پاؤلو کوئہلو

[box type=”shadow” align=”” class=”” width=””] انسان اگر کوشش کرے تو سب کچھ ممکن ہے، حصولِ مقصد کی راہ میں حائل مشکلات، رکاوٹیں نہیں بلکہ آزمائش ہوتی ہیں، جب انسان کےدل میں کوئی خواہش سراٹھاتی ہے اور وہ کسی چیز کو پانے کی جستجو اور کوشش کرتا ہے تو قدرت اس کی خواہش کی تکمیل میں مددگار بن جاتی ہے کہ اس کی یہ خواہش پوری ہو ۔ اگر لگن سچی ہو تو خدا کی اس کائنات میں بکھری نشانیاں اِس جدوجہد کے دوران راہنمائی اور معاونت کرتی نظر آتی ہیں۔
کیمیاگر (الکیمسٹ Alchemist ) برازیلی ادیب پاؤلو کویلہو Paulo Coelho کا شاہکار ناول ہے، جس کا دنیا کی 70 زبانوں میں ترجمہ ہوا ۔ اس ناول نے فروخت کےنئے ریکارڈ قائم کرکے گنیز بک میں اپنا نام شامل کیا۔ اس کہانی کے بنیادی تصوّرات میں رومی، سعدی اور دیگر صوفیوں کی کتابوں اور فکرِ تصوّف کی جھلک نظر آتی ہے۔ 
کیمیا گر ، اندلس کے ایک نوجوان چرواہے کی کہانی ہے جو ایک انوکھا خواب دیکھتا ہے جس کی تعبیر بتائی جاتی ہے کہ اسے کوئی خزانہ ضرورملے گا ۔ وہ خزانے کی تلاش میں نکلتا ہے اور خوابوں، علامتوں کی رہنمائی میں حکمت اور دانائی کی باتیں سیکھتے ہوئے ، افریقہ کے صحراؤں میں اس کی ملاقات ایک کیمیاگر سے ہوتی ہے ، یہ کیمیا گر خزانے کی تلاش کے ساتھ انسانی سرشت میں چھپے اصل خزانے کی جانب بھی اس کی رہنمائی کرتا ہے….
[/box]

ستریویں قسط ….

[box type=”Warning” align=”” class=”” width=””]

گزشتہ قسط کا خلاصہ : یہ کہانی اندلوسیا (اسپین ) کے ایک نوجوان سان تیاگو کی ہے، والدین اُسے راہب بنانا چاہتے تھے مگر وہ سیاحت کے شوق میں چراوہا بن گیا۔ ایک رات وہ بھیڑوں کے گلّہ کے ساتھ ایک ویران گرجا گھر میں گزارتا ہے اور ایک عجیب خواب دیکھتا ہے کہ ‘‘کوئی اسے اہرام مصر لے جاکر کہتا ہے کہ یہاں خزانہ ملے گا۔’’ خزانے کا مقام دیکھنے سےقبل آنکھ کھل جاتی ہے۔ دو سال سے بھیڑیں اس کی دنیا تھیں لیکن تاجر کی بیٹی سے ملنے کے بعد وہ اس کی دلچسپی کا محور بن گئی تھی۔ وہ شہر طریفا میں خانہ بدوش عورت سے ملتا ہے، جو خواب کی تعبیر بتاتی ہے کہ خزانہ اسے ضرور ملے گا۔ وہ مذاق سمجھ کر شہر کے چوک پر آبیٹھا جہاں اس کی ملاقات خود کو شالیم کا بادشاہ کہنے والے بوڑھے سے ہوتی ہے جو کہتا ہے کہ وہ خزانہ ڈھونڈنے میں اس کی مدد کرسکتا ہے ۔ پہلے تو لڑکا اُسے فراڈ سمجھا، لیکن جب وہ بوڑھا اسے وہ باتیں بتاتا ہے جو صرف وہی جانتا تھا تو اسے یقین ہوا۔ بوڑھا سمجھاتا ہے کہ ‘‘انسان اگر کوشش کرے تو سب کچھ ممکن ہے، جب انسان کسی چیز کو پانے کی جستجو کرتا ہے تو قدرت اس کی خواہش کی تکمیل میں مددگار بن جاتی ہے ’’۔ مدد کے بدلے بوڑھا بھیڑوں کا دسواں حصہ مانگتا ہے جو لڑکا دے دیتا ہے۔ بوڑھا بتاتا ہے کہ خزانے تک پہنچنے کے لیے غیبی اشاروں کی زبان سمجھنا ہوگی۔ بوڑھا اُسے دو سیاہ سفید پتھر دیتا ہے کہ اگر کبھی تم قدرت کے اشاروں کو سمجھ نہیں سکو تو یہ پتھر ان کو سمجھنے میں مدد کریں گے۔ بوڑھا چلا جاتا ہے اور لڑکا ایک بحری جہاز سے افریقہ کے ساحلی شہر طنجہ پہنچتا ہے۔ یہاں کا اجنبی ماحول دیکھ کر وہ فکرمند ہوجاتا ہے ، اسے ایک ہم زبان اجنبی ملتا ہے۔ لڑکا اس سے مدد مانگتا ہے۔ اجنبی رقم کا مطالبہ کرتا ہے۔ لڑکا اجنبی شخص پر بھروسہ کرکے رقم دے دیتا ہے، لیکن اجنبی بازار کی گہما گہمی میں غائب ہوجاتا ہے۔ رقم کھونے پر لڑکا مایوس ہوجاتا ہے لیکن پھر وہ خزانہ کی تلاش کا مصمم ارادہ کرتا ہے۔ اسی شہر میں شیشے کا سوداگر تھا، اس کی ظروف کی دکان جو کبھی سیاحوں کی توجہ کامرکزتھی، اب بے رونق ہوتی جارہی تھی۔ سارا دن وہ گاہک کے انتظار میں گزاردیتا۔ اچانک دوپہر کو وہ لڑکا اس دکان پر آکر کہتا ہے کہ وہ کام کرنا چاہتاہے، بدلے میں اسے کھانا چاہیے۔ لڑکے کے کام کرنے پر سوداگر اسے کھانا کھلاتاہے۔ لڑکا اُسے بتاتا ہے کہ اسے مصر جاننے کے لیے کام چاہیے۔ سوداگر بتاتا ہے کہ سال بھر کام کرنے سے بھی اتنی رقم جمع نہ ہوگی۔ مگر لڑکا دکان میں کام کرنے لگتا ہے۔ لڑکے کو اندازہ ہوتا ہے کہ بھیڑیں خریدنے کے لیے اُسے کم از کم سال بھر کام کرنا پڑے گا۔ زیادہ رقم پانے اور زیادہ گاہک لانے کے لیے وہ سڑک پر ایک شوکیس لگانے کا مشورہ دیتا ہے، پہلے تو تاجر نقصان کا خدشہ ظاہر کرتا ہے مگر پھر مان جاتا ہے ۔کاروبار میں بہتری آنے لگتی ہے۔ ایک دن سوداگر کے پوچھنے پر لڑکا بتاتا ہے کہ اہرام دیکھنا اس کا خواب ہے۔ سوداگر بتاتا ہے کہ اس کا خواب مکّہ معظّمہ کا سفرکرنا تھا، اس نے دکان کھولی ، رقم جمع کی، لیکن کوئی ایسا شخص نہ مل سکا جو اِس کی غیرموجودگی میں دکان سنبھالے۔ یوں مکّہ جانے کا خواب ، خواب ہی رہ گیا۔ لڑکا دکان کے ساتھ قہوہ کی دُکان کھولنے کا مشورہ دیتا ہے، لوگ آنے لگتے ہیں اور کاروبار خوب پھیلنے لگتا ہے ….لڑکے کو کام کرتے گیارہ مہینے ہوتے ہیں تو وہ وطن واپسی کا ارادہ کرتا ہے۔ لڑکے کو سامان سے سیاہ و سفید پتھر ملتے ہیں ، اہرام پہنچنے کی خواہش پھر جاگ اٹھتی ہے۔ وہ سوچتا ہے کہ اندلوسیا واپسی کبھی بھی ممکن ہے لیکن اہرام دیکھنے کا موقع دوبارہ نہ ملے گا۔ سوداگر کے پاس ایک شخص قافلہ کے ذریعہ سامان صحرا پار لے جانے آیاکرتا تھا، وہ اس کے گودام جاتا ہے، جہاں انگلستان کا ایک باشندہ ملتا ہے۔ جو کیمیا گری سیکھنا چاہتا تھا۔ عرب کے ریگستان میں مقیم ایک کیمیاگر کا تذکرہ سُن کر وہ سب کچھ چھوڑ چھاڑ کر اُسے ملنے یہاں چلا آیا۔ انگلستانی باشندہ سے گفتگو کے دوران اوریم اور تھومیم پتھروں، غیبی اشارہ اورکائناتی زبان کا ذکر سن کر لڑکے کی دوستی ہوگئی۔ گفتگو کے دوران لڑکے کی زبان سے نکلاکہ وہ خزانہ کی تلاش میں ہے، لیکن انگلستانی باشندے کو صرف کیمیاگر کی تلاش تھی۔ صحرائی قافلہ روانگی کے لیے تیار ہوتا ہے۔ قافلہ کا سردار اعلان کرتا ہے کہ ہر شخص کو اس سفر میں ہوشیار اور محتاط رہنے کی ضرورت ہے۔قافلے نے شروع کیا، سورج کی تمازت پر سفر رک جاتا اور سہہ پہر میں شروع ہوجاتا۔ انگلستانی باشندہ زیادہ تر اپنی کتابوں میں منہمک رہا جبکہ لڑکا دلچسپی اور خاموشی کے ساتھ صحرا ، قافلہ اور اپنے ارد گر لوگوں کا مشاہدہ کرنے اور ریگستانی ہوا کی آوازوں کو سننے میں گزارتا۔ رات جب الاؤ لگا کر بیٹھے تو ایک سارِبان نے اپنی داستان سنائی کہ کیسے قاہرہ میں اس کا باغ اور خاندان ایک زلزلہ کی نظر ہوگیا ، لیکن اس کا اللہ پر یقین قائم ہے۔ کبھی راہ چلتے پُراسرار نقاب پوش بدّو ملتے جو خطرہ سے باخبر کرتے ۔ قبیلوں میں جنگ کی خبر سنتے ہی سفر خاموشی سے ہونے لگا۔ خوف کے اس دور میں ساربان مطمئن رہا، اس نے لڑکے کو بتایا کہ اِس کے لئے سب دن برابر ہیں اور ماضی کی یادوں اورمستقبل کے اندیشوں کے بجائے اگر انسان اپنے حال پر زیادہ توجہ دے تو اس کی زندگی زیادہ خوشحال گزرے گی ۔ انگلستانی باشندے کولڑکے نے اپنے خواب اور سفر کی کہانی سنائی۔ انگلستانی باشندے نے اسے علم کیمیا کے کائناتی اصول سمجھنے کے لیے کتابیں دیں، لیکن کتابیں دقیق تھیں، لڑکے کے کچھ پلے نہ پڑا، اُس نےسب کتابیں یہ کہہ کر واپس کردیں، کہ وہ ان کتابوں سے یہی سیکھا کہ کائنات کی ایک روح ہے اور جو بھی اِس روح کو سمجھ لیتا ہے وہ کائناتی زبان جان لیتا ہے ۔انگلستانی باشندے کو مایوسی ہوئی کہ کتابیں لڑکے کو متاثر نہ کر سکیں۔ آخر کارقافلہ الفیوم نخلستان پہنچ گیا۔ نخلستان میں موجود کیمیاگر قافلے کا منتظر تھا، کائنات کی علامتوں سے اس پر انکشاف ہوگیا تھا کہ اِس قافلے میں ایک ایسا شخص آرہا ہے جسے اُس نے اپنے مخفی علوم کے بعض راز بتانا ہیں لیکن کیمیاگر اُس شخص کو پہچانتا نہ تھا ۔ لڑکا اور انگلستانی باشندہ نخلستان کی وسعت دیکھ کر حیران تھے ۔ قافلے کے سردار نے اعلان کیا کہ جنگ کے خاتمہ تک قافلہ نخلستان میں مہمان رہے گا ، ٹھہرنے کا سُن کر لڑکا فکرمند ہوجاتا ہے کیونکہ اسے اور بھی آگے جانا تھا۔ انگلستانی باشندہ لڑکے کے ساتھ مل کر کیمیاگر کی تلاش کرتا ہے لیکن وہ نہ ملا۔ آخر کار لڑکا نخلستان کے ایک کنویں پر پانی بھرنے والوں سے پوچھتاہے، وہاں ایک نوجوان لڑکی آتی ہے، جیسے ہی لڑکے کی نظر اس کی گہری سیاہ آنکھوں پر پڑی اسی لمحے لڑکے نے عشق کے جذبات محسوس کیے اور لڑکی کے جذبات بھی مختلف نہیں تھے۔ لڑکی نے بتایا کہ کیمیاگر صحرا میں رہتا ہے۔ انگلستانی باشندہ کیمیاگر کی تلاش میں چل پڑا۔ لڑکا اس لڑکی سے ملنے کی امید میں کنویں پر دوبارہ پہنچااور اس سے اپنی محبت کا اظہار کردیا۔ اب روز ہی لڑکا کنویں کے کنارےلڑکی سے ملنے لگا اوراسے اپنی زندگی کی کہانی سنادی۔ ایک مہینہ گزرا ، صحرا میں جنگ جاری رہی۔ لڑکی اُسے سفر آگے جاری کرنے کا کہتی ہے، لڑکی سے بچھڑنے کا سوچ کر لڑکا اداس ہوگیا۔ لڑکا انگلستانی باشندے کے پاس پہنچا، جو اپنے بھٹی بنا کر تجربات کررہا ہوتا ہے۔ انگلستانی باشندہ بتاتا ہے کہ کیمیاگر نے اسے کام دیا ہے اور اس کام میں کامیابی کی اولین شرط یہ ہے کہ ناکامی کا خوف بالکل نہ ہو۔ لڑکا اُس کے عمل کو دیکھتا رہا اور پھر صحرا میں نکل گیا۔ کچھ دیر تک وہ صحرا میں اِدھر اُدھر بھٹکتا رہا اور پھر ایک پتھر پر مراقب بیٹھ گیا۔ وہ عشق میں وصل، فراق اور ملکیت کے تصور پر غور کرتا رہا، لیکن کسی میں فرق کرنے سے قاصر رہا۔ ابھی اسی سوچ میں غرق تھا کہ اُسے اُوپر عقابوں کا ایک جوڑا پرواز کرتا نظر آیا۔ اچانک ایک عقاب دوسرے پر جھپٹا۔ تب ہی لڑکے کو جھماکے سے ایک عکس نظر آیا کہ ایک فوج نخلستان میں داخل ہورہی ہے۔ وہ گھبراکر نخلستان کی جانب دوڑگیا اور ساربان کو بتایا، ساربان نے یقین کرلیا کیوں کہ وہ ایسے مستقبل شناس لوگوں سے مل چکا تھا، وہ ایک بزرگ سے ملا تھا جس نے اسے سمجھایا تھا کہ مستقبل کو کھوجنے سے بہتر ہےکہ حال پر غور کرو، حال ہی میں اصل راز پوشیدہ ہے۔ مستقبل صرف قدرت کے ہاتھ میں ہے، البتہ قدرت کبھی کبھی مستقبل کو کسی پر منکشف بھی کردیتی ہے، ساربان سردار ِقبیلہ کو اطلاع دینےکا کہتا ہے۔ لڑکا ججھکتا ہے لیکن ساربان کے سمجھانے پر سردارِ قبیلہ کے خیمہ جا پہنچتا ہے۔ لڑکا خیمے کی سجاوٹ دیکھ کر دنگ رہ جاتا ہے، لڑکا وہاں سب کو اپنا مکاشفہ بتاتا ہے، سردارانِ قبیلہ آپس میں بحث کرتےہیں۔ بڑا سردار یوسف اور خواب کی تعبیر کا قصہ سنا کر کہتا ہے کہ ہمیں صحرا کے پیغامات پر یقین کرنا چاہیے، پنچائت کی نشست ختم ہو تی ہے، سردار کہتا ہے کہ دشمن کے مارے جانے پر انعام ملے گا۔ لڑکے اپنے خیمہ لوٹتاہے ، اچانک ریت کے طوفان کے ساتھ ہاتھ ایک گھڑسوار آتاہے اور لڑکے پر تلوار سوت کر پوچھتا ہے کہ کائناتی نشانیوں کو ظاہر کرنے کی اس نے ہمت کیسے کی، لڑکا بتاتا ہے کہ اس طرح ہزاروں جانیں محفوظ ہوجائیں گی۔ اجنبی شہسوار کہتا ہے کہ وہ اس کی ہمت کا امتحان لینے آیا تھا، اپنے مقدر کی تلاش میں تم اتنا دور آ چکے ہو، اپنی کوششیں درمیان میں نہ چھوڑ دینا، اس کے بعد کل ملنے کا کہہ کر اجنبی گھڑسوار چلا جاتا ہے، لڑکے کو خوشی ہوتی ہے کہ آج وہ کیمیاگر سے ملا ہے۔ دوسرے دن دوپہر کو شمال سے گھڑ سوار قبائلی نمودار ہوئے اور نخلستان پر حملہ آور ہو گئے ، مگر گھات لگائے مقامی جنگجو نے انہیں گھیر لیا اور سارے حملہ آور مار ڈالے گئے۔ فوجی پلٹن کا کماندار جس کو قتل نہیں کیا گیا سرداروں کے سامنے پیش ہوا، اُسے پھانسی کی سزا ہوئی۔ قبیلے کے سردار نے لڑکے کو سونے کے سکے پیش کیے اور نخلستان کے مشیر کا عہدہ دیا۔ شام کو لڑکا اونٹ پر سوار جنوب کی سمت چل پڑا اور کیمیا گر کے خیمہ تک جاپہنچا۔ کیمیاگر نے اسے کھانے کی دعوت دیاور کہا کہ میں تو تمہیں وہ مقام بتاؤں گا کہ جس جگہ تمہارا خزانہ ملے ہے اور دوسرے دن گھوڑا ساتھ لانے کو کہا۔ اگلی رات وہ لڑکا گھوڑے پر سوار ہو کر کیمیاگر کے خیمے پر پہنچ گیا۔ کیمیاگر نے اسے سمجھایا کہ اہرام کے اردگرد ریت ہی ریت ہے، خزانہ وہی ہوگا جہاں زندگی ہوگی، اس کے لیے صحرا میں زندگی تلاش کرنا سیکھنا ہوگی۔ وہ بتاتا ہے کہ زندگی میں زندگی کے لئے کشش ہوتی ہے، لڑکا گھوڑے کی لگام ڈھیلی چھوڑ دیتا ہے اور گھوڑا سرپٹ دوڑکر ایک مقام پر پہنچتا ہے، جہاں پتھروں کے درمیان ایک سوراخ نظر آ تا ہے، کیمیاگر اپنا ہاتھ سوراخ میں ڈال کر سیاہ ناگ نکالتا ہے اور اسے حصار میں ڈال دیتا ہے۔ کیمیا گر کہتا ہے کہ وہ ریگستان سے باہر نکلنے تک میں راہنمائی کرے گا۔ لڑکا نخلستان میں رہنے پر بضد ہوتا ہے تو کیمیاگر بتاتا ہے کہ تمہارے اس فیصلے کے بعد کیا ہو گا….؟؟ …. اب آگے پڑھیں …. 

