے محض اسے کافی سمجھا گیا کہ کہ سال میں ایک دن ’’ماں‘‘ کے لیے مخصوص کر لیا جائے۔ چنانچہ امریکہ اور دیگر مغربی ممالک میں1914ء سے ہر سال مئی کے ہر دوسرے اتوار کو ’’ یوم والدہ ‘‘ یعنی ’’ مدرز ڈے ‘‘ منایا جاتا ہے ۔ اس دن بچے ماں کو کارڈ ، پھول اور تحائف دیتے ہیں ، اس طرح گویا ماں کی بے لوث محبتوں کا اعتراف کیا جاتا ہے ۔ لیکن اکثر کو ملنے کا موقع بھی نہیں ملتا ،اور وہ گھر میں بیٹھ کر ہی صرف’’یاد ‘‘ کر لیتے ہیں ۔
یہ ہے مغربی معاشرے میں ’’ماں‘‘کی عزت اور احترام!
مغرب کی دیگر روایات کی نقالی کی روایت کی طرح ہمارے یہاں بھی لوگ اب مدرز ڈے کو اہمیت دینے لگے ہیں ۔ لیکن الحمداللہ ماںکی عظمت ، اس کی عزت و احترام ہمارے یہاں آج بھی قائم ہے اور انشاء اللہ ہمیشہ قائم رہے گا۔
ماں!اللہ کی طرف سے دیا جانے والا سب سے حسین تحفہ ہے ۔ خوش نصیب ہوتے ہیں وہ لوگ جن کو ماں کی محبت اور شفقت نصیب ہوتی ہے ۔ ہر بچہ اپنی زندگی کا پہلا سبق ماں کی گود میں ہی حاصل کرتا ہے ۔ وہ تکلیف کے وقت اپنی ماں کی طرف ہی دیکھتا ہے کیونکہ وہ جانتا ہے کہ ماں اس کا ہر مسئلہ حل کر دے گی ۔ مشکل لمحات میں مامتا بھر ے ایک لمس سے دل جینے کی قوت حاصل کر لیتا ہے۔
یہاں نپولین بونا پاٹ کی مثال دی جاسکتی ہے ، نپولین ایک چھوٹے قد اور بھدے جسم کا آدمی تھا ۔ اسکول کے زمانے میں اس کے ہم جماعت اس کے قد اور جسم کی مناسبت سے اسے ’’ بچہ ہاتھی ‘‘ کہا کرتے تھے ۔ ہم جماعتوں کے اس مذاق نے نپولین میں احساس کمتری پیدا کر دی ۔ جب اس نے اس با ت کا ذکر اپنی ماں سے کیا تو انہوں نے ’’تم اپنے قد کی کمی کو اپنے کردار کی بلندی سے شکست دو، اور اپنے کردار کو اس قدر بلند کرو کہ مذاق اڑانے والے تمہارے بلند کردار کے سامنے جھک جائیں۔ ‘‘
اپنی ماں کی اس نصیحت پر عمل کرتے ہوئے نپولین کیا بناء یہ آج ہم سب پرعیاں ہے۔ صرف نپولین ہی نہیں تاریخ ایسے بے شمار لوگوں سے بھری پڑی ہے جنہوں نے اپنی ماں کے حکم کے آگے سرجھکادیا تو وہ کیا سے کیا بن گئے۔
بے غرض اور بے لوث محبت کا دوسر ا نام ماں ہے۔ اولاد کی ہر تکلیف پر تڑپ جانے والی ماں ہی وہ واحد ہستی ہے جو اپنے بچوں سے بے غرض محبت کرتی ہے ۔ اور اس کے ہر دکھ کو اپنے سینے میں سمیٹ لیتی ہے۔ ماں کی محبت ایک ایسے سایہ دار شجر کی مانند ہے جس کی چھائوں کی ٹھنڈک کبھی ختم نہیں ہوتی۔ دنیا بھر کی پریشانیوں سے گھبرایا ہوا انسان ماں کی چھائوں تلے اپنے ہر دکھ کو بھول جاتا ہے۔
ماں بلاشبہ وہ عظیم ہستی ہے جس کا نعم البدل ناممکن ہے۔ ماں اولاد کے لیے جتنی قربانیاں دیتی ہے اولاد اگر چاہے بھی تو ساری زندگی خدمت کرکے اس کا قرض نہیں اتار سکتی ۔ ماں ایک لفظ نہیں بلکہ محبتوںکا مجموعہ ہے۔ اللہ اور اس کے رسولﷺ کے بعد سب سے زیادہ محبت کرنے والی ہستی ماں کی ہے ۔ ماں کے بغیر زندگی کا تصور ہی نہیں کیا جاسکتا۔ زندگی کے ہر دور میں ’’ ماں ‘‘کی راہنمائی کی ضرور ت ہوتی ہے۔
ماں بچے کی زندگی میں کلیدی حیثیت رکھتی ہے ۔ ماں کی بھرپور توجہ اور اچھی تربیت بچے میں اعتماد پیدا کرتی ہے ۔ خاص طورپر لڑکیوں کو عمر کے ہر حصے میں ماں کی توجہ کی سخت ضرورت ہوتی ہے ۔ ہمارے یہاں ویسے بھی لڑکیاں ماں سے زیادہ قریب ہوتی ہیں اور اپنے دل کی ہر بات ماں سے ہی کرتی ہیں ۔ جو محبت ، خدمت اور وقت ماں اولاد کو دیتی ہے، وہ کوئی اور دے ہی نہیں سکتا۔ ماں اور بچے کا رشتہ اتنا مضبوط ہوتا ہے کہ اس کی محبت میں کبھی کمی نہیں آسکتی۔ وہ لوگ بہت بد قسمت ہیں جو ماں کی زندگی میں بھی ماں کو صرف ’’ مدرز ڈے ‘‘ پر ہی یاد کرتے ہیں ۔ ماں تو وہ عظیم دولت ہے جسے ہر لمحہ ہر پل اور ہر ساعت یاد رکھنا چاہیے اور ہمارا ہر دن ہر پل ماں سے منسوب ہونا چاہیے، بعض لوگوں کا کہنا ہے کہ جہاں ہم سالگرہ یا دیگر تقریبات مناتے ہیں ، وہاں ایک دن اگر ایسی ہستی کے نام کر دیا جائے جو ہمیں سب سے زیادہ عزیز ہے تو اس میں کوئی حرج نہیں ۔بلاشبہ حرج تو کو ئی نہیں لیکن عزیز ترین ہستی کے لیے صرف ایک دن ہی کیوں مخصوص کیا جائے ۔۔۔۔۔؟
کیوں نہ ہر دن ماں کا دن ہو، کیونکہ ماں کا بدل کوئی نہیں ہو سکتا۔

 

ماں – تحریر نسرین اختر / روحانی ڈائجسٹ مئی 2010ء سے اقتباس