اگست 2016ء

پڑوسیوں اور اقربا کے منفی رویے

***

قرآن کریم میں پڑوسیوں سے حسن سلوک کی ہدایت پر کئی آیات ہیں ۔
ارشاد باری تعالیٰ ہے
‘‘ اوراللہ کی عبادت کرو اوراس کے ساتھ کسی کو شریک نہ ٹھہراؤ اور حسن سلوک کرو ماں باپ کے ساتھ ،قرابت داروں کے ساتھ، یتیموں اور مسکینوں کے ساتھ اور رشتہ دار، ہمسایوں ،اجنبی ہمسایوں اور رفقائے پہلو کے ساتھ۔’’( سورہ نساء:36)
رسول اللہ ﷺ نے فرمایا
‘‘ اللہ کے نزدیک بہترین ہمسایہ وہ ہے جو اپنے ہمسائے کے لئے بہتر ہے۔’’ (ترمذیشریف)
اللہ کے رسولﷺ نے پڑوسیوں کے درمیان باہمی تعلقات کی بہتری پر بہت زور دیاہے۔ ایک موقع پر ارشاد فرمایا:
‘‘ پڑوسی کا تم پر یہ حق ہے کہ اگر وہ بیمار پڑجائے تو اس کی عیادت کرو۔ فوت ہوجائے تو جنازہ میں شریک ہو۔ اسے قرض کی ضرورت پڑجائے تو قرضہ دو۔ اسے کپڑے کی ضرورت ہو تو پہننے کو کپڑے دو۔ اگر اسے کوئی بھلائی پہنچے تو اسے مبارکباد دو۔ اگر اسے کوئی مصیبت پہنچے تو تعزیت کرو ۔
اپنے مکان کی دیواریں اس قدر بلند مت کرو کہ اس کی ہوا رُک جائے۔
اپنی ہانڈی کی بُو سے اسے اذیت نہ پہنچاؤ اِلّا یہ کہ اسے بھی اس میں سے کچھ بھیج دو۔’’ (بخاری)
ایک مرتبہ رسول کریمﷺ نے فرمایا‘‘ وہ شخص مومن نہیں جس کی ایذارسانی سے اس کا پڑوسی محفوظ نہیں۔’’(مسلم)
پڑوسیوں کا خیال رکھنا ،اللہ اور اللہ کے رسولﷺ کی خوشنودی کا ذریعہ بھی ہے۔
مومن بندہ دوسروں کے لیے ایذارسانی کا سبب نہیں بنتا بلکہ وہ لوگوں کے لئے ایک مفید انسان بننے کی کوشش کرتاہے ۔یقیناً یہ بندہ ٔ مومن کی شان نہیں کہ اس کی ذات سے کسی کو تکلیف پہنچے ۔
اچھے پڑوسی اورمخلص عزیز واقارب نعمت ہیں۔اگر پڑوسی یا قریبی رشتہ دار تنگ کرنے والے ہو ں تو یہ امربہت اذیت و تکلیف کا باعث بنتا ہے۔

گالم گلوچ کرنے والے پڑوسی :

سوال: ہم نے ایک جگہ نیا فلیٹ لیا ہے۔یہاں پڑوس سے لڑائی جھگڑے اورگندی گندی گالیوں کی آوازیں آتی ہیں جس کی وجہ سے ہم میاں بیوی بہتپریشان ہیں۔ میرے شوہر نے پڑوسی سے بات کی کہ دیکھیں اس طرح بچوں پر بُرا اثر پڑے گا توانہوں نے میرے شوہر کوبھی پہلے بُرا بھلا کہا اور پھر گالیاں دینا شروع کردیں۔ انہوں نے کہا کہ ہم جو مرضی آئے کریں گے تمہیں جوکرناکرلو ۔
چند دنوں بعدانہوں نے ہمیں مختلف طریقوں سے تنگ کرنا شروع کردیا۔ کبھی کچرا ہمارے دروازے پر ڈال جاتے ہیں تو کبھی بلا وجہ اتناپانی بہاتے ہیں کہ سارا پانی ہمارے دروازے کے سامنے کھڑا ہوجاتاہے۔
پڑوس کےاس گھر کے بڑے تو ایک طرف ان کے بچے بھی بہت شرارتی ہیں۔ میرا چھوٹا بیٹا اسکول سے آتاہے تو اس کو طرح طرح سے تنگ کرتے ہیں،اگر میں کچھ کہوں تو ان بچوں کی ماں مجھ سے لڑنے دوڑتی ہے۔
ہم نے کمیٹی والوں سے شکایت کی ہے مگر وہ بھی اس سلسلے میں بےبس معلوم ہوتے ہیں۔

جواب:رات سونے سے پہلے 101 مرتبہ سورہ ہود(11)کی آیت نمبر 52 کا ابتدائی حصہ :

وَيَا قَوْمِ اسْتَغْفِرُوا رَبَّكُمْ ثُمَّ تُوبُوا إِلَيْهِ 

گیارہ گیارہ مرتبہ دورد شریف کے ساتھ پڑھ کران لوگوں کو ہدایت ملنے اور انہیں پڑوسیوں کے ساتھ حسن سلوک سے رہنے کی توفیق ملنے کیدعاکریں ۔
یہ عمل کم ازکم ایک ماہ تک جاری رکھیں۔
چلتے پھرتے وضو بے وضو کثرت سے یَا مُوْمِن ُ یَاحَفِیْظُ یَا سَلَام کا ورد کیا کریں۔

***

پڑوس نے اے سی فین کارخ ہمارے کمرے کی طرف کیا ہواہے :

سوال: ہمارے مکان کے پیچھے والے پڑوسی جن کی دیوار ہمارے مکان سے ملی ہوئی ہے انہوں نے ہمیں بہت تنگ کیا ہواہے۔ انہوں نے اپنے اے۔ سی کے آؤٹر کا رخ ہماری طرف کیا ہواہے۔ اس کی وجہ سے گرم ہوا ہمارے کمرے میں آتی ہے۔ اگر ہم دروازہ بند کردیں تو حبس ہوجاتاہے۔ ہم نے انہیں کئی بار اپنی تکلیف بتائی مگر وہ وہاں سے اے سی آؤٹرہٹانے پر تیار نہیں ہورہے۔
میرے شوہر نے ایک بار غصہ میں سختی سے انہیں وارننگ دی مگر ان کی عورتیں میرے شوہر سے لڑنے پر آگئیں اور خوب ہنگامہ ہوا ۔
اب ان کی شرارتوں میں مزیداضافہ ہوگیاہے۔ کبھی اپنے چھت سے بدبودار سالن،بریانی ہماری چھت پر پھینک دیتے ہیں۔ کبھی بچوں کے ڈائپر ہمارے چھت پر ملتے ہیں۔

جواب:اللہ تعالیٰ آپ کے پڑوسی کو ہدایت اوردرست رویے رکھنے کی توفیق عطا فرمائے۔آمین
آپ صبح نہار منہ اکیس مرتبہ سورۃ الفرقان (25)کی آیت نمبر58 ،تین تین مرتبہ درود شریف کے ساتھ پڑھ کر پڑوسیوں کا تصورکرکے دم کردیں اور دعاکریں کہ اللہ تعالیٰ ان کو ہدایت اور دوسروں کے ساتھ اچھے سلوک کی توفیق عطا فرمائے۔ یہ عمل کم ازکم چالیس روزتک جاری رکھیں۔

***

پڑوسی لڑکے پریشان کرتے ہیں :

سوال: ہمارےپڑوس میں دو سال پہلے ایک فیملی آئی۔ ان کے چار لڑکے اور تین بیٹیاں ہیں۔ بچوں کے والدین تو اچھے ہیں لیکن بچے انتہائی خودسر، نافرمان اور شرارتی ہیں۔
بڑے بیٹے کی عمر بائیس سال ہے اس سے چھوٹا بیٹا اٹھارہ سال کا ہے۔ یہ دونوں مل کر ہمیں تنگ کرنے کا کوئی موقع ہاتھ سے جانے نہیں دیتے۔
دروازے پر لگا بلب نکال کر لے جاتے ہیں، تو کبھی بلب ہی توڑدیتے ہیں۔ کبھی کچرا دروازے کے سامنے ڈال کرڈس بین غائب کردیتے ہیں ۔ہماری دیواروں پر مارکر سے تصوریں بنا دیتے ہیں۔ گھنٹی کا بٹن بھی توڑ دیاہے۔
ان کے گھر والے ہم سے شرمندہ ہیں اور وہ اپنے بچوں کو زیادہ کہیں تو وہ اپنے ماں باپ سے بھی بدتمیزی کرنے لگتے ہیں۔ ہم نے بہت پیار محبت سے سمجھایا مگر وہ نہیں ماننے والے ۔
آپ کوئی وظیفہ بتائیں کہ یہ لڑکے ہمیں تنگ کرنا چھوڑ دیں اورراہ راست پرآجائیں۔

جواب: آپ رات سونے سے پہلے ایک سوایک مرتبہ سورہ یونس (10) کی آیت نمبر25،گیارہ گیارہ مرتبہ درود شریف کے ساتھ پڑھ کر ان لڑکوں کی رویوں میں مثبت تبدیلی اور انہیں اپنے والدین کی فرمانبرداری کی توفیق ملنے کی دعاکریں۔
یہ عمل کم ازکم چالیس روزتک جاری رکھیں۔

***

شک پیدا کردیا :

