عیاش باپ نے بیٹے اور حاملہ بہو کو گھر سے نکال دیا

دولت مند، متکبر اور عیاش باپ نے بیٹے اور حاملہ بہو کو گھر سے نکال دیا !

سوال:  

میرے والد ایک بہت بڑے بزنس مین ہیں شہر میں ان کی کئی جائیدادیں اور بڑا کاروبار ہے۔ ہم چاروں بھائی والد کے بزنس میں ہی ان کا ہاتھ بٹاتے تھے۔ میرے باقی تین بھائیوں کو ہمارے والد سے کبھی کوئی شکایت نہیں رہی، وہ اکثر اوقات والد کی تعریفوں کے پل باندھتے اور ان کی چاپلوسی میں مصروف رہتے ہیں جس کے بدلے میں والد کی نوازشات ان پر برستی رہتی ہیں۔ کبھی نئی گاڑی کی صورت میں تو کبھی بیرون ملک ہالی ڈیز کی صورت میں۔ میں البتہ شروع ہی سے اپنی والدہ سے قریب رہا ہوں، میں نے والد کے رویے پر اپنی والدہ کی آنکھوں میں آنسو ناصرف دیکھے بلکہ محسوس بھی کیے ہیں۔
میرے والد دولت مند ہونے کے ساتھ ساتھ ایک بہت ہی متکبر اور عیاش طبیعت کے مالک ہیں۔ کئی خواتین سے ان کے تعلقات ہیں، دو تین ایسی خواتین کو تو انہوں نے اپنے آفس میں جاب بھی دے رکھی ہے۔
میری والدہ ان حرکتوں پر بہت کڑہتی رہتی ہیں لیکن میرے والد نے انہیں ہمیشہ بہت دباکررکھا۔
میرے تینوں بھائی اور کئی رشتہ دار والد کی ان حرکات سے واقف ہیں، لیکن کوئی انہیں ٹوکتا تک نہیں۔ واحد میں ایک شخص ہوں جو ناصرف اپنے والد سے نالاں تھا بلکہ گاہے بگاہے اپنی والدہ کی حمایت میں ان کے سامنے بولتا بھی تھا۔ شاید اسی لیے میرے والد اپنے دیگر بیٹوں کی نسبت مجھے پسند نہیں کرتے تھے۔
کچھ دن پہلے تو حد ہی ہوگئی۔ آدھی رات کے وقت والد صاحب شراب کے نشے میں چور ایک خاتون کے ساتھ شہر کے ایک معروف ہوٹل کی لابی میں بیٹھے کبھی گلوکار کے ساتھ بول ملا کر گا رہے تھے کبھی اس عورت کو ساتھ لے کر رقص کر رہے تھے۔ وہاں موجود ہمارے ایک رشتہ دار نے اس واقعے کی وڈیو بنا کر مجھے اور کئی رشتہداروں کو بھیج دی۔
اگلے روز میں نے اپنے والد سے اس واقعے پر شدید احتجاج کیا۔ میری اس جرات پر میرے والد مجھ پر سخت غصہ ہوئے۔ انہوں نے مجھ سے کہا کہ ان کا جو جی چاہے گا کریں گے جس عورت سے وہ جس طرح چاہیں گے ملتے رہیں گے۔ انہوں نے مجھ سے پوچھا کہ تم ہوتے کون ہو مجھے روکنے ٹوکنے والے….؟ میں نے انہیں بتایا کہ سارے خاندان میں آپ کا مذاق بن رہا ہے۔ سوشل سرکل میں بھی لوگ آپ کے بارے میں باتیں کرتے ہوئے برے برے کلمات کہتے ہیں۔
یہ بات سن کر انہوں نے کہا کہ انہیں اپنے خاندان میں یا ملنے جلنے والوں میں سے کسی کی کوئی پروا نہیں ہے۔ وہ اپنی زندگی جیسے چاہیں گے جئیں گے۔
اس ساری بات چیت کے دوران میرے بھائی تو کچھ نہ بولے لیکن میری دو بھابھیاں مسلسل میرے والد کی حمایت میں بولتی رہیں۔
میری والدہ صاحبہ ایک طرف بیٹھی خاموشی سے آنسو بہا رہی تھیں۔ جب والد صاحب کا غصہ زیادہ بڑھا تو میری والدہ نے میری حمایت میں بولتے ہوئے کہا کہ اپنی حرکتوں پر غور کرنے کے بجائے بیٹے کو کیوں ڈانٹ رہے ہیں….؟
بس یہ بات میرے والد کے لیے ناقابل برداشت ہوگئی۔ انہوں نے مجھے حکم دیا کہ ایک ہفتے کے اندر اندر میں ان کے گھر سے کہیں اور شفٹ ہوجاؤں۔ اپنے تین چار ارب روپے کے بزنس میں سے ڈیڑھ کروڑ انہوں نے مجھے دیے کہ اس رقم سے میں اپنا کاروبار کروں۔
محترم وقار عظیمی صاحب….! جس وقت یہ سب باتیں ہو رہی تھیں اس وقت میری بیوی پانچ ماہ کی حاملہ تھی۔ اپنے والد کی طرف سے گھر سے نکل جانے کے حکم پر میرے تینوں بھائی اور بھابھیوں میں سے کوئی بھی میری حمایتمیںنہبولا۔
میں اپنی پریگنینٹ وائف اور دو بچوں کے ساتھ اب دو کمروں کے ایک فلیٹ میں کرایہ دار ہوں۔ والد نے دیگر بھائیوں اور ان سے مالی مفاد حاصل کرنے والے دیگر رشتہ داروں کو مجھ سے رابطہ رکھنے کے لیے سختی سے منع کررکھا ہے۔
ڈاکٹر صاحب ….! اب آپ ہی بتائیے کہ کیا میں نے کوئی غلط کام کیا تھا جس کی مجھے یہ سزا مل رہی ہے﷠﷠﷠﷠…؟ برائے مہربانی آپ دعا کیجیے کہ میرے والد راہ راست پر آجائیں اور حق کو پہچان لیں۔ کیونکہ اب اُس گھر میں ایسا کوئی نہیں جو انہیں سچ بات سمجھائے۔