تاریخ و سیرت

سیدنا صدیق اکبر ؓ کے یومِ وصال 22 جمادی الثانی کی مناسبت سے خصوصی مضمون

حضرت ابوبکرؓ نے ہی سب سے پہلے کلمہ طیبہ کا ذکر تلقین کیا۔ کشف المحجوب میں حضرت داتا گنج بخشؒ نے آپؓ کو ’’امام تصوف‘‘ لکھا ہے۔ سلسلہ نقشبندیہ کا سلسلہ امام جعفر صادق ؒ کے واسطے سے حضرت ابوبکرؓ تک پہنچتا ہے۔

 

ایک مرتبہ دربار رسالت مآبﷺ میں صحابہ کرام ؓ اس طرح موجود تھے گویا شمع کے گرد پروانے….
سیدنا حضور علیہ الصلوٰۃ والسلام نے دریافت فرمایا ’’آج تم میں سے کس کا روزہ ہے؟‘‘….
سب خاموش رہے۔ ایک صاحب نے اس حکم پر عجزو انکساری کے ساتھ عرض کیا ’’ حضورؐ میں روزے سے ہوں ‘‘
پھر آپ ﷺ نے پوری مجلس پر نظر دوڑاتے ہوئے فرمایا ’’ تم میں سے کس کس نے آج مسکین کو کھانا کھلایا؟‘‘….
پھر وہی صاحب کھڑے ہوئے۔ آپﷺ نے تیسری مرتبہ دریافت فرمایا ’’کسی نے آج مریض کی عیادت کی؟‘‘….
اس پر بھی اُنہی صاحب کا جواب اثبات میں آیا۔
پھر دریافت کیا گیا ’’کوئی جنازے کے ساتھ چلا؟‘‘….
وہی صاحب دوبارہ کھڑے ہوئے اور عاجزی سے بولے ’’حضورﷺ میں جنازے کے ساتھ چلا‘‘….
یہ سُن کر آنحضرت ﷺ نے ارشاد فرمایا ’’جو ایک دن میں اس قدر نیکیاں جمع کرلیتاہو وہی یقینا جنت میں جائے گا‘‘….
یہ صاحب جو بار بار کھڑے ہوکر ارشادِ نبویؐ پر اقرار کررہے تھے، حضرت ابوبکر صدیق ؓتھے….۔
صدق و صفا، زہد و تقویٰ، تواضع اور معرفت کا خزینہ یارِغارحضرت ابوبکر صدیق ؓ….۔
رنگ گورا، جسم دبلا پتلا، گھونگھریالے بال خشخشی داڑھی، رقیق القلب اور سادہ طبیعت کے مالک حضرت ابوبکر صدیق ؓ کا شمار قبل از اسلام قریش کے رئووسا میں ہوتا تھا۔ مال و دولت کے ساتھ ساتھ حسن اخلاق، ہمدردی، وسعتِ معلومات، دانشمندی اور معاملہ فہمی کی امتیازانہ صفات کے حامل ہونے کی وجہ سے اپنی قوم میں محبوب اور معتمد تھے۔ ناصرف ماضی کے قصوں سے واقف تھے بلکہ دنیا کے موجودہ حالات سے تجارت کے سفر کے ذریعے آگاہ تھے۔ آپؓ کی صفات کی شہرت مکہ کے نواح تک ہی محدود نہیں تھی بلکہ عرب کے علاوہ دوسرے ممالک میں بھی آپؓ کی اخلاقی خوبیوں سے لوگ واقف تھے۔

کشف و کرامات:

گوکہ صحابہ کرام ؓ طبعاً کشف وکرامات کے اظہار سے گریز کیا کرتے تھے لیکن جس طرح عشق اور مشک چھپائے نہیں چھپتا اسی طرح بحرِروحانیت و معرفت سیدنا حضور علیہ الصلوٰۃ والسلام سے فیضیاب ہونے والے صحابۂ کرامؓ میں نور نبوت کا جھلکنا بھی لازمی ہے۔ انبیائے کرام ؑ سے کوئی خرق عادت صادر ہو تو اسے معجزہ کہتے ہیں اور انبیاء کے ورثاء سے صادر ہو تو کرامت کہلاتی ہے۔صحابۂ کرامؓ میںحضرت ابوبکر صدیق ؓ کو ممتاز مقام حاصل تھا اس لئے تمام تر احتیاط کے باوجود آپ ؓ سے بھی چند کرامات صادر ہوئیں ۔
ایک مرتبہ سیدنا حضور علیہ الصلوٰۃ و السلام کی مجلس سے چند افراد کو حضرت ابو بکر ؓ بطور مہمان اپنے گھر لے آئے۔ رات کے وقت کھانا شروع ہوا تو سب مہمانوں نے خوب سیر ہوکر کھانا تناول کیا۔ ان مہمانوں کا بیان ہے کہ جب ہم کھانے کے برتن میں سے لقمہ اُٹھاتے تو جتنا کھانا ہاتھ میں آتا تھا اُس سے زیادہ کھانا برتن میں بڑھ جاتا۔ جب ہم کھانے سے فارغ ہوئے تو کھانا بجائے کم ہونے کے مزید بڑھ گیا ۔ حضرت ابو بکر صدیق ؓ یہ برتن لے کر مسجد نبوی میں چلے گئے۔ وہاں بارہ وفود آئے ہوئے تھے۔ ہر وفد میں بہت سے لوگ تھے ۔ ان سب لوگوں نے اسی برتن سے کھانا کھایا یہاں تک کہ سب سیر ہوگئے۔

ایک اور مشہور واقعہ یہ ہے کہ جب حضرت صدیق اکبر ؓ کا آخری وقت نزدیک آیا تو آپ ؓ نے اپنی صاحبزادی حضرت عائشہؓ کو بلوایا اور یہ وصیت فرمائی ’’میری پیاری بیٹی!….۔ میرے پاس جو مال تھا وہ آج وارثوں کا ہوگیا ہے۔ تمہارے دونوں بھائی عبد الرحمن و محمد اور تمہاری دونوں بہنیںاس مال کو قرآن مجید کے حکم کے مطابق آپس میں تقسیم کرلینا‘‘….۔ حضرت عائشہؓ نے حیرت سے کہا ’’ ابا جان میری تو ایک ہی بہن اسماء ہیں۔ یہ دوسری بہن کون ہے؟‘‘….۔۔ حضرت صدیق اکبر ؓ نے فرمایا ’’تمہاری یہ بہن میری زوجہ بنتِ خارجہ کے بطن سے پیدا ہوگی‘‘۔
آپ ؓ کے انتقال کے بعد یہ بات اسی طرح پوری ہوئی۔ حضرت بنتِ خارجہ ؓ سے ایک لڑکی کی پیدائش ہوئی جس کا نام اُم کلثوم رکھا گیا۔
علامہ تاج الدین سبکی تحریر کرتے ہیں’’اس واقعہ سے حضرت ابوبکر صدیق ؓ کی دوکرامات ثابت ہوئی ہیں۔ اوّل یہ کہ آپؓ کو پہلے سے یہ علم ہوگیا تھا کہ میں اسی مرض کے باعث دنیا سے رحلت کروں گا۔ دوم یہ کہ زوجہ محترمہ سے لڑکی ہی کی پیدائش ہوگی‘‘۔

کمال استغنا:

روحانیت کابنیادی نکتہ یہ ہے کہ ماسوائے اللہ کے ہر چیز کی نفی کردی جائے۔ نفی کا مطلب یہ نہیں کہ بندہ سب کچھ چھوڑ چھاڑ کر جنگلوں میں نکل جائے بلکہ اللہ تعالیٰ کے سوا ہر چیز کو ثانوی حیثیت دے دی جائے۔ وہ جو کچھ دیکھے اللہ کے تناظرمیں دیکھے ، جو کچھ سوچے پہلے اس کا ذہن اللہ کی طرف جائے ۔ اسے استغنا کہا جاتا ہے جو صفت صمدیت کا عکس ہے۔
حضرت ابوبکر صدیق ؓ دولت استغنا سے مالا مال تھے۔ اُنہوں نے اللہ اور اللہ کے رسولﷺ کے علاوہ ہر چیز کی نفی کردی تھی۔ ایک مرتبہ رسول اللہ ﷺ نے صحابۂ کرامؓ کو ایک جنگ کے لئے عطیات جمع کرنے کا حکم دیا ۔ حضرت عمر ؓ فرماتے ہیں ’’مجھے خیال گزرا کہ آج میںابو بکرؓ سے سبقت لے جاؤں گا۔ چنانچہ اپنا نصف مال لے کر بارگاہ نبوتﷺ میں پیش کردیا۔ آنحضرتﷺ نے دریافت فرمایا ’’تم نے اہل وعیال کے لئے کتنا مال رکھا ہے؟‘‘….۔
میں نے عرض کیا اتنا ہی جتنا یہا ں مال پیش کیا ہے….۔ لیکن اسی وقت حضرت ابو بکرصدیق ؓ اپنا کُل سرمایہ لئے حاضر ہوئے۔ آنحضور ﷺ نے وہی سوال دہرایا کہ تم نے گھر والوں کے لئے کیا چھوڑا ہے تو اُنہوں نے عرض کیا ’’ اُن کے لئے خدا اور اس کا رسولﷺ ہے‘‘۔
اس بات سے میں نے جان لیا کہ میں کبھی ابو بکرؓ سے سبقت نہیں لے سکتا‘‘۔
حضرت داتاگنج بخش ؒ تحریر کرتے ہیں’’ جب خدا تعالیٰ بندہ کو کمال صدق پر پہنچادیتاہے اور عزت کے مقام پر اُسے متمکن کردیتا ہے تو وہ امر الٰہی کے وارد ہونے کامنتظر رہتاہے کہ وہ کس طور پر نازل ہوتا ہے چنانچہ وہ امر الٰہی کے مطابق ہوجاتا ہے….۔ اگر حکم آتا ہے کہ وہ فقیر ہو جائے تو وہ فقر اختیار کرلیتا ہے۔ اگر حکم ہوتا ہے کہ امیر ہوجائے تو امیر ہوجاتا ہے۔ اس میں اپنی طرف سے کوئی تصرف نہیں کرتا۔ جیساکہ حضرت ابو بکر صدیق ؓ نے ابتدا سے انتہا تک سوائے تسلیم امر حق کے کوئی دوسری راہ اختیار نہیں کی کیونکہ وہ تمام مسلمانوں کے عموماً اور اہلِ طریقت کے خصوصاً امام اور پیشوا ہیں‘‘۔

