اسماء الحسنیٰ سے مشکلات کا حل

الفتاح کے لغوی معنی کھولنے والے Opener کے ہیں۔ شرح اسماء الحسنٰی کے مصنف علامہ قاضی سلیمان منصور پوری فرماتے ہیں ….
الفتاح وہی ہے جو مشکلات، مہمات(کی گرہوں) کو کھول دیتا ہے۔ فتاح وہی ہے جو دل کو حق کے لیے کھول دیتا ہے۔ فتاح وہی ہے جو زبان پر علوم کو جاری فرما دیتا ہے۔ فتاح وہی ہے جو اہل حق اور باطل کے درمیان فیصلہ فرماتا ہے۔ فتاح وہی ہے جو صادقین کے صدق کو ظاہر کرتا ہے۔ کاذبین کی اصلیت سب پر کھول دیتا ہے۔
اہل ایمان کو اس ذات مقدس سے کشائش ظاہری و باطنی کی اُمید رکھنی چاہیے۔
اﷲ تعالی فرماتا ہے کہ:

اﷲ اپنی جتنی رحمت لوگوں کے لیے کھول دے اسے کوئی بند کرنے والا نہیں اور جس کے لیے بند کردے ۔ بس اس کے بعد اس کو کوئی جاری کرنے والا نہیں اور وہی غالب حکمت والا ہے ۔[سورۂ فاطر:آیت2]

الفتاح مشکل کشا کو بھی کہتے ہیں اور فاتح کو بھی۔ یعنی اپنی مہربانی سے بند چیز کو کھول دے اور رہنمائی و نشاندہی سے مشکل کو حل کر دے۔ انبیاء علیہم السلام کو فتح عطا فرمائے۔ فرمایا:

إِنَّا فَتَحْنَا لَكَ فَتْحًا مُّبِينًا 

ترجمہ: (اے نبی) ہم نے آپ کو واضح فتح دی۔ [سورۂ الفتح] قرآن میں ایک دعا ان الفاظ میں ہے۔

 رَبَّنَا افۡتَحۡ بَیۡنَنَا وَ بَیۡنَ قَوۡمِنَا بِالۡحَقِّ وَ اَنۡتَ خَیۡرُ الۡفٰتِحِیۡنَ

[سورۂ اعراف: آیت89] اسمِ مبارک ‘‘الفتاح’’ قرآن میں صرف ایک مرتبہ آیا ہے۔

قُلۡ یَجۡمَعُ بَیۡنَنَا رَبُّنَا ثُمَّ یَفۡتَحُ بَیۡنَنَا بِالۡحَقِّ ؕ وَ ھُوَ الۡفَتَّاحُ الۡعَلِیۡمُO

[سورۂ سبا:آیت26]