سوال:ہمارے قریبی رشتہ دار میرے اورمیرے شوہر کے درمیان اختلافات اورلڑائی جھگڑا کرانے کی کوشش کررہے ہیں۔ میرے شوہر کی اچھی آمدنی ہے اورہم خوش وخرم زندگی بسر رہے ہیں جس کی وجہ سے وہ حسد کا شکار ہوگئے ہیں۔
اب خاندان کی دو عورتیں میرے بارے میں جھوٹی اورمن گھڑت باتیں پھیلا رہی ہیں۔وہ کہتی ہیں کہ میں اپنے شوہر کے پیسے چوری چھپے اپنے میکے والوں کودیتی ہوں۔
میرے شوہر میرے والدین کی بہت عزت کرتے ہیں ۔میرے میکے آنے پر بھی انہوں نے کبھی کچھ نہیں کہا لیکن ان دوعورتوں کی طرف سے بار بار اس بات کی تکرار سے شوہر بھی متاثر ہوئے اور انہوں نے مجھ سے کہا کہ اگر میکے میں کسی کو پیسے دینے ہوں تو میں نے منع کب کیاہے۔مجھ سے چھپانے کی کیا ضرورت ہے….؟
بتانے کا مطلب یہ ہے کہ مسلسل جھوٹ سن سن کر میرے شوہر کے دل میں بھی شاید میری طرف سے کوئی بدگمانی آگئی ہے اور شک پیدا ہوگیا ہے۔

جواب:

رات سونے سے پہلے 101مرتبہ سورہ یونس (10) کی آیت 35،گیارہ گیارہ مرتبہ درودشریف کے ساتھ پڑھ کرمذکورہ خواتین کو ہدایت ملنے اور اپنے اور اپنے شوہر کے لئے ہر طرح کے شر سے حفاظت کی دعاکریں۔ یہ عمل کو کم ازکم چالیس روزتک جاری رکھیں۔

***

بہتان لگاکر بدنام کردیا :

سوال: میرے والد صاحب کی اپنے ماموں سے کسی بات پر ان بن ہوگئی ۔اس کے بعد سے والدصاحب کی بات چیت ان سے بند ہوگئی مگر ان کے اہل خانہ ہم سے ملنے آتے اورہم بھی ان کے ہاں ملنے جاتے ۔مگر والد صاحب کے ماموں ہر تقریب میں، ہرملنے والوں سے ہمیشہ ہمارے والد صاحب کے بارے میں جھوٹی اورمن گھڑت باتیں کرنےلگےہیں۔
کبھی ابو کے کسی دوست سے کہتے ہیں کہ وہ تو تمہارے بارے میں فلاں غلط بات کررہاتھا،کبھی کسی رشتہ دار سے کہتے ہیں کہ ان میاں بیوی میں آج کل بہت ان بن چل رہی ہے،غرض کبھی کچھ تو کبھی کچھ ، فضول اورجھوٹی باتیں ابو کے بارے میں پھیلاتےرہتے ہیں۔
ان کے رشتہ داراور دوست احباب ماموں کی ان حرکتوں کو سمجھنے لگے ہیں لیکن بہرحال ان کی ان باتوں سے ہم اذیت میں رہنےلگےہیں۔

جواب:

رات سونے سے پہلے اکتالیس مرتبہ سورہ نور(24) کی آیت نمبر21،گیارہ گیارہ مرتبہ درود شریف کے ساتھ پڑھ کرمذکورہ فرد کو ہدایت ملنے اور ان کے شر سے حفاظت کی دعا کریں۔
یہ عمل کم ازکم چالیس روز تک جاری رکھیں۔

اگست 2016ء

[box type=”success” align=”” class=”” width=””]

آپ کی شخصیت کا رنگ کیا ہے….؟
آپ کی کامیابی کس رنگ سے وابستہ ہے….؟
کون سا رنگ آپ کے موڈ کو خوش گوار بناسکتا ہے….؟
آپ کے تعلقات کس رنگ کی وجہ سے بہتر یا خراب ہوسکتے ہیں ….؟
یہ اور اس موضوع پر بہت کچھ روحانی ڈائجسٹ میں  نئے سلسلہ وار مضمون  کلر سائیکلوجی میں زندگی پر  رنگوں  کے اثرات کے بارے میں  جانیے اور صحت  ، حسن  ، خوشیوں   اور کامیابیوں    کی طرف قدم بڑھائیے

[/box] 

قسط 9

کیرئیر کو نقصان پہچانے والے منفی اثرات

‘‘آپ نے یہ واس یہاں کیوں رکھ دیا ۔اس کی جگہ یہاں ہے’’۔
شانزے نے گلدان میں سجے تازہ پھولوں کی سجاوٹ کو تھوڑا سا مزید سنوارتے ہوئے ٹیبل کے کارنرپر ایک خوبصورت ویلکم کارڈ کے ساتھ رکھ دیا۔
‘‘مجھے یقین ہے ۔ ہمارے نئے مینجر صاحب اپنے ایفیشنیٹ اسٹاف سے متاثر ہوئے بغیر نہیں رہ پائیں گے ’’۔خرم خوب چمکتے دمکتے آفس اور شانزے کے ہاتھ میں پھولوں کے گلدستے کو دیکھتے ہوئے بولا۔
اتنے میں گارڈ نے نئے مینجر صاحب کے آنے کی اطلاع دے دی تھی ۔
سب مستعد ہوکر اپنی اپنی ٹببل پر پہنچ گئے ۔ خرم اور شانزے انہیں ویلکم کرنے گیٹ پر کھڑے ہو گئے ۔
‘‘السلام علیکم!’’ خرم نے سلام کیا
‘‘ویلکم سر۔ ’’شانزے نے گلدستہ آگے بڑھا دیا
‘‘ہیلو،’’ ایک اسٹرکٹ اور بے تاثر چہرے کے ساتھ سلام کا جواب دے کر گلدستہ قبول کیا گیا۔
ہال میں موجود تمام لوگوں کی نظریں ان پر ٹکی ہوئی تھیں ۔وہ سیدھے اپنے کیبن کی جانب بڑھ گئے۔
پیچھے پیچھے تقریباً دوڑتے ہوئے پیون نے ساتھ ساتھ آفس میں گھسنے کی کوشش کی ۔مگر ان کی رفتار سب میں تیز تھی ۔
پیون نے جلدی سے ہاتھ میں اٹھایا ہوا بیگ سائیڈ پر رکھا اور دوسرے ہاتھ میں پکڑ الیپ ٹاپ ٹیبل پر رکھ کر مستعدی سے کھڑا ہوگیا۔
‘‘آپ نے ڈسٹنگ نہیں کی کیا….؟ ’’ انہوں نے ٹیبل کے شیشے پر لگی ہلکی سی ڈسٹ کو انگلی سے صاف کرتے ہو ئے پیون کو گھورا
‘‘جی کی ہے ’’۔وہ گڑ بڑا گیا
‘‘ یہ دیکھیں یہ کیا ہے۔یہ اتنی سی ڈسٹ بھی ہمارا سارا امیج Spoil کر د یتی ہے ۔مجھے پورے آفس کا ایک کونا ایک شیشہ چمکتا ہوا نظر آنا چاہیئے ’’۔ وہ سختی سے بولے ۔
‘‘پتہ ہے ناں آپ کو first impression is the last impression.۔ ’’ اس بار انہوں نے اپنے اسٹنٹ مینیجرکو گھورا ۔
‘‘ٹرو ُ سر ’’۔ خرم نے سر ہلا کر بولا۔
‘‘سیکرٹری کوبھیجئے ’’۔نوید الدین صاحب نے اپنی نظرسیل فون پر جھکا لیں تھیں ۔
‘‘ یار…. یہ نیا منیجر تو بہت اسٹرکٹ ہے۔ پروموشنز پر تو فاتحہ پڑھ لو’’۔اس نے دعا کے انداز میں ہاتھ اٹھاتے ہوئے کہا۔
‘‘او یار تم پروموشن کو رو رہے ہو مجھے تو ون پرسنٹ انکریمینٹ بھی نظر نہیں آرہا’’۔ خرم جھوٹ موٹ ہاتھوں سے آنکھوں کے اوپر سایہ سا بناکر دور تک کچھ دیکھنے کی ایکٹنگ کرتے ہوئے بولا۔
‘‘ پتا نہیں ڈیفنیس برانچ کا کیاحال کیا ہوگا’’۔
‘‘نہیں یار وہاں کے اسٹاف نے تو پرزور سفارش کی تھی انہیں روکنے کی ’’۔
‘‘بہت لینییٹ ، کالم، اینڈ جوائے فُل پرسنلٹی ہیں ۔ ہاں صفائی کے معاملے میں تھوڑے ….’’ فہد نے اپنے ریسورسس سے حاصل کی گئی انفارمیشن سامنے رکھ دیں ۔
خرم کا منہ بن گیا۔
‘‘غلط فہمی ہے تم لوگوں کی ۔اور فہد تم تو اپنے ریسورسس بدل لو یار۔بالکل ہی جھوٹی انفارمیشن ہے’’۔خرم تو جیسے برس پڑا۔
اسے اپنی پروموشن کی بہت فکر تھی۔
‘‘وہیں رہتے تواچھا تھا’’۔ پیون بڑبڑایا
‘‘ پروموشنز کہیں نہیں گئیں فرینڈز ، وہ یہیں ہے’’ ۔شانزے بڑے اعتماد سے لہجے میں بولی۔
دونوں نے اسے گھورا
‘‘رئیلی سچ کہہ رہی ہوں ۔دیکھو جب اپنے ایفیشینٹ اسٹاف سے ملیں گے۔تو پھر انہیں اپریزل اے گریڈز میں اپروو کرنے ہی ہوں گے ’’۔
‘‘تم ہی رہو اس خوش فہمی میں ۔میرا سات سال کا تجربہ کہتاہے کہ یہ مینیجر ہمیں بہت بھاری پڑنے والا ہے ’’۔خرم بیزاری سے بولا
‘‘لیٹس سی…. ٹی بریک کے بعد سب کو بلایا ہے آفس میں ’’۔شانزے کہتے ہوئے اپنے کیبن میں سیٹ سنبھالتے ہوئے بولی
‘‘اور ہاں صابر !’’اس نے شیشے کو رگڑتے ہوئے پیون کو آواز دے کر کہا۔ ‘‘مینیجر صاحب کے لئے کافی اچھی سی بنوائیے گا۔ود آؤٹ شوگر’’۔
first impression is the last impression.، خرم نے دل ہی دل میں ان کی کہی ہوئی بات دہرائی اور اس بات کو اچھی طرح ذہن نشین کر لیا کہ نوید صاحب کے آگے بڑا محتاط ہو کر چلنا پڑے گا۔
نوید الدین کا اپنے آفس میں بحیثیت برانچ مینیجر آج پہلا دن تھا۔ ان کے تمام اسٹاف ان کو Warm Welcome دینے کے لیے نہایت پر جوش نظرآ رہے تھے۔ وہ جتنا خوش اپنے پچھلے مینیجر سے تھے ایسا ہی خوشگوار ماحول وہ نوید الدین صاحب کے ساتھ بھی رکھنا چاہ رہے تھے۔مگر خلاف توقع نوید صاحب کی شخصیت ایسی نظر نہ آئی۔ نوید اتنے روکھے، خشک مزج نہ تھے ۔ مگر کچھ عرصے سے انہیں لوگوں کے ناگوار رویوں کا سامنا کرنا پر رہاتھا۔تلخ کلامی ہوجاتی۔ وہ میٹنگ میں تھک جاتے۔ بے وقت لنچ مسلسل کام کا دباؤ اور پھر زندگی کے چند جذباتی دھچکوں نے انہیں روکھا اور درشت بنانا شروع کردیا تھا۔
پیون گرم گرم کافی نوید صاحب کے آگے رکھ کر جلدی سے دبے قدموں باہر نکلنے لگا کہ اکاؤنٹس کی تفصیلات کے لیے خرم کو یاد کیا گیا۔
یاد ہے جب سرفراز صاحب کو پیون کافی دیتاتھا۔ تب وہ ہم سب کے لیے بھی بنواتے تھے۔
‘‘ How Rude ’’خرم نے یہ کہتے ہوئے اکاؤنٹس کی فائل ہاتھ میں لیے ان کے کیبن کی جانب جا رہا تھا۔
نوید صاحب نے پہلے دن ہی اپنے Reserved Behavior سے سب کو ہائی الرٹ اور مایوس کر دیا تھا۔

