سلسلہ عظیمیہ کی تعلیمات

سلسلہ عظیمیہ کی تعلیمات

بچوں کی تربیت کیسے کی جائے….؟

جب ہم اپنی اولاد کا ذکر کرتے ہیں تو ارادی یا غیر ارادی طور پر یہ بات بھی ذہن میں آتی ہے کہ کبھی ہم بھی بچے تھے۔
ہر بالغ انسان کی خواہش ہوتی ہے کہ اللہ تعالیٰ اُسے اولاد کی نعمت سے نوازے…. اولاد ہونا اللہ تعالیٰ کا بہت بڑا فضل اور کرم ہے۔ اس نعمت سے صرف والدین ہی خوش نہیں ہوتے، خاندان اور معاشرے میں بھی خوشی کی لہر دوڑ جاتی ہے…. اولاد ایک ایسی نعمت ہے کہ جس کے لئے پیغمبروں نے بھی اللہ تعالیٰ سے التجا اور دعا کی ہے….

حضرت زکریا علیہ السلام نے دعا کی:

 رَبِّ هَبْ لِىْ مِنْ لَّـدُنْكَ ذُرِّيَّةً طَيِّبَةً ۖ اِنَّكَ سَـمِيْعُ الـدُّعَآءِ o 

‘‘میرے رب تو اپنے پاس سے مجھے طیب اولاد عطا فرما بے شک تو دعا کا سننے والا ہے’’ (سورۂ آلِ عمران آیت 38)

اللہ تعالیٰ نے اولاد کے حقوق متعین کئے ہیں اور بار با رارشاد فرمایا ہے ‘‘رزق دینے والا میں ہوں’’….

