جون 2014ء

پاکستان رمضان المبارک کے بابرکت مہینے کی پر نور اور باسعادت شب یعنی لیلۃ القدر کو قائم ہوا۔ کیا آپ نے کبھی غور کیا ہے کہ پاکستان کو ملنے والی یہ سعادت محض اتفاق ہے؟ ….نہیں ہر گز نہیں! !
پاکستان کے قیام کے لئے اس مبارک ساعت کے انتخاب میں پاکستانی قوم کے لئے ایک لطیف روحانی اشارہ موجود ہے۔ لیلۃ القدر سلامتی اور برکت والی رات ہے اسے سال کی تمام راتوں پر فضلیت ہے ۔ اس رات کی نعمتوں اور برکتوں سے وہی لوگ فیضیاب ہوتے ہیں جو اس رات کو تلاش کرتے ہیں۔لیلۃ القدر کی بابرکت ساعتوں میں پاکستان کا قیام اس حقیقت کی طرف قدرت کا اشارہ ہے کہ جس طرح لیلۃ القدر کو سال کی تمام راتوں پر فضیلت حاصل ہے اسی طرح مملکتِ خداداد پاکستان کو دنیا بھر میں ایک نمایاں ترین مقام حاصل ہوسکتا ہے مگر یہ اُس صورت میں ممکن ہے جب پاکستانی قوم پوری دیانت داری ، اخلاص ، ملک و ملت کے لئے مکمل ایثار کے ساتھ انتھک محنت کرکے اس مقام کو پانے کی کوشش کرے۔ اﷲ تعالیٰ کی نعمتیں و نوازشات اس قوم کا مقدرکر دی گئی ہیں لیکن ان نعمتوں کو پانا اور انہیں اﷲ تعالیٰ کی خوشنودی کی خاطر پوری قوم کی بھلائی کے لئے استعمال کرنا خود پاکستانی قوم کی ذمہ داری ہے ۔
اس خطہ زمین کو اہلِ تکوین اور مشیئت ایزدی کے تابع اولیائے کرام کی روحانی مدد ملتی رہی ہے ۔ پاکستان کے ساتھ اولیائے کرام کی دعائیں اور روحانی بزرگوں کی خصوصی نظر شروع ہی سےہے ۔ ان بزرگوں نے پاکستان کی سلامتی اور مستقبل کے بارے میں واضح ارشادات فرمائے ہیں۔ آیئے اس روحانی فیضان کا ہم تحریکِ پاکستان سے جائزہ لیتے ہیں۔
پاکستان کا قیام کوئی اتفاقیہ امر نہیں ہے ۔ مطالعہ پاکستان کی کوئی بھی نصابی کتاب اٹھایئے ، مسلم معاشرے کی تشکیل کے حوالے سے ہمیں کتنے ہی صوفیائے کرام کے تذکرے اور کوششیں نظر آئیں گی۔ حضرت مجدد الف ثانیؒ نے ہندوستان میں احیائے اسلام کی بنیادیں استوار کیں، حضرت شاہ ولی اﷲؒ نے اسے اپنی مجتہدانہ کوششوں سے سینچا۔ اگلے دور میں حضرت شاہ عبد العزیز دہلویؒ نے مسلمانوں کی ذہنی پسماندگی کو دیکھتے ہوئے فرمایا ‘‘دینی تعلیم کے خاطر خواہ انتظام کے ساتھ مسلمان طلبہ جدید درس گاہوں میں تعلیم حاصل کرسکتے ہیں۔’’ حضرت حاجی امداد اﷲ مہاجرمکیؒ نے اپنے صوفیانہ افکار اور روحانی مساعی سے ان راہوں کی تعمیر نو کی ، اعلٰحضرت مولانا احمد رضا خاں بریلویؒ نے اپنی کتاب ‘‘الحجۃ الموتمنہ’’ میں دو قومی نظریئے کو درست ثابت کرتے ہوئے اس کی مکمل حمایت کی۔
اس مملکت کی تشکیل کا آغاز تو اس خطے میں داتا گنج بخش اور خواجہ معین الدین چشتی کی آمد سے شرع ہو گیا تھا۔ حضرت خواجہ معین الدین چشتی المعروف خواجہ غریب نوازؒ کے پیر و مرشد خواجہ عثمان ہارونیؒ کے ملفوظات اور شاہ ولی اللہ کی تحریروں میں، حضرت شاہ نعمت اﷲ ؒ کے اشعار کے علاوہ بیانیہ طور پر دیگر کئی روحانی بزرگوں کے الفاؓ میں ملتی ہیں۔
پروفیسر مسعود الحسن صاحب عالم و فاضل شخصیت تھے۔ وہ اپنی انگریزی کتاب ”حضرت داتا گنج بخش، روحانی سوانح عمری’’ ( Hazrat Data Ganj Bakhsh; a spiritual biographyمطبوعہ داتا گنج بخش اکادمی صفحہ 3)میں لکھتے ہیں کہ میں 1930ء میں لاہور آیا اور داتا گنج بخش مزار کے قریب رہائش اختیار کی۔ علامہ اقبال ان دنوں اکثر نماز فجر سے قبل داتا گنج بخش حاضری دیا کرتے تھے جہاں میری ان سے ملاقات رہتی تھی۔ میں نے علامہ صاحب کے ارشاد کے مطابق ان کے لئے انگریزی میں کچھ کام کیا اور ان کی تقاریر لکھنے میں بھی مدد کی جن میں خطبہ الٰہ آباد بھی شامل ہے۔ پروفیسر مسعود الحسن لکھتے ہیں کہ میرے پوچھنے پر علامہ اقبال نے بتایا کہ انہیں مسلمانوں کے لئے علیحدہ وطن کا خیال داتا گنج بخش مزار میں عبادت کے دوران سوجھا۔ لطف کی بات ہے کہ ایک انگریز مصنف ایولن رنچ نے اپنی کتاب۔ Immortal Yearمیں لکھا ہے کہ ”میں نے جناح سے پوچھا کہ تمہیں سب سے پہلے پاکستان کا خیال کب آیا اور یہ تصور تمہارے ذہن میں کب ابھرا؟۔ جناح کا سیدھا سا جواب تھا۔” 1930ء میں“۔ گویا علامہ اقبال اور قائداعظم دونوں کو پہلی بار پاکستان کا خیال 1930ء میں آیا۔
تحریکِ پاکستان میں کامیابیوں کے حوالے سے سلسلہ چشتیہ کے ایک ممتاز بزرگ حضرت سید محمد ذوقی شاہؒ نے ایک مرتبہ فرمایا تھا ‘‘آل انڈیا مسلم لیگ کو ملنے والی کامیابیاں محض محمد علی جناح کا کام نہیں بلکہ یہ دراصل اﷲ کی مرضی سے ہوا ہے ۔ جناح صاحب کو غیب سے مدد مل رہی ہے۔ قابلیت کا لحاظ رکھا جاتا ہے اور قابلیت کی وجہ سے جناح صاحب کو پسند کیا گیا ہے ۔ دراصل پاکستان مدینہ والے کے فیض سے بنا ہے یہ فیضانِ نبویؐ ہے ۔ ’’
تحریک پاکستان، قیامِ پاکستان اور اس کے بعد سے آج تک کے ادوار کا بہ نظر غائر جائزہ لیں تو روحانی بزرگوں کی دعاؤں،تاثیرِ روحانی اور تصرف کا بھر پور احساس ہوتا ہے ۔ روحانی بزرگوں کے تصرف اور پاکستان پر ان کی فیض رسانی کا حال بیان کرتے ہوئے ممتاز مفتی مرحوم نے تحریر کیاہے کہ:
‘‘بابے افراد نہیں بلکہ ایک سلسلہ ہیں جو جاری رہتا ہے ۔ بابوں کی ڈیوٹیاں متعین ہوتی ہیں ۔ یہ بابے اﷲ کے چاکر ہیں اس کا حکم بجالانے پر مامور ہیں۔ کوئی فیلڈ آفیسر ہے کوئی سیکریٹریٹ سے متعلق ہے ۔ کسی کو حکم ہے کہ خود کو ظاہر کرے ۔کسی کوحکم ہے کہ پردے میں رہ کر کام کرے۔ پاکستان کے سیاسی اور اقتصادی حالات میں باباؤں کا ہاتھ ہے ۔ یہ بھید داتا صاحب نے کھولا ہے ’’ ۔
داتا گنج بخشؒ کی کتاب ‘‘ کشف المحجوب ’’ کے حوالے پیش کرتے ہوئے وہ اپنی بات یوں آگے بڑھاتے ہیں’’ میں تو صرف یہ کہتا ہوں کہ پاکستان کے معاملات میں باباؤں کا ہاتھ ہے ۔ داتا صاحب نے تو برملا کہہ دیا کہ اﷲ نے اولیاء کو کائنات کا گورنر بنایا ہے ۔ ان کی برکتوں کی وجہ سے آسمان سے پانی برستا ہے ۔ زمین سے بوٹے اُگتے ہیں۔مسلمان کافروں سے لڑائیاں جیت جاتے ہیں۔
صرف داتا صاحب نے ہی نہیں ان کے علاوہ اور بہت سے بزرگوں اور عالموں نے باباؤں کی عظمت کا ذکر کیا ہے۔ مثلاً مولانا رومؒ ، فرید الدین عطارؒ، امیر خسروؒ اور علامہ اقبالؒ ۔
صرف ساٹھ ستر سال قبل کے حالات پر نظر ڈالئے تو بہت سے بزرگوں کے بیان کے مطابق برصغیر کے مسلمانوں کے لئے ایک آزاد خطے کے قیام میں سیدناحضور علیہ الصلوٰۃ والسلام کی رحمت و شفقت شامل تھی ۔ مثال کے طور پر ہم یہاں کچھ واقعات پیش کررہے ہیں ۔
کلیاتِ حسرت موہانی صفحہ 28 تا29 پر تحریر ہے کہ جولائی 1946ء میں مسلم لیگ کونسل کا ایک تاریخی اجلاس بمبئی میں منعقد ہونا تھا۔ اس میں شرکت کے لئے پیر سید علی محمد راشدی بھی ہوائی جہاز میں مولانا حسرت موہانی کے ساتھ روانہ ہوئے۔ اثنائے راہ میں مولانا نے پیر راشدی سے کہا ’’سنئے صاحب پاکستان تو مل جائے گا اب آئندہ کی فکر کرنی چاہئے ‘‘ پیر راشدی صاحب نے کہا کہ آپ کو کیسے یقین ہوگیا کہ پاکستان مل جائے گا فرمانے لگ میں نے حضرت محمد رسول اﷲ ﷺ کی زیار ت کی ہے آپؐ نے پاکستان کے قیام کی بشارت دی ہے ‘‘۔
پاکستان پر روحانی بزرگوں کی توجہ ابتداء ہی سے رہی ہے ۔ ۱۹۶۵ء میں پاک بھارت جنگ میں پاکستان نے دشمن ملک کو کاری ضرب لگاتے ہوئے اس کا حملہ پسپا کردیا ۔ اس موقع پر اللہ تعالیٰ نے پاکستان کی خصوصی حفاظت کی۔