حضرت داتا صاحب مزید تحریر کرتے ہیں ’’حضرت ابوبکر صدیق ؓنے اپنی ایک مناجات میں فرمایا اے اللہ! ….۔ میرے لئے دنیا فراغ کردے اور مجھے اس سے زاہد بنادے….۔
پہلے تو آپ ؓ نے فرمایا کہ دنیا مجھ پر فراغ کردے اور پھر فرمایا مجھے اس کی آفت سے محفوظ رکھ۔ اس میں ایک رمز یہ ہے کہ پہلے مجھے دنیا عطافرما تاکہ اس کا شکریہ ادا کروں پھر اس بات کی توفیق بخش کہ محض تیری خوشنودی کے لئے اس کو فی سبیل اللہ خرچ کرنے کا درجہ بھی حاصل کروں‘‘۔

 

روحانی علوم کی منتقلی:

روحانی علوم کاغذ قلم سے نہیں سیکھے جاتے بلکہ یہ علوم منتقل ہوتے ہیں ۔ حضرت ابوبکر صدیق ؓ دربار رسالتؐ کے حاضر باش صحابی تھے ۔ آپ ؓ کا قلب اطہر نور نبوت سے لبریز تھا اور رسول اللہ ﷺ نے معرفت کے نور سے اپنے اس جانثار ساتھی کاباطن روشن کردیا تھاچنانچہ روحانی علوم کی اس منتقلی کا واضح اشارہ سیدنا حضور علیہ الصلوٰۃوالسلام نے اس طرح فرمایا ’’ ابوبکر….۔ تم سے نماز اور روزوں کی کثرت کی وجہ سے افضل نہیں ہیں بلکہ ایک راز کی وجہ سے افضل ہیں جو اُن کے سینے میں ڈالا گیا ہے‘‘۔
ایک اور موقع پر فرمایا ’’ میرے رب نے جو کچھ میرے دل میں ڈالا وہ میں نے ابوبکر کے قلب میں ڈال دیا‘‘۔
سرچشمہ ٔ روحانیت اور راز کنائے حقیقت ومعرفت حضرت محمد رسول اللہ ﷺ سے معرفت کے جام نوش کرنے کے باوجود حضرت ابوبکر ؓ صحو کے بجائے سکر میں زیادہ رہتے۔ سرورِ عشق کو مدہوشی میں تبدیل کرکے افشائے راز کو کبھی پسند نہ فرمایالیکن پھر بھی کہیں نہ کہیں باطن کی دنیا ظاہری دنیا میں بھی اپنا اثر دکھا دیتی چنانچہ قیام صلوٰۃ کے دوران خشیت الہٰی سے اتنے بے قابو ہوجاتے کہ روتے روتے ہچکیاں بندھ جاتیں۔ انوارو تجلیات کا اثر اتنا ہوتا کہ وہاں موجود خواتین اور بچوں پر بھی رقت طاری ہوجاتی۔ بعض اوقات نماز میں انتہائی بے حس و حرکت ہوجاتے، چہرے کا رنگ متغیر ہوجاتااور دیکھنے والا اندازہ کرلیتا کہ آپ ؓ اس وقت حضوری کی کیفیت میں ہیں۔
قرآن مجید کی تلاوت فرماتے تو انوار کا اتنا ہجوم ہوجاتا کہ دل گداز ہوکر خشیت میں ڈوب جاتا، آنکھیں نم ہوجاتیں، اسرارالٰہی کھل جاتے اور قرآن کے معانی سامنے آنے لگتے۔ بعض مواقع پر اس قدر پھوٹ پھوٹ کر روتے کہ آس پاس لوگ جمع ہوجاتے۔

عشق رسول ﷺ:

حضرت صدیق اکبرؓ عشق رسولؐ کے اعلیٰ ترین مرتبے پر فائز تھے۔ جب واقعہ معراج پیش آیااور رسول اللہﷺنے اہل مکہ سے بیان فرمایاکہ آپ ﷺ رات میں خانہ کعبہ سے بیت المقدس اور پھر وہاں سے آسمانوں پر تشریف لے گئے تو یہ بات سُن کر مشرکین کے لئے ایذاء رسانی کا نیا موقع ہاتھ آگیا۔
ابوجہل نے ابوبکر ؓ کو روک کر پوچھاکہ کوئی آدمی ایک ہی رات میں اتنا فاصلہ طے کرسکتا ہے۔
حضرت ابوبکر ؓ نے پوچھا ’’کس لئے پوچھتے ہو‘‘….۔ تواس نے کہا کہ محمد (ﷺ ) آج یہی کہہ رہے ہیں۔
یہ سُن کر حضرت ابوبکر ؓ نے فرمایا ’’ اگر رسول اللہ ﷺ نے فرمایا ہے تو یہ بات بالکل سچ ہے۔ جب اللہ آسمان سے چند لمحوں میں وحی نازل کرسکتاہے تو رسول اللہ ﷺ کو لمحہ بھر میں زمین سے آسمانوں تک سیر کرانے میں کیا چیز مانع ہے؟‘‘….۔
یہ بات سُن کر ابوجہل بغلیں جھانکنے لگا۔
ہجرت مدینہ کے وقت یار غار حضرت ابوبکر صدیق ؓ کے ہمراہ آنحضور ﷺ جب غار ثور میں تشریف لائے توحضرت ابوبکرؓ نے پہلے خود داخل ہوکر سارے سوراخوں کو بند کردیا پھر آنحضرت ﷺ سے اندر تشریف لانے کی درخواست کی۔ آپ ﷺ غار میںاپنے رفیق کے زانو پر سر مبارک رکھ کر مشغول استراحت ہوگئے۔ اتفاقاً اسی جگہ ایک سوراخ بند ہونے سے رہ گیا تھا۔ اس سوراخ میں ایک زہریلا سانپ تھا….۔ حضرت ابوبکرؓ نے اس سوراخ کو اپنی ایڑی رکھ کر بند کردیا۔ سانپ نے نکلنے کی کوئی راہ نہ پائی تو پاؤں پر ڈس لیا ۔ سانپ کا زہر اثر کرنے لگا۔ درد و کرب سے حالت متغیر ہونے لگی لیکن اس وفاشعار رفیق نے اپنے جسم کو حرکت نہ دی کہ کہیں آپ ﷺ کے آرام میں خلل پیدانہ ہو۔ تکلیف سے بے حال ہونے لگے تو اس کا اثر آنکھوں سے آنسو کے قطرے کی صورت میں ظاہر ہوا۔ یہ قطرہ ٔ چشم آنحضرت ﷺ کے چہرئہ انور پر ٹپکا جس سے حضور ﷺ بیدار ہوگئے۔ آپ ﷺ نے اپنے مخلص غمگسار کو بے چین دیکھا تو وجہ دریافت فرمائی۔
عرض کیا’’ سانپ نے ڈس لیا ہے‘‘۔
آنحضرت ﷺ نے اسی وقت اس مقام پر اپنا لعاب دہن لگادیا اور فوراً ہی زہر کا اثر دور ہوگیا۔
مزاج آشنائے نبوت: سیدنا حضورعلیہ الصلوٰ ۃ والسلام نے اپنے آخری ایام میں ارشادفرمایا ’’اللہ نے اپنے بندے کو یہ حق دیاہے کہ چاہے وہ دنیا کو اختیار کرے چاہے آخرت کو لیکن اس بندے نے آخرت میں اللہ کے قرب کو اختیار کیا‘‘۔
یہ سُن کر حضرت ابوبکر ؓ جان گئے کہ رسول اللہ ﷺ خود اپنا ذکر فرمارہے ہیں اور زار و قطار روئے یہاں تک کہ ہچکیاں بندھ گئیں ۔ لوگ یہ دیکھ کر بہت حیران ہوئے کہ حضرت ابو بکر صدیق ؓ کیوں رونے لگے ۔ اسی کیفیت میں انہوں نے حضور ﷺ سے فرمایا ’’یارسول اللہ ﷺ!…. ہماری جانیں اور اولاد آپ پر قربان ہو۔ ہم آپ ﷺ کے بعد زندہ کیسے رہیں گے؟‘‘….۔