****

‘‘سر ! یہ آپ کے لیے’’۔شانزے نے جھجھکتے ہوئے ایک Cardنوید صاحب کی طرف بڑھا دیا۔
‘‘What is this?’’ نوید صاحب روکھائی سے پوچھا:
شانزے جھجکی اور پھر ڈرتے ڈرتے بولی ‘‘سر یہ میری شادی کا کارڈ ہے’’۔
‘‘ آپ نے مس ارم کو اپنی ڈیوٹی سمجھا دیں ’’۔
‘‘جی سر اور آپ کو ضرور آنا ہے’’۔ شانزے نے ہمت کرکے کہا:
‘‘ہم ….’’ نوید صاحب نے بدستور اپنی نگاہ لیپ ٹاپ پر جمائے رکھی اور کارڈ سائیڈ پر رکھ دیا۔
شانزے کو اس رویے کی ہر گز امید نہ تھی۔ کم از کم مبارک باد تو دے سکتے تھے ۔
جی جناب اس کے بجھے بجھے چہرے سے باہر آتے دیکھ کر فہد اور کرم کے چہرے پر مسکراہٹ آگئی ۔
‘‘مس ایفیشنٹ’’۔ فہد آہستہ سے بولا۔
مگر شانزے کو اپنی جاب کی فکر ہوگئی تھی۔ ‘‘کہیں ایک مہینے کی چھٹی اسے بھاری نہ پڑ جائے ۔اگر واپسی پر نو ویکنسی کا بورڈ ملا تو….’’ وہ گھبرائی ۔
ویسے عقلمندی کا تقاضہ یہی ہے کہ تم ان سے ایسی کوئی امید نہ رکھو۔ خرم نے جواب میں شانزے کو سچائی سے آگاہ کر دیا۔
‘‘You are absolutely right’’. شانزے نے بھی سچائی کو جلد ہی قبول کر لیا۔
شانزے بولی ‘‘کیا انہیں کسی نے بتایا نہیں کہ ایک اچھی آرگنائزیشن چلانے کے لئے مینجر سپورٹ اور ٹیم ورک کتنا ضروری ہے ۔سرفراز صاحب تو کہتے تھے کہ اچھا مینیجر وہ ہوتا ہے جو اپنے اسٹاف سے کام لینے کے لئے حکم دینے کے ساتھ ساتھ ٹیم ورک اور ان کی ضروریات کا خیال بھی رکھے’’۔
شانزے کی یہ باتیں سن کر خرم ہنسنے لگا۔
درحقیقت ایسابالکل نہیں تھا۔ نوید صاحب یہ سب باتیں بہت اچھی طرح جانتے تھے۔ مگر پھر بھی نہ جانے کیوں ان کے رویے میں حد درجہ تبدیلی واقع ہو رہی تھی جو خود ان کے کیرئیر میں بے حد نقصان دہ ثابت ہو سکتی تھی۔ نوید صاحب کو احساس تھا کہ وہ اب پہلے سے زیادہ تلخ ہوتے جارہے ہیں ۔ان کی طبیعت بھی اکثر سست رہتی۔کبھی دل پردباؤ تو کبھی پیٹ میں گڑ بڑ ۔اکثر آنے والے کسٹمر سے بھی سختی سے بات کرتے ۔یہ جانتے ہوئے بھی کہ بحیثیتِ مینجر خوش اخلاقی ان کی فیلڈ کی بنیادی ضرورت اور ذمہداری ہے۔ مگر شاید وہ اپنا رویہ نہ چاہ کر بھی بدل نہیں پارہے تھے ۔
شانزے کی شادی، خرم کی پروموشن، کوئی بھی get together ہو یا پھر کسٹمر سے ملاقات ہر جگہ مینیجر صاحب اپنے اسٹاف کو مطمئن رکھنے اور ان کو سپورٹ کرنے میں ناکام رہے۔رفتہ رفتہ ایک مہینے میں ہی کسٹمر کی شکایات موصول ہونی شروع ہوگئیں۔ اسٹاف کی ایفیشنسی وہ نہ رہی جو تھی۔ ہیڈ آفس کو اب اس برانچ کی شکایات موصول ہونے لگیں ۔ کسٹمر وزٹ میں واضح کمی نے ہیڈ آفس کو بھی ایکشن لینے پر مجبور کردیا۔ پھر انویسٹی گیشن کے بعد برانچ کی ریپورٹیشن اور کسٹمرز کی Satisfactionکو بر قرار رکھنے کے لیے نئے مینیجر کو بھیجنا پڑا۔

کیا آپ بھی کسی ذمہ دار پوزیشن پر ہیں ….
کیا آپ کے رویے میں بھی کچھ ایسا ہی روکھاپنہے؟ ….
کیا آپ بھی ا ب جلد بیزار ہو جاتے ہیں….
خوامخواہ کا غصہ یا طیعت میں الجھن محسوس کرتے ہیں ….
دماغ ہر وقت کام میں الجھا رہاتا ہے ….
مگر ایک اچھی پوزیشن ہونے کے بوجود آپ اپنی ذمہ داریاں پوری کرنے میں الجھ رہے ہیں؟….
کیا اب آپ کولوگوں سے ملنا اچھا نہیں لگتا….
یا آپ اپنی بات صحیح طرح سمجھا نہیں پا رہے ….
یہ روکھا پن اور بیزاری اعتماد کی کمی بھی ہوسکتی ہے۔ جسے قبول کرنا آسان نہیں ۔
جو بات قابلِ غور ہے ۔وہ یہ کہ اگر ایک شخص اپنی صلاحیتوں کی بل پر کسی مقام پر پہنچتا ہے اور پھر کسی مقام پر وہ صلاحیتیں معدوم ہونے لگیں ۔تو یقینا اس کا موجب بیرونی دنیا ہی نہیں بلکہ آپ کی اپنی شخصیت اورباطن میں بھی ہے۔ یقیناً آپ کے اندر کچھ ایسی تبدیلیاں واقع ہو رہی ہیں۔ جن کے منفی اثرات آپ کی صحت اور شخصیت پر اثرانداز ہوکرآپ کے تعلقات اور کیرئیر کو نقصان پہنچا نے کا سبب بن رہے ہیں ۔

کلر سائیکالوجی ا سکے بارے میں بتاتی ہے کہ ایسے افراد میں رنگ و روشنی کی ترسیل میں رکاوٹ پیدا ہونے لگے۔ تب سولر پلیکس ، ہارٹ انرجی بٹنز متاثر ہوتے ہیں جو زرد، سبز ارو نیلے رنگ میں نیگیٹویٹی اور عدم توازن پیدا کردیتے ہیں۔ جس کا اظہار عموما اسی طرح ہوتاہے۔ جس طرح نوید الدین لغاری کی شخصیت میں ہوا۔

**

اگر آپ یہ جاننا چاہتے ہیں کہ
آپ کی شخصیت کا رنگ کیا ہے….؟
اگر آپ صحت کی بہتری کے لیے رنگوں کا مناسب استعمال جاننا چاہتے ہیں۔ یا اپنی صحت اور زندگی میں درپیش مسائل کے لیے کلر سائیکلوجی کے حوالے سے رہنمائی یا مدد چاہتے ہیں تو آپ اپنا مسئلہ )(اپنے نام اور تاریخِ پیدائش کے ساتھ)ہمیں لکھ بھیج سکتے ہیں۔

خط کے لیے ہمارا پتہ ہے۔
کلر سائیکلوجی۔ روحانی ڈائجسٹ۔ ناظم آباد کراچی۔
 یا درج ذیل پتے پرای میل کر سکتے ہیں ۔ 
colourpsychology@gmail.com