ہم سمجھتے ہیں کہ سن 1965ء کی جنگ میں پاکستانی قوم میں نظر آنے والا عظیم الشان جذبہ اﷲ تعالیٰ کا احسان اور اﷲ کے نامزد کردہ تکوینی بندوں کی انسپائریشن کا نتیجہ تھا۔ دنیا کے کسی بھی ملک میں جنگ کے دوران یا بعد میں غذائی اجناس میں کمی واقع ہوجاتی ہے ، صنعتی اور زرعی کارخانے عارضی طور پر کام کرنا بند کردیتے ہیں۔ نتیجتاً اشیاء کی قیمتوں میں اضافہ ہوجاتاہے۔ معاشی طور پر چونکہ ملک کئی سال پیچھے چلا جاتا ہے اس لئے قیمتوں میں اضافہ لازمی امر ہے مگر سن ۶۵ء میں بالکل عجیب منظر دیکھنے میں آیا۔ ضروریاتِ زندگی کی چیزوں کی قیمتیں بجائے بڑھنے کے مزید کم ہوگئیں۔ عوام الناس میں عسکری جوش و جذبے کا یہ عالم تھا کہ لوگ لاٹھیاں اور کلہاڑیاں لے کر سرحدوں پر نکل گئے ۔
پاکستان کی تاریخ نے ایک اہم موڑ اُس وقت لیا جب مئی 1998ء میں پڑوسی ملک بھارت نے ایٹمی دھماکہ کیا ۔ اس دھماکے کے بعد چند ہفتے پاکستانی قوم کے لئے بڑے کھٹن اور صبر آزما تھے ۔ ملک کی معیشت مسلسل خسارے میں جارہی تھی ایسے میں جوابی ایٹمی دھماکہ معیشت کے لئے بھی کسی دھماکے سے کم نہیں تھا ۔ پاکستان کی سلامتی کوبھیانک خطرات لاحق تھے اور پڑوسی ملک جارحانہ عزائم کا اظہار کررہا تھا۔ بھارت کے ایٹمی دھماکے سے پہلے بین الاقوامی برادری میں پاکستان کی حیثیت سوتیلے بھائی کی سی محسوس ہورہی تھی مگر بھارت کے دھماکے کے بعد ان سب کا رویہ اچانک تبدیل ہوگیا اور بیرونی قوتوں نے پاکستانی معیشت کو مشروط طور پر سہارا دینے اور قرضے معاف کر دینے کی بھی پیش کش کی مگر ملکی سلامتی کو مدِنظر رکھتے ہوئے پاکستان نے ایک اہم اقدام کیا اور دنیاکی ساتویں ایٹمی قوت بن کر دنیا پر ابھرا ۔ سنجیدہ بین الاقوامی حلقوں نے تسلیم کیا کہ پاکستان نے یہ اقدام بحالتِ مجبوری اور اپنی سلامتی کو مدِّنظر رکھتے ہوئے کیا۔ کیا کبھی آپ نے غور فرمایا کہ یہ اقدام کس طرح پاکستان کو دنیا میں سربلند کرنے کا سبب بنا ۔ بھارت اگر دھماکہ نہ کرتا تو پاکستان کو کیا اپنی قوت کے اظہار کا یہ موقع ہاتھ آسکتا تھا؟ بھارت تو 1974ء میں ایٹمی دھماکہ کر چکاتھا اسے دوبارہ ایسا کرکے دنیا بھر میں شرمندگی اٹھانے کی بھلا کیا ضرورت تھی؟ بھارتی ایٹمی دھماکہ دراصل دنیا بھر میں پاکستان کو سربلند کرنے کا وسیلہ بن گیا۔کیا ہم یہ نہیں کہہ سکتے کہ اہل تکوین نے پڑوسی ملک کی قیادت کو انسپائر کیا ہو کہ دھماکہ کر دینا چاہئے اور اس طرح پاکستان کو دنیا میں اپنی حیثیت منوانے کا موقع فراہم کیا گیا۔ اُس وقت بعض لوگ اس خوف میں مبتلا تھے کہ کہ اس عمل سے پاکستان کی بیرونی امداد بند ہوجائے گی اور بیرونی امداد بند ہوجانے کے سبب ملک میں شدید معاشی ابتری پھیل جائے گی ، غذائی ضروریات اور دیگر اشیائے خورد نوش کی قیمتیں گراں ہوجائیں گی لیکن آج غور کیجئے کسی بھی بازار میں آپ نے سبزیوں ، پھلوں یا دوسری ضروریاتِ زندگی کے فقدان کا مشاہدہ کیا ہے ؟ گندم کے جس بحران کی بات کی جاتی ہے وہ بھی محض چند عناصر کا پھیلایا ہوا پروپیگنڈہ ہے ۔ ملک کے ہر شہر و دیہات کے گھروں میں آج بھی آٹا موجود ہے ۔ سبزیوں اور پھلوں سے بازار آج بھی لبریز ہیں، کھلیانوں میں ہریالی قابلِ دید ہے ۔ پاکستان کے ایٹمی دھماکہ سے قبل کئی عقلی جائزے اور دانشورانہ تجزیئے اسی بات پر زور دے رہے تھے کہ ایٹمی دھماکے کے بعد ملک کی معاشی حالت اگر بالکل تباہ نہ ہوئی تو کم از کم ناقابلِ بیان حد تک بگڑ جائے گی۔ مگر دیکھ لیجئے آج صورتحال ان جائزوں سے قطعی مختلف ہے ! پاکستان ایٹمی طاقت بھی بن گیا اور اس کی معیشت مشکل صورتحال سے باہر بھی نکل آئی ہے ۔
اہلِ روحانیت کی صحبتوں سے فیض حاصل کرنے والوں کا یقین ہے کہ یہ سب کچھ اس وجہ سے ممکن ہوسکا ہے کیونکہ اللہ کا فضل وکرم پاکستان کے ساتھ ہے اور اللہ کے حکم پر روحانی ہستیوں کی خصوصی نظر اہلِ پاکستان پر ہے ۔ پاکستان پر مشکل وقتوں میں غیبی مدد کی کئی مثالوں سے انتہائی محدود عقل رکھنے والا شخص بھی یہ سمجھ سکتا ہے کہ اس ملک کو اﷲ والوں کی دعائیں سنبھالے ہوئے ہیں ۔ اﷲ کے فرستادہ بندوں کی دعائیں اور عملی مدد اہل پاکستان کے ساتھ ہے ۔
اﷲتعالیٰ کی تمام نعمتیں اس ملک میں موجود ہیں اور اﷲ کی رحمت اہل پاکستان پر بارش کی طرح برسنے کے لیے تیار ہے اگر کمی ہے تو ہمارے اپنے اندر ہے ۔ ملک کی تعمیر و ترقی کے لیے ہماری کوششیں کم ہیں۔ ہماری صلاحیتیں پوری طرح استعمال نہیں ہوسکی ہیں۔ یقین جانئے اﷲ تعالیٰ نے ہمیں زبردست وسائل عطا کئے ہیں۔ اب یہ ہمارا اپنا کام ہے کہ اﷲ تعالیٰ کے اس احسان کا شکریہ ادا کرتے ہوئے اپنی ذمہ داریاں پوری کریں ۔
کسی بھی قوم کی ترقی کے لئے علمی ترقی بنیادی حیثیت رکھتی ہے ۔ علم کے بغیر کوئی قوم ترقی نہیں کرسکتی ۔ اللہ کے نظام میں کام کرنے والے خصوصی بندے نہ صرف یہ کہ قوم کو اس ضرورت کا احساس دلانے میں ہمہ تن مصروف ہیں بلکہ علوم کے مختلف شعبوں کے لحاظ سے قوم کے لئے مستقبل کی ضروریات بھی ان کے پیشِ نظر ہیں ۔ روحانی بصیرت کے حامل افراد کی گفتگو سے اس قسم کے اشارے ملتے ہیں کہ پاکستانی قوم کے نوجوانوں کو قدرت کی طرف سے الیکٹرونکس، کمپیوٹر، کیمسٹری، ارضیات ، معاشیات اور طب کے شعبوں میں آگے بڑھنے کے لیے خصوصی استعداد اور فطری رجحان ودیعت کیا گیا ہے ۔ پاکستانی قوم اپنے اس ذہنی اثاثہ سے بحسن وخوبی استفادہ کرے تو تھوڑی مدت میں کئی عظیم الشان کامیابیاں اسے حاصل ہوجائیں گی۔ ناقدری کی صورت میں اس بیش بہا دولت کا بڑا حصہ غیر قوموں کی طرف منتقل ہوسکتا ہے ۔
ہمارے پاس دنیا کے بہترین جفاکش ، اعلیٰ دماغ انجینئر، بہترین ٹیلنٹ ، زرخیز زمین اور ہر قسم کے موسم بھی موجود ہیں۔ ضرورت اس بات کی ہے کہ ہم اپنی قائدانہ صلاحیتوں کو بہتر بنائیں ، ایمانداری اور حّب وطن کے جذبوں سے معمور ہوکر اپنے ملک میں موجود وسائل کو استعمال کریں۔
اﷲ تعالیٰ کی نوازشیں اور کرم نوازیاں پاکستان کے ساتھ ہیں اور پاکستان کی ترقی کے امکانات بہت زیادہ ہیں ۔ ارکانِ تکوین اس سلسلہ میں مدد کے لیے کمر بستہ ہیں مگر یہ صرف اسی صورت میں ممکن ہے جب ہم اپنے اندرتبدیلی پیدا کریں ۔ ذہنی جمود اور فکری پسماندگی کے جو بادل گذشتہ دو تین دہائیوں سے ہم پر سایہ فگن ہیں ان کو علم کی بادِ نسیم سے اپنی پاک سر زمین سے دور دھکیل دیں ۔ دینی ، روحانی، سائنسی ، ٹیکنیکی اور دوسرے شعبوں میں اپنی صلاحیتوں کو بھر پور طور پر استعمال کرنے کا عہد کریں تو روحانی نظا م ہماری مدد کے لیے تیار ہے ۔ اﷲ نے ہمیں اتنے وسائل سے نوازا ہے کہ ان کے صحیح استعمال سے ہم صرف چند سالوں میں دنیا کی بہترین اور ترقی یافتہ قوم بن کر اُبھر سکتے ہیں۔
قدرت کے انعامات آپ کے لئے لکھ دیئے گئے ہیں تاہم ان کے حصول کے لئے چند لازمی شرائط کا پورا کرنا آپ کے لئے ضروری ہے ۔ تاہم یہاں ایک بات یاد رکھنی ضروری ہے ۔ قدرت مخصوص مقاصد کی تکمیل کے لئے افراد یا قوموں کا انتخاب کرتی ہے اگر یہ افراد یا قومیں اس انتخاب پر شکرگزار بنیں اور مقاصد کی تکمیل کریں تو انہیں اللہ کی رضا اور خوشنودی حاصل ہوتی ہے لیکن جو افراد یا قومیں انتخاب کی قدر نہیں کرتیں تو اللہ تعالیٰ ان سے بےنیاز ہے اور اللہ تعالیٰ نافرمان اور ناشکرگزار افراد اور قوموں کو دوست نہیں رکھتا ۔