اولاد کی تربیت کے حوالے سے سلسلۂ عظیمیہ کے امام قلندر بابا اولیاء ؒ کا ارشاد ہے:
‘‘قیامت کے روز والدین سے اللہ تعالیٰ یہ نہیں پوچھیں گے کہ تم نے اپنی اولاد کو کیا کھلایا ہے…. کیا پلایا ہے…. اور کیسا لباس پہنایا ہے….
اللہ تعالیٰ یہ پوچھیں گے کہ تم نے اولاد کی تربیت کیسی کی؟’’….
اولاد کی اچھی تربیت کے لئے ضروری ہے کہ اپنے بچوں کو بات بات پر ڈانٹنے، جھڑکنے اور بُرا بھلا کہنے سے گریز کیا جائے…. اُن کی شرارتوں، کوتاہیوں پر بیزار ہونے اور غصے کا اظہار کرنے کے بجائے….محبت کے ساتھ اُنہیں سمجھائیے کہ وہ اچھی باتیں اختیار کریں….
والدین اپنی اولاد سے جو کچھ چاہتے ہیں وہ سب اچھی صفات ماں باپ کے اندر موجود ہوں….
جب ایک عورت شوہر کے ساتھ خوش رہے گی اور اُس کی اطاعت و فرماں برداری کرے گی…. تو بچے بھی فرماں بردار ہوں گے…. اور جب شوہر اپنی اہلیہ کے جذبات و احساسات کا خیال کرے گا اور ان کی غلطیوں کو نظر انداز کرے گا، اُس کے اندر عفوودرگزر کا جذبہ ہوگا تو ایسے ماحول میں پروان چڑھنے والی اولاد بھی والدین کی سعادت مند ہوگی۔ اُس کے اندر معافی کی صفات پیدا ہوجائیں گی….
ایک مرتبہ اقرع بن حابس رسول اللہ صلی اللہ علیہ وآلہٖ وسلم کے پاس آئے…. حضورصلی اللہ علیہ وآلٖہ وسلم اُ س وقت حضرت حسنؓ کو پیار کر رہے ہیں…. اقرع کو دیکھ کر تعجب ہوا…. اور بولے
‘‘یا رسول اللہ صلی اللہ علیہ وآلہٖ وسلم! آپ بھی بچوں کو پیار کرتے ہیں!…. میرے دس بچے ہیں لیکن میں نے کبھی کسی کو پیار نہیں کیا’’….
رسول اللہ صلی اللہ علیہ وآلٖہ وسلم نے اقرع کی طرف دیکھا اور فرمایا:
‘‘اگر خدا نے تیرے دل سے رحمت و شفقت کو نکال دیا ہے تو میں کیا کرسکتا ہوں؟’’….
فاروق اعظمؓ کے دور میں حضرت عامرؓ ایک بار حضرت عمرؓ سے ملنے کے لئے آئے۔ اُ س وقت حضرت عمرؓ لیٹے ہوئے تھے اور بچے اُن کے سینے پر اُچھل کود کر رہے تھے…. حضرت عامرؓ کو یہ بات اچھی نہیں لگی….
امیر المومنین حضرت عمر فاروق ؓ اعلیٰ درجے کے مردم شناس تھے۔حضرت عامرؓ کی ناگواری کو محسوس کرکے اُن سے پوچھا….
‘‘آپ کا اپنے بچوں کے ساتھ کیا برتاؤ اور رویّہ ہے؟’’….حضرت عامرؓ بولے ‘‘جب میں گھر میں داخل ہوتا ہوں تو گھر والوں پر سکتہ طاری ہوجاتا ہے۔ سب خوف کے مارے دُم سادھ کر چپہوجاتےہیں’’….
حضرت عمرؓ نے بڑے افسوس کے ساتھفرمایا….
‘‘عامر! آپ اُمت محمدیہ کے فرزند ہوتے ہوئے یہ بھی نہیں جانتے کہ مسلمان کو اپنے گھر والوں کے ساتھ کس طرح نرمی اور محبت کا سلوک کرنا چاہئے’’….
سلسلۂ عظیمیہ اپنے اراکین کو تاکید کرتا ہے کہ حضرت محمد رسول اللہ صلی اللہ علیہ وسلم کی تعلیمات کے مطابق اپنی اولاد کو اچھی تربیت اور انہیں زیور علم سے آراستہ کرنے کا اہتمام کیجیے۔
اللہ تعالیٰ فرماتے ہیں:
‘‘مومنوں بچاؤ اپنے آپ کو اور اپنے گھر والوں کو جہنم کی آگ سے’’….
جہنم کی آگ سے بچنے کا ایک راستہ یہ ہے کہ اولاد کی دینی و دنیاوی لحاظ سے تربیت و تعلیم اچھی ہو….
نبی پاک صلی اللہ علیہ وآلٖہ وسلم کا ارشاد ہے:
‘‘باپ اپنی اولاد کو جو کچھ دے سکتا ہے اُس میں سب سے بہتر عطیہ اولاد کی اچھی تربیت ہے’’….
یاد رکھئے!…. صالح اولاد ہماری روایات، تہذیب، دینی تعلیمات اور توحید کے پیغام کو زندہ رکھنے کا ذریعہ ہے….
بچوں کو نبیوں کے قصے اور اولیاء اللہ کے واقعات سنائیے…. تمام مصروفیات کے باوجود بچوں کے لئے وقت نکالیں….خوش الحانی کے ساتھ اُنہیں قرآن پڑھ کر سنائیں….رسول اللہ صلی اللہ علیہ وآلٖہ وسلم کی سیرت ِطیبہ اُن کے سامنے بیان کیجیے….
ماں اور باپ دونوں کا فرض ہے کہ اپنے بچوں سے غریبوں کو پیسے دلوائیں…. کھانا کھلوائیں…. بہن بھائیوں میں چیزیں تقسیم کروائیں…. تقریبات میں بہن بھائیوں سے آپس میں تحفوں کا تبادلہ کروائیں….
بچوں کے ساتھ کرخت آواز میں نہ بولیں ۔
والدین کے اوپر فرض ہے کہ اولاد کے ساتھ برابری کا سلوک کریں….
ایک بار حضرت نعمانؓ کے والد حضرت بشیرؓ اپنے بیٹے کے ساتھ حضور پاک صلی اللہ علیہ وآلٖہ وسلم کی خدمت میں حاضر ہوئے اور کہا….
‘‘یارسول اللہ صلی اللہ علیہ وآلٖہ وسلم میرے پاس ایک خادم تھا…. میں نے وہ خادم اپنے اس لڑکے کو بخش دیا’’….
نبی مکرم صلی اللہ علیہ وآلٖہ وسلم نے پوچھا….
‘‘کیا تم نے اپنے ہر لڑکے کو ایک ایک خادم بخشاہے؟’’….
بشیرؓ بولے….‘‘نہیں!’’….
حضورصلی اللہ علیہ وآلٖہ وسلم نے فرمایا ‘‘اس خادم کو تم واپس لے لو…. اور فرمایا اللہ سے ڈرو اور اپنی اولاد کے ساتھ مساوات کا سلوک کرو’’….۔
ہر ماں باپ کی ذمہ داری ہے کہ اپنے بچے سے یا اپنے بچے کے سامنے جھوٹ نہ بولیں…. بچے وہی کچھ سیکھتے ہیں، وہی کچھ بولتے ہیں، وہی کچھ کرتے ہیں جو ماں باپ کرتے ہیں….
حضرت عبداللہ ابن عامرؓ بیان کرتے ہیں ‘‘میری والدہ نے مجھے بلایا اور کہا کہ یہاں آؤمیں تجھےچیزدوں گی’’….
یہ بات حضور صلی اللہ علیہ وآلٖہ وسلم نے بھی سن لی اور پوچھا ‘‘تم بچے کو کیا چیز دینا چاہتی ہو’’؟…. والدہ بولیں…. ‘‘میں اس کو کھجور دینا چاہتی ہوں’’…. رسول اللہ صلی اللہ علیہ وآلہٖ وسلم نے فرمایا ‘‘اگر تم اپنے بچے کو چیز دینے کا بہانہ کرکے بلاتیں اور بچے کو کچھ نہ دیتیں تو تمہارے اعمال نامے میں جھوٹ لکھ دیا جاتا’’ ….
ہمارے معاشرے میں یہ بات عام طور سے دیکھی جاتی ہے بلکہ یوں کہئے کہ رائج ہوگئی ہے کہ لڑکی کی پیدائش پر اتنی خوشی نہیں ہوتی جتنی خوشی لڑکے کی پیدائش پر ہوتی ہے….
حدیث شریف میں ہے….
‘‘جب کسی کے ہاں لڑکی پیدا ہوتی ہے تو اللہ اُس گھر میں فرشتے بھیجتا ہے….وہ کہتے ہیں
اے گھر والو!…. تم پر سلامتی ہو…. اور یہ کہہ کر وہ لڑکی کو اپنے پَروں کے سائے میں لے لیتے ہیں…. اور اُس کے سر پر ہاتھ پھیرتے ہوئے کہتے ہیں…. یہ کمزور جان ہے…. جوایک کمزور جان سے پیدا ہوئی ہے…. جو اس لڑکی کی نگرانی اور پرورش کرے گا قیامت تک اللہ کی مدد اس کے شاملِ حال رہے گی’’….
نبی پاک صلی اللہ علیہ وآلٖہ وسلم کا ارشاد ہے‘‘جس شخص نے تین لڑکیوں یا تین بہنوں کی سرپرستی کی، اُنہیں تعلیم دلائی، تہذیب سکھائی…. بہترین تربیت کی، اُن کے ساتھ رحم کا سلوک کیا….۔ یہاں تک کہ اللہ اُن کو بے نیاز کردے (یعنی وہ اپنے گھر کی ہوجائیں)…. تو ایسے شخص کے لئے اللہ نے جنت واجب کردی ہے’’….
مجلس میں موجود ایک آدمی بولا….
‘‘یار سول اللہ صلی اللہ علیہ وآلہٖ وسلم!…. اگر دو لڑکیاں ہوں’’؟….
رسول اللہ صلی اللہ علیہ وآلہٖ وسلم نے فرمایا ‘‘دو لڑکیوں کی پرورش کا بھی یہی صلہ ہے’’….
ام المومنین حضرت عائشہؓ فرماتی ہیں….کہ رسول اللہ صلی اللہ علیہ وسلم نے فرمایا‘‘جو شخص بھی لڑکیوں کی پیدائش کے ذریعے آزمایاجائے اور اُن کے ساتھ اچھا سلوک کرکے آزمائش میں کامیاب ہو….تو یہ لڑکیاں اُس کے لئے قیامت کے روز جہنم کی آگ کے سامنے ڈھال بن جائیں گی’’….
بچے نازک پھولوں کی مانند ہوتے ہیں۔بچپن سے ہی اولاد کی مناسب تربیت کا مرحلہ شروع ہو جاتا ہے جس طرح پودوں کی افزائش کے لئے مناسب وقت پر تمام مراحل کو ترتیب و تصحیح کے ساتھ مرحلہ وار سرانجام دینا ، پودے کی بہترین افزائش کے لئے ناگزیر ہے ۔ بچوں کی تربیت و پرورش بہت احتیاط و توجہ کی متقاضی ہے جس میں بعض اوقات معمولی کوتاہی بھی بڑے نقصان کا پیش خیمہ ثابت ہوسکتی ہے۔