اسمِ مبارک الفتاح کے اعداد 489ہیں۔
حضرت اشرف علی تھانویؒ ، اعلیٰ حضرت احمد رضا خان بریلویؒ اور کئی بزرگوں کی کتب میں اسم ِ مبارک ‘‘الفتاح’’کو قلب میں طہارت ونورانیت اور رزق میں آسانی کے لیے تجویز کیاگیاہے۔
حضرت اشرف علی تھانویؒ فرماتے ہیں کہ بعد نمازِ فجر سینے پر ہاتھ رکھ کر 71مرتبہ اس اسمِ مبارک کو پڑھنے سے کاموں میں آسانی پیدا ہوتی ہے۔ [اعمالِ قرآنی] اعلیٰ حضرت احمد رضا خان بریلویؒ فرماتے ہیں کہ مشکل کام جن کا حل دشوار ہو اس اسم مبارک کی برکت سے آسانی سے حل ہوجاتے ہیں۔
کتاب ظفر جلیل (شرح حصن حصین) میں ہے کہ جو کوئی بعد نماز فجر اپنے دونوں ہاتھ سینے پر رکھ کر ستر مرتبہ یا فتاح کا ورد کرلے۔ اس کے آئینہ دل سے زنگ و میل دور ہوگا اور صفائی قلب و نورانیت ہوگی۔
یہ اسم امتحان دینے والوں، وکیلوں، نئی نئی دریافتیں کرنے والوں، مفکروں، مبلغوں اور مقرروں کے لیے شمع شبستان کا کام دیتا ہے۔
شیخ بونی ؒ فرماتے ہیں کہ یہ اسم سالکوں کے لیے مناسب ہے جو کثرت سے اس کا ورد کرے تو پروردگار ابوابِ فتح و نصرت کشادہ فرمادے۔ نیز جو شخص دو رکعت نماز ادا کرے اور رکعت اول میں بعد فاتحہ یسین شریف اور دوسری رکعت میں بعد فاتحہ سورہ تبارک الذی پڑھے بعد نماز 489 مرتبہ یافتاح پڑھے تو مشکلات آسان ہوں اور حاجت برآئے۔ [شمع شبستان رضا] جو شخص اس اسم کا بکثرت ورد کرتا ہے اس کا قلب روشن ہوجاتا ہے اور اس کو اپنے مقاصد میں کامیابی ہوتی ہے۔ جو لوگ مقرر لیکچرار یا ادیب ہوں وہ اس اسمِ مبارک کا ورد نمازِ فجر کے بعد کریں۔ وکیل اگر نمازِ فجر کے بعد 101مرتبہ اس اسم کا ورد کریں تو ان شاء اﷲ مقدمہ میں کامیابی پائیں گے۔
جو شخص کسی مقدمہ یا قید میں بے گناہ پھنس گیا ہے تو وہ خود یا اس کے عزیز ورشتہ دار اکیس ہزار مرتبہ سا ت دن تک برابر اس اسم کا ورد کریں۔ ان شاء اﷲ جلد ہی اس مصیبت سے چھٹکارا ملے گا۔
کوئی طالب علم اسمِ مبارک ‘‘الفتاح’’ کا اس کے اعداد کے مطابق 489مرتبہ روزانہ ورد کرے تو ان شاء اﷲ اس کو امتحان میں کامیابی نصیب ہوگی۔
کوئی شخص پریشانی اور سخت ضرورت میں مبتلا ہو تو بعد نمازِ عشاء سو مرتبہ الفتاح اول آخر گیارہ گیارہ مرتبہ درود شریف کے ساتھ ورد کرے انشاء اﷲ العزیز ضرورت پوری ہوگی اور پریشانی دور ہوجائے گی۔
نمازِ فجر کے بعد اوّل وآخر تین مرتبہ درود پاک پڑھے اور درمیان میں 121مرتبہ اسمِ مبارک ’’الفتاح‘‘ کا ورد کرے تو اﷲ اس کے رزق میں فراوانی عطا فرمائے گا اور اسے کشائش نصیب ہوگی۔
نسیان اور بھول جانے کی شکایت میں مبتلا افراد نمازِ فجر کے بعد 99مرتبہ اس اسمِ مبارک کو پڑھ کر سینے پر پھونک ماریں ان شاء اللہ چند یوم میں بھول جانے کی عادت میں رفتہ رفتہ کمی آئے گی اور حافظہ قوی ہوگا۔
یا فتاح اور یا رزاق دونوں اسماء ملا کر وظیفہ کی طرح پڑھنا بھی فیوض وبرکات کے لحاظ سے بہت مؤ ثر ہے۔ حصولِ دولت کے لیے یہ وظیفہ 303مرتبہ روزانہ صبح پڑھنا بہت مفید ہے۔ اگر کوئی آثار نظر نہ آئے تو وظیفہ کی تعداد بڑھا کر 2100مرتبہ روزانہ کرلینی چاہیے ان شاء اﷲ مقصد حل ہوگا۔ عام طور پر روزانہ چند بار پڑھ لینے سے بھی مال ودولت میں خیر وبرکت رہتی ہے۔
جوشخص قرضو ں میں جکڑا ہوا ہو اور اداءٔ قرض کے اسباب نظر نہ آرہے ہوں اسے چاہیے کہ چالیس روز الفتاح الرزاق بعد نمازِعشا گیارہ ہزار مرتبہ روزانہ پڑھے ان شاء اﷲ قرض سے خلاصی ملےگی۔

وھاب ، وھب سے مشتق ہے جس کے معنی ھبہ کرنا، ھبہ اس عطیہ کو کہتے ہیں جو کسی غرض کے بغیر دیا جائے۔ الوھاب وہ ہستی ہے جو اپنی مخلوق کو بغیر کسی غرض کے عطاکرنے والیBestower ہے۔