 

 

[box type=”info” align=”” class=”” width=””] کچھ نہیں بلکہ بہت سارے لوگ یہ سوچ رکھتے ہیں ۔مرد ہونا طاقت اور اکرام کا سبب ہے۔عورت کا وجود کمزوری اورشرمندگی کی علامت ہے۔
ایسا سوچنے والے صرف مرد ہی نہیں ہیں کئی عورتیں بھی اس بات پر یقین رکھتی ہیں۔
بیٹے کی ماں بن کر بعض عورتیں خود کو محفوظ اورمعزز خیال کرتی ہیں، بیٹی کی ماں بن کر خود کوکمزور محسوس کرتی ہیں۔ مردانہ تسلط والے معاشر ے میں کئی مصیبتوں ،دکھوں اورظلمتوں کے درمیان ابھرنے والی ایک کہانی….مرد کی انا اورعونت، عورت کی محرومیاں اوردکھ،پست سوچ کی وجہ سے پھیلنے والے اندھیرے، کمزوروں کا عزم ،علم کی روشنی ،معرفت کے اجالے، اس کہانی کے چند اجزائے ترکیبی ہیں۔
نئی قلم کار آفرین ارجمند نے اپنے معاشرے کا مشاہدہ کرتے ہوئے کئی اہم نکات کو نوٹ کیا ہے۔ آفرین ارجمند کے قلم سے ان کے مشاہدات کس انداز سے بیان ہوئے ہیں اس کا فیصلہ قارئین خود کریں گے۔
[/box]

دوسر ی قسط :

گھر میں پھیلی سوگواری نے سکینہ کے قدم دروازے پر ہی روک دئیے تھے۔پسینے سے شرابور پھولی ہوئی سانسوں پر قابو پاتے ہوئے اس نے ادھ کھلے دروازے کے اوٹ سے اندر جھانک کر دیکھا۔برآمدہ میں دھوپ پھیلی ہوئی تھی۔بانو کے کمرے میں سے چند عورتوں کے ہلتے ہوئے سر نظر آرہے تھے۔ اتنی عورتوں کی موجودگی میں اس قدر خاموشی ….اس نے دھوپ کی تپش سے بچنے کے لیے کمرے کی جانب تیزتیز قدم بڑھادئیے ۔گاؤں کی چند عورتیں آپس میں سر جوڑے دبی آواز میں چہ مگو ئیاں کر رہیں تھیں ۔کچھ گرمی کا رونا رورہی تھیں تو کچھ بیٹی کے پیدا ہونے پر اپنے ساتھ شوہر اور سسرال کے ناروا سلوک کے قصے سنارہی تھیں۔

کونے سے لگی چارپائی پر بانو نیم بے ہوشی کی حالت میں آنکھیں موندے پڑی تھی۔اس کے ہلدی رنگ چہرے سے نڈھالیت اور پژمردگی ٹپک رہی تھی۔ چھوٹے سے جھولے میں نوزائیدہ بچی کپڑے میں اچھی طرح لپٹی گٹھڑی سی بنی پڑی تھی۔ بانو کی ماں اسٹیل کا گلاس ہاتھ میں پکڑے اس میں تیز تیز چمچہ چلا رہی تھی اور ساتھ ساتھ بانو کو آوازیں بھی دے رہی تھی۔

چل پتر اٹھ ہلدی دودھ پی لے۔

نوزائیدہ بچی کو دیکھ کر سکینہ کے چہرے پر جان دار مسکراہٹ پھیل گئی ۔
خالہ نواسی مبارک ہو، واہ کتنی سوہنی ہے ۔یہ جانتے ہوئے بھی کہ گاؤں میں بیٹی کی پیدائش پر نہ تو مبار ک باد دی جاتی ہے اور نہ ہی مٹھائی کھلائی جاتی ہے۔ سکینہ نے بانو اور اس کی ماں کو مبارک باد دے ڈالی اور آنکھ سے کاجل چھنگلی سے چھوکر بچی کے گال پر تل کی طرح لگادی۔
ہاں ہاں ٹھیک ہے…. بس اللہ نصیب اچھے کرے۔ بانو کی ماں نے جواب میں جبری مسکراہٹ کے ساتھ سر ہلادیا اور پھر بانو کی طرف متوجہ ہوگئی اسے ہلکے ہلکے ہلاتے ہوئے ہوش میں لانے لگی۔ اٹھ پتر اٹھ۔
سکینہ نے نصیبو کی طرف دیکھا۔ اس کے چہرہ پر بھی پھیکی سی مسکراہٹ تھی۔
ہائے ربا یہ کیا ہو گیا ….؟ اماں کس کی نظر لگ گئی، میرے گھر کو ….؟ بانوہو ش میں آتے ہی ماں سے لپٹ کر دھاڑیں مار مار کر رو نے لگی۔
دیکھ لینا۔ وہ مجھے چھوڑ دے گا ، بانو کا زردی مائل چہرہ کسی انجانے خوف سے اب سفید ہو گیا۔
نہ پتر نہ…. ایسی گل سوچی وی نہ۔بانو کی ماں اسے تسلیاں دینے لگی۔ لے شاباش یہ ہلدی دودھ پی ۔ انھوں نے زبردستی گلاس بانوکے منہ سے لگا دیا۔
ارے اماں!میں نے تو باجی سے پہلے ہی کہا تھا کہ تیری جیٹھانی جاتی ہے تعویز کرانے۔ وہ، وہاں…. ڈیرے پہ۔ نصیبو نے گردن اور آنکھیں ایک سمت میں گھما کر کہا۔ ضرور یہ سب اسی کا کیا دھرا ہے۔
ہاں خالہ….! نصیبو ٹھیک ہی کہہ ری ہے۔ارے میرے ساتھ بھی تو یہی ہوا تھا۔دوسری بار میں میری نند نے ایسا سفلی کرایا میری کوکھ پر…. کہ چھڑوا کر ہی دم لیااورکرم دین…. اس کا تو مزاج بھی بہت گرم ہے کرتا پہلے ہے سوچتا بعد میں ہے۔ زرینہ، بانو کو ڈرانے والے انداز میں بولی۔
بک بک مت کر ۔چپ کرکے بیٹھ۔بانو کی ماں نے زرینہ کو ڈانٹا۔
لَے میرے چپ کرانے سے کیا ہوتا ہے۔میں تو کہتی ہوں اس کے ابّے کو بلالے ۔کرم دین اپنے گھر میں برادری کے چار مرد دیکھے گا تو ذرا تھم کر بولے گا۔زرینہ اپنا پورا حساب برابر کرنے پر تلی ہوئی تھی۔آخر چند دن پہلے تک اس کو بھی تو خوب سنائی تھیں بانو اور نصیبو نے۔ بانو کی سسکیاں تیز ہوگئیں۔
ہاں زرینہ ….!کہہ تو تُو ٹھیک رہی ہے۔کالے ناگ کا ڈسا اِک واری پانی مانگ لے پر اس کالے عامل کا سفلی تو جان کے ساتھ جائے۔تیری نند ہے بڑی میِسنی۔ گاؤں کی ایک عورت نے زرینہ کی باتوں پر اپنی تصدیق کی مہر لگائی۔
شاید عورتوں کے شور سے نومولود بچی کی نیند خراب ہوئی اور وہ رونے لگی۔اس کی ننھی آواز نے سب کی توجہ اپنی طرف کھینچ لی۔ لیکن بانوکے چہرے پر شدید بیزاری کے آثار نمایاں تھے۔ بانو کی ماں بچی کو گود میں لے کر بہلانے لگی ۔
اماں ….!لے جا اسے یہاں سے۔ اس وقت تو زہر لگ ری ہے اس کی آواز….بانو ہذیانی انداز میں چیخی ۔
نہ بانو….! بیٹیاں تو پرایا دھن ہو تی ہیں۔ یہ تو مہمان ہے۔ رب کی رحمت ہے۔اسے ایسے مت کوس۔میں تو کہتی ہوں کہ اپنی یہ سونے کی چوڑیاں بھی سنبھال کر رکھ دے۔ کل کو جہیز میں کام آئیں گی۔زرینہ نے پھر اپنا حساب برابر کرنا چاہا۔
اس کی بات سن کر عورتوں کے چہرے پر ہلکی سی تمسخرانہ مسکراہٹ پھیل گئی۔
اری تُو تو چپ کر…. بانو کی ماں زرینہ کی مسلسل نمک پاشی سے چڑ گئی۔وہ غصے میں زرینہ کی طرف دیکھتے ہوئے بچی کو تیز تیزتھپکنے لگی۔ایسے میں آٹھ سالہ ببلو دوڑتا ہوا اندر گھس آیا۔
ہائے ہائے۔ یہ کیا کیا….؟ ساری چادر خراب کردی۔ نصیبو چیخی۔ لڑکے کے ننگے پیر چادر پر کئی نقش ونگار بنا چکے تھے۔

[box type=”shadow” align=”” class=”” width=””]

بہن کی پیدائش پر ڈھول تاشے نہیں بجتے۔ مٹھائیاں تقسیم نہیں ہوتیں۔  [/box]