نبوت کا چھیالیسواں حصہ :

حضرت ابوبکر ؓ کو بحر نبوت سے خواب کی تعبیر کا علم بھی منتقل ہواتھاجسے حضور علیہ الصلوٰۃ والسلام نے نبوت کا چھیالیسواں حصہ قراردیا ہے۔ حضور علیہ الصلوٰۃ والسلام نے اپنا خواب صحابہ کے سامنے بیان فرمایا اور امتحان کے طور پر حضرت ابو بکر صدیق ؓ سے فرمایا کہ اس کی تعبیر بتائیں۔
آپ ﷺ نے فرمایا ’’میں نے دیکھا کہ مجھے حلوے کا ایک لقمہ دیاگیاجب میں نے اس کو نگلنا چاہاتو وہ میرے حلق میں پھنس گیااس کے بعد علی نے اپنا ہاتھ ڈال کر اسے نکالا۔‘‘
حضرت ابوبکر صدیق ؓنے عرض کیا ’’اے اللہ کے رسولﷺ! یہ آپﷺ کی ایک جنگی مہم (سریہ) میں سے ایک مہم ہے۔ اس میں بعض پسندیدہ چیزیں پیش آئیں گی اور بعض میں رکاوٹیں پیش آئیں گی پھر علی کو بھیجیں گے تو وہ اسے آسان بنادیں گے۔‘‘
حضرت ابوبکرؓ نے ہی سب سے پہلے کلمہ طیبہ کا ذکر تلقین کیا۔ کشف المحجوب میں حضرت داتا گنج بخشؒ نے آپؓ کو ’’امام تصوف‘‘ لکھا ہے۔ سلسلہ نقشبندیہ کا سلسلہ امام جعفر صادق ؒ کے واسطے سے حضرت ابوبکرؓ تک پہنچتا ہے۔

 

سیدنا صدیق اکبر ؓ کے یومِ وصال 22 جمادی الثانی کی مناسبت سے خصوصی مضمون

آپؓ سفر ہو یا حضر، ہمیشہ اللہ کے رسولﷺ کے ساتھ رہتے اور ہر وار کے سامنے سینہ سپرہوجاتے۔