ڈاکٹر وقار یوسف عظیمی

جون 2020ء

سلسلہ عظیمیہ کی تعلیمات

ایمان، نیت ، تزکیہ نفس ، جذبات پر کنٹرول اور تعمیر شخصیت

تصوف کی تربیت میں تزکیہ نفس کی بہت زیادہ اہمیت ہے۔ قرآن پاک میں، احادیث مبارکہ میں تزکیہ نفس کے لئے واضح ہدایات موجود ہیں۔ امت مسلمہ میں علمائے حق نے ، اولیاء اللہ ، صوفیائے کرام نے اور عامتہ الناس میں لاتعداد افراد نے ان احکامات پر عمل کیا۔ ایسے افراد نے نفس مطمئنہ کے معنی اور مفاہیم جان لئے۔ اللہ کی مہربانیوں سے ایسے اصحاب دوسرے انسانوں اور اللہ کی سب مخلوقات کے لئے خیر و فلاح کا ذریعہ بنے۔
شیطان کسی بھی آدمی کو ورغلانے کی کوشش کرسکتا ہے۔ جو لوگ اپنے نفوس کا تزکیہ کرنا چاہیں اور اللہ کے راستوں پر چلنا چاہیں شیطان ان سے بہت ناخوش ہوتا ہے۔ شیطان ہمارے اردگرد روپ بدل بدل کر آتا ہے۔ کبھی ہمارے دلوں میں وسوسے ڈالتا ہے، کبھی تمنائیں ابھارتا ہے، کبھی طرح طرح کے خوف اور ڈر میں الجھادینا چاہتا ہے۔ تزکیہ نفس کی کوششوں میں مصروف بندے کو اپنی تربیت پر مسلسل توجہ دینے کے ساتھ ساتھ شیطان کی طرح طرح کی چالوں سے بھی ہوشیار رہنا چاہیے….
تز کیہ نفس کا مطلب کیا ہے….؟
تزکیہ نفس کا ایک مطلب یہ ہے کہ اپنے خالق اور مالک اللہ کا سچا بندہ بننے کی کوششیں کی جائیں۔ اللہ کے احکامات پر سچے دل سے عمل کیا جائے۔ اللہ کی اطاعت و تابع داری مکمل وفاداری کے ساتھ ہو۔ اللہ اور رسول اللہ صلی اللہ علیہ وسلم کے احکامات و تعلیمات پر صدق دل سے عمل کیا جائے۔
کیا تزکیہ نفس کا مطلب یہ ہے کہ بندہ کوئی خاص وضع قطع کرے۔کوئی خاص ڈریس پہننا شروع کردے۔ خواتین خاص قسم کا کوئی برقعہ پہننا شروع کر دیں۔
جی نہیں۔
تزکیہ نفس کے پراسیس کامطلب بنیادی طور پر فکر اور سوچ میں مثبت تبدیلی اور اخلاص اور خیرخواہی لانا ہے۔ نفس کا تزکیہ اللہ تعالیٰ کے احکامات امر و نواہی (امر بالمعروف و نہی عن المنکر) پر عمل کرنے سے اور اپنی زندگی کو اللہ کی مرضی کے مطابق ڈھال لینے سے ہوتا ہے۔ اس کام کے لیے نیت کا خالص ہونا ضروری ہے۔ نیت کا تعلق انسان کے باطن سے ہے۔ نیت کی پاکیزگی کے ساتھ ظاہری معاملات درست ہونا ضروری ہیں۔ ظاہری معاملات کے لئے کچھ معیار اور پیمانے ہیں۔
ایک آدمی یہ کہتا ہے کہ میں اللہ پر ایمان لایا… یہ زبانی اقرار ہے۔ ایمان کی گواہی اعمال صالحہ کے ذریعے ہوتی ہے۔ اللہ تعالیٰ ارشاد فرماتے ہیں۔

 وَالْعَصْرِ o إِنَّ الْإِنْسَانَ لَفِي خُسْرٍ o إِلَّا الَّذِينَ آَمَنُوا وَعَمِلُوا الصَّالِحَاتِ

زمانے کی قسم انسان خسارے میں ہے۔ سوائے ان لوگوں کے جو ایمان لائے اور انہوں نے صالح کام کئے ۔  

ایمان اور عمل صالح کا ذکر ایک ساتھ کرنا ایک بہت اہم نکتہ ہے۔ دل میں ایمان کے اثرات کا اظہار صا لح عمل سے ہوتا ہے۔اللہ پر ایمان اور صالح اعمال کا امتزاج انسان کو فلاح کا امیدوار بناتا ہے۔

جذبات پر کنٹرول اور تعمیر شخصیت

ماں باپ اپنی اولاد کو خوش اور کامیاب دیکھنا چاہتے ہیں۔ اولاد کی فلاح ماں باپ کی خوشی کا باعث بنتی ہے۔
سلسلۂ طریقت میں مرشد اپنے شاگردوں کے، اپنے مریدوں کے روحانی باپ ہوتے ہیں، مرشد کی یہ خوا ہش ہوتی ہے کہ ان کی روحانی اولاد کا شمار فلاح پانے والوں میں ہو۔ فلاح پانا صرف خواہشات سے ہی ممکن نہیں ہے۔ اس کے لئے کئی کام کرنے ضروری ہیں۔ سب سے پہلا کام یہ کہ قرآن پاک سے ہدایت پانے اور حضرت محمد رسول اللہ صلی اللہ علیہ وسلم کے اسوہ حسنہ سے رہنمائی حاصل کرنے کی دل و جان سے سعی کی جائے۔
فلاح پانے کے لیے تزکیہ نفس ضروری ہے۔ تزکیہ نفس کے کئی مراحل ہیں۔ ہر مرحلے میں اپنا جائزہ مسلسل لیتے رہنے کی ضرورت ہے۔ اس جائزہ کا مقصد یہ جانتے رہنا ہوگا کہ میری سوچ میں ، میری فکر میں مثبت تبدیلی کتنی آئی ہے۔ طرزِفکر سے منفی پہلو کتنے کم ہوئے ہیں اور مثبت پہلوؤں میں کتنا اضافہ ہوا ہے۔
سوچ یا طرزِ فکر میں مثبت پہلو کو بڑھاوا دینے کے ساتھ ساتھ ہر طالب علم کو کچھ خاص اوصاف اختیار کرنے اور ان اوصاف کو مسلسل ڈیولپ کرنے کی ضرورت ہے۔
اپنے جذبات پر کنٹرول ایک بہت اہم وصف ہے۔ صرف نا موافق صورتحال میں ، مشکل حالات میں یا ناکامیوں پر ہی اپنے جذبات کو کنٹرول نہیں کرنا بلکہ کامیابیوں پر ، خوشیوں کے مواقع اور طاقت اور اختیار کے حاصل ہونے پر بھی جذبات پر کنٹرول ہونا ضروری ہے۔ بقول شاعر….

