نومبر 2019ء

نومبر 2019ء – قسط نمبر 3

سیکھیے….! جسم کی بو لی

علم حاصل کرنے کے لئے کتابیں پڑھی جاتی ہیں لیکن دنیا کو سمجھنا اور پڑھنا اس سے بھی زیادہ اہم ہے اور اس کے لئے انسانوں کا مطالعہ کیا جاتا ہے۔ آج کے دور میں باڈی لینگویج روز بروز اہمیت اختیار کرتی جارہی ہے اس فن کے ذریعے دوسروں کو ایک کھلی کتاب کی مانند پڑھاجاسکتا ہے۔ لوگوں کی جسمانی حرکات و سکنات کے ذریعے شخصیت اور رویوں کو سمجھنے میں مدد مل سکتی ہے۔

باڈی لینگوج میں قدرتی طور سے انسان اپنے اعضا کا استعمال، اپنے ارد گرد کے ماحول اور سچویشن کے حساب سے کرتا ہے۔ انسان جب باتیں کرتا ہے تو صرف اس کی زبان ہی استعمال نہیں ہوتی بلکہ اس کا پورا وجود جن میں اس کے ہاتھ ، پیر، آنکھوں، دیگر فیس ایکشپریشنز شامل ہیں، اس کے جذبات کی عکاسی کرتا ہوا نظر آتا ہے۔ بس کوئی اسے سمجھنے والا ہو۔ یعنی ضروری نہیں ہے کہ انسان زبان سے کچھ کہے تو ہی ہر بات کی وضاحت ہو، کچھ باتوں کا پتہ انسان کی حرکات سے بھی لگایا جا سکتا ہے۔ بس موقع کے حساب سے ان حرکات کا صحیح مطلب اخذ کرنے والا ہونا چاہئے۔
امریکا کی یونیورسٹی آف کیلیفورنیا، لاس اینجلس کی ایک تحقیق ظاہر کرتی ہے کہ انسانوں کے درمیان رابطے میں الفاظ کا کردار صرف سات فیصد ہوتا ہے۔ باقی میں سے اڑتیس فیصد آواز کے لہجے اور پچپن فیصد جسمانی زبان یعنی باڈی لینگویج سے ہوتا ہے۔
اب خود ہی اندازہ لگالیجیے کہ جسمانی حرکات و سکنات کو سمجھ کر آپ کسی بھی شخص کے بارے میں کتنا کچھ جان سکتے ہیں۔ اس لیے چاہے آپ دفتر کی کسی میٹنگ میں ہوں، کاروبار کے حوالے سے کسی سے مل رہے ہوں یا کسی خاص فرد سے پہلی بارملاقات کر رہے ہوں یا پھر اپنے بچوں کے ساتھ ہوں، ان پہلوؤں پر ضرور غور کریں۔

Mouth & Lips
منہ اور ہونٹ 

باڈی لینگوج میں ماؤتھ یعنی منہ اور ہونٹوں کی حرکات اور ان حرکات سے ابھرنے والے تاثرات بھی اہمیت کے حامل ہیں۔ کسی کی بات کے جواب میں ہلکی سے مسکراہٹ ، کسی کو دیکھ کر منہ بنانا، ہونٹوں کو دانتوں میں دبا لینا وغیرہ وغیرہ ۔
آپ دنیا کے کسی بھی کونے میں رہتے ہوں ان حرکات سے ضرور واقف ہوں گے ، یا آپ بھی ان میں سے کوئی نہ کوئی حرکت بلا اختیار ضرور کرتے ہوں گے۔ ان ساری حرکات میں پنہاں تاثرات ہی معنی رکھتے ہیں ، جن کو دیکھ کر سامنے والا اس کے معنی اخذ کر سکتا ہے۔ چہرے پہ مسکراہٹ کا ہونا اچھی بات ہے ، لیکن یہ بھی جان لیجیے کہ ہمیشہ مسکرانے کا مطلب بھی خوش گوار نہیں ہوتا۔