مزید رابطے کےلیے ہمارا فیس بُک پیج ہے
facebook.com/colourpsychology

تحریر شاہینہ جمیل

(جاری ہے)

اگست 2016ء

[box type=”shadow” align=”alignright” class=”” width=”600″]دنیا بھر میں ہر روز بے شمار تربیتی پروگرامز منعقد کئے جاتے ہیں ، مضامین، کالم اور کتابیں یہ بتانے کے لئے لکھی جاتی ہیں کہ کس طرح ان خواہشات کے حصول کی تکمیل کی جائے۔ زندگی بہتر انداز میں گزارنے کے لئے ہم اپنے طور پربھی کوشش اور تجربات کرتے رہتے ہیں ۔اس کے باوجودہم ایسی زندگی نہیں گزار پاتے جو انسانیت کے شایانِ شان ہو۔ہم غربت، جہالت، بے روزگاری جیسے مسائل سے دو چار ہیں ۔ ہمارے رشتوں میں محبت ، قربانی اور روا داری کا فقدان رہتا ہے۔ اچھی زندگی ہمارے لئے ایک خواب بن جاتی ہے، وہ خواب جو ہم ہر رات دیکھتے ہیں ۔زندگی ایک معمہ بن جاتی ہے ، جسے سمجھتے سمجھتے پوری زندگی گزر جاتی ہے۔ 1998 سے میرا تعلق پڑھانے اور ٹریننگز کرانے سے رہا ہے۔ اس دوران میں نے سینکڑوں لوگوں کے نقطہ نظر کو سنا، کتابیں پڑھیں اور یہ کوشش کی کوئی ایسا فارمولا ہاتھ لگ جائے جس کے باعث ہم مطلوبہ نتائج حاصل کر تے ہوئے خوشحال زندگی گزاریں ۔ ایسی زندگی جو دونوں جہانوں میں سرفراز کر دے۔میرا ایمان ہے کہ انسان جس چیز کی کوشش کرتا ہے وہ حاصل کر ہی لیتا ہے۔مجھے بھی وہ فارمولا مل گیا۔ میں اس کے بارے میں مکمل اعتماد کے ساتھ کہہ سکتا ہوں یہ کامیابی اور خوشحالی کا واحد فارمولا ہے،واحد فارمولا۔ اس سلسلۂ مضامین کا مقصد یہی ہے کہ نا صرف اُس قانون کو بیان کیا جائے بلکہ اس پر عمل کرنا آسان بنا دیا جائے تاکہ ہماری زندگی صحت ،محبت ، دولت اور خوشیوں سے بھر نے کے ساتھ ساتھ خدا کی رضا بھی حاصل کر لے ۔ محمد زبیر[/box]

زندگی کا ایندھن

دسواں دن

It is not happiness that makes you grateful; it is gratefulness that makes you happy.
~Brother David Steindl – Rast

‘‘خوشی آپ کو شکرگزار نہیں بناتی بلکہ شکرگزاری آپ کو خوش رکھتی ہے’’۔  [برادر ڈیوڈ اسٹینڈل]

کھانا کھانے سے پہلے شکر ادا کرنا ہزاروں سال پرانی روایت ہے۔ یہاں تک کہ اس کے شواہد قدیم مصری تہذیب میں بھی پائے جاتے ہیں۔ آج کی تیز رفتار زندگی میں ہم اُن تمام خوبصورت چیزوں کو نظر انداز کردیتے ہیں جو ہماری زندگی کا لازمی حصہ ہونی چاہئیں۔آج ہم نے شکر ادا کرنا چھوڑ دیا ہے۔ کئی کئی دنوں، کئی کئی ہفتوں اور بعض اوقات کئی کئی مہینوں تک ہمیں بلا ناغہ دن کے تینوں اوقات میں وقت پر گرم اور صاف ستھرا کھانانصیب ہوتا ہے ۔ لیکن ہم ایک بار بھی شکر ادا کئے بغیر کھاتے رہتے ہیں، کھاتے رہتے ہیں اور اگر کبھی ایک مرتبہ بھی وقت پر یا ہماری مرضی کے مطابق نہ ملے تو ہم فوراً سب کچھ بھول جاتے ہیں اور جو نعمتیں ملتی رہی ہیں ان پر بھی پانی پھیر دیتے ہیں۔
اگر ہم اپنے کھانے کو شکر سے مزین کر لیں تو نہ صرف کھانے میں بلکہ بے شمار کاموں میں اللہ خوشیاں بھر دے گا۔ سنن ابنِ ماجہ کی روایت ہے کہ حضور نبی کریمﷺ نے ارشاد فرمایا، :

 اَلطَّاعِمُ الشَّاکِرُ بِمَنْزِلَۃِ الصَّائِمِ الصَّابِرِ

‘‘کھانا کھا کر شکر کرنے والا روزہ رکھ کر صبر کرنے والے کے برابرہے’’۔ [ترمذی؛ ابن ماجہ]

اَلطَّاعِمُ الشَّاکِرُ لَہُ مِثْلُ أَجْرِ الصَّائِمِ الصَّابِرِ 

‘‘کھانا کھا کر شکریہ ادا کرنے والے کے لیے صبر کرنے والے روزہ دار کے اجر کی مثل (اجر) ہے’’۔ [جامع صغیرطبرانی]

کھانا کھا کر شکر ادا کرنا بظاہر کتنا عام سا عمل ہے لیکن اس کے اثرات ہماری سوچ اور توقعات سے کہیں زیادہ ہیں۔
اگر آپ ایک لمحہ کے لئے وہ وقت یاد کریں جب آپ کو بھوک لگ رہی تھی، شدید بھوک۔ آپ کو یاد آئے گا آپ نہ تو کچھ کرنے کے قابل تھے اور نہ ہی سوچنے سمجھنے کے۔ آپ کو کمزوری محسوس ہورہی تھی اور سمجھ میں نہیں آرہا تھا کہ کیا کریں۔اس وقت کھانے کی کوئی عام سی چیزبھی کسی بہت بڑی نعمت سے کم نہیں تھی۔ چند گھنٹوں کی بھوک نے آپ کی عقل ٹھکانے لگا دی تھی۔ 

The belly rules the mind.  ~Spanish Proverb

‘‘پیٹ دماغ پر حکومت کرتا ہے۔ ’’ [ہسپانوی کہاوت]

One cannot think well,  love well, sleep well,
if one has not dined well.  ~Virginia Woolf

‘‘کوئی شخص نہ تو اچھی طرح سوچ سکتاہے، اچھی طرح محبت کر سکتا ہے،اور نہ ہی اچھی طرح سو سکتا ہے، اگر اس نے اچھی طرح کھانا نہ کھایا ہو’’۔ [ورجینیا وولف]

ہمیں کھانے کی ضرورت ہوتی ہے زندہ رہنے کے لئے، سوچنے کے لئے، اور زندگی کو بھر پور انداز سے جینے کے لئے ۔اب اگر اس کے لئے بھی شکرا دا نہیں کریں گے تو کس طرح کے معجزے دیکھنے کے بعد کریں گے۔
تھوڑی سی توجہ اور دیں ،شکر گزاری مزید آسان ہوجائے گی۔ اُن تمام لوگوں کے متعلق سوچیں جن کی محنت آپ کے ہر ہر نوالے میں شامل ہوتی ہے ۔ اگر غور کریں گے تو ہر ہر کھانے کے لئے نہیں ہر ہر لقمے کے لئے شکر اد ا کریں گے ۔
باغوں اور کھیتوں میں کام کرنے والے لوگوں کو ہم تک تازہ پھل اور سبزیاں پہنچانے کے لئے ان پودوں اور درختوں کی نشو نما کرنی پڑتی ہے، مستقل پانی دینا پڑتا ہے ، تپتی دھوپ میں ہل چلانا پڑتا ہے، جانوروں اور کیڑے مکوڑوں سے حفاظت کرنی پڑتی ہے۔ پھر اُن کی کٹائی اور صفائی ہوتی ہے اُس کے بعد کچھ لوگ اُسے پیک (Pack)کرتے ہیں ، کچھ تقسیم کرتے ہیں، کچھ گاڑیوں میں لاد کر میلوں سفر طے کرتے ہیں، پھر یہ سب منڈیوں میں آتا ہے، منڈیوں میں کچھ لوگ انہیں خریدتے ہیں اور پھر بہت سارے لوگ تھوڑی تھوڑی مقدار میں لے کر بازاروں ، دکانوں یا گھر گھر جاکر فروخت کرتے ہیں جن سے ہم بغیر کسی محنت کے لطف اندوز ہوتے ہیں ۔ اور شکر تک ادا نہیں کرتے۔
اسی طرح گوشت ، مچھلی ، دودھ ، چائے ، کافی اور دیگر اشیاء بے شمار ہاتھوں سے ہوتی ہوئی مختلف ادوار سے گزرتی ہوئی ہم تک پہنچتی ہیں جن کا شکر ادا کرنا تو ایک طرف ہم انہیں اپنا حق سمجھ کر استعمال کرتے ہیں اور اگر نہ ملے تو واویلا مچادیتے ہیں ۔ یہی ناشکری ہے۔ اس کا نتیجہ ہمارے سامنے ہے۔
نا شکروں کے ساتھ دوطرح کے معاملات ہوتے ہیں ۔ پہلا تو یہ ہے کہ وہ نعمتوں سے محروم ہوجاتے ہیں ، چھوٹی چھوٹی چیزوں کے لئے ترستے رہتے ہیں ۔ دوسرا یہ کہ ان نعمتوں سے گھر بھرا ہونے کے باوجود ان میں برکت نہیں رہتی۔ ان چیزوں کی قدر نہیں ہوتی ا ور آپس میں محبت نہیں ہوتی۔ اتنا کچھ انہیں کم لگتا ہے ۔ وقتی طور پر ہوسکتا ہے کہ سب کچھ صحیح لگ رہا ہولیکن وقت کے ساتھ ساتھ ساری خوشیاں اور سارا سکون ہاتھ سے نکل جاتا ہے۔
جب کبھی کھانا کھائیں تو ‘‘الحمدللہ’’ یا ‘‘اللہ تیرا شکر ہے’’ کہیں ۔ یہ کھانا اور پانی صحت ، برکت اور مزید نعمتوں کا سبب بنے گا۔کھانے کا شکر یہ ادا کرنے کا ایک فائدہ یہ بھی ہوتا ہے کہ آپ اس کھانے سے صحیح معنوں میں لطف اندوز ہوتے ہیں ۔
ہمارے ایک دوست اکثر ہمارے ساتھ کھانا کھاتے ہیں ، بعض اوقات جب وہ اپنا آدھے سے زیادہ کھانا کھا چکے ہوتے ہیں اور ان سے پوچھا جاتا ہے کھانا ٹھیک ہے، کسی چیز کی کمی یا زیادتی تو نہیں تو وہ کہتےہیں :
‘‘میں نے غور سے نہیں کھایا، ابھی بتاتا ہوں ’’،
پھر وہ غور سے کھاتے ہیں ا ور کہتے ہیں ، ہاں یار نمک تھوڑا کم ہے یا بہت مزے کا بنایاہے وغیرہ ۔
آپ ہر گز ایسا نہ کریں۔ کھانا لطف اندوز ہونے کیلئے دیا ہے، اس سے لطف اندوز ہوں ۔ جتنا زیادہ لطف اندوز ہوں گے اتنا زیادہ اچھے انداز سے شکر ادا کر سکیں گے۔