ماسی مجھے لڈو کھانا ہے۔بانو کا بیٹا فضل دین جسے سب پیار سے ببلو کہتے تھے اپنی خالہ نصیبو کےدوپٹے کا کونہ پکڑ کر کھینچنے لگا۔
جھلّا ہوگیا ہے کیا….؟ لڈو یہاں کہاں۔
پر آپ تو کہہ رہی تھی کہ ننھا بھائی آئے گا تو لڈو کھائیں گے۔ ڈھول بجائیں گے۔اس نے منہ بسورا۔
ہاں ، اس نے ٹھنڈی آہ بھری ۔پر ننھابھائی آتا تب نہ ۔یہ تو تیری بہن ہے بہن۔
تو کیا اب ہم لڈو نہیں کھائیں گے ؟وہ پھر بسورا۔
نہیں کاکا نہیں،بہن تو بڑی ذمہ داری ہوتی ہے۔ بہن کی پیدائش پر ڈھول تاشے نہیں بجتے۔ مٹھائیاں تقسیم نہیں ہوتیں۔ کرم دین کی پھوپھی نے ببلو کو گود میں بٹھا لیا۔
گڑ بھی نہیں…؟ ببلو بولا۔پھوپھی نے گردن نہ میں ہلادی۔بچہ منہ پھلا کے بیٹھ گیا ۔ بہن اچھی نہیں ہوتی ۔مجھے لڈو کھانا ہے ۔
نہیں بیٹا نہیں ایسے نہیں کہتے ۔یہ تیری بہن ہے نازک کمزور جان …. تُو بڑا بھائی ہے۔ تو تیرا یہ کام ہوگا کہ اس کی حفاظت کرے…. اسے ڈولی بٹھائے۔ باپ کا سہارا بنے۔ کرم دین کی پھوپھی ببلو کی آڑ میں بانو اور اس کی ماں کو باتیں سناتی رہی۔
اتنا چھوٹا بچہ ہے ۔اسے کیا سمجھ آرہا ہوگا۔کیوں چھوٹے بچے کو پریشان کرتی ہو پھوپھی۔ پھر نصیبو بچے کی طرف متوجہ ہوتے ہوئے بولی چل اٹھ یہاں سے۔ نصیبو نے ببلو کو بازو سے پکڑ کر اٹھا لیااور باہر نکل گئی۔

 

[box type=”shadow” align=”” class=”” width=””]

سکینہ محوحیرت یہ سارا منظر دیکھ رہی تھی۔  [/box]

بانو نے پھر رونا شروع کردیا۔ہائے ربا میں کیا کروں ۔ یہ کیا ہوگیا…. سکینہ محوحیرت یہ سارا منظر دیکھ رہی تھی۔ ان لوگوں کی باتوں سے ہونے والی گھٹن ناقابلِ برداشت ہوگئی تو وہ اُٹھ کر کمرے سے باہر برآمدے میں آگئی۔ وہ انہیں کیسے سمجھاتی کہ بیٹا ہو یا بیٹی اللہ کی دین ہے۔ جو بے اولاد ہیں وہ یہ درد سمجھتے ہیں۔اس کی آنکھوں میں ستارے جھلملا نے لگے۔
سکینہ گاؤں کے ا کلوتے ماسٹر غلام رسول کی بیٹی اور گاؤں کی پہلی پرائمری پاس عورت تھی ۔ماسٹر غلام رسول نے اسے ماں اور باپ دونوں کا پیار دیا تھا۔گاؤں میں پانچویں تک کا پر ا ئمری اسکول تھا جس میں سوائے چند ایک لڑکوں کے اور کوئی نہ آتا ۔جو آتے ان کا دھیان بھی پڑھائی پر کم اور غل غپاڑہ کرنے پر زیادہ ہوتا۔ایسے میں ماسٹر غلام رسول سکینہ کو لے کر بیٹھ جاتے اور اسے کبھی الف ب پ تو کبھی اے بی سی ڈی پڑھاتے ۔انھوں نے کوشش کرکے بیٹی کو پرائمری کا امتحان بھی دلوادیا جس میں وہ اچھے نمبروں سے پاس ہوئی۔وہ چاہتے تھے کہ سکینہ کم سے کم میٹرک کرلے۔
ماسٹر غلام رسول کے ان ارادوں کی خبر گاؤں کے لوگوں کو ہوئی تو مخالفتوں کا ایک طوفان ہی آگیا۔ لگ رہا تھا کہ گاؤں کا ہر فرد اس کام کے خلاف ہے۔
ماسٹر اپنی لڑکی کو پڑھا کر گاؤں کا ماحول خراب کرنا چاہتا ہے۔ وہ کہتا ہے کہ میں صرف اپنی بیٹی کو ہی تو پڑھا رہا ہوں۔ یہ کیا بات ہوئی جی….؟
آج ایک لڑکی پڑھے گی تو کل دس پرسوں بیس لڑکیاں پڑھ رہی ہوں گی۔ پھر یہ لڑکیاں گھر داری کے بجائے فضولیات میں پڑ جائیں گی۔ مردوں پر رعب جمائیں گی۔
بالکل ٹھیک کہا جی، چاچا برکت نے….لڑکیوں کو پڑھانے سے گاؤں کا پورا ماحول خراب ہوگا….
ہاں جی…. لڑکیوں کو بھلا پانچ پانچ دس دس سال اسکول جانے کی کیا ضرورت ہے۔ اسکول والے انہیں کیا سکھائیں گے۔ لڑکیوں کو گھر داری کی ضرورت ہوتی ہے اور یہ گھر داری کی تعلیم انہیں اپنے گھر میں عورتوں سے مل جاتی ہے۔
سکینہ کو پانچویں سے آگے پڑھانے کی مخالفت صرف مردوں کی طرف سے نہیں ہورہی تھی بلکہ گاؤں کی عورتیں بھی اس مخالفت میں پیش پیش تھیں۔ سردارں بی بی اس مخالفت میں سب سے آگے تھی۔
نا جی نا …. لڑکیاں گاؤں چھوڑ کر دوسرے شہر جائیں گی پڑھنے کے لیے۔ وہاں انہیں دیکھنے والا کون ہوگا۔ نا جی نا…. توبہ توبہ ۔ اور پھر وہ وہاں جاکر کیا پڑھیں گی کیا سیکھیں گی….؟ اسکول جاکر لڑکیاں اپنے ماں باپ کے سامنے زبان چلانا سیکھیں گی۔ نئے نئے فیشن اور فلمی گانے سیکھیں گی۔
گاؤں کے مردوں کے ساتھ عورتوں کا بھی خیال تھا کہ اس طرح ما سٹر غلام رسول گاؤں میں انتشار پھیلانے کے مرتکب ہو ر ہے ہیں۔ اس غلطی پر انتہائی قدم کے طورپر ان کو گاؤں بدر بھی کیا جاسکتا ہے۔
ماسٹر غلام رسول کا یہ آبائی گاؤں تھا …. ان کے باپ دادا کی آخری آرام گاہیں یہاں تھیں ۔گاؤں کو چھوڑ کر جانے کے خیال سے ہی ایک جھر جھری سی ان کے بدن میں دوڑ جاتی ۔ گاؤں والوں کے دباؤ میں آکر انھوں نے یہی بہتر سمجھا کہ پانچویں کے بعد سکینہ کی پڑھائی روک کر جلد از جلد اس کی شادی کردی جائے۔
تقریباً پندرہ سال کی عمر میں سکینہ کی شادی کردی گئی۔ سکینہ کا شوہر شفیق ایک نرم دل انسان تھا…. پیشے سے کمہار تھا۔ سارا دن مٹی کے برتن بناتے بناتے خاکساری بھی اس کے مزاج کا حصہ بن گئی تھی۔
سکینہ اور شفیق کی شادی کو دس سا ل ہو چکے تھے مگر وہ اولاد کی نعمت سے محروم تھے۔ اس بے اولادی پر سسرال یا دنیا والوں کی طرف سے آنے والے طنز کے نشتر سکینہ سے پہلے شفیق کو چھبتے۔ وہ سکینہ کے لئے آہنی حصار تھا۔اس سب کے باوجود بے اولادی کا غم اپنی جگہ تھا۔ سکینہ اس درد سے خوب آشنا تھی۔ شاید یہی وجہ تھی کہ اس کے لیے بیٹا یا بیٹی میں کوئی فرق نہ تھا۔ لڑکی کی پیدائش پر گاؤں والوں بالخصوص عورتوں کے منفی روئیے پر وہ تلملا کر رہ جاتی۔ تھوڑی بہت تعلیم اور باپ کی تربیت نے اسے اتنا شعور تو دے ہی دیا تھا کہ وہ صحیح غلط کا فرق سمجھ سکے مگر وہ گاؤں والوں کی اکثریت کے خلاف جانے کی ہمت نہ کر سکی تھی ۔ویسے بھی نقارخانے میں طوطی کی آواز بھلا کون سنتا ۔