Finger in Mouth
ہونٹ چبانا، منہ میں انگلی دبانا 

ہر طرح کے جذبات اور احساسات کو محسوس کرنے والے انسان کو قدرت نے ان کے اظہار کے لئے مختلف طریقے بھی سکھا دئیے ہیں۔ ان طریقوں کا بغور جائزہ لیا جائے تو باآسانی سامنے والے کی کیفیات کا اندازہ لگایا جا سکتا ہے۔
جیسے اگر کوئی انسان دوران گفتگو یا پھر کسی کونے میں اکیلے بیٹھا ہونٹ چباتا نظر آئے تو جان لیں کہ اسے کسی پریشانی یا پھر خوف کا سامنا ہے، ایسی پریشانی جسے سامنے لانے سے وہ گریز کر رہا ہے، اگر آپ نہ تو پریشان ہیں اور نہ ہی کسی خوف میں مبتلا ہیں لیکن پھر بھی ہونٹ چبانے کی عادت میں مبتلا ہیں تو اس عادت سے جلد چھٹکارہ حاصل کریں ورنہ لوگ آپ کو خواہ مخواہ پریشان حال سمجھ کر آپ کی دل جوئی کرنے نہ بیٹھ جائیں۔
دانتوں تلے انگلیاں دبانا بھی پریشانی یا خوف کا اشارہ کرتا ہے۔

Mouth Guard Gesture
ہونٹوں کو دبالینا ، منہ بند کرنا

ہونٹوں کو دبانا ، منہ کو ہاتھ سے چھپانا یا ہونٹ سینا، عموماً لوگ ایسا اس وقت کرتے ہیں جب وہ لوگوں کو کسی بات کا جواب نہ دینا چاہ رہے ہوں۔

Turn Up or Down
ہونٹوں کا ابھار یا جھکاؤ

ہیپی فیس اور سیڈ فیس تو سب نے ہی دیکھا ہوگا۔ اس انداز میں بھی کچھ ایسے ہی تاثرات سامنے آتے ہیں۔ اگر سامنے والا آپ کے کسی فیصلے سے خوش ہوجائے تو اس کے ہونٹ ہلکے سے اوپر کی جانب اٹھ جاتے ہیں یعنی ان کا ابھارنا جو کہ ہیپی فیس دکھائی دیتا ہے، دوسری جانب اگر وہ آپ کے فیصلے سے ناخوش ہوجائے تو ہونٹوں کا انداز یکسر بدل جاتا ہے ، یعنی ہونٹ اگر نیچے کی جانب آجائیں یعنی ان میں جھکاؤ پیدا ہوجائے تو یہ سیڈ فیس کو ظاہر کرتا ہے۔
جب آدمی زیادہ دُکھ سے دوچار ہوتا ہے تو اس کے ہونٹ مزید جھک جاتے ہیں، اسے ذرا سا منہ نکل آنا یا منہ اتر جانا کہتے ہیں۔ یہ کسی دکھ تکلیف کے باعث بھی ہو سکتا ہے ۔

Face of Liar
جھوٹے کا منہ 

پنوکیو Pinocchio کی کہانی تو کئی قارئین نے پڑھی ہوگی ، پنوکیو کے کردار کی خاص بات یہ تھی کہ وہ جب بھی جھوٹ بولتا تھا تو اس کی ناک لمبی ہونا شروع ہو جاتی تھی جس سے وہ پکڑا جاتا تھا۔
ماہرین کا کہناہےکہ جس طرح بڑے سے بڑا ماہر مجرم اپنے پیچھے کوئی ایسی نشانی چھوڑ جاتا ہے جو اس تک پہنچنے میں مدد دیتی ہے اسی طرح ہر جھوٹے سے بھی کوئی ایسی حرکت ضرور سرزد ہوجاتی ہے جس سے شک کا دروازہ کھل جاتا ہے۔ماہرین کا کہناہے کسی شخص کی حرکات و سکنات کی بنا پر آسانی سے یہ تعین کیا جاسکتا ہے کہ وہ سچ بول رہاہے یا جھوٹ۔ جھوٹا شخص آنکھ ملاکر بات کرنے سے کتراتا ہے۔ جھوٹ بولنے والا غیر ارادی طور پر اپنے چہرے، گردن یا منہ پر ہاتھ پھیرتا رہتا ہے اور ناک یا کان کو کھجاتا نظر آتا ہے۔
عموما! چھوٹی عمر کے بچے یا ٹین ایجرز جھوٹ بولتے وقت منہ چھپانے کی کوشش کرتے ہیں۔ بچے عموماً پورا منہ چھپاتے ہیں، ٹین ایجرز آدھا منہ اور چہرہ چھپاتے ہیں اور بڑی عمر کے افراد ہونٹوں اور ناک کے درمیان انگلی رکھتے ہیں ۔
کینیڈا کی برٹش کولمبیا یونیورسٹی کے ماہر ڈاکٹر لین برنکے (Leanne Ten Brinke)کہتے ہیں کہ آپ صرف مسکراہٹ کا انداز دیکھ کر ہی یہ قیاس کرسکتے ہیں کہ آپ کا مخاطب سچ بول رہا ہے یا سچ کو چھپا رہا ہے کیونکہ انسانی جذبات جھوٹ کاساتھ نہیں دیتے۔ اگر کوئی شخص اپنی گفتگو میں مسرت، دکھ یا محبت کا اظہار کررہاہو اور وہ اپنے اظہار میں سچا نہ ہوتو اس کی مسکراہٹ میں چہرے کے سارے اعصاب ساتھ نہیں دیتے ایسے وقت میں اس شخص کے چہرے پر تاثرات تاخیر سے ظاہر ہوں گے اور اچانک غائب ہوجائیں گے۔ جب کہ نیچرل مسکراہٹ میں پورا چہرا مسکراتا ہے، سچے جذبات زبانی اظہار سے پہلے ہی چہرے پر آجاتے ہیں اور اور مصنوئی مسکراہٹ جتنی جلدی چہرے پہ سجائی جاتی ہے اتنی ہی جلدی غائب ہو جاتی ہے۔ اصل مسکراہٹ دیر تک قائم رہتی ہے۔