People who love to eat are always the best people. ~Julia Child

‘‘جو لوگ کھانے سے محبت کرتے ہیں وہ ہمیشہ بہترین لوگ ہوتے ہیں ’’۔ [جولیہ چائلڈ]

اگلی مرتبہ جب کبھی کھانے کے درمیان آپ کو خیال آئے کہ کھانے کے لئے شکر ادا نہیں کیا تو رُکیں ، شکر ادا کریں اور پھرکھانا جاری رکھیں ۔ آپ کو حیرت ہوگی کہ آپ کتنی بڑی نعمت کی اہمیت کو نظر انداز کئے ہوئے تھے۔
سوچیں یہ وہی کھانا ہے جو نہ ملے تو کمزور کردیتا ہے، سوچنے سمجھنے کی صلاحیتیں چھین لیتا ہے، غلط کام کرنے پر مجبور کردیتا ہے۔آپ کو اندازہ نہیں یہی کھانا شکر گزاری کے باعث کتنی تقویت پہنچاسکتا ہے ۔ جب ہم اس کی اہمیت سمجھے بغیراسے استعمال کرتے رہتے ہیں تو ہمیں اندازہ بھی نہیں ہوتا کہ اس میں سے برکت ختم ہوتی جا رہی ہے۔
اس کے ساتھ ساتھ ایک اور کام کریں ۔شدید بھوک میں وقت پرکھانا نہ ملنے یا مزیدار کھانا نہ ملنے پر اگر اب تک غصہ آتا رہا ہے تو آج سے جب بھی ایسی صورتِ حال پیش آئے تو اس بھوک کیلئے دل سے شکر ادا کریں کیونکہ ہر روز بے شمار لوگ اپنی محنت سے کمایا گیا ایک بہت بڑا حصہ ان ادویات پر خرچ کرتے ہیں جس کے باعث انہیں تھوڑی سی بھوک محسوس ہو جائے۔ یہ بھوک قدرتی بھوک کا نعم البدل نہیں ہو سکتی۔
قدرتی طور پر لگنے والی بھوک تو اللہ کی بہت بڑی نعمت ہے جسے ہم فراموش کیے ہوئے ہیں۔ اس بات کا مشاہدہ ہم سب نے کیا ہے کہ جب جب بھوک جیسی عظیم نعمت کی ناقدری کی جاتی ہے، اس کا پہلا اثر ہمارے تعلقات پر پڑتا ہے۔
اگر آپ کھانے کے لئے شکر ادا کرنا بھول جائیں تو دن کے کسی بھی وقت جب بھی یاد آئے اسی وقت آنکھیں بند کریں اور وہ وقت یاد کریں جب آپ پانی پی رہے تھے یا کچھ کھارہے تھے۔ پھر د ل سے شکر ادا کریں کہ اگر یہ سب کچھ آپ کو میسر نہ ہوتا توآپ کے لئے کتنی پریشانی کا باعث ہوتا۔
شکر گزاری کے بغیر زندگی ہم برداشت نہیں کرسکتے۔ ہمارے خوابوں کا انحصار انہی تشکّر کے جذبات پرہے۔

‘‘اگر آپ آج سے شکر ادا کرنا شروع کر دیں تو سمجھیں کہ حالات آج سے بہتر ہو گئے’’۔
[واصف علی واصف]

 

[box type=”note” align=”alignright” class=”” width=”600″]

[دسواں دن ]

اپنے من پسندکھانوں کے نام لکھیں:۔

1۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

2۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

3۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

4۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

5۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ان لوگوں کے نام لکھیں جن کے ساتھ آپ کھانا کھاتے ہوئے بہت محظوظ ہوتے ہیں :

1۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

2۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

3۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

4۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

5۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ان مقامات کے نام لکھیں جہاں کا کھانا آپ کو بہت پسند ہے:

1۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

2۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

3۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

4۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

5۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

فوائد و تاثرات: 
_____________________________ _____________________________ _____________________________ _____________________________ _____________________________

کیون کارٹر ایک حیران کن شخصیت

پوری دنیا میں کیون کارٹر Kevin Carter کی شہرت کے چرچے تھے۔ لوگ اس کی ایک جھلک دیکھنے کی جستجو کرتے۔ لڑکیاں اس کے ساتھ تصویر کھنچوانے، اس سے آٹوگراف لینے کیلئے بےتاب رہتیں۔ 33سالہ اس نوجوان نے 1993 میں ایک ایسی تصویر کھینچی جس کی شہرت میں آج تک کمی نہیں آئی ۔

اس تصویر کو پوری دنیا میں کتنے اخبارات اور تمام سوشل نیٹ ورکنگ سائٹوں پر نہ جانے کتنی بار لاکھوں، کروڑوں لوگوں کی طرف سے اسٹاک کیا گیا ہے، کروڑوں لوگوں نے اس کو ٹیگ کیا ہے، آج بھی ہر روز لاتعداد لوگ سوشل میڈیا پر نا صرف اس کی اُس انعام یافتہ تصویر کو دیکھتے بلکہ اس تخلیق کے خالق کے متعلق انہماک سے پڑھتے اور اپنی رائے کا اظہاربھی کرتے ہیں۔مگر کیا اس کے پیچھے کی چھونے کہانی کسی کو معلوم ہے؟
اسی تصویر نے کیون کارٹر کو پلٹزر ایوارڈPulitzer Prize بھی دلوایا۔ یہ ایوارڈ امریکہ میں صحافیوں کو دیا جانے والا سب سے بڑا ایوارڈ ہے۔یہ ایوارڈ ملنے کے چند ماہ بعد ہی کارٹر نے خود کشی کرلی۔اہم ترین بات یہ ہے کہ خود کشی کی ایک بہت بڑی وجہ یہی تصویر بنی، جس نے اسے ناموری عطا کی تھی۔
مارچ 1993میں کارٹر سوڈان گیا، جہاں اس کا کام قحط زدہ لوگوں کی تصویریں لینا تھا۔ ایک دن اسے ایک ایسی بچی کی تصویر لینے کا موقع ملاجس کے والدین اسے چھوڑ کر کھانا لینے گئے ہوئے تھے ، اوروہ بھوک سے نڈھال آہستہ آہستہ سسک سسک کر اپنے والدین کے پیچھے جانے کی کوشش کر رہی تھی۔ اس بچی کے جسم پر ہڈیاں ہی ہڈیاں نظر آرہی تھیں، گوشت نام کو نہیں تھا۔اسی دوران ایک گدھ اس کے پیچھے آکر تاک میں بیٹھ گیا اور انتظار کرنے لگا کہ جیسے ہی بچی کی جان نکلتی ہے، وہ اس پر حملہ کر دیگا۔
کافی دیر تک تو کارٹر اس پورے منظر کو دیکھتا رہا، پھر خاموشی سے تصویر لے لی۔تصویر لینے کے بعد اس نے گدھ کوتو بھگا دیا لیکن خود ایک درخت کے نیچے بیٹھ کر پھوٹ پھوٹ کر رونے لگا۔اس بچی میں اسے اپنی بیٹی کی تصویر نظر آرہی تھی۔
ویسے اس تصویر کے علاوہ سوڈان کے اس بحران کی انہوں نے اور بھی کئی تصویر کھینچی تھیں، مگر یہ تصویر ان کو خاص لگی…. ! واپس آکر کیون کارٹر نے اس تصویر کو مشہور امریکی اخبار New York Times کو فروخت کردیا، یہ تصویر پہلی بار 26مارچ ، 1993کو نیویارک ٹائمزمیں شائع ہوئی اور اس تصویر کا عنوان تھا: "Metaphor for Africa’s despair”