٭٭٭

شام ڈھل رہی تھی۔ گھونسلے سویرے سے رزق کی تلاش میں نکلے تھکے ماندے پرندوں سے دوبارہ آباد ہونے لگے تھے۔ مگر کرم دین منہ لپیٹے بھوکا پیاسا ایسے پڑا تھا جیسے کوئی ہارا ہوا آدمی۔اس میں خود اپنا سامنا کرنے کی ہمت بھی نہ تھی۔اسے جب جب لوگوں کا خیال آتا،اس کی آنکھوں کے سامنے ڈھلکی مونچھوں، لٹکتے کِلّے کے ساتھ اپنی ہی شکل گھوم جاتی۔کانوں میں مختلف آوازیں شور مچانے لگتیں۔
لو جی بھائی کرم دین ….! سونے کی پوری چھ چوڑیاں تیار پڑی ہیں۔یہ ہوئے پورے وی ہزار روپلی۔
تو کبھی پنچائیت کے چودھری سراج کے برابر والی خالی کرسی گھوم جاتی جس پر بیٹھنے سے پہلے ہی کوئی اسے ہاتھ پکڑ کر کھینچ لیتا ۔
کرم دین ہڑبڑا کر آنکھیں کھول دیتا۔
کرمو ۔او۔ کرمو۔ اٹھ شام سر پر ہے ، گاؤں میں تیری ڈھونڈ مچی ہے اور تو یہاں پڑا آرام کررہا ہے۔
شام ڈھلے تک جب کرم دین گھر نہ آیا تو گھر والوں نے شفیق کو اسے لانے بھیجا۔ وہ جانتے تھے شفیق وہ واحد بندہ ہے جس کی بات کرم دین نہیں ٹالتا….اور اب شفیق اس کے سر پر کھڑا تھا۔
برادری میں رتبہ ملنے کا موقع لڑکی پیدا ہونے کی وجہ سے چھن جانے پر کرم دین زمین پر بے سدھ لیٹا اپنی قسمت کو کوس رہا تھا۔
شفیق کی آواز نے اس کو چونکا دیا۔ چل اٹھ ، کچھ گھر کی خبر بھی لے، شفیق نے کرمو کو ہلاِ ہی ڈالا، پر کرمو پر کوئی اثر نہ ہوا جیسے اس نے کچھ سنا ہی نہیں۔
ابے اٹھتا ہے یا ….شفیق نے زرا تیز لہجے میں کہا ،
کیا مصیبت ہے ، نہیں اٹھتا جا …. نہیں دیکھنی مجھے اس کی شکل….کرمو نے منہ بناتے ہوئے کہا
ارے….تو نہ دیکھنا اُسے ….پر گھر تو چل ۔شفیق اسے بچوں کی طرح پچکار نے لگا اور یہ تیری ٹانگ پر کیا ہوا۔شفیق اس کی ٹانگ پر لپی مٹی دیکھ کر بولا جس پر کہیں کہیں خراشوں سے نکلنے والے خون کے دھبے بھی مل گئے تھے ۔
نحوست کا اثر ہے۔کرمو بے بسی سے بولا۔
فضول باتیں نہ کر، تو اپنی بیٹی کے لیے اس طرح سوچ رہا ہے۔ شکر کرکوئی عیب نہیں ہے اس میں۔ نہ بدصورت ہے نہ لولی لنگڑی ،خوامخواہ کوس رہا ہے۔ اسے ایک بار دیکھے گا تو سارا غصہ بھول جائے گا۔
اف….تُو گیان دینا بند کرے گا یا نہیں۔کرمو کا چہرہ غصے سے لال ہوگیا۔
کر دوں گا اگر تُو ابھی کے ابھی میرے ساتھ چلے تو۔شفیق بھی کہاں پیچھے ہٹنے والا تھا۔
کرم دین لیٹے سے اٹھ کر بیٹھ گیا اور گھمبیرتا سے بولا۔ہاں بول….
مگر کچھ کہنے سے پہلے کرم دین کا چہرہ پھر تن گیا۔آنکھیں سرخ ہونے لگیں۔زرا دیر خاموشی رہی۔
کاش یہ میرے بس میں ہوتا۔ کرم دین بڑبڑایا۔اس نے غصے اور لاچاری سے زمین پر مکے مارنا شروع کردئیے۔کچھ نوکیلے پتھر اس کی انگلیو ں کو خار خار کرنے لگیں۔
کیا کر رہا ہے۔ شفیق نے جلدی سے اس کے دونوں ہاتھ جکڑ لئے ۔کوئی فائدہ ہے اس کا….؟ خوامخواہ خود کو تکلیف دے رہا ہے۔
تین بیٹوں کے بعد بیٹی پیدا ہوگئی ہے میرے گھر میں…. میرا سب کچھ چھن گیا ہے۔
تُو سمجھتا کیوں نہیں….؟ بیٹا بیٹی تیرے بس میں نہیں۔تیرا کام تو بس شکر کرنا ہے ۔شفیق اپنے دوست کرم دین کی دیوانگی دیکھ کر پریشان سا ہوگیا۔
چھوڑ مجھے….کرم دین غصے سے اپنے ہاتھچھڑائے۔
کرم دین میرے یار….! میری بات سن….وہ دھیمے سے بولا۔یہ جو تو غصہ کررہا ہے یہ کس پر کررہا ہے….؟ بھلا بتا ۔دیکھ جب میں گُندھی مٹی چاک پر ڈالتا ہوں تو یہ میرے ہاتھ ہوتا ہے کہ میں اپنی مرضی سے اسے گھڑا بنادوں یا صراحی۔
ذرا سوچ میرے یار وہ تو ہم سب کا مالک ہے ۔اس نے انگلی سے آسمان کی طرف اشارہ کرتے ہوئے کہا۔ اس کی مرضی ۔جس سانچے میں چاہے ڈھالے۔ادھر تیری میری مرضی نہیں چلنی۔وہ ہنسنے لگا۔

[box type=”shadow” align=”” class=”” width=””]

بیٹا کھوٹا بھی ہو تو باپ کا سانجھا ہوتا ہے ۔اور بیٹی سونا بھی ہو تو عمر بھر کا بوجھ۔  [/box]

او تُواپنی موٹی موٹی باتیں پا س رکھ ا پنے۔کرم دین بیزاری سے بولا۔میں بس اتنا جانوں کہ بیٹا کھوٹا بھی ہو تو باپ کا سانجھا ہوتا ہے ۔اور بیٹی سونا بھی ہو تو عمر بھر کا بوجھ۔او…. اس کے ویاہ کے لیے شریکے میں سر جھک جائے گا میرا۔ہتھ جوڑ کر داماد کی آئو بھگت مجھ سے نہ ہووے گی۔ وہ رعونت سے بولا۔سمجھا تُو….اور اس نے تو پیدا ہوتے ہی جگ ہنسائی کروادی میری۔پتہ نہیں آگے کیا کیا دیکھنا پڑے گا…. اس کی وجہ سے۔
تُو اپنا وقت بھول گیا کیا؟ شفیق نہ چاہتے ہوئے بھی بول پڑا۔ تُو تو آج بھی اپنی سُسر سے منہ ٹیڑھا کرکے ہی ملتا ہے۔جیسے انھوں نے تجھے بیٹی دے کر کوئی جرم کیا ہے۔
جا تُو دفع ہو یہاں سے…. بات نہ کر مجھ سے شفیق کی سچی بات نے اسے اور گرم کردیا۔
یہ میرا معاملہ ہے دیکھ لوں گا کیا کرنا ہے مجھے۔ پَر اِک بات تو طے ہے کہ کرم دین کا سر نہ کبھی کسی کے آگے جھکا ہے نہ جھکے گا۔وہ ایک ایک لفظ جما جما کر بولا اور تکبر سے گردن اکڑالی
تو کیا کرے گا ؟مار ڈالے گا کیا اسے….؟شفیق کو بھی اس کی باتیں سن کر خوف آنے لگا۔
کرم دین نے کوئی جواب دئیے بغیرمٹی سے پتھر اٹھا کر دور کھیتوں میں کھنیچ کر مارا۔جیسے کسی ان دیکھے مخالف کو بھگانے کی کوشش کررہا ہو۔اس وقت بھی اس کی آنکھوں میں شدید نفرت تھی۔
چل گھر چل ۔کرم دین کپڑے جھاڑ کر کھڑا ہوگیا۔وہ جانتا تھا شفیق اسے لے جائے بغیر ٹلے گا نہیں۔نہ جانے کس مٹی کا بنا ہے تُو….؟ شفیق بھی اٹھ کھڑا ہوا۔
گاؤں کی جانب جانے والی پگڈنڈی کو پھلانگتے ہی کرم دین نے راستہ بدل لیا ۔وہ جانتا تھا کہ راستے میں برگد کے سائے میں بنے چبوترے پر شام کے وقت معمول کے مطابق چوپال سجا ہوگا۔ گاؤں کے مرد وہاں اکٹھا ہوکر ہلا گُلامچارہے ہونگے۔ وہ لوگ کرم دین کو اپنے سامنے پائیں گے تو اس کا مذاق اُڑائیں گے۔ کرم دین ان لوگوں کا سامناکرنے سے ہچکچارہا تھا وہ راستہ بدل کر جھاڑیوں والے میدان میں اتر گیا۔
شفیق ،کرم دین کی حالت سمجھ رہا تھا۔ وہ بھی خاموشی سے اس کے ساتھ چل پڑا۔شومئی قسمت ۔ راستہ بدلنے پر اس کی مڈبھیڑ جمال سے ہوگئی۔ جمال نے کرم دین کو جو اس راستے سے آتا دیکھا تو ہنستا ہوا اس کے سامنے آگیا۔اس کی تمسخرانہ ہنسی سن کر کرم دین کا خون کھولنے لگا۔
جمال کی خوشی کا تو کوئی ٹھکانہ ہی نہ تھا۔ زمین پر قبضہ کرنے کا خواب پورا ہونے سے اسے اب کوئی نہیں روک سکتا تھا۔ وہ دانت نکالتے ہوئے بولا، او بادشاہو ….! خیر تو ہے ،رستہ بھول گئے کیا ؟
راستہ چھوڑ میرا ۔کرم دین غصے سے بولا۔
آہو جی…. میں نے کب تیرا رستہ روکا۔وہ ایک طرف ہوگیا اور طنزیہ مسکراتے ہوئے ہتھیلی پر سونف مسل کر منہ میں ڈال لی۔
بات تو سن یار ، اُس نے پھر جلدی سے آگے بڑھ کر کرم دین کو بازو سے پکڑ لیا۔کرم دین نے جھٹکے سے بازو چھڑایا۔او کیا مصیبت ہے تجھ کو۔وہ غرایا۔
میری جان ! بات تو سن میری…. اس نے پھر دانت نکالے….
دیکھ میرے یار کوئی بات نہیں کہ لڑکی پیدا ہونے پر تجھے پنچائیت میں جگہ نہ ملی…. پرہمارے دل میں تیرے لیے بڑی جگہ ہے۔وہ سینہ ٹھوک کر بولا۔
کرم دین کا منہ کڑوا ہو گیا اس نے بمشکل تھوک نگلا۔ قریب تھا کہ اسے کوئی موٹی سی گالی دیتا،شفیق نے جلدی سے اس کا ہاتھ پکڑ لیا۔تقریباًاسے کھینچتا ہوا گھر لے گیا۔

٭٭٭

گھر پہنچ کر کرم دین نے نہ تو بانوسے کوئی بات کی اور نہ ہی اپنی نومولود بیٹی کی طرف آنکھ اٹھا کر دیکھا۔اس کا چہرہ تنا ہوا تھا مگر اس کو گھر میں دیکھ کر وہاں موجود عورتوں نے سکھ کی سانس لی۔ نصیبو نے جلدی سے چارپائی سیدھی کی اور پھر باورچی خانے میں کھانا گرم کرنے گھس گئی۔
بانو کی ماں موڑھا آگے کرکے اس کے پاس بیٹھ گئی۔ شکر بیٹا…! تیری موہنی صورت دیکھی۔ جواب میں کرم دین نے پانی کا گلاس منہ سے لگایا اور منہ میں پانی بھر کر غرارے کرنے شروع کردیے۔
آج تیری پسند کا کھانا ہے بیٹا، بانو کی ماں پھر بولی۔

کیوں آج کونسا عید کا دن ہے….؟اس نے طنز کیا۔اتنے میں نصیبو کھانا لے آئی۔
بچوں کو بھی کھانے کو کچھ دیا یا نوابزادی کے نخرے اٹھا نے میں ہی لگے ہو صبح سے ….؟ کرم دین نوالہ منہ میں رکھتے ہوئے روکھائی سے پوچھا۔
ہاں جی بچے کھانا کھا کر سوگئے ہیں ۔نصیبو نے ڈرتے ڈرتے جواب دیا اور جلدی سے اندر بھاگ گئی ۔
بانو کی ماں بھی اس کے تیور دیکھ کر خاموشی سے اندر چلی گئی۔کرم دین کے اس رویئے کے لئے سب تیار تھے ۔ کوئی نہیں جانتا تھا وہ اب کیا کر ے گا۔ وہ کھانا کھا کر آنکھوں پر کپڑا ڈال کر لیٹ گیا۔ سکینہ جسے شفیق کچھ دیر کے لئے زبردستی چھوڑ گیا تھا اندر بانو کے پاس جاکر بیٹھ گئی ۔بانو کی ماں آہستہ آہستہ بانو سے کچھ بات کررہی تھی ۔
شکر کر بانو کرمو گھر آگیا۔ارے جب تُو پیدا ہوئی تھی تب تیرے باپ نے پندرہ دن اپنی شکل نہ دکھائی تھی۔ ابّے کو بول گیا تھا کہ اسے واپس لے جا ۔
تُو بس جلد سے جلد بستر چھوڑ ، خدمت کر اس کی اور کسی طرح منا اسے ۔

