لعلن لعل لطیف کہے

اوّل نام اللہ کا اعلیٰ اور علیم
قادر اپنی فطرت سے قائم اور قدیم
والی واحد وحدهٔ رازق رب رحیم
بڑھ کر ہے ہر حمد سے اس کی حمد حکیم
ہے سارے سنسار کا مالک وہی کریم

مدھر ہی کے میں نے اپنے پیارے ساجن کو پہچان لیا
یہ پریت کا ناتا کر کے میں نے جانے کیا کیا جان لیا
اس پارکی ا گنی ہے من میں جس پار سے میں نے گیان کیا
یہ جگ ہے دو دن کی مایا ساجن ہم نے یہ مان لیا
کہے ‘‘لطیف’’ کہ تو ہی تو ہے، یہ سارا جگ چھان لیا

اپنے محبوب سے اگر ہے پیار
سیکھ لے پہلے چور کے اطوار
رات بھر جاگنا ہو کام ترا
نیند کا سکھ نہ ہو تجھے درکار
تھک بھی جائے جو دوڑ دھوپ سے تو
دل نہ ہو دوڑ دھوپ سے بیزار
اک تیرے دل میں اک زبان پر ہو
خوف تعزیر، جرم سے انکار
ٹکڑے ٹکڑے ترے اگر اڑ جائیں
نہ کرے ان کے راز کا اظہار

کیا اس کو کوئی مٹائے یہ روگ میرے من کا
مرے دل میں درد سجن کا
اے چارہ سازو! جاؤ لے جاؤ دوائیں اپنی
یہ گھاؤ ہے مجھ برھن کا
وہ جی کا جیارا آئے جیون کا روگ مٹائے
دن آئے پریت ملن کا
مرے دل میں درد سجن کا

غذاے عاشقاں ہے، زہر قاتل
اسے وہ دیکھ کر، ہوتے ہیں شاداں
فدائے ہر ادائے قاتلانہ
نثار جنبش زنجیر زنداں
چھپائے ہیں دلوں میں زخم کاری
تبسم ریز ہیں لب ہائے خنداں

کیوں لگایا ہے سامنے ناداں
تہ بہ تہ کاغذوں کا یہ انبار
فائدہ کیا ورق الٹنے سے
ایک ہی لفظ ہے تجھے درکار
صرف چلہ کشی سے کب ہوگا
حسنِ محبوب کا تجھے دیدار

جو بظاہر ہیں تنگ اہل جہان
ان کا باطن ہے چشم عرفاں
ان کے لب پر ہے ورد حقانی
اور سینے میں عشق کا پیکاں

موج زن چشمہ حقیقت ہے
قولِ رومی پیامِ راحت ہے
جس نے دیکھی وہ ہستی مطلق
وہ مجسم سکوتِ حیرت ہے

دوستو! عرصی محبت ہے
اپنے سر کی نہ تم کرو پروا
باطل کم نگاہ کیا جانے
مے سر دار راہِ دار بقا
سانپ ہے عشق یہ وہی جانے
جو اسے جسم سونپ دے اپنا

بجھاؤ آنسوؤں سے آتش تن
نہیں ان کے سوا غمخوار کوئی
میسر ہو اگر عزلت نشینی
تو پھر منزل نہیں دشوار کوئی
یہاں اہل جہاں سے دل لگا کر
نہ پائے گا سراغ یار کوئی

جب سے محبوب چارہ ساز ہواہو گیا دور دل کا ہر آزار
وہی غمخوار بن کے آیا ہےہم سمجھتے رہے جسے قہار
ایک انعام ہے دل پر خوں ایک نعمت ہے زخم خنجر یار
ہاتھ اس کا رگوں پہ رہتا ہےآشنائے نفس ہے وہ ہشیار

اگر تم بھی ہو پروانوں میں شامل
تو آؤ اور یہ شعلے بجھاؤ
ہزاروں‘ آنچ پر اس کی جلے ہیں
مزا جب ہے کہ تم اس کو جلاؤ
کہیں ظاہر نہ ہو جائیں کسی پر
رموزِ عاشقی دل میں چھپاؤ

منزل عشق ہے در محبوب
سجدہ ریزی کرو عقیدت سے
کیا عجب تم پہ مہربان ہو جائے
اور نوازے تمہیں محبت سے
کاش مل جائے خوب و زشت کا راز
تمہیں اس رہبر حقیقت سے

اسم اعظم ہو یا ہو ذکر جلی
ہے بہ طور ایک ہی مفہوم
جیسے ہوتا ہے سیپ میں موتی
ہے یونہی دل میں ذاتِ نامعلوم
غیر کے در سے کچھ نہ پائے گا
اس کے در سے جو ہو گیا محروم

ہر تمنائے طالب وحدت ذکر اللہ سے مچلتی ہے
روح ان کی بس ایک آہ کے ساتھ جسدِ خاک سے نکلتی ہے

غیر محدود ہے جلال اس کا
دھر آئینۂ جمال اس کا
آپ رہبر ہے آپ ہی راہی
ختم خود اس پہ ہے کمال اس کا
اس کا احساس ہر جگہ ہر وقت
کہ ہم گیر ہے خیال اس کا
روح انسان میں جلوۂ فرما ہے
پر تو حسن بے مثال اس کا