 قرآن میں حضرت ابراہیم ؑ کی دعا ہے کہ

اَلۡحَمۡدُ لِلّٰہِ الَّذِیۡ وَھَبَ لِیۡ عَلَی الۡکِبَرِ اِسۡمٰعِیۡلَ وَ اِسۡحٰقَ ؕ اِنَّ رَبِّیۡ لَسَمِیۡعُ الدُّعَآءِ

 تعریف اﷲ کے لیے ہے جس نے بڑھاپے میں مجھے اسمعٰیل اور اسحٰق عطا فرمائے یقیناً میرا پالنہار اللہ دعاؤں کا سننے والا ہے۔[سورۂ ابراہیم (14) :39]

قرآن مجید میں اس اسمِ مبارک کے حوالے سے دو دعائیں موجود ہیں۔ پہلی دعا استقامت کے لیے ہے۔ 

رَبَّنَا لَا تُزِغۡ قُلُوۡبَنَا بَعۡدَ اِذۡ ھَدَیۡتَنَا وَ ھَبۡ لَنَا مِنۡ لَّدُنۡکَ رَحۡمَۃً ۚ اِنَّکَ اَنۡتَ الۡوَھَابُ

اے ہمارے رب! ہدایت ملنے کے بعد ہمارے قلوب ٹیڑھے نہ ہوجائیں اور ہمیں اپنے پاس سے رحمت عطا فرما یقینا تو ہی بہت بڑی عطا کرنے والا ہے۔ [سورۂآلِ عمران (3) :آیت8]

 رَبِّ اغۡفِرۡ لِیۡ وَ ھَبۡ لِیۡ مُلۡکًا لَّا یَنۡۢبَغِیۡ لِاَحَدٍ مِّنۡۢ بَعۡدِیۡ ۚ اِنَّکَ اَنۡتَ الۡوَھَّابُ

اے میرے رب مجھے بخش دے اور مجھے ایسا ملک عطا فرما جو میرے سوا کسی کے لائق نہ ہو تو بڑا عطا کرنے والا ہے۔ [سورۂ ص (38):آیت35]

علم الاعداد کے مطابق ‘‘الۡوَھَّابُ’’کے اعداد 14ہیں۔ امام علی رضاؓ، شاہ عبدالعزیزؒ، حضرتاشرف علی تھانویؒ، اعلیٰ حضرت احمد رضا خان بریلویؒ اور کئی بزرگوں کی کتب میں اسم ِ مبارک ‘‘الۡوَھَّابُ’’کو غربت اور تنگدستی دور کرنے اور غیب سے رزق کے اسباب فراہم کرنے کے لیے خاص تجویز کیا گیا ہے۔
شاہ عبدالعزیز ؒ رزق کی فراہمی اور وسعت کے لیے یہ عمل بتاتے ہیں کہ
دن کے دس بجے وضو کرکے چار رکعتیں نفل چاشت کی نیت سے اداکریں اور سجدہ میں جاکر 104مرتبہ یا وھاب کا ورد کریں۔ ہر ماہ میں سات روز یہ عمل جاری رکھیں۔
اعلیٰ حضرت احمد رضا خان بریلویؒ رزق میں فراخی اور تونگری کے لیے ایک خاص عمل بتاتے ہیں کہ جمعرات یا جمعہ کو روزہ رکھ کر فجر سے پہلے سو مرتبہ درود شریف پڑھ کر دو دو رکعت نفل ادا کی جائے اور ہر رکعت میں سورۂ فاتحہ کے بعد آیت الکرسی 15 مرتبہ، قل ہوا للہ 5 مرتبہ اور بعد سلام 41 مرتبہ یا وھاب کا ورد کیا جائے۔
اس کے علاوہ آپ فرماتے ہیں کہ چالیس روز تک روزانہ 700 مرتبہ یہ پڑھا جائے۔