اندھیری رات ہے ، چاروں طرف ہو کا عالم ہے۔ دو نورانی صورت انسان خاموشی سے بستی سے نکل کر جنوب کی سمت چل پڑتے ہیں۔ قرائن سے صاف ظاہر ہو رہا ہے کہ اُن میں سے ایک مقتدا ہے اور دوسرا مقتدی ، مقتدی کی حرکات و سکنات اور اُس کی اضطراب کیفیات سے عیاں ہے کہ وہ سخت خطرے میں ہیں۔ ساتھی اپنے محبوب مرشد و رہنما کے کبھی آگے آگے چلتا ہے اور کبھی پیچھے پیچھے ۔ کبھی اُن کے دائیں طرف ہوجاتا ہے اور کبھی بائیں طرف ۔ اگر کسی طرف سے کوئی حملہ ہو تو وہ اُس پر ہو اور اُس کا جان سے پیارا محبوب ہر قسم کے گزند سے محفوظ رہے۔
تین میل کا فاصلہ طے کر کے وہ پہاڑ کے ایک غار کے دہانے پر پہنچتے ہیں۔ نیا ز مند ساتھی نے نہایت ادب و احترام سے عرض کیا ۔ ’’ اس سے پہلے کہ ہم دونوں اس ویران ، سنسان اور تاریک غار میں پنا ہ کے لیے داخل ہوں ، میرے آقا ! آپ باہر تشریف رکھیے میں تنہا جا کر پہلے اسے صاف کرتا ہوں۔‘‘
اپنے رہنما کی اجازت حاصل کرکے وہ غم گسار اور جاںنثار رفیق غار میں داخل ہوجاتا ہے ۔ گھٹا ٹوپ اندھیرے میں ٹٹول ٹٹول کر اُسے صاف کرتا اور اپنی چادر پھاڑ پھاڑ کر زہریلے جانوروں کے سوراخ بند کر دیتا ہے ۔ پورا اطمینان کر لینے کے بعد حاضرِ خدمت ہو کر عرض کرتا ہے۔
’’ حضور تشریف لے آئیے ۔ ‘‘
یہ فدا کار اور عقیدت مند ساتھی چمنستان ِ انسانیت کا وہ گل ِسبد ہے جسے تاریخ ابو بکر صدیق ؓ کے نا م سے یاد کرتی ہے۔ وہ اپنی اس خوش قسمتی پر نازاں ہے کہ اُسے ان خطرناک ، پُر آشوب اور ہولناک حالات میں اپنے مرشد او ر رہنما ، فخر موجودات سر ور کونین محمد مصطفی ﷺ کی رفاقت کی عظیم ترین سعادت عطا ہوئی ہے ۔
خدا کے حکم سے اُس کا آخری رسول ﷺ اپنے رفیق خاص حضرت ابو بکر ؓ کے ساتھ مکے کی بستی سے نکل کر مدینے کی طرف رواں دواں ہونے کی تیاری کرنے لگے۔
اور وہ خوفناک اور بھیانک رات بھی آگئی جب کفر میں ڈوبے ہوئے اہل مکہ محسن ِانسانیت کے گھر کو اس اراے سے محاصرے میں لیے ہوئے تھے کہ جو نہی وہ گھر سے باہر قدم رکھیںان پر یکدم حملہ کرکے معاذ اللہ ان کا کام تمام کر ڈالیں۔ ابن سعد کی روایت ہے کہ اس کام پر مختلف قبائل کے بارہ مسلح افراد متعین تھے ۔ اس کائنات کا مالک ان کے سارے منصوبے ناکام بنانے کا فیصلہ کر چکا تھا ۔رسول ﷺ اپنے بستر پر حضرت علی ؓ کو لٹا کر دشمنوں کی آنکھوں میں خاک جھونک کر نکل گئے اور اپنے رفیق خاص حضرت ابو بکر ؓکے گھر تشریف لے گئے جو پہلے ہی اس خطرناک سفر میں اپنی جان سے عزیز ہستی کا ساتھ دینے کے لیے تیا رتھے۔
اللہ کی راہ میں اپنا گھر بار ، عزیز و اقارب اور سب کچھ چھوڑ کر جانے والے دونوں ساتھی مکے سے جنوب کی طرف چل دیے۔ خطرات چاروں طرف منڈلا رہے تھے۔ ظلمتِ شب کی تاریکی اور سیاہی نے پورا ماحول اپنی لپیٹ میں لیے لے رکھا تھا ۔ ہوکا عالم تھا مگر یہ دونوں ساتھی ، جن کے دل انوارِالہٰی کی تجلیات سے منور اور رحمت ِ الہٰی پر بے پناہ اعتماد سے مطمئن تھے ، برابر بڑھے چلے جارہے تھے۔ امام بیہقی نے اس پر خطر سفر کی روئیداد بیان کرتے ہوئے حضرت عمرفاروق ؓ کی یہ روایت درج کی ہے کہ اس ہولناک سفر میں حضرت ابوبکر ؓ کا یہ حال تھا کہ وہ کبھی اللہ کے رسول کے آگے آگے چلتے اور کبھی پیچھے پیچھے ….۔۔ سرکا ر ِدو عالم ﷺ نے اس کی وجہ دریافت کی تو حضرت ابو بکر ؓنے عرض کیا ۔
’’ یا رسول اللہ! جب مجھے تعاقب کرنے والوں کا خیال آتا ہے تو پیچھے چلنے لگتا ہوں اور جب یہ اندیشہ ہوتا ہے کہ کہیں آگے کوئی خطرہ درپیش نہ ہو تو آگے آجاتا ہوں۔ ‘‘
یہ جواب سن کر فخر ِ موجوداتﷺ نے احسان شناسی کے محبت بھرے لہجے میں پوچھا ۔’’ کیا تمہارا مطلب یہ ہے کہ اگر کوئی آفت آئے تو میری بجائے تم پر آئے….؟‘‘ حضور ﷺ کے اس ارشاد پر حضرت ابو بکر ؓنے مہرو محبت اور عقیدت و صداقت کے پاکیزہ جذبات سے سرشار ہو کر عرض کی۔ ’’ جی ہاں۔‘‘
تین میل کا سفر طے کرکے حضور ﷺاور حضرت ابوبکر ؓ غارثور پہنچے ۔ پروگرام کے مطابق یہاں پناہ لینی تھی۔ یہ غار ویران اور سنسان تھی۔ اس کی ویرانی اس شبہے کو تقویت پہنچا رہی تھی کہ یہ زہریلے جانوروں کا مسکن ہے ۔ حضرت ابو بکر ؓ نے اپنے آقا کی سلامتی کے تحفظ کے پیش ِ نظر نہایت ادب سے عرض کیا ۔
’’ آپ ذرا باہر ٹھہریے ۔ میں اندر جا کر غار کو آپ کے لیے صاف اور محفوظ کر آئوں۔‘‘
ابو بکر ؓ غار میں گئے ۔ اندھیرے میں ٹٹول ٹٹول کر اُسے صاف کیا ۔ اپنی چادر پھاڑ پھاڑ کر زہریلے جانوروں کے بل بند کیے ۔ تب حضور ﷺ سے اندر تشریف لانے کے لیے درخواست کی۔
طبرانی ، بزار ، حافظ ابو القاسم بغوی نے یہ روایت بھی نقل کی ہے کہ غار میں ایک بل رہ گیا تھا ۔ حضرت ابو بکر ؓنے اس پر اپنی ایڑی لگا دی کہ ایسانہ ہو کوئی اذیت دینے والا جانور اس بل سے نکل کر حضورؓ کو کاٹ لے ….۔ یہ تھا حضرت ابو بکر ؓکا اپنے آقا اور رہنما پر اپنی جان نثار کر دینے کا پر خلوص جذبہ۔
کفار مکہ حضور ﷺکی تلاش میں غار ثور کے منہ تک پہنچ گئے ۔ دشمن سر پر تھا ۔ عشق ِ رسول میں اپنی ہستی فنا کر دینے والے ابو بکر ؓ کے لیے یہ لمحات نہایت اضطراب انگیز تھے۔ اپنے ہادی مرشد کے سامنے اپنی بے چینی اور بے قراری کا اظہار کیا۔ اُدھر سے اللہ پر بھرو سے کی تلقین ہوئی ۔ ان کیمیا اثر ارشادات نے ابو بکر ؓ کے دل کو سکون و اطمینان اور راحت و یقین کی شاداب کیفیت سے معمور کر دیا ۔ ان اہم لمحات کی منظر کشی خود قرآن مجید نے اس طرح کی ہے۔
’’ تم نے اگر نبی کی مدد نہ کی تو کچھ پروا نہیں ۔ اللہ ان کی مدد اُس وقت کر چکا ہے جب کافروں نے اُسے نکال دیا تھا اور وہ صرف دو میں سے دوسرا تھا جب وہ دونوں غار میں تھے۔ جب وہ ( نبی ) اپنے ساتھی سے کہہ رہا تھا کہ ، غم نہ کرو ۔ اللہ ہمارے ساتھ ہے ۔ اُس وقت اللہ نے اس پر اپنی طرف سے سکون ِ قلب نازل کیا اور اُس کی مدد ایسے لشکروں سے کی جو تم کو نظر نہ آتے تھے او رکافروں کا بول نیچا کر دیا اور اللہ کا بول تو اُونچا ہی ہے ۔ اللہ زبردست اور دانا و بینا ہے ۔ ‘‘ ( سوئہ توبہ )
حضرت ابو بکر ؓجن کا تعلق قبیلہ قریش کے خاندان بنو تیم سے تھا ، عمر میں حضور ﷺ سے تقریباً دو سال چھوٹے تھے۔ باپ کا نام ابو قحافہ تھا ۔ حضرت ابو بکر ؓحضورﷺ کے بچپن کے ساتھی، جوانی کے دوست اور خلوت و جلوت کے رفیق تھے ، دونوں کے تعلقات نہایت گہرے اور باہمی اعتماد پر قائم تھے ۔ اخلاق وعادات اور سوچ کے انداز میں ہم آہنگی اور یکرنگی غالب تھی ۔ عہد جاہلیت میں بھی حضرت ابو بکر ؓکی زندگی بداخلاقیوں کی آلودگیوں سے پاک صاف رہی۔
حضرت ابو بکر ؓکا ذریعہ معاش تجارت تھا ۔ کاروبار میں دیانتداری ، راست بازی اور امانتداری کی بدولت معاشرے میں اخلاقی طور پر ایک اہم اور بلند مقام پر فائز تھے ۔ کاربار ی حلقوںمیں آپ کی ساکھ اور آ پ کا اعتبار قائم تھا ۔ آپ کا شمار خوشحال اور کامیاب تاجروں میں ہوتا تھا۔
مبداء فیض نے حضرت ابو بکر ؓکو بڑی فیاضی سے اعلیٰ خوبیوں اور صلاحیتوں سے نوازا تھا۔ صفائی و پاکیزگی ، الفت و محبت ، ہمدردی و خیر خواہی ، حق و باطل میں تمیز ، مروم شناسی و جوہر شناسی وسیع الظرفی وشریف النفسی ان کی شخصیت کے فطری جوہر تھے جنہیں حضورﷺ کی رفاقت وہم نشینی نے پوری طرح نکھار دیا تھا ۔ ابن مندہ نے ابن عباس ؓ کی روایت نقل کی ہے کہ حضرت ابو بکر ؓ18سال کی عمر سے حضورﷺ کی صحبت میں بیٹھتے تھے۔ اس وقت سے دونوں کے درمیان دوستی چلی آرہی تھی ۔
یہ اسی باہمی اعتماد اور واقفیت کا نتیجہ تھا کہ جو نہی حضرت ابو بکر ؓکو علم ہوا کہ ان کے دوست خدا کی طرف سے رسالت کے منصب جلیلہ پر فائز ہوئے ہیں تو آپ فوراً اُس حقیقت کو دل و جان سے تسلیم کرنے کے لیے تیار ہو گئے۔ حضرت ابو بکر ؓکے ایمان لانے کے متعلق علامہ زرقانی نے اپنی کتاب ، شرح ِ مواہب میں لکھا ہے کہ وہ حضرت خدیجہ ؓ کے بھتیجے حکیم ابن حزام کے پاس بیٹھے تھے ۔ اتنے میں حضرت حکیم کی ایک کنیز اُن کے پاس آئی اور اُس نے کہا کہ آپ کی پھوپھی آج کہہ رہی تھی کہ اُن کے شوہر حضرت موسیٰ علیہ اسلام کی طرح نبی ہیں جنہیں اللہ نے مبعوث کیا ہے یہ سنتے حضرت ابو بکر ؓسید ھے اپنے پرانے رفیق محمد رسولِاللہﷺ کے پاس پہنچے اور بلا تامل ایمان لے آئے ابن اسحق نے عبداللہ بن الحصین کی روایت نقل کی ہے۔
رسول اللہ ﷺ نے فرمایا کہ میں نے جس کسی کے سامنے اسلام پیش کیا، اُس نے کچھ نہ کچھ تردد اور سوچ بچار کیا، مگر ابو بکر ؓسے جو نہی میں نے اس کا ذکر کیا تو انہوں نے کوئی حیل و حجت نہیں کی اور اسے تسلیم کرنے میں ذراسی بھی دیر نہیں لگائی۔
رسالت پر ایمان لانے کے بعد حضرت ابو بکر ؓکا ذات ِ رسالت مآب کے ساتھ لازوال اور پائیدار محبت کا مقناطیسی رشتہ قائم ہو گیا ۔ اس رشتہ محبت نے آپ میں حکمت و فراست ، عزیمت و استفامت ، ایثار قربانی ، جرأت و ہمت ، دلیری و بے باکی ، غمخواری و دلسوزی اور اتباع ِ رسول کی وہ بے پناہ اور بے پایاں قوت اور صلاحیت پیدا کی جس کی نظیر پوری انسانی تاریخ پیش کرنے سے قاصر ہے۔
مکے میں توحید کی دعوت جب عام ہوئی اور کچھ بلند ہمت اور سعید الفطرت انسان اسے قبول کرکے میدان ِ عمل میں آگئے تو ان میں کچھ وہ لوگ بھی تھے جو معاشرتی اور سیاسی لحاظ سے نہایت بے بس اور لاچار تھے ۔ غلام اور کنیزیں آزادی کے حق او ربنیادی انسانی حقوق سے محروم تھے لیکن اللہ کے دین کے اعجاز نے اُن کے دلوں میں وہ حوصلہ اور ولولہ پیدا کر دیا تھا اور اُن کے کمزور و ناتواں جسموں میں وہ قوت اور عزیمت پیدا کر دی تھی کہ کھلے بندوں معبودان ِ باطل کے مقابلے میں ایک خدائے بزرگ و برترکی خدائی کا اعلان کرنے لگے ۔ ان کی یہ جرأت مشرکانہ نظام کے علمبرداروں کے لیے ناقابل ِ برداشت بنتی جارہی تھی۔ انہوں نے ان مظلوموں پر ظلم و تشدد کے پہاڑ توڑنے شروع کر دیے ۔ انہیں اذیتیں پہنچانے کے نت نئے حربے ایجاد کر لیے، مگر ان بندگان خدا کے پائے استقلا ل میں ذرا بھی لغزش نہ آئی۔
حضرت ابو بکر ؓاپنے پیارے رسول ﷺ کا کلمہ پڑھنے والے ان بے بسوں کو اذیت میں دیکھ کر بے قرار ہوجاتے۔ آپ آگے بڑھتے اور اُن بے سہارا غلاموں اور کنیزوںکے مشرک آقائوں سے بھاری رقموں کے بدلے خریدکر آزاد کر دیتے۔ مشرکین مکہ حضرت ابو بکر ؓکی اس دلی خواہش کو بھانپ گئے تھے اس لیے وہ ان غلاموں اور کنیزوں کی بہت زیادہ قیمت طلب کرتے لیکن حضرت ابو بکر ؓمنہ مانگی قیمت ادا کرکے اپنے محبوب آقا کی خوشنودی حاصل کرنے کی صورت پیدا کر لیتے۔
ظلم و ستم کی چکی میں پسنے والے بے سہارا غلاموں میں حضرت بلال ؓ حبشی بھی تھے ۔ جب ان کے دامن اسلام سے وابستہ ہونے کا راز کھلاتو امیہ بن خلف نے انہیں طرح طرح کے عذاب دینے شروع کردیے ۔ وہ دوپہر کی سخت گرمی میں مکے کی تپتی ہوئی ریت پر لٹا کر ان کے سینے پر بھاری پتھر رکھ دیتا اور کہتا کہ خدا کی قسم تو اسی طرح پڑا رہے گا جب تک محمد اور اس کی تعلیم کا انکار کرکے لات و عزّیٰ کی عبادت نہ کرے گا۔ وہ اس جاں کنی اور کرب کی حالت میں بھی احد احدہی پکارے چلے جاتے ۔ عمر و بن العاص کی روایت ہے کہ میں نے بلال ؓکو ایسی سخت تپتی اور دہکتی زمین پر لیٹے دیکھا ہے کہ اگر اس پر گوشت رکھ دیا جاتا تو وہ بھی پک جاتا مگر وہ اس حالت میں بھی صاف صاف اور برملا کہہ رہے تھے کہ میں لات وعزی کا انکار کرتا ہوں۔ حضرت ابو بکر ؓاپنے اس عظیم ساتھی اور دینی بھائی کی یہ حالت زار دیکھ کر تڑپ اُٹھے انہیں آزاد کر الیا۔
ہجرت کے بعد مدینے میں بھی حضرت ابو بکر ؓکا یہی معمول رہا کہ ان کا مال اللہ اور اس کے رسول ﷺ کے لیے وقت تھا ۔ ہر اجتماعی ضرورت کے موقع پر آپ بڑی خو ش دلی سے دولت خرچ کرکے اپنے جذبہ عشق و محبت کی آسودگی اور بالیدگی کا سامان مہیا فرماتے۔ غزوئہ تبوک کے موقع پر جب اللہ کے رسولﷺ نے مسلمانوں سے جہاد کی تیاری کے لیے مال صدقہ کرنے کی اپیل کی تو مخلص اور وفا شعار مسلمانوں نے اپنی بساط کے مطابق بارگاہِ رسالت میں رقمیں پیش کیں، ضروری سامان فراہم کیا ۔ اس موقع پر حضرت ابو بکر ؓنے ایثار و صداقت اور اخلاص و فدائیت کا جو عظیم الشان اور بے مثل مظاہرہ کیا اس کی روئیداد حضرت عمر ؓ کی زبانی سنیے حضرت عمر ؓ فرماتے ہیں۔
’’ غزوہ تبوک کے نہایت کٹھن موقع پر رسول اللہ ﷺ نے ہمیں اللہ کی راہ میں خرچ کرنے کے لیے کہا۔ میں نے دل میں پختہ ارادہ کیا کہ میں آج ابو بکر ؓ سے بڑھ کر مال کا صدقہ کروں گا ، چنانچہ اپنے کل اثاثے کا نصف حصہ لے کرجناب رسالتماؐب کی خدمت میں حاضر ہوا ۔ سرکارووعالمﷺ نے دریافت فرمایا۔ اپنے اہل و عیال کے لیے کتنا چھوڑ آئے ہو….۔؟ عرض کیا ، نصف حصہ ۔ اتنے میں حضرت ابوبکر ؓ ؓحاضرِ خدمت ہوئے اور مال پیش کیا ۔ رحمت ِ عالمﷺ نے پوچھا بال بچوں کے لیے کیا چھوڑا….۔؟حضرت ابو بکر ؓ نے نہایت ادب سے کہا ۔ اُن کے لیے اللہ اور اس کے رسول کی سرپرستی کافی ہے ، یہ سن کر مجھے یقین ہوگیا کہ میں کسی بات میں بھی ان سے سبقت نہیں لے جاسکتا ۔
حضرت ابو بکر ؓایمان کی سعادت سے بہرہ اندوز ہونے کے بعد پوری جانسوزی اور دلجمعی کے ساتھ اشاعت ِاسلا م اور تبلیغ دین کے پر خطر مشن میں مصروف ہوگئے اور ان کی مخلصانہ اور سرگرم کوششوں کے نتیجے میں حضرت عثمان ؓ بن عفان حضرت زبیر ؓبن عوام ، حضرت عبدالرحمن ؓ عوف ، حضرت سعد ؓ بن وقاص ، حضرت ابو عبیدہ ؓ بن جراح اور حضرت عثمان ؓ بن مظعون جیسے بے شمار جلیل القدر ، عظیم المرتبت اور باصلاحیت انسان حلقہ ، ایمان میں داخل ہوئے۔ اس سے حضرت ابو بکر ؓکی مردم شناسی اور معاشرے میں ان کے وسیع اور گہرے تعلقات کا اندا ز ہ ہوتا ہے۔ دعوتی کاموں کے سلسلے میں آپ سفر ہو یا حضر ہمیشہ اللہ کے رسول ﷺ کے ساتھ رہتے اور ہروار کے سامنے سینہ سپر ہوجاتے ۔