[box type=”shadow” align=”” class=”” width=””]

بیٹی جنم دینے پر وہ اپنے شوہر کرم دین کا سامنا کرنے میں ندامت محسوس کررہی تھی [/box]

بانو کی بھیگی نظریں ٹکی ہوئی تھیں برآمدے میں بیٹھے ہوئے کرم دین پر ۔ اسے رہ رہ کر ایک دن پہلے تک کی کرم دین کی الفت و نوازشات یاد آرہیں تھیں۔ بیٹی جنم دینے پر وہ اپنے شوہر کرم دین کا سامنا کرنے میں ندامت محسوس کررہی تھی۔اس نے خود کو اس گناہِعظیم کا ذمہ دار سمجھتے ہوئے اپنے آپ کو کوسنا شروع کردیا۔
ہائے اماں ….!اس لڑکی کی وجہ سے میرا بسا بسایا گھر اجڑ رہا ہے…. کتنا خیال کرنے لگا تھا۔ وہ میرا….یہ سب اسی کمینی کنیز کا کیا دھرا ہے۔ اسی نے تعویز کرایا ہے۔ بانو پھر سے وہی بات دہرانے لگی۔ زرینہ صیح کہہ رہی تھی کا لے عامل کے تعویز میں بڑی طاقت ہے ورنہ میرا تو بیٹا ہی تھا۔ دائی رشیدہ نے نبض پر ہاتھ رکھ کر بتادیا تھا۔
پر اب کیا کرسکتے ہیں۔ جو ہونا تھا ہوگیا۔اب اسے پھینک تو نہیں سکتے ناں۔
سکینہ ان ماں بیٹی کی باتیں ضبط سے سے سنتی رہی ۔ وہ جانتی تھی ان کو سمجھانا بے سود ہے۔ آخر چوٹ بھی تو گہری تھی۔طاقت اور بڑائی کا نشہ چڑھنے سے پہلے ہی چور چور ہوگیا تھا اور ویسے بھی گاؤں میں بیٹیوں کی پیدائش پر یہ رویہ عام تھا۔ سکینہ بچی کے پاس بیٹھ کر اسے دیکھتی رہی۔کبھی اس کے روئی جیسے نرم گالوں کو چھوتی تو کبھی اس کی بند مٹھی میں اپنی انگلی پھنسا دیتی۔
رات کے وقت شفیق کے ساتھ وہ تھکی ماندی مایوس اپنے گھر لوٹ گئی۔ مگر نیند اس کی آنکھوں سے کوسوں دور تھی ۔رات بھر اسے بار بار اپنا ہاتھ اس ننھی منی کے گلابی گلابی نرم ملائم گالوں پر محسوس ہوتا۔ اس کی رونے کی آواز کانوں میں رس گھولنے لگتی۔ وہ بے اختیار سی ہوجاتی۔ خیالوں ہی خیالوں میں کبھی بچی کو اپنے سینے سے چمٹالیتی تو کبھی اسے لے کر گول گول جھولنے لگتی جیسے فضاء میں اڑ رہی ہو اور پھراچانک بانو کی تندو تیز آوازیں اس کو جھنجھوڑ کر ہوش میں لے آتیں۔ میرا گھر برباد ہوجائے گا اس لڑکی کی وجہ سے۔ سکینہ نے گھبرا کر آنکھیں کھول دیں ۔ میں اب بانو کے ہاں نہیں جاؤں گی ۔سکینہ نے خود سے یہ فیصلہ کرلیا۔

٭٭٭

تین دن خاموشی سے گزر گئے۔کرم دین بظاہر خاموش تھا مگر گھر اور اپنی بیوی کی طرف سے مسلسل لاپرواہ۔ رات گئے لوٹتا تو منہ لپیٹ کر پڑ جاتا۔اس کی خاموشی بانو کو مزید پریشان کررہی تھی۔
شکر ہے پتر کرم دین کا مزاج ٹھیک ہے۔ تُو بس اب جلد سے جلد کھڑی ہوجا۔مجھے بھی گھر جانا ہے۔ تیرے ابے کا مزاج تو تجھے پتہ ہے نہ۔ وہاں بھی ایک قیامت کھڑی کی ہوئی ہے اس نے اور میرے گٹوں کا درد بھی بڑھ گیا ہے۔ بانو کی ماں نے تکلیف سے کراہتے ہوئے اپنے گھٹنے دبانے شروع کردئیے۔
لا ماں میں تیل لگادوں ۔نصیبو تیل کی بوتل اُٹھا لائی اور تھکی ماندی بوڑھی ماں کی ٹانگوں پر نرمی سے تیل کی مالش کرنے لگی۔
نہیں ماں ،وہ ٹھیک نہیں ہے۔بانوکسی گہری سوچ میں ڈوبی ہوئی بولی۔اس کے گالوں پر پھر پانی کی لکیریں بننے لگیں۔
اماں وہ مجھے دو تھپڑ ماردیتا تو میں سمجھتی کہ اس کا غصہ اتر گیا ہے…. میرا گھربچ گیا۔پر اس کی خاموشی میں کوئی بڑا طوفان ہے میرے لیے۔بانوں کے منہ سے نکلنے والی سسکیوں کی جگہ ہچکیوں نے لے لی۔

٭٭٭

ٹن ٹن ٹن….دھڑ دھڑدھڑ….برتن اور سامان گرنے کے بے ہنگم شور سے سب گھبرا کر اٹھ بیٹھے۔
ربّاخیر…. نصیبو ساتھ سوتی بانو سے چپک گئی۔کیا بھونچال آیا ہے۔
بانو ….بانو ۔کرم دین چنگھاڑا۔ کچھ ہوش ہے گھر کا۔ آرام کی لت پڑ گئی ہے تجھے۔وہ پھر چیخا۔
باجی اٹھ…. باجی اٹھ۔ نصیبو کپکپاتے ہوئے جلدی جلدی بانو کو ہلا نے لگی ۔
کب سے پڑی کھٹیا توڑ رہی ہے۔اٹھ میرے کپڑے ڈھونڈکر دے۔وہ پھر دہاڑا۔
باجی تُو۔ٹھیک تو ہے؟
آہو۔وہ نصیبو کا سہارا لے کر آہستہ سے کراہتی ہوئی بستر سے اٹھی۔نصیبو وہیں کمرے میں دبک گئی۔ہائے اماں کو ابھی گھر جانا تھا۔اس نے دل ہی دل میں ماں کو یاد کیا۔ جو رات ہی گھٹنوں میں شدید درد کی وجہ سے گھر لوٹ گئی تھی۔کہا تھا بانو کو بھی ساتھ لئے چلتے ہیں مگر اماں بھی نہ بس۔نہیں تیرا یہیں رہنا بہتر ہے۔وہ نقل اتارتے ہوئے بڑبڑائی۔
بانونے بڑی مشکل سے کرم دین کے کپڑے نکالےاور اس کی طرف بڑھادئیے۔ یہ لو جی۔
کرم دین نے اسے گھورا۔یہ ایسے پہنوں گا۔اس نے سکڑے ہوئے کپڑے بانو کے منہ پر مار دئیے۔
میں نصیبو سے کہتی ہوں کہ….آآآ اس کی چیخ نکل گئی۔کرم دین نے اس کی بات پوری ہونے سے پہلے ہی اسے گدی سے پکڑ کر اس کا منہ دبا دیا۔
خبردار جو ایک لفظ بولی…. جیسا کہا ہے ویسا کرورنہ تجھے بھیج کر اُسی کو رکھ لوں گا۔ وہ حقارت سے بنکارا۔بانو کا دم گھٹنے لگا۔
اس نے زور سے بانو کو دھکا دیا… بانو کا سر دیوار سے جا ٹکرایا۔
اماں…. وہ درد سے بلبلائی۔
دفع ہو…. جا کر روٹی ڈال۔وہ پھر بنکارا
وہ بمشکل خود کو سنبھالے باورچی خانے میں چلی گئی۔لرزتے کانپتے جیسے تیسے اس کے لیے ناشتہ بنایا۔
یہ کیا ہے۔اس نے پراٹھے کا پہلا نوالہ منہ میں رکھتے ہی تھوک دیا۔پھیکی روٹی ٹھنڈا ددھ۔
دفع ہوجا میری نظروں کے سامنے سے۔اس نے دودھ کا گلاس فرش پردے مارا۔ کوئی کام ڈھنگ سے نہیں کرتی ۔ وہ غصے سے پیر پٹختا باہر نکل گیا۔
فرش دودھ سے سفید ہوگیا ۔کچھ چھینٹیں بانو کے پیر پر بھی آگئیں۔اس نے نظر اٹھا کر باہر کی جانب دیکھا۔ کرم دین جا چکا تھا۔دروازے کا ادھ کھلا پٹ بانو کا منہ چڑا رہا تھا۔اسے طوفان کا یقین ہو چلا تھا ۔کرم دین کا غصہ کھلا اعلان تھا کہ وہ کچھ بہت برا کرنے والا ہے….کہیں وہ اسے چھوڑ نے تو نہیں والا….اسے چکر آنے لگے وہ جلدی سے چارپائی کے کونے سے ٹک گئی۔
کر م دین کے باہر جانے کے بعد نصیبو دوڑ کر بانو کے پاس آگئی۔ اسے سہارا دے کر بٹھایا۔لے باجی….! اب تو تیری آس پوری ہوگئی۔ ٹھنڈ پڑگئی نا مار کھا کر۔غصہ نکل گیا ویر کا؟
نہیں نصیبو۔میرا دل گھبرا رہا ہے ۔ میں اسے جانتی ہوں۔ اس کے ارادے ٹھیک نہیں لگ رہے۔ وہ کچھ کرنے والا ہے۔
اس نے کوئی ایسی ویسی حرکت کی تو ہم برادری کے پاس جائیں گے۔
او نصیبو…. کیا پاگلوں والی بات کررہی ہے تو۔ اری برادری نے پنچائیت نے آج سے پہلے کبھی کسی عورت کا ساتھ دیا ہے۔ پنچائیت کی نظروں میں عورت کی کیا عزت ہے….؟ لڑکی پیدا ہونے پر عورت کو اس کے میکے چھوڑ آنا یا اسے طلاق ہی دے دینا کون سی انوکھی بات ہے…. کیا پہلے پنچائیت نے لڑکی پیدا کرنے پر کسی عورت کے شوہر اور سسرال والوں کے ہاتھوں پٹنے سے، ذلیل ہونے سے بچایا ہے۔
نہیں۔ نصیبوں بہت بے بسی سے بولی۔
شوہر کتنا ہی غلط ہو، ظالم ہو، شرابی جواری ہو، مرد میں سو عیب ہوں وہ کسی کو نظر نہیں آتے۔ مگر شوہر کی چھوڑی ہوئی عورت کی گاؤں میں، برادری میں کوئی عزت نہیں رہتی…
ہاں باجی ….! ایسا ہی ہے۔ واقعی …. ہمارے ہاں عورت کی کیا عزت ہے….؟ کبھی کبھی تو لگتا ہے کہ بھینس اور بکری کی اہمیت گھر والی سے زیادہ ہے… بانوں کی باتیں سن کر نصیبو کی آنکھوں سے آنسو بہہ رہے تھے۔