جھوٹ بولنے والے کئی افراد اپنی باتوں کا یقین دلانے اور نارمل نظر آنے کے لیے مسکراہٹ کا سہارا لیتے ہیں۔ ڈاکٹر برنکے کہتے ہیں کہ حقیقی مسکراہٹ میں چہرے کے سارے اعصاب حصہ لیتے ہیں اوردیکھنے والے کو پورا چہرہ کھلا ہوا سا دکھائی دیتا ہے۔ سچی مسکراہٹ دیر تک قائم رہتی ہے اور آہستہ آہستہ تحلیل ہوتی ہے۔ جب کہ زبردستی کی مسکراہٹ صرف ہونٹوں اور اس کے آس پاس کے اعصاب تک محدود رہتی ہے۔ منصوعی مسکراہٹ کے دوران گال اور آنکھوں کی بھوئیں اپنی نارمل حالت میں رہتی ہیں۔

Real or Fake Smile
حقیقی اور مصنوعی مسکراہٹ 

جب کوئی مسکرائے، تو اس کے لب تو دھوکا دے سکتے ہیں، لیکن آنکھیں کبھی نہیں دیتیں۔ حقیقی مسکراہٹ آنکھوں تک جاپہنچتی ہے اور اس کے اردگرد جھریاں بنالیتی ہیں۔ لوگ اپنی حقیقی سوچ اور احساسات کو چھپانے کے لیے بھی مسکراتے ہیں،اس لیے جب بھی کوئی آپ کے سامنے مسکرائے، تو دیکھیں کہ اس کی آنکھوں کے کناروں پر جھریاں ہیں یا نہیں؟ اگر ایسا نہیں ،تو جان لیں کہ اس کی مسکراہٹ کچھ چھپا رہی ہے۔

Three Type of Smiles
تین قسم کی مسکراہٹیں 

مسکراہٹ انسانی زندگی میں اظہار کے اُن طریقوں میں سے ایک ہے جن کا سب سے زیادہ استعمال ہوتا ہے۔ تاہم کبھی کبھار اس کا خفیہ کوڈ کھولنا مشکل ہو جاتا ہے۔ برطانوی اخبار ڈیلی میل کے مطابق ایک ریسرچ میں یہ بات سامنے آئی ہے کہ مسکراہٹ بنیادی طور پر تین طرح کی ہوتی ہے اور ہر مسکراہٹ کا اپنا عضلاتی امتزاج ہوتا ہے۔