ظفر آدمی اسکو نہ جا نئے گا
وہ ہو کیسا ہی صا حب فہم و ذکا
جسے عیش میں یاد ِ خدا نہ رہی
جسے طیش میں خوف خدا نہ رہا

عیش ہو یا طیش ہو، خوشی ہو یا غم ہر حال میں جذبات کے اظہار پر ، Emotions پر کنٹرول ہو نا چا ہیے۔
سلاسل طریقت میں ایک اہم سبق جذبات پر کنٹرول سیکھنا بھی ہے۔
ہر آدمی کہیں کم زور ہے کہیں طاقت ور ہے، افسر اپنے ماتحتوں پر اختیارات استعمال کرتا ہے۔ حکمراں اپنی رعا یا پر طا قت ور ہو تا ہے۔ گھر کا بڑا گھر کے چھو ٹوں پرطاقت ور ہوتا ہے۔ کسی مقابلہ آرائی میں جس نے غلبہ پا لیا وہ طاقت ورہوتا ہے۔
بدلہ لینے کے لیے زندگی میں جلد یا بدیر مواقع ملتے ہیں لیکن معاف کردینااچھی بات ہے۔ طاقت کے باوجود معاف کردینا بہت بڑے ظرف کی بات ہے۔ اگر کوئی کم زور ہے اس کا ظالم پر کوئی بس نہیں چلتا ایسے آدمی نے معاف کردیا تو یہ شاید مجبوری میں معاف کرنا ہو۔ اصل خوبی تو یہ ہے کہ طاقت ہو، بدلہ لینے پر پوری قدرت ہو لیکن معاف کردیا جائے۔ جانی دشمنوں کو ، مخالفین کو معاف کردینے کی بڑی بڑی مثالیں حضرت محمد ﷺ کے اسوۂ حسنہ میں ملتی ہیں ۔
فتح مکہ کے بعد رسول اللہﷺ مسجدالحرام میں تشریف لے گئے۔ وہاں کئی ظالم لوگ سر جھکائے کھڑے تھے۔ اس موقع پر نبی رحمت حضرت محمد علیہ الصلوٰۃ والسلام نے فرمایا کہ آ ج تم سب کے لیے معا فی ہے۔
قدرت ہونے کے باوجود، غلبہ ہونے کے باوجود معاف کرنا اللہ تعالیٰ کے نز دیک بہت ہی پسندیدہ بات ہے۔ یہ جذبات (Emotions) پر انتہائی اعلیٰ کنڑول ہے۔
حضرت مولا علی شیر خدا کرم اللہ وجہہ ایک جہاد میں کفار سے مقابلہ کررہے تھے۔ حضرت علی نے اپنے مدمقابل کو پچھاڑ دیا۔ وہ شخص مکمل طور پر بے بس ہوچکا تھا۔ قریب تھا کہ حضرت علی کی تلوار اس کا سر تن سے جدا کردے۔ اس شخص نے حضرت علی کے ساتھ بدتمیزی کی۔ اس پر مولا علی نے اپنی تلوار اس شخص کی گردن سے ہٹالی، لوگوں نے دیکھا کہ اس مغلوب شخص کی بدتمیزی پر حضرت علی غضب ناک نہ ہوئے بلکہ اس کی جان بخش دی۔ آپ سے پوچھا گیا کہ ایسا کیوں کیا….
حضرت علی نے جواب دیا پہلے میں اللہ کی خاطر اس سے لڑرہا تھا۔ اس نے بدتمیزی کی ، اس کے بعد میں اپنی خاطر اس سے لڑتا اور یہ مجھے گوارا نہیں ہوا۔ اس لیے میں نے اسے چھوڑ دیا۔ یہ واقعہ غلبے کے وقت جذبات پر کنٹرول کی چند اعلیٰ مثالوں میں سے ایک ہے ۔
پرسنیلٹی ڈیولپمینٹ میں جو عمل زیادہ اہمیت رکھتا ہے وہ جذبات پر کنٹرول سیکھنا ہے۔ اس مقصد کے لئے مراقبہ سے بھی مدد لی جاسکتی ہے۔
میرے پاس اسٹریس ، ڈپریشن، بےخوابی، کم خوابی کے بھی کئی مریض آتے ہیں۔ میں انہیں کلر تھراپی کے اصولوں پر مختلف تراکیب بتانے کے ساتھ اللہ کا ذکر اور مرا قبہ کرنے کا بھی کہتا ہوں۔ ان عارضوں میں ذکر اور مراقبہ کے بہت اچھےنتائج سامنے آئے ہیں۔
ہمیں اپنے اندر موجود ایک کم زوری کو جانچنا ہے اسے ٹھیک کرنے کی کوشش کرنی ہے۔ وہہےجلد بازی۔
کئی لوگ جلد باز ہوتے ہیں۔ چیزوں کو اپنے وقت پر سرانجام دینا ، متحرک اور فعال ہونا بہت اچھی بات ہے۔ یہ ہونا چاہیے لیکن جلدبازی ایک الگ صفت ہے۔ جلد بازی Positiveصفت نہیں ، بردباری اور اعتدال اچھی صفت ہے۔
ہمیں اپنا جائزہ لینا چاہیے کہ جلدبازی ہمارے اندر ہے یا نہیں۔
یہ امورPersonality development سے تعلق رکھتے ہیں۔ یہ پرسنالٹی ڈیولپمنٹ ہماری تربیت میں کئی مقام پر کام آئے گی۔ ان کا تعلق تزکیہ نفس سے بھی ہے۔
ہم جا ئزہ لیں تو یہ بات واضح ہو گی کہ ہم اپنے وقت کا بہت بڑا حصہ ضا ئع کر دیتے ہیں۔ انسانوں سے قیامت کے دن نعمتوں کے بارے میں سوال ہو گا۔ قیامت کے دن یہ سوال بھی ہو گا کہ دنیا کی زندگی میں تمھیں جو وقت دیا گیا تھا اس میں کیا کیا….؟
ہم میں سے ہر ایک کو دیکھنا چا ہیے کہ ہم کتنا وقت درست استعمال کر رہے ہیں اور ہمارا کتنا وقت ضا ئع ہو رہا ہے۔
دن بھر بظاہر مصروف رہنے کے باوجود ہم کتنا وقت ضائع کرتےہیں….؟
اللہ تعالیٰ نے انسان کو جو ذہن عطا کیا ہے اس کی رفتار بہت زیادہ ہے لیکن اکثر لوگ ذہن کو بہت کم استعمال کرتے ہیں۔ وقت کے درست استعمال کا ایک طریقہ یہ بھی ہے کہ ذہن کی رفتار کو بڑھا دیا جائے۔ اس طرح کم وقت میں زیادہ کام کرنا آسان ہو جائے گا۔ مراقبہ کی ٹھیک طرح مشق سے ذہن کی رفتار بڑھانے میں بھی مدد لی جاسکتی ہے۔