 ………… [/box]

….(گزشتہ سے پوستہ)

 

 لڑکے کو بضد دیکھ کر کیمیاگر اس سے مخاطب ہوا اور گھمگیر آواز میں کہنے لگا۔
‘‘ایسی بات ہے تو چلو، میں تمہیں تمہارے مستقبل سے رُوبرو کراتا ہوں…. اور بتاتا ہوں کہ تمہارے اس فیصلے کے بعد کیا ہو گا….؟؟ ’’
‘‘تم واپس جاؤ گے تو سرداروں کی جانب سے تمہیں نخلستان کا مشیر مقرر کر دیا جائے گا۔ تمہارے پاس پہلے ہی سے کافی سونا موجود ہے جس سے تم بہت سی بھیڑیں اور اونٹ خرید لو گے۔ اس صحرائی لڑکی سے تمہاری شادی ہو جائے گی اور پھر سال بھر تک تم دونوں خوب خوش و خرّم رہو گے۔ پھر تم صحرا سے بھی مانوس ہوجاؤ گے اور اس کو سمجھنے اور اُس سے محبت کر نے میں تم اور آگے بڑھو گے۔ پھر نخلستان کے ہر گوشے ہر درخت کے بارے میں تمہاری معلومات میں خوب اضافہ ہوتا جائے گا۔ تم اُن کو اُگتے بڑھتے دیکھو گے اور سمجھو گے کہ دنیا کیسے بدلتی ہے۔
مشاہدہ میں پختگی کے ساتھ ساتھے صحرا میں رہ کر کائناتی نشانیوں کو سمجھنے میں تمہاری صلاحیتوں میں روز افزوں ترقی ہوتی جائے گی۔ کیونکہ صحرا بذات خود ایک بہترین استاد ہے۔ ’’

تھوڑی توقف کے بعد کیمیاگر پھر بولا، ‘‘لیکن دوسرے سال میں ایک وقت ایسا آئے گا جب تمہیں خزانے کاخیال آئے گا۔ علامات اور نشانیاں تم پر اکثر ظاہر ہوں گی ، تمہیں اشارے کریں گی اور اُس کے حصول کے لئے تمہیں اُکسائیں گی لیکن تم اُن نشانیوں صَرفِ نظر کرتے رہو گے۔ کیونکہ تم اپنے تجربہ اور علم کو نخلستان اور یہاں کے مکینوں کی فلاح و بہبود کے لئے استعمال کرو گے۔ قبیلے کے سردار تمہارے کردار اور کارناموں کو سراہیں گے اور تمہارے ریوڑ، اونٹ کے قافلے، تمہاری دولت اور قوّت میں اضافہ کرتے رہیں گے۔
تیسرے سال بھی نشانیاں مزید شدت کے ساتھ تمہیں خزانہ اور مقدّر کی جستجو کے لئے اُکسائیں گی۔ تم رات رات بھر نخلستان میں اِدھر اُدھر گھومتے رہو گے، جس کی وجہ سے تمہاری بیوی ایک احساسِ جرم کا شکار رہنے لگے گی۔ اُسے یہ احساس ستانے لگے گا کہ اُس کی وجہ سے تم اپنی جستجو ختم کر بیٹھے تھے۔ حالانکہ تم بدستور ایک دوسرے سے محبت کرتے رہو گے۔ لیکن تمہیں کبھی کبھی یاد آئے گا کہ تمہاری بیوی نے تو تمہیں کبھی روکا نہ تھا اور وہ روکتی بھی کیسے کہ صحرا عورت تو اپنے مرد کا انتظار کرنے کے لئے پیدا ہوئی ہے۔ یوں تو الزام تمہاری بیوی پر نہ آئے گا۔ مگر اکثر چلتے پھرتے تمہیں خیال آئے گا۔ ‘‘تم اپنی مہم جاری رکھ سکتے تھے…. تم اپنی بیوی کی محبت پر بھروسہ کر سکتے تھے….’’ کیونکہ اب بھی تو تمہارے دل میں رہ رہ کر یہی خیال آ رہا ہو گا کہ اگر چلا گیا تو نہ معلوم واپس بھی آ سکوں گا کہ نہیں۔
اور پھر ایک وقت آئے گا کہ کائناتی علامتیں اور نشانیاں یہ بتائے گی ‘‘خزانے تک پہنچنے کے تمام اسباب ختم ہوچکے ہیں، تمہارا خزانہ ہمیشہ کے لیے دفن ہو چکا ہے۔ اب اس کی تلاش ناممکن ہے۔’’
پھر چوتھے سال میں کسی وقت یہ علامتیں نشانیاں بھی تمہارا ساتھ چھوڑ دیں گی۔ اس لیے کہ تم نے اُنہیں سُننا اور سمجھنا ہی بند کر دیا ہو گا۔
پھر سردارانِ قبیلہ اِس تبدیلی کو محسوس کر لیں گے کہ کائناتی نشانیاں تمہارا ساتھ نہیں دے رہیں اور اس کے بعد تمہیں کسی کام کا نہ سمجھ کر اس اعلیٰ عہدے سے بر طرف کر دیا جائے گا۔
لیکن یہ اور بات ہوگی کہ اُس وقت تم ایک اچھے اور امیر تاجر بن چکے ہو گے۔ تمہارے پاس بہت سے اونٹ اور وافر تجارتی سامان موجود ہو گا۔ لیکن پھر بھی زندگی کے بقیہ ایّام تم اِس افسوس میں گزار دو گے کہ تم مقدّر کی جدوجہد جاری نہ رکھ سکے اور اب وقت گزر چکا ہے۔’’
ایسا لگ رہا تھا کہ کیمیاگر اپنے سامنے اس کی آنے والی کی زندگی کی کتاب رکھ کر ورق در ورق پڑھ کر سُنا رہا ہو۔ کیمیاگر اُسے سمجھانے کے انداز میں کہنے لگا:
‘‘تم اچھی طرح سمجھ لو کہ عشق حصولِ مقصد کی جد و جہد سے روکتا نہیں۔ اگر کوئی اِس جدو جہد کو چھوڑ بیٹھے تو یہ سمجھ لو کہ عشق سچا نہیں تھا۔ وہ عشق نہیں تھا ، جس کی زبان لفظوں کی محتاج نہیں ہے، وہ کوئی اور جذبہ ہو گا، عشق نہیں۔’’

اب کیمیاگر نے جو دائرہ بنایا تھا اُسے مٹا دیا اور سانپ پتھروں میں کہیں غائب ہو گیا۔ لڑکا اُس کی باتوں پر غور کئے بغیر نہ رہ سکا۔ اُسے شیشے کا تاجر یاد آیا جسے مکّہ جانے کی شدید خواہش تھی، مگر وہ اپنی ترجیحات میں الجھ کر اسے پوری نہ کرسکا اور اسے تمام زندگی اس کا ملال رہا، پھر اسے انگلستانی باشندہ یاد آیا جو کیمیاگر سے ملنا چاہتا تھا اور اس کےلیے اپنا سب کچھ چھوڑ کر یہاں چلا آیا۔ اور پھر وہ اُس لڑکی کے متعلق سوچنے لگا جو سب کچھ ریگستان ہی سے سیکھتی اور اُس کی محبت پر بھروسہ کرتی ہے اور اِس طرح اُس ریگستان پر اُس کی نظر دوڑ گئی جس کی بدولت ہی وہ اپنی محبوبہ سے مل سکا تھا۔
دونوں گھوڑوں پر سوار ہو گئے۔ اِس بار لڑکا کیمیاگر کے پیچھے پیچھے تھا، دونوں نخلستان ہی واپس جا رہے تھے۔ تیز چلتی ہوا کے ساتھ نخلستان کی آبادی سے اُبھرنے والی آوازیں اُن کے کانوں میں ٹکرائیں تو لڑکا سوچنے لگا کہ کاش میں اِنہیں آوازوں میں سلمیٰ کی آواز پہچان سکتا۔
وہ رات بھی عجیب تھی…. وہ کئی نئے تجربوں سے گزرا تھا۔ دائرہ کے حصار میں گرفتار کوبرا سانپ، عقابوں کو کندھے پر بٹھائے عجیب و غریب شہسوار اور محبت اور خزانہ کے بارے میں اُس کے پُراِسرار خیالات، صحرائی لڑکی اور مقدّر کے بارے میں اُس کی حکیمانہ باتیں جنہیں صرفِ نظر نہیں کیا جا سکتا تھا۔دونوں گھڑسوار ساتھ ساتھ چل رہے تھے، سفر کے دوران لڑکا کیمیاگر کی باتوں پر غور کرتا رہا اور آخر وہ ایک فیصلے پر پہنچ گیا،
‘‘ٹھیک ہے، میں تمہارے ساتھ چلوں گا۔’’ فیصلہ کن لہجے میں لڑکے کی زبان سے نکلا اور جیسے اچانک اُس کے دل کو سکون سا مل گیا تھا۔
‘‘ٹھیک ہے ہم لوگ کل طلوعِ آفتاب سے قبل نکلیں گے۔’’کیمیاگر نے مختصراً جواب دیا۔

***

اُس رات نیند کوسوں دور رہی۔ طلوعِ صبح سے کوئی دو گھنٹہ قبل اُس نے اپنے خیمے میں ساتھ رہنے والے ایک نو عمر عرب لڑکے کو جگایا تاکہ سلمیٰ کے خیمہ تک پہنچنے میں آسانی ہو۔ اِس خدمت کے عوض بچہ کو سونے کے اتنے سکّہ دئے جو ایک بھیڑ خریدنے کے لئے کافی تھے۔
لڑکے نے اُس سے کہا کہ سلمیٰ کے خیمہ میں جاکر اُسے بتائے کہ میں باہر اُس کا منتظر ہوں۔ بچہ نے خوشی خوشی حکم کی تعمیل کی اور ایک بار پھر بچہ کو انعام سے نوازا گیا۔
‘‘اب تم جا سکتے ہو، ’’ لڑکے نے عرب بچے سے کہا۔جو خوش تھا کہ نخلستان کے مشیر نے اِس سے خدمت لی جس کے عوض اُسے خاصا سونا مل چکا تھا۔ حکم سُن کر وہ خوشی خوشی اپنے خیمہ میں واپس اپنی نیند پوری کرنے چلا گیا۔
سلمیٰ خیمے کے دروازے پر نظر آئی تو دونوں ایک دوسرے سے ذرا دور رہ کر درختوں کے حصہ کی جانب بڑھ گئے۔

سلمیٰ نے کہا کہ ‘‘اچانک یہاں بیچ نخلستان میں اِس طرح کھلے عام ملنا ٹھیک نہیں، یہ ہماری روایت کے خلاف ہے’’۔ اِس بات کا احساس لڑکے کو بھی تھا، لیکن مجبوری یہ تھی کہ پھر کوئی اور موقع نہ تھا۔
‘‘میں آج جا رہا ہوں۔’’ وہ بولا…. ‘‘یاد رکھنا کہ میں بہت جلد واپس آ جاؤں گا۔میں شاید تمہارے بغیر بہت عرصہ تک نہ رہ سکوں ۔ سنو ! میں تم سے بہت شدید محبت کرتا ہوں، کیونکہ….’’
‘‘کچھ کہنے کی ضرورت نہیں’’ سلمیٰ نے بیچ میں لڑکے کی بات کاٹ دی۔‘‘کسی سے محبت اس لیے کی جاتی ہے کہ اس سے محبت ہوتی ہے، محبت تو بس برائے محبت ہوتی ہے،محبت کے لیے کسی وجہ کی ضرورت نہیں ہوتی ۔’’
لیکن لڑکے نے اپنی بات جاری رکھی، ‘‘میں تمہیں سب کچھ بتا چکا ہوں۔ میرا خواب، بادشاہ سے ملاقات، شیشے کی دکان پر کام، ریگستان کا سفر، قبائلی جنگوں کی بنا پر میرا یہاں رکنا اور پھر کیمیاگر کی تلاش میں کنویں پر آنا اور تم سے ملنا جیسے یہ سب ایک سلسلہ کی کڑیاں نظر آتی ہیں۔ ایسا لگتا ہے کہ تم سے ملنے کے لئے ہی یہ سب کچھ ہوا تھا، جیسے تمہیں ڈھونڈنے اور محبت کی آبیاری میں پوری کائنات میری معاون بن گئی ہو۔’’
جانے کب سلمیٰ کا کانپتا ہوا ہاتھ لڑکے کے دونوں ہاتھوں کے درمیان قرار پا چکا تھا۔ یہ پہلا موقع تھا جن دونوں نے ایک دوسرے کے لمس کو محسوس کیا تھا۔
‘‘میں واپس آؤں گا، میرا انتظار کرنا۔’’ لڑکا بولا۔
‘‘آج سے پہلے ریگستان کو دیکھ کر میرے دل میں ایک انجانی سی تمنّا سر اُٹھا تی تھی۔’’ سلمیٰ کہہ رہی تھی، ‘‘لیکن اب اِس میں امید کی کرن بھی ہو گی۔ میرے والد ایک بار ماں کو چھوڑ کر گئے لیکن وہ واپس آ گئے۔اور اب وہ جب بھی جاتے ہیں واپس آ جاتے ہیں۔’’
پھر وہ دونوں کچھ نہ بولے۔ درختوں کے درمیان چلتے ہوئے آہستہ آہستہ سلمیٰ کے خیمہ تک واپس آ گئے اور لڑکے نے سلمیٰ کو خدا حافظ کہا۔
‘‘جیسے تمہارے والد تمہاری والدہ کے پاس واپس آگئے، اُسی طرح یقین کرو کہ میں بھی واپس آؤں گا۔’’سلمیٰ کی خوبصورت آنکھیں آنسوؤں سے لبریز ہونے لگیں۔
‘‘یہ کیا تم رو رہی ہو؟….’’

‘‘میں ریگستان کی عورت ضرور ہوں ’’ سلمیٰ نے چہرا موڑ کر آنسو چھپاتے ہوئے کہا۔ ‘‘لیکن بہرحال ایک عورت ہوں۔’’
سلمیٰ اپنے خیمہ میں واپس لوٹ گئی…. جب صبح ہوچکی تو وہ خیمے سے باہر آئی، برسوں سے جاری پانی بھرنے کا معمول میں مشغول ہوگئی ۔ لیکن آج سب کچھ بدل چکا تھا۔وہ لڑکا اب نخلستان سے جا چکا تھا۔ اُسے لگا کہ جو سکون کا احساس اُسے کل تک حاصل تھا، وہ اب کبھی نہ حاصل ہو سکے گی۔ نخلستان جس کی فضاؤں میں محبت و یگانگت کی آبیاری ہوئی وہ اپنی معنویت کھو چکا تھا۔ یہاں کے پچاس ہزار درخت اور تین سو کنویں جو طویل سفر سے واپس آنے والے قافلوں کے لئے جایہ سکون تھے، سلمیٰ کے لیے اُس دِن سے یہ بس ایک ویران جگہ ہو گی تھی، کیونکہ جس کی چند روز کی رفاقت میں اُسے وجود کا ادراک حاصل ہو ا تھا، اب یہاں نہیں تھا۔ جیسے اب کچھ نہ رہا ہو، سب خالی خالی تھا۔
آج کے بعد نخلستان نہیں بلکہ صحرا اُس کے لئے زیادہ اہم ہو جائے گا۔ وہ ہر نئے دن کا انتظار کرے گی، سوچے گی کہ وہ خزانے کی تلاش کا سفر کس ستارے کو دیکھ کر طے کر رہا ہو گا۔ وہ اپنی محبت اور جذبات کے پیغامات کو ہواؤں کے دوش پر بھیجے گی کہ یہ ضروراُس کے چہرے سے ٹکرا کر میری زندگی کا پیغام دیں گی اور یہ بتائیں گی کہ وہ اُس کی منتظر ہے۔ خزانے کے متلاشی ایک با ہمّت نوجوان کے لئے ایک عورت سراپا انتظار بنی ہوئی ہے۔ آج کے بعد یہ ریگستان محض اِس امید کی بناء پر اہم ہو گا کہ اُس کا آنے والا اِسی سے گزر کر واپس آئے گا۔

***

‘‘جو کچھ تم پیچھے چھوڑ آئے ہو اُس کے لئے زیادہ فکر مند نہ ہو۔’’ کیمیاگر نے راستہ چلتے ہوئے لڑکے کو سمجھایا۔
‘‘کائنات کی روح میں سب کچھ لکھا جاتا ہے جو اس میں ہمیشہ رہتا ہے، جو کچھ لکھا جا چکا اس میں تبدیلی نہیں ہو سکتی۔’’
‘‘گھر واپسی کے خواب دیکھنا اور اُس کے تصوّر سے بے قرار رہنا انسانی کمزوری ہے اور گھر چھوڑنا اُس کے لئے درد انگیز۔ آدمی گھر چھوڑنے سے زیادہ گھر لوٹنے کے خواب دیکھتا ہے۔’’ لڑکا بولا۔ وہ صحرا کے سکوت کا پہلے سے عادی تھا۔
‘‘جو کچھ تم نے پایا ہے اگر وہ حقیقی ہے تو سمجھ لو کہ وہ ختم نہ ہو گا اور تم واپس آ کر اُسے حاصل کر لو گے اور اگر تم محض ایک لمحاتی جذبہ کو حقیقت سمجھ بیٹھے ہو تو یہ ایک روشنی کے جھماکے کی طرح ختم ہو جائے گا اور واپسی پر کچھ نہ ملے گا۔’’
کیمیاگر صوفیانہ انداز میں اظہارِ خیال کر رہا تھا لیکن لڑکے کو اندازہ تھا کہ اُس کا یہ حوالہ سلمیٰ سے متعلق ہے۔ لڑکے کی مجبوری یہ تھی کہ وہ جو کچھ پیچھے چھوڑ آیا تھا اُسے بھُلا نہیں سکتا تھا۔ یہ نا ممکن تھا کہ سلمیٰ اُس کے خیالوں کی گرفت سے باہر رہ سکے۔ صحرا کی وسعت پذیری اور اُس کی لامتناہی یکسانیت اسے خواب دیکھنے پر مجبور کررہی تھیں۔ اور اب بھی نخلستان کے خوبصورت درخت جیسے اُس کی آنکھوں کے سامنے تھے۔ وہ کنواں اور پانی بھرتے ہوئے سلمیٰ- جیسے وہ سب کچھ دیکھ رہا تھا۔ انگلستانی باشندہ جو اپنے تجربے میں مستغرق تھا اور وہ ساربان جس نے اُسے بہت سی باتیں سکھائی تھیں وہ ایسے محسوس کر رہا تھا جیسے اُن کے درمیان ہو۔ بھلا یہ سب کیسے نہ یاد آئیں گے اُن کو بھُلایا نہیں جا سکتا۔ لڑکا سوچنے لگا کہ کیمیاگر کو شاید عشق کا تجربہ کبھی نہیں ہوا۔
کیمیاگر کا گھوڑا آگے آگے تھا۔ عقاب اُس کے کاندھے پر سوار صحرا کی زبان سے اچھی طرح واقف تھا۔ جب بھی وہ کہیں رُکتے تو عقاب اشارہ پا لیتا اور کسی شکار کی تلاش میں اُڑ جاتا۔ پہلے دن ایک خرگوش کا شکار لایا اور دوسرے دن دو چڑیاں۔

رات ہوئی تو وہ اپنے بستروں کو کھول کر بچھا دیتے اور ضرورت کے تحت چھپا کر آگ روشن کرتے۔ ریگستان کی راتیں سرد تھیں اور اندھیری بھی۔ چاند کے گھٹنے کے ساتھ اُس اندھیرے میں اضافہ ہو تا جا رہا تھا۔ کوئی ایک ہفتہ تک وہ ایسے ہی سفر کرتے رہے، ضرورت پڑنے پرہی کوئی گفتگو کرتے اور وہ بھی زیاد ہ تر ایسی احتیاطی تدابیر سے متعلق ہوتی جو قبیلوں کی جنگ کی زد میں آنے سے محفوظ رہنے کے لئے ضروری تھیں۔ جنگ جاری رہی اور بہنے والی خون کی بو کبھی کبھی ہوا کے دوش پر اُڑتی ہو ئی اُن کے حواس کو باخبر کر دیتی کہ جنگ شاید یہیں کہیں قریب ہی ہو رہی تھی۔ لڑکے کو یہ اندازہ تھا کہ جو چیزیں نظر نہ آسکیں گی وہ علامتوں کے ذریعہ معلوم ہو جائیں گی۔
ساتویں روز کیمیاگر نے اب تک کے معمول سے ذرا قبل ہی ٹھہرنے کا فیصلہ کر لیا۔ عقاب شکار کی تلاش میں اُڑ گیا۔کیمیاگر نے اپنی پانی کی مشکیزہ لڑکے کو پیش کی۔
‘‘ہمارا سفر اب خاتمہ کے قریب ہے۔’’ کیمیاگر کہنے لگا۔
‘‘تم نے اپنی جستجو جس کامیابی سے جاری رکھی ہے وہ یقیناً قابلِ تحسین ہے۔’’
‘‘لیکن راستہ میں تم نے مجھے کچھ بھی نہیں سکھایا۔’’ لڑکے نے کہا:
‘‘میں سوچتا تھا کہ تم مجھے کچھ خاص خاص باتیں بتاؤ گے، یہ تو بالکل ایسے ہی ہوا جیسے انگلستانی باشندے کے ساتھ ریگستان سے گزرتے ہوئے ہوا تھا ، مجھے سکھانے کے لیے اُس نے ڈھیر سی کتابیں دیں، لیکن وہ میرے لئے بے کار رہیں اور میں اُن سے کچھ نہ حاصل کر سکا۔’’
‘‘جاننے اور سیکھنے کا ایک ہی طریقہ معتبر ہے۔’’ کیمیاگر لڑکے کو بتانے لگا۔ ‘‘اور وہ ہے عمل، جو کچھ تمہارے لئے ضروری تھا وہ سفر نے تمہیں سکھا دیا ہے۔ بس اب ایک چیز باقی ہے۔’’
لڑکا جاننا چاہتا تھا کہ وہ چیز کیا ہے؟…. لیکن کیمیاگر کی نظریں تو آسمان میں اُڑنے والے عقاب کو تلاش کر رہی تھی۔
‘‘تمہیں کیمیاگر کیوں کہا جاتا ہے۔’’
‘‘اِس لئے کہ میں کیمیاگر ہوں۔’’
‘‘لیکن دوسرے بہت سے کیمیاگر جنہوں نے سونا بنانے کی کوشش کی اور ناکام ہوئے؟ ’’
‘‘کیونکہ اُن کا مطمع نظر صرف سونا تھا۔وہ اپنے مقدّر کی دولت یعنی اُس کے صرف ایک حصہ کو ہی چاہتے تھے، پوری تقدیر سے انہیں دلچسپی نہ تھی۔’’
‘‘مجھے اب کیا سیکھنا باقی ہے؟’’ لڑکے نے پھر پوچھا۔

لیکن کیمیاگر کی نظر آسمان میں کچھ تلاش کر تی رہی۔ تھوڑی دیر میں عقاب شکار سے واپس آ گیا۔ اُنہوں نے ایک گڑھا کھود کر اُس میں آگ جلائی تاکہ باہر سے کسی کو وہ نظر نہ آسکے۔
‘‘میں کیمیاگر ہوں اِس لئے مجھے کیمیاگر کہتے ہیں، بالکل سادہ سی بات ہے۔’’ وہ کھانا تیار کرتے ہوئے لڑکے سے کہنے لگا : ‘‘یہ عِلم میں نے اپنے دادا بزرگوار سے حاصل کیا تھا اور اُنہوں نے اپنے والد سے اور اِسی طرح یہ سلسلہ تخلیقِ کائنات سے جاری ہے۔ در اصل اُس زمانہ کا امتیاز اختصار تھا اور شاہکارِ تخلیق محض ایک زمرّد کی سطح پر تحریر کی جا سکتی تھی۔ وقت گزرنے کے ساتھ سادگی ختم ہونے لگی تو رسالے تحریر کئے جانے لگے پھر اُن کی تشریحات ہونے لگیں اور پھر فلسیانہ مطالعات کا لمبا سلسلہ چل پڑا۔ اور پھر بعد کے آنے والوں نے یہ محسوس کرنا شروع کر دیا کہ گزشتہ زمانہ کے لوگ ہمارے مقابلہ میں کم جانتے تھے۔ ہمارا عِلم اور ہمارا زمانہ زیادہ ترقی یافتہ ہے، لیکن ایسا نہیں ہے کہ وہ علم بالکل ختم ہو گیا۔ وہ آج بھی موجود اور لوحِ زمرّد آج بھی زندہ ہے۔’’
‘‘زمرّد کی اُن لوحوں پر کیا تحریر ہوتا تھا ؟’’ لڑکے نے جاننا چاہا۔
کیمیاگر نے ریت میں کچھ آڑی ترچھی لکّیریں کھینچنی شروع کر دیں۔ تکمیل کرنے میں کوئی پانچ منٹ لگے ہوں گے۔ اِس دوران لڑکا اُسے دیکھتا رہا۔ اُسے بوڑھا بادشاہ یاد آیا جس سے پلازہ کے سامنے ملاقات ہوئی تھی اور اس نے ریت پر لکھا تھا، ۔ اسے ایسا لگ رہا تھا جیسے یہ ملاقات برسوں پہلے ہوئی تھی۔
‘‘لوحِ زمرّد پر یہ لکھا رہتا تھا۔ ’’ کیمیاگر لکھ چکا تو لڑکے سے مخاطب ہوا۔ لڑکے نے پڑھنے کی کوشش کی۔
‘‘یہ تو کچھ اشارے ہیں۔’’ اُس کے انداز میں مایوسی تھی۔
‘‘ایسا ہی کچھ اِس انگریز کی کتاب میں تھا۔’’
‘‘نہیں ….’’ کیمیاگر نے جواب میں کہا ‘‘یہ اُن عقابوں کی اُڑان کی مانند ہے جو تم نے اُس روز دیکھے تھے، یہ سمجھنے کے لئے محض منطق اور استدلال ہی کافی نہیں ہے۔ لوحِ زمرّد در اصل ایک راستہ بتاتا ہے جس سے روحِ کائنات میں براہِ راست پہنچا جا سکتا ہے….’’
‘‘دانا لوگ یہ کہتے ہیں کہ یہ نظر آنے والی دنیا تو محض ایک تصویر یا ایک عکس ہے، اُس اصل دنیا کا جو کہیں اور موجود ہے، آخرت کے بعد یعنی جنّت کی شکل میں …. ہم اس عکس *کو ہی اصل سمجھ رہے ہیں، یہ دنیا تو ہمارے اِس یقین کو پختہ کرنے اور یہ ضمانت دینے کے لیے ہے کہ عیبوں اور نقائص سے بالکل پاک ایک اور دوسری دنیا ضرور پائی جاتی ہے۔
خدا نے یہ کائنات اِس لیے بنائی ہے کہ انسان اُس کی تخلیقات پر غور و فکر کرتا رہے اور اُس کی حکمت و دانائی، اُس کی عظمت و بزرگی اور انسانوں کے تئیں اُس کی رحمت اور اُس کی باریک بینی پر تدبّر کرے اور اِس طرح اُس کی مخلوق کو سمجھ کر خدا کو پہچانے۔ دراصل اِس غور و فکر، تدبّر اور تفقہ کا نام ہی عمل ہے اور یہی عمل کرتے ہوئے انسان کے علم میں اضافہ ہو سکتا ہے۔

 

[box type=”shadow” align=”” class=”” width=””]

* یہ دنیا ساری ایک دماغی فلم ہے جو اوپر سے چل رہی ہے۔ اور ہم اسے دیکھ رہے ہیں۔اب ادھر پراجیکٹر چل رہا ہے ، ادھر فلم اسکرین ڈسپلے ہو رہی ہے۔ ایک آدمی پروجیکٹر سے واقف ہی نہیں تو وہ یہی کہے گا کہ بھائی میں نے فلم دیکھی ہے بس مگر کوئی دانشور ہے۔ سمجھدار ہے وہ یہ کہے گا کہ فلم کا فیتہ پروجیکٹر پر چل رہا ہے اور روشنی کے ذریعے اسکرین پر ڈسپلے ہو رہا ہے اور میں اسے دیکھ رہا ہوں، تو جو کچھ آپ اسکرین پر دیکھ رہے ہیں وہ تابع ہے پروجیکٹر کے بعینہ یہ ساری کائنات ایک فلم ہے اللہ کی اور لوح محفوظ اس کا پروجیکٹر ہے۔تو اب ہم اس طرح کہیں گے کہ ایک لوح محفوظ ہے۔ اس پر کائنات کی فلم چل رہی ہے اور اس فلم کو آپ دیکھ رہے ہیں۔ جب اس کائناتی فلم سے آپ واقف ہو جائیں گے یعنی لوح محفوظ سے واقف ہو جائیں گے تو تب آپ کو پتہ چلے گا کہ آپ کیا دیکھ رہے ہیں؟ تو اس فلم سے واقف ہونے کیلئے روح کی حقیقت سے آشنا ہونے کیلئے روحانیت میں سب سے بڑی اہمیت جس عمل کو ہے وہ ہے محبت….

[ذات کا عرفان، خواجہ شمس الدین عظیمی] [/box]

‘‘پھر کیوں نہ میں بھی اس لوحِ زمردکو سمجھنے کی کوشش کروں ’’ لڑکے کی آواز میں شوق کی گونج تھی۔
‘‘ہاں کیوں نہیں…. اگر تم اس وقت کیمیا کی لیبارٹری میں ہوتے تو لوح زمرد کو سمجھنے کا طریقہ جاننے کی کوشش کے لئے یہ مناسب وقت ہوتا، لیکن ابھی تم اِس وقت ریگستان میں ہو۔ اِس میں ڈوب جاؤ تو یہ خود ہی تم کو وہ سب کچھ دے گا اور اِس کائنات کی تفہیم کرا دے گا، بلکہ سچ تو یہ ہے کہ اِس زمین کی سطح پر جو کوئی بھی چیز موجود ہے وہ اِس دنیا کو سمجھنے میں تمہاری مدد کر سکتی ہے۔ تمہیں پورے ریگستان کو سمجھنے کی ضرورت نہیں بلکہ محض اِس کے ریت کے ایک ذرّہ پر بھی تم غور کرو تو اِس عظیم تخلیق کی حیرت ناک باریکیاں اور اُن میں پنہاں حکمتیں تمہیں ورطہ حیرت میں ڈال دیں گی۔’’
‘‘ریگستان میں کیسے ڈوبا جائے۔’’
‘‘اپنے من کی آواز سنو۔ اُسے قدرت کے رازوں تک رسائی حاصل ہے، تمہارا باطن سب کچھ جانتا ہے۔ وہ کائناتی روح سے منسلک ہے، وہ وہیں سے آیا یے ےاور اُسے بہر حال ایک دن اُسی کائناتی روح سے جا کر مل جانا ہے۔’’

 

 

(جاری ہے)
***

تحریر : پاؤلو کویلہو ; ترجمہ: ابن وصی

 

[box type=”shadow” align=”” class=”” width=””] انسان اگر کوشش کرے تو سب کچھ ممکن ہے، حصولِ مقصد کی راہ میں حائل مشکلات، رکاوٹیں نہیں بلکہ آزمائش ہوتی ہیں، جب انسان کےدل میں کوئی خواہش سراٹھاتی ہے اور وہ کسی چیز کو پانے کی جستجو اور کوشش کرتا ہے تو قدرت اس کی خواہش کی تکمیل میں مددگار بن جاتی ہے کہ اس کی یہ خواہش پوری ہو ۔ اگر لگن سچی ہو تو خدا کی اس کائنات میں بکھری نشانیاں اِس جدوجہد کے دوران راہنمائی اور معاونت کرتی نظر آتی ہیں۔
کیمیاگر (الکیمسٹ Alchemist ) برازیلی ادیب پاؤلو کویلہو Paulo Coelho کا شاہکار ناول ہے، جس کا دنیا کی 70 زبانوں میں ترجمہ ہوا ۔ اس ناول نے فروخت کےنئے ریکارڈ قائم کرکے گنیز بک میں اپنا نام شامل کیا۔ اس کہانی کے بنیادی تصوّرات میں رومی، سعدی اور دیگر صوفیوں کی کتابوں اور فکرِ تصوّف کی جھلک نظر آتی ہے۔ 
کیمیا گر ، اندلس کے ایک نوجوان چرواہے کی کہانی ہے جو ایک انوکھا خواب دیکھتا ہے جس کی تعبیر بتائی جاتی ہے کہ اسے کوئی خزانہ ضرورملے گا ۔ وہ خزانے کی تلاش میں نکلتا ہے اور خوابوں، علامتوں کی رہنمائی میں حکمت اور دانائی کی باتیں سیکھتے ہوئے ، افریقہ کے صحراؤں میں اس کی ملاقات ایک کیمیاگر سے ہوتی ہے ، یہ کیمیا گر خزانے کی تلاش کے ساتھ انسانی سرشت میں چھپے اصل خزانے کی جانب بھی اس کی رہنمائی کرتا ہے….
[/box]

پندرھویں قسط ….

[box type=”Warning” align=”” class=”” width=””]

گزشتہ قسط کا خلاصہ : یہ کہانی اندلوسیا (اسپین ) کے ایک نوجوان سان تیاگو کی ہے، والدین اُسے راہب بنانا چاہتے تھے مگر وہ سیاحت کے شوق میں چراوہا بن گیا۔ ایک رات وہ بھیڑوں کے گلّہ کے ساتھ ایک ویران گرجا گھر میں گزارتا ہے اور ایک عجیب خواب دیکھتا ہے کہ ‘‘کوئی اسے اہرام مصر لے جاتا ہے اورکہتا ہے کہ تمہیں یہاں خزانہ ملے گا۔’’ خزانے کا مقام دیکھنے سےقبل آنکھ کھل جاتی ہے۔ دو سال سے بھیڑیں ہی اس کی دنیا تھیں لیکن تاجر کی بیٹی سے ملنے کے بعد وہ اس کی دلچسپی کا محور بن گئی تھی۔ وہ شہر طریفا میں ایک خانہ بدوش عورت سے ملتا ہے، جو خواب کی تعبیر بتاتی ہے کہ خزانہ اسے ضرور ملے گا۔ وہ مذاق سمجھ کر شہر کے چوک پر آبیٹھا جہاں اس کی ملاقات خود کو شالیم کا بادشاہ کہنے والے بوڑھے سے ہوتی ہے جو کہتا ہے کہ وہ خزانہ ڈھونڈنے میں اس کی مدد کرسکتا ہے ۔ پہلے تو لڑکا اُسے فراڈ سمجھا، لیکن جب وہ بوڑھا اسے وہ باتیں بتاتا ہے جو صرف وہی جانتا تھا تو اسے یقین ہوا۔ بوڑھا سمجھاتا ہے کہ ‘‘انسان اگر کوشش کرے تو سب کچھ ممکن ہے، جب انسان کسی چیز کو پانے کی جستجو کرتا ہے تو قدرت اس کی خواہش کی تکمیل میں مددگار بن جاتی ہے ’’۔ خزانہ کی مدد کے بدلے بوڑھا بھیڑوں کا دسواں حصہ مانگتا ہے جو لڑکا دے دیتا ہے۔ بوڑھا بتاتا ہے کہ خزانے تک پہنچنے کے لیے غیبی اشاروں کی زبان سمجھنا ہوگی۔ بوڑھا اُسے دو سیاہ سفید پتھر دیتا ہے کہ اگر کبھی تم قدرت کے اشاروں کو سمجھ نہیں سکو تو یہ پتھر ان کو سمجھنے میں مدد کریں گے۔ بوڑھا چلا جاتا ہے اور لڑکا ایک چھوٹے سے بحری جہاز سے افریقہ کے ساحلی شہر طنجہ پہنچتا ہے۔ یہاں کا اجنبی ماحول دیکھ کر وہ فکرمند ہوجاتا ہے ، اسے ایک ہم زبان اجنبی ملتا ہے۔ لڑکا اس سے مدد مانگتا ہے۔ اجنبی رقم کا مطالبہ کرتا ہے۔ لڑکا اجنبی شخص پر بھروسہ کرکے رقم دے دیتا ہے ، لیکن اجنبی بازار کی گہما گہمی میں نظروں سے اوجھل ہوجاتا ہے۔ رقم کھونے پر لڑکا مایوس ہوجاتا ہے لیکن پھر وہ خزانہ کی تلاش کا مصمم ارادہ کرتا ہے۔ اسی شہر میں شیشے کا سوداگر پریشان تھا، اس کی ظروف کی دکان جو کبھی سیاحوں کی توجہ کامرکزتھی، اب بے رونق ہوتی جارہی تھی۔ سارا دن وہ گاہک کے انتظار میں گزاردیتا۔ اچانک دوپہر کو وہ لڑکا اس دکان پر آکر کہتا ہے کہ وہ دکان کی صفائی کرنا چاہتاہے، بدلے میں اسے کھانا چاہیے۔ لڑکے کے کام صفائی کرنے پر سوداگر اسے کھانا کھلاتاہے۔ لڑکا اُسے بتاتا ہے کہ اسے مصر جانا ہے جس کے لیے وہ کام کرنے کو تیار ہے۔ سوداگر کہتا ہے کہ سال بھر کام کرنے سے بھی اتنی رقم جمع نہ ہوگی۔ لڑکا مایوس ہوجاتا ہے۔ تاجر واپس ملک لوٹنے کا کہتا ہے مگر لڑکا دکان میں کام کرنے لگتا ہے۔ لڑکے کو کام کرتے اندازہ ہوتا ہے کہ بھیڑیں خریدنے کے لیے اُسے کم از کم سال بھر کام کرنا پڑے گا۔ زیادہ رقم پانے اور زیادہ گاہک لانے کے لیے وہ سڑک پر ایک شوکیس لگانے کا مشورہ دیتا ہے، پہلے تو تاجر نقصان کا خدشہ ظاہر کرتا ہے مگر پھر مان جاتا ہے ۔کاروبار میں بہتری آنے لگتی ہے۔ ایک دن سوداگر لڑکے سے پوچھتا ہے کہ وہ اہرام کیوں جانا چاہتا ہے ، لڑکا بتا تا ہے کہ یہ اس کا خواب ہے۔ سوداگر بتاتا ہے کہ اس کا بھی خواب تھا کہ وہ مکّہ معظّمہ کا سفرکرے، اس نے دکان کھولی ، رقم جمع کی، لیکن کوئی ایسا شخص نہ مل سکا جو اِس کی غیرموجودگی میں دکان سنبھالے۔ یوں مکّہ جانے کا خواب ، خواب ہی رہ گیا۔ لڑکا دکان کے ساتھ قہوہ کی دُکان کھولنے کا مشورہ دیتا ہے، سوداگر مان جاتا ہے۔ لوگ آنے لگتے ہیں اور کاروبار خوب پھیلنے لگتا ہے ….لڑکے کو کام کرتے گیارہ مہینے ہوتے ہیں تو وہ شیشے کے سوداگر سے وطن واپسی کی اجازت طلب کرتا ہے۔ لڑکے کو سامان باندھتے ہوئے سیاہ و سفید پتھر ملتے ہیں ۔ اِن دونوں پتھروں کو ہاتھ میں لینے سے اہرام پہنچنے کی خواہش پھر جاگ اٹھتی ہے۔ وہ سوچتا ہے کہ اندلوسیا میں تو کبھی بھی واپسی ممکن ہے لیکن اہرامِ مصر دیکھنے کا موقع دوبارہ نہ آ سکے گا۔ سوداگر کے پاس ایک شخص تجارتی سامان قافلہ کے ذریعہ صحرا لے جانے آیاکرتا تھا، وہ اس کے گودام جاتا ہے، جہاں انگلستان کا ایک باشندہ ملتا ہے۔ جس نے زندگی کائناتی زبان کی جستجو کے لیے وقف کر دی اور اب کیمیا گری سیکھنا چاہتا تھا ۔ عرب کے ریگستان میں مقیم ایک کیمیاگر کا تذکرہ سُن کر وہ سب کچھ چھوڑ چھاڑ کر اُسے ملنے کے لیے یہاں آیا ہے۔ انگلستانی باشندہ سے گفتگو کے دوران اوریم اور تھومیم پتھروں ، غیبی اشارہ اورکائناتی زبان کا ذکر سن کر لڑکے کی دوستی ہوگئی۔ گفتگو کے دوران لڑکے کی زبان سے نکلاکہ وہ خزانہ کی تلاش میں ہے، لیکن انگلستانی باشندے کو صرف کیمیاگر کی تلاش تھی۔ صحرائی قافلہ روانگی کے لیے تیار ہوتا ہے۔ قافلہ کا سردار اعلان کرتا ہے کہ ہر شخص کو اس سفر میں ہوشیار اور محتاط رہنے کی ضرورت ہے۔قافلے نے مشرق کی سمت رُخ کرکے سفر شروع کردیا۔ سورج کی تمازت پر سفر رک جاتا اور سہہ پہر میں دوبارہ شروع ہوجاتا۔ انگلستانی باشندہ زیادہ تر اپنی کتابوں میں منہمک رہا جبکہ لڑکا دلچسپی اور خاموشی کے ساتھ صحرا ، قافلہ اور اپنے ارد گر مختلف زبان اور نسل کے لوگوں کا مشاہدہ کرنے اور ریگستانی ہوا کی آوازوں کو سننے میں گزارتا ۔ رات جب الاؤ لگا کر بیٹھے تو ایک سارِبان نے اپنی داستان سنائی کہ کیسے قاہرہ میں اس کا باغ اور خاندان ایک زلزلہ کی نظر ہوگیا ، لیکن اس کا اللہ پر یقین قائم ہے۔ کبھی راہ چلتے پُراسرار نقاب پوش بدّو ملتے جو خطرہ سے باخبر کرتے ۔ اِس دوران بعض قبیلوں میں جنگ کی خبر سنتے ہی قافلے کی رفتار میں تیزی آ گئی تھی اور سفر زیادہ خاموشی سے طے کیا جانے لگا۔ ایک رات انگلستانی باشندے کولڑکے نے اپنے خواب اور سفر کی پوری کہانی سنائی۔ انگلستانی باشندے نے اسے علم کیمیا کے کائناتی اصول سمجھنے کے لیے کتابیں دیں لیکن کتابیں کچھ زیادہ ہی دقیق اور گنجلک تھیں، لڑکے کے کچھ پلّے نہ پڑا۔ لڑکے نے سب کتابیں یہ کہہ کر واپس کردیں، کہ وہ ان کتابوں سے یہی سیکھا کہ کائنات کی ایک روح ہے اور جو بھی اِس روح کو سمجھ لیتا ہے وہ کائناتی زبان جان لیتا ہے ۔انگلستانی باشندے کو مایوسی ہوئی کہ کتابیں لڑکے کو متاثر نہ کر سکیں۔ قبیلوں میں جنگ کی خبر سن کر سفر تیز ہونے لگا۔ خوف کے اس دور میں ساربان مطمئن رہا، اس نے لڑکے کو بتایا کہ اِس کے لئے سب دن برابر ہیں اور ماضی کی یادوں اورمستقبل کے اندیشوں کے بجائے اگر انسان اپنے حال پر زیادہ توجہ دے تو اس کی زندگی زیادہ خوشحال گزرے گی ۔ آخر کارقافلہ الفیوم نخلستان پہنچ گیا۔ نخلستان میں موجود کیمیاگر قافلے کا منتظر تھا، کائنات کی علامتوں سے اس پر انکشاف ہوگیا تھا کہ اِس قافلے میں ایک ایسا شخص آرہا ہے جسے اُس نے اپنے مخفی علوم کے بعض راز بتانا ہیں لیکن کیمیاگر اُس شخص کو ظاہری طور پر پہچانتا نہ تھا ۔ ادھر لڑکا اور انگلستانی باشندہ نخلستان کے وسیع العریض منظر کو دیکھ کر متاثر اور حیران ہورہے تھے۔ قافلے کے سردار نے اعلان کیا کہ جنگ کے خاتمہ تک قافلہ نخلستان میں مہمان رہے گا ، ٹھہرنے کا سُن کر لڑکا فکرمند ہوجاتا ہے کیونکہ اسے اور بھی آگے جانا تھا۔ انگلستانی باشندہ کیمیاگر کی تلاش کے سلسلے میں اس سے مدد طلب کرتا ہے۔ دونوں کیمیاگر کو تلاش کرتے رہے لیکن انہیں کامیابی نہ ملی۔ آخر کار لڑکا نخلستان کے ایک کنویں پر پانی بھرنے والوں سے پوچھنے لگا۔ ایک نوجوان عورت پانی بھرنے آئی۔ جیسے ہی لڑکے کی نظر اس کی گہری سیاہ آنکھوں پر پڑی اسی لمحے اُسے ایسا لگا کہ جیسے وقت کی رفتار تھم گئی ہے۔لڑکے نے عشق کے جذبات کو محسوس کیا اور لڑکی کے جذبات بھی مختلف نہیں تھے۔ لڑکی سے پوچھنے پر پتا چلا کہ کیمیاگر صحرا میں رہتا ہے۔ انگلستانی باشندہ کیمیاگر کی تلاش میں فوراً ہی چل پڑا۔ اگلے دن لڑکا پھر لڑکی سے ملنے کی امید میں کنویں پر پہنچااور اس سے اپنی محبت کا اظہار کردیا ۔ اب روز ہی لڑکا کنویں کے کنارےلڑکی سے ملنے جانے لگا اوراسے اپنی زندگی کی کہانی سنادی۔ ایک مہینہ گزر گیا لیکن صحرا میں جنگ ابھی بھی جاری تھی۔ لڑکی کے کہنے پر لڑکے نے سفر آگے جاری کرنے کا فیصلہ کیا۔ لڑکی سے بچھڑنے کا سوچ کر لڑکا اداس ہوگیا۔ لیکن لڑکی اسے کہتی ہے کہ وہ اسے آزاد مرد دیکھنا چاہتی ہے اور وہ اس کا انتظار کرے گی۔ لڑکا انگلستانی باشندے کے پاس پہنچتا ہے جو اپنے خیمہ کے سامنے بھٹی بنا کر اس میں تجربات کررہا ہوتا ہے۔ انگلستانی باشندہ بتاتا ہے کہ کیمیاگر نے اسے گندھک الگ کرنے کا کام دیا ہے اور اس کام میں کامیابی کی اولین شرط یہ ہے کہ ناکامی کا خوف بالکل نہ ہو۔ لڑکا اُس کے عمل کو دیکھتا رہا اور پھر صحرا میں نکل گیا۔ کچھ دیر تک وہ صحرا میں اِدھر اُدھر بھٹکتا رہا اور پھر ایک پتھر پر مراقب ہو کر بیٹھ گیا۔ وہ عشق میں وصل، فراق اور ملکیت کے تصور پر غور کرتا رہا، لیکن کسی میں فرق کرنے سے قاصر رہا۔ ابھی اسی سوچ میں غرق تھا کہ اُسے اُوپر عقابوں کا ایک جوڑا پرواز کرتا نظر آیا۔ تنویمی حالت میں عقابوں کو دیکھتے اُس پر غنودگی طاری ہونے لگی۔ اچانک ایک عقاب دوسرے پر جھپٹا۔ تب ہی لڑکے کو جھماکے سے ایک عکس نظر آیا کہ ایک فوج نخلستان میں داخل ہورہی ہے۔ اس عکس نے لڑکے کو جھنجھوڑ دیا۔ اُسے لگا کہ واقعی ایسا ہونے جا رہا ہے۔ وہ نخلستان کی جانب دوڑگیا۔ لڑکے نے ساربان کو اپنے مکاشفہ کے متعلق بتایا، ساربان نے یقین کرلیا کیوں کہ وہ ایسے لوگوں سے مل چکا تھا جو مستقبل جان لیتے ہیں۔ وہ بھی ایک بزرگ سے ملا تھا جس نے اسے سمجھایا تھا کہ مستقبل کو کھوجنے سے بہتر ہےکہ حال پر غور کرو، حال ہی میں اصل راز پوشیدہ ہے۔ مستقبل صرف قدرت کے ہاتھ میں ہے، البتہ قدرت کبھی کبھی مستقبل کو کسی پر منکشف بھی کردیتی ہے، ساربان لڑکے کو سردار ِقبیلہ کو اطلاع دینےکا کہتا ہے۔ لڑکا ججھکتا ہے لیکن ساربان کے سمجھانے پر سردارِ قبیلہ کے خیمہ جا پہنچتا ہے۔ پہرے دار کے کہنے پر سنہرے لباس پہنے ایک نوجوان عرب باہر آتا ہے اور لڑکا اسے سب کچھ بتادیتا ہے۔وہ ٹھہرنے کا کہہ کر واپس خیمے میں چلا جاتا ہے …. اب آگے پڑھیں ………… [/box]

….(گزشتہ سے پوستہ)

 

رات کا اندھیرا چھانے لگا تھا۔ کچھ دیر بعد سردار کے خیمے میں گہماگہمی پیدا ہوگئی ، لڑکے کے سامنے دیکھتے ہی دیکھتے کئی تاجر اور ہتھیاروں سے لیس جنگجو لوگ تیزی سے خیمہ میں داخل ہوئے ، جس سے نسبتاً پُرسکون ماحول میں گرمی پیدا ہو گئی۔ تھوڑی دیر بعد وہ تاجر اور مسلح افراد ایک ایک کر کے باہر نکلے…. جلتے ہوئے الاؤ کی آگ بجھا دی گئی ۔ اب نخلستان بھی صحرا کی طرح پُر حول سنّاٹے کی زد میں آ گیا، سردار کے خیمے کے اندر کی روشنی البتہ باقی تھی۔
تنہائی میں کھڑے کھڑے لڑکا ، اپنی محبوبہ کے تصوّر میں کھویا رہا۔ آخری ملاقات میں دونوں کے درمیان جو گفتگو ہوئی تھی اُس کو ابھی تک وہ کوئی معنی نہ پہنا سکا تھا۔
گھنٹہ بھر انتظار کے بعد آخر کار، پہرے دار نے اُسے خیمہ کے اندر جانے کی اجازت دی۔ وہ اندر داخل ہوا تو خیمہ کی سجاوٹ دیکھ کر دنگ رہ گیا۔اُس کے گمان میں بھی نہ تھا یہاں ریگستان کے بیچ ایسا خیمہ بھی ہو سکتا ہے۔
خیمے کا فرش ایسے بیش قیمت قالینوں سے مزیّن تھا جن پر وہ آج تک نہ چلا تھا، خیمہ کی چھت سے سونے کے بنے شمع دان لٹک رہے تھے جن کی روشنی خیمہ کو منوّر کر رہی تھی۔ سردارانِ قبیلہ انتہائی قیمتی گدّوں پر نصف دائرے کی شکل میں بیٹھے چائے اور قہوہ سے محظوظ ہورہے تھے۔
متعدد غلام حُقّوں میں آگ سلگانے کے انتظام پر مامور تھے۔ خیمے کی فضا حُقّہ کے خوشبودار دھوئیں سے بھری ہوئی تھی۔
اس قبیلے کے کل آٹھ سردار تھے، سب یہاں موجود تھے، لیکن سب سے بڑے سردار کو پہچاننے میں لڑکے کو ذرا بھی دیر نہ لگی۔ وہ ان سب کے درمیان شان سے بیٹھا ہوا تھا۔ اپنے قیمتی سفید اور سنہری لباسِ سے دوسروں سے ممتاز نظر آرہا تھا۔ سردارِ قبیلہ کے برابر میں سفید اور سنہری پوشاک میں وہی عرب جوان بیٹھا تھاجس سے لڑکا کچھ دیر قبل بات کر چکا تھا۔

‘‘یہ اجنبی کون ہے…. جو غیبی علامتوں کی بات کرتا ہے۔ ’’ ایک سردار نے لڑکے کو گھورتے ہوئے پوچھا۔
‘‘جی ! وہ میں ہوں ….’’ لڑکے نے جواباً کہا اور پوری بات دہرا دی۔
‘‘صحرا ایک اجنبی لڑکے کو یہ غیبی اشارے کیوں بتانے لگا؟…. جبکہ ہم لوگ نسلوں سے یہاں رہ رہے ہیں ’’ دوسرے سردار نے اپنے خیال کا اظہار کیا۔
‘‘میری آنکھیں ابھی تک اُس ریگستان کی عادی نہیں ہوئیں۔’’لڑکے نے جواب دیا۔ ‘‘میں وہ چیزیں یقیناً آسانی سے دیکھ سکتا ہوں جو عادی آنکھوں کو شاید نظر نہ آئیں….’’
اور شاید اِس لیے بھی کہ کائنات کی روح سے بھی میں واقف ہوں لیکن یہ آخری جملہ اس نے دل میں خود اپنے آپ سے کہا۔
ــ‘‘نخلستان کو ہمیشہ ایک غیر جانبدار علاقہ Neutral Territoriesمانا جاتا ہے اُس پر کوئی بھی حملہ نہیں کرسکتا۔ یہ صحرائی قبائل کی روایت اور قانون ہے’’ ایک تیسرے سردار نے لڑکے کی تردید کرتے ہوئے اپنا موقف رکھا۔
لڑکابولا ‘‘ دیکھیں! میں نے جو بھی دیکھا، وہ آپ سب کو بتا دیا…. اگر آپ لوگوں کو اس بات پر یقین نہیں ہے تو پھر آپ کی مرضی، آپ کو کچھ کرنے کی ضرورت نہیں ہے۔’’
باقی سردار آپس میں بحث کرنے لگے۔ یہ بحث خاصی پُر جوش اور مقامی عربی لہجے میں تھی جو لڑکے کی سمجھ سے بالا تر تھی۔ لڑکے نے پلٹ کر واپس جانا چاہا تو پہرے دار نے اُسے روک دیا اور وہیں ٹہرنے کا کہا۔ اُس سے لڑکے کے دِل میں خوف کی ایک لہر اُبھر آئی۔
وہ سوچنے لگا کہ کہیں اِن لوگوں کو یہ بات بتا کر کوئی غلطی تو سرزد نہیں ہو گئی۔ اسے خیال آیا کہ شاید ساربان کو بتا کر اُس سے غلطی ہوئی لیکن اب پچھتانے سے کیا فائدہ۔
اچانک درمیان میں بیٹھا بڑا سردار بے خیالی میں مسکرا اُٹھا۔ لڑکے نے یہ دیکھ کر خاصا سکون اور اطمینان محسوس کیا۔ اُس بڑے سردار نے ابھی تک بحث میں حصّہ نہ لیا تھا۔
لڑکے کو کائناتی زبان کا فہم تھا۔ اُس نے محسوس کر لیا کہ خیمہ کے ماحول میں اب اطمینان کی لہر غالب ہوگئی ہے۔ اب وہ سوچ رہا تھا کہ یہاں آکر اُس نے غلطی نہیں کی۔
بحث ختم ہوئی، سب لوگ خاموش ہو گئے۔ بوڑھا سردارِ قبیلہ جو کچھ کہنے والا تھا، اُسے سننے کے لیے سب ہمہ تن گوش ہو گئے۔ بوڑھے سردار کی آواز اُبھری۔ وہ لڑکے سے مخاطب تھا۔ اُس کے انداز میں بےرُخی اور سردمہری نمایاں تھی ….
‘‘کوئی دو ہزار برس پہلے کا قصّہ ہے۔ دور کی ایک سرزمین میں ایک نوجوان شخص ایسا گزرا جسے خوابوں پر یقین تھا، اسے ایک اندھے کنویں میں پھینک دیا گیا اور پھر اُسے بازار میں فروخت کر دیا گیا۔’’ وہ بوڑھا سردار اب ایسے عربی لہجے میں بول رہا تھا جسے لڑکا سمجھ سکتا تھا۔
‘‘تاجروں نے اُس آدمی کو خرید لیا اور اُسے مصر لے آئے…. یہ تو ہم سب بھی جانتے ہیں کہ جو بھی خوابوں میں یقین رکھتا ہے، وہ اُن کی تعبیر بھی جانتا ہے۔’’
سردار نے اپنی بات جاری رکھی۔
‘‘جب فرعونِ مصر نے ایک خواب دیکھا کہ کچھ گائیں موٹی ہیں اور کچھ دبلی ہیں تو اُس نوجوان نے جس کا میں ذکر کررہا تھا اس خواب کو سمجھ کر مصر کو ایک بڑے قحط سے بچا لیا۔ ’’
‘‘اُس نوجوان کا نام یوسف * تھا اور وہ بھی ایک نئے ملک میں اجنبی تھا ۔’’
تھوڑی دیر کے لیے سردار رُکا۔ لیکن ابھی بھی سردار کا چہرہ سپاٹ اور نگاہوں میں اجنبیت تھی۔ لڑکے کو سردار کی آنکھوں میں اب بھی دوستی کی چمک اور اس کے چہرے پر دوستانہ تاثرات نظر نہیں آرہے تھے۔
‘‘ہم لوگ ہمیشہ سے روایتوں کی پاسداری کرتے چلے آرہے ہیں۔ سچ یہ ہے کہ انہی روایات پر عمل کر کے اُس زمانے میں مصر قحط سے محفوظ رہسکا تھا۔ اُسی کے نتیجہ میں مصر کی قوم ایک امیرترین قوم بن کر اُبھری۔’’
‘‘ہماری یہ روایتیں ہمیں بتاتی ہیں کہ زندگی کیسے گزاری جائے، دنیا سے کس نہج پر تعلق قائم کیا جائے۔ صحرا میں سفر کیسے کیا جائے، یہاں تک کہ بچوں کی شادیاں کس طرح کی جائیں۔
انہی روایتوں پر عمل کرتے ہوئے ہی ہم نے نخلستان کو سب کے لیے ایک غیر جانب دار علاقہ قرار دیا ہے۔ نخلستان دوست اور دشمن دونوں کے علاقوں میں ہو سکتے ہیں۔ اگر اِس روایت پر عمل نہ کیا جائے اور معاہدہ قائم نہ رہے تو پھر ہر علاقہ غیر محفوظ ہے۔’’

 

[box type=”shadow” align=”” class=”” width=””]

* حضرت یوسف علیہ السّلام کا زمانہ کم وبیش دو ہزار سال قبل مسیح بتایا جاتا ہے۔ قرآن اور تورات میں موجود حضرت یوسف ؑکے قصے میں اس بات کا انکشاف ہوتا ہے کہ خواب مستقبل کی نشاندہی کا ذریعہ ہیں۔ عام طور پر خواب کو حافظے میں جمع خیالات اور بے معنی تصوّرات کہا جاتا ہے لیکن خواب کے تجربات اس بات کی نفی کرتے ہیں کہ خواب محض خیالات کا عکس ہیں۔ خواب ایسی ایجنسی ہے جس کی معرفت انسان کو غیب کا کشف حاصل ہوتا ہے اور رُویاء کی صلاحیت انسان کو مادی سطح سے ماوراء باتوں کی اطلاع فراہم کرتی ہے۔ 

[/box]

سردار کی گفتگو کے دوران خیمے میں موجود سب افراد پر سکوت سا طاری تھا۔
‘‘ہماری روایتیں یہ بھی بتاتی ہیں کہ صحرا اگر کوئی پیغام دے تو اُس پر اعتبار کرنا چاہیے۔ حقیقت تو یہی ہے کہ ہمارا زیادہ تر عِلم اِس صحرا کا ہی مرہونِمنّت ہے۔’’
سردار نے اپنی بات ختم کرنے کے بعد کوئی اشارہ کیا اور سب لوگ مؤدب ہوکر کھڑے ہو گئے۔ پنچائت کی یہ نشست ختم ہو چکی تھی۔
حُقّوں کی آگ بجھا دی گئی اور محافظ تن کر کھڑے ہو گئے۔ لڑکا بھی جانے کے لیے اُٹھنے لگا تو بوڑھا سرداراُس سے پھر مخاطب ہوا۔
‘‘کل ہم لوگ اِس معاہدہ کو ختم کرنے کا اعلان کر رہے ہیں جس کے تحت کسی بھی شخص کو نخلستان میں ہتھیار لے کر چلنے کی اجازت نہ تھی۔ کل کا پورا دن ہم دشمن کی آمد کے منتظر رہیں گے اور سورج غروب ہوتے ہی تمام مرد حضرات اپنے ہتھیار میرے پاس جمع کرا دیں گے۔ دشمن کے ہر دس افراد کے مارے جانے پر تمہیں سونے کا ایک ٹکڑا بطور انعام ملے گا۔’’
‘‘لیکن خیال رہے کہ …. ہتھیار اُس وقت تک نہیں اُٹھائے جائیں گے جب تک جنگ نہ ہو۔ ہتھیاروں کی فطرت ایسی ہی متلوّن مزاج ہے جیسی صحرا کی۔ اگر اُنہیں استعمال نہ کیا جائے تو اگلی بار یہ دھوکہ دے سکتے ہیں۔ یاد رکھو کہ کل دن کے ختم ہونے تک اگر کوئی ایک ہتھیار بھی استعمال نہ کیا جاسکا تو ان کا استعمال تمہارے ہی اوپر ہوگا۔’’

لڑکا سردار کے خیمہ سے باہر آیا تو رات ہوچکی تھی البتہ پورے چاند کی روشنی نخلستان کو روشن کیے ہوئے تھی۔ اب لڑکے کا رُخ اپنے خیمہ کی طرف تھا جو یہاں سے کوئی بیس منٹ کی دوری پر تھا۔
جو کچھ ہو چکا تھا وہ خطرہ سے خالی نہ تھا۔ کائنات کی روح تک وہ پہنچا تو تھا لیکن یہاں تک پہنچنے کی قیمت بڑی بھاری ادا کرنی پڑ سکتی تھی۔ خود اُس کی جان بھی جا سکتی تھی۔ شرط بڑی خطرناک تھی، لیکن اب وہ اِن خطروں کا عادی ہو چکا تھا۔ جب اُس نے بھیڑوں کو بیچ کر اپنی تقدیر کھوجنے کےسفر کا فیصلہ کیا تھا وہ بھی ایک بڑی خطرناک شرط تھی۔
اُسے ساربان کے الفاظ یاد آئے۔ اُس نے کہاتھا کہ :
‘‘آج اور کل میں کوئی فرق نہیں۔ موت آج آئے یا کل دونوں برابر ہی ہیں۔’’
یہاں ہر نیا دن محض یا تو اِس لیے ہے کہ دنیا کو کچھ دیا جائے یا اِس لیے کہ دنیا پر اپنا نقش چھوڑ کرواپسی کا اعلان ہو جائے۔ سب باتوں کا انحصار اِس پر ہے کہ قدرت نے دن کے بارے میں لکھا کیا ہے۔‘‘مکتوب’’….
وہ چاند کی روشنی میں اپنے خیمے کی جانب اکیلا محو ِسفر تھا۔ اُسے اپنے فیصلے پر کوئی ملال کوئی پشیمانی نہیں تھی۔ اُس نے سوچا کہ کل اگر میں مارا بھی جاؤں تو میں یہ سمجھوں گا کہ قدرت کی منشا ہی نہیں تھی کہ میرا مستقبل تبدیل ہو۔ لیکن ایسا بھی نہیں کہ میں دنیا سے بالکل خالی ہاتھ جاؤں گا۔ میں نے کوشش کی، آبنائے پار کر کے اِس علاقہ میں آیا۔ شیشے کی اُس دکان پر کام کر کے خاصا تجربہ حاصل کیا۔ ایک صحرا کی تنہائی اور سکوت سے واقف ہوا ۔ اس لڑکی کی آنکھوں کی گہرائی نے بھی نئے تجربہ ، نئے جذبوں سے آگاہ کروایا۔
اُسے یاد آیا کہ اندلوسیا کو خیر باد کہنے کے بعد سے اُس کا ہر دن عزم و استقامت سے بھر پور گزرا ہے۔ اگر وہ کل کو مر بھی گیا تو وہ فخریہ کہہ سکتا ہے کہ اس نے دوسرے چرواہوں کے مقابلے میں کہیں زیادہ دنیا دیکھ لی ہے اور اُن سے کہیں زیادہ تجربہ اور علم سے اُس نے اپنا دامن بھر لیا ہے۔
اچانک ایک کڑاکے دار آواز ہوئی اور ہوا کا ایک اتنا تیز جھونکا آیا کہ وہ زمین پر گِر پڑا۔ اتنی تیز ہوا کا تجربہ اُسے آج تک نہ ہوا تھا۔ ریت کا ایک طوفان تھا۔ پورا علاقہ گرد و غبار سے بھر گیا تھا۔ چاند بھی اِس گہرے غبار میں نظر نہ آ رہا تھا۔ اچانک اُسے ایک انتہائی سفید گھوڑا نظر آیا جو بڑے خوف ناک انداز میں ہنہناتا چراغ پاہو کر اُس کے سامنے دو پاؤں پر کھڑا تھا۔
جب گرد و غبّار ختم ہوا تو لڑکا یہ دیکھ کر خوف سے لرز گیا کہ گھوڑے پر ایک سیاہ لباس پہنے سوار کھڑا تھا، اس کے بائیں بازو پر ایک ‘‘شکرا’’ پر پھیلائے بیٹھا تھا، سیاہ لباس کے ساتھ ساتھ وہ ایک سیاہ عمامہ باندھے تھا ، اس نے اپنا پورا چہرا سربند رومال نما مفلر میں لپیٹا ہوا تھا۔ اس کی دو آنکھوں کے سوائے کچھ نظر نہیں آرہا تھا۔
بظاہر تو وہ صحرا کے ان خانہ بدوش پیغام رساں بدؤوں جیسا لگتا تھا لیکن اُس کی ہیت ان سے کہیں زیادہ طاقتور اور رعب و جلال والی تھی۔

 

اجنبی شہسوار نے گھوڑے کی زِین سے لٹکی میان سے ایک بہت بڑی خمدار تلوار نکال کر سونتی تو اُس کے پھل کی چمک روشن رات میں بھی آنکھوں کو خیرہ کر گئی۔ وہ انتہائی کرخت آواز میں بولا۔
‘‘عقابوں کو لڑتے ہوئے دیکھ کر اس کی نشانیوں میں معنی نکالنے کی ہمّت کس نے کی؟ اُس اجنبی شہسوار کی آواز اتنی بلند تھی کہ شاید نخلستان کے سب پچاس ہزار درختوں سے ٹکرا کر وہ اِس پورے علاقے میں گونج گئی۔’’

‘‘‘میں نے…. یہ میں ہوں…. جس نے یہ ہمّت کی ہے۔’’ لڑکے نے کہا۔
لڑکے کے ذہن میں ہسپانوی جنگجو سان تیاگو ماتا مورس کی سفید گھوڑے پر سوار اُس تصویر کے خدوخال روشن ہو گئے جو وہ بچپن سے اپنے گھر میں لٹکی ہوئی دیکھتا رہا تھا۔ سامنے کھڑا شخص بالکل ویسا ہی لگرہاتھا۔
‘‘میں نے یہ ہمّت کی تھی۔’’ لڑکے نے دوبارہ کہتے ہوئے اپنا سر خم کر لیا یہ سوچ کر کہ شاید تلوار کا وار اب ہونے ہی والا ہے۔
‘‘میں مستقبل کو دیکھ پایا ہوں اور میں نے سوچا کہ اس طرح ہزاروں جانیں محفوظ ہوجائیںگی۔’’
تلوار لڑکے کی گردن پہ گری تو نہیں البتہ آہستہ آہستہ نیچے آتی گئی اور اُس کی پیشانی سے آ کر لگ گئی تلوار کی ہلکی سی چبھن سے خون کا ایک چھوٹا سا قطرہ بھی نکل پڑا۔ شہسوار بالکل ساکن رہا اور لڑکا بھی ، جیسے اُسے زمین نے جکڑ لیا ہو۔ بھاگ جانے کا خیال تک اس کے دل میں نہ آیا۔ بلکہ اس کے دل میں عجیب سی خوشی اور اطمینان کااحساس تھا۔
اُس نے سوچا کہ وقت نے بھی کیا کیا دکھایا ہے۔ مقدّر کی جستجو میں موت کے کتنا قریب پہنچ گیا تھا اور پھر سلمیٰ سے ملاقات۔ اُسے اس بات کی زیادہ خوشی تھی کہ اس نے کائنات کی زبان کو سمجھ لیا ہے اور علامت دیکھ کر اُس نے بالکل صحیح معنیٰ سمجھ لیے تھے۔
اس نے جو سوچا وہ سچ ہوا …. اُس وقت دشمن اس کے روبرو تھا البتّہ اُسے موت کا خوف نہ تھا کیونکہ اُس کے نتیجہ میں وہ بھی اس کائناتی روح کا حصہ بن جائے گا، جیسا کہ صحرائی لڑکی نے کہا تھا۔ ایک دن اس کا یہ دشمن بھی اِس کائناتی روح کا حصہ ہوگا ، کیونکہ جب نخلستان پر حملہ آور ہو گا تو اُس کا انجام بھی تو وہی ہونے والا تھا۔
اجنبی شہسوار تلوار کی نوک لڑکے کی پیشانی سے لگائے رہا ‘‘تم نے ان عقابوں کی اُڑان کی علامات کو پڑھنے کی کوشش کیوںکی….؟’’
‘‘میں نے اِتنا ہی پڑھا جتنا عقابوں نے مجھے بتایا۔ شاید وہ نخلستان کی حفاظت کرنا چاہتے تھے۔ اور ہاں کل جب تم نخلستان پر حملہ کرو گے تو تم لوگ ضرور مارے جاؤ گے کیونکہ تمہارے مقابلہ میں وہاں آدمی بہتزیادہ ہیں۔’’

تلوار کی نوک کا دباؤ بدستور قائم تھا۔
‘‘قدرت کی لکھے ہوئے کو بدلنے والے تم کون ہوتے ہو….’’
‘‘قدرت ہی نے فوجیوں کو پیدا کیا ہے اور وہی ان عقابوں کی خالق بھی ہے۔ اُسی نے مجھے کائناتی زبان کا فہم عطا کیا۔ سب کچھ اُسی کے ہاتھ کا لکھا ہوا ہے۔’’ لڑکے نے ساربان کی کہی باتوں کو یاد کرتے ہوئے جواب دیا۔
‘‘اجنبی شہسوار نے تلوار جب لڑکے کی پیشانی سے ہٹائی تو اطمینان کی لہر اُس کے بدن میں دوڑ گئی لیکن وہ اب بھی وہاں سے بھاگ جانے کی کوشش نہ کر سکا۔
‘‘مستقبل کی باتیں ظاہر کرتے ہوئے محتاط رہنے کی ضرورت ہے۔’’ اس اجنبی نے لڑکے سے کہا ‘‘جو لکھا جا چکا اُسے بدلا نہیں جا سکتا۔’’
لڑکا بولا ‘‘میں نے بس ایک فوج دیکھی تھی…. جنگ کا انجام نہیں جانتا ۔’’
اجنبی شہسوار اِس جواب سے مطمئن نظر آ رہا تھا، لیکن تلوار ہاتھ میں اُسی طرح سونتے رہا۔
اجنبی شہسوار بولا ‘‘ایک اجنبی دیس کا مسافر اِس غیر علاقے میں کیا کرنے آیا ہے….؟’’
‘‘میں تو وہی کر رہا ہوں جو میرے مقدّر میں لکھا ہے اور یہ ایسی چیزیں نہیں جو تمہاری سمجھ میںآجائیں….’’
شہسوار نے تلوار میان میں رکھ لی۔ لڑکے کی گھبراہٹ اطمینان میں بدل رہی تھی۔
‘‘میں تمہاری ہمّت کا امتحان لے رہا تھا۔’’ اجنبی بولا۔ ‘‘ہمّت ہی وہ اصل صفت ہے جو کائناتی روح کی تفہیم کے لیے انتہائی ضروری ہے۔’’
لڑکا یہ سن کر متعجب ہو اُٹھا، کیونکہ یہ اجنبی ایسی باتیں بتا رہا تھا جو کم ہی لوگ جانتے ہیں۔
‘‘اپنے مقدر کی تلاش میں تم اتنا دور تک آ چکے ہو، اپنی کوششیں درمیان میں نہ چھوڑ دینا….’’ اجنبی نے اپنی بات جاری رکھی۔
‘‘صحرا سے محبت ضرور کرو لیکن اُس کی ہربات پر بھروسہ نہ کرو کیونکہ صحرا بھی قدرت کی طرح ہر ایک کا امتحان لیتا ہے۔ ہر قدم پر رکاوٹیں کھڑی کر کے یہ ایک طرح سے للکارتا ہے اور جو بہک جاتے ہیں اُن کو ختم بھی کر دیتا ہے۔’’

اجنبی شہسوار کی یہ باتیں سن کر لڑکے کو شالیم کے بوڑھے بادشاہ کی یاد آنے لگی۔ وہ بھی ایسے ہی بات کرتا تھا۔
‘‘کل اگر فوج حملہ کر دے اور تمہارا سر تمہارے کاندھوں پر سلامت رہے تو پھر مغرب بعد مجھے ضرور تلاش کرنا….’’ اجنبی نے لڑکے سے کہا۔ جس ہاتھ میں ابھی تک تلوار تھی اب اُس میں چابُک تھی۔
گھوڑے نے اگلی ٹانگیں پھر بلند کیں اور نظروں سے غائب ہونے لگا۔ آنکھوں کو اندھا کر دینے والی دھول نے ایک بار پھر لڑکے کو ماحول کو دھندلا دیا ۔
‘‘تم رہتے کہاں ہو؟’’ لڑکا زور سے چلّایا۔
چابک تھامے ہاتھ جنوب کی طرف اشارہ کر رہا تھا۔لڑکے کو خوشی ہورہی تھی کہ اسے آج کیمیاگر سے ملاقات کا شرف حاصل ہو چکا تھا۔

 

(جاری ہے)
***

تحریر : پاؤلو کویلہو ; ترجمہ: ابن وصی

 

[box type=”shadow” align=”” class=”” width=””] انسان اگر کوشش کرے تو سب کچھ ممکن ہے، حصولِ مقصد کی راہ میں حائل مشکلات، رکاوٹیں نہیں بلکہ آزمائش ہوتی ہیں، جب انسان کےدل میں کوئی خواہش سراٹھاتی ہے اور وہ کسی چیز کو پانے کی جستجو اور کوشش کرتا ہے تو قدرت اس کی خواہش کی تکمیل میں مددگار بن جاتی ہے کہ اس کی یہ خواہش پوری ہو ۔ اگر لگن سچی ہو تو خدا کی اس کائنات میں بکھری نشانیاں اِس جدوجہد کے دوران راہنمائی اور معاونت کرتی نظر آتی ہیں۔
کیمیاگر (الکیمسٹ Alchemist ) برازیلی ادیب پاؤلو کویلہو Paulo Coelho کا شاہکار ناول ہے، جس کا دنیا کی 70 زبانوں میں ترجمہ ہوا ۔ اس ناول نے فروخت کےنئے ریکارڈ قائم کرکے گنیز بک میں اپنا نام شامل کیا۔ اس کہانی کے بنیادی تصوّرات میں رومی، سعدی اور دیگر صوفیوں کی کتابوں اور فکرِ تصوّف کی جھلک نظر آتی ہے۔ 
کیمیا گر ، اندلس کے ایک نوجوان چرواہے کی کہانی ہے جو ایک انوکھا خواب دیکھتا ہے جس کی تعبیر بتائی جاتی ہے کہ اسے کوئی خزانہ ضرورملے گا ۔ وہ خزانے کی تلاش میں نکلتا ہے اور خوابوں، علامتوں کی رہنمائی میں حکمت اور دانائی کی باتیں سیکھتے ہوئے ، افریقہ کے صحراؤں میں اس کی ملاقات ایک کیمیاگر سے ہوتی ہے ، یہ کیمیا گر خزانے کی تلاش کے ساتھ انسانی سرشت میں چھپے اصل خزانے کی جانب بھی اس کی رہنمائی کرتا ہے….
[/box]

چودھویں قسط ….

[box type=”Warning” align=”” class=”” width=””]

گزشتہ قسط کا خلاصہ : یہ کہانی اندلوسیا (اسپین ) کی وادیوں میں پھرنے والے نوجوان سان تیاگو کی ہے، والدین اُسے راہب بنانا چاہتے تھے مگر وہ سیاحت کے شوق میں چراوہا بن گیا۔ ایک رات وہ بھیڑوں کے گلّہ کے ساتھ ایک ویران گرجا گھر میں گزارتا ہے اور ایک عجیب خواب دیکھتا ہے کہ ‘‘کوئی اسے اہرام مصر لے جاتا ہے اورکہتا ہے کہ تمہیں یہاں خزانہ ملے گا۔’’ خزانے کا مقام دیکھنے سےقبل آنکھ کھل جاتی ہے۔ وہ دو سال بھیڑوں کے ساتھ پھر تا ہے لیکن تاجر کی بیٹی سے ملنے کے بعد وہ اس کی دلچسپی کا محور بن گئی تھی۔ وہ شہر طریفا میں ایک خانہ بدوش بوڑھی عورت سے ملتا ہے، جو خواب کی تعبیر بتاتی ہے کہ خزانہ اسے ضرور ملے گا۔ وہ مذاق سمجھ کر شہر کے چوک پر آبیٹھا جہاں اس کی ملاقات خود کو شالیم کا بادشاہ کہنے والے بوڑھے سے ہوتی ہے جو کہتا ہے کہ وہ خزانہ ڈھونڈنے میں اس کی مدد کرسکتا ہے ۔ پہلے تو لڑکا اُسے فراڈ سمجھا، لیکن جب وہ بوڑھا اسے وہ باتیں بتاتا ہے جو صرف وہی جانتا تھا تو اسے یقین ہوا۔ بوڑھا سمجھاتا ہے کہ ‘‘انسان اگر کوشش کرے تو سب کچھ ممکن ہے، جب انسان کسی چیز کو پانے کی جستجو کرتا ہے تو قدرت اس کی خواہش کی تکمیل میں مددگار بن جاتی ہے ’’۔ خزانہ کی مدد کے بدلے بوڑھا بھیڑوں کا دسواں حصہ مانگتا ہے جو لڑکا دے دیتا ہے۔ بوڑھا بتاتا ہے کہ خزانے تک پہنچنے کے لیے غیبی اشاروں کی زبان سمجھنا ہوگی۔ بوڑھا اُسے دو سیاہ سفید پتھر دیتا ہے کہ اگر کبھی تم قدرت کے اشاروں کو سمجھ نہیں سکو تو یہ پتھر ان کو سمجھنے میں مدد کریں گے۔ بوڑھا چند نصیحتیں کرکے چلا جاتا ہے اور لڑکا ایک چھوٹے سے بحری جہاز سے افریقہ کے ساحلی شہر طنجہ پہنچتا ہے۔ یہاں کا اجنبی ماحول دیکھ کر وہ فکرمند ہوجاتا ہے ، اسے ایک ہم زبان اجنبی ملتا ہے۔ لڑکا اس سے مدد مانگتا ہے۔ اجنبی رقم کا مطالبہ کرتا ہے۔ لڑکا اجنبی شخص پر بھروسہ کرکے رقم دے دیتا ہے ، لیکن اجنبی بازار کی گہما گہمی میں نظروں سے اوجھل ہوجاتا ہے۔ رقم کھونے پر لڑکا مایوس ہوجاتا ہے لیکن پھر وہ خزانہ کی تلاش کا مصمم ارادہ کرتا ہے۔ اسی شہر میں شیشے کا سوداگر پریشان تھا، تیس برسوں سے قائم اس کی ظروف کی دکان جو کبھی سیاحوں کی توجہ کامرکزتھی، اب بے رونق ہوتی جارہی تھی۔ سارا دن وہ گاہک کے انتظار میں گزاردیتا۔ اچانک دوپہر کو وہ لڑکا اس دکان پر آکر کہتا ہے کہ وہ دکان کی صفائی کرنا چاہتاہے، بدلے میں اسے کھانا چاہیے۔ لڑکے کے کام صفائی کرنے پر سوداگر اسے کھانا کھلاتاہے۔ لڑکا اُسے بتاتا ہے کہ اسے مصر جانا ہے جس کے لیے وہ کام کرنے کو تیار ہے۔ سوداگر کہتا ہے کہ سال بھر کام کرنے سے بھی اتنی رقم جمع نہ ہوگی۔ لڑکا مایوس ہوجاتا ہے۔ تاجر واپس ملک لوٹنے کا کہتا ہے مگر لڑکا دکان میں کام کرنے لگتا ہے۔ لڑکے کو کام کرتے مہینہ بیت جاتا ہے تو وہ اندازہ لگاتا ہے کہ بھیڑیں خریدنے کے لیے اُسے کم از کم سال بھر کام کرنا پڑے گا۔ زیادہ رقم پانے اور زیادہ گاہک لانے کے لیے وہ سڑک پر ایک شوکیس لگانے کا مشورہ دیتا ہے، پہلے تو تاجر نقصان کا خدشہ ظاہر کرتا ہے مگر پھر مان جاتا ہے ۔کاروبار میں بہتری آنے لگتی ہے۔ ایک دن سوداگر لڑکے سے پوچھتا ہے کہ وہ اہرام کیوں جانا چاہتا ہے ، لڑکا بتا تا ہے کہ یہ اس کا خواب ہے۔ سوداگر بتاتا ہے کہ اس کا بھی خواب تھا کہ وہ مکّہ معظّمہ کا سفرکرے، اس نے دکان کھولی ، رقم جمع کی، لیکن کوئی ایسا شخص نہ مل سکا جو اِس کی غیرموجودگی میں دکان سنبھالے۔ یوں مکّہ جانے کا خواب ، خواب ہی رہ گیا۔ لڑکا دکان کے ساتھ قہوہ کی دُکان کھولنے کا مشورہ دیتا ہے، سوداگر مان جاتا ہے ۔ لوگ آنے لگتے ہیں اور کاروبار خوب پھیلنے لگتا ہے ….لڑکے کو کام کرتے گیارہ مہینے ہوتے ہیں تو وہ شیشے کے سوداگر سے وطن واپسی کی اجازت طلب کرتا ہے۔ بوڑھا سوداگر دعا کے ساتھ رخصت کرتا ہے۔ لڑکے کو سامان باندھتے ہوئے سیاہ و سفید پتھر ملتے ہیں ۔ اِن دونوں پتھروں کو ہاتھ میں لینے سے اہرام پہنچنے کی خواہش پھر جاگ اٹھتی ہے۔ اس نے سوچا کہ اندلوسیا میں تو کبھی بھی واپسی ممکن ہے لیکن اہرامِ مصر دیکھنے کا موقع دوبارہ نہ آ سکے گا۔ سوداگر کے پاس ایک شخص آیاکرتا تھا، جس کا تجارتی سامان قافلہ کے ذریعہ صحرا کے جاتا تھا۔ وہ گودام جاتا ہے، جہاں انگلستان کا ایک باشندہ ملتا ہے۔ جس نے زندگی کائناتی زبان کی جستجو کے لیے وقف کر دی اور اب کیمیا گری سیکھنا چاہتا تھا لیکن اسے کامیابی نہ ملی۔ عرب کے ریگستان میں مقیم ایک کیمیاگر کا تذکرہ سُن کر وہ سب کچھ چھوڑ چھاڑ کر الفیوم پہنچے کے لیے یہاں آیا ہے۔ انگلستانی باشندہ سے گفتگو کے دوران اوریم اور تھومیم پتھروں ، غیبی اشارہ اورکائناتی زبان کا ذکر سن کر لڑکے کی دوستی ہوگئی۔ گفتگو کے دوران لڑکے کی زبان سے نکلاکہ وہ خزانہ کی تلاش میں ہے، لیکن انگلستانی باشندے کو صرف کیمیاگر کی تلاش تھی۔ صحرائی قافلہ روانگی کے لیے تیار ہوتا ہے۔ قافلہ کا سردار اعلان کرتا ہے کہ ہر شخص کو اس سفر میں ہوشیار اور محتاط رہنے کی ضرورت ہے۔قافلہ میں سینکڑوں لوگ اور جانور تھے۔ لڑکا اور انگلستانی باشندہ اونٹ پر سوار ہوئے ۔ قافلے نے مشرق کی سمت رُخ کرکے سفر شروع کردیا۔ سورج کی تمازت پر سفر روک دیاجاتا اور سہہ پہر میں سفر دوبارہ شروع ہوجاتا۔ انگلستانی باشندہ زیادہ تر اپنی کتابوں میں منہمک رہا جبکہ لڑکا دلچسپی اور خاموشی کے ساتھ صحرا ، قافلہ اور اپنے ارد گر مختلف زبان اور نسل کے لوگوں کا مشاہدہ کرنے اور ریگستانی ہوا کی آوازوں کو سننے میں زیادہ دلچسپی لیتارہا ۔ رات جب الاؤ لگا کر بیٹھے تو ایک سارِبان نے اپنی داستان سنائی کہ کیسے قاہرہ میں اس کا باغ اور خاندان ایک زلزلہ کی نظر ہوگیا ، لیکن اس کا اللہ پر یقین قائم ہے۔ کبھی راہ چلتے پُراسرار نقاب پوش بدّو ملتے جو خطرہ سے باخبر کرتے ۔ اِس دوران بعض قبیلوں میں جنگ کی خبر سنتے ہی قافلے کی رفتار میں تیزی آ گئی تھی اور سفر زیادہ خاموشی سے طے کیا جانے لگا۔ ایک رات انگلستانی باشندے کولڑکے نے اپنے خواب اور سفر کی پوری کہانی سنائی۔ انگلستانی باشندے نے اسے علم کیمیا کے کائناتی اصول سمجھنے کے لیے کتابیں دیں لیکن کتابیں کچھ زیادہ ہی دقیق اور گنجلک تھیں، لڑکے کے کچھ پلّے نہ پڑا۔ آخر کار جھنجھلا کر لڑکے نے سب کتابیں یہ کہہ کر واپس کردیں، کہ وہ ان کتابوں سے یہی سیکھا کہ کائنات کی ایک روح ہے اور جو بھی اِس روح کو سمجھ لیتا ہے وہ کائناتی زبان جان لیتا ہے ۔انگلستانی باشندے کو مایوسی ہوئی کہ کتابیں لڑکے کو متاثر نہ کر سکیں۔ قبیلوں میں جنگ کی خبر سن کر سفر تیز ہونے لگا۔ خوف کے اس دور میں ساربان مطمئن رہا، اس نے لڑکے کو بتایا کہ اِس کے لئے سب دن برابر ہیں اور ماضی کی یادوں اورمستقبل کے اندیشوں کے بجائے اگر انسان اپنے حال پر زیادہ توجہ دے تو اس کی زندگی زیادہ خوشحال گزرے گی ۔ آخر کارقافلہ نخلستان پہنچ گیا۔ نخلستان میں موجود کیمیاگر قافلے کا منتظر تھا، کائنات کی علامتوں سے اس پر انکشاف ہوگیا تھا کہ اِس قافلے میں ایک ایسا شخص آرہا ہے جسے اُس نے اپنے مخفی علوم کے بعض راز بتانا ہیں لیکن کیمیاگر اُس شخص کو ظاہری طور پر پہچانتا نہ تھا ۔ ادھر لڑکا اور انگلستانی باشندہ نخلستان کے وسیع العریض منظر کو دیکھ کر متاثر اور حیران ہورہے تھے۔ قافلے کے سردار نے اعلان کیا کہ جنگ کے خاتمہ تک قافلہ نخلستان میں مہمان رہے گا ، ٹھہرنے کا سُن کر لڑکا فکرمند ہوجاتا ہے کیونکہ اسے اور بھی آگے جانا تھا۔ انگلستانی باشندہ کیمیاگر کی تلاش کے سلسلے میں اس سے مدد طلب کرتا ہے۔ دونوں کیمیاگر کو تلاش کرتے رہے لیکن انہیں کامیابی نہ ملی۔ آخر کار لڑکا نخلستان کے ایک کنویں پر پانی بھرنے والوں سے پوچھنے لگا۔ ایک نوجوان عورت پانی بھرنے آئی۔ جیسے ہی لڑکے کی نظر اس کی گہری سیاہ آنکھوں پر پڑی اسی لمحے اُسے ایسا لگا کہ جیسے وقت کی رفتار تھم گئی ہے۔لڑکے نے عشق کے جذبات کو محسوس کیا اور لڑکی کے جذبات بھی مختلف نہیں تھے۔ لڑکی سے پوچھنے پر پتا چلا کہ کیمیاگر صحرا میں رہتا ہے۔ انگلستانی باشندہ کیمیاگر کی تلاش میں فوراً ہی چل پڑا۔ اگلے دن لڑکا پھر لڑکی سے ملنے کی امید میں کنویں پر پہنچااور اس سے اپنی محبت کا اظہار کردیا ۔ اب روز ہی لڑکا کنویں کے کنارےلڑکی سے ملنے جانے لگا اوراسے اپنی زندگی کی کہانی سنادی۔ ایک مہینہ گزر گیا لیکن صحرا میں جنگ ابھی بھی جاری تھی۔ لڑکی کے کہنے پر لڑکے نے سفر آگے جاری کرنے کا فیصلہ کیا۔ لڑکی سے بچھڑنے کا سوچ کر لڑکا اداس ہوگیا۔ لیکن لڑکی اسے کہتی ہے کہ وہ اسے آزادی سے اپنی راہیں بنانے والا دیکھنا چاہتی ہے اور وہ اس کا انتظار کرے گی۔ لڑکا انگلستانی باشندے کے پاس پہنچتا ہے جو اپنے خیمہ کے سامنے بھٹی بنا کر اس میں تجربات کررہا ہوتا ہے۔ انگلستانی باشندہ بتاتا ہے کہ کیمیاگر نے اسے گندھک الگ کرنے کا کام دیا ہے اور اس کام میں کامیابی کی اولین شرط یہ ہے کہ ناکامی کا خوف بالکل نہ ہو۔اِس سے قبل میری ناکامی کی وجہ شاید یہی تھی کہ میں ناکامی کے خوف سے ڈرتا اور گھبراتا تھا۔ لڑکا اُس کے عمل کو دیکھتا رہا اور پھر صحرا میں نکل گیا۔ کچھ دیر تک وہ صحرا میں اِدھر اُدھر بھٹکتا رہا اور پھر ایک پتھر پر تنویمی حالت میں مراقب ہو کر بیٹھ گیا۔ وہ عشق میں وصل، فراق اور ملکیت کے تصور پر غور کرتا رہا، لیکن کسی میں فرق کرنے سے قاصر رہا۔ ابھی اسی سوچ میں غرق تھا کہ اُسے اُوپر عقابوں کا ایک جوڑا پرواز کرتا نظر آیا۔ تنویمی حالت میں عقابوں کو دیکھتے اُس پر غنودگی طاری ہونے لگی۔ اچانک ایک عقاب دوسرے پر جھپٹا۔ تب ہی لڑکے کو جھماکے سے ایک عکس نظر آیا کہ ایک فوج نخلستان میں داخل ہورہی ہے۔ اس عکس نے لڑکے کو جھنجھوڑ دیا۔ اُسے لگا کہ واقعی ایسا ہونے جا رہا ہے۔ وہ نخلستان کی جانب دوڑگیا۔ …. اب آگے پڑھیں …………[/box]

….(گزشتہ سے پوستہ)

ساربان کھجور کے درخت کی جڑ سے کمر لگائے بیٹھا ڈوبتے سورج کی خوبصورتی کا مشاہدہ کررہا تھا کہ اُسے ریت کے ٹیلے کے دوسری طرف سے لڑکا دوڑتا ہوا آتا نظر آیا۔
‘‘نخلستان کی طرف ایک فوج آ رہی ہے۔’’ لڑکا ساربان کو دیکھتے ہی چلا کر بولا۔ ‘‘میں نے ابھی اس کی جھلک دیکھی ہے۔’’
‘‘صحرا میں لوگوں کو اکثر ایسے عجیب وغریب سراب نظر آنے لگتے ہیں۔’’ ساربان نے کہا۔
لڑکے نے اُسے بتایا کہ وہ اُڑتے ہوئے عقابوں کانظارہ دیکھنے میں محو تھا کہ اُسے لگا کہ کائنات کی روح نے اُسے سمو لیا ہے اور اچانک اُس کی رسائی مستقبل کے اس عکس تک ہوگئی ۔
ساربان لڑکے کی بات کی تہہ تک پہنچ گیا۔ اُسے معلوم تھا کہ اِس زمین کی سطح پر موجود ہر شے اپنے اوپر گزرنے والے واقعات و حوادث کا ایک ریکارڈ رکھتی ہے اور وہ اسُے کبھی بھی منکشف کر سکتی ہے۔ اس ریکارڈ کی کتاب کے کسی بھی ورق کو کھول کر دیکھا جا سکتا ہے۔ جس طرح بعض انسان ہاتھوں کی لکیروں کی زبان سمجھ کر ماضی ، حال و مستقبل جان لیتے ہیں، بعض انسان کارڈ کے پتوں سے جان لیتے ہیں۔ اُسی طرح بعض انسانوں کو چڑیوں کی اُڑان، شیشوں کے گولوں، موم بتی کی لو میں بھی مستقبل کی جھلک نظر آجاتی ہے…. جو چیز بھی نظر آتی ہے اُس میں اُس لمحہ واقع ہونے والے حوادثات کا عکس محفوظ ہوتا ہے، بلکہ صحیح بات یہ ہے کہ ہتھیلیوں کی لکیریں، کارڈز، پرندے، اشیاء یا واقعات اپنے طور پر کچھ بھی منکشف نہیں کرتے بلکہ اصل تو وہ انسان * ہوتا ہے جو اُن کو دیکھ کر اُس لمحے کی تہہ تک پہنچ جانے کی صلاحیت رکھتا ہے۔ کائنات اس انسان کے سامنے اپنے راز افشاکرنے لگتی ہے۔

[box type=”shadow” align=”” class=”” width=””]

* کائنات میں موجود جملہ مخلوقات میں انسان سب سے پیچیدہ نفسیات و طبیعات کا حامل ہے۔ بعض اوقات کچھ افراد سے ایسے افعال سرزد ہوتے ہیں جنہیں ہم Supernatural یعنی مافوق الفطرت کہہ دیتے ہیں اور جو عام لوگوں کی نظروں میں عجیب و غریب اور حیرت انگیز ہوتے ہیں۔ حالانکہ غور کیا جائے تو کوئی چیز مافوق الفطرت نہیں ہے۔ ماہرین نفسیات کابیان ہے کہ انسانی وجودمیں ایک خاص قوت موجود ہے۔ اِس قوت کا نام قوت ِ خیال ہے۔ خیال کی یہ قوت مختلف اوقات میں انسان کے لیے وارننگ کا کام بھی کرتی ہے۔ مستقبل میں آنے والے واقعات سے غیر محسوس طورپرآگہی یا اچھی اور بری بات کا پیشگی احساس، وجدان یا کشف سب اسی قوت کے کرشمے ہیں، خیالات دراصل روشنی ہیں، ایسی روشنی جو ٹائم اسپیس سے آزاد ہے۔ کیونکہ ہمیں اس کی عادت نہیں ہے اس لیے ابتداء میں تو انہیں سمجھنے کے لیے مختلف چیزوں کے ساتھ ذہنی یکسوئی کی مشق کرنی پڑتی ہے مثلاً شمع بینیLacanomancy ، دائرہ بینی Cyclomancy، اندھیرا بینی، نگیٹو بینی، سورج بینیHeliomancy، چاند بینی Lunamancy، آب بینیHydromancy، آئینہ بینی Catoptromancy وغیرہ وغیرہ۔پھر انسان کی باطنی نگاہ کام کرنے لگتی ہے اور اس کے شعور میں اتنی طاقت آ جاتی ہے کہ جدھر اس کی توجہ جاتی ہے اس سمت کے مخفی معاملات اور مستقبل کے حالات اور تصویری خدوخال نگاہ کے سامنے آ جاتے ہیں۔ 

[/box]

ریگستان میں ایسے بہت سے بزرگ موجود تھے جو اِنہی خدا داد صلاحیتوں کو بروئے کار لاتے تھے۔ انہیں لوگ روشن ضمیر پیش گو کہتے۔ ایسے لوگ اکثر الگ تھلگ رہتے اور زیادہ گھلنے ملنے سے گریز کرتے تھے۔ بعض بوڑھے اور عورتیں اُن سے اِسی بناء پر خوف زدہ بھی رہتے تھے۔ قبیلہ کے لوگ بھی اُن سے مشورہ لینے اور مستقبل کی معلومات حاصل کرنے سے کتراتے ہیں۔
ظاہر ہے کہ اگر کسی کو پہلے ہی معلوم ہو جائے کہ ہونے والی جنگ کا انجام ناکامی ہے اور ان کے آدمیوں کی موت واقع ہو جائے گی تو لوگ لڑنے سے جی کترانے لگیں گے اور سپاہی جنگ میں اپنی صحیح کارکردگی نہیں دکھاسکیں گے۔
قبیلہ کے لوگ اُس جنگ کو ہی ترجیح دیتے جس میں انہیں لڑنے میں لطف آئے۔ جس میں انجام کے بے خبری کی سنسنی موجود ہو۔ جو کامیابی پانے کے جوش سے لبریز ہو۔
یہ لوگ یقین رکھتے ہیں کہ مستقبل تو پہلے ہی لکھا جا چکا ہے اور جو کچھ لکھا جا چکا ہے اُس میں انسان کی بہتری ہی ہے۔ اسی لیے صحرائی قبیلوں کے لوگ صرف اور صرف حال ہی میں یقین رکھتے ہیں اور حال ہی کے لئے جیتے تھے۔ وہ سمجھتے تھے کہ یہ حال ہی ہے جو اپنے دامن میں اُن کے لئے حیران کردینے والے عجوبے اور بے شمار غیرمتوقع باتیں رکھتا تھا اور تحیّرات سے لبریز ہے۔ صحرائی باشندوں کے لیے آنے والے خطرات کے لیے تیار رہنا ہی اصل زندگی ہے۔
دشمن کی تلوار کہاں ہے، اُس کا گھوڑا کہا ں ہے اور اپنے آپ کو محفوظ رکھنے کے لیے دشمن پر کیسے تیر چلایا جائے۔ یہی سوالات اُن کی جستجو کا مرکز بنے رہتے ہیں۔
***

ساربان خود کوئی سپاہی نہ تھا لیکن اُس نے ایسے پیش گو نجومیوں، کاہنوں اور صاحب بصیرت بزرگوں سے بہت سے سوالات پوچھے ضرور تھے، بہت سے جوابات صحیح نکلتے تھے اور کچھ جوابات غلط بھی ہوتے تھے۔
اُسے یاد آیا کہ ایک روز وہ اُن بزرگوں میں سب سے زیادہ معمّر اور صاحبِ بصیرت بزرگ سے ملاتھا۔ جب ساربان نے ان سے مستقبل کے متعلق سوال کیا تو ان بزرگ نے پلٹ کر پوچھا کہ وہ آخر کیوں اپنا مستقبل جاننا چاہتا ہے۔
‘‘تاکہ میں کچھ بہتر کام کرسکوں…. آئندہ وقوع ہونے والی خرابیوں اور اَن چاہے واقعات کو تبدیل کرسکوں ’’ساربان نے جواب دیا تھا۔
بزرگ نے مسکراتے ہوئے کہا ‘‘اگر ابھی جان لیا تو پھر وہ مستقبل کہاں ہوا….؟’’
‘‘کیا یہ اچھا نہیں ہوگا کہ میں مستقبل سے آگاہ ہو کر زیادہ بہتر طور پر کام کر سکوں….’’ ساربان نے صفائی دینے کی کوشش کی ۔

بزرگ نے گھمبیر لہجے میں کہا۔
‘‘دیکھو !…. اگر مستقبل میں تمہارے ساتھ کچھ اچھا ہونے والا ہے تو یقین رکھو اس کے اچانک ملنے والی خوشی کا لطف ہی کچھ اور ہوتا ہے اور اگر مستقبل میں تمہارے ساتھ کچھ برا ہونے والا ہے تو اُس کے واقع ہونے سے بہت پہلے سے ہی جان لینے سے تمہارا باقی وقت درد و کرب میں گزرے گا، جس کی تکلیف اُس کے اچانک رو نما ہونے کے مقابلہ میں کہیں زیادہ ہو گی….’’
ساربان نے وضاحت کی کہ ‘‘ہر انسان مستقبل کے لئے جیتا اور اُس کو سامنے رکھ کر منصوبہ بندی کرتا ہے۔مستقبل جاننے کی فطری خواہش ہر انسان میں ہوتی ہے ’’
وہ بزرگ پیش بینی کے سری علوم کے بہت بڑے ماہر تھے۔ ساربان کی یہ بات سن کر بزرگ نے لکڑی کے گٹکوں سے بنے پانسے، جن پر عجیب و غریب حروف کندہ تھے*، ہاتھ میں اٹھائے اور زمین پر پھینک دئیے۔ زمین پر اُن کے گرنے کے انداز کو بغور دیکھ کر کچھ معنیٰ اخذ کئے اور اُنہیں اُٹھا کر اپنے تھیلے میں رکھ لیا، لیکن بزرگ نے ساربان کو اس کے مستقبل کے متعلق کچھ نہ بتایا، البتہ انہوں نے ساربان سے یہ کہا کہ :
‘‘میں نے اپنی زندگی لوگوں کو مستقبل کے بارے میں پیش گوئیاں کرتے گزاردی۔ میں اس سے اپنے لئے رزق کماتا ہوں۔ یہی میرا روزگار ہے۔ ’’ پھر تھوڑا توقف کے بعد بزرگ نے کہا۔
‘‘دیکھو!…. میں صرف زائچوں اور پانسوں کو سمجھنے کا علم جانتا ہوں اور پانسوں کو اِس طرح پھینکتا ہوں کہ ان میں وہ نشانیاں دیکھ سکوں، جس سے میں چند نقوش تک پہنچ سکوں۔ اِس طرح میں ماضی پڑھ لیتا ہوں، اس عمل کے ذریعے جو بھلایا جاچکا ہے اُسے ظاہر کر سکتا ہوں اور آج کے حال میں جو علامتیں ہیں میں اُنہیں پڑھ سکتا ہوں۔’’
‘‘ہاں البتہ یہ واضح رہنا چاہیے کہ جب مجھ سے کوئی مستقبل کے بارے میں پوچھتا ہے تو ایسا نہیں ہے کہ میں قسمت کےلکھے ہوئے کو پڑھ کر سناتا ہوں بلکہ در اصل میں مستقبل کے لئے محض اندازے لگاتا ہوں۔ ’’
‘‘دیکھو ! مستقبل تو صرف قدرت کے ہاتھ میں ہے، قدرت ہی کو معلوم ہے کہ کل کیا ہونا ہے۔ لیکن قدرت کبھی کبھی مستقبل کو کسی پر منکشف بھی کردیتی ہے، لیکن یہ انتہائی غیر معمولی حالات ہی میں ہوتا ہے۔
اب تم یہ پوچھو گے کہ میں اندازہ کیسے قائم کرتا ہوں، تو سنو ! میں حال میں موجود علامتوں کو بنیاد بنا کر ہی یہ کام کرتا ہوں۔ در اصل حال ہی میں راز پوشیدہ ہے۔ اگر حال پر توجہ دی جائے تو اُسے بہتر کیا جاسکتا ہے اور اگر تم حال کو بہتر کر لو تو جو اُس کے بعد آنے والا ہے وہ بھی بہتر ہو جائے گا۔ ’’
یہ بتاکر ان بزرگ نے ساربان سے کہا تھا ‘‘مستقبل کو بھول جاؤ۔ اُس کی بالکل فکر نہ کرو۔ آج کے بارے میں سوچواور اُسے صحیح ڈھنگ اور صحیح تعلیم کے مطابق گزارو۔ اس بات پر یقین رکھو کہ قدرت مخلوقات کا بھلا چاہتی ہے۔ یہ بھی یاد رکھو کہ گزرتا ہوا ہر ایک دن خود اپنی ذات میں ایک دائمیت اور ابدیت رکھتا ہے۔ ’’
ساربان نے بزرگ سے پوچھا کہ‘‘اچھا وہ کون سے مخصوص حالات اور وقت ہوتا ہے جس میں کسی پر مستقبل آشکار ہوجاتا ہے….؟’’
‘‘صرف اس وقت جب قدرت خود یہ چاہے…. اور ایسا شاذ و نادر ہی ہوتا ہے اور جب ایسا ہوتا ہے تو اُس کی ایک ہی وجہ ہوتی ہے، اور وہ یہ کہ یا تو قدرت اُس بندے کو بتانا چاہتی ہے کہ مستقبل کے بارے میں یہ جو کچھ لکھا گیا ہے اسی مقصد سے لکھا تھا کہ اسے تبدیل ہونا ہے۔ یا پھر یہ بتانا مقصود ہوتا ہے کہ یہی مستقبل ہے اور اس کے لیے تیار رہنا۔’’

[box type=”shadow” align=”” class=”” width=””]

* قدیم دور میں بہت سے مخفی علوم کے ماہر، پیش بین، جیوتش اور نجومی کائناتی رازوں اور نشانیوں کو سمجھنے اور ان سے مستقبل جاننے کے لیے کئی طریقے اپناتے تھے، جیسا کہ رونی Runes خط ، جو پانسوں کی طرح ہوتے اور ان پر 200 سے 1200 تَک پُراسرار نشان اور قدیم جرمن زبان کے حروف تہجی کھُدےہوتے تھے، اسی طرح اوگمOgham جسے بِست حرفی ابجد بھی کہا جاتا تھا ۔ بیس حروف اور علامات پر مشتمل لکڑی کے ٹکڑے ہوتے تھے ، ان کی موجودہ شکل اوئجا بورڈ اور ٹیرٹ Tarot کارڈز ہیں۔ کھیلے جانے والا تاش کے پتّوں کی طرح کی پتوں کی ایک گڈٖی جس پر بنی علامات کو دیکھ کر قسمت کا حال بتایا جاتا ہے۔ ٹیرٹ کارڈز کی تعداد بائیس ہوتی ہے جس پر بادشاہ، ملکہ پادری،جادوگر، مسخرہ، قاضی، عابد، شیطان، چاند، ستارے، سورج سمیت مختلف چیزوں کی تصاویریں ہوتیں، اور ہر کارڈ کا اپنا خاص مفہوم ہے۔ جو بات معلوم کرنی ہو، اسے ذہن میں رکھ کرچار ٹیرٹ کارڈز ترتیب سے نکالے جاتے ہیں۔ ان چاروں کارڈز کے مشترکہ مفہوم کے ذریعے سوال کا جواب کھوجا جاتا ہے۔ اوئجا بورڈ لکڑی کا ایک چپٹا ٹکڑا ہوتا ہے جس پر حروف تہجی، 0 سے 9 تک اعداد اور‘‘ہاں’’، ‘‘نہیں’’ کے الفاظ لکھے ہوتے ہیں۔ بعض اقوام میں خیال کیا جاتا ہے کہ اس تختے کے ذریعے روحوں سے بات کی جاسکتی ہے۔

[/box]

 

 

***
ساربان نے سوچا کہ ہوسکتا ہے کہ اس لڑکے کو بھی ہونے والے واقعہ کا ایک عکس دکھادیا گیا ہو۔ ‘‘لیکن سوال یہ ہے کہ قدرت نے اس کام کے لیے صرف اُس لڑکے ہی کو آخر کیوں چُنا۔’’
پھر ساربان جیسے خیالات کے سمندر سے اچانک نکل آیا ہو۔اس نے لڑکے کو ہدایت دی کہ
‘‘جاؤ! قبیلہ کے سردار کو جا کر بتاؤ کہ فوجیں آ رہی ہیں۔’’
لڑکے نے جھجھکتے ہوئے کہا ‘‘ نہیں…. وہ مجھ پر ہنسیں گے۔’’
‘‘یہ صحرا کے باشندے ہیں۔ یہ لوگ اِن غیبی علامتوں اور نشانیوں پر یقین رکھتے ہیں اور انہیں پہچانتے ہیں۔’’
‘‘تو ممکن ہے کہ اُنہیں یہ پہلے ہی معلوم ہو چکا ہو۔’’ لڑکا ابھی بھی جانے سے کترارہا تھا۔
‘‘اِن باتوں سے اُنہیں کوئی مطلب نہیں ہے۔ اُن کا یقین ہے کہ قدرت اگر یہ چاہتی ہے کہ انہیں یہ بات معلوم ہو جائے تو کوئی نہ کوئی آ کر اُنہیں بتا ہی دے گا۔ ایسا کئی بارہا ہو چکا ہے۔ بس اِس بار خطرے سے آگاہ کرنے والا وسیلہ تم بن رہے ہو ….’’
لڑکے کو کنویں والی لڑکی کا خیال آیا، نخلستان کے ساتھ وہ بھی خطرے میں تھی، وہ فوراً سردارِ قبیلہ سے ملنے کے لئے اُٹھ کھڑا ہوا۔
***
سردارِ قبیلہ کا سفید اور وسیع خیمہ نخلستان کے بالکل وسط میں تھا، لڑکے نے خیمے کے سامنے پہنچ کر وہاں کھڑے ہوئے پہرے دار سے کہا کہ ‘‘میں سردار سے ملنا چاہتا ہوں، میں نے صحرا میں بعض عجیب اور غیر معمولی علامتیں دیکھی ہیں۔’’
پہرے دار نے بات سنی لیکن کچھ جواب دئیے بغیر خیمہ کے اندر چلا گیا اور خاصی دیر تک اندر رہا۔ وہ جب باہر آیا تو سفید اور سنہرے لباس پہنے ایک نوجوان عرب اُس کے ساتھ تھا۔
لڑکے نے اسے وہ سب بتایا جو اُس نے صحرا میں دیکھا تھا۔ اُس نوجوان نے سب کچھ غور سے سنا اور باہر ٹھہرنے کے لئے کہہ کر خیمہ میں چلاگیا۔

 

 

(جاری ہے)
***

تحریر : پاؤلو کویلہو ; ترجمہ: ابن وصی