فوٹو گرافر کیون کارٹر کو اس تصویر کے لئے پلیزر پرائز ملا اور اس تصویر کے شائع ہوتے ہی دنیا بھر کے ہزاروں لاکھوں لوگوں نے کیون کارٹر سے اس سوڈانی بچی کے بارے میں ہزاروں سوال اُٹھائے! بعض نے تو اس پر یہ الزام بھی لگائے کہ اس نے اس وقت تصویر کھینچنا زیادہ مناسب سمجھا بہ نسبت اس رینگتی ہوئی بچی کو بچانے کے! وہ لوگ یہ نہیں جانتے تھے کہ اس وقت سوڈان میں متاثرہ بیماریاں پھیلی تھی اور صحافیوں اور فوٹوگرافروں کو زخمی اور دم توڑتے سوڈانی لوگوں سے دور رہنے کا حکم U .N. (یونائیٹڈ نیشن) کی طرف سے دیا گیا تھا … یہی وجہ تھی کہ کیون کارٹر اس بچی کو اٹھا نہ پائے!….
کیون کارٹر اس پلیزر پرائز کا لطف بالکل نہیں لے پائے چونکہ ان کو ہمیشہ اس سوڈانی بچی کی یاد آتی رہی، لوگوں کے سوالات انہیں پریشان کرتے رہے!…. ان کو یہ بات ستاتی رہی کہ انہوں نے اس بچی کو بچانے کی پوری کوشش نہیں کی اور نہ ہی یہ دیکھ پائے کہ وہ زندہ رہی یا مر گئی! لوگ بھوک سے مر رہے تھے، کھانے اور پینے کی چیزوں کیلئے ترس رہے تھے، اپنی اولاد کو اپنی آنکھوں کے سامنے مرتا ہوا دیکھ رہے تھے ، کچھ کر نہیں سکتے تھے، بے بس تھے۔ یہ اور اس جیسی بہت سی محرومیاں بار بار اس کی آنکھوں کے سامنے ناچتی رہیں اور پھر اسی احساس جرم میں وہ تنہائی پسند ہو گئے ۔ اس تصویر کے New York Times میں شائع ہونے کے تین ماہ بعد جب پوری دنیا میں اس تصویر پر تبصرے ہو رہے تھے ، اس عظیم فوٹوگرافر نے عین جوانی میں ہی خاموشی سے اپنی زندگی کا خاتمہ کر لیا …

If you can’t feed a hundred people, then feed just one. ~Mother Teresa

‘‘اگر آپ سو لوگوں کو نہیں کھلا سکتے تو ایک کو تو کھلائیں’’۔ [مدر ٹریسا]

(جاری ہے)

اس مضمون میں پاکستان میں ایسے کچھ اہم مقامات کے بارے میں معلومات فراہم کی گئی ہیں، جن کے گرد کسی نہ کسی حوالے سے دل دہلانے والی کہانیاں، انجانے خوف، پے درپے پیش آنے والے پراسرار حادثات اور انوکھے حالات اور واقعات کی چادر تنی ہوئی ہے۔

بعض افراد مافوق الفطرت مخلوق اور جنات پر بالکل یقین نہیں رکھتے  لیکن ان کا وجود ایک حقیقت ہے ۔جن، آسیب ، عفریت اور عجیب و غریب مخلوقات کے ماننے والے دنیا بھر میں موجود ہیں اور کوئی بھی تہذیب یا معاشرہ اس سے خالی نہیں۔  آپ نے دنیا بھر کے پراسرار مقامات کے بارے میں سن رکھا ہوگا۔  کیاآپ جانتے ہیں کہ پاکستان میں  بھی بعض مقامات اپنی پراسراریت اور واقعات کی وجہ سے خوف کی علامت بنے ہوئے ہیں۔

کچھ جگہوں کے بارے میں کہا جاتا ہے کہ یہاں پریاں رہتی ہیں تو کسی کے بارے میں بتایا جاتا ہے کہ یہاں روحیں راج کرتی ہیں،کچھ ایسی ہی جگہیں ہیں جہاں کئی افراد نے کچھ غیر معمولی ‘‘سائے ’’ یا سرگرمیوں کو دیکھنے کا دعویٰ کیا ہے ۔

یوں تو پاکستان میں ہزاروں ایسے مقامات ہوں گے جنہیں آسیب زدہ کہا جاتا ہے، جن کے متعلق خوفناک کہانیاں مشہور ہیں اور لوگ رات کے وقت ان مقامات پر جانے سے ڈرتے ہیں۔  لیکن ان سب میں سے 12 مشہور ترین پراسرار مقامات ایسے ہیں جن کے گرد کسی نہ کسی حوالے سے دل دہلانے والی کہانیاں، انجانے خوف، پے درپے پیش آنے والے پراسرار حادثات اور انوکھے حالات اور واقعات کی چادر تنی ہوئی ہے۔آئیے آپ کو ان مقامات کے متعلق آگاہ کرتے ہیں۔

Koh-e-Chiltan
کوہ چلتن

کوہ چلتن کوئٹہ (بلوچستان) کے قریب واقع اس پہاڑی سلسلہ چلتن میں واقع سب سے بلند چوٹی ہے،   جس کی اونچائی 3194 میٹر (10479 فیٹ ) ہے اور  زرغون اور کوہِ تختو کے بعد کوئٹہ کی تیسری بڑی چوٹی  اور بلوچستان کی پانچویں بڑی چوٹی میں شمار ہوتی ہے۔

چلتن دراصل فارسی  اور بلوچی زبان کا لفظ ‘‘چہل تن’’ ہے  جس کے معنی ہیں  ‘‘چالیس جسم’’۔

کوئٹہ کے قریب واقع اس پہاڑی کے بارے میں مشہور ہے کہ یہ  ایک پراسرار جگہ ہے ،  یہاں ان چالیس بچوں کی روحیں بھٹکتی ہیں جن کے والدین نے انہیں تنہا مرنے کے لئے  وہاں چھوڑ دیا تھا۔  مقامی افراد اس بارے میں ایک داستان سناتے ہیں۔

داستان کے مطابق صدیوں قبل ایک غریب بے اولاد جوڑا اولاد کے لیے کسی بزرگ کے پاس جارہا تھا۔  بزرگ کی دعا قبول ہوئی اور ان کے ہاں  ایک دو نہیں بلکہ 40 بچوں کی ولادت ہوئی۔ یہ غریب جوڑا اتنے سارے بچوں کی کفالت نہیں کر سکتا تھا چنانچہ انہوں نے ایک بچے کو اپنے پاس رکھ کر 39 بچے پہاڑ پر چھوڑ دیے۔ کچھ عرصہ بعد عورت یہ سوچ کر پہاڑ پر گئی کہ شاید ان بچوں کی موت واقع ہوچکی ہوگی لیکن وہ سب وہاں زندہ تھے۔ بیوی خوشی سے شوہر کو یہ بتانے کے لیے واپس آگئی اور ایک بچہ جو ان کے پاس تھا وہ بھی پہاڑ پر  ہی چھوڑ گئی۔ کچھ دیر بعد جب دونوں میاں بیوی پہاڑ پر پہنچے تو سارے بچے غائب ہوچکےتھے۔

یہ داستان سچی ہو یاجھوٹی …. لیکن مقامی افراد کا کہنا ہے کہ آج بھی انہی 40 بچوں کی روحوں کے چیخنے،  چلانے اور رونے کی آوازیں اکثر و بیشتر سنائیدیتی ہیں۔

Chaukhandi Tombs
چوکھنڈی کا قبرستان

چوکھنڈی قبرستان کراچی سے 29کلومیٹر مشرق میں کراچی کی نیشنل ہائی وے پر واقع ہے، چوکھنڈی  دیدہ زیب اور منفرد طرزِ تعمیر کی حامل قبروں کے باعث پوری دنیا میں مشہور ہے۔ ڈھائی کلومیٹر سے زیادہ رقبے پر پھیلے اس قبرستان میں مورخین کے مطابق بعض قبریں سولہویں صدی عیسوی کے بعض قبائل کے سرداروں کامدفن ہیں۔

600  سال قدیم متروکہ اس  قبرستان  کے بارے میں مشہور ہے کہ یہاں آسیب کا سایہ ہے اور روحیں اکثر یہاں بھٹکتی رہتی ہیں۔ اس لیے کوئی بھی شخص شام کے بعد اس قبرستان میں جانے کی جرأت نہیں کرتا۔قریب کی آبادیوں میں رہائش پذیر افراد کا کہنا ہے کہ شام ہوتے ہی یہاں پراسراریت کا راج ہوجاتا ہے اور یہاں سے غیر مانوس آوازیں اور ہیولے نظر آتے ہیں۔ جیسے ہی سورج غروب ہوتا ہے تو یہاں موجود بعض قبریں جلنے لگتی ہیں اوربہت زیادہ گرم ہوجاتی ہیں۔کچھ لوگوں کا کہنا ہے کہ انہیں اکثر رات کے وقت قبرستان سے لوگوں کے چیخنے چلانے کی آوازیں آتی ہیں ۔ اس کے علاوہ کہا جاتا ہے کہ اس  قبرستان میں کئی پراسرار واقعات رونما ہوچکے ہیں۔اس قبرستان میں رات کے وقت میں کسی کو بھی جانے کی اجازت نہیں ہے کیونکہ یہاں رات کے وقت میں جانا خطرے سے خالی نہیں ہے۔

Makli Graveyard
مکلی کا قبرستان

صوبہ سند ھ کے شہر ٹھٹھہ کے قریب واقع یہ قبرستان اپنے اندر کئی داستانیں چھپائے ہوئے ہے۔یہ دنیا کا سب سے بڑا قبرستان ہے جو تقریباً 8 کلومیٹر پھیلا ہوا ہے۔  یہاں بعض قبریں منزلوں میں بنائی گئی ہیں۔ تیرھویں صدی کے اس قبرستان میں ایک لاکھ سے زائد قبریں ہیں لیکن اب یہاں کسی کو دفن نہیں کیا جاتا۔ اس کو دیکھنے کے لئے ہر سال ہزاروں لوگ اس قبرستان میں آتے ہیں۔   اس قبرستان میں جنات اور پریوں سے متعلق کئی پراسرار باتیں منسوب ہیں۔