ڈاکٹر وقار یوسف عظیمی

جولائی 2020ء

سلسلہ عظیمیہ کا بنیادی مقصد یا نصب العین اپنے خالق و مالک اللہ تعالیٰ کی پہچان حاصل کرنا ہے۔ سلسلہ کی تعلیمات کا مقصد یہ ہے کہ اللہ تعالیٰ کے ارادے، اللہ تعالیٰ کی مشیّت، اللہ تعالیٰ کی مرضی کو سمجھنے کی اور ان پر عمل کرنے کی کوشش کی جائے۔  سالک کے اندر وہ طرز فکر پیدا کردی جائے جس کے تحت وہ قدم بقدم عرفان الٰہی کی راہوں پر چل سکے۔  اس کا مطلب یہ ہوا کہ سلسلہ عظیمیہ یا پیر و مرشد کا کام اپنے شاگرد کے ذہن میں عرفان الٰہی کی اہمیت و ضرورت کو اجاگر کرنا، اس کے قلب و ذہن میں اس راہ پر چلنے کا ذوق و شوق پیدا کرنے کی کوشش کرنا اور پھر اسے اس راستے پر چلا دینا ہے۔  منزل تک پہنچنا خالصتاً اللہ اور اس بندے کا معاملہ ہے۔ اس کا تعلق اللہ تعالیٰ کے فضل و کرم سے ہے۔

 سلسلہ عظیمیہ نے جو مقصد یا راستہ اختیار کیا ہے وہ کوئی نیا مقصد یا نیا راستہ نہیں ہے۔ یہ وہی مقصد یا راستہ ہے جس کی طرف اللہ تعالیٰ کے بھیجے ہوئے انبیاء انسانوں  کو بلاتے رہے اور جس راستہ پر چلنے کی اللہ کے آخری نبی  اور رسول حضرت محمدﷺ نے نوع انسانی کو تلقینفرمائی۔

بعض لوگ عظیمی بہن بھائیوں سے پوچھتے ہیں کہ  آپ کا سلسلہ اسلاف میں سے  کس سلسلہ سے وابستہ ہے یعنی جس طرح دوسرے کئی سلاسل میں سے کوئی چشتیہ سلسلہ سے وابستہ ہے، کوئی قادریہ سلسلہ سے وابستہ ہے، کوئی سلسلہ سہروردیہ سلسلہ سے وابستہ ہے، کوئی شاذلیہ، کوئی نقشبندیہ سلسلہ سے وابستہ ہے۔ اس طرح سلسلہ عظیمیہ کس  سلسلہ سے وابستہ ہے۔

جب ہم اس بات پر غور کرتے ہیں تو یہ سوال بھی پیدا ہوتا ہے کہ چشتیہ سلسلہ  اسلاف سے کس سلسلہ سے وابستہ ہے، قادریہ سلسلہ کس سلسلہ سے وابستہ ہے، سہروردیہ سلسلہ کس سلسلہ سے وابستہ ہے شاذلیہ سلسلہ، رفائیہ سلسلہ اور نقشبندیہ سلسلہ کس سلسلہ سے وابستہ ہے۔ جس طرح سلسلہ چشتیہ، قادریہ، سہروردیہ اور نقشبندیہ بنیادی سلاسل ہیں اور اپنے امام سے شروع ہورہے ہیں سلسلہ عظیمیہ بھی اسی طرح کا بنیادی سلسلہ ہے اور اپنے امام حضرت محمد عظیم برخیا،قلندر بابا اولیاءؒ سے شروع ہوتا ہے۔

سلسلہ عظیمیہ اسی طرح کا ایک بنیادی سلسلہ ہے جیسے کہ دوسرے بنیادی سلاسل ہیں۔

ایک اور غلط فہمی یا غلط تاثر ہمارے معاشرہ میں یہ پایا جاتا ہے کہ بنیادی بڑے سلاسل صرف چار ہیں اور باقی سب ان کی شاخیں ہیں۔ یہ بات تو درست ہے کہ کچھ بنیادی سلاسل ہیں اور ان کی بہت ساری شاخیں بھی ہیں لیکن ان بنیادی سلاسل کی تعداد چار نہیں ہے بلکہ ان کی تعداد دو سو کے قریب ہے۔ البتہ برصغیر میں یہ چار سلاسل زیادہ مشہور ہوئے۔

سلسلہ عظیمیہ کے اراکین کی تربیت اور تعلیم کے لیے امام سلسلہ حضرت محمد عظیم برخیاؒ اور ان کے بعد سلسلہ عظیمیہ کے مرشد حضرت خواجہ شمس الدین عظیمی صاحب نے تعلیمات کا ایک نظام اور نصاب تربیت دیا ہے۔ اس نصاب کو دو حصوں میں تقسیم کیا جاسکتا ہے۔ ایک حصہ تھیوری سے اور ایک حصہ پریکٹیکل۔