یونیورسٹی آف وِسکونسن میڈیسن میں نفسیات کی پروفیسر پاؤلا نیڈنٹال Paula Niedenthal کہتی ہیں کہ ‘‘سکراہٹوں کے بیچ امتیاز کرنے کے لیے سائنس دان حقیقی اور غیر حقیقی مسکراہٹ پر توجہ مرکوز کرتے ہیں’’۔
اس سلسلے میں لوگوں میں یہ خیال پھیلا ہوا ہے کہ صرف خوشی کی حالت میں سامنے آنے والی مسکراہٹ ہی حقیقی ہوتی ہے ، ایسا سمجھنا چہرے کے اتنے اہم اظہار کو سمجھنے کے لیے ہماری سوچ کو محدود کر دیتا ہے۔
یہ بات سب جانتے ہیں کہ مسکراہٹ کی ذمہدار رخسار کی بڑی ہڈی ہوتی ہے۔ اس کام میں گالوں کے نیچے موجود عضلات اپنا کردار ادا کرتے ہیں جو انسانی مُنہ کے دونوں کونوں کو کھینچتے ہیں۔ شکل بگاڑنے، منہ بنانے میں 43مسلز کو محنت کرنا پڑتی ہے جبکہ مسکراتے وقت صرف 17مسلز کو کام کرنا پڑتاہے۔
سائنس دان اس نتیجے پر پہنچے ہیں کہ مسکراہٹ تین قسم کی ہوتی ہے۔ انعامی ، الحاقی اور غلبے والی ۔
انعامیReward مسکراہٹ غالبا سب سے زیادہ بدیہی ہوتی ہے۔ یہ وہ قسم ہے جس کا استعمال ہم بچے کے ساتھ اُس وقت کرتے ہیں جب وہ ہماری مرضی کے کام کرتا ہے۔ یہ مسکراہٹ رخسار کے عضلات کی متوازن اُٹھان ، بھنوؤں کے اوپر جانے اور ہونٹ کے ذرا سے کھنچاؤ سے سامنے آتی ہے۔

الحاقی Affiliativeمسکراہٹ انسان کی جانب سے درگزر یا ملاپ اور الحاق کا اظہار کرتی ہے۔ محققین کے مطابق اس مسکراہٹ سے یہ پیغام بھی دیا جا سکتا ہے کہ آپ سامنے والے کے لیے کسی قسم کا خطرہ نہیں ہیں۔ مسکراہٹ کی اس قسم میں بھی منُہ کی متوازن اٹھان استعمال ہوتی ہے تاہم ہونٹ پر دباؤ کے ساتھ اور اس حالت میں دانت بھی نظر نہیں آتے۔
تیسری قسم کی مسکراہٹ یعنی غلبے والی dominanceمسکراہٹ کا استعمال معاشرتی حیثیت کے اظہار کے لیے ہوتا ہے۔ واضح طور پر یہ غیر متوازن مسکراہٹ ہوتی ہے جس سے عدم احترام کی عکاسی ہوتی ہے۔ اس کے دوران بھنوؤیں اور گال دونوں اوپر کو چڑھتے ہیں۔

مسکراہٹ

امریکا کی کنساس یونیورسٹی کی 2012 کی تحقیق کے مطابق مسکراہٹ سے ذہنی تناؤ میں کمی آتی ہے جس کی وجہ دل کی دھڑکن کی رفتار میں کمی آنا ہوتی ہے اور یہ عمل ہمارے ذہن پر سوار تناؤ کو کم کرنے میں مددگار ہوتا ہے، اس طرح مشکل حالات میں خود کو تناؤ سے محفوظ رکھ کر چیلنجز کا سامنا کرنا آسان ہوجاتا ہے۔
دماغ منفی چیزوں کو زیادہ شدت سے محسوس کرتا ہے تاہم مسکرانے کی عادت ہمارے ذہن کو زیادہ مثبت اور پر امید رہنے میں مدد فراہم کرتی ہے۔ مسکراہٹ، چاہے آپ خوشی محسوس نہ بھی کررہے ہوں، تب بھی مزاج یا موڈ پر خوشگوار اثرات مرتب کرتی ہے۔
ڈارون نے تو 1872ءمیں ہی کہہ دیا تھا کہ چہرے کے تاثرات میں تبدیلی جذباتی تناؤ کو تبدیل کردیتے ہیں۔ اب سوئیڈن کی اپسلا یونیورسٹی کی تازہ تحقیق میں اس بات کی تصدیق کرتے ہوئے بتایا گیا ہے کہ مصنوعی مسکراہٹ نہ صرف مزاج پر اثرانداز ہوتی ہے بلکہ اسے خوش گوار بھی بنادیتی ہے۔ اب چاہے کتنا بھی غصہ یا مشکل حالات ہوں اور ہم واقعی خوشی محسوس نہ کررہا ہو تب بھی مسکراہٹ کے ذریعے اپنے مزاج کو بہتر بنانا آپ کے اپنے ہاتھ میں ہے۔