[box type=”success” align=”” class=”” width=””] سلسلہ عظیمیہ کے امام حضرت محمد عظیم برخیا ،قلندر بابا اولیاء ؒ کی ذاتِ بابرکات علم و عرفان اور اسرارورموز کا ایک خزینہ ہے۔ آپ ؒ نے روحانی علوم کو جدید ذہن کے مطابق سادہ انداز میں پیش کیا۔ ان تعلیمات پر عمل کرکے درست، مثبت، ولولہ انگیز اور پُرخلوص خیالات کے ساتھ اپنے انفرادی و اجتماعی کردار کو ادا کرنے کی کوشش کی جاسکتی ہے۔
بابا صاحب ؒ کی طرزِتفہیم کا وصف یہ تھا کہ کسی واقعہ، تمثیل، لطیفہ، شعر وغیرہ بیان کرنے میں طول بیان، کو ضروری نہیں سمجھتے تھے جو براہِ راست قوانین قدرت کی گہرائیں کے متعلق ہیں۔ قلندر بابا اولیاء ؒ کی تعلیمات کا فہم حاصل کرنے میں آپؒ کے ارشادات و اقوال سے بڑی مدد مل سکتی ہے۔
آئیے !….خزینہ قلندر کے چند موتیوں سے فیضیاب ہوتے ہیں….
[/box]

*….آدمی آدمی کی دوا ہے۔
*….عرفانِ الٰہی حاصل کرنے کی پہلی منزل ایمان ہے۔
*….انسان خیالات کی لہریں ایک ترتیب میں جمع ہوجانے کا نام ہے۔
*….اﷲ کی مخلوق کی خدمت اﷲ تک پہنچنے کا آسان اور قریبی راستہ ہے۔
*….جو اﷲ کو جانتا ہے پہچانتا ہے۔ وہ اﷲ کی صفات کا عارف ہے۔ ایسا بندہ عوام کی طرح رہتا ہے اور عوام کی خدمت کرتا ہے۔
*….با ادب بانصیب ۔ بے ادب بے نصیب ۔ سالک کی زندگی کے لئے مشعلِ راہ ہے۔
*….جوقوم کائناتی قدروں کا مشاہدہ نہیں کرتی اس کی فہم کائناتی علوم تک نہیں پہنچی۔ اس وضع کی قوم ہزاروں سال کی عمر پانے کے باوجود پالنے کا بچہ ہی رہے گی۔

*….ہر آدمی اپنی جنت اور دوزخ اپنے ساتھ لیے پھرتا ہے۔ اس کا تعلق طرزِ فکر سے ہے۔ طرزِ فکر انبیاٴ کرام علیہم السلام کے مطابق ہے تو آدمی کی ساری زندگی جنت ہے۔ طرزِ فکر میں ابلیسیت ہے تو تمام زندگی دوزخ ہے۔
*….سلوک کے راستے پر گامزن رہنے کے لئے ضروری ہے کہ علوم کے حصول اور ترقی کو اﷲ کی دی ہوئی توفیق سمجھا جائے۔
*….شک کو دل میں جگہ نہ دیں ۔ جس فرد کے دل میں شک جا گزیں ہو ، وہ عارف کبھی نہیں ہو سکتا۔ اس لیے شک شیطان کا سب سے بڑا ہتھیار ہے جس کے ذریعے وہ آدم زاد کواپنی روح سے دورکر دیتا ہے۔
*….جب تک آدمی کے یقین میں یہ بات رہتی ہے کہ چیزوں کا موجود ہونا یا عدم میں چلے جانا اللہ کی طرف سے ہے، اس وقت تک ذہن کی مرکزیت قائم رہتی ہے ۔ جب یہ یقین غیر مستحکم ہوکر ٹوٹ جاتا ہے تو آدمی ایسے عقیدے اور ایسے وسوسوں میں گرفتار ہوجاتا ہے جس کے نتیجے میں ذہنی انتشار پیدا ہوتا ہے۔
*…. جس معاشرے میں خلوص اور محبت کا پہلو نمایاں ہوتا ہے وہ معاشرہ پُرسکون رہتاہے ۔ جس معاشرے میں بیگانگی اور نفرت کا پہلو نمایاں ہوتاہے اس معاشرے کے افراد ذہنی خلفشار اور عدم تحفظ کے احساس میں مبتلا رہتے ہیں۔
*….کسی کی ہنسی نہ اُڑائیے کہ اس سے آدمی احساس برتری میں مبتلا ہو جاتاہے۔ احساس برتری آدمی کے لیے ایسی ہلاکت ہے جس ہلاکت میں ابلیس مبتلا ہے۔