تھیوری کے حصے میں کتابی و روحانی تعلیمات شامل ہیں۔ اس کے تحت روحانی علوم پر ایک پورا نصاب ہمارے پاس موجود ہے۔ اس نصاب میں کتاب لوح و قلم، احسان و تصوف، نظریہ رنگ و نور، محمد رسول اللہ ﷺ، آواز دوست، قلندر شعور، تجلیات، تذکرہ قلندر بابا اولیاءؒ وغیرہ شامل ہیں۔ ہمارے بزرگوں   کا جتنا بھی تحریری  سرمایہ ہمارے پاس ہے وہ ہمارے نصاب کا علمی سیکشن یا تھیوری ہے۔

اس علمی حصہ میں ہمارے لیے  ایک عملی سیکشن بھی ہے۔ اسکول کالج یونیورسٹی میں بعض مضامین میں تھیوری کے ساتھ عملی حصہ بھی ہوتا ہے بعض مضامین  صرف تھیوری  پر مشتمل ہوتے ہیں۔ ان میں عملی حصہ نہیں ہوتا، مثلاً اردو میں پریکٹیکل  نہیں ہوتا، معاشرتی علوم میں پریکٹیکل نہیں ہوتا۔ فزکس، کیمسٹری جیسے مضامین میں تھیوری پڑھنے کے ساتھ ساتھ لیب  جاکر  پریکٹیکل بھی کرنا ہوتے ہیں۔

عمومی طور پر نصاب کا عملی حصہ مثلاً فزیکل ٹریننگ Physical Trainingیعنی پی ٹی کی حیثیت صرف عملی حصہ کیہے۔

جیسے آپ فزکس اور کیمسٹری میں پریکٹیکل کرتے ہیں اسی طرح سلسلہ عظیمیہ کی تھیوری کا پریکٹیکل سیکشن مراقبہ، کم سونے، کم بولنے، کم کھانے، روزہ رکھنے اور دیگر چند عملی مشقوں پر مشتمل ہے۔

اب آئیے اس تعلیمی نظام کے عملی حصہ کی جانب۔ ہمارے بزرگوں قلندر بابا اولیاءؒ اور حضرت خواجہ شمس الدین عظیمی نے بطور  پریکٹیکل جو مشق یا ایکسرسائز تجویز کی ہے وہ ہے‘‘خدمتخلق’’۔

ہم سلسلہ عظیمیہ کے ایک رکن کی حیثیت سے خدمت خلق میں  مصروف ہوتے ہیں تو ہم اپنے نصاب کے عملی حصہ یا پریکٹیکل حصے کی تکمیل کرتے ہیں۔ ہر اس بھائی اور بہن کے لیے جو سلسلہ عظیمیہ کی تعلیمات جاننا، سمجھنا اور اپنانا چاہتے ہیں لازمی ہے کہ وہ سلسلہ عظیمیہ کے نصاب کے عملی حصہ کو بھی سمجھیں اور اس پر عمل پیرا ہوں۔

خدمت خلق کو بطور پریکٹیکل نصاب کا حصہ بنانے میں ہمارے بزرگوں کی بہت بڑی حکمت، بصیرت اور دانش پنہاں ہے۔

نبی کریمﷺ کا ارشاد گرامی ہے کہ

الخلقُ كُلُّهم عِيالُ الله ،فأَحَبُّ خلقِه إليه أنفعُهم لعِيالِه

‘‘اللہ تعالیٰ کی تمام مخلوق اللہ کا کنبہ ہے۔ اللہ تعالیٰ کو وہ بندہ زیادہ پسند ہے  جو اللہ کی مخلوق کے لیے  زیادہ فائدہ مند ہو۔’’

[طبرانی،  شعب الایمان بیہقی، بزار، ابویعلیٰ، الکامل ابن عدی، ابن ابی دنیا]

سلسلہ عظیمیہ کے بزرگوں نے لوگوں کو  اسی طرف متوجہ کیا ہے۔ حصول علم کے دوران  اور تحصیل علم کے بعد بھی آپ کو اس بات کا اہتمام کرنا چاہیے کہ آپ کی ذات دوسرں کے لیے مفید ہو آپ کے اندر دوسروں کے کام آنے، ان کی خدمت کرنے کا جذبہ ہو،  لوگوں کے لیے مفید بنیں۔  جب آپ اللہ کی ذات کو اور اللہ کے ارادے کو سمجھنے کی کوشش کرتے ہیں اور اس دوران آپ وہ کام کرتے ہیں جو اللہ کو پیارے ہیں تو اپنی منزل تک پہنچ جانا، منزل کو پانا آپ کے لیے آسان ہوجاتا ہے۔

اسی نصاب کی تکمیل کے ساتھ ساتھ سلسلہ عظیمیہ آپ کو بار بار اس طرح متوجہ کرتا ہے کہ رسول اللہ ﷺ کے فرمان

 لَا رَهْبَانِيَةُ فِی الاِسْلَامِ

‘‘اسلام میں رہبانیت نہیں’’ [مسند احمد]

کے مطابق روحانی علوم کا حصول یا روحانیت کی راہوں پر چلنا ترک دنیا کا نہیں ہے۔ اس راہ میں چلنے کا مقصد یہ نہیں ہے کہ آپ  دنیاوی ذمہ داریوں سے کنارہ کشی اختیار کرلیں۔ جنگلوں میں نکل جائیں  یا اپنے گھر میں رہتے ہوئے اپنے آپ کو جنگل یا ویرانے میں تصور کرنا شروع کردیں۔ سلسلہ عظیمیہ کی دعوت یا پیغام اور سلسلہ عظیمیہ کی تعلیمات ہنستے بستے، متحرک، ارتقا پذیر معاشروں اور عملی انسانوں کے لیے ہیں۔ یہ تعلیمات ترک دنیا کی یا دنیا سے بیزاری کی تعلیمات نہیں۔

سلسلہ عظیمیہ کے بزرگ چاہتے ہیں کہ نوع انسانی میں ایک خاص قسم کی ترتیب، ہم آہنگی، اعتدال اور توازن قائم ہو۔

یہ توازن، اعتدال، ہم آہنگی اور ترتیب کیا ہے….؟

یہ ہے انسان کے مادی تقاضوں اور روحانی تقاضوں کی  اعتدال کے ساتھ تکمیل۔  انسان اپنے روحانی تقاضوں کو بھی اسی طرح سمجھنے کی کوشش کرے جس طرح کہ وہ اپنے مادی تقاضوں کو سمجھتاہے۔