 

[box type=”shadow” align=”” class=”” width=””]

شوہر کتنا ہی غلط ہو، ظالم ہو، شرابی جواری ہو، مرد میں سو عیب ہوں وہ کسی کو نظر نہیں آتے۔   [/box]

ہائے ربا…. میرے ساتھ بڑی ناانصافی ہوگئی۔ میری خوشیاں چھن گئیں…. میرے ہاں چوتھا بیٹا پیدا ہوتا تو میرے ہاتھوں میں سونے کی بارہ چوڑیاں ہوتیں۔ میں بڑی حویلی میں چوہدرانی سے ملنے جاتی۔ کرم دین چوہدری کے برابر والی کرسی پر بیٹھتا۔ پر اب۔ ہائے ہائے….
بانو پھوٹ پھوٹ کر رونے لگی۔ اب تو میرا اپنا گھر ہی خطرے میں آگیا ہے۔ ہائے۔
لڑکی پیدا ہونے پر کرم دین کے رویے سے بانو بری طرح سہمی ہوئی تھی۔ اس مصیبت کی گھڑی میں میرا ساتھ کون دے گا….
تو خود کو اتنا بھی اکیلا نہ سمجھ۔ نصیبو نے اپنی بہن کو تسلی دیتے ہوئے کہا۔
کون کھڑا ہوگا میرے ساتھ ….؟ بانو بے یقینی سے بولی۔
بانو کی بات سن کر نصیبو بولی
سکینہ باجی….

 

(جاری ہے….)
تحریر: آفرین ارجمند
از روحانی ڈائجسٹ جون 2014ء

پاکستانی قوم اپنی عجیب عجیب صفات کی وجہ سے دنیا کی ایک منفرد قوم ہے۔ یہ وہ قوم ہے، جس کے پاس قیمتی معدنیات سے مالا مال، سونا اگلنے والی زرخیز زمین موجود ہے۔ لیکن یہ قوم غربت کا شکار ہے۔ اس قوم کے پاس دریا ہیں لیکن یہ قوم پانی کی کمی کا شکار ہے۔ پانی سے انتہائی سستی بجلی پیدا کرنے کی بھرپور صلاحیت موجود ہونے کے باوجود یہ قوم تیل امپورٹ کرکے مہنگی تھرمل بجلی پر انحصار کرتی ہے۔ اس قوم کے پاس نظام مملکت و حکومت میں رہنمائی حاصل کرنے کے لئے کتاب اللہ اور سنت ِ رسول صلی اللہ علیہ وسلم موجود ہے لیکن اس قوم میں پنچائت کے فیصلے کے تحت مختاراں بی بی کے ساتھ اجتماعی زیادتی کی جاتی ہے۔ اس قوم میں صلح کے معاہدے میں وزیراں، تسلیم اختر، زاہدہ، نسیم، اقراء مقتول کے خاندان کے حوالے کی جاتی ہیں۔ جہاں یہ واقعات ہوتے ہیں وہاں کے لوگ خاموشی سے یہ سب کچھ دیکھتے رہتے ہیں۔

اسلام مکمل ضابطہ حیات ہے۔ ہمارا دین اسلام زندگی کے ہر شعبہ میںجامع رہنمائی عطا کرتا ہے۔ اسلام انپے پیروکاروں کو سچ بولنے کی تلقین کرتا ہے۔ پیغمبر ِ اسلام صلی اللہ علیہ وسلم فرماتے ہیں کہ مومن جھوٹ بولنے ولا نہیں ہوسکتا۔ آج ہم دیکھتے ہیں کہ جھوٹ تو ہمارے ارد گرد پوری طرح چھایا ہوا ہے۔ رہا سچ۔۔۔۔۔ تو اس کی جھلک ایسے دکھائی دیتی ہے جیسے برسات کی راتوں میں چاند کچھ دیر کے لئے بادلوں کی اوٹ سے نکل کر اجالا پھیلا دے۔ اس کے بعد پھر وہی تاریکی۔ جھوٹ کی تاریکی۔ ہمارا یہ حال ہے کہ ہم جھوٹ کے ماحول میں، اس تاریکی میں رہنے کے عادی ہوگئے ہیں۔ ہم جھوٹ بولنے والے پر اعتماد کرتے ہیں اور سچ بولنے والے کے بارے میں شکوک اور بدگمانیوں میں مبتلا ہوجاتے ہیں۔ ہمارا دین ہمیں اپنے وجود، اپنے گھر، اپنے ماحول کو صاف ستھرا رکھنے کی ہدایت کرتا ہے۔ ہم اس ہدایت پر کس طرح عمل کرتے ہیں۔ اس کا مشاہدہ، گلیوں محلوں میں کچرے کے ڈھیروں، ابلتے ہوئے گٹروں، ٹوٹی ہوئی سڑکوں اور دیگر مناظر سے ہوسکتا ہے۔معاشروں کو استحکام بخشنے میں سب سے اہم کردار عدل و انصاف کا ہے۔ پاکستان میں حق دار کو اس کا حق دلانے اور انصاف کی فراہمی کا جو حال ہے وہ سب کے سامنے ہے۔

ہمارے معاشرے کا یہ حال کیوں ہے؟ اس کی ذمہ داری کس پر عائد ہوتی ہے؟ یہاں کے معاملات کس طرح سدھریں گے؟ کون سدھارے گا؟

بہت سے لوگ اس انتظار میں ہیں کہ کوئی نجات دہندہ آئے گا وہ کوئی ایسا طریقہ اختیار کرے گا جس سے ہمارے مسائل راتوں رات حل ہوجائیں گے۔ کاش کہ ایسا ہوسکتا۔ لیکن ایسا کبھی نہیں ہوگا۔ کیوں ؟  کیونکہ یہ عمل اللہ تعالیٰ کی سنت سے مطابقت نہیں رکھتا۔ اللہ تعالیٰ فرماتے ہیں:

وان لیس للانسان الا ماسعٰی O وان سعیہ سوف یرٰی O ثم یجزہ الجزآء الاوفٰی O

ترجمہ: اور یہ کہ انسان کو وہی کچھ ملتا ہے جس کی وہ کوشش کرتا ہے اور یہ کہ اس کی کوشش دیکھی جائے گی۔ پھر اس کو پورا پورا بدلہ دیا جائے گا۔ (سورہ نجم۔ آیت 39-41)

ہمارے معاشرہ کے حالات بھی قوم کی اجتماعی کوشش سے ہی تبدیل ہوں گے۔ جب ہم اجتماعی طور پر بھلائی کی طرف سبقت کریں گے تو قدرت ہماری مدد کرے گی۔ راستے کی مشکلات کم ہوسکتی ہیں۔ لیکن راستہ بہرحال طے کرنا ہوگا۔ راستہ کتنی سہولت اور تیز رفتاری سے طے ہو اس کا تعلق بھی ارادہ اور کوشش سے ہے۔ کراچی سے لاہور کا سفر اونٹ پر بیٹھ کر بھی کیا جاسکتا ہے۔ تیز رفتار ٹرین  یا ہوائی جہاز سے بھی سفر کیا جاسکتا ہے۔

تکلیف و آرام، سفر کا وقفہ ذریعہ سفر کے لحاظ سے مختلف ہوگا۔ جس قدر تیز رفتار اور آرام دہ ذریعہ سفر اختیار کرنا ہو اس کے لئے اتنے ہی وسائل کی ضرورت ہوگی۔ وسائل کی یہ فراہمی بھی کوشش کا حصہ ہے۔ قوم کے حالات راتوں رات تو ٹھیک نہیں کئے جاسکتے۔ البتہ یہ یقینا ہوسکتا ہے کہ اس قوم کے حالات نہایت تیز رفتاری سے بہتر ہوتے جائیں۔ اس کام کے لئے جتنی جلدی ہو جتنی تیز رفتاری درکار ہو اسی کے مطابق اجتماعی کوششوں میں زیاد تی اور تیزیلانا ہوگی۔

اصلاح احوال کے لئے کیا ہمیں نئے قوانین بنانا ہوں گے؟  جہاں تک زندگی کے مختلف شعبوں سے متعلق قوانین کی موجودگی کا تعلق ہے اس میں ہم دنیا کی کسی بھی مہذب اور ترقی یافتہ قوم سے پیچھے نہیں۔ ہمارا مسئلہ قانون کی غیرموجودگی نہیں۔ ہمارا مسئلہ قانون کا مؤثر اور منصفانہ نفاذ ہے۔ قوانین بنانا، ان کی تشریح کرنا اور انہیں نافذ کرنا  پارلیمنٹ، عدلیہ اور حکومت کی ذمہ داریاں ہیں۔ قوانین کی موجودگی کسی بھی معاشرہ کی بنیادی ضرورت ہے۔ لیکن کسی بھی معاشرہ میں اصلاح کا عمل صرف قوانین کے ذریعہ ہی ممکن نہیں ہے۔ مثال کے طور پر ملاوٹ کا ارتکاب کرنے والے شخص کے لئے کسی ملک کا قانون سزا کا تعین کردیتا ہے۔ کوئی شخص وہاں ملاوٹ کا جرم کرے گا تو اس سزا کا حقدار ٹھہرے گا۔ لیکن افراد معاشرہ ملاوٹ کے فعل سے نفرت کرنے لگیں اور معاشرتی دباؤ کے باعث معاشرہ میں ملاوٹ کا تصور بھی نہ ہو۔ یہ کام محض قانون سازی سے نہیں ہوسکتا۔ برائیوں سے نفرت اور اچھائیوں سے رغبت کے لئے اصلاح و تزکیہ کے ایک ایسے عمل کی ضرورت ہے جس کے اثرات معاشرہ کے تمام طبقات اور تمام سطحوں تک پھیل جائیں۔ یہ کام اپنے معیار اور حجم کے اعتبار سے بہت بڑا دکھائی دیتا ہے لیکن یہ ناممکن نہیں ہے۔ قرآن پاک اور سنت ِ نبوی صلی اللہ علیہ وسلم سے استفادہ کیا جائے تو یہ کام زیادہ مشکل بھی نہیں ہے۔