(جاری ہے)

اِقْرَاء

از: خواجہ شمس الدین عظیمی

اللہ تعالیٰ نے علم اور حکمت کو اپنی نعمت بتایا اور اس نعمت کی تکمیل سرور کائنات، حضرت محمد علیہالصلوۃ والسلام پر کی ہے۔ آپﷺ کے ذریعے کتاب و حکمت کی یہ نعمت عالمین میں تقسیم ہورہی ہے۔

قرآن پاک کی ابتدائی آیات غار حرا میں نازل ہوئیں، فرستادہ حق، حضرت جبرائیلؑ آپﷺ کے پاس حاضر ہوئے۔ حضرت جبرائیلؑ نے آپﷺ سےفرمایا پڑھیے!

آپﷺ نے جواب میں فرمایا کہ میں پڑھا ہوا نہیں ہوں۔ اس پر حضرت جبرائیلؑ نے آپؐ کو سینہ سے لگایا اور دوبارہ کہا پڑھیے! آپﷺ نے دوبارہ فرمایا کہ میں پڑھا ہوا نہیں ہوں۔ اس طرح یہ مکالمہ اور عمل تین مرتبہ دہرایا گیا اور پھر سیدنا حضور علیہ الصلوۃ والسلام نے ابتدائی آیات پڑھیں۔

اللہ زمین اور آسمان کا نور ہے۔ فرشتے اللہ تعالیٰ کی نورانی مخلوق ہیں اور حضرت جبرائیلؑ فرشتوں میں افضل و مقرب ترین گروہ کے سردار ہیں۔ 

آیات مبارکہ پر غور و فکر سے معلوم ہوتا ہے کہ کائنات کی تخلیق سے متعلق آیات کا علم اللہ کے نور پر مشتمل ہے جو اللہ.تعالیٰ کی طرف سے آپﷺ کومنتقل کیا گیا۔

اقرا باسم ربک الذی خلق

پڑھیے رب کے نام سے جس نے تخلیق کیا۔

خلق الانسان من علق

انسان کو پیدا کیا کھنکھناتی مٹی سے۔

اقرا و ربک الاکرم

پڑھیے اپنے رب کے نام سے جو بڑا کرم والا ہے۔

الذی علم بالقلم

جس نے علم سکھایا قلم سے۔

علم الانسان مالم یعلم

انسان کو علم سکھایا جو وہ نہیں جانتا تھا۔

غور کرنے سے معلوم ہوتا ہے کہ اللہ تعالیٰ نے قرآن پاک کی ابتدائی آیات میں تخلیق کا علم بیان فرمایا اور آخری آیات میں دین اور اپنی نعمت کی تکمیل کا بیان کیا ہے۔   ابتدائی آیات میں تخلیق کے دو مراحل یا رخ علیحدہ علیحدہ بیان کیے گئے ہیں۔ پہلے مرحلے میں علم القلم کے تحت ارواح کی اولین تخلیق کا ذکر ہے۔ اس میں تمام انواع شامل ہیں۔ تخلیق کا یہ مرحلہ وسائل کے بغیر وجود میں آیا۔ دوسرے مرحلہ میں انسان کے لیے ایک میڈیم ‘‘علق’’ کا بیان کیا گیا ہے۔ علق عنصری وجود ہے جو روح انسانی کے لباس کی حیثیت رکھتا ہے۔

تخلیق کائنات سے ذات کے اندر موجود لاشمار پوشیدہ صفات کا مظاہرہ ہوا۔ ان صفات کا سب سے زیادہ علم صرف انسان کو سکھایا گیا ہے۔ معرفت اور حقیقت جاننے کی صلاحیت انسان کو عطا کی گئی ہے اور اسی شرف کی بناء پر وہ دیگر مخلوقات سے افضل ہے۔

اللہ تعالیٰ کی ذات کی طرح اللہ کی صفات کا علم بھی لامحدود ہے۔ کسی مخلوق میں یہ صلاحیت نہیں کہ وہ اپنے وہم، گمان، خیال، ادراک، وجدان یا علم میں اللہ تعالیٰ کی ذات یا کسی صفت کا احاطہ کرسکے۔ اللہ تعالیٰ کی ان صفات کا  محض جزوی علم انسان کو عطا کیا گیا ہے جو کائنات سے متعلق ہیں۔ اللہ تعالیٰ کا عطا کردہ یہ قلیل علم بھی انسان کے لیے لامحدود وسعترکھتاہے۔

اللہ تعالیٰ عالم الغیب والشہادۃ ہیں۔ ذات باری تعالیٰ نے اس کائنات کو امروخلق کے تحت تخلیق کیا ہے۔ غیب کے علوم میں علم القلم، علم الکتاب یا علم الاسماء اور عالم امر کے قوانین و فارمولے شامل ہیں جبکہ عالم شہادت میں عناصر کے علوم کار فرما ہیں۔ صفات یا نور کے تنزل سے روشنی، رنگ اور عناصر بنتے ہیں۔

قرآن پاک میں تخلیق کے دونوں رُخ تفصیل سے بیان کیے گئے ہیں۔

مادہ بھی اللہ کی تخلیق اور علم الٰہی ہے جو  قلم، لوح، امر کے زون سے گزر کر عناصر کا رنگ و روپ اختیار کرلیتا ہے۔

پہلے مرحلے میں علم القلم کے تحت کن فیکون ہوا اور ارواح تخلیق ہوئیں۔

 دوسرے مرحلے میں الست بربکم کہہ کر اللہ تعالیٰ نے ارواح کو اپنی صفات کا مشاہدہ اورتعارف کرایا۔

تیسرے مرحلے میں احسن تقویم کے تحت ان صفات کا علم انسان کو سکھایا گیا۔

 چوتھے مرحلے میں جب انسان عالم دنیا یا اسفل السافلین میں پیدا ہوتا ہے تو کائناتی شعور سے پست ترمادی شعور میں داخل ہوجاتا ہے۔ اس طرح تخلیق…. کئی مراحل سے  گزرتی ہوئی عالم دنیا کے مادی شعور میں داخل ہوجاتی ہے۔

اجتماعی شعور کے مقابلہ میں انسان انفرادی شعور میں اتنا محدود ہو جاتا ہے کہ روز ازل کیا گیا عہد، مشاہدہ اور علم الاسماء کے تحت نیا بت و خلافت کا منصب اور علم پس پردہ چلا جاتا ہے اور انسان زمان و مکان کا پابند اور وسائل کا محتاج بن جاتا ہے۔

انسان کا مادی شعور اتنا محدود ہے کہ وہ مختلف اوقات میں مظاہر یعنی آسمان، سورج، چاند، آگ، پتھر حتیٰ کہ حیوانات کو بھی اپنا معبود تسلیم کرلیتا ہے۔ جبکہ فطرت کی آفاقی نشانیاں انسان کی عقل و شعور کو مادہ کے پس پردہ موجود ایک کائناتی حقیقت یعنی روح کے شعور و حواس کی آگاہی بخشتی ہیں ….

صاحب امر کی حیثیت سے انسان مخلوق پر حکمران ہے، انسان کو اللہ نے خلیفتہ الارض  بنایاہے۔

اللہ تعالیٰ نے قرآن پاک میں انبیاء کرام ؑکے معجزات و واقعات پر غور و فکر کی دعوت دی ہے۔ جس سے عالم شہادت اور عالم غیب کی تفہیم ملتی ہے۔

اللہ کی طرف سے ایک نور اور ایک روشن کتاب  تمہارے پاس آچکی ہے۔

ہم نے ایک کتاب اتاری تاکہ لوگوں کو ظلمات سے نور کی طرف لے جائیں۔

حضرت محمد رسول اللہ ﷺ نے تمام تر تکالیف کو بیش بہا قربانیوں کے ساتھ برداشت کیا۔ یہ آپﷺ کا اعجاز و کمال ہے کہ آپﷺ نے قرآن پاک میں موجود علم نوع انسانی تک پہنچایا۔ اللہ تعالیٰ نے قرآن پاک کی حفاظت کا وعدہ کر رکھا ہے اور قرآن کا سمجھنا بہت آسان کردیا ہے۔ اقراء! کے ذریعے اللہ کے محبوبﷺ نے نوع انسانی کو محدود و مقید اور مجبور  و پابند شعور سے نجات دلا کر توحید پر جمع فرمایا۔ انسان کا تعلق براہ راست اللہ سے جوڑ دیا ، انسان کو بتایا گیا اور یاددہانی کروائی گئی کہ :

v….اللہ نے ہر چیز کا احاطہ کیا ہوا ہے۔

v….تم جہاں کہیں بھی ہو اللہ تمہارے ساتھہے۔

v….اللہ تو تمہارے اندر ہے تم دیکھتے کیوں نہیں۔

v….اللہ تو تمہاری رگ جان سے زیادہقریبہے۔

زیر تفکر علم دو حصوں پر مشتمل ہے۔ ایک علم شریعت یا قال اور دوسرا علم معرفت یا حال کہلاتا ہے۔ دونوں علوم کا منبع قرآن پاک ہے جبکہ دونوں کا مقصد اللہ سے براہ.راست ربط قائم کرنا ہے۔ شریعت سے جسم ، لباس، جگہ کی کیفیات…. سمت، رکعت اور اوقات کے تعین…. نیت، تکبیر، قیام، رکوع، سجدہ، تلاوت، تسبیحات، درود شریف، دعا اور سلام کا علم اور دیگر قوانین ملتے ہیں جبکہ علم معرفت میں مرتبہ احسان کے ذریعے بندہ عبادت کے دوران اپنی رگ جان سے قریب ، اللہ کے سامنے حاضری کا مشاہدہ کرتا ہے یا اس کا دھیان و گمان کرتا ہے۔

v….جو کوئی بھی اس کی راہ میں کوشش اور جدو جہد کرے گا اللہ اسے اپنا راستہ دکھا دے گا۔

v….بندہ فرائض کے ساتھ نوافل سے اس کا ربط اور قرب چاہتا ہے تو پھر وہ بندہ کو اپنا بنا لیتا ہے اور اپنے بندہ سے محبت کرتا ہے۔ اگر بندہ اسے پکارے تو وہ جواب دے اور بندہ کچھ مانگے تو وہ اسے عنایت کرے۔ پھر!

اللہ اس کی سماعت بن جاتا ہے جس سے وہسنتاہے۔

اس کی بصارت بن جاتا ہے جس سے وہدیکھتاہے۔

اس کی زبان بن جاتا ہے جس سے وہ بولتا ہے

اس کے ہاتھ بن جاتا ہے جن سے وہ پکڑتا ہے

علم اور مشاہدہ مومن کی صفت ہے جبکہ مسلمان ہونا اور مومن ہونا الگ الگ بات ہے۔

کم علم یہ کہہ دیتے ہیں کہ وہ مومن بن گئے ہیں حالانکہ ایمان تو ان کے قلوب میں داخل نہیں ہوا ہے اور یہ تو فقط مسلمان ہوئے ہیں۔

اللہ تعالیٰ نے انبیاء کرام کو خصوصی طور پر کتاب و حکمت عطا کی ہے اور یہی علم انبیاء کا ترکہ یا ورثہ ہوتا ہے۔ رب العالمین نے اپنے محبوب، سردار الانبیاء حضرت محمد مصطفیٰﷺ پر دین کی تکمیل فرمائی اور اپنی تمام نعمتیں عطا کیں۔

سیدنا حضور علیہ الصلوۃ والسلام کو اتنا زیادہ علم عطا کیا گیا کہ آپ کی امت کا ایک عالم بنی اسرائیل کے نبی کےبرابر  قرار پایا ہے۔

سیدنا حضور علیہ الصلوۃ والسلام کا ورثہ آپﷺ کا علم ہے۔ شریعت اور معرفت آپؐ کے علم کےدورُخ ہیں۔

سلسلہ عظیمیہ کے زیر اہتمام 
گلبرگ ٹاؤن کراچی میں محفلِ میلاد سے 
ڈاکٹر وقار یوسف عظیمی کا خطاب

سلسلہ عظیمیہ کراچی ٹاؤن گلبرگ کے زیر اہتمام محفل میلاد منعقد ہوئی۔
اس محفلِ میلاد میں ڈاکٹر وقار یوسف عظیمی نے اولاد کی تربیت میں والدین کے کردار، خواتین کے حقوق اور اصلاح معاشرہ کے موضوعات پر خطاب کیا۔ ڈاکٹر وقار یوسف عظیی نے کہا کہ والد کو اپنے بچوں کے لیے معلم کا کردار بھی ادا کرنا چاہیے۔
محفلِ میلاد میں حضرت محمد رسول اللہ ﷺ کی خدمت میں ہدیہ نعت اور صلوٰۃ و سلام پیش کیا گیا۔
آخر میں محترمہ غزالہ شریف اور محترمہ ریحانہ نے دعا کروائی۔

(رپورٹ۔ ضیاء الدین)