*…. تمہیں کسی کی ذات سے تکلیف پہنچ جائے تو اسے بلا توقف معاف کردو، اس لیے کہ انتقام بجائے خود ایک صعوبت ہے۔ انتقام کا جذبہ اعصاب کو مضمحل کردیتا ہے۔

*….غصے کی آگ پہلے غصہ کرنے والے کے خون میں ارتعاش پیدا کرتی ہے اور اس کے اعصاب متاثر ہو کر اپنی انرجی ضائع کردیتے ہیں۔ اس کے اندر قوتِ حیات ضائع ہوکر دوسروں کو نقصان پہنچاتی ہے۔
اﷲ تعالیٰ نوعِ انسانی کے لئے کسی قسم کے نقصان کو پسند نہیں فرماتے
*….مذہب اور لامذہب میں بنیادی فرق یہ ہے کہ لامذہبیت انسان کے اندر شکوک و شبہات، وسوسے اور غیر یقینی احساسات کو جنم دیتی ہے…. جبکہ مذہب احساسات، خیالات، تصورات اور زندگی کے اعمال و حرکات کو ایک قائم بالذّات اور مستقل ہستی سے وابستہ کردیتا ہے۔
*….انسان صرف نیت کے خدوخال کا نام ہے، باقی تمام حرکات روشنیاں ہیں اور روشنیوں کا عمل حرکت ہے۔
*….انسان کے اندر ساڑھے گیارہ ہزار صلاحیتیں موجود ہیں۔ کسی ایک صلاحیت پر بھی ذہن کو مرکوز کرنا اور اﷲ تعالیٰ کی صفت کو ڈھونڈنا مراقبہ ہے۔
*….اسلام ، سائنس اور ریسرچ میں کہیں بھی ٹکراؤ نہیں ہے۔ یہ تینوں باہم مربوط ہیں۔ سینکڑوں مسلم سائنسدانوں نے سائنسی ترقی میں اہم کردار اداکیاہے۔
*…. کسی شخص کو یہ زیب نہیں دیتا کہ وہ کسی دوسرے کو کمتر سمجھے۔ تخلیقی پروگرام کے تحت خواہ وہ مرد ہو یا عورت ، بچہ ہو یا بوڑھا سب اﷲ کے نزدیک برابر ہیں۔ نہ کوئی چھوٹا ہے نہ کوئی بڑا …. تخلیقی پروگرام میں ہر شخص کا ایک خاص کردار متعین ہے ۔ خدا پرہیز گاروں کو دوست رکھتا ہے۔ بڑائی صرف اُس کو زیب دیتی ہے جو اﷲ سے قریب ہو۔
*….الہامی تعلیمات کو نہ ماننے والے ہمیشہ اپنے قیاس پر چلتےرہے، ان کے قیاس نے ان کی غلط رہنمائی بھی کی۔ ان کے نظریات کہیں کہیں دوسرے نظریات سے متصادم ہوتے رہتے ہیں۔ قیاس کا پیش کردہ کوئی نظریہ کسی دوسرے نظریہ کا چند قدم ضرور ساتھ دیتا ہے مگر پھر ناکام ہوجاتا ہے۔ توحیدی نقطہ نظر کے علاوہ نوعِ انسانی کو ایک ہی طرزِفکر پر مجتمع کرنے کا کوئی اور طریقہ نہیں ہے۔
*….قرآن کے علوم اُس بندے پر منکشف نہیں ہوتے جس کے دل میں اﷲ کی ذات کے بارے میں شک ہو۔ قرآن اُن لوگوں کو ہدایت دیتا ہے جو متقی ہیں اور متقی کے دل میں شک نہیں ہوتا۔
*….ہر انسان کو اﷲ تعالیٰ نے ایک صلاحیت دی ہے جو اُس کی رہنمائی کرتی ہے ۔ جس کے تحت وہ اچھائی اور بُرائی ، خیر اور شر میں تمیز کرتا ہے۔ اس صلاحیت کو نورِ باطن یا ضمیر کہتے ہیں۔ ضمیر کی رہنمائی کو قبول کرنے یا رد کرنے کے لئے اﷲ تعالیٰ نے انسان کو بااختیار بنایا ہے۔ انسان کو ضمیر کی تحریکات کو سمجھ کر رہنمائی قبول کرنی چاہئے۔ *….خوشی اسی وقت حاصل ہوتی ہے جب آدمی ہر حال میں اللہ کا شکر ادا کرے۔ جو حاصل ہے اس پر صبر و شکر کے ساتھ قناعت کرے اور جو چیز میسر نہیں اس کا شکوہ نہ کرے۔ ہر حال میں خوش رہنے سے بندہ راضی بہ رضا ہوجاتا ہے۔
*….خدا سے محبت کے دعوے کی تکمیل اسی وقت ہوتی ہے اور یہ دعویٰ خدا کی نظر میں اسی وقت اہل قبول ہوتا ہے جب ہم خداکے رسول حضرت محمد مصطفیٰ صلی اللہ علیہ و سلم کی پیروی کریں۔
*…. جو کھو دیتا ہے، وہ پا لیتا ہے….اور جو پا لیتا ہے، وہ خود کھو جاتا ہے۔
*….ہر شخص کو چاہیے کہ کاروبار حیات میں مذہبی قدروں، اخلاقی و معاشرتی قوانین کا احترام کرتے ہوئے پوری پوری جدو جہد اور کوشش کرے، لیکن نتیجے پر نظر نہ رکھے۔ نتیجہ اللہ کے اوپر چھوڑ دے۔
*….انسان کٹھ پتلی کی طرح ہے، ایک انسان میں بیس ہزار ڈوریاں بندھی ہوئی ہیں۔ ایک ایک ڈوری ایک ایک فرشتے نے سنبھالی ہوئی ہے۔
*….اصلی اور حقیقی ماں زمین ہے۔ جب تک آدمی زندہ رہتا ہے کفالت کرتی ہے اور جب مر جاتا ہے تو سڑاند اور تعفن کو اپنے اندر چھپا لیتی ہے۔
*….مال و زر، دولت اور دنیا انسان کیلئے بنائی گئی ہیں….جبکہ انسان خود کو یہ باور کرانے میں مصروف ہے کہ مجھے دنیا کیلئے بنایا گیا ہے۔
*….سخاوت، اعلیٰ ظرف لوگوں کا شیوہ ہے۔
*….دسترخوان وسیع ہونا چاہئے۔
*….کم ظرف دوسروں سے توقعات قائم کرتے ہیں…اعلیٰ ظرف لوگ مخلصانہ خدمت کرتے ہیں۔
*….انتقام، ہلاکت و بربادی ہے۔ عفو و درگزر اللہ تعالیٰ کا انعام ہے۔
*….ہمارے بچے….دراصل ہمارا اسلاف ہیں۔ ان کی تربیت اس طرح کی جائے کہ کل یہ بچے اسلاف کے مقام پر فائز ہو جائیں۔
*….اللہ تعالیٰ صبر کرنے والوں کو پسند کرتا ہے….صبر یہ ہے کہ درگزر کیا جائے۔
*….زر و جواہر سے زیادہ کوئی شئے بیوفا نہیں ہے….جس نے زر و جواہر سے محبت کی وہ ہلاک ہو گیا اور جس نے دولت کو پیروں کے نیچے رکھا وہ ہمیشہ اس کی کنیز بنی رہی۔
*….دنیا فریب ہے….فریب خوردہ انسان کی ہر بات فریب ہے….جو لوگ یہ بات جان لیتے ہیں ان کے لئے دنیا سکون کا گہوارہ بن جاتی ہے۔