هَبْ لِي مُلْكَ عِشْقِكَ یَا وَهَّابُ
هَبْ لِي مُلْكَ رِزْقِكَ یَا وَهَّابُ 

ایک عمل یہ بھی ہے کہ بعد نماز عشاء یَا وَهَّابُ 444 مرتبہ ایک نشت میں چالیس دنوں تک پڑھا جائے۔ [شمع شبستانِ رضا] نمازِ عشاء کے بعد ایک ہزار مرتبہ الوھاب کا ورد رزق میں برکت کا ذریعہ بنتا ہے۔ کوئی شخص مالی تنگی میں مبتلا ہو تو روزانہ ایک ہزار مرتبہ اسم یاوھاب فجر کی نماز کے بعد پڑھتارہے۔ انشاءاللہ وسائل ملیں گے۔ یہ اسم ایک ہزار مرتبہ کاغذ پر لکھ کر پاس رکھنے سے بھی رزق کی تنگی ختم ہوجاتی ہے۔
اگر کسی شخص کو کوئی حاجت درپیش ہو تو آدھی رات کو مسجد میں یا گھر کے صحن میں تین بار سجدہ کرکے سجدہ سے سر اُٹھاکر سو مرتبہ یا وھاب پڑھے۔ ان شاء اﷲ حاجت پوری ہوجائے گی۔ چاشت کی نماز کے بعد آیت: وَ اسۡجُدۡ وَ اقۡتَرِبۡ [سورۂعلق (96):19] پڑھ کر سات مرتبہ یاوھاب پڑھنے سے بندہ مخلوق کا محتاج نہیں رہتا۔
حضرت اشرف علی تھانوی ؒ کے مطابق چاشت کے نوافل میں آخری سجدہ میں 14 مرتبہ یاوھاب کا ورد غنااور قبولیت پیدا کرتاہے۔[اعمالِ قرآنی] اگر کوئی مقصد ہو تو آدھی رات کو ننگے سر کھلی جگہ میں اسم مبارک یاوھاب کا ورد (حسب توفیق) پڑھیں ان شاء اﷲ دعا قبول ہوگی۔ دن میں کسی بھی وقت کسی میدان میں کھڑے ہوکر دعا کے لیے ہاتھ بلند کرکے سو مرتبہ اس اسم کو پڑھنے سے مشکلات آسان ہوجاتی ہیں۔
جس شخص کا ذاتی مکان نہ ہو تو روزانہ بکثرت یاوھاب کا ورد کرتارہے ان شاء اﷲ اس کے ذاتی مکان کے لیے اسباب پید اہوجائیں گے۔
ملازمت کے حصول کے لیے نمازِ فجر اور عشاء کے بعد باوضو حالت میں قبلہ رخ ہوکر اول وآخر درود شریف کے ساتھ گیارہ سو مرتبہ اسم ِ مبارک یاوھاب کا ورد کرنے سے ان شاء اﷲ بہت جلد مراد پوری ہوگی۔
اگر کسی جگہ بارش نہ ہوتی ہو اور قحط اور خشک سالی کی کیفیت پیدا ہوگئی ہو تو گیارہ آدمی مل کر اسم مبارک ‘‘یاوھاب’’ 71 ہزار مرتبہ پڑھیں اور اول آخر19,19 مرتبہ درود شریف پڑھیں ۔ یہ عمل تین دن مسلسل کیا جائے اور ہر مرتبہ ختم کے بعد بارانِ رحمت کے لیے دعا کی جائے انشاءاﷲ بارانِ رحمت کا نزول ہوگا۔
جو شخص ‘‘یا وھاب’’ کا ورد کثرت سے کرے گا اس کے مزاج میں رحم دلی، نرم خوئی، سخاوت اورفیاضی کی صفات پیدا ہوں گے۔ ایسا شخص کسی سائل کے سوال کو رَدّ کرنا پسند نہیں کرے گا۔
اگر کسی شخص کے سر میں در د ہو تو اس کی پیشانی دائیں ہاتھ سے پکڑ کر یاوھاب پندرہ مرتبہ ایک ہی سانس میں پڑھ کر دم کیا جائے۔ ان شاء اﷲ درد جاتا رہے گا۔
جو شخص روزانہ ایک ہزار مرتبہ یاحیٔ یا قیوم اور ایک ہزار مرتبہ یا وھاب پڑھے گا تو اﷲ کے فضل وکرم سے اس کے رزق میں کشائش پیدا ہوگی۔

الۡخَالِقُ: