افق

سلسلہ عظیمیہ نارتھ ناظم آباد ٹاؤن کے زیر اہتمام اتوار یکم دسمبر کی سہ پہر ایک محفل میلاد منعقد ہوئی۔ اس موقع پر خطاب کرتے ہوئے ڈاکٹر وقار یوسف عظیمی نے کہا کہ حضرت محمد رسول اللہﷺ نے فرمایا ہے کہ علم حاصل کرنا ہر مسلمان پر فرض ہے۔
[طَلَبُ الْعِلْمِ فَرِيضَةٌ عَلَى كُلِّ مُسْلِم(ابن ماجہ)]
معلم اعظم حضرت محمد رسول اللہ ﷺ کے اس ارشاد کی تعمیل میں ہر مسلمان مرد اور عورت کو علم حاصل کرنا ہے۔ اس حکم کی تعمیل میں ہمیں دینی اور روحانی علوم حاصل کرنے ہیں اور ماڈرن ایجوکیشن حاصل کرتے ہوئے نیچرل سائنسز کے علوم بھی پڑھنے ہیں۔
ڈاکٹر وقار یوسف عظیمی نے کہا کہ مسلمان گھرانوں میں بچوں کو اور نوجوانوں کو ابتدائی اسلامی تعلیمات ان کے گھروں سے ملنی چاہئیں۔ انہوں نے کہا کہ اولاد کے لیے پہلا معلم ماں باپ کو بالخصوص والد کو بننا چاہیے۔
اس محفل میلاد میں ٹاؤن نگراں نارتھ ناظم آباد محترمہ فرزانہ جاوید اور صائمہ انصاری نے سیرت النبی پر مقالے پیش کیے۔ محمود عثمانی، بلال شیر، معراج ظہیر تاجی، فیضان قادری، فہمیدہ خالق اور فاطمہ کائنات نے نعتیں پیش کیں۔
محترمہ غزالہ شریف نے دعا کروائی۔ آخر میں نبی کریم علیہ الصلوٰۃ والسلام کی خدمت میں ہدیہ درود و سلام پیش کیا گیا۔

(رپورٹ۔ محمد جاوید غوری)

ڈاکٹر وقار یوسف عظیمی جمعہ 29 نومبر کو سیالکوٹ تشریف لائے۔ مراقبہ ہال سیالکوٹ میں اراکین سلسلہ عظیمیہ کے ایک اجتماع سے خطاب کیا اور بعض حاضرین سے انفرادی طور پر ملاقاتیں بھی کیں۔

اپنے خطاب میں ڈاکٹر وقار یوسف عظیمی نے حاضرین کو سلسلہ عظیمیہ کے مرشد حضرت خواجہ شمس الدین عظیمی صاحب کا سلام اور دعائیں پہنچائیں۔ بعد از سلام دعا سلسلہ عظیمیہ کے پیغام اور تعلیمات، جدید دور میں سامنے آنے والے بعض سنگین مسائل کے حل کے لیے قرآن و حدیث اور اولیاء اللہ کی تعلیمات سے رہنمائی، والدین اور اولاد کے درمیان مشفقانہ و مودبانہ تعلقات کے قیام، لڑکیوں کی اچھی پرورش اور تعلیم، خواتین کے حقوق و طبقہ خواتین کے احترام اور دیگر کئی موضوعات پر بات کی۔ قبل ازیں نگراں مراقبہ ہال سیالکوٹ عابد محمود نے سلسلہ عظیمیہ کے پیغام پر مختصر بات کی۔ نگراں مراقبہ ہال مظفر آباد شیخ طاہر رشید بھی اس موقع پر موجود تھے۔

ڈاکٹر وقار یوسف عظیمی کے خطاب کے بعد اللہ تعالیٰ کے اسماء یا حی یاقیوم کا اجتماعی ذکر ہوا۔ حاضرین نے مل کر آقا و مولا حضرت محمد رسول اللہ ﷺ کی خدمت میں ہدیہ صلوٰۃ (درود خضری) پیش کیا۔ اجتماعی مراقبہ ہوا۔
ہفتہ 30 نومبر کو ڈاکٹر وقار یوسف عظیمی نگراں مراقبہ ہال سیالکوٹ عابد محمود اور نگراں مراقبہ ہال مظفرآباد شیخ طاہر رشید کے ساتھ سیالکوٹ کے مضافاتی علاقوں بجوات اور سمبڑیال تشریف لے گئے۔ سمبڑیال میں قائم عظیمیہ روحانی لائبریری کا دورہ کیا۔ لائبریری نگراں تنویر یوسف نے سلسلہ عظیمیہ کے پیغام کی ترویج کے لیے لائبریری کی کارکردگی کے بارے میں بتایا۔ ڈاکٹر وقار یوسف عظیمی نے لائبریری میں موجود افراد کے ساتھ گفتگو کی ایک نشست میں قرآن پاک سے ہدایت پانے، رسول اللہ کی تعلیمات سے انفرادی و اجتماعی زندگیوں کو روشن کرنے اور سلسلہ عظیمیہ کی تعلیمات کے مختلف پہلوؤں پر بات کی اور حاضرین کے سوالات کے جوابات دیے۔

ہفتے کو بعد نماز عشاء نگراں مراقبہ ہال عابد محمود کی رہائش گاہ پر اراکین سلسلہ عظیمیہ کے ساتھ ایک نشست میں ڈاکٹر وقار یوسف عظیمی نے تصوف کی تعلیمات اور دیگر موضوعات پر گفتگو کی۔ انہوں نے اسمائے الٰہیہ کے ذکر کی اہمیت بیان کی اور حاضرین کو بتایا کہ ذاکر کے ذہن و قلب پر ذکر کے اثرات کس طرح ہوتے ہیں۔ ڈاکٹر وقار یوسف عظیمی نے ذکر سے ہونے والے متوقع نتائج پر بھی حاضرین سے بات کی۔

اتوار یکم دسمبر کو ڈاکٹر وقار یوسف عظیمی نگراں مراقبہ ہال سیالکوٹ عابد محمود اور سیالکوٹ سے تعلق رکھنے والے چند اراکین سلسلہ عظیمیہ اور نگراں مراقبہ ہال لاہور محمد نواز کے ساتھ لاہور میں حضرت داتا گنج بخش کے مزار پر حاضر ہوئے۔ سلسلہ عظیمیہ کے مرشد حضرت خواجہ شمس الدین عظیمی اور سب اراکین سلسلہ عظیمیہ کی طرف سے سلام عرض کیا اور حضرت علی ہجویری ؒ کے درجات کی بلندی اور پاکستان کے استحکام و ترقی کے لیے اللہ تعالیٰ کے حضور دعائیں کیں۔

سلسلہ عظیمیہ کے زیر اہتمام 
گلبرگ ٹاؤن کراچی میں محفلِ میلاد سے 
ڈاکٹر وقار یوسف عظیمی کا خطاب

سلسلہ عظیمیہ کراچی ٹاؤن گلبرگ کے زیر اہتمام محفل میلاد منعقد ہوئی۔
اس محفلِ میلاد میں ڈاکٹر وقار یوسف عظیمی نے اولاد کی تربیت میں والدین کے کردار، خواتین کے حقوق اور اصلاح معاشرہ کے موضوعات پر خطاب کیا۔ ڈاکٹر وقار یوسف عظیی نے کہا کہ والد کو اپنے بچوں کے لیے معلم کا کردار بھی ادا کرنا چاہیے۔
محفلِ میلاد میں حضرت محمد رسول اللہ ﷺ کی خدمت میں ہدیہ نعت اور صلوٰۃ و سلام پیش کیا گیا۔
آخر میں محترمہ غزالہ شریف اور محترمہ ریحانہ نے دعا کروائی۔

(رپورٹ۔ ضیاء الدین)

مرکزی مراقبہ ہال میں مطالعہ قرآن کلاس کے طالب علموں اور دیگر اراکین سلسلہ عظیمیہ کے لیے آڈیو (سماعت) ٹیسٹ، میڈیکل چیک اپ اور خون کا عطیہ دینے کے لیے کیمپ لگائے گئے۔

آڈیو ٹیسٹ کے لیے پاکستان کے معروف آڈیولوجسٹ کنسلٹنٹ شاہد اختر راجپوت اور آڈیو لوجسٹ کنسلٹنٹ مسز نزہت شاہد نے تقریباً ساٹھ افراد کی سماعت کے ٹیسٹ لیے۔ ان ٹیسٹ سے حاصل ہونے والے نتائج کے پیش نظر بعض افراد کو نیورو فزیشن یا ای این ٹی فزیشن کو ریفر کیا گیا۔

میڈیکل چیک اپ کے لیے ڈاکٹر وقار صغیر، ڈاکٹر رضا عباس اور لیڈی ڈاکٹر عروج پر مشتمل ٹیم نے مطالعہ قرآن کلاس کے طالب علموں کی Lipid Profile, C.B.C اور S.G.P.Tکی رپورٹس ملاحظہ کیں۔ بلڈپریشر اور بلڈ شوگر جانچے گئے۔ جن افراد کو مزید ٹیسٹ یا کسی علاج کی ضرورت معلوم ہوئی انہیں متعلقہ ڈاکٹرز سے ملنے کے لیے کہا گیا۔

حسینی بلڈ بینک کے زیر اہتمام عطیہ خون (Blood Donation) کیمپ میں بڑی تعداد میں مرد و خواتین نے خون کے عطیہ کی پیشکش کی۔ عطیہ دینے کے لیے موزوں افراد سے خون کے عطیات لیے گئے۔

ڈاکٹر وقار یوسف عظیمی نے خدمات انجام دینے والے ڈاکٹرز، لیڈی ڈاکٹرز، آڈیولوجسٹ کنسلٹنٹ ، پیرا میڈیکل کارکنان اور اراکین کا شکریہ ادا کیا۔