Sheikhupura Fort
شیخوپورہ قلعہ

لاہور کے قریبی شہر  شیخوپورہ کے جنوب میں واقع قلعہ شیخوپورہ مغل شہنشاہ جہانگیر کے دور میں تعمیر ہوا۔ بعد میں سکھ حکمراں اور برطانوی دور حکومت میں بھی     یہاں رہائش رہی۔  ایک وقت تھا کہ اس قلعے میں ملکہ اور شہزادیاں رہا کرتی تھیں۔ اب یہ قلعہ ٹوٹ پھوٹ کا شکار ہے اور نہایت ابتر حالت میں ہے ، لیکن کوئی اس کی تعمیرنو کرنے کو تیار نہیں اور اسے درست کروانے کی ہمت  بھی نہیں رکھتا۔ کیونکہ لوگوں کا خیال ہے کہ قلعے میں اب بھی ان ملکہ اور شہزادیوں کی روحیں آتی رہتی ہیں۔ مقامی افراد کے مطابق کئی صدیاں قبل اس قلعہ میں رہنے والی ملکہ کی روح اب بھی یہیں رہتی ہے اور وہ غیر متعلقہ افراد کی موجودگی سخت ناپسند کرتی ہے۔

Lake Saif-ul-Muluk
جھیل سیف الملوک

بالاکوٹ سے وادی کاغان اور ناران  جانے والی  شاہراہ پر سربفلک اور برف پوش پہاڑوں کے درمیان سطح سمندر سے  3224 میٹر( 10578 فٹ ) کی بلندی  پر ایک انتہائی خوبصورت جھیل واقع ہے جسے سیف الملوک کی جھیل کہتے ہیں۔   دنیا بھر سے سیاح اسے دیکھنے کے لئے آتے ہیں۔ اس جھیل سے متعلق ایک افسانوی داستان مشہور ہے۔  یہ قصہ ایک فارسی شہزادے اور ایک پری کی محبت کی داستان ہے۔ کہاجاتا ہے کہ صدیوں قبل ایک فارسی  شہزادہ سیف الملوک اور پریوں کی رانی بدیع الجمال ایک دوسرے کے عشق میں مبتلا ہوگئے لیکن کچھ لوگوں  کو یہ پیار ایک آنکھ نہ بھایا اور انہوں نے دونوں کو قتل کردیا اور تب سے اب تک ہررات کو پریاں اس جگہ آکر اپنی ساتھی کو یاد کرکے روتی ہیں۔ جھیل کے ارد گرد کا علاقہ مکمل غیر آباد ہے۔  آج بھی  لوگوں کا ماننا ہے کہ یہاں اکثر رات کو پریاں اُترتی ہیں ۔ بعض لوگ اس جھیل کو طلسماتی جھیل  بھی کہتے ہیں ،   کہا جاتا ہے  کہ کسی بادشاہ کی نابینا بیٹی نے اس جھیل میں غسل کیا تو اس کی بینائی لوٹ آئی۔

Shamshan ghaat, Hyderabad
شمشان گھاٹ، حیدرآباد

حیدرآباد میں واقع شمشان گھاٹ، جہاں ہندو اپنے انتقال کر جانے والے لوگوں کی چتائیں جلاتے ہیں، اس کے بارے میں دعویٰ کیا جاتا ہے کہ جن لوگوں کو یہاں جلایا جاتا رہا ہے ان میں سے بعض کی روحیں اب بھی یہیں بھٹکتی پھر رہی ہیں۔ یہ شمشان گھاٹ تقریباً اڑھائی سو سال پرانا ہے۔ شمشان گھاٹ کے گارڈ اور دیگر سٹاف کا کہنا ہے کہ غروب آفتاب کے بعد اکثر یہاں کئی بچے کھیلنے کے لیے آتے ہیں اور عجیب و غریب قسم کی آوازیں نکالتے ہیں۔ ان میں سے کسی کو بھی کبھی گیٹ سے آتے ہوئے نہیں دیکھا گیا، یہ بچے پتہ نہیں کون سی جگہ سے آتے ہیں اور کھیلنا شروع ہوجاتے ہیں اور  صبح سورج نکلنے سے قبل اپنا کھیل ختم کرنے کےبعد غائب ہوجاتے ہیں۔  رات بھر پراسرار آوازیں بھی سنائی دیتی ہیں…..بچے جہاں کھیلتے ہیں وہیں نمودار ہوتے ہیں اور پھر وہیں غائب ہو جاتے ہیں۔

Dalmia Road, Karachi
ڈالمیا روڈ ، کراچی

کارساز اور جوہر کو ملانے والی سڑک ڈالمیا روڈ  کراچی کی معروف ترین سڑکوں میں شمار ہوتی ہے۔ اس سڑک کے بارے میں قدیم وقتوں سے آج تک ایک کہانی بیان کی جاتی ہے کہ اکثر اس روڈ پر ایک پراسرار لڑکی کو دیکھا جاتا ہے جو دلہن بنی ہوئی ہوتی ہے اور اس نے سرخ لباس پہن رکھا ہوتا ہے۔

لوگوں کا کہناہے 60 کی دہائی میں یہ خاتون ایک ڈانسر تھی جسے قتل کر کے اس کی لاش کو اس سڑک پر چھوڑ دیا گیا۔  جو کہ یہاں سے گزرنے والوں کو مدد کیلئے رُکنے کو کہتی ہے اور اچانک غائب ہو جاتی ہے۔  بعض افراد کا دعویٰ ہے کہ آدھی رات کو سفر کرنے والے جب ڈالمیا روڈ پر پہنچتے ہیں تو کسی وجہ سے وہ رکنے پر مجبور ہوجاتے ہیں۔ رُکنے کے بعد انہیں ایک سجی سجائی سرخ لباس میں ملبوس دلہن نظر آتی ہے جو کسی اجنبی زبان میں ان سے گفتگو کرنے کی کوشش کرتی ہے۔ ڈرائیورز کا پہلا خیال یہی ہوتا ہے کہ کسی پریشان حال دلہن کو مدد کی ضرورت ہے لیکن دیکھتے ہی دیکھتے  اس کی شکل بدل جاتی ہے اور  وہ ایک خوفناک چڑیل کا روپ دھار لیتی ہے۔ کچھ افراد نے یہ بھی دعویٰ کیا کہ جب وہ رکے نہیں تو اس دلہن نے ان کا پیچھا کیا اور انہیں اس کی چیخیں بھی سنائی دیں۔ڈالمیا روڈ پر آدھی رات کو بھٹکنے والی اس ‘‘دلہن’’ نما ہیولے کی سی سی ٹی وی فوٹیج  بھی انٹر نیٹ پر دیکھی جاسکتی ہے ۔ اسے کارساز کی دلہن Bride of Karsazنام دیا جاتا ہے۔

Kalabagh Dam
کالاباغ ڈیم

آپ نے کالاباغ ڈیم کے بارے میں تو بہت کچھ پڑھ رکھا ہوگا،  جو بعض وجوہات کی بنا پر بن نہ سکا۔

لیکن کیاآپ کو معلوم ہے کہ طویل عرصے سے بند پڑے اس پروجیکٹ کی سائٹ پر بنے مکانات اب کھنڈر ات اور بھوت بنگلے میں تبدیل ہوگئے ہیں اور جس جگہ یہ ڈیم بننا تھا وہاں پراسرار بڑھیا  بھی راتوں کو پھرتی ہوئی پائی جاتی ہے۔

جن لوگوں نے اس بڑھیا   نما  چڑیل کو دیکھا ہے، ان کا کہنا ہے کہ یہ چھوٹے قد ،فربہ جسم ،لمبے بالوں والی بڑھیاراتوں کو وہاں چلتی ہوئی دیکھی جاتی ہے۔

Koh-e-Suleman
کوہ سلیمان

کوہِ سلیمان جنوب مشرقی افغانستان، جنوبی وزیرستان ،  صوبہ بلوچستان کے شمالی علاقوں ، اور صوبہ پنجاب کے جنوب مغربی علاقوں، پر مشتمل  ہندوکش پہاڑی سلسلہ  کی بلند ترین چوٹیہے۔

اس پہاڑ کے بارے میں کئی دلچسپ قصے اور کہانیاں ہیں ، جتنے قصے اور کہانیاں ہیں اُتنا ہی یہ پہاڑ پرُاسرار بھی ہے ، مقامی لوگ اسے “برقعہ پوش پہاڑ ” بھی کہتے ہیں ، برقعہ پوش اس لیے کیونکہ بعض اوقات یہ انتہائی قریب سے بھی دکھائی نہیں دیتا، البتہ بارش ہو جائے تو یہ میلوں دور سے نظر آتا ہے ،  اس پہاڑ پر ایک تخت بھی ہے  جسے مقامی لوگ “تختِسلیمان” کہتے ہیں۔ اس تخت کے بارے میں روایت ہے کہ  اس جگہ پر حضرت سلیمان   کا تخت  جو ہوا میں اُڑتا جا رہا تھا کچھ لمحوں کیلئے ٹھہر گیا، اس پہاڑ کی چوٹی کو بھی دیکھ کر ایسے لگتا ہے جیسے یہ خاص طور پر بیٹھنے کی جگہ ہو۔  اس  پہاڑ پر  جنات کی موجودگی کے واقعات  منسوب ہیں۔

Dhabeji
دھابیجی

کراچی سے 15 کلومیٹر دور سندھ کے قصبہ دھابیجی ٹاؤن میں ہارجینہ Harjeena  نامی ایک فشنگ پوائنٹ ہے،  جو آسیبی علاقے کے طور پر بھی جانا جاتا ہے۔ مقامی ماہی گیروں کے مطابق، اکیلے وہاں جانا یا سورج غروب ہونے کے بعد وہاں جانا خطرے سے خالی نہیں۔  کہ کہیں آپ رات کو وہاں مچھلی کے شکار کو جائیں اور کسی بے چین بدروح، بھوت پریت کا نشانہ نہ بن جائیں ۔