یہ تعلیمات کس کے لیے ہیں….؟

سلسلہ عظیمیہ کی یہ تعلیمات انسانوں کے لیے ہیں۔  یہ تعلیمات پہلے آپ خود حاصل کرتے ہیں اس کے بعد آپ کا فرض ہے کہ انہیں دوسروں تک منتقل کریں۔

سلسلہ عظیمیہ خاص طور پر اپنے وابستگان سے، اپنے نوجوان ساتھیوں سے ، بزرگون سے، بھائیوں سے، بہنوں سے اس امر کا تقاضہ وہ کرتا ہے کہ جب وہ روحانی تعلیمات کے حصول یا روحانی مشن کے فروغ میں مصروف ہوں تو ان کے کسی طرز عمل سے اپنی گھریلو اور معاشرتی ذمہ داریوں سے پہلوتہی یا فرار کا ہلکا سا تاثر بھی نہیں ملنا چاہیے۔ آپ کی جو گھریلو ذمہ داریاں ہیں بیوی بچوں کی ذمہ داریاں ہیں شوہر یا اولاد کی ذمہ داریاں ہیں والدین اور بزرگوں کی ذمہ داریاں ہیں محلہ اور معاشرہ کی ذمہ داریاں ہیں وہ ٹھیک طرح ادا ہوتی رہیں۔

اس سے آگے بڑھ کر  سلسلہ عظیمیہ آپ کو اس بات کی تلقین کرتا ہے اور ترغیب دیتا ہے کہ روحانی علوم کی روشن کرنوں سے منور ہونے کے بعد آپ  کو زیادہ اچھے طریقے سے اپنی معاشرتی ذمہ داریاں نبھانے کے قابل ہونا چاہیے۔

آپ والد ہیں تو سلسلہ عظیمیہ میں آنے کے بعد آپ کے بچوں کو اس بات کا احساس ہونا چاہیے کہ آپ ان کے ساتھ زیادہ شفیق ہوگئے ہیں۔ آپ شوہر ہیں تو سلسلہ عظیمیہ  میں آنے کے بعد آپ کی اہلیہ کو یہ محسوس ہونا چاہیے کہ میرے شوہر اب پہلے سے تبدیل شدہ اور Positive شخصیت کے حامل ہوگئے ہیں۔ آپ ماں ہیں تو آپ کی اولاد کو آپ سے پہلے سے زیادہ شفقت، محبت، اپنائیت ملنیچاہیے۔

سلسلہ عظیمیہ کی تعلیمات کو سمجھتے ہوئے اولاد کی دیکھ بھال اور تربیٹ کی طرف آپ کی توجہ بڑھنی چاہیے۔ آپ طالب علم ہیں تو روحانیت میں آنے کے بعد آپ کے آئندہ سال کے نمبر پچھلے سال کے نمبروں سے اچھے ہونے چاہئیں۔ آپ کی تعلیمی پوزیشن بہتر ہونی چاہیے۔

آپ کاروباری شخص ہیں اور بزنس کرتے ہیں تو آپ کا بزنس مزید Flourish کرنا چاہیے۔ آپ کی توجہ اور کوششوں سے آپ کی آمدنی میں اضافہ ہوتا رہنا چاہیے۔ کاروبار میں زیادہ وسعت اور اضافہ ہونا چاہیے۔ زیادہ Prosperity آنی چاہیے۔

آپ Job کرتے ہیں تو آپ کی Promotion جلدی ہونی چاہیے یہ نہ ہو کہ آپ ایک طرف ہوکے بیٹھ جائیں۔  آپ کے ادارے والے اس بات سے پریشان ہوجائیں اور کہیں کہ پہلے تو یہ تھوڑا بہت کام کر بھی لیتا تھا اب تو یہ بالکل کام سے گیا۔  جہاں آپ job کرتے ہیں ان لوگوں کو احساس ہونا چاہیے کہ سلسلہ عظیمیہ میں شامل ہونے اور روحانی علوم سمجھنے کے بعد اس کارکن کی شخصیت میں بڑی مثبت تبدیلی آئی ہے۔ اس کی صلاحیتوں میں اضافہ ہوا ہے۔ اس کی کارکردگی بہت اچھی ہوگئی ہے اور اب تو یہ شخص ہمارے لیے بھی بڑا اثاثہ ہے۔

آپ کی شخصیت میں ایسی تبدیلیوں کا اظہار آپ کی شخصیت سے آپ کی ذات سے سلسلہ عظیمیہ کی تعلیمات کو اپنانے کے فوراً بعد شروع ہوجانا چاہیے۔

سلسلہ عظیمیہ میں داخل ہونے کے بعد بہت سے لوگوں کو اپنے خاندان یا ملنے جلنے والے لوگوں کے سامنے کئی طرح کی صورت حال کا سامنا کرنا پڑتا ہے۔ کچھ لوگ  اتفاق کرتے ہیں کچھ لوگ اختلاف کرتے ہیں۔ جو اختلاف کرتے ہیں ان میں سے کئی لوگ بعض اعتراضات بھی کرتے ہیں۔ کئی لوگ سلسلہ میں شامل ہونے والوں خصوصاً نوجوانوں کو اس راہ سے ہٹا دینے کی کوشش بھی کرتے ہیں کہ بھائی! یہ تم کس چکر میں پڑ گئے ہو۔ یہ تو بڑھاپے کے کام ہیں۔ نوجوانی ان کاموں کے لیے نہیں ہیں۔ تم وظائف اور مراقبے بڑھاپے میں کرنا وغیرہ وغیرہ۔ بعض لوگ ایسا تاثر بھی دینے کی کوشش کرتے ہیں کہ روحانیت کی لائن اختیار کرنا بےعمل، نکمے لوگوں اور ایسے لوگوں کا کام ہے جو زندگی میں کچھ اور نہ کرسکیں۔

اس قسم کے اعتراضات کو سمجھنا اور ان سے وابستہ تاثرات اور منفی تاثر دور کرنا بھی آپ کی ذمہداری ہے۔

یہ ذمہ داری کس طرح  سرانجام دی جائے….؟

 اس کے لیے مناسب بات یہ ہے کہ ایسے لوگوں کے ساتھ بحث مباحثہ میں نہ الجھا جائے۔ آپ اپنے عمل سے ثابت کریں کہ آپ نے نوجوانی کے ایام میں یا زندگی کے کسی بھی دور میں جب روحانی علوم کے حصول کی طرف  توجہ دی سلسلہ عظیمیہ سے وابستگی اختیار کی، مرشد کریم کی صحبتوں سے فیض حاصل کرنا شروع کیا اس کے بعد آپ کی شخصیت میں کتنا نکھار آیا۔