اعلانِ نبوت کے بعد مکہ میں حضور علیہ الصلوٰۃ والسلام کو کفار کی جانب سے جس قدر مزاحمت اور مشکلات کا سامنا کرنا پڑا  اکثر قارئین ان سے واقف ہوں گے۔ اپنے موضوع کی مناسبت سے ایک واقعہ پر نظر ڈالتے ہیں۔

ایک روز کفارِ مکہ حضرت محمد صلی اللہ علیہ وسلم کے پاس آئے اور مطالبہ کیا کہ آپ دین کی دعوت و تبلیغ کا کام روک دیں۔ کفار نے یہ پیشکش بھی کی کہ اس کام کے عوض کفارِ مکہ آپ صلی اللہ علیہ وسلم کو بے شمار دولت دینے کے ساتھ ساتھ اپنا حکمران بنا لینے کے لئے بھی تیار ہیں۔ اللہ کے رسول محمد صلی اللہ علیہ وسلم نے کفارِ مکہ کی اس پیشکش کے ذریعہ مکہ کا حاکم بننے کے بجائے ان کے ظلم و ستم سہتے رہنا برداشت فرما لیا لیکن دعوتِ توحید میں کوئی کمی یا ضعف نہ آنے دیا۔ کچھ عرصہ بعد حضرت محمد مصطفٰے صلی اللہ علیہ وسلم ہجرت فرما کر مدینہ منورہ تشریف لے آئے یہاں آکر آپ نے ایک اسلامی ریاست کی بنیاد رکھی اور اس ریاست کی حکمرانی کی ذمہ داریاں خود سنبھالیں۔

یہاں ایک سوال ذہن میں آتا ہے۔

مدینہ جاکر بھی تو آپ صلی اللہ علیہ وسلم نے حکمرانی اختیار فرمائی تھی۔ مکہ میں تو کفار نے خود حضور صلی اللہ علیہ وسلم کو اپنا حکمران تسلیم کرنے کی پیشکش کی تھی۔ حضور علیہ الصلوٰۃ والسلام کے پیشِ نظر کیا حکمت تھی جس کی وجہ سے آپ صلی اللہ علیہ وسلم نے اس وقت اس پیشکش کو قبول نہ فرمایا۔ کفار کی پیشکش قبول کرکے حضرت محمد صلی اللہ علیہ وسلم مکہ اور آس پاس کے علاقوں کے حکمران تو بن جاتے۔ قانون بنانے اور فیصلہ کرنے کا اختیاربھی آپ صلی اللہ علیہ وسلم کے پاس ہوتا لیکن اصلاح و تزکیہ کے معاملہ میں کفارِ مکہ آپ صلی اللہ علیہ وسلم کے فرامین اور تعلیمات کے پابند نہ ہوتے۔ حق حکمرانی حاصل کرلینا آپ صلی اللہ علیہ وسلم کا مقصد نہ تھا۔ آپ صلی اللہ علیہ وسلم کے پیش نظر اللہ کے بندوں پر مشتمل ایک مثالی فلاحی معاشرہ قائم کرنا تھا۔ ایسا معاشرہ محض قانون کے نفاذ کے اختیارات حاصل کرکے قائم نہیں کیا جاسکتا۔ اس مقصد کے حصول کے لئے ضروری ہے کہ حاکم (یا حکومت) کو عوام اپنا حکمران سمجھنے کے ساتھ اپنا رہنما و ہادی بھی تسلیم کریں۔ ان کے فرامین پر دل و جان سے عمل کریں۔ اس کے کہنے پر اپنی عادات اپنے رویوں اپنی روایات اپنے باطل اعتقادات تبدیل کرسکیں۔ مکہ میں کفار کی پیشکش مسترد کردینے میں حضور صلی اللہ علیہ وسلم کی یہ حکمت ہمیں نظر آتی ہے کہ اس وقت وہاں کی حکمرانی توحید کی دعوت کے فروغ اور اصلاح و تزکیہ میں معاون نظر نہ آتی تھی۔

حضرت محمد مصطفٰے صلی اللہ علیہ وسلم اللہ کے آخری نبی اور رسول ہیں۔ آپ صلی اللہ علیہ وسلم کی ذاتِ مبارکہ کو اللہ تعالیٰ نے جامع صفات و کمالات بنایا ہے۔ آپ صلی اللہ علیہ وسلم کی سنت ِ مبارکہ، آپ صلی اللہ علیہ وسلم کے اختیار کردہ طریقے، حکمت ہائے عملی سے انسان حسبِ ضرورت رہتی دنیا تک فائدے اٹھا سکتا ہے۔ قرآنِ پاک میں اللہ تعالیٰ اپنے رسول محمد صلی اللہ علیہ وسلم کے فرائض رسالت کے بارے میں ارشاد فرماتا ہے:

ترجمہ: آسمانوں اور زمین میں ہر چیز اللہ کی تسبیح کرتی ہے جو بادشاہ ہے، نہایت مقدس ہے، زبردست ہے، حکمت والا ہے، اسی (نہایت مقدس زبردست حکمت والے بادشاہ) نے امیّوں میں سے ایک رسول (محمد صلی اللہ علیہ وسلم) مبعوث فرمایا۔ جو انہیں اس کی آیتیں پڑھ کر سناتا ہے، اور اس کا تزکیہ و اصلاح کرتا ہے اور انہیں کتاب و حکمت سکھاتا ہے۔ بے شک لوگ اس سے پہلے کھلی گمراہی میں تھے، یہ (تزکیہ تعلیم و حکمت) ان لوگوں کے لئے بھی ہے جو ابھی ان سے آکر نہیں ملے (یعنی مستقبل میں قیامت تک آنے والے ہیں) اور وہی (اللہ) سب پر غالب اور حکمت والا ہے۔ (سورۂ جمعہ : 2-4)

غزوۂ خندق کے وقت دفاع کے لئے خندق کی کھدائی کا کام سب مسلمان مل کر کررہے تھے۔ اس وقت مسلمانوں کی مالی حالت کچھ اچھی نہ تھی۔ کام کے دوران ایک صحابی رسول اللہ صلی اللہ علیہ وسلم کے پاس آئے۔ وہ شدید بھوک محسوس کررہے تھے لیکن انہوں نے اپنا کام جاری رکھا ہوا تھا۔ان صحابی نے اپنے پیٹ سے کپڑا ہٹا کر  رسول اللہ صلی اللہ علیہ وسلم کو دکھایا بھوک کے احساس کو کم کرنے کے لئے انہوں نے پیٹ پر ایک پتھر باندھ لیا تھا۔ اس پر رسول اللہ صلی اللہ علیہ وسلم نے اپنے پیٹ سے کپڑا ہٹایا۔ رسول اللہ صلی اللہ علیہ وسلم کے پیٹ پر دو پتھر بندھے ہوئے تھے۔

کتاب و حکمت سکھانے والے نبی صلی اللہ علیہ وسلم کی تعلیمات سے استفادہ کرکے ہم اپنے معاشرہ سے برائیوں کا خاتمہ اور یہاں اچھائیوں کو فروغ دے سکتے ہیں۔ اس کام کے لئے حکمرانوں کو بھی اپنے آپ کو بدلنا ہوگا اور عوام کو بھی۔

نبی کریم صلی اللہ علیہ وسلم نے اسلامی ریاست کے معاملات چلانے کے لئے محض قانون سازی پر انحصار نہیں کیا۔ آپ صلی اللہ علیہ وسلم نے حکمرانی کے ساتھ ساتھ ایک مصلح کا انتہائی مشکل کام سرانجام دیا۔ آج ہمارے حکمرانوں کو بھی یہی وصف اختیار کرنے کی ضرورت ہے۔ ہمارا مسئلہ یہ ہے کہ حکمران اور عوام کے درمیان قربت نہیں بلکہ دوریاں پائی جاتی ہیں۔ عوام سمجھتے ہیں کہ حکمران طبقہ عوام کے مسائل و مشکلات سے واقف ہی نہیں ہے۔ بات ہے بھی صحیح۔ کیا کوئی سیکریٹری، جنرل، وزیر، صدر، اس تکلیف و اذیت سے ذاتی طور پر واقف ہے جو بسوں میں لٹک کر سفر کرنے والوں کو ہوتی ہے؟  کیا ایوانِ صدر، ایوانِ وزیراعظم، گورنر ہاؤس کے مکینوں کو لوڈشیڈنگ کا عذاب جھیلنا پڑتا ہے ؟  کیا حکمران طبقہ کے لوگ اس تکلیف سے واقف ہیں جو کروڑوں لوگوںکو پانی کے حصول کے لئے اٹھانا پڑتی ہے۔

ایک بار صرف ایک بار عوام کو یہ احساس دلانے کی ضرورت ہے کہ حکومت کرنے والا بھی عوام میں سے ہے۔ ان کی تکالیف سے واقف ہے اور ان کے ازالہ کے لئے خلوص دل سے کوشاں ہے۔

اپنے معاشرہ کی خرابیاں دور کرنے اور ایک منظم و مستحکم معاشرہ کے قیام کے لئے اصلاح کا عمل بالائی طبقات سے شروع کرنا ہوگا۔ صحیح معنوں میں قانون کا مؤثر نفاذ اسی وقت ہوگا جب ہر شخص سے خواہ وہ اثر و رسوخ کا حامل ہو یا کوئی عام فرد ہو یکساں طور سے قانون پر عملدرآمد کروایا جائے۔ کمزوروں کو پکڑ لینے اور طاقتوروں کو چھوڑ دینے سے معاشرہ میں سدھار کبھی نہیں آسکتا۔ بلکہ اس روش پر عمل پیرا معاشرے تو اللہ تعالیٰ کے غضب کو دعوت دیتے ہیں۔ جو لوگ یا جو معاشرہ برے اعمال میں مصروف رہتے ہیں اور ہدایت حاصل نہیں کرنا چاہتے ان کے لئے صاف صاف تنبیہ ہے۔

ترجمہ: اے محمد کہہ دو کہ لوگو! میں برا وقت آنے سے پہلے صاف صاف خبردار کردینے والا ہوں۔ پھر جو ایمان لائیں گے اور نیک عمل کریں گے ان کے لئے مغفرت ہے اور عزت کی روزی اور جو ہماری آیات کو نیچا دکھانے کی کوشش کریں گے وہ دوزخ کے یار ہیں۔(سورۂ الحج: 49-51)

 

h
ماخوذ از کتاب ‘‘حق القین’’  ڈاکٹر وقار یوسف عظیمی