*….مشاہداتی آنکھ دیکھتی ہے کہ موت سے خوبصورت کوئی زندگی نہیں ہے….
*….ہر انسان کے اندر کم و بیش گیارہ ہزار صلاحیتیں ایسی ہیں جن میں ہر صلاحیت پورا علم ہے۔
*….تصوف سے مراد نور باطن ہے۔ یعنی ایسا خالص ضمیر جس میں قطعاً آلائش نہ ہو۔
*….خدمت خلق کے ذریعہ انسان محدودیت کے دائرے سے نکل کر نوعی شعور اور کائناتی شعور حاصل کرلیتا ہے اور یوں وہ اﷲ کا پسندیدہ بندہ بن جاتا ہے۔ آدمَزاد کو بلا تخصیص مخلوق کی خدمت اس لئے کرنی چاہیئے کہ مخلوق کی خدمت کرنا خالق کا پسندیدہ عمل ہے۔ اور اس عمل کے ذریعہ ہی بندہ خالق کی قربت و محبت حاصل کرسکتا ہے۔
*….لوگوں کو روزگار کے مواقع فراہم کرنا، صحت وتعلیم کی سہولیات فراہم کرنا، لوگوں کی اخلاقی وذہنی تربیت کرنا، بھوکوں کو کھانا کھلانا، یتیموں اور بیواؤں کی دیکھ بھال وغیرہ وغیرہ سب خدمتِ خلق کے زمرے میں آتے ہیں۔
*….انسان کسی نہ کسی طرح رنج سے دور رہنے اور راحت سے قریب ہونے کی ضمانت چاہتا ہے۔ وہ اپنی کمزوری کے سبب خود کو حوادث پر قابو پانے کے لائق نہیں سمجھتا۔ لہٰذا کسی ایسی طاقت کی تلاش میں سرگرداں رہتا ہے جس سے اس کو راحت کی ضمانت مل سکے۔ یہی مخفی طاقتوں کی تلاش کا موجب ہے۔ قرآن پاک نے یومنون بالغیب میں اس ہی حقیقت کی طرف اشارہ کیا ہے۔ پھر جگہ جگہ اﷲ کی لامتناہی صفات کا تذکرہ ہے۔ یہیں سے راحت کی ضمانت ملتی ہے۔کوئی انسان خود اعتمادی کا دعویٰ کرسکتا ہے لیکن رنج و راحت سے بے نیاز نہیں ہوسکتا۔ البتہ غیب پر ایمان لانے کے بعد اسے بہتری کا یقین ہوجاتا ہے۔ غیب پر ایمان لانے کے معنی یہ ہیں کہ غیب میں جو کچھ ہے بہتر ہی بہتر ہے، کیوں کہ غیب رحیم و کریم کے ہاتھ میں ہے۔
*….انسان کی بڑی بدقسمتی یہ ہے کہ وہ پیچھے پلٹ پلٹ کر دیکھتارہتا ہے۔ وہ یہ نہیں سوچتا کہ اﷲ تعالیٰ نے آنکھیں اس کی پیشانی پر سامنے دی ہیں۔ اگر پیچھے ہی دیکھنا مقصود ہوتا تو اﷲ کے لئے کیا مشکل تھا کہ وہ آنکھیں سرکے پچھلے حصّہ پر لگادیتے۔

[box type=”note” align=”” class=”” width=””]

عرفانِ نفس
اُس وقت تک تمہیں اپنے نفس کا عرفان نصیب نہیں ہوگا، جب تک تم اپنی انا اور اپنی ذات کی نفی نہیں کردوگے۔ بندہ جب اپنے شعوری علم کی نفی کردیتا ہے، اُس پر لاشعوری علوم کا دروازہ کُھل جاتا ہے۔

مراقبہ
تفکر کرنا، کسی ایک نقطے پر ذہن کو مرکوز کرنا اور یکسوئی کے ساتھ اللہ تعالیٰ کی نشانیوں پر غور کرنا مراقبہ ہے۔ انسان کے اندر ساڑھے گیارہ ہزار صلاحیتیں موجود ہیں۔ کسی ایک صلاحیت پر بھی ذہن کو مرکوز کرنا اور اللہ تعالیٰ کی صفات کو تلاش کرنا مراقبہ ہے۔ مراقبہ سے اسی وقت فائدہ حاصل ہوتا ہے جب یہ عمل مسلسل کیا جائے۔

روحانیت اور سائنس 
سالکین کے لیے ضروری ہے کہ روحانی علوم کے ساتھ ساتھ سائنسی علوم اور ٹیکنالوجی بھی حاصل کی جائے۔

 

پانچ نسلیں
 ایک فرد نے اگر اپنی طرزِفکر یہ بنالی کہ اُس کی ذات سے کسی دوسرے کی ذات کو تکلیف نہیں پہنچے گی…. اُس کی دس اولادیں ہوئیں، دس کی دس نہیں تو پانچ تو اُس کی طرزِفکر پر چلیں گی…. اس کا مطلب یہ ہے کہ آپ نے اچھائی کا ایک دروازہ کھول دیا…. پانچ نسلیں اچھی بنیں….

 

غصہ
آدمی جب غصہ کرتا ہے تو اس کے شعور میں اضطراب پیدا ہو جاتا ہے۔ اعصاب پر تناؤ طاری ہو جاتا ہے۔ غصہ کرنے والے افراد جسمانی اور نفسیاتی مریض بن جاتے ہیں اور غصہ کرنے والے لوگوں کی روحانی ترقی رک جاتی ہے۔ 

سلسلہ عظیمیہ کا پلیٹ فارم
سلسہ عظیمیہ تمام نوع انسانی کو متحد ہو کر ‘‘اللہ کی رسی کو مضبوط پکڑو اور آپس میں تفرقہ نہ ڈالو’’ کے پلیٹ فارم پر جمع ہونے کی دعوت دیتا ہے۔

 

[/box]

*….ہر بیج ہر گٹھلی ازل تا ابد اپنی نوع اپنے خاندان کا ایک ریکارڈ ہے۔
*….اسلام، سائنس اور ریسرچ میں کہیں بھی ٹکراؤ نہیں ہے۔
*….سلوک کے راستے پر گامزن رہنے کے لیے ضروری ہے کہ علوم کے حصول اور ترقی کو اللہ تعالیٰ کی دی ہوئی توفیق سمجھا جائے۔ روحانی علوم کے انعامات کو اپنی ذاتی کوشش نہ سمجھا جائے۔
*….تکبر شیطانی وصف ہے جو بندے کو اللہ تعالیٰ سے دور لے جاتا ہے، جب کوئی شخص خود کو دوسرے سے برتر ثابت کرنے کی کوشش کرتا ہے تو وہ دراصل ایسے اختلاف کی بنیاد رکھ دیتا ہے جس پر چل کر لوگ منتشر ہو جاتے ہیں۔
*….دنیا کی ساری برائی سود کی وجہ سے ہے۔ اگر سود کا خاتمہ نہ ہوا تو دنیا خراب و ختم ہوجائے گی۔
*….ہر مسلمان کو چاہیے کہ وہ سلام میں پہل کرے۔ السلام علیکم کا مطلب ہے ’’آپ پر سلامتی ہو‘‘۔ سلام میں پہل کرنے والا شخص بلاتخصیص ذات و مراتب دوسروں کے لئے نیک جذبات رکھتا ہے۔ ‘‘ بچوں کو خود سلام کیجئے کہ تاکہ بچوں میں دوسرے لوگوں کی بھلائی چاہنے کی عادت پختہ ہو جائے۔ رسول اللہ صلی اللہ علیہ و سلم کا ارشاد ہے: ’’وہ آدمی اللہ سے زیادہ قریب ہے جو سلام میں پہل کرتا ہے۔‘‘(جامع ترمذی)
*….اللہ تعالیٰ بحیثیت خالق…. مخلوق سے ایک خاص ربط رکھتے ہیں۔ ہر انسان میں اللہ تعالیٰ کی پھونکی ہوئی روح کام کر رہی ہے۔ اس لئے کسی شخص کو یہ زیب نہیں دیتا کہ وہ کسی دوسرے کو کمتر سمجھے۔ تخلیقی پروگرام کے تحت خواہ وہ مرد ہو یا عورت ہو، بچہ ہو یا بوڑھا سب اللہ تعالیٰ کے نزدیک برابر ہیں۔ نہ کوئی چھوٹا ہے نہ کوئی بڑا….تخلیقی پروگرام میں ہر شخص کا ایک خاص کردار متعین ہے۔ خدا متقی لوگوں کو دوست رکھتا ہے۔ بڑائی صرف اس کو زیب دیتی ہے جو اللہ تعالیٰ سے قریب ہو۔ اللہ تعالیٰ کو جانتا ہو۔ اللہ تعالیٰ کو پہچانتا ہو۔ جو اللہ تعالیٰ کو جانتا ہے پہچانتا ہے۔ وہ اللہ تعالیٰ کی صفات کا عارف ہے۔ ایسا بندہ عوام کی طرح رہتا ہے اور عوام کی خدمت کرتاہے۔
*….قرآن کے علوم اس بندے پر منکشف نہیں ہوتے جس کے دل میں اللہ تعالیٰ کی ذات کے بارے میں شک ہو۔ قرآن ان لوگوں کو ہدایت دیتا ہے جو متقی ہیں اور متقی کے دل میں شک نہیں ہوتا۔
*….جب تک اللہ تعالیٰ، اللہ تعالیٰ کے رسول صلی اللہ علیہ و سلم اور اللہ تعالیٰ کی کتاب قرآن پر یقین کامل نہیں ہو گا آپ روحانی علوم نہیں سیکھ سکتے۔
*….ہر انسان کو اللہ تعالیٰ نے ایک صلاحیت دی ہے جو اس کی رہنمائی کرتی ہے۔ جس کے تحت وہ اچھائی اور برائی، خیر اور شر میں تمیز کرتا ہے۔ اس صلاحیت کو نور باطن یا ضمیر کہتے ہیں۔ ضمیر کی رہنمائی کو قبول کرنے یا رد کرنے کے لئے اللہ تعالیٰ نے انسان کو بااختیار بنایا ہے۔ انسان کو ضمیر کی تحریکات کو سمجھ کر رہنمائی قبول کرنی چاہئے۔
*….جو نور پوری کائنات میں پھیلتا ہے اس میں ہر قسم کی اطلاعات ہوتی ہیں جو کائنات کے ذرہ ذرہ کو ملتی ہیں، ان اطلاعات میں چکھنا، سونگھنا، سننا، محسوس کرنا، خیال کرنا، وہم و گمان وغیرہ وغیرہ….زندگی کا ہر شعبہ، ہر حرکت، ہر کیفیت کامل طرزوں کے ساتھ موجود ہوتی ہے۔ ان کو صحیح حالت میں وصول کرنے کا طریقہ صرف ایک ہے….انسان ہر طرز میں، ہر معاملہ میں، ہر حالت میں کامل استغنیٰ رکھتا ہو۔
*….بعض چیزیں ایسی ہیں جنہیں انسان غیر حقیقی کہہ کر نظر انداز کردیتا ہے۔ حالانکہ کائنات میں کوئی شئے فاضل اور غیر حقیقی نہیں ہے۔ ہرخیال اور ہر واہمہ کے پسِ پردہ کوئی نہ کوئی کائناتی حقیقت ضرور کار فرما ہوتی ہے۔
*….وہ لوگ جن کے اندر اﷲ کی ذات کے ساتھ وابستگی ہے، وہ یہ سمجھتے ہیں کہ زندگی کے ہر عمل پر اﷲ محیط ہے، جب کسی بندے کے اندر یہ طرزِفکر پوری طرح قائم ہوجاتی ہے تو روحانیت میں ایسے بندہ کا نام مستغنی ہے۔
*….ہم واضح طور پر دیکھتے ہیں کہ آج کا انسان مادّی ماحول میں اس قدر کھوچکا ہے کہ وہ مذہب کو بھی، جس کا کام ہی انسان پر باطنی دنیا روشن کرنا ہے،مادّی لذّتوں کا وسیلہ بنانے پر بضد ہے۔ مذہب کا نام استعمال کرنے والے تو بہت ہیں، مگر ایمان، یقین اور مشاہدے کی طلب اِس دور میں ناپید ہوچکی ہے۔
*….آج کی نسلیں گزشتہ نسلوں سے زیادہ مایوس ہیں اور آئندہ نسلیں اور بھی زیادہ مایوس ہونے پر مجبور ہوں گی۔ نتیجہ میں نوعِ انسانی کو کسی نہ کسی وقت نقطۂ توحید کی طرف لوٹنا پڑے گا۔ موجودہ دور کے مفکر اور سائنٹسٹ کو چاہئے کہ وہ وحی کی طرزِفکر کو سمجھے اور نوعِ انسانی کی غلط رہنمائی سے دستِ کش ہوجائے۔