لوگوں کو آپ کے طرز عمل سے معلوم ہوجائے کہ سلسلہ عظٰمیہ میں داخل ہونے سے پہلے آپ اپنے والدین کے لیے، اہل خانہ کے لیے اور معاشرہ کے لیے کتنے مفید تھے اور سلسلہ میں داخل ہونے اور روحانی تعلیمات کو سمجھنے کے بعد آپ اپنے والدین، اولاد، خاندان اور معاشرہ کے لیے کتنے مفید اور کارآمد بن گئے ہیں۔

ابھی میں نے آپ سے عرض کیا تھا کہ سلسلہ عظیمیہ کی تعلیمات ترک دنیا کی تعلیمات نہیں ہیں۔ اسی حوالہ سے میں آپ سے عرض کروں گا کہ دو امور کے بارے میں اللہ تعالیٰ کی طرف سے سخت وعید آئی ہے۔ وہ دو امور یہ ہیں۔

*…. اللہ کے ساتھ شرک۔

*…. بندوں کے حقوق میں کوتاہی۔

جس طرح اللہ تعالیٰ شرک کو معاف نہیں کرے گا اسی طرح حقوق العباد میں کوتاہی کی معافی  بھی نہیں  ملے گی۔

 سلسلہ عظیمیہ کے سعید ارکان کو حقوق العباد کے بارے میں ہمیشہ ذمہ دارانہ اور محتاط رویہ اختیار کرنا چاہیے۔ یاد رہے کہ حقوقالعباد میں کسی قسم کی کوتاہی نہ ہو۔ بیوی، بچوں، شوہر اور اولاد، والدین، پڑوسیوں اور معاشرے کے حوالے سے جو بھی حقوق آپ پر عائد ہوتے ہیں انہیں ادا کرنے کے لیے نیک نیتی اور اخلاص کے ساتھ کوشش کیجیے۔

جن لوگوں نے سلسلہ عظیمیہ کی دعوت پر غور و فکر کیا اور اسے قبول کیا ایسے اکثر لوگوں پر اللہ کی رحمت ہوئی۔ اللہ تعالیٰ کے فضل و کرم سے انہوں نے روشنی پائی، نور پایا۔ یہ روشنی اور نور راستہ بھی دکھاتے ہیں، حقیقت کا سراغ بھی دیتے ہیں اور آخرکار خود نور منزل بن جاتا ہے۔

علم کے طالب اور اللہ کی معرفت کے امیدوار سلسلہ عظیمیہ کے مخلص اور سچے اراکین کو یہ روشنی اور نور مبارک ہو۔ اس روشنی سے اپنے ظاہر و باطن میں اجالا کیجیے اور اس نور سے اپنی روح کو منور کیجیے۔ ساتھ ساتھ…. یہ بھی یاد رکھیے کہ آپ کو ملنے والی یہ روشنی اور نور آپ کے لیے سعادت کے ساتھ ساتھ آپ کے پاس امانت بھی ہیں۔ یہ روشنی آپ کے پاس ان لوگوں کی امانت ہے جن لوگوں تک ابھی  یہ روشنی پہنچی نہیں ہے ایسے لوگوں کا  آپ کے اوپر یہ حق ہے کہ آپ ان تک یہ روشنی پہنچائیں۔ اس کے لیے آپ کو جو بھی کوششیں کرنا ہوں ان کے لیے خود کو تیار کیجیے۔ معاشرہ کے دوسرے لوگوں تک سلسلہ عظیمیہ کا پیغام پہنچانا، اس بات کی کوشش کرنا کہ ان کے ظاہری و باطنی وجود بھی اس روشنی سے منور ہوں، لوگوں پر کوئی احسان کرنا نہیں ہے بلکہ یہ تو دوسرے لوگوں کا آپ پر حق ہے۔  آپ کا یہ عمل بھی حقوق العباد کے زمرے میں آتا ہے۔ جس طرح آپ کے اوپر آپ کے والدین کے، آپ کی اولاد کے، بھائی بہنوں کے حقوق ہیں اسی طرح سلسلہ کے پیغام، دعوت اور سلسلہ کی تعلیمات کے حوالہ سے معاشرے کے آپ پر حقوق ہیں۔

ہمیں خود تعلیم حاصل کرنے کے ساتھ ساتھ اپنے آپ کو اس کام کے لیے بھی تیار  کرنا چاہیے کہ ہم اس روحانی مشن کو پھیلانے والے بنیں۔ سلسلہ عظیمیہ کے ایک رکن کی حیثیت سے عمومی طور پر  یہ ہم سب کی ڈیوٹی ہے۔ ہمیں اس ڈیوٹی کا ہمیشہ خیال رکھنا چاہیے۔

ہم میں سے کچھ لوگوں کو اس کام کی انجام دہی کے لیے اپنے آپ کو خاص طور پر تیار کرنے کی طرف بھی توجہ دینی چاہیے۔ سلسلہ عظیمیہ کے کچھ اراکین کو مبلغ کا کردار ادا کرنے کے لیے خود کو تیار کرنا چاہیے۔ اس وقت بھی ماشاء اللہ بہت سے لوگوں نے سلسلہ عظیمیہ کے لیے بہت زیادہ ایثار کرکے اپنے آپ کو اس کام میں مصروف کیا ہوا ہے۔ سلسلہ عظیمیہ کے ایسے تمام افراد، تمام بھائی  بہنیں، نوجوان ساتھی، بزرگ انتہائی درجہ قابل احترام اور لائق صد تکریم ہیں۔ ہم اپنے ان تمام بہن بھائیوں کو سلام پیش کرتے ہیں۔

سلسلہ عظیمیہ کے ہر رکن کا فرض ہے کہ وہ ذاتی طور پر اپنے دائرہ اثر میں سلسلہ عظیمیہ کے پیغام کو پہنچائے اور جو لوگ خاص طورپر سلسلہ عظیمیہ کے پیغام کو پھیلانے کی کوشش اور جدوجہد میں مصروف ہیں ان کے ساتھ انتہائی عزت و احترام سے جہاں تک اور جس طرح  ہوسکے سلسلہ عظیمیہ کے پیغام کی تبلیغ کے لیے تعاون فرمائیں۔

ڈاکٹر وقار یوسف عظیمی