Shehr-e-Roghan
شہر روغن

ہمارے ملک میں متعدد ایسے مقامات موجود ہیں جن سے خود ہمارے ملک پاکستان کی عوام بھی مکمل طور پر واقف نہیں جبکہ یہ مقامات اپنے اندر کئی پراسرار راز سموئے ہیں۔ انہی مقامات میں سے ایک مقام گونڈرانی بھی ہے جسے شہرروغان کے نام سے جانا جاتا ہے۔ اس شہر کی خاصیت یہ ہے کہ یہاں موجود پہاڑوں میں سینکڑوں غاربنے ہوئے ہیں لیکن ان غاروں کی تعمیر کے حوالے سے تاریخ بالکل خاموش ہے۔ گونڈارنی صوبہ بلوچستان میں کراچی سے 175 کلومیٹر کے فاصلے پر ضلع لسبیلہ میں واقع ہے۔ یہ شہر قدیم قصبے بیلہ کے شمال میں 20 کلومیٹر کے فاصلے پر موجود ہے۔ مورخین کا خیال ہے کہ ان پہاڑوں میں موجود غار  بدھ مت کے پیروکاروں نے تعمیر کیے اور وہ یہاں رہائش پذیر تھے۔ ان غاروں میں چھوٹے چھوٹے کمرے بھی بنے ہوئے ہیں جو مختلف راستوں سے منسلک ہیں۔ برطانوی دور میں یہاں 1500 غار موجود تھے  لیکن مناسب دیکھ بھال نہ ہونے کی وجہ سے ان گنت غار منہدم ہو  چکے ہیں اور اب صرف 500 غار باقی ہیں۔   بلوچستان میں واقع اس شہر  روغن کے بارے میں مشہور ہے کہ یہاں جن یا بدروحیں موجود ہیں۔  یہ جن اس علاقے کی پہاڑیوں،غاروں اورندیوں پر رہتے ہیں ہیں اور یہاں آنے والے لوگوں پر حملہ کرتے رہتے ہیں۔

Hawks Bay Hut, Karachi
ہاکس بے ہٹ ، کراچی

کراچی کے ساحلی مقام  ہاکس بے پر واقع ایک مشہور ہٹ آسیب زدہ مشہور ہے اور اسے کوئی کرایہ پر نہیں لے سکتا۔ اگر کوئی بیوقوف یہ حماقت کرے تو وہ صبح ہونے سے قبل ہی چیختا ہوا ہٹ سے باہر آجاتا ہے۔

کہا جاتا ہے کہ پورے چاند کی رات میں اس ہٹ کے اندر جنات کی شادیاں انجام پاتی ہیں اور یہ جنات بن بلائے مہمانوں یعنی انسانوں سے بہت برا سلوک کرتے ہیں۔

Hundreds year old House in Gujrat
گجرات میں 100 برس قدیم مکان

پاکستان  کے شہر گجرات میں سرگودھا روڈ کے قریب ایک 100 سال پرانا مکان موجود ہے،  جس میں مبینہ طور پر بزرگ  انسان کی ایک دوستانہ روح رہتی ہے،   خستہ دیواروں، اردگرد خود رو پودوں سے ایک ڈراونا  نظر آنے والا یہ مکان برسوں سے خالی پڑا ہے، لیکن   بہت سے مقامی لوگوں نے اس مکان میں سفید کپڑوں  میں ملبوس ایک باریش بزرگ کو دیکھنے کا دعوی کیا ہے۔    اس نیک خصلت بزرگ نے کبھی کسی کو آزار نہیں  پہنچایا ، بعض مقامی بچوں  کا  کہنا ہے کہ ان بزرگ ان کے  ساتھ کھیلتے بھی ہیں،  ایک دو مرتبہ تو کرکٹ کھیلنے کے دوران بچوں گیند اگرا س مکان میں چلی گئی تو  بزرگ اسے واپس بھی لوٹاچکے ہیں۔

Peer Chattal Noorani Gandhawa
پیر چٹال نورانی گندھاوا

ضلع جھل مگسی پاکستان کے صوبہ بلوچستان کا ایک ضلع ہے۔ اس کے مشہور علاقوں میں جھل مگسی اور گنداواہ  (گندھاوا) شامل ہیں۔  بلوچستان کے علاقے جھل مگسی کے قریب ایک نخلستان آباد ہے اور اس کے پانی میں دوفٹ لمبی مچھلیاں پائی جاتی ہیں، کہا جاتا ہے کہ یہ مچھلیاں یہاں کے بزرگ پیر چٹال نورانی کی پالی ہوئی ہیں ، مقامی لوگ ان مچھلیوں کے شکار کا منع کرتے ہیں  اور اگر کوئی انہیں نقصان پہنچانے کی کوشش کرے تو یہ  مچھلیاں اسے  کاٹ کر زخمی کردیتی ہیں۔

Haunted House in Karachi
کراچی کے آسیبی مکانات

اگر آپ کبھی پی ای سی ایچ ایس PECHS کی گلیوں میں گھومتے رہے ہوں تو آپ نے دیکھا ہو گا کہ وہاں ایک خاص مکان سے پراسرار روشنی آ رہی ہوتی ہے۔ اس کا مطلب ہے کہ وہاں کوئی رہائش پذیر ہے، حالانکہ یہ مکان کئی عشروں سے بند پڑا ہے۔ کئی لوگوں کا کہنا ہے کہ انہوں نے اس مکان میں سفید لباس پہنے ہوئے ایک کمزور سی خاتون کو اکثر دیکھا ہے جو رات کے پچھلے پہر گلی میں چلتی نظر آتی ہے مگر صبح 3بجے کے قریب غائب ہو جاتی ہے۔

سولجر بازار، کراچی، میں بھی ایک متروکہ مکان آسیب کی وجہ سے بھوت بنگلہ مشہور ہے. کہا جاتا ہے  یہاں غیر معمولی سرگرمیوں کے مختلف واقعات ہوتے رہے ہیں۔  کبھی کبھی رات کو، ایک عجیب آدمی چھت پر آتا ہے اور مدد کے لئے چیختا ہے.

اسی طرح ناظم آباد میں بھی ایک مکان ہے، کہتے ہیں کہ 1992ء میں اس مکان میں ایک نوبیاہتے جوڑے کو وحشیانہ قتل کر دیا گیا، مقامی لوگوں کو ان کی چیخیں آج تک سنائی دیتی ہیں۔

Gorakh Hill Monster
گورکھ ہل کا عفریت

سندھ کے شہردادوکے شمال مغرب کوہ کیرتھر پرگورکھ ہل اسٹیشن واقع ہے، یہ صوبہ سندھ کا بلند ترین مقام ہے اور سطح سمندر سے5،688فٹ بلند ہے جوکہ آب و ہوا کے لحاظ سے پاکستان کے مشہور ترین ہل اسٹیشن مری کا ہم پلہ قراردیا جاتا ہے۔  کراچی سے گورکھ ہل اسٹیشن کا فاصلہ 400 کلومیٹرہے۔ یوں تو گورکھ ہل  میں میٹھے چشمے، آبشار اور قدرتی مناظر وافر نظر آتے ہیں  اور فطری خوبصورتی کے رسیا پہاڑوں کا حسن دیکھنے کے لیے اکثر وہاں جاتے ہیں۔     لیکن اس سیاحتی مقام سے کچھ پراسرار باتیں بھی منسوب ہیں۔

گورکھ ہل کے ویرانوں میں آتے جاتے لوگوں کو  ایسے انسانوں کی جھلک نظر آئی ہے جو بن مانس سے مشابہہ تھے،  یعنی قد کاٹھ تو انسانوں جیسا تھا مگر جسم بالوں سے ڈکھا ہوا تھا۔   نہ جانے کتنے برسوں سے یہاں انسان نما بن مانس دیکھنے کے واقعات  ہوتے آرہے ہیں۔  اس بھاری جسامت والے وجود  کا نام   مقامی لوگوں نے ‘‘مم’’ رکھا ہے۔   ایسی ہی مخلوق تبت کے پہاڑوں  میں یٹی Yeti  کے نام سے اور امریکی  جنگلات میں بگ فُٹ کے نام سے مشہور ہے۔

بعض  لوگوں کا کہنا ہے کہ  یہ مخلوق کوئی انسان نما بھیڑیے کی نسل سے ہیں۔ یہاں ایک داستان بھی مشہور ہے کہ صدیوں پہلے یہاں ایک سادھو گورکھ ناتھ مقیم تھے ان کا ایک ملازم  تھا جو دن میں انسان اور رات میں بھیڑیا بن جاتا تھا، کہتے ہیں کہ گورکھ ہل کانام گورکھ بھی اسی وجہ سے پڑا کیونکہ فارسی میں بھڑیے کو گرک کہتے ہیں۔

یہ تھے  پاکستان کے چند   مشہور مقامات جو بھوت پریت، جناب، پریوں اور بلاؤں کی وجہ سے مشہور  ہیں، بھوت پریت، پریوں اور بلاؤں کی کہانیاں ہم سب ہی سنتے آئے ہیں۔کچھ لوگ ان کہانیوں پر یقین رکھتے ہیں اور کچھ لوگ ایسی باتوں کو مذاق میں اُڑا دیتے ہیں۔ پاکستان سمیت دنیا کے کئی ممالک میں جنات اور گھروں میں جنات کے بسروں کے حوالے سے کئی کہانیاں موجود ہیں۔ کچھ لوگوں کا ماننا ہے کہ جنات اور ان کا گھروں میں بسیرامحض من گھڑت کہانیاں ہیں،لیکن بعض لوگ یہ کہتے ہیں کہ جنات حقیقت میں موجود ہوتے ہیں اور یہ گھروں میں بھی بسیراکرلیتے ہیں یا یہ پہلے سے ہی گھروں میں موجود ہوتے ہیں اور ہم ان کے مقامات میں قیام پذیر ہوجاتے ہیں۔  ان مقامات سے منسوب باتوں میں کتنی سچائی ہے اور کتنا فسانہ اس کے لیے مزید تحقیق کی ضرورت ہے۔