[box type=”note” align=”” class=”” width=””]

پر مسرت زندگی
ہر آدمی پرسکون اور پر مسرت زندگی اپنا سکتا ہے۔ فارمولا یہ ہے کہ….جو چیز حاصل ہے اس کو شکر کے ساتھ خوش ہو کر استعمال کیا جائے اور جو چیز حاصل نہیں ہے اس پر شکوہ نہ کیا جائے….اس کے حصول کیلئے تدبیر کے ساتھ دعا کی جائے….

 

کوشش اور ارادہ
عموماً لوگ اپنی صلاحیتوں کو بروئے کار لانے میں کوتاہی کرتے ہیں اور نتیجہ اپنی پسند یا مرضی کے مطابق چاہتے ہیں۔ اور جب نتیجہ ان کی مرضی کے مطابق نہیں نکلتا تو کڑھتے ہیں اور شکوہ کرتے ہیں۔ جب بندہ کام کا پختہ ارادہ کر کے بھرپور کوشش کرتا ہے تو اس کا انجام اچھا ہوتا ہے۔

اولین مقصد
انسان کو محض روٹی، کپڑے کے حصول اور آسائش و زیبائش کے لئے پیدا نہیں کیا گیا بلکہ اس کی زندگی کا اولین مقصد یہ ہے کہ وہ خود کو پہچانے۔

قرآن میں تفکر
قرآن پاک کے معنی اور مفہوم پر غور کرنے سے بندے کے اندر روحانی صلاحیتیں بیدار ہوجاتی ہیں۔ دماغ کے اندر کروڑوں Cells کھل جاتے ہیں اور انسان باطنی دنیا کی طرف متوجہ ہوجاتا ہے۔ جب کوئی بندہ قرآن پاک کی تلاوت کرتا ہے تو دراصل وہ بندہ اﷲ سے ہم کلام ہوتاہے۔

پرسکون معاشرہ
معاشرے میں سکون برقرار رکھنے کے لیے دوسروں کی غلطیاں معاف کردینی چاہئیں۔ دوسروں کے عیوب پر پردہ ڈالنا چاہیے۔

راز
ایسے کام کریں کہ آپ خود سے مطمئن ہوں۔ آپ کا ضمیر مردہ نہ ہوجائے ۔ یہی وہ راز ہے جس کے ذریعے آپ کی ذات دوسرو ں کے لیے رہنمائی کا ذریعہ بن سکتی ہے۔

[/box]

 

 

*….اﷲ رب العالمین نے مخلو ق کی آسانی کے لیے اُسے تمام وسائل مہیا کردیئے ہیں۔ سورج کی روشنی بلاتفریق مذہب وملت ہر ایک کو یکساں فوائد مہیا کررہی ہے…. پانی،ہوا، آکسیجن، نباتات، جمادات وغیرہ سب ہی اﷲ کے حکم کے مطابق مخلوق کی خدمت میں مصروف عمل ہیں۔ اسی طرح الہامی تعلیمات کے مطابق اﷲ کے بندوں میں اﷲ کے نزدیک وہی شخص ہوگا جو زیادہ سے زیادہ دوسروں کے کام آئے اور لوگ اُس سے فلاح پائیں۔
*….انسان کی سوچ میں ایک منفی رخ یہ بھی موجود ہے کہ وہ ہمیشہ ماضی کے بارے میں سوچتا اور افسردہ رہتاہے میرے ساتھ ایسا ہوا۔ میرے ساتھ فلاںنے یہ کیا۔ اس واقعہ نے میری ہمت ختم کردی۔ میرا فلاں عزیز مجھ سے بچھڑ گیا وغیرہ وغیرہ۔ آدمی یہ نہیں سوچتا کہ اس کی آنکھوں کے سامنے اﷲ کی کتنی نشانیاں اور نعمتیں موجود ہیں۔ وہ ان نشانیوں پر غور وفکر نہیں کرتا، وہ حالات کے پس منظر میں آگے نہیں دیکھتا، اور ماضی یا تاریخ کے کارناموں کو سینہ سے لگائے بیٹھا رہتا ہے اور حال یا مستقبل کی بہتری کی کوئی فکر نہیں کرتا۔ غور طلب بات یہ ہے کہ اﷲ نے آنکھیں پیشانی پر سامنے دی ہیں کہ انسان بصارت وبصیرت سے کام لے اور اپنے لئے مستقبل کی راہیں متعین کرے۔
*….اچھی گفتگو کے لئے ضروری ہے کہ گفتگو میں ہمیشہ اعتدال رکھا جائے۔ یہ بات آپ نے بھی نوٹ کی ہوگی کہ انسان کا دل جب کسی کی طرف سے خوش ہوتاہے تو وہ اس کی تعریف میں زمین وآسمان کی قلابیں ملادیتاہے اور جب اُسی شخص کی جانب سے اگر کبھی دل میں میل آجائے تو اُس کے نزدیک اس سے برُا شخص کوئی نہیں ہوتا۔ بعض اوقات کسی انسان کو خود اندازہ نہیں ہوتا کہ وہ کس درجہ منافقت سے کام لے رہا ہے۔
*….ہرتخلیق دو رخوں کی شکل و صورت میں وجود رکھتی ہے چنانچہ زندگی کے بھی دورخ ہیں ایک وسیع تر رُخ زمان (لاشعور) اور دوسرا محدود تر رُخ مکان (شعور)۔ زندگی کا وسیع تر پہلو (لاشعور) زمان ہے، جس کی حدود ازل تا ابد ہیں اور محدود تر پہلو (شعور) مکان ہے جو دراصل زمان (لاشعور) کا تقسیم شدہ جزو ہے۔
*….انسان کو محض روٹی، کپڑے کے حصول اور آسائش و زیبائش کے لئے پیدا نہیں کیا گیا بلکہ اس کی زندگی کا اولین مقصد یہ ہے کہ وہ خود کو پہچانے اور رحمۃ للعالمین محسنِ انسانیتﷺ کا قلبی اور باطنی تعارف حاصل کرے جن کے جودو کرم اور رحمت سے ہم ایک خوش نصیب قوم ہیں اور جن کی تعلیمات سے انحراف کے نتیجہ میں ہم بدنصیب قوم بن چکے ہیں۔

قلندر بابا اولیاءؒ کے چند فرمودات آپ نے پڑھے…. ان فرمودات کو لکھنے کی سعادت اس لئے حاصل کی گئی کہ ہم کھُلے ذہن و فکر کے ساتھ ان سے استفادہ کریں۔ قلندر بابا اولیاءؒ کے فرمودات میں حکمت و دانائی اور حقیقت تلاش کرنے کے لئے طریقہ یہ ہے کہ آپ ایک ایک فرمان کو توجہ کے ساتھ پڑھیں اور آنکھیں بند کرکے اُس کے معنی اور مفہوم پر غور کریں۔ یعنی فرمودات کے اندر جو حقیقتیں مخفی ہیں اور اسرار و رموز کا جو سمندر پنہاں ہے، اس تک رسائی کی حاصل کرنے کی کوشش کریں…. ان اسرار و رموز کا ادراک مراقبہ کے ذریعہ ممکن ہے۔